رواية الوجه الاخر للرحمة الفصل الرابع والاربعون44 بقلم عبير ادريس
سمر
لا رغبة لي بك بعد اﻵن
يمكنك توزيع نفسك
على المحتاجين
محمود درويش
____________
ريحانة
اذا قررت ان تكون ضمادة لأحد
تذكر إن الضمادات ترمى عندما يلتئم الجرح.
_______________
شهم
شخصاً مثلي
لا يموت من الخيانات
ولا من الخوف
ولا يقتلني الحب ولا الخسائر
أنا قد أموت بسببي فقط
بسببي
وليس بسبب أي شيئاً آخر
___________
يوسف
لا تتعامل مع احد على أنه مصدر أمان
كل الناس مؤذية
لكن بطرق مختلفة
احياناً تقتل من شدة الحب
_____________
فارس
لا توقف قطار حياتك
من أجل راكب متردد
___________
طيبة
يمر على الإنسان
أوقات يكون فيها
أعظم أمنياته هي أن لا يشعر
____________________
لستُ متأكد من وجودي طويلاً
في الدنيا
لكنني اتمنى أن أكون غرست داخلكم ذكرى طيبة تبقى للأبد
عبير إدريس
________________
آخذت العلبة منه ورحت فتحتها طلعت الكلادة لبستها لطيبة وباركتلها مرة ثانية ، جانت كلش فرحانة أول مرة أشوف الفرحة و اللمعة بعيونها بعد اللي صارلها ، خلصت الحفلة والناس راحوا وصعدنا فوك غيرنا ملابسنا آخذت من طيبة دشداشة ونزلنا نظفنا البيت انه والبنات ، بتول وتبارك وبنات عمامي كلنا تعاونا ما خليناها كل شي تسوي ...
من خلصنا البيت دخلت لغرفتها حتى آخذ عباتي وأرجع للبيت لكيتها تخابر غمزتلها ضحكتلي وطلعت آخذت بنتي ورجعنا للبيت ، شهم اجى بالليل حسيت عليه بس جنت قافلة الباب عرفته راح ييجي بعد الموقف اللي صار بينا اليوم..
كعدت الصبح حطيت القوري على النار وفتحت الشبابيك وشغلت رقية شرعية بالتلفزيون ، رحت أشوف فطومة اذا كاعدة حتى نتريك سوية واذا نايمة ، اتصل على ريحانة تجي تتريك وياي ، فتحت الباب والكى شهم نايم وهي بحضنه رايحين بسابع نومة ، سديت الباب وطلعت ، سويت ريوك وكعدت اتريك وحدي مو مال ادز على ريحانة وهو هنا خفت تنحرج منه ...
خلصت ريوكي وكمت غسلت المواعين وطلعت لحم حتى اسوي غدة سمعت صوت موبايله يدك ورا شوية طلع من الغرفة راح للحمام واجى للمطبخ ينشف بوجهه ، عاينلي وكال
شهم : صباح الخير
سمر : صباح النور
شهم : اتصلت أمي رحيمة وكالت ابوك تعبان
سمر : ابوي قادر ؟
شهم : اي
سمر : خير شبيه ؟
حجيتها وانه امسح إيدي بهدومي من المي
شهم : ما ادري تكول تعبان وطول الليل ما كدر ينام
سمر : البارحة ما بيه شي
شهم : لا جان تعبان وبالكوة واكف وانه وصلته للبيت وسألته كال تعبت بالبستان مابية شي..
سمر : نروحله ؟
شهم : اي كعدي بنتج والبسوا حتى نروح
سمر : اي اي هسه
طفيت الطباخ وركضت للغرفة ما اعرف شلون كعدتها وشلون لبسنا و طلعنا ، صعدنا سيارته ورحنالهم صف السيارة ونزلنا ، صح البيت قريب بس آخذ السيارة حتى ياخذ عمي للمستشفى ، دخلنا للبيت جان متمدد على الفراش وأمي تسويله كمادات ، شهم وكف فوك راسه وانه نزلت على إيده ورجله ابوس بيهن ..
قادر : بوية مابية شي شجاج ؟
سمر : سلامتك يابعد عمري انت شجاك البارحة سلمت عليك ما بيك شي ؟
شهم : ها بوية تدلل علينا ؟
التفت لأمي وكال
قادر : عليش خوفتيهم مابية شي
رحيمة : شلون مابيك شي والليل كله تون وما كدرت تنام
شهم : يلة بوية كوم وياي
قادر : وين ؟
شهم : آخذك للمستشفى نجيك وضعك
قادر : ولا اروحن مابية شي
شهم : بوية تكوم لو اشيلك ؟
قار : هسه غير يعوفني داكولك مابية شي ليش تلح ؟
شهم : نشوف اذا بيك او لا وراها نسولف
قادر : يابة مابية عليش تعذب نفسك ؟
شهم : بوية ياما وياما عذبناك بصغرنا وتمرضنا واعتنيت بينا هسه من كبرنا واحتاجيتنا صرت تعذبنا ترى ما مقبولة منك ابد..
حجاية منه ومني كدرنا نقنعه يروح للمستشفى ، من طلعوا سويت ريوك لأمي و فطومة عفتهم ياكلون وكمت للبيت تظفته كله غسلته غسل بالصوندة وأمي تصيح
رحيمة : ولج يمة عوفيه نظيف مابيه شي
سمر : ادري بيج نظيفة وبيتج ينكط ورد بس خليني اساعدج حتى من يرجع ابوي ماعندج شي وبس تداريه ...
آخذت ملابسهم وحطيتهن بالغسالة سمعت نقالي عاينت شهم يتصل...
سمر : ها شهم بشر ؟
شهم : بعدنا بالمستشفى انتم شلون وضعكم ؟ أمي شلونها زينة ؟
سمر : احنا زينين ، عفية طمني على ابوي مابية شي ؟
شهم : كلتلج بعدني ماعرفت شي من أعرف اكولج
سمر : الله كريم بس طمني اذا عرفت شي
شهم : تمام ، اتصلت حتى اكولج لا تسوين غدة
سمر : ليش ؟
شهم : ابوي مشتهي سمج وراح اجيب وياي سمجات نسكفهن بالحديقة
سمر : سودة علية حبيبي يحب السمج كون يكدر ياكل
شهم : فطومة تريكت ؟
سمر : اي
شهم : يلة انه رايح محتاجين شي اجيبه وياي ؟
سمر : جيبلهم مسواك ثلاجتهم فارغة مابيها غير المخضر
شهم : هو ابالي اتسوكلهم يلة خليني اروح اشوف الدكتور
سمر : الله وياك...
سديته منه ورحت للغسالة خلصت غسل آخذت الملابس وطلعت للحوش شريتهن ورجعت كعدت يمهم بالهول
رحيمة : شلون وضعج وي شهم مرتاحة ؟
سمر : اي يمة مرتاحة ؟
رحيمة : زين وياج ؟
سمر : كلش زين
رحيمة : يحن على بنيته ؟ لو مثل كبل ؟
سمر : لا الحمد لله البارحة جان نايم يمها بغرفتها
رحيمة : نعمة من الله ، وإن شاءالله تدوم
سمر : إن شاءالله
رحيمة : انتِ هم صيري سباعية ولزمي بيتج ورجلج محد يفيدج غيره
سمر : اي يمة
رحيمة : ترى شهم گلبه طيب وبيه لزمة وييجي باللسان الحلو
سمر : اي ادري
رحيمة : الله يهنيكم يا يمة
سمر : فدوة لعينج
رحيمة : اكوم اصلي أذن الظهر مو ؟
سمر : اي أذن ما سمعتي صوت كميل ؟
رحيمة : لا والله ركست شوية من جنتي تشتغلين
سمر : نوم العافية حبيبتي
رحيمة : الله يعافيج كومي انتِ هم صلي
سمر : ماعندي صلاة
رحيمة : ها يلة انه أصلي وأدعيلج
سمر : الله يتقبل يوم حبيبتي
كمت حضنتها وطبطبت على ظهري أحس الحمل الجنت شايلته خف بحضنها ...
سمر : يمة شكثر جنت محتاجة هالحضن
رحيمة : شعندي غيرج يابنيتي ، انتِ وشهم دنيتي كلها ، اتمنى أشوفكم عايشين بسعادة ومرتاحين طول العمر
سمر : حبيبة يوم الله يخليج النا إن شاءالله
رحيمة : ويخليكم الي
كامت تصلي وانه رحت كملت باقي شغلي ، وراها سمعتهم اجوا طلعت تلكيت أبوي حضنته وسندته مشينا للبيت ، حاضني وانه جوا جناحه عاينلي ابتسمت بس القهر والخوف ماكل گلبي عليه ...
سمر : يابه انت زين ؟
قادر : الحمدلله بنيتي الحمد لله
تلكته أمي وصاحت هله
قادر : هلة بيج ام الشهم
رحيمة : ها بشروني شنو طلع ؟
دخل شهم شايل المسواك وجاوبها
شهم : يتدلل مابيه شي الحجي طلع مشتهي سمج
رحيمة : اها والوجع اللي أكله البارحة شنو جان ؟
شهم : يتدلل عليج حجية
رحيمة : خله يتدلل يستاهل الدلال
كعدناه على فراشه ورحت ورا شهم للسيارة اساعده نزلنا باقي المسواك ورحت للمطبخ رتبته بالثلاجة وغسلت السمجات حتى نشويهن ، التفتت عليه من كال
شهم : سمر رايح اجيب حطب حتى اشعله ونشوي بيه وانتِ لوزي الأمور
سمر : صار
طلع وانه كملت البيدي وراها حطيت السمج بالصينية وخذيتهن برا لكيته يشعل بالحطب ، تقربت منه اسأله
سمر : شهم
شهم : ها
سمر : صدك ابوي مابيه شي لو حجيت هيج حتى ما تخوفنا ؟
شهم : مابيه شي تحاليله نظيفة والفحوصات هم مابيها شي
سمر : عليش متخربط ومصخن اذا مابيه شي ؟
شهم : حب يتدلل علينا
سمر : شهم عاينلي واحجي ليش تتهرب من تجاوبني ؟
ترك الحطب من إيده وعاينلي
شهم : يلة باوعت ، وعلى شنو اتهرب ؟
سمر : انه أعرفك من تكذب لا تنسى ربينا سوية وحافظتك حفظ
شهم : مابيه شي كلتلج عليش اضم عليج؟
سمر : اذا مابيه شي صدك ، ليش عيونك مدمعات من اجيت؟
شهم : ما أعرف شنو طب بيهن من جنت أسوق ، يلة خل نشوي حتى يتغدا وينام ، بس نتأخر عليه يغفى ..
سمر : بس وجهه ما عاجبني وحتى وجهه لونه اصفر شاحب..
شهم : اذا عرفتي علته بعد عليش نودي مستشفى ونتعب روحي شخصي حالته وفضينا..
سمر : وشبيك تستهزء ؟
شهم : سمر ما مستهزء بس انتِ كاعد تجذبيني عينك عينك.
سمر : لأن اعرفك من تكذب يبين عليك
شهم : لا هواي تعرفيني واضح
سمر : أكثر وحدة بالدنيا تعرفك وفاهمتك هي انه
شهم : اي صحيح
ماحجيت شي بعد حطيت السمج بالمسكافة آخذهن مني حطهن على النار ، كاعدة كباله صافنة عليه وهو يكلب بيهن ، رفع عينه اجت بعيني وكال
شهم : جيبي قوري الجاي حتى نحطه على الحطب من يستوي السمج..
كمت جبته ورجعت لكيته كاعد هو وفطومة يسولفون اسمعه يكوللها
شهم : راح يصير عندج اخو حلو مثلج وتلعبين وياه ومن يكبر يدافعلج اذا احد ضوجج لو آذاج
فاطمة : ماما راح تجيبلنه نونو ؟
تنهد وكال...
شهم : لا مو ماما سمر ، ماما ضحى ابطنها نونو صغير
فاطمة : ويشهبني ؟
شهم : اي حلو مثلج عيونه زرك وشعره كيرلي ملفلف مثل الذهب ..
تحمحمت رفع عينه عاينلي وغابت الابتسامة من على وجهه ورجع يكلب بالسمج ، فطومة شافتني ضحكت كامت حضنتني وكالت
فاطمة : ماما راح يصير عندي أخ يشبهني بابا كال..
سمر : اي حبيبتي أدري
فاطمة : بس مو منج من ماما ضحى
عاينتله ومسدت على راسها ، دنكت كبالها ابتسمت ، شفت الفرحة بعيونها
سمر : انتِ فرحانة ؟
فاطمة : اي كلش
سمر : وليش فرحتي ؟
فاطمة : بابا يكول اخوي من يكبر يدافعلي ومايخلي أحد يضربني
سمر : بس انتِ الجبيرة يعني انتِ اللي تدافعيله وتديرين بالج عليه ومن يكبر هو يدافعلج ...
فاطمة : ونلعب انه وياه بالبستان ؟
سمر : اي حبيبتي
فاطمة : يعني انتِ تقبلين العب وياه ؟
سمر : اي اقبل
باستني وكالت
فاطمة : عادي اكول لبيبي ؟
سمر : اي عادي
تركتني وراحت تركض على جدتها تبشرها بالخبر اللي سمعته ، عاينتله بعتب هو عرف شنو أريد احجي وكال
شهم : ضجتي مو ؟
سمر : فاطمة عندها أم وحدة مالها داعي تكوللها عندج أم ثانية وتأملها بيها ..
شهم : ليش ؟
سمر : باجر عكبة تكبر وتحس اتجاهها بأحساس حلو وبعدين تنصدم بتصرفات مرتك وياها ، الله اعلم شلون تعاملها ، لهذا بطل تزرع هيج أفكار براسها
شهم : لعد سويلها أخ بنتج كبرت خوما تظل وحدها؟ عاجبني نخاويها
سمر : مكتفية بيها ما أريد خلفة بعد والبركة بيك راح تخاويها من غير أم ...
ضحك وكال
شهم : مو هو بكيفج والقرار بس الج
سمر : طبعاً بكيفي اذا أريد اسوي واذا ما ردت محد يكدر يجبرني
شهم : نشوف
سمر : شنو يعني نشوف ؟
شهم : خليها لوكتها ، حطي القوري وانه رايح اجيب السفرة
كام راح للبيت جاب السفرة وأمي جابت صينية بيها بصل وخضرة وتمر وطرشي ، اجى آخذ السمج ونقله للسفرة ، كعدنا وراح جاب أبوي وكعدوا....
قادر : لو متغدين جوا مو أحسن ؟
شهم : الجو حلو هنا اذا تريد نفوت جوا
قادر : لا بعد فرشتوها فد انه محتر ما اعرف ليش
كام شهم جاب بنكة عامودية وشغلها حطها كباله وكعدنا ناكل ، انه افلس لأمي ولفطومة وهو يفلس لأبوي ويرجع يفلس ويحط كبالي
سمر : اعرف آكل
شهم : أدري
جان كاعد بصفي تدنيت منه وهمست
سمر : حركاتك هاي مالها داعي صارت قديمة
ما جاوبني ورجع فلس وحط بماعوني
سمر : انت شوكت تاكل ؟
شهم : خايفة علية بيبي ؟
سمر : لا طبعاً
شهم : فلسيلي اعتبريني ابنج ابوج
سمر : كلمن يفلس لنفسه
شهم : هاي بس من يمي كلمن يفلس لنفسه؟
سمر : عندك عيون وإيدين وفلس
قادر : شكد تتناكرون اللي يسمعكم يكول رويسية
شهم : ما تحاجيها يابه كللها تسكت وما تداهر زلمتها
قادر : هذا منو اليحجي ؟ هسه تريدني احاسبها عكب ما صارت مرتك ؟
شهم : وليش ما تحاسبها هي بنتك قبل لا تصير مرتي
قادر : اتذكر كبل جنت توكفلي سجينة خاصرة اذا حاجيتها كلمة لو فكرت احاسبها
شهم : هاي كبل من جانت فقيرة وما عندها لسان تجاوب هسه ماشاءالله تكول لسان دلالة
قادر : تربيتك ، سمر تربت على إيديك وانت اللي طلعت عينها واتحمل...
سمر : يابة انت وياي علية ؟
قادر : لا يابة وياج شلي بشهم
شهم : ها يابة اشو كلبت علية ؟
قادر : لا بوية انه اكدر بدونك ؟
شهم : والله بوية صاير كلاوجي
قادر : دكوم اسندني اروح اغسل إيدي
شهم : بس ما أكلت شي ؟ ماعونك على حاله
قادر : ما مشتهي ورايد انامن
شهم : ظل بمكانك هسه اجيب المي ليمك وغسل هنا
اشرلي اكوم وراه وراح جابله مي بالطاسة وكال
شهم : سمر جيبي صابونة وخاولي
سمر : جبتهم
رحنا لابوي غسل إيده وانه رحت جبت استكاين حتى نصب جاي ، حولنا كعدتنا على الحصيرة وشهم صبلنا الجاي ، سولفنا شوية وبعدها ابوي راح نام وامي احنا كلنالها روحي نامي ارتاحي ، ورا ما دخلوا رحت للمطبخ غسلت المواعين وطلعت للحوش جريت الصوندة حتى اغسله قبل لا ارجع لبيتي ، طلع شهم وصاح ...
شهم : شدتسوين ؟
التفتت عليه
سمر : اغسل الحوش
اجى آخذ الماسحة مني وكام يجر بالمي من كدامي ، وراها ضحك وكال...
شهم : والله رشدي طلع خوش رجال
سمر : رشدي منو ؟
عاينلي والضحكة ضامها
شهم : فد واحد ما تعرفيه
كلت هذا شبيه راح من بالي الفنان
سمر : اكولك هاك انت كمل الحوش بعد عليمن ارشلك مي ؟
شهم : لا نكمل سوى موزين مني اجيت اساعدج
سمر : محد ضربك على إيدك وكلك تعال ساعدني
شهم : ولج اشو لسانج طولان وبس تراددين
عاينت عليه واكف منتظرني اجاوبه وجان ارشه بالمي من فوك ليجوا ، شمرت الصوندة وركضت لبيتي صعدت فوك وكبل للحمام سبحت وطلعت نشفت شعري ولبست من الملابس الجديدة اللي اشتريناها انه وريحانة ، عاينت بالمرايا والله حلوات عجبوني ، احلى من الدشاديش جنت دافنة نفسي بيهن ...
فتحت السبلت وطفيت الاضوية ومددت على القنفة اعاين على روتانا كلاسيك ، جان طالع فيلم اسمه لا وقت للحب بطولة فاتن حمامة ، شوية شوية بديت انعس ، توني اريد اغفى انفتح الباب ودخلوا هادمين اللذات شهم وبنته ، صحت عليهم...
سمر : شهم هدومك كلها مي لا تفوت بيهن وانتِ ماما كبل للحمام اسبحي وذبي ملابسج بالغسالة بسرعة
شهم : وشنو انزع هنا ؟ ماعندي بيت ؟
سمر : شهم اذا وسخت البيت انت تمسحه
تقرب مني ولزمني من شعري
شهم : ولج لا عبالج ساعدتج بالحوش تستغليني
سمر : الكاع تنكعت هاي شبيك؟
شهم : والله صدك ؟ هو منو بللني غيرج ؟ وبعدين شنو هذا اللبس ؟
سمر : شبيه ؟
شهم : اشو لبسنا تغير كله شورتات وتصلخنا شنو سالفتج ؟
سمر : ابيتي ترى ما لابستهن برا
شهم : يعني قصدج لابستهن الي ؟
سمر : لا طبعاً
شهم : اي مو انه مو رشدي اباضة
التفت على التلفزيون اشر عليه وكال
شهم : هي هاي الافلام فسدتج علية ، لا وقت للحب ! حلوو بطولة فاتن حمامة ورشدي أباضة وياها لا ؟
سمر : وين اخلص وقتي ؟ حتى هاي ممنوعه منها ؟
شهم : اي باوعي ما مانعج بس مو لدرجة تتعلقين بشخصية ممثل وتفضليه على زوجج
سمر : ها طلعت انت اللي جنت بالبيت وسمعتنا ولهذا السبب دزيت علية فوك تريد تحجي وياي ؟ ما تحملت تضمها بگلبك وتريد بس تتعارك
شهم : هو غير جنت كاعد على اعصابي انتظرت العقد يخلص حتى اطيح حظج
سمر : وعلى شنو اتطيح حظي ترى كل بنية بمراهقتها تحب مطرب لو تتعلق بفنان مو بس انه..
شهم : مو على اساس مراهقتج كلها خلصتيها تنوحين علية ؟
سمر : اي جنت ، فايتة انام نعست ؟
شهم : لا تغيرين الموضوع
سمر : يا موضوع ؟
شهم : لبسج
سمر : شبيك شهم غير بالبيت ؟
شهم : وبالبيت تطلع عينج وتصيرين رعنة ؟
سمر : لازم عجبوك هذا ذوق ريحانة
شهم : هم ريحانة ؟ ما اخلص منها ؟
سمر : شبيك وياها البنية مريضة وجايبها اخوك حتى تتعالج
شهم : لا ما جاية تتعالج جاية تهجم بيتي
سمر : ليش شنو سوت حتى تهجم بيتك ؟
شهم : هو منو طلع عينج علية غير صخمانة
سمر : انت بس تريدلك شماعة وتعلك عليها اخطاءك ، المهم اكو شخص تحمله ذنوبك بريء مذنب ما يهمك ...
شهم : سمر لا تخبليني انتِ شبيج ؟
سمر : انت اللي شبيك ؟ تدقق على أقل شغلة اسويها وكل شي ما عاجبك...
تركته ورحت لغرفتي لفيت راسي ونمت ...
ريحانة : غريب اليوم سمر ما اجت ورحت اشوفها تلاكيت وية زوجها بالباب تالي رجعت
يوسف : خابرتني الصبح من راحوا لبيت عمي قادر جان تعبان شوية وكالت راح تتأخر حتى انه امرلج واجيبلج أكل
ريحانة : خير شبيه ؟
يوسف : شهم يكول محتاج غسل كلى
ريحانة : يا خطية ليش ؟
يوسف : صاعدة عنده اليوريا وعنده ضعف بوظائف الكلى
ريحانة : معناها عنده فشل كلوي ؟
يوسف : تقريباً والفحوصات أكدت عنده احتباس سوائل
ريحانة : ولو ما اعرفه بس مبين طيب اللي ربى سمر وطلعها بهاي الأخلاق أكيد هو مثلها
يوسف : عمي طيب وأصيل وصاحب مواقف حلوة ، انقهرت عليه والله ..
ريحانة : الله يعينها لسمر شنو صار بيها من سمعت بالخبر
يوسف : ما تدري
ريحانة : ليش ما كلتولها ؟
يوسف : شهم ما حجالها وانتِ هم لا تحجين شي كدامها
ريحانة : بس أكيد راح تعرف
يوسف : شهم كال انه امهدلها الموضوع حتى لا تنصدم
ريحانة : خطية الله يعينهم وياربي يشافي عمك
يوسف : آمين ، هسه خلينا بسالفتج
ريحانة : اكو تطور جديد ؟
يوسف : اول شي انتِ حالياً مو على ذمة قسور ، هاي الحسنة الوحيدة بموضوعج
ريحانة : ما تفرق عندي سواء جنت زوجته او لا بالحالتين هو ميت بالنسبة الي
يوسف : عوفج منه هسه وتعالي احجيلي ليش اسمج طلع من المطلوبين ؟ شنو مسوية ؟
صفنت عليه منتظرني اجاوبه رجع عاد نفس السؤال علية ، باوعت بعيونه وحجيت ..
ريحانة : سؤالك هذا شك لو استفسار ؟
يوسف : انه ما اعرف شي عن ماضييج لهذا ما أكدر احدد اذا جان شك او استفسار
ريحانة : الوضوح بالكلام حلو
يوسف : وانه هم أريدج تكونين واضحة وياي
ريحانة : شنو تريد تعرف ؟
يوسف : شنو مسوية ؟
ريحانة : شنو اللي ييجي ابالك اعتبرني مسويته
صفن علية بعدها كال
يوسف : تريدين تستفزيني بجوابج لو شنو ؟
ريحانة : لا طبعاً
يوسف : يعني انه حالياً اعتبر متستر على وحدة مجرمة وكاعد اعالجها ابيتي ؟
ريحانة : تكدر تكول هيج بس للتصحيح اني مو مجرمة وانما مريضة واللي اعرفه المريض ما يتحاسب ولا ينحكم
يوسف : بس ياخذوه لمصح نفسي يتعالج بيه ويكون تحت الرقابة
ريحانة : جنت بمصح وانت اللي وقعت على خروجي معناها اني تشافيت بشهادة دكتور استشاري ، وكونه دكتور استشاري من المنطق يكتب تقارير رسمية عن شفاء مرضاه وخروجهم من المصح وعن المخالفات والإهمال ويشهد بصفته المهنية على ما شاهده بنفسه ، يوقع التقرير باسمه وصفته العلمية ويطلب تحقيق فوري في حال وجود مخالفات تهدد سلامة المرضى ، ويكدر يخاطب الجهات العليا بشكل طبيعي جداً ..
يوسف : اللي فهمته من كلامج هذا تهديد ؟
ريحانة : اعتبره تهديد عادي ماعندي مشكلة..
يوسف : شنو قصدج ؟
ريحانة : في حال فكرت تسلمني اجيب رجليك للتحقيق
يوسف : تهدديني ؟
ريحانة : شلون ما تفهمها افهمها
تركته وكمت للغرفة صاح
يوسف : بس انه ما كملت كلامي
ريحانة : واني ماعندي شي احجيه الك
كام من مكانه ولزم إيدي نترتها منه وهمست
ريحانة : دير بالك تلزمني مرة ثانية
يوسف : بديت اخاف منج
ريحانة : مو اخوك حذرك ؟ ليش ما أخذت بحجايته ؟
يوسف : اخوي ؟ منو منهم ؟
ريحانة : شهم
يوسف : وانتِ شلون عرفتي ؟
ريحانة : عرفت بطريقتي
يوسف : انتِ شبيج انكلبتي فجأة ؟
ريحانة : الدكتور الما يحافظ على اسرار مريضه ما يستاهل كلمة الدكتور ...
تركته حاير ومشيت
سمر : بس هو ما حاجي شي لشهم انه متأكدة ، ليش هيج تعاملتي وياه ؟
ريحانة : زوجج كالي أكثر من مرة وآخرها اليوم مرة عن أذيتي ليوسف ولازم ابتعد ومرة عن اللي صار ، وسكتت
سمر : شنو اللي صار ؟
سكتت لأن ما ردتها تعرف بالسواه قسور بية كدام عيون يوسف ...
سمر : ليش سكتي ؟
ريحانة : سكتت لأن يوسف متقصد يأذيني
سمر : شلون يعني يأذيج ؟ ريحانة يوسف حرك نفسه وخسر مستقبله وتعارك وي اهله علمودج
ريحانة : لا مو علمودي ، وهسه هو بإجازة يكدر يقطعها ويداوم شوكت ما يحب بس هو ما مستعد لهالشي ..
سمر : ليش ما تكولين فرغ نفسه علمودج ليش تكولين ما مستعد ؟
ريحانة : الصراحة ما كمت اثق بيه
سمر : ليش
ريحانة : من كلام زوجج
سمر : غير اعرف شنو حجى وياج ؟ وليش ما واجهتي يوسف باللي سمعتيه على الأقل تفتهمين منه بدون ما تظلميه ..
ريحانة : اكو شغلة صارت وما يعرفها غيره شلون زوجج عرفها ؟ غير هو حاجيله ؟
سمر : شنو كالج بالضبط ؟
ريحانة : قبل لا اجي هنا اتصلت على يوسف وهو رد علية ومن ضمن الكلام كال اعرف كل شي ويوسف حجالي كل التفاصيل واليوم من اجيت عليج وشفته بالباب رجع ذكرني بيها
سمر : وشنو جانت غايته من حجى وياج هيج ؟
ريحانة : ما اعرف شنو غايته بس كالي بصريح العبارة انتِ هنا خطر علينا كلنا والأحسن تطلبين من يوسف يكمل علاجج بمصح حتى لو جان أهلي احنا مستعدين نتكفل بكافة مصاريفج المهم تكونين بعيدة عنا وعن عوائلنا
سمر : اسمعيني شهم صحيح قاسي ومرات يحجي كلام يجرح بيه المقابل بس اذا صارت صدك وتأذيتي من شي أول واحد يركض ويساعدج هو ...
ريحانة : سمر اني ما الي شغلة بنيته شنو لو بشنو يفكر اني علية باللي سمعته منه والتهديدات اللي شفتها بعيونه...
سمر : والحل ؟
ريحانة : اروح منا
سمر : وين تروحين ؟
عصرت عيوني ما اريد دمعتي تنزل ، باوعتلها وهمست
ريحانة : هو هنا المشكلة وين أروح ؟ ماعندي أحد اروحله
سمر : دام ماعندج مكان تروحيله معناها هذا مكانج وشنو تسمعين حاولي تتجاهلين الى ان تصيرين زينة وساعتها نلكى الف حل
ريحانة : بس اني تعبت
سمر : هنا أأمن مكان الج صدكيني ، لا قسور ولا غيره يكدر يوصلج
ريحانة : من بلغ عني أكيد نطاهم عنوان بيتكم ومو بعيدة يسحلوني سحل منا واطلع بفضيحة الي وليوسف وهو الراح يتأذى صدكيني ...
سمر : لنفرض فعلاً اجوي احنا راح نسمع قبل جيتهم للبيت والف مكان اكو نكدر نضمج بيه
ريحانة : برأيج يوسف راح يسمح لنفسه يتستر على وحدة مجرمة ؟
سمر : ليش انتِ شنو مسوية ؟
ريحانة : البلاغ هيج يكول ويوسف سألني كال يعني هسه اني متستر على وحدة مجرمة كلتله ليش ما تكول مريضة ؟
سمر : وشنو جاوبج ؟
ريحانة : عوفج من جوابه وكوليلي شنو اسوي ؟
سمر : لا تتصرفين من راسج وعوفي يوسف يحلها ..
ريحانة : سمر
سمر : نعم
ريحانة : انتم عادي عندكم تجي بنية ما تعرفوها وتبقى يمكم وتحت حماية واحد من ولدكم بدون ما يكون شي رسمي بينهم ؟
سمر : شوفي هنا عاداتنا ما تسمح بهذا الشي بس اذا اجتي بنية غريبة واتنخت بيهم مستحيل يخلوها تمشي بدون ما يلكولها حل
ريحانة : بس ما رضوا على جيتي وسووا مشكلة ليوسف
سمر : صحيح لأن وراج مشاكل وخايفين على يوسف بعد اللي صار بيه ..
ريحانة : شفتي معناها محمليني ذنب الصار ، لهذا ما أريد ابقى هنا أكثر و المنطق يكول المفروض اطلع بكرامتي وما أأذي اي أحد ماله ذنب بمشاكلي ، و كعدتي هنا اكبر غلط سويته...
سمر : لا موغلط شوفي اكو بنية اسمها سهر صارلها فوك السنة يمنا محد حجى ولا جاب طاريها ولاحتى فكروا مرة يرجعوها منين ما اجت ، بس راحوا سألوا عنها وعرفوا ماكو وراها ولا كدامها ولا راح تسببلهم مشاكل وعاملوها احسن معاملة وروحي شوفي بعينج المشتمل الكاعدة بيه مرتب وكل شي متوفرلها ، لا تظلميهم لمجرد خوفهم على ابنهم واتوقع هذا من حقهم ...
ريحانة : أعرف من حقهم
سمر : بعد شكو ضايجة وتريدين تروحين منا بعد ما تعلمت عليج وحبيتج ..
ريحانة : اسألج سؤال وجوابيني بصراحة
سمر : تفضلي
ريحانة : اذا صار شي لواحد عزيز عليج وتأذى بسببي غير يوسف ، راح يكون هذا كلامج وياي نفسه ؟ لو ممكن تلوميني حتى لو بداخلج وتحطين السبب بية ؟ وتكولين ياريتها ما اجت لهنا ولا شفناها..
سكتت ما جاوبتني
ريحانة : شفتي معناها راح تلوميني
سمر : اذا يوسف او غيره كلهم عزيزين علية بس ان شاءالله ما نوصل لهيج مرحلة
ريحانة : اذا قسور اندل مكاني راح نوصل للأكثر صدكيني وهذا المكان يتحول لمجزرة اذا عرف اني بيه
سمر : ريحانة لا تخوفيني
ريحانة : دا احجيلج الصراحة ، واحد مجرم وإيده واصله ويريدني مو محبة بية بس روحه ومستقبله بيدي ، صح ممكن هسه اعترفوا عليه وممكن لا ما أدري بس اللي أعرفه ما عندهم ادلة كافية تدينه ، الأدلة كلها عندي صوت وصورة وهذا اللي مخوفه مني
سمر : بس حسب اللي سمعته منج هو تركج بالبيت وانهزم لو يخاف منج جان آخذج وياه لأي مكان يروحله ليش يتركج وحدج وانتِ عندج مثل هيج أدلة عليه
ريحانة : لأن يعرف ماعندي مكان اروحله
سمر : بس مو يتركج ٣ ايام بالبيت بدون ما يرجع او على الأقل يحط حراسة عليج
ريحانة : ومنو كالج ما حط حراسة يراقبوني ، من طلعت بيومها جانت اكو سيارة تلحكني وضيعتها ودخلت للسوك
سمر : وليش ما نبش المنطقة عليج ؟
ريحانة : هو ليش بلغ برأيج ؟
سمر : ليش؟
ريحانة : حتى يلكاني
سمر : شلون يلكاج وانتِ تفوتين سجن وغيرها ممكن تعترفين عليه...
ريحانة : شوفي بالقانون اذا حطلي محامي وثبت معاناتي من مرض عقلي يخليني أفقد الإدراك أو الإرادة وقت ارتكاب الجريمة او غيرها ، ما تعتبر مسؤولية جنائية والمحكمة راح تعرضني على لجنة طبية نفسية مختصة لتقييم حالتي ، واذا ثبت صحة ادعاءه بمرضي ما راح اتعاقب عقوة جنائية ، وراح تقرر المحكمة نقلي لمستشفى الأمراض النفسية لغرض العلاج والحماية وهو هنا لعبته ، لو ييجيني بنفسه لو يسلط علية ناس تلعب بعقلي وبعلاجي وتدمر نفسيتي الى ان اعترف بمكان الأدلة وبعدها يخلص مني بإبرة صغيرة اني ونايمة ..وحتى اذا أعترفت عليه محد ياخذ بكلامي لكوني مريضة نفسياً
سمر : بس مرة سمعت من يوسف على اساس هو جان يريد منج ترجعين الورث اللي آخذتيه من ابوج وتتنازلين عنه وتنازلتي ، وهيج خلصت مشكلته وياج
ريحانة : يوسف ما يدري عندي أدلة عليه البارحة يلة عرف بيهن
سمر : وانتِ ليش ما حجيتيله كل شي ، ليش ساكتة
ريحانة : من جنا بالمصح طلب مني احجيله كل شي وكلتله ابتعد وحذرته أكثر من مرة كلتله ثمن الكلمة روحي واذا انت عرفت ما راح يخلوك تعيش بس هو ظل ينبش وراهم ويدور أدلة عليهم وشفتي شنو صارله ، هسه اذا حجيتله كل شي اعرفه ما راح يبقى ساكت وراح يروح يدور على الأدلة بنفسه ويكتشف اشياء جديدة واعرف نهايته التهلكة لهذا اني ساكتة مو لأن اريد اسكت او اتستر على واحد بيهم بس خايفة عليه وهو مدايفتهم هذا الشي ، والصراحة كلام شهم صحيح ولازم اعوف هذا المكان بأسرع وقت ..
سمر : هذا اللي صار بينا حجيتلك كل شي
وكف حاير ما يعرف شنو يحجي وشنو يكول
سمر : يوسف كلام ريحانة صحيح ، ضلتها هنا مو صحيحة وممكن تسببلك مشكلة
يوسف : وين ادويها ؟ هنا أأمن مكان الها ، ياسمر انه هم حاير ، من جهة مقهور عليها ومن جهة ثانية ميت رعب وخايف على اهلي لا يصيرلهم شي بسببي وابقى طول العمر عايش بندم كوليلي شنو أسوي؟
سمر : شوفلها بيت بعيد عن هنا وانه مستعدة اروح وابقى يمها بين ما تهدأ الأمور
يوسف : وعلى اساس بكيفي وبكيفج نطلع ونأجر ونعيش بعيد عنهم ، لا اهلي راح يسمحون بهذا الشي ولا شهم
سمر : فكر بيها راح تشوف هذا انسب حل
يوسف : يعني برأيج أأجرلها بيت ؟ بس لازم انه اروح وياها وشلون افهمهم بهذا الشي ؟
سمر : كوللهم أريد ارجع لدوامي محد راح يعترض
يوسف : خليني أفكر بيها من كل النواحي ويصير خير
سمر : هي قاتلة أحد ؟
صفن عليه حاير بشنو يجاوبني
سمر : ريحانة مجرمة ؟ سألتك جابوني
يوسف : حجتلج شي ؟
سمر : لا ما حجت بس كالت الدعوة اللي عليها جنائية ماكو غير القتل ، واحتمال دخلت بنوبة وخنكت واحد او وحدة، حاولوا يساعدوها وقتلتهم مثل اللي سوته وياي قبل فترة او ممكن استخدمت سجين او مسدس ، انت شمدريك بماضيها كل شي ما تعرف عنها
يوسف : وهذا اللي مخوفني كل شي ما أعرف عنها
سمر : معناها مخاوف شهم بمحلها لا تلومه
يوسف : ما ألومه بس عتبي عليه ليش يحجي وياها وما اجى حجى وياي ؟
سمر : تعرفه ما يجامل ولا يلون الكلام قبل لا يحجيه ، ويحجي اللي يريده حتى لو يجرح المقابل ما يهتم من جانبه يشوف اللي دايسويه هو الصح ..
يوسف : هو صح وابوي صح وكلكم صح بس انه حاير لابية اتخلى عنها ولا كادر اساعدها واطلعها من اللي هي بيه وبنفس الوقت خايف على أهلي لا يتأذون ، سمر انه ليلي مدا انامه وصارلي أشهر ما أعرف طعم الراحة شنو ، عقلي يودي ويجيب وما اسمع غير الملامة والتحذيرات ، تخيلي ابوي قبل كم يوم يكولي اذا شغلة اجتنا من الله اكول انت سببها ، احجيلي شنو الحل ؟ راح اتخبل ...
سمر : الحل تروح لأهلك وتحجيلهم ، تكوللهم اهلها اجوي وسألوا عنها وراح اوصلها الهم وراها ترجع هنا تبقالك يوم يومين وتكوللهم أريد ارجع لدوامي ، بس انت راح تبقى يمها
يوسف : راح تبين جذب
سمر : شلون ؟
يوسف : أول شي شهم يعرف بكل التفاصيل ويعرف ما عندها أحد غير أمها ودخلت مصح وثاني شي من راح اكول رجعت لدوامي برأيج شهم ما راح يدور وراية ويسأل ؟
سمر : حط شهم بالصورة وخليه يساعدك
يوسف : شهم قافل عليها وما يريدني اساعدها وحتى كلام بينا ماكو شبه متخاربين انه وياه من يوم اللي جبت ريحانة لهنا ...
سمر : والحل ؟
يوسف : أرجعي أحجي وياها بلكت تحجيلج شي يكدر يفيدنا ونفكر بطريقة ثانية
سمر : بس سالفة البيت لا تتهاون بيها حاول تأجرلها بأسرع وقت في حال صار شي كبل تاخذها بيه
يوسف : إن شاءالله ، أرجعليها هسه وبعدين نحجي
سمر : يلة هسه رايحتلها كمل جايك برد مو ؟ اجدده ؟
يوسف : لا تسلمين رايح أفكر بالمصيبة اللي أجتنا غفل وأشوف شنو ممكن أكدر أسوي
سمر : تمام دير بالك على نفسك
يوسف : إن شاءالله
سمر : راح ترجع يمها لو لا ؟
يوسف : لا صارت مشادة كلامية وما أتوقع حابة تشوفني ولا انه مستعد أحاجيها
سمر : يلة انه رايحتلها ونشوف شنو يطلع منها
يوسف : إن شاءالله تحجيلج شي نكدر نستفاد منه..
سمر : الله كريم أحاول وياها ونشوف شنو يصير ...
طلع وانه رحت للمطبخ سويت كم شغلة ورجعت للغرفة لبست حجابي ورحت لغرفة فطومة ..
سمر : ماما كملتي أكلج ؟
فاطمة : اي
سمر : يلة فرشي أسنانج ونامي من وقت ، راح أطفي التلفزيون
فاطمة : ماما بس تخلص هاي الحلقة وباجر عطلة ما أريد انامن من وقت
سمر : بس حلقة وحدة وتنامين واذا رجعت وبعدج كاعدة أزعل منج
فاطمة : بابا وينه ما ييجي ينام يمي ؟
سمر : البارحة نام يمج خوما كل يوم ؟
فاطمة : وليش مو كل يوم ؟
هسه هاي شلون أفهمها ، رحت كعدت يمها مسدت على شعرها وحجيت
سمر : ماما انتِ كبرتي وصرتي أمورة وحلوة وتفتهمين الكلام صح ؟
هزت راسها بأي
سمر : وبابا صار عنده بيت ثاني بيه ....
سكتت الغصة سكنت صدري ، مسحت وجهي وكملت
سمر : بيه زوجته وراح يصير عندج أخو صغير مو حجالج بابا عنه ؟
فاطمة : اي
سمر : هو لازم يبقى يمهم حتى يدير باله على أخوج
فاطمة : وأخوي وينه ليش انه ما أشوفه ؟
سمر : أخوج ابطن أمه بعده صغير من يكبر راح تشوفيه
فاطمة : والعب وياه ؟
سمر : أكيد طبعاً تلعبين وياه ، يلة أمي مثل ما وصيتج وانه ما اتأخر عليج أروح أشوف خالة ريحانة وأجيج تمام ؟
فاطمة : تمام ماما
سمر : أروح فدوة للتمام
بستها وطلعت قفلت الباب ونزلت الدرج ، بيتي وبيت ضحى مشترك اباب وحدة يعني لازم أنزل للحديقة يلة أطلع من الباب ، بالبداية جان بابي وحد بس عمي لغاه ما أعرف ليش ، المهم من نزلت لكيتها واكفتلي يم الدرج تريد تصعد شافتني وتخصرت...
سمر : خير إن شاءالله حلمانة بية ؟
ضحى : شهم وين ؟
التفتت منا ومنا ورجعت عاينت بهدومي وعاينتلها
سمر : ما ضامته فتشيني اذا حابة
ضحى : أحجي وينه ؟
سمر : شنو ضاع منج ؟ أمشينا ندوره
ضحى : سألتج وجاوبيني مثل الأوادم
سمر : لازم طفشتيه منج ومن مشاكلج وجاية تدوريه عندي ؟
ضحى : ما كفاج النهار كله يمج ؟ تريديه بالليل هم
سمر : والله عاد هو رجال شكبره شكده ما تلزمه مرة لو ينلزم جان لزمتيه وكعدتيه يمج مو جاية تدوريه ابيتي
ضحى : صعد فوك مو ؟ أحجي
سمر : ويصعد وين المشكلة ؟
ضحى : على شنو يصعد ، اليوم المفروض يكون يمي مو يمج
سمر : المفروض بس شنو اللي يمنع اذا حب يصعد يشوف بنته مثلاً ؟
ضحى : بنته
حجتها وضحكت مستهزءة
سمر : اي بنته عندج شك بهالشي ؟
ضحى : لا ماعندي بس يمكن يكون عند شهم
سمر : شنو قصدج ؟
ضحى : قصدي واضح وتعرفين كلش زين أبوها منو
سمر : أبوها شهم ، واذا عندج حجاية أحجيها بوجهي لا تلفين وتدورين بالكلام..
ضحى : كلش عيب على الوحدة تحبل من واحد وتذبها بلائها براس واحد ثاني وتحاول تنتحر حتى بس يلم فضيحتها بين الناس ويتستر عليها ..
سمر : منو تقصدين بكلامج ؟
ضحى : كلامي واضح بس المقابل فهمه بطيء وعلى كده او هو يحب يعيش دور الغبي الما فاهم شي
جسمي كله كام يرجف ما عرفت شنو أجاوبها..
ضحى : عبالج اني غبية وما اعرف شنو اللي صار وطلكج مرتين ولزكتيله ، تعرفين ليش ؟ لأن انتِ وحدة ما عندها ذرة من الكرامة وتبقين طول عمرج تركضين ورا واحد متزوج وهو مو بحالج..
لساني تربط ما كدرت أجاوبها تركتها ورحت لريحانة ، فتحت الباب لكيتها كاعدة بالهول ، أنهاريت بحضنها وكمت أبجي وأصرخ بقوة ..
ريحانة : سمر شبيج خير ؟ شنو صير وياج ؟ سمر أحجي
سمر : شهم ريحانة شهم طلع واحد كلش نذل فوك ما تتصورين
ريحانة : ليش شنو سوى بعد ؟
وخرت من حضنها وحجيتلها اللي سمعته من ضحى وهي صافنة علية
سمر : طلع حجي رفل صحيح يعني شاكك بنسب بنته ومسوي التحليل
ريحانة : ومنو يكول ما رفل حجتلها ؟
سمر : مستحيل ما تتجرأ
ريحانة : وليش ما تتجرأ . انتِ ضامنتها ؟
سمر : رفل مو بالسوء هذا ، احتمال حجت هيج شي كدامي حتى بس تخوفني وما أحجيله ليوسف عنها
ريحانة : واحتمال تريد تطش الخبر حتى تلتهين عنها وتسوي اللي تريده شنو هو ما أعرف بس هيج فسرتها
سمر : شجاب رفل عليها اصلاً ما بينهم علاقة
ريحانة : لا واضح أكو بينهم حجي
سمر : شلون عرفتي ؟
ريحانة : البارحة بالمهر من اجتي اخت يوسف وصاحتج وراها انتِ صعدتي فوك ...
سمر : زين
ريحانة : شفتها كعدت يمها وما أعرف شنو حجت وياها وراها ضحى تغيرت ملامحها وكامت صعدت وراج بشوية
سمر : شلون عرفتي ضحى ؟ انتِ ما شايفتها
ريحانة : عرفتها لأن انتِ حجيتيلي عن حالتها يعني ميزتها من بين الحضور ...
سمر : زين وراها شنو صار من صعدت ؟
ريحانة : رفل ضحكت بخبث وراحت وكفت يم الدرج وراها من شفتج تأخرتي ضليت كاعدة بمكاني بس ما ارتاحيت حسيت الكل يباوعلي ، رحت للعرفة اللي غيرنا ملابسنا بيها ... وحجيتلها اللي صار بيني وبين رفل
سمر : يعني قصدج احتمال هي حاجيتلها ؟
ريحانة : مواحتمال أكيد هي حجتلها وضحى استغلت الفرصة حتى تأذيج او تزرع الشك بگلبج اتجاه زوجج وبالفعل صار اللي تريده..
سمر : بس يبقى هذا الموضوع بيه أنه وشهم مسويه بس ما حاجي لأحد ورفل عرفت بطريقة معينة واجت حجتلي..
ريحانة : كلتلج روحي حاجيها وسجلي كلامها وراها واجهي شهم بيه وريحي راسج من كل هذا..
سمر : رايحتلها
ريحانة : هسه ؟
سمر : اي ما أتحمل أبقى دقيقة وحدة اذا ما عرفت الحقيقة
ريحانة : أفتحي تسجيل قبل لا تروحين
سمر : هسه افتح الكاميرا وأسجل كل كلامها
ريحانة : لا الكاميرا تبين وتعرف داتسجليلها ، أفتحي تسجيل صوتي احسن..
سمر : ما أعرف شلون ؟
ريحانة : جيبي موبايلج وأعلمج منين تسجلين
آخذت موبايلها وعلمتها شلون تسجيل ، آخذته وطلعت راحت لبيت عمها وكفت كبال بابهم ورجليها ترجف ، خايفة تتأكد من الحقيقة ، جانت تريد اي سبب او اي كلمة تنفي الشكوك اللي انزرعت بعقلها لأن اذا تأكدت معناها سمر ماتت وانتهت ، جانت تحجي وية نفسها هذا الكلام قبل لا تروحلها ..
اعاين على إيدي ترجف ، ياربي شلون اذا واجهتها ؟ وشلون اذا طلعت الحقيقة مطابقة لكلام رفل وتلميحات ضحى ، ساعتها شنو اسوي ؟ وين أروح ابنتي وشلون اخلص من كلام الناس ، ياربي معقولة كلها تدري بس انه لا ؟ صرت حتى أخجل اعاين بعيونهم احسن الكل يدري بالموضوع وضامين علية ...
تقربت دكيت الباب طلع عمي ، شافني أنصدم من وضعيتي
راضي : شبيج بنيتي سمورة ؟
هو كال هيج لو عبالك فتح جروح گلبي ورش عليهن ملح ، تقربت حضنته وشهكت أبجي ...
راضي : شبيج بنيتي ، صاير شي ؟
سمر : الدنيا جارت علية هواي ، عمو تعبت منها ومن الناس تعبت كلش..
راضي : منو وياج ؟
بعدني عن حضنه وعاين بعيوني وكال
راضي : شهم وياج ؟
زدت بالبجي أكثر ، أحتار شلون يسكتني
راضي : تعاي بنيتي فوتي يم البنات غيري جو وياهن
أخذني من إيدي ودخلنا جوا للبيت وصاح على ريمة تجيب مي ، راحت جابت سراحية وكلاص عاينتلي وكالت
ريمة : شبيج سمر ليش تبجين ؟
آخذ منها كلاص المي وقربه من حلكي وكال
راضي : هاج بوية أشربي بللي ريكج
آخذته منه بإيد ترجف شربت شوية ورجعته بيده
راضي : تعالي أكعدي أرتاحي
كعدت بالهول على أعصابي أريد أروحلها وأحجي وياها
التموا علية يسألوني هو وريمة ومرته وانه بس أبجي بشهكة ، عاينتلهم وهمست بخنكة
سمر : رفل وين ؟
راضي : ريمة روحي شوفي أختج اذا كاعدة صيحيها تحجي وياها وترتاح ، رفل صديقتها بلكي تهون عليها
ريمة : صار يابة
سمر : لا انه أروحلها أريد أحاجيها وحدنا
راضي : روحيلها بنيتي بغرفتها تلكيها
كمت من يمهم ورحتلها فتحت الباب وعلكت الضوا رفعت راسها عاينتلي ورجعت تنام ، سديت الباب ورحت وكفت فوك راسها
سمر : كومي أريد أحجي وياج
رفل : ولي من وجهي
سمر : لا تخليني أحرك الأخضر واليابس كومي كلت
رفل : شتريدين ؟
سمر : الحجي اللي حجيتيه الية قبل كم يوم عن التحليل ، حجيتيه لضحى ؟
أرتبكت وبعدت نظرها عني
سمر : جاوبيني
رفل : شداتحجين انتِ
سمر : تحليل النسب مال بنتي مو كلتي شهم سواه ؟ ضحى شلون عرفت بيه وكعدت تلمحلي بالكلام
رفل : وشمدريني منين عرفت روحي اسأليها
سمر : ما اسألها انتِ جاوبيني
رفل : كلتلج ما أدري
سمر : شنو اللي متدرين بيه بالضبط ؟
رفل : الموضوع كله ما أدري عنه
سمر : شلون ما تدرين ؟ انتِ مو حجيتيلي عنه من جنا ابيت يوسف ؟
رفل : ماحجيت هيج شي
سمر : ولج حرام عليج تعيشيني بشك ، أحجي شهم مسويها لو لا ؟
رفل : روحي اسأليه وتأكدي بنفسج
سمر : واذا نكر راح تفتحين علية باب ما ينسد ، أحجي لو أروح لعمي وأحجيله كل شي والله
رفل : جواب سؤالج مو عندي
تقربت منها ضربتها على راسها وحطيت إيدي على ركبتها أريد أخنكها ، دفعتني بقوة ردت أوكع ، انه جنت بقمة التعب واليأس وهي مرتاحة وجانت أقوى مني ، ما كدرتلها
سمر : أحجي شنو تعرفين وانه ما أعرفه ولج انه شنو سويتلج حتى هيج حاقدة علية هالحقد كله وتزرعين الشك بگلبي وتسودين عيشتي
رفل : ولي من وجهي كلت
سمر : تعاديني علمود واحد ما يحبج ولا يدري الله وين حاطج ؟
رفل : دمشي ولي لج ، جاية تعيريني بيوسف ؟ روحي شوفي ماضييج شنو وبعدين تعالي اوكفي كبالي وعيريني هاي اذا عندج عين تباوعين بعيونا بعد اللي تعرفيه
سمر : ليش شبيه ماضيي حتى أستعير منه؟ لدرجة ما أكدر اعاين بعيونكم؟
رفل : والله لو تعرفين الأعرفة ساعة وحدة ما تبقين عايشة
سمر : شنو قصدج ؟ أحجي لا كل نوبة ذابتلج حجاية ورايحة ، أحجي شنو تعرفين لو أكلبها عزة عليج
رفل : الجواب يم الماما والحب مالج روحي واسأليهم مو جاية علية ، وبعدين ما تشوفين رجلج شايفج بالعين الصغيرة وما محترمج ، شوفي تعامله وي ضحى رغم متشوها فد يموت عليها
سمر : حسبي الله عليج من شيطانة ، ولج ما جنت أعرفج والحمد لله من أجتي ريحانة واختلطت بيها حتى أعرف معدنج الحقيقي شنو
رفل : وانتِ معدنج شنو ؟ على الأقل انه عائلتي معروفة منو وعايشة بوسطهم مو مثلج
سمر : وليش انه ما عندي عائلة ؟
رفل : ولي أريد انام كلت
سمر : نامي إن شاءالله ما تكعدين يارفل على حركة گلبي اللي صارت بسببج
تركتها وطلعت عمي صاحني ما رديت عليه ، رحت لبيت أهلي دكيت الباب كسرتها ، فتحها ليث عاينلي وكال
ليث : ها سمر خيرج ؟
سمر : هسه عرفتها لسمر ؟ أمك وين ؟
ليث : بالمطبخ
دخلت للبيت أركض لكيتها واكفة بالمطبخ تسوي عشا ، وكفت كبالها أرجف ودموعي تنزل عاينتلي وكالت
صالحة : خيرج ؟
سمر : انتِ هم حاسبة نفسج أم ؟
صالحة : شبيج اليوم حلمانة بية ؟
سمر : بس كليلي انه بنتج لو لا ؟ مو من لحمج ودمج ؟ مو حالي حال أخواني لو لكيتيني على باب جامع و...
قاطعتني وصاحت
صالحة : يمة مناسك جيبي الخبز وحميه حتى نتعشى
التفتت علية وكالت
صالحة : تتعشين ويانا ؟
سمر : شلون نطاج گلبج هيج تسوين بية ؟ ها شلون ؟
صالحة : شبيج بابا ؟
سمر : ولج يوم انه جاي أموت وانتِ ما حاسة بية
صالحة : هم رجلج الشفية مزعلج ؟ روحي لبسيله سيت نوم ورضيه مثل كل مرة
صفنت عليها باهتة
صالحة : شبيج صافنة ؟ روحيله بليلة وحدة ترضيه ويرجع ثاني يوم يهيج عليج مثل الثور
سمر : انتِ منين تعرفين خصوصياتي حتى تحجين بيها ؟
صالحة : دروحي عيني ام الخصوصيات هو منو ظل ما يدري بيها
سمر : انه ماحاجية غير ل ..
وسكتت سري جان عند رفل أكيد هي فاضحتني الحقيرة جنت أحجيلها حتى ما تعيد غلطتي وتنتبه لنفسها وتختار صح بس هي بشنو جازتني ؟ فضحتني وطلعت اسراري كلها
سمر : عوفج من شهم انه اجيت أحجي وياج
صالحة : مابينا حجي من زمان ، هسه يلة عرفتي عندج أم وتجين تحاجيها
سمر : انتِ شنو من گلب عندج أريد افتهم
صالحة : باعي روحي واصلة لخشمي ما عايزتج
حطت الأكل بالصينية وصاحت على ليث يجي ياخذها للهول حتى يتعشون ودارت ظهرها تريد تطلع من المطبخ ، الحجي بالكوة طلع منه وهمست
سمر : انتِ شلون كدرتي تذبيني بالتنور وجان عمري شهرين ؟ ما خفتي يصيرلي شي بالبرد لو تاكلني الجلاب ؟ ما وجعج گلبج علية ؟ والله انه فاطمة اذا نامت بدون عشا أكعد يم راسها وأبجي احس مقصرة اتجاهها
التفتت علية وكالت
صالحة : تمنيت بوقتها لو حاطة حطب عليج وحاركتج ولا وكفتج هاي كبالي وتحاسبيني
سمر : يعني صدك انتِ ذابتني بالتنور ؟ تدرين جنت كل يوم اغالط نفسي واكول أكيد أمي رحيمة متوهمة لو حجت هيج حتى انساج بس طلعتي صدك مسويتها ؟
صالحة : موضوع قديم شذكرج بيه هسه ؟
سمر : ابوي يدري ؟ بس أريد أعرف شنو سويتلج حتى تسوين بية كل هذا ؟
صالحة : يمكن الذنب مو ذنبج انتِ بس
سمر : ذنب منو ؟ وبس شنو أحجي ؟
صالحة : روحي اسألي ...
وسكتت من دخل ابوي وكف يسمع
سمر : اسأل منو ؟ ليش ما تحجولي الحقيقة ؟ شنو ضامين عني ؟ اسأل منو أمي حاجيني اسأل منو ؟
صالحة : ماكو داعي تسألين ، رحيمة حاجيتلج كل شي وتقبليه واسكتي وعيشي حياتج بعيد عنا لا تبقين تنبشين بالماضي لأن راح تتعبين..
تركتني بناري وطلعت من المطبخ ، عاينت لأبوي وهمست
سمر : وانت يابة شنو تعرف وضامه علية ؟
ابراهيم : تعالي تعشي ويانا وماكو أي شي صدكيني
ضليت أباوعله وأباوع لقساوة گلبه عينه مابيها اي رحمة وما شفت اي محنة اتجاهي ، شنو أجاوبك وانت ظالمني ، تركته وطلعت أركض للبيت دخلت سمعت صوت شهم جوا بالبيت الثاني ، رحت للباب دكيته بقوة فلشته تفلش واصيح بصوت عالي
سمر : ولك شهم أطلع وينك أطلع
طلع فتح الباب يعاينلي خايف ومرته واكفة وراه تعاينلي مبتسمة ...
شهم : خير صاير شي ؟
تقرب لزمني من إيدي نترتها منه بقوة
شهم : فطومة بيها شي ؟
سمر : انه البية انه
شهم : شبيج شكو ؟
سمر : هسه اتطلكني ما ابقى دقيقة وحدة على ذمتك
شهم : هاي شبيج ؟
سمر : كلتلك طلكني
شهم : أمشي نحجي فوك
سمر : مابينا حجي بعد ، كلتلك طلكني كل شي انتهى بينا وحتى على الورق ما أريد ارتبط بيك
شهم : شبيج تخبلتي ؟
سحبني من إيدي بقوة وجرني للدرج جر ، صعد وانه رافضة أصعد وكفت على أول باية ، دنك شالني وصعد ، جنت أدفع بيه بقوة حتى ينزلني
شهم : راح توكعينا شبيج بابا ؟
وصلنا للباب نزلني وكال
شهم : وين المفتاح ؟
سمر : ما أدري ما أدري
تركني واكفة ونزل يجيب النسخة الثانية وصعد يركض فتح الباب ودفعني حتى افوت سد الباب برجله وكف يعاينلي متخصر ويلهث
شهم : يلة أحجي شصاير ؟
سمر : مابية شي أريد اتطلك
شهم : شنو نمتي كعدتي تريدين تطلكين ؟ مو الصبح للظهر جنا سوى وماجان بيج شي ؟
سمر : كل شي بية كل شي بس انه أكابر
شهم : اليوم ابات يمج ونحجي براحتنا
سمر : ما اريدك ما أريد تبقى كبالي دقيقة وحدة
شهم : اهدئي وخلينا نفتهم واذا اقتنعت بكلامج اللي تريديه يصير
سمر : كارهتك أكو أكثر من هذا الشي ؟
شهم : كرهج مو جديد ليش إلا هسه اجيتي وتريدين مني اطلكج ؟
سمر : كلكم كذبتوا علية ، كلكم تعرفون اشياء عني انه ما أعرفها ، أهلي منو وليش أمي هيج تعاملني ، اسراري ليش متطشرة بحلك هذا وذاك ؟ بمنو أثق بعد ؟ بمنو ؟ لا رجال بيه حظ واستند عليه ويصير عكازتي من أكبر ولا أهل بيهم حظ
شهم : وانتِ شنو هسه تذكرتي ماعندج أهل بيهم حظ ؟
سمر : مالك شغل اللي عليك تطلكني وبس
كام يصيح ويكسر بالبيت مثل المجنون
شهم : كافي كافي تعبت منج كافي اسكتي
سمر : كلتلك طلكني واذا تعبت انه تعبت أضعاف تعبك انت دمرتني ما خليت شي بية صاحي مرضتني ...
تقرب مني ياخذ نفسه بصعوبة ويعاينلي حاير
شهم : طلاك ما اطلكج تحلمين
سمر : مو بكيفك
شهم : سمر لو أشوفج تموتين كدام عيوني طلاكج ما يصير
سمر : ليش مو طلكتني مرتين قبل ، مرة لأن مرتك عرفت بزواجنا والمرة الثانية طلكتني وانه حامل ولحد اﻵن ما عرفت السبب
شهم : وطلاك ثالث ماكو انسي
سمر : ليش متسمك بية ؟ شنو سبب تمسكك ؟ فهمني انت مو ...
قاطعني وصاح...
شهم : لو تنطبق السما على الأرض طلاك ما اطلك وراسج ضربيه بالحايط افتهمتي
عافني وطلع ، كمت ابجي واصرخ بصوت عالي ، كعدت بالكاع انمدت إيد صغيرة حضنتني رفعت راسي فطومة ، واكفة ومتدررة على نفسها شفتها تخبلت ...