رواية الوجه الاخر للرحمة الفصل الثالث والاربعون43 بقلم عبير ادريس
المشكلة عيونك هنه هنه
چا وين وديت المحنة ؟
_____________________
سمر : يوسف عوفه الله عليك الناس التمت لا تصير مشكلة
يوسف عاينله وكال
يوسف : مرة ثانية اذا مشيت من يم ناس احترم نفسك ولا تعيدها ، بختك بالبنات اللي وياي ، لو ما هن ما خليت بيك شي صاحي ...
آخذنا ومشينا للسيارة أول ما صعدنا التفت يسألها بضوجة
يوسف : سوالج شي لو بس ذب حجي ؟
نزيتها من رجلها حتى ما تحجيله
ريحانة : لا بس ذبلي حجي
يوسف : متأكدة ؟
ريحانة : اي
يوسف : اخ لو ما انتوا وياي جاي علمته درس طول عمره ما ينساه ...
سمر : يلة خوية تصير المهم مابيها شي
يوسف : خلصتوا كل شي لو بعد عندكم احتياجات ما مشتريها ؟
س
مر : لا خلصنا وحتى لو احتاج هم ما راح اشتري شي
يوسف : ليش بعد عندنا وقت اذا تريدون ننزل واشتروا
سمر : مو على الوقت
يوسف : لعد على شنو ؟
سمر : ﻷن ما خليتني ادفع شي
غمزلي بالمرايا وكال
يوسف : ترديها بالافراح عود ...
سمر : ان شاءالله عيوني بس هم انطيك الفلوس من نرجع
يوسف : سمر ما تسكتين هسه شمسويلكم
سمر : لا ما اقبل وبعدين عندي فلوس تكفيني
يوسف : اعرف عندج بس عيب انه وياكم وانتِ تدفعين
سمر : بس هواي صارن
يوسف : قليل بحقج ام فطومة ولو شنو ما اسويلج ما اجازيج ...
عيوني دمعت تمنيت اسمع هالكلام من شهم بس للأسف ما سامعة منه غير بس الغلط والحجي اللي يسم البدن ، رجعنا للبيت وهو راح بشغلة نزلنا تمشينا نضحك ونسولف انه وياها تصادفنا وي رفل ، ريحانة لزكت جسمها بية تقربت منها وهمست ...
سمر : لا تخافين انه وياج ما تكدر تسوي شي
مشينا من يمها واسمعها تكول
رفل : الله يثخن لبنجن صايرات طبة وطلعة
ما رديت عليها وصلتها للبيت وصعدت فوك حطيت اغراضي بالهول ونزلت لريحانة اركض خفت تفوتلها للبيت لو تسويلها شي ، دخلت وصحت عليها حتى ما تفز ..
سمر : ريحانة
ريحانة : اني هنا تعالي
دخلت لكيتها كاعدة بالاستقبال والعلاليك بالكاع
سمر : شنو تعبتي ؟
ريحانة : لا بس دخت صارلي شكد ما طالعة ومشترية ملابس اذا اكولج سنتين او يمكن أكثر تكولين ابالغ
سمر : شعجب ؟ لعد منو جان يشتريلج احتياجاتج ؟
ابتسمت ودنكت راسها بقهر
ريحانة : سمر اني صارلي أكثر من سنتين شبه محبوسة ومقيدة بكل شي ، وجان كل همي شلون اطلع أمي من السجن واخلص نفسي ...
سمر : ياعيوني سودة على اللي آذاج
ريحانة : الله ينتقم منهم اشد انتقام ويوم اللي اشوفهم متعلكين بحبل المشنقة
سمر : ان شاءالله نهاية كل ظالم هيج يكون مصيره
ريحانة : ان شاءالله ، صدك سمورة سؤال
سمر : كولي
ريحانة : انتِ ليش عشتي عند عمج مو يم اهلج الحقيقين ، مرة سألت يوسف عنج وكال عمي رباها الصراحة استغربت ونسيت اسألج
سمر : وليش استغربتي ؟
ريحانة : يعني كلت شعجب أم تكدر تنطي طفلتها بهيج عمر صغير لوحدة ثانية تربيها واللي عرفته من عمرج اشهر يعني بعدج بالكماط ونطوج لبيت عمج
سمر : شنو جاوبج يوسف من سألتيه؟
ريحانة : كال لأن عمي ومرته ما يخلفون لهذا ابوية نطاهم توأمي اللي هو شهم يربوه وبعدين انتِ
سمر : شهم صحيح نطوه لعمي حتى يربيه بس انه انفرضت فرض عليهم
ريحانة : يعني هم ما جانوا رايدين يربوج مثل شهم؟
سمر : ريحانة الظاهر للناس هيج وخليها هيج بدون ما ننبش بالماضي
ريحانة : لا تكوليلي امج ما جانت رايدتج ؟
سمر : عليج الله لا تفتحين علية جروح ما تشفى بعد
ريحانة : اعتذر
سمر : لا عادي ما صار شي
كمت آخذت الملابس ودخلت للغرفة حتى اعلكهم بالكنتور اجتي وراية وكفت وكالت ...
ريحانة : اني اعلكهم حبيبتي
سمر : لا ماعندي شي
لزمتني من كتفي ودارتني عليها
ريحانة : سمر داتبجين ؟ اني آسفة ما عبالي الموضوع يأذيج لهاي الدرجة اعتذر والله
سحبتني من إيدي وكعدنا على الجرباية ، أريد دموعي توكف ماكو ما ادري شصار بية ، وحسيت أريد احجيلها اللي كاتمتة بگلبي من سنين طويلة واخلص ولو اعرف ما راح يتغير شي بس مجرد فضفضة ويمكن ارتاح وراها ..
سمر : الكل يدري بالقصة اللي حجيتيها الية قبل شوية ، بس الحقيقة محد يدري بيها غيري انه وشهم وعمي قادر وزوجته وامي ...
سحبت نفس اختنكت بعبرتي وكملت
سمر : من كبرت وشفت ظلم أمي وأذيتها يتزداد تساءلت ليش هيج تعاملني من دون أخواني وليش تحبهم أكثر مني ؟ ليش تضوج مني ما جنت اعرف الى ان بيوم من الأيام صار موقف بيني وبينها ورحت لمرت عمي ، امي الثانية اللي ربتني وحجيتلها الصار كالت ..
رحيمة : انه امج مو كافي يعني انه ما تعبت عليج ما كفيتج ما دللت عليش تدورين حنانها ؟
سمر : يمة انتِ احطج على راسي من فوك ولو شنو اسوي ما اجازيج بس أريد اعرف هي ليش ما تحبني ولا حتى تسأل علية يعني انه بعمر ١٥ سنة يلة عرفت هي أمي الحقيقية وجانت أكبر صدمة بحياتي وراها تزوجت وما حضرت زواجي بحجة ما راضية بشهم وما تريده وحبلت وجبت بنتي وهي ماكو من تطلكت تعير بية وتسمعني كلام مثل السم ، زين ليش ؟ شنو فرقي عن مناسك اشو مدللتها دلال
رحيمة : كلنا نعرف مناسك مظلومة يمها فد شنو تسوي البنية لاحول ولا قوة مجبورة بيهم وين تروح؟
سمر : لعد بس سعيد وليث مدللتهم اشو سياراتهم وغرفهم ماشاءالله كلمن عنده غرفته الخاصة وفلوس وعز ليش فد انه ومناسك ظالمتنا وبالاخص انه
رحيمة : هي امج ما تحب خلفة البنات وجبارة من يومها ...
سمر : وابوي شبيه ما يحاجيها تعدل بينا ، مو كافي ما عشت بنصهم ولا حسيت بمحبتهم ولا ربيت وي أخواني ابيت واحد ؟ أريد سبب واحد اقتنع بيه وارتاح احجيلي عمة اذا تعرفين شي وساكتة ...
جرت نفس وتنهدت ..
رحيمة : شلج بالماضي انسيه يايمة
سمر : يوم انه كبرت ومن حقي أعرف كل شي عن حياتي وعن أهلي ، ليش تخلوني عمية عين وگلب ؟ على الأقل بعد ما أفكر بيهم ولا احن عليها ..
سكتت وضلت تعاينلي بحسرة بعدها تقربت مني وكالت..
رحيمة : احجيلج وتوعديني يبقى السر بينا لو شمايصير وياج ما تحجين حرف واحد من الراح تسمعيه مني
سمر : احجي يمة اسمعج بلكت گلبي يبرد ولو شوية وصدكيني ما أحجي لأي أحد...
رحيمة : شوفي يمة ، امج جانت حلوة حيل وزاهيتلها الدنيا وأبوج يموت عليها ، حبلت وجابت ولد فرحت حيل وسلطنت وراها جابت الثاني وكامت تمشي وتحجي انه بطني ما تجيب فد الولد وتتفاخر ...وراها الطفل الثاني مات ورجعت حبلت حتى تعوضه اجيتي انتِ
سمر : زين كملي ...
رحيمة : صارت عندها طلوكة اجت علية وخذيتها للجدة تولدها ، أول ما نزلتي منها سألت ها ولد ؟ الجدة كالتلها لا بنت امج اسود وجهها وكامت تبجي وتصيح ما اريدنها ، كعدت يمها وحاطتج بحضني يمعودة ارضعيها خطية هاي طفلة وتبجي تريد ترضع ، ما قبلت وكالت ابد ما اريدها انتِ آخذيها ، يا عمي الناس تتحسر على الضنى كالت انتِ تتحسرين انه عندي ولد واجيب غيرها فد هالبنية ما اريدها ...
رجعنا وحجيت لأبوج قادر كال الله يهديها ، فد ما رحتي من بالي تعلكتي بگلبي تمنيت انه جبتج مو هي ، مر أول شهر وصارت مشاكل بينها وبين ابوج عبن ما جانت تداريج ، الى ان اجى اليوم الرادت تخلص منج ...
سمر : تخلص مني ؟ شلون ؟
رحيمة :ييوم كعدت الفجر و طلعت للبستان احوشن بالخضرة واسمع صوت طفل يبجي من بعيد مشيت وراه ادور وين يكون هالطفل بهالبرد اعاين امج ماكو فد صوتج طالع واتبع الصوت وصلت لنهاية البستان مال ابوج ابراهيم جان اكو تنور جبير والصوت جاي منه من اتقرب وامدن راسي اشوفج بداخله ، فرفحت روحي عليج ، مديت إيدي وخذيتج للبيت رحت لعمج وحجيتله فلان هيج وهيج صار ، طلعنا بذاك الليل ندورلج على حليب تشربينه كلها جانت معزلة كال ما ارجع اذا ما لكيتلها حليب ، وجان نصل للولاية لكينه محل مفتح واشترينالج حليب وممة وحفاظات ، جانت غالية بوقتها حتى كلتله لعمج نلبسها حظينة ولباس اطفال انه اخيطه الها ما قبل ، رجعنا للبيت تلكانه شهم جان كاعد يدورنا وخايف لأن وحده عايفيه بالبيت ، وسمعنا من نحجي رغم صغير جان فد يفتهم ، عمج كال ما انطيها بعد ولا تكولين البنت عندنا يريد يشوف ابوج شنو يسوي اذا فكدج وهي شنو تكول للناس ..
سمر : طبعاً اسمعها تحجي وما مصدكة عبالك تحجيلي على قصة من فيلم او مسلسل
ريحانة : والله عقلي مدايشيلها شلون ام تسوي هيج بضناها راح اتخبل
سمر : اسمعي الصار
ريحانة : اي احجي صدميني بعد
سمر : ثاني يوم طالعة للتنور ما لكتني كيفت عبالها الجلاب اكلتني لو متت وجاريني لمكان ، المهم طلعت تبجي وتصيح لحكولي بنتي ماهي ماهي التموا عليها عمامي ونسوانهم وطلعوا يدورون للمغرب ماكو اي خبر عني ولا لكوا شي ، بعدين عمي دز عليها واجت للبيت كعدها كباله وكاللها
قادر : اسمعي صالحة ، البنية عندي
صاحت
صالحة : وينها ؟ بايكيها مو ؟ حتى تحركون گلبي بيها عبن ما يصير عندكم ضنى ؟
قادر : لا تفرينها علية وتاخذيني بصوتج العالي
صالحة : شنو بنتي عندك وندور عليها وما جبتها معقولة ما سمعت ؟ اذا ما بايكها شنو تفسرها ؟
قادر : لا ما بايكيها احنا مو حرامية عيب عليج ، البارحة انه شفتج من ذبيتيها بالتنور ورحتي عنها ولا جنها ضناج وبكل عين صلفة جاية تتهميني ؟
صالحة : ماكو منه الحجي انت جذاب
قادر : لا مو جذاب وهاي رحيمة شاهدة وياي على فعلتج واذا انتِ واثقة ما مسوية شي ، وانه بايكها منج امشي نروح نحجي لأخوي ولأهلي ونشوف اذا صدكوني لو يصدكونج
ارتبكت ماعرفت شنو تحجي بعد ضلت ساكتة ...
قادر : اسمعي البنية تبقى عندي وانه اتكفل بتربيتها بشرط تكولين للكل انه راح انطي الجاهلة لقادر يربيها لأن ما عنده ضنى فهمتي ،
صالحة : وانت صدك تريد تربيها ؟
قادر : بنت اخوي بحسبة بنتي ، شلون ما اربيها ؟
صالحة : واذا سألوني عنها شنو اكول ؟ لأن دورنا عليها بكل مكان ما لكيناها ؟
قادر : كولي اجت رحيمة بالليل وخذتها منج تساعدج بيها وانتِ نسيتي من السهر والتعب ما متذكرة شي
صالحة : وابراهيم شلون اقنعه تضل يمكم وتربيها ؟
قادر : هاي ضلت يمج ، تقعنينه احسن ما يعرف بالحقيقة وانه الاحجيله كل شي ..
صالحة : لالا انه اقنعه لا تحجيله شي ...
آخذوني وراحوا لبيت جدي وحجولهم حسب الاتفاق ، بيهم اللي صدك وبيهم اللي حط الملامة على امي رحيمة شلون تاخذني وما ترجعني ﻷمي ثاني يوم الصبح ، وراها عاد ربيت عندهم وعمي اللي سماني سمر ، عمتي تكول وجهج من جماله جنت كل ما اعاينلج اصلي على النبي خاف احسدج وامي اللي جابتني رادت تخلص مني بأي طريقة تخيلي لو عايشة يمها جان شسوت بية وشلون عاملتني !
ريحانة : يمة هاي مو أم اصلاً حرامات تتسمى أم
سمر : هاي جزء بسيط من معاناتي اللي عشتها
ريحانة : وهذا السر بقى بين امج الاصلية وبيت عمج لحد اﻵن ؟
سمر : اي محد يعرف حتى ما اتأذى اذا سمعت او اتعير من أحد وعمي وشهم لحد الآن ما يعرفون بية دريت ودائماً يوصي أمي رحيمة ما تحجي لأحد حتى ما احس بكسرة
ريحانة : زين واختج الثانية شلون تقبلتها ؟
سمر : من جابتها راحلها عمي وهددها اذا سوتلها شي ما يرحمها ويفضحها بين الكل لهذا خافت وما سوتلها شي
ريحانة : يعني معقولة اكو هيج ناس تفكر ؟ والله مدا اصدك
سمر : اي اكو هواي واهلي من الناس يكرهون خلفة البنات وزرعوا هذا الكره بگلوب اخواني ما تشوفيهم ما يحنون علية ولا حتى يسألون عني لو اغيب سنة محد يتفكدني
ريحانة : يعني ابوج واخوانج واختج ما يعرفون بالحقيقة ؟
سمر : لا بس احنا الاربعة نعرف ، حتى شهم ما حاجي لأي أحد
ريحانة : اذا شهم يدري بكل هاي المعاناة اللي عشتيها شلون كدر ياذيج ؟
سمر : هو انه ليش مصدومة بيه ومتفاجأة من تصرفاته ، شهم جان يخاف علية وعلى مشاعري ، تخيلي من جنا نلعب بالشارع جان محاوطني ما يتركني لحظة وحدة بحيث محد يتجرأ يضربني ﻷن يرجعله الضربة أضعاف ويأذيه ، لو يفتح راسه لو يطفيله عينه لهذا الكل جان يتجنبني وحتى من كبرنا ماجان يقبل اي أحد يحاسبني او يحجي وياية وهو اللي خلاني اكمل دراستي اتذكر جان يرجع من الكلية المغرب لأن طريقه طويل وجنت اتلكاه تعال قريني ، بس ياكل لكمة ويكعد يكابلني لحد ما اخلص كل واجباتي يلة يروح ينام ساعات قليلة ويكعد قبل الفجر يقرا ويطلع للدوام ، اخ يا ريحانة اخ هيجتي مواجعي
ريحانة : ياعمري آسفة ماجنت ادري هيج صاير وياج
حجتها وحضنتني بقوة وراها كعدنا بالهول سوينا جاي ورجعت سألتني عن مناسك
ريحانة : ظل بالي يم اختج خطية خاف متعذبة وتخاف تحجي
سمر : لا تخافين عليها تكدر تجيب حقها وامي رحيمة تكول عنها متأذية بس انه ما اصدك مبينة الراحة عليها
ريحانة : اكيد تعرف شي وإلا ليش تكولج ما مرتاحة ؟
سمر : احتمال حتى ما انقهر واقارن بيني وبينها
ريحانة : هاا
ضلينا نسولف وقت بعدها رحت لبيت عمي رجعت فطومة ورجعت لبيتي سويت عشا ودزيت عليها تتعشى يمي ، وبعد ما فتحنا اي موضوع .....
مشى الأسبوع بسرعة ، شهم لا اتصل ولا سأل من آخر مواجهة اللي صارت بينا وهيج اريح النا اثنينا ، زوجته ما شفتها بعد ولا مريتلها ...
اجى الخميس كعدت الصبح ورحت لبيت عمي ساعدتهم وجهزنا المكان اللي يكعدون بيه العرسان وجابوا طباخ يطبخ للرياجيل وللنسوان ، اول مرة نخلص من هوسة الطبخ بالبيت....وهذا جان اقتراح عمي عبد الملك...
بتول ومرت عمي راضي راحوا وي طيبة للصالون من شفت الوضع كله تمام رجعت للبيت سبحت فطومة وسبحت وكعدت اسشور شعري ، اندكت الباب كمت فتحتها دخلت ريحانة وجايبة فستانها وياها ..
سمر : هاي شنو اشو بعدج كل شي ما مسوية ؟
ريحانة : ماعندي لا مكياج ولا سشوار كلت اجي يمج
سمر : نسينا ما اشترينالج يلة تعالي هسه وبعدين نطلع نشتري...
رحنا للغرفة ، سويتلها شعرها وهي سوتلي شعري ، عاينتلها كالت
ريحانة : ها شبيج ؟
سمر : مو كلش اعرف للمكياج اقوى شي عندي اكحل عيني واحط حمرة
ريحانة : اصلاً وجهج ما يحتاجله شي تبارك الرحمن الرحيم مرسوم رسم
سمر : مو بجمالج حبي
ريحانة : يمعودة اني يمج عبدة عبودة
سمر : اسكتي اسكتي على اساس انه البيضا والله نفس البشرة بس الفرق عيوني زرك وعيونج سود
ريحانة : وهاي قليلة ؟
سمر : بربج سامعة فد يوم شاعر لو مطرب اتغزل بالعيون الزرك لو الخضر اشو كلها على السود ، ناظم الغزالي غناها الج مخصوص ، ام العيون السود ماجوزن انه خدج الكيمر انه اتريك منه لابسة الفستان وكالت لي انا ، حلوة مشيتها دتمشي برهدنة ....يموت عليج الفستان يعوبة وين جنتي ضامة جمالج ودافنة نفسج ؟
ريحانة : بنفس المكان اللي انتِ دافنة نفسج بيه
ضربنا كف بكف وضحكنا على حجيها
ريحانة : والله على اساس انتِ اللي عايشة حياتج يمكن اني تدللت وشفت وسافرت وشبعت ونسة ، آخر كم سنة طاح حظي بيها إلا انتِ ضيم وضلايم حياتج كلها
سمر : اي والله يا ريحانة ما حجيتي غير الصدك
ريحانة : تعالي اخربط وجهج
سمر : يلة بس كتري كتري على ئد ما تأدري
ريحانة : يولية گلبتي مصري
سمر : اموت على المسلسلات المصرية والأفلام القديمة خصوصاً اذا بيها رشدي اباضة يابه من اشوفله فيلم اتسرسح اموع جنت احلم اتزوج واحد مثله وتالي تزوجت شهم امداني
ريحانة : سوي طاقة جذب بلكت تجذبيلج واحد يشبهه
سمر : وين بعد راحت علية
سكتنا من سمعت صوت الباب انسد
سمر : لحظة اشوف منو اجى
طلعت للهول عاينت ماكو أحد معقولة الهوى سدها ؟ عجيب رجعت للغرفة كالت
ريحانة : منو اجى ؟
سمر : محد يمكن الهوى سد الباب
كملنا مكياجنا وشعرنا وحدة عاينت للثانية وتتغزل بجمالها
ريحانة : راح تكسرين على طيبة
سمر : هسه هي تكسر علينا اتذكر بمهرها الأول طلعت لعابة اوووف انكسرت ربي يجبر بخاطرها وكون باسل يعوضها ، شبيج صافنة ؟
ريحانة : شنو هذا ثاني واحد ؟ ليش زوجها الأول وين؟
سمر : يوو انتِ ما تدرين هاي قصة لوحدها بعدين احجيلج عنها
ريحانة : لا تكوليلي مات ؟
سمر : لا اسم الله بس فسخوا
ريحانة : هو الخسران
سمر : اكيد وين يلكى مثلها ، يلة البسي عباتج حتى ننزل ولفي شالج زين وغطي وجهج
ريحانة : وليش يعني الف وجهي ؟
سمر : ولج هسه من نطلع كومة زلم برا ما يقبلون وحدة يتكشف وجهها
ريحانة : صدك تحجين ؟
سمر : والله شبيج انتِ ما شفتيني من رحنا للسوك لبست بوشية
ريحانة : الصراحة استغربت بس ما سألتج
سمر : اسم الله عليج ، شهم يغار علية ما يرضى اطلع بدونها
ريحانة : عمي حقه هو صح مزودها بس حقه يغار عليج انتِ ما شفتيهم شلون يباوعون علية وشفتي هذا الحقير شلون تحارش بية
سمر : لأن ما جنتي لابسة عباية بس الحجاب وهيج لافتة شلون مجان ، لهذا استغربوا وضلوا يعاينون عليج ما شفتي يوسف شلون محاوطنا وين ما نمشي ويانا
ريحانة : اي والله حتى ما خلانا نتنفس ، الصراحة ضجت وما آخذت راحتي واستحيت منه
سمر : تعودي خية وتقبلي الوضع ، يلة نروح كبل لا يوصلون بيت عمي وتصير هوسة على الأقل نكص كم صورة وي طيبة
ريحانة : يلة
طلعت عاينت لفطومة نسيت البسها بدلتها
سمر : يا شوفي التهيت بنفسي وعفت فطوم
ريحانة : جيبي ملابسها واني اسوي شعرها
رحت جبت بدلتها وريحانة سرحت شعرها ، لبستها وطلعنا ، مشينا لبيت عمي ركض ركض ، كومة زلم واكفة ، وصلنا للبيت اول ما دخلت ركعتهم بهلهولة اجتني عمتي صاحت
زهرة : ولج يالعرمة بعدهم ما عاقدين عليش هلهلتي؟
سمر : عمة اعتبريهم عقدوا قابل راح يختلفون ؟
زهرة : حت لو ما يصير تهلهلين هسه عيب شيكولون علينا ما مصدكين ؟ يعقدون واشبعي هلاهل...
سمر : صار حبيبتي تأمرين أمر
عفناها ورحنا لغرفة جدتي نزعنا عبينا والحجابات ورتبنا شعرنا ودخلنا للصالة ، عاينت لطيبة طالعة لعابة ركضت حضنتها عاينتلي وكالت ...
طيبة : شلوني الله عليج ؟
سمر : تخبلين ما شاءالله
طيبة : لا تجامليني ؟
ريحانة : لا ليش تجاملج طالعة كلش حلوة
ابتسمت ودنكت راسها خجلانة
كصينا صور وياها بنقالي ، عاينت لريحانة كاعدة ومستحية ، سحبتها من إيدها وآخذنا صور وي طيبة ، ورحنا كعدنا على صفحة ، كل شوية وحدة تسأل منو هاي الحلوة واكوللهم صديقتي ، بس زوجات عمامي وبناتهم يعرفوها منو هي لهذا ما سألوا ....
بلش العقد وعقدوا كمت اهلهل واطش جكليت عليها ، صاحوا سووا درب للولد ، كمنا لبسنا حجاباتنا وكعدنا يمهم ، طيوب جانت مستحية ومدنكة راسها....دخل باسل بخطوات هادئة لابس دشداشة بيضة وعكال ، عيونه ما فارقتها لحظة دنك يمها وهمس بأذنها ...
باسل : من شفتج كل هاي الهوسة اختفت وكأن اللحظة انحصرت بس بيج ....
دنكت راسها خجل وهو فرحان وجريء وياها ، كل شوية يحاجيها وتضحك ..
جابوا الذهب بعلبة لونها أحمر آخذها من أمه وفتحها كدامها طلع النيشان يلمع لمع جايبلها طقم بس مبين ثكيل يترس العين...أمه رادت تساعده يلبسها ما قبل كاللها انه البسها ...
مد إيده وهو يبتسم ابتسامة دافية..
باسل : اذا تسمحين ؟
رفعت نظرها عليه وتلاقت عيونهم بخجل...
للحظة نسيت كل الناس الداير مدايرنا مديتله إيدي ترجف ، لزم أصابعي برقة حسسني لازم شي غالي عليه وخايف لاينكسر بيده ... لبسني الحلقة وظل لازم إيدي ، أمه كالت يلة لبسها الباقي ابتسملي وتقرب همس بأذني
باسل : من هاي اللحظة صرتي حلالي ومالتي ، ما أريد أشوف هالرجفة بيدج إلا من الفرح ..
ضحكت بخجل ونزلت راسها ..
شد على إيدها بخفة ولبسها باقي الذهب وهي لبسته حلقته ... وراها جبنالهم كيك وعصير وسووا مراسيم العقد وكصوا صور ...
تقربوا اهلنا من الطرفين وباركولهم اجت امه وكالت ..
حنة : الله يجعل أيامكم كلها محبة وخير وما يفرقكم إلا الموت بعد عمر طويل ...
عمتي زهرة سلمت عليهم وباركتلهم وكالتله..
زهرة : يلة اطلع كافي بعد
باسل : عمة يصير آخذها وياي ؟
زهرة : استعجل بالعرس وآخذها صارت حلالك بعد ..
التفت على طيبة وهمس ...
باسل : تمشين وياي ؟
طيبة : وين أجي باسل لا تحرجني أكثر من هيج
شد على إيدها بقوة وهمس يضحك ...
باسل : والله الحلال حلو خصوصاً اذا جان من دمك ..
دنكت راسها بخجل تقرب منها باسها وطلع ، رجعنا نزعنا الحجاب وشغلوا مواليد بالديجي كميل ما يرضى نشغل اغاني ..
انجريت من ثوبي التفتت جدة تعاينلي وتضحك
سمر : ها جدة ؟
صدمة : هاي الحلوة صاحبتج ما تزوجيها ليوسف
سمر : ان شاءالله جدة ان شاءالله بس ادعيلهم وهي تصير
رفعت إيدها وكالت
صدمة : يارب تفرحنا بهالوليد هذا
ورا شوية اجت الملة جيرانا عمتي عزمتها حتى تسوي اجواء للحفلة ، هي بلشت منا واحنا ذبينا لحم ، وراها تعبت ورحت كعدت يم ريحانة نسولف ونضحك كل شوية جدتي مسوية فقرة وتضحكنا ....
سمر : تونستي ؟
ريحانة : اعراسكم حلوة همزين اجيت جان فاتتني
سمر : يلة الحمد لله
اجت بتول وكفت شاورتني ...
بتول : سمر شهم يريدج
سمر : وينة ؟
بتول : فوك بغرفتكم القديمة
سمر : شنو يريد ما كلج ؟
بتول : ما ادري كال صيحيها
بطلعتي من الصالة فاتت ضحى عمتي راحت جابتها ، عاينتلي من فوك ليجوة وفاتت ، ما اهتميت الها جنت فرحانة لفرح طيبة وحابة اتونس ، صعدتله فوك فتحت الباب لكيته كاعد رفع راسه عاينلي وبهت ، بقى صافن علية ما شال عينه مني ..
سمر : بتول كالت رايدني
ساكت ما حجى شي
سمر : شهم الحفلة راح تخلص اكو شي ؟
كام من مكانه وكف كبالي ويعاينلي كصني بعيونه من فوك ليجوا ، بقى دقايق ساكت وبس يعاين ..
سمر : اكو شي ما عاجبك بية ؟
همس
شهم : بنت الخ.... كل شي عاجبني
تحمحمت وهمست
سمر : ليش صحتني ؟
عاين بعيوني وهمس
شهم : ها
سمر : شنو ردت مني ؟
شهم : ما ادري انه صحتج ؟
سمر : اي دزيت علية بتول كالت
عكد حاجبه وتغريت ملامحه
شهم : انت شلون هيج لابسة ؟
عاينت لفستاني عكدت حاجبي وهمست
سمر : ليش شبيه لبسي ؟
شهم : مفتوح هواي من يم الصدر
سمر : شنو يعني هي حفلة وبس نسوان ماكو زلم
شهم : واذا ماكو زلم نتشلح ؟
سمر : شهم شبيك خليني فرحانة يعني إلا تنكد علية يلة ترتاح ؟
شهم : ما منكد بس
سمر : بس شنو خليني انزل
شهم : وين ضامة هالحلاوة هاي ؟
هو يتقرب خطوة وانه ارجع ليورا خطوتين ، بدون مقدمات فتح إيده وحضني بلهفة ، حسيته راح يكسر عظامي ، جر نفس وكال...
شهم : ولج ولج مشتاقلج بكد رحمة الله والله حرام عليج مانعتني من هذا الجمال ..
سمر : شهم مو وقتها عوفني أنزل
شهم : اش ولا كلمة
سمر : شهم شهم وخر عني ...
جان محاوطني بقوة لدرجة ما كدرت اتحرك ، ذايب لدرجة ما حس على وجود ضحى جانت واكفة بالباب مصدومة والدمعة بطارف عينها ، من شفتها واكفة بادلته الحضن وهمست يم أذنه ...
سمر : شكد تحبني ؟
شهم : بكد رحمة الله
عاينتلها وابتسمت ما أعرف ليش بس ردت اردلها الأهانة اللي هانتني بيها قبل كم يوم من كالت انتِ داتسوين كله هذا حتى بس يباوعلج..
سمر : مشتاقلي ؟
شهم : ميت
سمر : شكد تحبني ؟
شهم : ماكو وصف ماكو
سمر : تريدني ؟
شهم : شنو أريدج شنو متخبل عليج شنو متمني اللحظة اللي تفتحيلي بيها حضنج وتسامحيني...
دفعته عني وهمست ...
سمر : شهم ضحى تريدك
شهم : هسه وكت ضحى خلينا بالأحنا بيه....
سمر : وراك ...
بقى يعاينلي مصدوم
شهم : شنو وراية ؟
سمر : التفت وشوف
دار ظهره شافها واكفة عاينلها وكال
شهم : شجابج ؟ مو عفتج نايمة وتعبانة ؟
ضحى : اجيت اشوف الرومانسية لو باقية نايمة جان فاتتني
شهم : وشصعدج الدرج مو على اساس موزين عليج ؟
ردت اطلع واعوفهم يتعاركون ، سحبني من إيدي وحط إيده ورا ظهري عاينلي وكال ...
شهم : ابقى ما كملنا حجينا
سمر : بعدين نحجي
ضحى : لا ليش ابقي وين رايحة ؟ بعده مشتاقلج ورايدج ، الظاهر اني تطفلت عليكم..
سمر : شهم بعدين نحجي الحفلة راح تخلص ...
حجيتها وابتسمت عفتهم ونزلت للصالة دورت على ريحانة ماكو استغربت سألت عنها كالوا ما شفناها ، دورتها بالبيت ما لكيتها ، لبست حجابي وطلعت لبيت يوسف ادورها....
ريحانة
اجتي وحدة من البنات صاحت لسمر وراحت وراها ، ضليت كاعدة بمكاني ما ارتاحيت احس الناس كلها تباوعلي ، رحت للغرفة اللي غيرنا ملابسنا بيها ، كعدت ورا شوية فاتت نفس البنية اللي جانت تضايقني بالبيت وتسوي حركات تخوفني بيها ، باوعتلي وكالت..
رفل : شعندج جاية هنا ؟ بنت عم بنت خال ؟ عرف ولف
ريحانة : اجيت وية سمر
رفل : هاي وي سمر ؟وعلى شنو ناوية بلة؟
ريحانة : ما ناوية على شي اجيت اتونس
رفل : ترى ماعندنا زلم للزواج لا عبالج تصيديلج واحد منا منا يالبايرة...
ضحكت
ريحانة : عفواً وانتِ منو كايلج اني رايدة اتزوج ؟
رفل : لبسج وتصرفاتج كلها تبين شنو تريدين ، مو عيب عليج جاية يم ناس لا تعرفيهم ولا يعرفوج وفوكاها ماخذة راحتج وهيج لابسة ..
باوعت لفستاني ورجعت باوعتلها
ريحانة : اذا عجبج انزعه وآخذيه بس ما اتوقع قياسج لأن انتِ اسمن مني بهواي
رفل : وتقلدين علية ؟ لج انتِ شكد صلفة
ريحانة: رجائاً خلينا بحدود الأحترام لا تتجاوزين حدودج
رفل : ام حدود انتِ وين تعرفين بالحدود ؟
كامت تردح كمت لبست ملابسي وطلعت من البيت رجعت لبيت يوسف دخلت للأستقبال نزعت العباية والحجاب وكعدت اغلي من العصبية استغربت شلون تمالكت نفسي وما كتلتها ، لهناك واسمع صوت من المطبخ ، خفت كمت على كيفي وجان اشوف يوسف كاعد على الميز يتغدا
ريحانة : انت هنا ؟
التفت علية ونزع السماعة من إذنه ، صفن علية وكال
يوسف : ما ادري راح ترجعين من وقت واجيت هنا اتغدى
ريحانة : وليش تبرر بالنهاية هذا بيتك واني خطار بيه
يوسف : ها
ريحانة : دا اكولك هذا بيتك واني خطار بيه
يوسف : ها اي كلنا خطار صحيح
ريحانة : يوسف شبيك ؟
يوسف : شبية احتركوا شيب اهلي شبية يعني
ريحانة : وليش عصبي ؟
يوسف : مو عصبي
ريحانة : رايحة اغير ملابسي وانت آخذ راحتك كمل غداك
يوسف : اوكفي اوكفي لحظة ما شبعت اقصد يعني كملت واريدج بموضوع ...
باوعت للأكل بعده على حطته مبين توه بادي ياكل
ريحانة : بس اغير ملابسي واجي اذا تريد نحجي
وكف كبالي بس اكو مسافة جبيرة بينا باوعلي ويبلع بريكه ابتسم وكال
يوسف : بسم الله ماشاءالله هاي انتِ نفسج اللي اعالجها ؟
ريحانة : اي نفسي انتظرني ابدل وراح تعرفني
راد يحجي تركته ورجعت للغرفة غيرت ملابسي ودخلت للحمام غسلت وجهي ورجعت جان كاعد بالهول رفع راسه باوعلي وكام يتلفت منا ومنا
ريحانة : على شنو تدور ؟
يوسف : قبل شوية جانت بنية هنا كلش حلوة ما شفتيها ؟
ريحانة : شنو قصدك ؟
يوسف : مو قصدي شي بس داسألج اذا شفتيها
ريحانة : لا ما شفتها يلة سولف شنو عندك
يوسف : خرب الأنوثة راحت شبيج تخربين حتى الواهس كبل سولف شعندك
ريحانة : اي مو كلت اريدج بموضوع
يوسف : اي صح
ريحانة : شنو هو ؟
يوسف : راح احجي بس ما أريد اي توتر
ريحانة : تمام اسمعك
يوسف : انتِ والمرحوم عاقدين سيد ومحكمة شيخ ومحكمة لو شنو ؟
ريحانة : يامرحوم ؟
يوسف : قسور يكرم طاري الله
ضحكت
ريحانة : اشو يكرم طاري الله
يوسف : اي مو نكس
ريحانة : صدقت
يوسف : عوفج منه واحجيلي عاقدة العقدين لو لا ؟
ريحانة : اي عقدنا شيخ وبعدها صدقناه بالمحكمة ليش تسأل ؟
يوسف : ليش اسأل ردت اخلصج منه و وكلت محامي يترافع عن القضية بس المشكلة من راح يسأل يريدون شهود وماكو غيرنا انه وياج والمحامي كل نحتاج ادلة وقرائن مثل رسائل بينج وبينه وانتِ تليفونج عنده رادوا تسجيلات صوتية هم ماعندج تصوير كاميرات هم ماكو وشهود ماكو والاهم ما مسوين تقرير طبي على الحالة حتى نقيم عليه دعوة جنائية بس يبقى الفيديو اللي دزه قسور لشهم فكرت اقدمه كدليل ، المشكلة لا صوته ولا شكله مبين ، واقترح المحامي انتِ تقيمين دعوى تفريق للضرر بس لازم عندج إدلة عليه كافية ندينه بيها ،خليته يقيم الدعوى ونشوف شنو يصير ...
ريحانة: بس اني ما عندي لا مستمسكات ولا غيرها شلون يترافع عني او يقيم دعوى ؟
يوسف : هاي هم مشكلة بس انحلت ، والسالفة الثانية ماعندج أدلة عليه وهو يأذيج
ريحانة : عندي
يوسف : شنو عندج ؟
ريحانة : إدلة تثبت سوء اخلاقه وجرائمه وأذيته الية
يوسف : وينهن لعد ما تحجين ؟
ريحانة : المشكلة مو عندي
يوسف : وين لعد ؟
ريحانة : ما محتاجيها هسه ودعوة التفريق عوفها مو وقتها
يوسف : شلون مو وقتها غير نخلص منه
ريحانة : يوسف اذا أقمنا دعوى عليه وهو حر طليق راح يأذينا
يوسف : ما يكدر يسوي شي
ريحانة : يكدر اني اكولك يكدر ، الله يخليك وكف كل شي هسه
يوسف : بس كلتله يقدم شكوى بالمركز بخصوص اللي صار وكلتله انه اكون الشاهد ونشوف سالفة المستمسكات بعدين
ريحانة : شلون يعني قدم شكوى؟
يوسف : شهادتي راح تفتح باب للتحقيق بالموضوع
ريحانة : شلون فهمني
يوسف : المحامي راح للمركز قدم شكوى على قسور ، رفق أسمائكم انتِ وياه حتى لو ماكو مستمسكات ، وانه من ييجي دوري اروح ادلي بإفادتي كشاهد عيان ، وراها الأوراق تروح للقاضي بعدها ينفتح التحقيق ويسووله استدعاء حتى لو ما اجى وبعدين يدزون عليج ...
ريحانة : يوسف تحجي صدك ؟
يوسف : لعد تريدين اضيع حقج ؟
ريحانة : بس مو وقتها اتصل عليه اذا بعده ما رايح خليه يأجلها
يوسف : اتوقع راح الصبح بس هم اخابره ، قبل لا اتصل اريد افهم منج بعض الأمور ..
ريحانة : مثل شنو ؟
يوسف : الصراحة انه رحت سألت عند المذهبين الشيعي والسني وجانت الأجابة نفسها انتِ بعدج زوجته ، من رجعت للبيت تذكرت من جنا مخطوفين كلتيلي زواجج جان على ورق صح ؟
دنكت وهمست
ريحانة : صحيح
يوسف : لا تنحرجين مني الله يخليج ضروري اعرف حتى اكدر اساعدج
ريحانة : كلتلك ماصار بينا شي
يوسف : وشوكت طلكج ؟
ريحانة : طلكني قبل لا اجي للبيت اللي انخطفنا بيه
يوسف : يعني جان هادئ مو عصبي ؟
ريحانة : لا جنا كاعدين وطلكني عادي يضحك اصلاً
يوسف : معناها كذب علية من كال طلكتها قبل لا ندخل للغرفة
ريحانة : اي كذب
يوسف : لحظة خليني اتصل بكميل واسأله على شغلة
ريحانة : اتصل بالمحامي أول قبل لا يسوي شي
يوسف : هو اذا رايح يكون رايح الصبح هسه هو بالمكتب اخابره براحتي
ريحانة : ماشي
كام واتصل على اخوه حتى يحجي وياه سد الباب وطلع برا ..
يوسف : الو شيخنا الحبيب شلونك ؟
كميل : الحمدلله وين صرت مو كلت اتغدا واجي ؟
يوسف : هسه جاييكم بس قبلها رايدك بشغلة صغيرة
كميل : كول
يوسف : هو سؤال يعني شلون اكولك فضول واريد اعرف اجابته منك
كميل : اسأل
يوسف : اذا واحد عقد على وحدة وما صار بينهم اي جماع بفترة الخطوبة وطلكها وبعدها اعتدى عليها بالقوة شنو الحكم عندنا وعند المذهب السني ؟
كميل : وشجابه هذا السؤال على بالك ؟
يوسف : ماعندي شي كاعد ودا اقرأ بالفيس بوك شفت قصة منشورة واختلفوا بالآراء قريت التعليقات اغلبها ما قنعتني لهذا خابرتك كلت أكيد الكى عندك الجواب الصح
كميل : بهيج حالة يعتبر جريمة اغتصاب يعني زنا باﻹكراه ولا يعد بأي حال من الأحوال جماعاً زوجياً وما عليها سنة وشيعة كل الفقهاء اتفقوا على أن المرأة بهيج حالة لا إثم عليها ولا عقوبة لكونها مكرهة على هذا الفعل بينما هو يعاقب ..
يوسف : اشرحلي أكثر يرحم والديك عند المذهبين أريد اتأكد
كميل : عندنا بمذهبنا قبل الدخول بمجرد الطلاق تنتهي العلاقة الزوجية فوراً تعتبر أجنبية ومثل ما كلتلك ما عليها لا أثم ولاعقوبة لأنها مكرهة وغير راضية ، اما عند السنة بمجرد النطق بالطلاق بعد ما تحل عليه إلا بعقد ومهر جديدين لقوله تعالى (بسم الله الرحمن الرحيم يا أَيُّهَا الَّذِينَ آمَنُوا إِذَا نَكَحْتُمُ الْمُؤْمِنَاتِ ثُمَّ طَلَّقْتُمُوهُنَّ مِنْ قَبْلِ أَنْ تَمَسُّوهُنَّ فَمَا لَكُمْ عَلَيْهِنَّ مِنْ عِدَّةٍ﴾ [الأحزاب: 49] صدق الله العظيم
يوسف : يعني حتى عدة ما عليها ؟
كميل : اي شبيك يوسف شنو أول مرة تسمع بالدين لو ما قاري قرآن قبل ؟
يوسف : شلون ما قاري حبيبي شلون ؟ زين هسه انت وين ؟
كميل : بالمضيف ليش ؟
يوسف : أريد اجي ابوسك
كميل : فرحتك هاي كلها علمود المشكلة اللي قريتها بالفيس ؟
يوسف : ها اي مو كلتلك احتاريت وهيج يعني
كميل : خير ان شاءالله ، اذا ماعندك اسألة بعد خليني اروح وتعال انت هم عيب من الناس...
يوسف : اي هسه جاي
كميل : لا تتأخر
يوسف : ماشي
سده منه ورجع اتصل بالمحامي هو وداخل للبيت حجى وياه بالأول جان مبتسم وفرحان ما ادري ليش بعدها عكد حاجبه ويجاوبه اي واي وبعدين شلون ؟ لا تحجي صدك ؟ زين ليش شنو السبب ؟ هز راسه متضايق وجهه انگلب ، وراها سده و باوعلي ساكت ..
ريحانة : خير خوفتني
ما جاوبني حسيته حاير
ريحانة : صاير شي ؟
يوسف : المحامي رايح ويكول انشغلت وما رديتلك خبر
ريحانة : زين ليش وجهك انگلب سمعت شي ؟
يوسف : لا
ريحانة : يوسف انت وعدتني تحجيلي كل شي واني متأكدة عبوسك هذا وراه شي وجبير هم..
بقى يباوعلي حاير بين يحجي او لا
ريحانة : احجي شنو صار ؟ مو خوفتني
يوسف : من دكوا اسمج بالحاسبة الضابط كايل للمحامي موكلتك عليها تعميم وأمر قبض بحقها
ريحانة : أمر قبض وليش ؟
يوسف : جريمة قتل
بهذه الأثناء اندكت الباب ودخلت سمر باوعتلنا عكدت حاجبها وكالت ..
سمر : خير شصاير ؟ وانتِ ليش مغيرة ملابسج ؟
ظلينا نباوع واحد للثاني ، التفتت عليها وهمست
ريحانة : راسي صدع واجيت ارتاح
سمر : أكو أحد ضوجج ؟
ريحانة : لا أبد
سمر : الحمدلله
بعدها التفتت ليوسف وكالت
سمر : يوسف الولد متجمعين حتى يلبسون طيبة الذهب وبس انت ماكو
كام من مكانه باوعلي جر نفس والتفت لسمر كال
يوسف : يلة امشي
طلعوا وصلوا للباب التفتلي وكال
يوسف : من ارجع نكمل حجينا
رجعنا لبيت عمي هو وكف بالباب وانه دخلت جوا وصحت على البنات يلبسون حجابهم ، بعدها دخلوا جدي وعمي عبد الملك واخوانها وكل واحد بيهم لبسها قطعة ذهب ، محبس على كلادة وبتوت ، ترسوها ترس ، عاينت لشهم بعده واكف ما لبسها ، رفع عينه عاينلي واجى وكف بصفي وكال ..
شهم : هاج انتِ لبسيها
سمر : ليش ما انت لبستها حالك حال اخوانك ؟
ابتسم وكال
شهم : انه وانتِ واحد