رواية الوجه الاخر للرحمة الفصل الثاني والاربعون42 بقلم عبير ادريس
ذيج التحن مثل الطفل تابت بعد متريدك
______________________
شهم : اش ولا كلمة بوجهج للبيت كبل
يحجي وعيونه تجدح نار ، آخذت عباتي ورحت وراه للبيت دخلنا سد الباب والتفتلي ...
شهم : رايحة تستأذنين من حماج حتى تروحين للسوك ؟ لو حابة تاخذين رأيه ؟ يقبل لا ؟ يسمحلج تطلعين ؟ يمكن ما يقبل ؟
سمر : هذا اللي فهمته من حجينا ؟
شهم : مالج شغل شنو فهمت غبية
سمر : ليش تتجاوز ؟
شهم : شدعواج هيج لازكة بيه بعد شوية تفوتين بحضنه ادبسز رعنة..
سمر : شهم كافي اتهامات باطلة ترى مللتني من عيشتي والله العظيم مليت دكافي ..هي هاي هم غيرة ؟
تقرب مني لزم فكي عصره بقوة وهمس من بين اسنانه
شهم : بعدج ما شفتي شي من غيرتي
سمر : الداتسويه تسميه غيرة ؟ ترى هذا شك مرضي ، شهم انت مريض وضروري تتعالج ..
ما سمعني شنو كلت عيونه ناطه ليبرا من العصبية
شهم : الظاهر عادي عندج تحضنين حماج مو؟
سمر : انت مو طبيعي والله العظيم بيك شي
شهم : اي مو طبيعي يلة فسريلي الصار كبل شوية فسري قربكم من بعض واسراركم صايرة كلها سوا
سمر : ولك وين شفتني حاضنته راح تخلبني وبعدين يا اسرار هاي التحجي عنها ؟
شهم : لج تمشين عدل ولا تبقين تستفزيني بتصرفاتج الخبيثة ، ترى اموتج
سمر : ليش شنو سويت حتى تصرفاتي خبيثة ؟
شهم : اعرفج ليش هيج داتسوين حتى تستفزيني وتشوفيني شكد رايدج مو ؟ عاجبتج هاي اللعبة تركضين واركض وراج ، تثيرين غيرتي واتخبل عليج
سمر : واذا هيج تريدني تكوم تهين وتشك لو تقرتب مني بمودة وحب وتصلح الما يتصلح..
شهم : انتِ خليتي بيها مودة ؟ لج راح تموتيني ، إيدي ماجاي تاخذ شغل ولا كادر اعيش حياتي طبيعي كل تفكيري ليش تغيرت وشنو اللي صار وياها وغيرها علية راح اموت كافي تعانديني ارحميني حرام عليج
سمر : انت فكر وراجع نفسك راح تلكى الجواب وبعدين اذا تحجي بالحلال والحرام خلينا نروح لشخص مختص نحجيله قصتنا وهو يقرر على منو يوكع الحرام...
شهم : سمر سمر انه تعبان لا تضغطين على اعصابي أكثر من هيج ترة تخبلت..
سمر : يا اخي عوفني اعيش حياتي وانت عيش حياتك ، انسى وحدة اسمها سمر جانت تحبك انساها لأن ماتت تعرف شنو ماتت
شهم : يا أخي ؟ شو هاي جديدة ؟
سمر : لا اله إلا الله عاف كل الجملة وجلب بهاي
شهم : وبعدين شنو عوفني اعيش حياتي ؟ شلون تريدين تعيشيها بلة ؟ و وية منو ؟
سمر : طلكني واخلص من همي انه علة على گلبك عليش مجلب بية عجيب
شهم : لازم لاكية البديل وتريديني اطلكج مو ؟ والله تحلمين..
اعصابي تلفت كمت اصرخ بقوة فقدت ...
سمر : كافي كافي شك ، كرهتني بكل الزلم كمت اشوفهم وحوش والفضل الك ، وبعدين تعال واذا فكرت اعيش حياتي شنو يعني ؟ شنو افرق عنك ها شنو ؟ ماعندي مشاعر ما عندي احتياجات ماعندي .....
قاطعني وحط إيده على حلكي ، عاينت لعيونه مدمعه ووجهها احتقن صار احمر دم...
شهم : انه موجود وألبي لج كل احتياجاتج
حجاها وبلع ريكه ، هزيت راسي بلا وبعدت إيده عني ، احس حتى حنيته توجعني...
سمر : لا مو هاي مشكلتي ، أنت داتحاول تصلح شي فات و مستحيل يتصلح
رفع عيونه عليها وصاح
شهم : هو شنو المستحيل ؟ خبصتيني بيه
ضحكت ضحكة باهتة ، أقرب للبجي ...
سمر : ترجعلي نفسي القديمة ؟ ترجعلي الأمان اللي راح مني بسببك ؟ تكدر تضمنلي أنام ليلة كاملة بدون ما أفز من كابوس مزعج ، تكدر ؟ شهم جاوبني تكدر ؟
ساد الهدوء بينا ، جان يعرف جواب هالسؤال مو بكلمة ولا بوعد ، تنهد ببطء مشى كعد على القنفة مدنكة راسه ، بعدها طلع باكيت الجكاير ورث وحدة آخذ منها نفس وزفرة بعدها رفع عينه علية وكال
شهم : لا ما أكدر أرجع الماضي
رفعت عيوني عليه وهزيت راسي مستحسفة عمري الضيعته وياه والفرص اللي هدرها ...
شهم : بس أكدر أبقى يمج الى أن يصير الماضي مجرد ذكرى مو سجن تعيشين بداخله وصدكيني ناوي اعوضج على كل المر اللي عشتيه بسببي...
سمر : شهم انه تعبت والله تعبت
شهم : أدري
سمر : لا ما تدري ولا راح تدري باللي عشته وحسيته بسببك
شهم : وانه ما رايد اجبرج تنسين بيوم وليلة وترجعين مثل أول بس اللي اطلبه منج نفتح صفحة جديدة وتشوفين التغيير بنفسج ..
سمر : ما اريد
شهم : شنو اللي تريديه لعد ؟
سمر : تبتعد وتخليني ارجعلك من وحدي اذا حبيت
شهم : سمر ما اتحمل ، راح اتخبل ، كلما ابتعد عنج انتِ تزيدين جفا واحسج بعيدة عني بعد السما عن الأرض ...
سمر : انت اللي بعدتني عنك اذا تتذكر وانت اللي منعتني منك ومنعت اي قرب واي تواصل بينا
شهم :هسه شنو تريدين مني ؟
سمر : تبطل شك وتبتعد عني وتخليني اعيش حياتي..
شهم : والله مو كادر وبعدين شلون تمنعين نفسج عني هذا مو حرام ويعتبر هجر لو انه غلطان ؟
سمر : هسه يلة عرفت الهجر حرام ؟ اتذكر مرة تركتني ست اشهر اشو ما فكرت اذا حرام او لا بس هذه جانت رغبتك
شهم : تغيرتي هواي وقسيتي علية مداعرفج والله مصدوم بيج
سمر : من تصرفاتك ، شخصيتي هاي نتاج افعالك ، واذا جان عندك ذرة احساس عوفني بحالي ولا تطلب مني شي بالأكراه لأن صدكني ما طايقتك ابد..
جان يسمع مني ويغلي عيونه مدمعة وحرك نفسه بالجكاير حرك وحدة ورا الثانية يورثها ، هز راسه وطلع من البيت بدون اي كلمة ، انهديت هد ، أحس جسمي تبند من الألم ، كمت آخذت نقالي اتصلت بفارس ...
سمر : الو هلو فارس شلونك ؟
فارس : يا هلا بسمور الحمدلله انتِ شلونج ؟
سمر : الحمدلله زينة ، وين انت ؟
فارس : لو تدرين وين
سمر : طالع ؟
فارس : لا واكف كبال بيت اهلج الاصليين الخوش أوادم
سمر : وشعندك هناك ؟
فارس : جايب هدية لمناسك وخايفة تطلع تاخذها
سمر : فارس ارجع للبيت لا يشوفوك اخواني وتصيرلك مشكلة
فارس : ليش انتو عندكم زلم يخوفون ؟ أول مرة ادري
سمر : فارس ارجع احسن وانه باجر أوصللها هديتك
فارس : ولج اريد اشوفها طكت روحي حتى للجامعة مداتروح خايف صايرلها شي وتخاف تحجيلي ..
سمر : لا مابيها شي خابرتها البارحة بيها فلاونزة وماكدرت تداوم
فارس : يمة بنيتي سلامتها
سمر : فارس من صدك تحبها لو مجرد سوالف ؟
فارس : سمور اموت عليها ولج اتنفسها انتِ شداتحجين من عقلج تسأليني هيج سؤال؟
سمر : هاي انت وين واصل بالحب ؟ واكع ومحد مسمي عليك
فارس : واصل مرحلة هسه غير ابوج الله يهديه ويصالح ابوي ويزوجونا مو والله مليت شوكت افرح بعد صارت عمري ٣٤ سنة ...
سمر : الله كريم اذا من نصيبك تصيرلك واذا ....
قاطعني وصاح بالضحك
فارس : واذا مو من نصيبي هم الي
سمر : ان شاءالله ، المهم عيني اتصلت عليك اريد تجيبلي فطومة عفتها ابيتكم فدوة لعينك ولو ازاحمك..
فارس : خليها تبات قبل شوية لكيتها نايمة يم جدتي
سمر : صدك نامت ؟
فارس : اي والله وباجر سبت عطلة نامي ارتاحي وعود تعالي آخذيها لو تريكي هنا ويانا وتغدوا وتعشوا تدرين فاتحين بيتنا سبيل ....
سمر : عابتلك اي والله همزين مو ابيتك جايين جان شسويت
فارس : احطج بعيوني غير انتِ اخت الغالية وخالة جهالي اشيلج برمش عيني واداريج شعندي غيرج ياهروش گلبي...
سمر : لالا واصل مرحلة من صدك
فارس : اخ اخ ولج ميت ميت
سمر : روح موت بعيد عني اكوم اشوف الباب دا تندك
فارس : اكيد الشهم اجاج
سمر : لا قبل شوية طلع
فارس : احتمال رجع ، يلة تصبحين على خير
سمر : لا تبقى كبال بيتهم ارجع تمام ؟
فارس : صار صار بس روحي
سمر : يلة باي
فارس : متطورين يابه كله باي وتمام والفد خلصنا منها
حجاها وضحك
سمر : من تعاشر ناس لهجتهم تختلف عن لهجتك لا ارادي تاخذ منهم وياخذون منك..
فارس : صرتي بغدادية عمي بس يلوكلج ليش لا
سمر : ديلة روح وعينك على فطومة خاف تكعد بالليل تريد مي شي كوملها مو تتعاجز..
فارس : صار واوديها الحمام هم
سمر : لا هي تعرف
ضحك وكال
فارس : يلة ام فطوم توكلي وافتحي الباب هسه اللي اجاج صار طرشي تخلل ..
سمر : اي والله
سديته منه وطلعت فتحت الباب لكيت ريحانة تريد تنزل من سمعت صوت الباب التفتت ...
ريحانة : آسفة اذا نايمة وكعدتج
سمر : لا كاعدة بس جنت احجي تليفون
ريحانة : اروح اذا عندج شي ؟
سمر : لا تعالي اصلاً ضايجة وحدي
دخلت كعدت على القنفة وكالت
ريحانة : ضل بالي عليج وصعدت اشوفج وين ما وين
سمر : ليش حبيبتي خايفة علية ؟
ريحانة : اول شي ما شفتج بعد ورا ما تغدينا وثاني شي طلعت اتمشى شوية طبعاً بموافقة يوسف كال حدج لمكان معين هو حدده يكول اهله ما يوصلون لهنا ...
سمر : زين
ريحانة : وبرجعتي شفت زوجج نازل من البيت واكف برا بس عصبي نار ، دك موبايله باوع للشاشة وركعه بالكاع كسره ومشى ، خفت يكون متعارك وياج واجيت اشوفج..
سمر : اي تعاركنا ونزل
ريحانة : شبيه ليش هيج يتصرف وياج ؟ ما يمل ؟
سمر : يريد يرجع علاقتنا عباله بهالسهولة
ريحانة : ليش ما تنطيه فرصة ؟ يمكن يكون صادق وياج..
سمر : اسرج بسر وما يطلع ابد
ريحانة : ما احجي تدرين بية
سمر : اعرف بس من باب الاحتياط اوصيج ما تحجين لأحد
ريحانة : اسمعج احجي وما راح يطلع هذا السر لأحد..
سمر : البنية اللي حجيتلج عنها كلتلج زوجها مسوي اثبات نسب لابنه تتذكرين ،
ريحانة : اي
سمر : هاي القصة الي
ريحانة : عرفت ومبين الج بس ما حبيت احرجج أكثر كلت اذا حبيتي تحجيلي ...
سمر : وهذا أكبر الاسباب اللي مخليني كارهته وما أريد انطيه فرصة عاشرة مدري شكد ..
ريحانة : ليش ما واجهتيه وطلبتي الطلاق منه مو احسن يمكن ترتاحين اذا تواجهتوا وسمعتي منه..
سمر : مو بهاي السهولة ينحل الموضوع ما يوكف عند المواجهة وبس..
ريحانة : شيصير خل يصير المهم تاخذين حقج وحق بنتج وتخلصين منه للأبد اذا جان مسويها فعلاً اما اذا عنده سببه مقنع او السالفة تطلع كذب ومتلفقة علية ساعتها تسامحيه وترجعون سوية
سمر : اول شي انه ما اعرف اذا جان كلام رفل صحيح او تكذب علية ، ثاني شي اذا حجيت وطلع الموضوع جذب وشهم واجهني بيها ونكرت راح يشك بية أكثر واكون طلعت علية سالفة ما ينلبس عليها ثوب والعار يصيبني ويصيب بنتي طول العمر وسمعتنا تتلطخ على لسان اليسوى والما يسوى ...
ريحانة : يعني قصدج تحتاجين دليل قوي حتى تواجهيه بيه
سمر : بالضبط
ريحانة : ومن وين راح تحصلين على الدليل ؟
سمر : ما اعرف والله ما اعرف وهذا اللي مدوخني أكثر
ريحانة : احجي وياها مرة ثانية وسجلي كلامها هيج يلة تحصلين على الدليل
سمر : والله فكرة تعالي ابوسج
ضحكت وحضنتني
ريحانة : من ورا قسور تعلمت هواي أمور ولو ما جنت اسجل له كل شي واصور اثباتات عليه جان اني ميتة من زمان وامي هم
سمر : يعني عندج ادلة عليه ؟
ريحانة : اي هواية ما تشوفيه عافني عايشة لحد الآن
سمر : وشنو منتظرة ليش ما تنطيها ليوسف يتصرف ؟
ريحانة : المشكلة مو عندي
سمر : وينهن ؟
ريحانة : دفنتهن بحديقة البيت حطيت الهارد بكيس نايلون ودفنته بالتراب
سمر: وشلون راح تجيبيهن شيوديج لهناك
ريحانة : ما ادري وما اريد احجي ليوسف حتى ما يروح ويجازف بنفسه اعرف يسويها مجرد ما يسمع
سمر : اذا هيج لا تحجين افضل اتركيها للأيام ان شاءالله رب العالمين يظهر حقج كامل
ريحانة : ان شاءالله
سمر : ما تحجيلي شنو صار وياج ؟
ريحانة :ما مستعدة احجي لأن راح اتعب ويوسف كال لا تتذكرين اي شي من الماضي ولا تفكرين بيه علمود جلسات العلاج تمشي بصورة صحيحة...
سمر : اي لا تحجين احسن
ريحانة : اللي يسمع قصصنا يمكن ما يصدك اني زوجي دكتور جراح شاطر بمجاله وانتِ زوجج هم دكتور ، يشوفونا من برا حياتنا بيرفكت بس هم ما يدرون بالضيم اللي عايشيه
سمر : تصدكين ريحانة ، شهم قبل لا يدخل كلية الطب ماكو احن منه ولا شفت ارجل منه جان يخاف على مشاعري اذا مرت نسمة هوى ضوجتني ينزعج بس من دخل كلية
وحب ضحى هواي تغير ، ما اعرف شاف نفسه علية لو الشهادة غرته وخلته يشوفني بالعين الصغيرة ، احجيلج موقف من اللي عشته وياه ...
ريحانة : اي احجيلي عندي فضول اعرف قصتج
سمر : بعد زواجنا بشهر تقريباً هو ما تقربلي ابد وهنا عاداتنا وتقاليدنا يسألون الرجال ها تم الزواج وين دليل عذريتها ؟ بوقتها شهم ما شوفهم شي واصلاً راح الموضوع بالكلينكس يعني مو فوطة تثبت دليل عذريتي الهم ، اتوقع هذا الشي اللي خله رفل تجي وتحجيلي هذا الكلام ..
ريحانة : بس ليش عاداتكم هيج ترى هاي اسمها خصوصية ؟
سمر : هاي من زمن جدتي وقبلها ماشي قانون علينا لازم يشوفون اثبات عذرية البنية يلة يباركون الزواج واتوقع بسبب هذا الشي طلع كلام علية وشهم صدكه
ريحانة : وليش هيج سوا ؟ ليش ما شوفهم دليل عذريتج اذا هاي من عاداتكم
سمر : اتوقع حسب معرفتي بيه يعتبرها خصوصية بس ما تفيد هنا
ريحانة : يعني اذا يوسف تزوج ممكن يطلبون منه نفس الشي ؟
حجيتها بخوف بسبب اللي صار ما اتوقع يوسف يفكر بية بعد ، اكيد عقليته مثل اهله وهذا الشي راح يكون حاجز جبير بين علاقتنا ولازم اعود نفسي واتأقلم بدونه..
سمر : اكيد حتى من يوسف يطلبون نفس الشي قابل يختلف
ريحانة : وهو يسمحلهم ؟
سمر : مو بكيفه ولا بمزاجه اكو الأكبر منه يأمره واذا خالفهم تصيرله هواي مشاكل وقيل وقال فيضطر يسكتهم افضل ...
ريحانة : الله يكون بعون زوجته
حجيتها وغصيت بكلامي
سمر : اكلتي لفاتج ؟
ريحانة : اي يوسف كال سمرة دزتهن ، يحبج هواي تدرين؟
سمر : يوسف ماكو منه اثنين راقي ومثقف بشكل
ريحانة : الله يحفظه لشبابه اللي سواه وياية مستحيل احد يسويه بالدنيا كلها يمكن لو جان ابوية عايش لو عندي اخوان هم ما سووا الي سواه
سمر : يوسف عنده شهامة وي الكل من صغره صاحب غيرة ونخوة وحتى شهم بس ما أعرف شنو اللي غيره
ريحانة : حسب كلامج عنه اكيد اكو سبب غيره عليج
سمر : والله ما ادري بعد
ريحانة : سمر سؤال
سمر : تفضلي
ريحانة : يعني ولا مرة صار بينكم شي مميز
سمر : مثل شنو ؟
ريحانة : يعني مثلاً ليلة مستحيل تنسيها ؟
ابتسمت بقهر ودنكت راسي اتذكرت هذيج الليلة اللي هاني بيها وكرهني بيه
سمر : اي اكو ومستحيل انساها
ريحانة : يعني اكو شي مميز
سمر : لا مو مميز ، ورا ما عقدنا عقدنا الثاني بعد انفصال دام اربع لو خمس سنوات امه صعدتلي وكالت حضري نفسج زوجج راح يصعد ، وجنت متلهفة إله بطريقة عجيبة ، جنت اتمنى لمسة منه اتمنى نظرة حب ، كلمة يطيب خاطري بيها ، هو اول ما صعد شافني تدرين شنو سوا ؟
ريحانة : اكيد جانت لهفته عليج أكبر
سمر : اي اسمعي عاينلي و كال عليش متحضرة وشنو تريدين مني
شهكت ريحانة وحطت إيديها على حلكها وفتحت عيونها على وسعهن ، انه كملت كلامي
سمر : وصارت العلاقة من كمل سألني شنو جان سؤالج قبل شوية اني ضحكت بخجل وكلتله ليش رغم كل اللي سويته بية بعدني أريدك ، جنت اقصد بهاي اللهفة اللي عاشها وياي قبل شوية ، تدرين شنو جاوبني
ريحانة : شنو ؟
سمر : كال تريدين تعرفين ليش كلتله اي كال لأن بدون كرامة ، حجاها وآحذ ملابسه وطلع بدون حتى ما يباوعلي لو يفكر شنو ممكن صار بية بسبب كلامه هذا او شنو عشت وراها ...
ريحانة : لا لا مستحيل ولا تكولين نطيتيه فرصة ثانية ؟ حتى اموتج
سمر : اي نطيته بيوم عيد زواجنا لبست وتمكيجت وتحضرتله جنت قافلة الباب حتى ارتب نفسي واسوي شعري يلة اخليه يشوفني ، اجى كسر الباب علية ليش قافلتها من فتحتها ابتسمت دفرها وفات يدور على النقال عباله عندي واحد وضامته وقافلة الباب لأن فاتحة اتصال وي واحد واخونه
ريحانة : تحجين صدك ؟
سمر : للأسف صدك
ريحانة : لج بابا اتطلكي منه واخلصي
سمر : وبنتي شنو ذنبها متعلقة بأبوها هواي وانه منو دايملي ماعندي سند يا ريحانة ، عمي قادر ومرته كبار بالعمر واهلي ما عليهم اعتماد وامي اصلاً ما تحبني ولا تحن علية ، صارلي شكد ما شايفتها بالجذب ما فكرت تسأل عني لو تتصل وتدري صار عندي نقال واحجي وية مناسك منو عندي يا ريحانة اذا تطلكت ...
ريحانة : اخوانج شنو دورهم ؟ ما يجيبولج حقج منه ؟
سمر : اخوي الجبير من اتطلكت رجعت يمهم ما رضوا اعيش يم عمي قادر ، تعاجز من لكمتي ولكمة بنتي راح جابلي صديقه وتعالي غصب عنج ترضين بيه وانه اعرف جماعته شنو اكيد مثله تافهين وبدون رجولة ، تخيلي واعده بشغل ما اعرف بتعيين ومقابل هذا الشي كايله ازوجك اختي بدون حاضر ولا غايب ولا حتى حفلة هيج آخذني تخيلي
ريحانة : اي وشنو صار بعدين يعني اقصد شلون تطلكتي منه ورجعتي لشهم ؟
سمر : دزيت اختي عليه وكلتلها احجي كل شي لشهم حتى يخلصني منه واجوي للبيت آخذوني وطلكوني بنفس اليوم ولهذا السبب رجعت لشهم لأن اعتبره مصدر امان وحيد الي ولبنتي بوسط هاي الذئاب العايشه بينها
ريحانة : شغلتج تعبانة وميؤوس منها الصراحة
سمر : ليش اكولج ما اكدر احجي ولا اواجهه لأن اعرف السد البيني وبين نذالتهم هو شهم ، ومجرد ما شال إيده عني اصير فريسة سهلة الهم ويلعبون بية طوبة وما اعيش هاي الحرية البسيطة اللي هسه عايشتها ننحرم انه وبنتي من كل شي..
ريحانة : تعرفين لو اني بمكانج شنو اسوي ؟
سمر : شنو تسوين
ريحانة : اخلص دراستي بدون ما احد يدري وآخذ شهادتي واعتمد على نفسي وبراتبي اعيش اني وبنتي وراها اذا اشتدت اخلي يوسف يساعدني
سمر : وشلون يساعدني ؟
ريحانة : حتى لو تشترين بيت صغير بغير مكان او تأجرين المهم تخلصين منهم
سمر : الحجي سهل وهاي ابغداد ممكن تصير والبنية تعيش وحدها بس هنا صعب توصل للقتل ، وبالنسبة للدوام لازم انطيه خبر ، وحدتنا اذا راحت للسوك الف عين عليها عاد تطب وتطلع كل يوم الكل راح يعرف ويمانع واولهم شهم
ريحانة : هسه انتِ ادرسي ومنا للأمتحانات يحلها رب العالمين ما تعرفين الظروف شنو تصير يمكن تكون من جانبج ...
سمر : وشلون ابدي ومنو يدرسني ؟ حيرة
ريحانة : لا ماكو حيرة استغليني والله اني شاطرة واتذكر كل شي واقريج ومنها نلتهي شوية ، انتِ تدرسين وتسوين شي زين لنفسج واني استمر بعلاجي وية يوسف ونتساعد ونخلص من الأحنا بيه ..
سمر : ما ادري شكلج بس شوكت نبدي ؟
ريحانة : بالنسبة الي بلشت بأول جلسة وانتِ بلشي من باجر وصي يوسف يجبيلج ملازم وكتب بدون ما احد يدري بالموضوع واني ادرسج ..
سمر : احجي وياه باجر واوصيه ما ينطي خبر لشهم يين ما اخلص قرايتي ...
ريحانة : عفية عليج واعتمدي على نفسج ولا تكولين ماعندي سند ربنا يسخرلج ناس ما تعرفين من وين اجوي وشلون دخلوا حياتج مثل اللي صار وياية ، جنت ضايجة ومأيسة من حياتي بيوم اللي دخلت للمصح كلت هنا نهايتي واموت ومحد يعرف بية بس سبحان الله جان يوسف موجود حتى يخلصني من هذا السجن وسوا المستحيل وطلعني منه..
سمر : ونعم بالله صدك قصتج غريبة
ريحانة : جنتي تتوقعين بيوم تتعرفين على وحدة مو من قريتكم وغريبة وتصير صديقتج وتتساعدون انتِ وياها وحدة تنهض بالثانية ؟
سمر : لا والله ما جنت اتوقع هذا الشي بصراحة
ريحانة : شفتي مقادير رب العالمين ، وللعلم رجعت اصلي البارحة وارتاحيت شوية يعني احس اكو تطور بحالتي وحبيت افرحج..
سمر : الله يثبتج ياعمري والف الحمد لله استمري وانتِ بطلة تكدرين تتجاوزين هاي المرحلة رغم صعوبتها..
ريحانة : آمين ، يلة اعوفج ترتاحين وانزل آخذ علاجي وانام لأن ممنوعة من السهر وما أريد يرجع يوسف للبيت وما يلكاني نايمة ويضوج..
سمر : اي عمري روحي ارتاحي
ريحانة : تصبحين على خير
سمر : تلاكين الخير
ثاني يوم رحت ليوسف وحجيتله ، بالبداية ضحك بعدها سألني...
يوسف : شعجب نويتي هسه ؟
سمر : اريد شي التهي بيه
يوسف : زين تسوين ، اليوم العصر يكونن يمج
سمر : مشكور ابو يعقوب يوم اللي نشوفك شايل ابنك بين إيديك ونفرح بيك ...
يوسف : الله يسمع منج بس ادعيلي ييجيني من الاحبها
سمر : منو سعيدة الحظ ؟
حجيتها وغمزتله ، تنهد جر نفس وكال
يوسف : بعدني ما مصادفها
سمر : متأكد ؟ على سمور هذا الحجي ؟
يوسف : انتِ لا تحرجيني كل شوية رجائاً
سمر : يلة مصيري اعرف ويني عنك قابل ؟
يوسف : يلة طيري من وجهي عندنا جلسة علاج
سمر : اي عيني عالجها وعينك عليها داريها زين
يوسف : ولج انتِ فد وحدة حقيرة ماكو تكج..
سمر : ليش لان اوصيك على البنية المريضة الجبتها حتى بس تعالجها وهذا هو ...
يوسف : سمر ملازم وكتب ماكو ورايح احجيله لشهم يلة روحي
سمر : لالا اتشاقى وياك سكتت...
دخل للبيت وهي رجعت لبيتها ، شاف ريحانة كاعدة باوعلها وكال
يوسف : صباح الخير تريكتي ؟
ريحانة : صباح النور اي تريكنا اني وسمر وقبل شوية راحت
يوسف : اي صادفتها بالباب ، بالعافية على الريوك
ريحانة : الله يعافيك
يوسف : آخذتي علاجج ؟
ريحانة : اي آخذته
يوسف : مستعدة للجلسة الثانية ؟
ريحانة : اي
يوسف : شلون تحبين تشربين كهوتج ؟
ريحانة : وسط
يوسف : تمام
راح للمطبخ سوى كهوة ورجع جايب فنجانين واحد قدمه الية والثانية بإيده ، احتسيت اول رشفة من الكوب وهو هم ، باوعلي بطرف عينه مبتسم
وعيونه تحجي اكثر منه
يوسف : طيبة ؟
ريحانة : اي
يوسف : يعني اعرف اسوي ؟
ريحانة : اذا طبخك طيب كهوتك شلون اكيد طيبة ..
حجيتها وضحكت
يوسف : اي طبخي طيب خصوصاً التبسي
ريحانة : عبالك ام بيت مسويته خو الجاي الجنت اشربه من إيدك بالمصح وقت الريوك خيال ، عبالك أول مرة اشرب جاي بحياتي..
يوسف : لا تبالغين هاي لأن صارلج فترة ما شاربته وسويتلج شفتيه طيب ...
ريحانة : يمكن بس انت الظاهر ما تحب المديح
يوسف : ولا اطيقه بس اذا منج عادي اتقبله
ريحانة : لعد عاشت ايدك الكهوة كلش طيبة
ضحك وكال..
يوسف : وإيدج يلة نبدي ؟
ريحانة : نبدي
آخذ الكوب من إيدي وكام وداهم للمطبخ ورجع كعد كبالي
يوسف : ريحانة انه وعدت نفسي اي شي اعرفه عن حالتج واي تطور احجيه الج طبعاً هذا الشي مو من عادتي وية باقي المرضى ، جنت اشخص واعالج كبل بس انتِ تختلفين
ريحانة : ليش يعني اختلف ؟
هو ارتبك من سؤالي ، دنك راسه بعدها باوعلي وكال
يوسف : تختلفين لأن انتِ اصلاً دكتورة واي شي احجيه راح تفتهميه غير عن الاشخاص البسطاء ، لو اكعد احجيلهم ساعات ما راح يفتهمون علية لهذا جنت اعالجهم كبل بدون ما افوت وياهم بتفاصيل حالتهم..
ريحانة : اكيد حقك ..
يوسف : المهم ، من خلصنا الجلسة الأولى اكتشفت شغلة جديدة
ريحانة : وهي ؟
يوسف : جاييج بالحجي ، من طلعت كتبت كل ملاحظة وكل حركة وكلمة صدرت منج ، من قارنتها بالتقارير السابقة العندي ، طلع تشخيصي مو غلط وانما نكدر نسميه اشتباه
ريحانة : جيد وشنو الاشتباه ؟
يوسف : الاشتباه ! الأول جان اضطراب بالقشرة البصرية ، بس بعد الجلسة الأولى اتصلت بصديق عندي بالخارج هم دكتور نفسي شاطر جداً وحجيتله عن حالتج وطلب مني ادزله التقارير ودزيتهن هن والفحوصات اللي سويتها الج داخل المصح ، طلب مني انطيه يوم كامل يدرس الحالة ويرجعلي خبر وبالفعل اتصل بية ثاني يوم وتناقشنا بالحالة وطبعاً عرض التقارير على أكثر من دكتور والنتيجة جانت وحدة مثل ما توقعت..
ريحانة : وهي ؟
يوسف : وهي ؟ اسمعي اتضح اكو اضطراب وظيفي بمعالجة الدماغ للمعلومات البصرية اللي صارت بعد الصدمة اللي تعرضتيلها انتِ ..
ريحانة : ما فهمت عليك شلون يعني ؟
يوسف : من شفت نتائج الفحوصات أول مرة وتصرفاتج رجحت الاحتمال الأقرب يكون اضراب بالقشرة البصرية ، لكن بعد الجلسة الأولى لاحظت انتِ داتشوفين البيئة بشكل طبيعي وكل شي تمام عندج بس المشكلة جانت تظهر على شكل صور مرتبطة بالصدمة وهذا اللي غير تشخيصي للحالة وحتى اتأكد أكثر وامشي بالعلاج صح دزيت تقاريرج للخارج والجواب اكدلي هذا الشي ..
ريحانة : وشنو الفرق بتشخيصك الأول عن الثاني ؟
يوسف : الخلل بالقشرة البصرية على الأغلب يكون وياه خلل عضوي وانتِ ما عندج ، فتظهر اضطرابات بإدراك الصور أو تشوهات بصرية ، لكن ليس بالضرورة تكون بسبب صدمة نفسية وحدها ، اما هسه اللي انتِ بيه هو اضطراب ما بعد الصدمة ، مع استرجاعات بصرية حية ، يعني تجيج اوقات تشوفين جزء من الحدث اللي صار وياج بالماضي من جديد او هلوسات بصرية اللي هي مرتبطة باضطراب وظيفي مثلاً تشوفين أشخاص ما موجودين او اشياء تتخيليها داتصر بس هي بالحقيقة ماكو ... اتمنى فهمتي علية ؟
ريحانة : اي فهمت دكتور
ابتسم وكال..
يوسف : هسه نبدي بالجلسة ؟ مستعدة دكتورة ؟
ريحانة : اي مستعدة..
يوسف : تحبين الكتب ؟
ريحانة : جنت احبها قبل هسه لا
يوسف : قبل ؟ وهسه ؟
ريحانة : يعني اقصد قبل ما عقلي بدا يخوفني أكثر من الناس نفسها
يوسف : مممم جيد ، هسه اللي اريده منج تغمضين عيونج وتتذكرين اكثر شي ما حابة تتذكريه
ريحانة : يوسف ليش ؟ ما اريد اتذكر شي
يوسف : ما نتعالج اذا ما واجهنا مخاوفنا مو هيج اتفقنا بالجلسة السابقة
ريحانة : راح اتعب
يوسف : انه يمج
ريحانة : يعني موقف لو اشخاص لو شنو ؟
يوسف : اكثر شي مأذيج اتذكريه
ريحانة : الجلسة من بدايتها صعبة
يوسف : نبدي من الأصعب حتى نكسر حاجز الخوف ...
ريحانة : هسه شنو اغمض واتذكر ؟
يوسف : اي
غمضت عيوني بهدوء ثواني وبدات انفاسي تتصاعد ، فكي احسه بدأ يرجف ، عكدت حاجبي وتجمدت حركتي منا وبعد ما كمت احس بشي غير الخوف...
خلاها تعيش الخوف بشكل كامل وجان يراقب حركاتها بدقة ويسجل كل ملاحظة جديدة تستحق التسجيل ...تعبت كلش لدرجة وجهها كام يصب عرك...
يوسف : هذا هو افتحي عيونج
رافضة تفتحها كامت ترجف اكثر
يوسف : ريحانة افتحي عيونج كلت
حجاها بصوت عالي حتى تسمعه وتنتبه....
يوسف : ريحانة انه هنا افتحي عيوني
صاحت بصوت عالي
ريحانة : انت شنو تريد مني ؟ عوفني عوفني..
تقرب منها لزمها من إيدها وكال
يوسف : افتحي عينج هذا هو
نترت إيدها بقوة منه وفتحت عيونها اتلفتت منا ومنا وباوعت اتجاه الشباك اتبسمرت بمكانها ولزكت جسمها بالقنفة وصاحت تأشر على المكان ....
ريحانة : اجى شوف مو كلتلك ما اريد اتذكره ، هذاك واكف يضحك علية ما يريدني اتعالج يريد ابقى مريضة ، خلصني منه خلصني الله يخليك يريد يموتني ..
كام وكف كبالها ورجع لزم إيديها باردة ترتعش من الخوف ، حاول يهدأها بدات تصرخ ....
ريحانة : دايتقرب شوفه راح يوصل يمك ، يوسف وخر عنه بيده مسدس يريد يموتك..
حجتها واحتمت بيه دخلت لحضنه ترجف ولازمته بقوة ، رفع راسه ليفوك آخذ نفس ورجع يحجي وياها بهمس...
يوسف : ريحانة حبيبي ماكو غيرنا انه وياج بالغرفة
ريحانة : اكو اكو يريد يموتك
رجع يهمس قريب من إذنها
يوسف : والله ياحبيبي محد يكدر يأذيني
ريحانة : بس آذاك قبل واني خايفة عليك
حجتها وجلبت بركبته بقوة ...
يوسف : افتحي عيونج وراح ينتهي كل شي ...
ريحانة : ما اريد افتح لان بعده واكف يباوعلي
مسد على شعرها يطمنها وهي بعدها حاضنته
يوسف : أدري اللي داتحسيه يخوفج بس
قاطعته تصرخ
ريحانة : لا تكلي ماكو أحد اني شفته بعده واكف هناذ
همس بهدوء يم أذنها
يوسف : ما راح أكذب إحساسج بس
قاطعته بخوف
ريحانة : لا تعوفني الله عليك
يوسف : باقي يمج ما رايح اللي اريده منج تسمعين صوتي وبس لا تسمعين لأفكارج..
ريحانة : دايقترب سامعة خطواته بأذني
جاوبها بصوت ثابت
يوسف : وانه هنا يمج ما اخليه يأذيج افتهمي هذا الشي
تسارعت انفاسها وزادت دكات گلبها لدرجة جان يحس بيها، حاول يهدأها همس بأذنها كلمات خلاها تهدأ وبدأ جسمها يرتخي أكثر ...همس بحنية
يوسف : افتحي عيونج هسه..
فتحت عيونها وجهه جان قريب منها لدرجة تلاقت نظراتهم ، يباوعلها بحب وهي تباوعله بخوف ، بلع ريكه وهمس
يوسف : خلصنا
ابتعدت عنه وهمست
ريحانة : آسفة
يوسف : على ؟
حجاها وكعد كبالها ، مدنكة راسها وهمست
ريحانة : ضوجتك مني
يوسف : أبد
ريحانة : يوسف اني اعرف الشي الدايصير مو حقيقي بس صدكني دا اعيشه كأنما حقيقة ما اعرف شلون افهمك بس تعبت ...
هز راسه وكال
يوسف : اعرف هذا أكثر شي متعبج
ريحانة : اي بس ليش يعني مجرد طلبت مني اتذكر اكثر شي مخوفني شفته كبالي واكف...
يوسف : لأن عقلج يبعث صورة وگلبج يصدكها قبل ما تلحكين تفكرين اذا جان هذا الشي حقيقي او لا وهذا سبب النوبة ، افكارج اكبر اعدائج يا ريحانة..
ريحانة : يعني راح ابقى هيج كلما اتذكره اشوفه كبالي ؟
يوسف : لو تبقين هيج جان ماطلبت منج تتذكريه هذا جزء من العلاج مواجهة مخاوفنا مثل ما كلتلج..
ريحانة : انت شلون خليتني اشوفه ؟ يعني اقصد قبل شوية جنا نشرب كهوتنا ونسولف شلون هيج بدقايق اختلف كل شي وضعت من جديد وتخربطت وضعيتي..
التفت الها مبتسم وكال
يوسف : لأن انه أشوف نفس الأشياء اللي انتِ تشوفيها
باوعتله باهتة
ريحانة : يعني شلون ؟
يوسف : حفظتج ، صارلنا فترة مو قليلة سوية وأعرف شنو تشوفين وبشنو تحسين ، وأشوف كل الصور اللي انتِ تشوفيها وكمت ألاحظ هاي الصور داتصير أقصر من القبلها..
ريحانة : شلون يعني اقصر ؟
يوسف : النوبات اللي جانت تجيج تخليج أكثر عنف من هسه ، جنتي تضربينا وتتهجمين علينا اما اليوم ما سويتي شي غير حضنتيني
حجاها وارتسمت ابتسامة على وجهه ، هي خجلت ودنكت راسها همست
ريحانة : اي يمكن
يوسف : ولاحظت كمتي ما تهربين منها مثل الأول يعني فتحتي عيونج أكثر من مرة رغم خوفج من اللي شفتيه
ريحانة : يمكن كلامك صحيح
يوسف : صحيح والدليل ، قبل أسابيع ، من تجيج الصور كدام عينج جنتي تركضين وتصرخين بصوت عالي وتحاولين تسدين الباب عليج وما تقبلين تشوفيني حتى ، وبالنهاية تتعبين واضطر اضربج إبرة مهدأ يلة تنامين صح ؟
ريحانة : اي صحيح
يوسف : اليوم ما صار هذا الشي مجرد نوبة بسيطة وعدت سلامات بدون اي أضرار
حجاها وضحك
ريحانة : كافي تفشلني يوسف
يوسف : ليش افشلج ؟
ريحانة : لو ضاربتك ولا هذا اللي صار معقولة الإنسان يوصل لهيج لحظة ضعف ويفشل نفسه بيده
يوسف : بس هذا ما اعتبره ضعف بالعكس تقدم بحالتج
حجاها وضحك ، تنرفزت منه
ريحانة : هسه انت ليش تضحك اريد افتهم ؟ شنو اللي بكلامي يضحك؟
يوسف : فرحان يعني اقصد بتقدم الحالة
ريحانة : ها
راح لغرفته ورجع جايب صورة كبيرة وبيها اطار خشب حطها كبالي وكال
يوسف : شنو تشوفين بيها ؟
باوعتلها وهمست
ريحانة : صورة
يوسف : لعائلة ؟
ريحانة : اي
يوسف : شفتي أحد غريب وياهم ؟ يعني اقصد انتِ تعرفيه مو غريب ، لأن اكيد ما تعرفين كل عائلتي
ريحانة : لا ماكو أحد اعرفه
يوسف : جيد
استغربت من سؤاله
ريحانة : ليش سألتني ؟
يوسف : دماغج كدر يفرق بين الواقع وبين الصورة اللي خوفتج قبل شوية وهذا تقدم اعتبره مهم بحالتج
ردت احجي اندكت الباب فاتت سمر جايبة صينية فواكه وعصير طبيعي هي مسويته ...
سمر : اكيد محتاجين تاكلون شي وتشربون عصير فرش وسمورة قامت بالواجب
هو ضحك وكام آخذها منها وكعدوا اني رحت للحمام غسلت وجهي وباوعت لنفسي بالمرايا صفنت عليها معقولة ييجي يوم واتعالج ؟ يارب يارب اخلص من الاني بيه ، برجعتي سمعتهم يحجون بية هو مدنك ضحك وكال
يوسف : بنت الكلب يخبل حضنها
من سمعته هيج كال رجعت للحمام وجسمي يرجف ، ما اعرف ليش ضجت منه حسيته استغل حالتي وقررت بيني وبين نفسي لو شنو يصير ما راح اكرر اللي صار قبل شوية ولو جان خارج عن ارادتي بس حيل ضجت منه ، سمعت سمر تصيحني طلعت من الحمام ورحت آخذت العصير منها واستأذنت منهم ارجع لغرفتي ارتاح ، ما مانعوا بالعكس رحبوا بالفكرة ، رحت مددت واحس جسمي صخن من الموقف رغم ما متذكرة من الشعور شي بس هو الحقير متذكر كل شي صار ، من نظراته واسلوبه بالكلام ، ضليت اتكلب بفراشي الى ان نمت ...
سمر : يوسف ترى كلام كميل صحيح ليش ما تعقد عليها ويصير كل شي بينكم بالحلال اليوم احضان باجر الله اعلم شنو يصير بينكم
يوسف : ليش تخليني اندم لأن حجيتلج
سمر : يوسف البنية ضعيفة وانت شاب مرتب وانيق وسوالفك حلوة وكلها حنية وتتعامل بشهامة ورجولة وياها انه واثقة من هالشي بس تضمن نفسك ؟
يوسف : شنو قصدج تضمن نفسك ؟
سمر : بنية وابيتك وحلوة وفوكاها تحبها لا عبالك ما ادري بيك مبين عليك وكل شي واضح ، لابد يصير بينكم شي بعدين تتندم عليه
يوسف : انه مو بهالسوء سمر ، لدرجة استغل مريضتي واسوي وياها المحرمات ، كلتلج تفاجأت والله من اللي صار ، تخيلي عشرة دقايق وهي حاضنتني ودافنة راسها بركبتي شتريديني اسوي ؟ ما حسيتها عشر دقايق حسيتها سنة
سمر : وحتى لا تتكرر لو تعقد عليها وانه متأكدة راح توافق ماعندها مشكلة لو بالجلسات الجاية اجي يمكم مو ﻷن اشك بيك لا بس حتى تحضني الي
حجيتها وضحكت
يوسف : الله كريم اشوف شلون احلها ، شوكت تروحين للسوك تشترين ملابس لمهر طيبة ؟
سمر : هاليومين لأن ما ضل وقت
يوسف : انه آخذكم انتِ وريحانة
سمر : يعني قبلت تجي للمهر
يوسف : مو شرط تجي بس اريدها تطلع من البيت وتشتري احتياجاتها ومنها تنفه عن نفسها وعادي تشتري فستان للمهر اذا حبت تحضر ماعندي مانع بس عينج عليها ما اوصيج بعد
سمر : هاهي يمي
ورا يومين آخذنا يوسف للسوك ، بالبداية ما قبلت تشرتي شي عاينتلها بنص المحل وخزرتها
سمر : شنو تبقين لازكة بكم قطعة جايبتها وياج ؟
ريحانة : وشنو اسوي بيهن ؟ وين رايحة قابل ؟
سمر : مثل ما اسمع كلامج تسمعين كلامي وما تناقشيني
ريحانة : والله عيب من يوسف اصرف فلوسه
سمر : اصرفي اصرفي المن رايدتهن ؟
كملت الجملة بگلبي ، اول وتالي تعبه كله الج ..
اشترت ملابس بيت وجبرتها تشتري ملابس طلعة وانه اشتريت ملابس بيت على ذوقها ، ذوقها حلو المفننة بعمري ما مشترية هيج ملابس اقوى شي عندي اخيط دشاديش ، وراها آخذنا لمحل يبيع ويأجر فساتين ، اختارتلي فستان على ذوقها لونه اسود ومفتوح من يم الصدر وبيه تفاصيل كلش حلوة عاينتلها وكلت ..
سمر : غير شهم يكص راسي اذا شافني لابسته ؟
ريحانة : هي مو حفلة بنات ؟ لو الولد يبقى بالعادة ؟
سمر : لا يلبسها النيشان ويطلع
ريحانة : واخوانها يحضرون العقد ؟
سمر : لا بس يم الزلم ما يدخلون يمنا
ريحانة : وين راح يشوفج بعد ويحاسبج ، آخذيه هذا احلى شي بالمحل الباقي ما عجبني
قنعتي اشتريه رغم جنت مترددة ، التفتت عليها وهمست
سمر : يلة دورج اشتري
ريحانة : ما راح اجي للمهر شنو اسوي بيه ؟
سمر : انه هم ما احضر ارجع الفستان احسن
ريحانة : سمر لا تسوين هيج عبالك جهال
سمر : تشترين اشتري ما تشترين ارجعه ونظلع
ريحانة: وشنو تلبسين اذا رجعتيه؟
سمر : اي شي من العندي
ريحانة : اللهم طولج ياروح
سحبتها من إيدها وافترينا على الفساتين ، آخذت واحد قصير لونه بنفسجي غامق ومن فوك مستور وردن كاملة بس شفافة ، من كملنا دخل يوسف حاسب وطلعنا
يوسف :محتاجين بعد شي ؟
بهاي الاثناء مر واحد من يم ريحانة ما اعرف شنو سوالها عاطت ركض وراه يوسف صاح عليه ارتبك ..
يوسف : شنو سويتلها احجي ؟
_ ما سويت شي
التفت لريحانة شاف عيونها مدمعة التفت عليه ضربه بوكس على وجهه وكعه بالكاع ....