رواية وكفي بها فتنة
الفصل الرابع والعشرون24
بقلم ايه نصار
في نفس الوقت…
كانت تيا رجعت البيت بعد يوم طويل في كورس الرسم.
أول ما فتحت باب الشقة…
اتفاجئت بطفلة صغيرة بتجري عليها بكل قوتها.
✦ ───────────────────────── ✦
أريج: خالتوووو!
ارتمت في حضنها وهي بتضحك بحماس.
أريج: هنعمل فشار… ونتفرج على كرتون سوا!
✦ ───────────────────────── ✦
ضحكت تيا من قلبها لأول مرة من أيام…
وشالت أريج بين إيديها.
تيا: يا سلام بس كده؟
دا الأميرة أريج تؤمر… وإحنا ننفذ على طول.
✦ ───────────────────────── ✦
خرجت هنا من المطبخ وهي بتضحك وقالت:
هنا: دلعي فيها كمان…
بقالها ساعة كاملة بتسأل عليكي.
دوشتني ومخلتنيش أعرف أعمل أي حاجة.
✦ ───────────────────────── ✦
أريج لفت إيديها حوالين رقبة تيا…
وقالت بثقة الأطفال:
أريج: خالتو تيا أحسن منك…
✦ ───────────────────────── ✦
بصت هنا لبنتها وهي رافعة حاجبها وقالت بتمثيل الغضب:
هنا: نعم يا ست أريج؟
✦ ───────────────────────── ✦
ضحكت أريج بصوت عالي…
وقالت وهي مستخبية في حضن تيا:
أريج: أنا هنام جنب خالتو تيا النهارده…
وإنتِ لأ يا مامي.
✦ ───────────────────────── ✦
انفجرت تيا في الضحك…
بينما وضعت هنا يدها على خصرها وقالت وهي بتمثل الزعل:
هنا: بقى كده؟ أنا اتعمل عليا انقلاب في البيت!
✦ ───────────────────────── ✦
امتلأ البيت بالضحكات…
ولأول مرة منذ أيام…
شعرت تيا أن قلبها أخذ هدنة صغيرة…
حتى وإن كانت مؤقتة.
✦ ───────────────────────── ✦
عند حازم في المكتب.....
✦ ─────
حازم رفع نظره من بين الأوراق…
وبص لسما بهدوء.
حازم: سما… قضية بكرة إنتِ اللي هتحضريها، وإنتِ اللي هتترافعي فيها.
✦ ───────────────────────── ✦
اتسعت عينا سما بدهشة واضحة.
سما: أنا… أستاذ حازم؟
✦ ───────────────────────── ✦
ابتسم ابتسامة خفيفة وهو يقفل الملف اللي قدامه.
حازم: أيوه… إنتِ.
القضية بسيطة، ومش معقدة.
وأنا هكون موجود… هتابع كل حاجة.
فمتقلقيش.
✦ ───────────────────────── ✦
تنفست سما براحة بسيطة…
وهزّت رأسها بثقة امتزجت ببعض التوتر.
سما: حاضر يا أستاذ حازم… إن شاء الله أكون عند حسن ظنك.
✦ ───────────────────────── ✦
التفت حازم إلى مي…
ثم قال بنبرة هادئة:
حازم: يلا… اقفلوا الشغل النهارده.
روحوا البيت، وراجعوا ملف القضية كويس.
بكرة عايزكم جاهزين من الساعة تمانية بالدقيقة.
✦ ───────────────────────── ✦
مي: حاضر يا فندم.
سما: حاضر.
✦ ───────────────────────── ✦
جمعت مي الأوراق…
وأخذت سما الملف بين يديها بعناية.
ثم خرجتا من المكتب…
بينما ظل حازم جالسًا مكانه…
وعيناه عادتا مرةً أخرى إلى الملف المفتوح أمامه…
الملف الذي لم يكن يحمل اسم قضية…
بل يحمل بداية معركة جديدة.
✦ ───────────────────────── ✦
في الجهة الأخرى…
كان ياسين خارج من مكتبه بعد يوم عمل طويل.
ألقى نظرة أخيرة على المبنى…
ثم استقل سيارته، وقرر أن يعود إلى المنزل.
✦ ───────────────────────── ✦
كانت الطرق مزدحمة كعادتها…
إلى أن وقعت عيناه على وجه يعرفه جيدًا.
تقى.
✦ ───────────────────────── ✦
كانت واقفة على جانب الطريق…
وأمامها شابان يحاولان التحدث معها.
كانت ترجع للخلف خطوة بعد الأخرى…
بينما يحاولان الاقتراب منها.
ملامحها كانت واضحة…
متوترة…
وتحاول تنهي الموقف بأي طريقة.
✦ ───────────────────────── ✦
ضيّق ياسين عينيه…
وأوقف سيارته على الفور بجوارهما.
فتح الباب ونزل بخطوات ثابتة.
✦ ───────────────────────── ✦
اقترب منهم…
ووقف مباشرة أمام تقي…
ليصبح حاجزًا بينها وبين الشابين.
✦ ───────────────────────── ✦
أول ما شافته…
تنفست براحة واضحة.
ومن غير تفكير…
جريت ووقفت وراه.
✦ ───────────────────────── ✦
التفت لها ياسين بسرعة…
وعيناه بتطمن عليها.
ياسين: إنتِ كويسة؟
✦ ───────────────────────── ✦
هزت رأسها بسرعة.
تقى: أيوه…
✦ ───────────────────────── ✦
بص للشابين مرة تانية…
ثم سألها بهدوء:
ياسين: مين دول؟
✦ ───────────────────────── ✦
تقى هزت رأسها بالنفي.
تقى: والله ما أعرفهم…
✦ ───────────────────────── ✦
أخذ ياسين نفسًا هادئًا…
ثم أشار إلى سيارته من غير ما يبعد عينه عن الشابين.
ياسين: طيب…
اركبي العربية.
ومتنزليش منها…
مهما حصل.
✦ ───────────────────────── ✦
هزت تقي رأسها بتوتر.
من غير ما تناقشه…
جريت بسرعة ناحية السيارة.
فتحت الباب…
وركبت وقفلت عليها.
✦ ───────────────────────── ✦
أما ياسين…
فظل واقفًا مكانه…
وعيناه مثبتتان على الشابين…
في انتظار أن يسمع منهما كلمة واحدة.
✦ ───────────────────────── ✦
أدخل ياسين يديه في جيب بنطاله…
وبقى واقف بثبات، ونظرة واثقة مرسومة على ملامحه.
بص للشابين وقال بسخرية واضحة:
ياسين: ها بقى…
كنتوا عايزين منها إيه؟
قولولي…
يمكن أعرف أساعدكم.
✦ ───────────────────────── ✦
اتبادل الشابان نظرة سريعة…
وبعدين قرب واحد منهم بخطوة وهو بيبتسم باستخفاف.
الشاب: وإنت بقى…
هتدينا اللي إحنا كنا عايزينه؟
✦ ───────────────────────── ✦
ابتسم ياسين ابتسامة خفيفة…
لكنها كانت خالية تمامًا من أي ود.
اقترب منهما…
لحد ما بقى على مسافة قريبة جدًا.
✦ ───────────────────────── ✦
مال برأسه قليلًا…
وقال بجوار أذنهما بصوت هادئ يكاد لا يُسمع:
ياسين: آه…
هتشوف دلوقتي حالا .
✦ ───────────────────────── ✦
ابتعد خطوة للخلف…
ورفع كُمَّي قميصه بهدوء…
وعيناه لم تفارقا وجهيهما لحظة واحدة.
✦ ───────────────────────── ✦
ساد صمت ثقيل…
كان كافيًا ليجعل التوتر يسبق أي حركة.
✦ ───────────────────────── ✦
لم ينتظر ياسين ثانية أخرى…
كوّر قبضته…
وفي لحظة خاطفة، وجّه لكمة قوية إلى أحد الشابين.
ترنح الأخير للخلف بعنف…
ووضع يده على فمه وهو يتأوه من شدة الضربة.
✦ ───────────────────────── ✦
حاول الشاب أن يستعيد توازنه…
لكن ياسين كان أسرع.
اندفع نحوه…
ووجّه له عدة لكمات متتالية، أجبرته على السقوط أرضًا.
✦ ───────────────────────── ✦
أما الشاب الآخر…
فتراجع خطوة إلى الخلف.
لم يكن يتوقع أن يتحول الموقف بهذه السرعة.
بدا عليه التردد…
وكأنه فقد الشجاعة التي كان يتحدث بها منذ دقائق.
✦ ───────────────────────── ✦
كان الغضب ظاهرًا في عيني ياسين…
سنوات من الهدوء…
انكسرت في لحظة واحدة.
✦ ───────────────────────── ✦
بدأ المارة يتجمعون حولهم…
وأسرع أكثر من شخص للفصل بينهم.
أمسكوا بياسين من ذراعيه…
وأبعدوه عن الشاب الذي كان على الأرض.
أحد الرجال قال بصوت مرتفع:
الرجل: خلاص يا أستاذ…
سيبه… كفاية.
ورجل آخر أضاف:
الرجل: امشوا من هنا قبل ما الموضوع يكبر.