رواية سجين الحب الفصل العاشر10بقلم زهراء الحريري
آدم
هي البدرُ حسناً والنساءُ كواكبُ
وشتـان ما بينَ الكواكب والبـدرِ
لقد فضلّت حسناً على الناسِ مثلما
على ألـف شـهرٍ فضـلت ليلة القـدرِ
❀-----------------------------------❀
اثيــــــــــــلة
ضربت على راسها وتصيح مفرفحة روحها
ـ ليش ما تصدڪيني والله مايحبج متفق عليج هو وسمر
نهضت صارت بيني وبينه وجهها عليه يدحك عليها بحيرة رفع عيونه الي
وهي ترجد بروحها وتصيح والله يحب سمر ماما صدكيني والله ما اجذب عليج يريد يطلكها من يونس وياخذها
اثيلة:- مو هيج حبيبتي اني افهمج انتي مفتهمه غلط
ـ لا ما مفتهمه غلط هو كال حبيت اثنين
سكتت كانه دتذكر شي هزت راسها لا بقوة وكملت
ـ يكرهج والله يريد يموتج لو يخبلج مثل بيلسان
كضبت ايدي وهي تتوسل بيه اصدكها وما ارجعله
ـ صدكيني ماما والله احجي الصدك
من اخذني للنواعير ذكرها ويبجي
سكتت تحرك بعيونها كانه تذكر،وهي تكمش راسها كالت وي نفسها
ـ لا اذكر كال راحت الله يسعدها بس عمو كال
رجعت كالت لا يجذب عليَّ لا يجذب عليج
حسيتها فقدت عقلها ما تعرف شنو تريد تحجي وشنو تريد تربط حاول يحجي وياها صاحت بيه
ـ اكررهك انت مو ابوي خوش لا تحجي وياي انت مو ذاك بطلي
سكتت النوب ڪالت
ـ استحي من عمو ارغد وماما نفس بسببك كعدتني ويا
آصف:- ويا منو كملي
اللي براسج كله طلعي خلي افتهم شبيج
مشت عليه وهي تصرخ
ـ ويا هاشم اللي اغتصب ماما نفس صرت اخاف من آدم بسببكم
فتح عيـونه يدحك عليها بصدمة وصدمتي مو أقـل منـه
آصف:- جــذب بابا ماكو هيج حجي لا تصدكين باللي سمعتيه واللي سولفلج جذاب
ـ لا صـدك
هو اغتصبها وجان مسجون وانت طلعته وكم مرة حجيت وياي ممنوع احجي بيه لبيت عمو ارغد
كمشت راسها وهي تحجي علمتني ماما نفس علمتني
اجت عليَّ وهي تكرر بالحجي
ـ راح يمرضج مثل بيلسان يكرهج والله ويحب بس سمر
كال ابوج ناوي عليها مرة ثانية ومستخدمج حتى يأذيها
آصف:- منووو الكال
كعدت بالكاع شفتها يابسه رفعت راسها اله حسيتها خافت كعدت بسدها اريد احجي وياها وافهمها
نزلت راسها على كتفي بنحول اجى كرفص مقابيلنا من شافته حضنتني تضم بيه عنه
زمزم:- عوووفها
اطلع منا مانريدك
حسيت الحجي ضاع من لسانه اثر الصدمة، طلع بره وهي حاضتني بضعف
زمزم:- ليش رجعتي له
راح يموتنا كلنا هو يموت بالناس حتى جده قتله لان زوج سمر ليونس
اريد احجي وهمست بتعب
ـ اريد انام
ماما جسمي يأذيني ورجليه خدرن كلش
اثيلة:- نوم شنووو ماما اكعدي احجي وياي منو وصلج هالحجي ترى جذب خلي افهمج اني
ما جاوبتني نزل راسها من كتفي لصدري سندتها بجف ايدي بقيت ڪاعدة بحيرة والوسيعة ضاگت بعيني
غمضت عيني نزلت راسي على راسها اريد الزمن هينا ويوڪف كل حيل للتفكير والحجي بعد خلص ماعندي ما اريد افڪر بعد هاي الساعة شنو يصير ويانا
صديت على ڪوثر عيونها علينا ولسه جامدة بمكانها، بلعت ريكي الناشف واني اسألها
ـ ها ماما تعالي ليش واڪفة
ـ سمر منو ماتقصد خالتي مووو!
ـ لا مو خالتج غير سمر تقصد
ـ شلون غيرها وهي كالت يطلكها من عمي يونس!
وهاشم منو؟ شنو آدم وعمتي نفس شنو تقصد زمزم
ـ ماتقصد شي ماما ماتقصد شي
نزلت عيوني على زمزم غافيه بحضني والدموع بعدهي ماناشفه من عينها
ـ علاجي من الغرفة جيبي الي
راحت بسرعة جابت العلاج وركضت جابتلي مي، ايدي ترجف ماكدرت اطلع الحبه هي طلعتها الي حطتها بحلكي وهي تشربني المي
ڪوثر:- مو خالتي مووو؟
ـ اي ماما كتلج مو هي
والي سمعتي هسه انسي لا تحجين بيه اعرفج راح توصلينه لعسل
كوكه ماما ازعل منج والله اذا طلعتي كلمة من هالحجي الصار ترى اختج فاهمة غلط ما اعرف منو مجذب عليها ولاعب بعقلها اكو غيرها المسمومة بيلسان اكيد الها ومن اكلهم مابيها شي مايصدڪوني
هزت راسها اي وهي تبعد الشعر من وجهه زمزم وتبوس بوجها، دخل اصف الوجه محتقن دنك شالها من حضني اشرت لكوثر تسندني
ساعدتني انهض مشيت وراهم كاعد على السرير ونص جسمها العلوي بحضنه حاضنها بقوة لصدره منزل وجهه على شعرها
رفع عيونه عليَّ صايرات دم من العصبية، نومها عدل على السرير غطاها واجى عليّ اخذني من ايدي سد الباب كال الكوثر اخذي اخوج وطلعوا للحديقة اريد احجي ويا امج
، من طلعوا سألني
آصف:- شلون عرفت!
ـ ما اعرف والله
اڪيد من بيلسان
يدحك عليَّ بشك كال
ـ بيلسان مو بعقلها
اثيلة خلي الدنيا كلها تكرهني الا زمزم اموت الا زمزم
اثيلة انتي سولفتيلها
ـ لا والله شلون اسولفلها
شلون تعقلها أذي بنتي واني اعرفها اشكد متعلقه بيك وتحبك وما ترضى عليك تا بالشقى
كعد على القنفة كامش راسه كال
ـ اللي حجته محد يعرف بيه غيري وغيرج
ـ والله ما حجيت شي الها ينكص الساني اذا اجذب
كال يحجي ويا نفسه أم آدم لا ما تسويها
عجل شلون عرفت بهاشم وآدم
وشنو الي علمته الها نفس!
حط جف ايده على خده يفرك بيه بقوة دفر الطبلة اللي مقابيله
نهض من مكـانه دخل للغرفة اجى يصحيها وتراجع تمدد بسدها نومها بحضنه وعيونه تتحرك بالفراغ بتفكير
أثيلة:- اذا مو بيلسان أكول هاشم مسولفلها؟
آصف:- وهاشم شعرفه بالصاير بيني وبينج بس لؤي يعرفه وهذا اعرفه ما يحجي لو على كص رگبته وما يعرف بالتفصيل اللي سولفته زمزم
دنك باسها براسها وبوجهها وجفوف اديها ورجع حضن راسها لصدره بقوة
بالليل حاولت وياها تا تكعد تتعشى ماقبلت كالت اريد انام جبرتها تڪعد تاكل كم لكمة ادحك عليها تغفي وهي تاكل رجعت راسها على المخده
ـ كومي غسلي ماما
ماجاوبتني ظلت على نومتها واصف دخل تمدد بصفها حط راسها على ايده اخذ شعرها يشم بيه ويبوس بظفيرتها على طولها
الصبح دخلت عليهم رافع راسها يضرب على وجهها خفيف
ـ بابا زمزم
افتحي عيونج
اشو اكعدي احجي وياي
بابا جمارتي زمزم افتحي عيونج لا تهبطيني يابـه عزيزتي نمرتي زمزومه بابا
اجيت عليه بسرعه اريد اخذها من ايده ما يقبل يعوفها صوته شبه عالي ويرجف
بابا زمزم اڪعدي احجي وياي زمزومه باباتي
ظليت ارجد بروحي ابجي بصياح اريد اخذها منه وهو حاضنها لصدره بقوة ويصيح كافي شبيج نايمه هاي تتنفس لا تجفلينها
سد اذاناتها من صياحي بجف ايده وصدره ويحجي عليَّ بصياح كافي خوفتيها
ـ انطينياها اني هسه اصحيها اصف عوووفها خنكتها، زمزم ماما اكعدي حبيبتي
اريد اخذها وهو حاضنها يهز راسه لا عوفيها نايمة جاي احس بيها تتنفس
صحت بمكاني ما اڪدر انهض ڪوثر ماما اركضي جيبيلي اخوالج بنت ماتت
اصف عوفها خنكتها شبلاك سايمه الله عليك عوفها
زمزم ماما حبيبتي اڪعدي هسه اطلعه من البيت
اخذ الغطا مغطيها وهي بحضنه ويحجي عليَّ كاافي صوتج كافي
❀-------------------------------------❀
آدم
فقدت نفسي واني اضرب بيه ما اعرف منو جاي يسحبني منه
ادفعه وارجع عليه اضرب بحقد واني اصيح
ـ لا تڪول ابني
مو أبنك
مو أبنك
ـ ولك كافي عوفه راح يموت
انت الثاني شبيك تنحرت هنا مطي مال دك وخر عنه هيج هيج من الجابني الكم، ولك آدم شبيك عووفه عمي شجرالك
ما اعرف لمنو هذا الصوت ولا اشوفه عيوني ما تشوف غير هاشم اللي مبتسم وهو يتلقى الضربات مني
التفتت دفعته عني واني ادفره على بطنه وكعته بالكاع ورجعت على هاشم مستسلم وبعده مبتسم وهاي الابتسامة تستفزني
عيني صارت على طابوكة اخذتها اريد امحي وجهه بيها رفعتها اريد اضربه بيها
نفس:- اخـذه اقتل بيه امك
هذه الروح انت ما مڪلف بعقابـه
آدم يستاهل كل هاي الخسائر؟
بين كلام امي وبين غضبي شعرة بعدني ما مستوعب شنو جاي اسوي نسحبت الطابوكة مني بقوة
لؤي:- ولك تخبلت انت شنووو
تريد تضيع شبابك بسبب هالـتفر
دفعني بقوة ودنك عليه رفعه من ايده كعده وهو كامش بطنه متأذي من ضربتي الـه
رجعت كم خطوة كعدت بـــالكاع اطرافي تصلبت من نوبة الغضب حيلي يرجف وصدري متشنج اسحب النفس بصعوبة ما اسمع شنو يحجي وياه اذاني صوت هوا عالي يضرب بيها واعظام ايدي تأذيني
عيوني عليهم عمي لؤي محتار بيه رفعت اديه لوجهي غطيته واني امسحه بقوة
لؤي:- انت شني سالفتك ما ترتاح الا تنجلد يومية
عينه عليه ومبتسم
هاشم:- اريد انطيك شي قبل لا اسافر
آدم:- افضل تنطيني روحك غيرها ما اريد منك شي
مد ايده على جنطة هسه انتبهت على وجودها طلع منها دفتر عالي
ـ هذا كتبته الك
ـ اخذه وامشي منا
لا تخليني أرتكب بيك جريمة ما لازمني عنك غير كلام
سكتت ماذكرت امي كباله غمض عيونه متألم من الضرب ويمسح الدم من خشمه
عمي لؤي سحب منه الدفتر
ـ جيبه ونكشر منا
والله لو عليَّ الا اخلي يموتك
بس حرامات يضيع شبابه بسببك
عفتهم ورحت بتجاه باب المجمع دخلت للصحيات غسلت ايدي اتنكست منه
استندت بطراف المغسلة ادحك على وجهي بالمراية كرهت كل ملامحي وعيوني ضربت وجهي بجفوف اديه اريد استجمع نفسي، دنكت غسلت وجهي بقوة عبالك راح امسح ملامحه من ملامحي
طلعت بره رايح بس عمي لؤي واكف والدفتر بيده يقرا باول صفحة من شافني سده ومده الي
سحبته من ايده مشيت بتجاه الحاوية مال الرصيف ذبيته بيها ورجعت عليه عيونه على الحاوية
لؤي:- ولك حيوان شلون تدفرني على بطني
تقربت بسته براسه واني اعتذر منه
وصلت الاجهزة وكفنا عليهم دخلوها كلها جوه كتله
ـ عمي هسه ما اكدر ارتبها خليها للعصر
ـ براحتك بويه خليها لباجر اذا تريد
عافني وطلع قفلت الابواب الداخلية وطلعت قفلت الباب الخارجي رجع عليه وبيده علاكة سودة بيها شي على شڪل مربع عرفته الدفتر
لؤي:- وصلني بدربك
آدم:- عمي اخذ سيارتي مَشي وضعك بيها اني ادبر نفسي بالدراجـة
أبتسم ربت على جتفي
لؤي:- يبعد عمك وطواريه
لا خلي سيارتك جواك كم يوم واشتري ان شاء الله
صعدنا بالسيارة بيته بعيد عن المجمع ساكتين بس اني ڪل دقيقة والوراها استغفر من العصبية
دار عليَّ طبك اصابعه بصبعه الإبهام ويحرك ايده منا ومنا
لؤي:- يمه كلش مسرعين فدوة يمه
يمه لحكيتهم كلش مسرعين
خايبه لا تعتبين ولا تعتبين
عيوني بينه وبين الطريق
آدم:- ها عمي!
تنعى لو تغني
لؤي:- بطلي يروحي ولا تعتبين
يمه كون تردين فدوة ييمه
اييي يروحي وراهم كون تردين
ضحكت واني اهز راسي
لؤي:- ها شو تضحك ولك ابجي عيونك جنها عيون عتوي
دك تلفونه كال عمتك تتصل
الو ها ارنوبة
سكت يستمعلها
ـ شبيها مزنه
نقر على كتفي وهو يأشري ادور بالاستدارة ما اطلع ڪبل
ـ يمتى اخذوها
تمام لا تبجين ماكو شي ان شاء الله
من اوصل اخابرج
درت على السايد الثاني واني اسال شكو شصاير منو مزنه؟
لؤي:- زمزم جا منو
وماخذينها للمستشفى
التفتت عليه:- شبيهااا؟
لؤي:- ولك عاين كبالك
رجعت عيوني واني اسأله بقلق
ـ شبيها ما كالت لك عمتي؟
ـ رايدين يكعدونها وماكاعده بس فا…
حسيت السيارة فلتت من ايدي شنو ماكاعدة
ـ ولك انتبه
وكفتها بسرعة نضربت بالستيرن وعمي ثبت اديه بالدشبول
ـ اشتعلوا الخلفوك
جا دهرتنا شمالك
ـ ميتة!
ـ كول يالله مابيها شي ان شاء الله
البنية فاتحه عيونها اذا ميته هذا حالي برأيك خبل انت؟
مسحت حلكي احسه يابس لساني صار تنمل ماڪدرت احجي بعد الهورنات ادك طلع ايده وراسه يحجي وياهم واني نبضي متخربط زفرت النفس بقوة اباوع على ايدي ترجف
لؤي:- انزل اذا تبقى تسوق تودينا للغريرية كبل واكعد هناك انعيلك
نزلت وهو صعد بمكاني قبل لا ادور كال
ـ مال اعوفك هنا واروح
درت صعدت واني اجاوبه
ـ أجر تكسي ماڪو اسهل منها
طلعنا للمستشفى وبداخلي ادعيلها
ـ اللهم ألبسها ثوب الصحة والعافية وأذهب عنها كل ألم وتعب واجعل ما أصابها رفعةً في درجاتها
وصلنا للمستشفى شفت امي موجودة ڪاعدة وراس عمتي اثيلة المنتهية من البجي على كتفها وابوي واكف ويا عمامي باسل وارسلان ابوها كاعد وحده مدنك راسه بين أديـه مبين عليه الرجفة مثل البردان
تقدمنا سلمنا عليهم وعمي لؤي سبقني بالسؤال عنها، جاوب عمي ارسلان
ـ سكرها صاعد لل600 دخلوها انعاش الدكتور كال وين جنتوا عنها هسه يلا جبتوها شنو هذا الاهمال
عفتهم وكعدت على الكرسي وحدي بعيد عنهم مختنك لساني ماترك الدعاء واحس گلبي يتفاوت بالنبض
بقينا ننتظر سڪرها ينزل عيوني صارت على أبوها نهض من مكانه مبين مو طبيعي ومشيته مخربطة
راح عليه لؤي يحجي وياه بقلق
ـ شبيك اصف شو تروط؟
ما جاوبه يمشي فاقد السيطرة رجع عليه يسأل بيه
ـ شبيك وين رايح؟
كاله ببتسامة اروح على زمزم خابرتني
مشى خطوتين مثل الطفل هسه يتعلم المشي رجع صد على لؤي
ـ تعال وياي انت تحب الگليجة زمزم تعلمت تسويه وذكرتك بيها
مشوا عليه بس اني بقيت ڪاعد بعده يحجي ووكع بالكاع فاقد والخشم ينزف وكعته هاي لوصايرة خارج المستشفى مايلحكون عليه لاسامح الله يموت
الاطباء بسـرعة اسعفوه نايم جوا والمغذي بيده، احنا برة واڪفين وعمي لؤي كاعد يمَه ما عــافه
للعصر ورحنا على الدڪتور نسأل على زمزم شصار على وضعها
ـ بنتكم مصابة بمرض السكري من النوع الأول، سكرها وصل لمستوى خطير خلاها تفقد الوعي
هسه أولويتنا ننزل السكر ونستقر على جرعات الانسولين ومن تستقر حالتها نحدد الجرعات المناسبة الها
الحمد لله على كل حال دفع الله ما ڪان أعظم، عمتي اثيلة من عرفت تهسترت تدعي على نفسه وتلوم روحها تكول اني السبب ما انتبهت عليها
ثـاني يوم من سيطروا على السكر طلعوها لغرفة تحت المراقبة، بس ابوها بعده وضعه خطر وسمعت من أمي مرجع عمتي لعصمته
عمي لؤي متأثر عليه اڪثر من اخوانه وولد عمه حتى عمي سراج ما عافــه يجي بشڪل مستمر
صعدنا لغرفة زمزم ڪاعدة على السرير وخوالها حاطينها بنصهم يسولفون عليها وهي ساڪته دحك بين امها الكاعدة كبالها وامي الكاعدة على الكرسي وعمها اوس واكف قريب من السرير مكتف ايده ويضحك على سوالفهم وياها ويجاوبهم وين اكو منها حبيبة عمها
أرغد:- شلونها شيخة البنات
رفعت راسها لابوي الوجه ذبلان واصفر أبتسمت وهي تجاوبه
ـ الحمد لله عمو
تقرب عليها باسها براسها عمي ارسلان نهض وابوي كعد بمكانه حاضن اكتافها
آدم:- الحمد لله على السلامة
عيونها صارت عليَّ ماجاوبتني صافنه بوجهي بعدت عيوني عنها مرتبك صديت على امي رافعة ايدها اصابعها جوا الحنك وضاغطة الابهام على شفتها وتباوع بيني وبينها بعقدة حاجب
رجعت عيوني عليها مدنكه راسها تمسح بظافر بصابعها، رفعت عينها الي بدون ماتشيل راسها صافن عليها شبيها هيج ادحك عليَّ بخوف
طلعت من الغرفة عمها مجد كاعد على المقاعد الموجودة حجى وياي تجاهلته ونزلت جوا بيـه طبع مو حلو اللي يسيء الي ما انسـاه
••----------- ♡♡♡♡ ------------••
نفـــــــــــس
عيوني بينها وبين آدم بعدني ما تخطيت الصدمـة شلون عرفت من سولفتلي اثيلة لهسه احس عقلي يفتر مستحيل بيلسان اني شفتها واعرف مو بعلقها وحتى من يرجعلها بين كل فترة مو مال هيج تحجي وتتلاعب بعقل زمزم اللي حجى الها بكامل قواه العقلية
طلع آدم وعينها ورا نظراتها تحمل خوف محد منتبه عليها غيري باوعت عليَّ عيونها متروسة دموع راح تربط كلامي القديم بآدم غمضت عيني يارب الصبر گلبي اذاني على ابني اخاف عليه
خوالها وعمامها طلعوا اريد اكعد وياها وحدي ماڪو مجال دخلوا اجدادها والبنات وياهم اباوع عليها خازرة سمر حتى من تحجي وياها ماترد عليها تكز باسنانها
دك تلفوني طلعته من جنطتي أرغد جاوبته كال يلا انزلي انروح
نهضت دنكت عليها واني ابوس راسها حجيت بذانها
ـ لا تتصرفين بطيش وتحجين شي كبال احد باجر اجيج ونحجي سوة وافهمج
رفعت راسي اباوع عليها حركت راسها أي كرصتها من حنكها وطلعت صار كبالي مجد
ـ شلونج أم آدم
ـ الحمد لله خوية
دخل لغرفتها واني مشيت للمصعد نزلت لارغد لكيته هو وآدم وقمر منتظريني رجعنا للبيت كاعدة وراهم خلصت الطريق عيوني على آدم يارب لطفك
دخلت لغرفتي غيرت ملابسي وعقلي ما عاف احد ما دخله بدائرة الشك واڪثر شخص شكيت بيه مجد ما انسى بسببه نفضح سر ابني
طلعت ارغد كاعد بالصالة وقمـر بحضنه عيونه على السلحفاة كعدت مقابيله ضحك وهو يهز راسه
نفس:- كافي ارغد بعدك حاطها براسك
ديستغفر وطلع آدم من غرفتـه مغير ملابسه
~~آدم~~
طلعت ويا كلام ابوي
ـ استغفر الله
والله نيتي ما تصفى دحكي على شڪلها
كعدت وياهم واني اسأل على منو تحجون؟
أرغد:- ول يابه مالكيت غير هاللون
وانت من يمتى تحب هالسلاحف!
آدم:- شبيها لونها حلو ونادر
صديت على ابوي اللي ضحك بصوت عالي وهو يرجع ظهره مغطي وجهه ويضحك
قمر نزلت من حضنه راحت على الحوض تلعب وياها
صديت على امي وجهها صاير احمر وخانكة ضحكتها
آدم:- شڪووو!
ـ ماكو شي حبيبي ابوك اليوم شمسه عاليه وفرحان بشوفته لـ زمزم
انطته نظرة تنبـه وهو يهز راسه ويكولها
ـ ماتصفى والله مو بيدي كل ما اشوفها نيتي سودة
آدم:- لا صدك شكو؟
نفس:- ماكو شي امي
اي ما حجيتلنا هاي المن مشتريها؟
آدم:- الي
رفعت حواجبها وابوي ضحك اقوى
آدم:- شنو بيها شي
اريدها لمكتبي بالمجمع
أرغد:- لا يابة تمنجدنا عوفها بالبيت
يول اذا شافها لؤي بعد ماتخلص من لسانه لعشر سنوات
نفس:- أرغد
صد عليها:- ها آغاتي
ضحكت وهي تهمسله من بين شفايفها بدون صوت بس تنفهم
ـ ڪاااافي
ارغد:- عجل بعديها لا تعوفينها كبالي شكلها مقزز ومو مريح
نهضت كعدت قريب منها ادحك عليها شنو المقزز بيها من وصلت ما شفتها وناسيها باقيه هينا وامي مداريتها بالاكل وتغير المي
آدم:- لا حلوة
ترى نادرة هاي
ارغد:- اي يابة تطبخ وتنظف
نهض دخل لغرفته وهو يضحك كال
ـ راح انام احسن
صديت على امي مستغرب كلام ابوي
نفس:- ماكو شي
وهسه احجي الصدك لمنو هاي؟
اكو جواب براسي ومتأكدة منه بس انتظر اجابتــك
ماجاوبتها ربتت على كتفي اخذت الحوض ودخلت للغرفة حطيتها بزاوية الميز رتبت اليوفي شغلته عليها كعدت على الڪرسي اريد اقرأ قربت الامتحانات
دحكت عليها شلون تسبح نقرت على الحوض بصبعي
ـ مزنـه
رجعت راسي على الڪرسي ادحك بالسڪف خفق گلبي بألم من تذڪرت شڪلها الهزيل من المرض
تنهدت رفعت شعري ارجـع بيه للخلف خلص بعد هالمشاعر ذنب مازال مالي نصيب بيها ربي طلعها من تفكيري
••------------ ♡♡♡ -------------••
نفـــــــــــــس
ثاني يوم العصر رحت على زمزم ابوها اليوم وضعه مستقر كعدت يمها الكل يم ابوها بس امها يمها
كعدت على سريرها سالت اثيلة على وضعها كالت منتظرينهم كالو اقل الساعة وتجي تقيسلها البنية
رفعت ايدي حطيتها جوا حنكها كتلها
ـ سولفيلي اللي سامعته بالتفصيل
بلشت تسولفلي اني واثيلة كاتمين النفس مو بس الصوت نستمعلها شي حقيقي وشي كذب
نفس:- منو الي سولفلج؟
باوعت على امها ورجعت تباوع عليَّ
تقربت منها حجت بذاني
ـ اكولج بس ما تحجين اسمه
هزيت راسي اي
كالت عمو مجد
بعدت عنها اباوع بينها وبين اثيلة غمضت عيوني شنو هاي الحقارة هزيت راسي لا حول ولا قوة الا بالله العلي العظيم من حقد البشر شنـو من أخ هذا
بلشت اسولفلها عن ابوها وسمر وشنو الصار بعد ما تزوجت سمر يونس حجيت ڪل شي اعرفه من سمر باوعت على اثيلة ساكته ما مهتمه او تبين ما مهتمه اولويتها هسه زمزم
ورجعت حجيتلها الصار بين ابوها وامها وشلون عالجتها ماضميت عنها شي، نزلت راسها على ڪتفي وهي تبجي
نفس:- غير هذا كل شي وصلج كذب
وسمر تحب زوجها ومرتاحـة وياه ابوج صفحة وطوتها من سنين طويلة لا تسببين مشاڪل الڪل في غنى عنها
زمزم:- بس هو لسه يحبها
كعدت يمها اثيلة تبرللها وهي نفسها تريد احد يبررلها
اثيلة:- لا ماما ابوج ماعاد يحبها
زمزم:- لا يحبها ويضوج من تتمرض
حجت بغصه
اثيلة:- غير بنت عمته طبعاً يضوج عليها
هزت راسها لا وهي تحضن امها اريد احجي وياها عني وعن آدم ماڪدرت دخلوا خوالها من شافوها تبجي اجوها بسرعه يسألونا بقلق شبيها يأذيها شي
دخل ابوها سانـده اوس من شافني وكف يباوع عليَّ مستحي
نفس:- يلا ترخصولي اني تبقى العافية عندكم ان شاء الله
سلمت عليهم وطلعت بعدني قريبه ماوصلت المصعد
آصف:- ام آدم
التفتت عليه اوس دخل للغرفة وهو تقدم بتجاهي
آصف:- والله وعافية بنتي لخاطر عمتي المريضـة
صدكيني حياته بالسجن افضل بمليون مرة من طلعته
نفس:- الحمد لله على سلامتك
عفته ومشيت للمصعد ضغطت على الزر اريده يفتح باوعت عليه بعده واكف نفتح الباب درت راسي صار كبالي لؤي وسراج
سلمت عليهم طلعوا واني دخلت نزلت جوا تصادفت ويا مهند مخلص دوامه ويريد يطلع كال اني اوصلج
ثاني يوم زمزم مطلعينها الصبح بعد ماڪدرت اروحلها بس على الاتصال ويا امها كالت اول ايام الوضع هادي وبعدين صارت حرب بالبيت سمتها اصف تربيع نفسه (تقصد اصف وزمزم)
••------------ ♡♡♡♡ ------------••
أثيــــــــــــلة
اول يومين البيت هدوء زمزم ما عندي وقت بالنهار احجي وياها لان البيت مافرغ ولا ساعة وبالليل تنام على وقت
كم يوم وفرغنا سولفت وياها واقنع بيها واني اريد احد يقنعني أبوها نسى خالتها ومايحبها احجي وحدي ماصدڪتني
بالليل تنومني يمها تتخبل اذا لكتنا بالغرفة تسحبني وياها من تنام تكضب ايدي بقوة
ـ احلفي والله ما تخليني انام وترحين تنامين وياه
ـ لا والله هينا انام يمج
ـ اي ابقي هنا يمي لا تنامين وياه هسه اطلعين حامل
ـ ول عيب شنو هالحجي شنو انام وياه شنو حامل
كعدت متربعة دحك عليَّ كالت ترى اني اعرف
كعدت ادحك عليها اريد احد يكرص ايدي حتى اصدك اني ما سمعت شي غلط
ـ شنووو تعرفين زمزم
وشلوون تعرفين
ضحكت وهي ترفع الڪذله من عيونها
ـ ماما نفس علمتني ووصتني من ينسد الباب على اثنين ممنوع اوصل للباب عيب وحـرام
ضربت على خدي
ـ عززا يمه
شنو معلمتج نفس وليش هيج حجت وياج شنو داخلة عليهم للغرفة
ـ لا شنو داخلة عليهم اصلاً ما اوصل غرفتهم من يدخل بيها عمو ارغد
ـ عجل شنو سولفيلي طيرتي عقلي من راسي ولج زمزم
زمزم:- اكو بنات بصفي بمدرستي القديمه ڪوثر تعرفهن بس احنا مامصادقينهن لان عليهن حجي وسمعة، البنات يكولن مو راحة
ـ اي شبيهن هذني
ـ مرة كاعدة اڪتب وهن بالرحلة اللي وراي يسولفن على هاي اللعبة روبلوڪس ويحجن بالغرف وشنو يصير وحتى يحجن ويا الولد ويحجن سوالف هواي عيب
من رجعت من المدرسة سولفتها لماما نفس تخبلت من سمعت وصارت عصبية يوم كامل بعدين كعدنا وحدنا سولفتلي وعلمتني هذا الشي مايصير قبل الزواج حرام وزنا والله يعاقبنا عليه بالدنيا والاخرة وكالت حجيتلج حتى فضولج ما يخليج ادورين المعرفة مابيها ضرر عليج والصار تنسينا وبس تذكرينه لو يجي سؤال براسج تجين تسولفيلي ما تحجين بيه لغيري ولا ادورين وحـدج واني اشرحلج
وهم حذرتني منهن كالت ممنوع تصادقينهن ولا تخلينهن يأثرن عليج بسوالفهن وڪالت هذا كلامهن غير اخلاقي ما يقبل بيه الله ولا البشر
وهم علمتني استر جسمي مو بس كبال الولد حتى من البنات وما اڪعد وحدي بمكان وعلمتتي اذا احد يباوع على مناطق معينة بجسمي لو على طولي ما ابقى وحدي انهزم وما ادخل لمكان هو بيه واذا سمعني كلمة اسولف لبابا ما اسڪت
دحكت عليَّ وهي تكضب ايدي كالت ودموعها تصب
ـ اني كل شي تسولفه الي ماما نفس اصدكه واقتنـع بكلامها وما اسأل غيرها والي تمنعني منه ابداً ما اقرب عليه
بس تسولف عنج ما اصدكها لان اني جنت اشوفج تكرهين بابا وتكرهيني وياه بس اني ماڪرهج ولا احبج
حضنتها واني احجي وياها
ـ اني شلون اڪرهج انتي قطعة من الروح اڪره عمري ولا اڪرهج
حتى ابـوج ما أڪره احبـه رغم اذيـته بعدني احبـه
ـ لا بعد لا تحبينه
ضربت على راسها خفيف ضحكت وهي تبوسني بخدي، ابتسمت على تعليم نفس الها واني ڪوثر من بلغت بقيت يوم كامل مستحية شلون احجي وياها واعلمها وجبت وياي لتين
دحكت بعيوني عندها شي، الخجلانه تحجي كتلها احجي ماما شعندج بعد
زمزم:- ماما نفس كالت من يصير طفل قبل الزواج حرام وابن زنا
هزيت راسي اي، رطبت شفتها بطرف السانها وهي تزفر النفس بقوة
ـ يعني آدم هسه شنو
اني عرفت هو ابن هاشم بدون زواج
سكتت وهي تبجي
زمزم:- اني ماريد اكره آدم احس گلبي يأذيني
اثيلة:- وعليش تڪرهين آدم اللي صار مو ذنبه ولا ذنب نفس ذاك النذل هو المذنب الوحيد خطفها واعتدى عليها
وآدم هو نفسه ماتغير شي ابن ارغد ونفس انسي هاشم ولا تحجين هالسالفة لاحد ترى تضر آدم
حضنتني وهي تبجي شبيج ماما ليش هالبجي
ـ ما اريد اشوفه اخاف منه
واريد اشوفه
ـ ليش هذا آدم المؤدب ليش تخافين منه مو عشتي وياه ڪم سنه
ما حجت تمددت وهي تسحبني دخلت بحضني احس بيها تبجي عجزت شنو احجي وياها
ڪم يوم وبلشت الحرب العالمية بينها و بين ابوها وهي ادور على كل شي يغثه تسويه ولسانها اطول منها
من تريد تضرب ابرة الانسولين تروح تكعد كباله وتضربها تصعد ضغطه
ومن يسالها من سولفلج خلي اعرف شغلي وياه ترد عليه بلسانها اللي رجعلها اقوى من قبل
ـ شغل عقلك ودوره
ـ زمزم احجي عدل وياي
اكول مريضه وساكتلج
والله وبالله اذا ضربت براسي اعرف شلون اخليج تحجين
ـ اي وشسوي مثلا تشخط الحايط لو توكفني بالشمس لو تسجني مثل اختك ڪلهن ما يخوفني
ضرب على رجليه بقوة وطلع للطرمه
كتلها كافي ماما عوفي ابوج
خزرتني وهي تكول ما حجيت شي غير هو هيج يعاقب
من يدخل تظل تخرخش بالحجل وهي تسوي صوت وياه تشش تشش جي جي وتغني بأغنيته يابو جرد الناعور
يسوي نفسه مزعوج كبالها ومن يدخل للغرفة يـضحك على سوالفها بالليل يخليها تغفي ويجي يكعدني انهض وهو ينام بمكاني ينومها بحضنه مرات تاخذه النومه للصبح تڪلب البيت علينا ومرات الفجر يكعد قبلها
بايام الامتحانات اخذتها اني وارسلان خلصت الطريق تحجي
ـ ماما والله ما انجح شڪو رايحين ترى ماقارية ولا اذڪر شي
ـ واذا امتحني واني احجي وياهن بلكي يساعدنج من احجيلهن وضعج
وصلنا لحديثة ڪعدنا بيت ابوي ارسلان بقى ويانا طول المدة ناخذها سوة تمتحن من تطلع تصفكلنا اديها يعني ڪل شي ما جاوبت
اخر امتحان امتحنته وقبل لا نرجع كالت اريد اروح اشوف بيت بيبي ام هاشم
اخذتها ورحت بعدنا ما دخلنا ودموعها صبت دخلنا للطرمة تتلفت وهي تشاهك واتشرلي على كل مكان كعدت بيه وياها وشلون عمتي تتلكاها من تدخـل
عفتها براحتها طلعت ملابس عمتي تشم بيهن وتبجي بصوت عالي حاطه ايدي على خدي وابجي وياها
عافت الملابس وراحت جابت سجاده فرشتها وحطت القران وكعدت دحك عليهن وتبجي قطعت گلبي وياها
حضنتها كافي ماما لا يصعد سڪرج
كضبت بلعومها وهي تكولي
ـ غصه منا ماما خانڪتني وكعت بحضني ومن الخوف دفعتها
ـ سودة عليَّ ماما
وينج وين الغصة
واللي صار جثير عليج حقج بالخوف
من هجدت نهضت نظفت البيت من التراب والملابس اللي طلعتها رجعت رتبتها وكل قطعة تشمها يلا تسفطها
اخذت ادوات الحياڪة وملفع لعمتي
حجت وهي تغص بعبرتها
ـ هذني اريدهن ذڪرى منها اشم بيهن ريحتها
غسلت وجهها واخذتها رجعنا ڪالت اريد اشوف بيلسان
دخلنا لبيت عمي عيوني عليها ما تقربت على بيلسان بس توصي بعمتي عليها وبيلسان ادحك عليها وتبجي تريد تجيها وعمتي كاضبتها
رجعنا لبغداد وبعد فترة طلعت درجاتها وراسبه بيهن كلهن رجعناها لمدرستها القديمة
••---------- ♡♡♡♡ -------------••
تـــــــــــــرتيل
كملت امتحانات او حرب الاعصاب اسميها افضـل ، اخر امتحان ما مصدكة بعد ما اقرا ولا افكر بالوقت راح يخلص واني ما مكملة مراجـعة،
شكلي صار مثل المومياء يمان مسويني محتوى اله بالبيت بس يشوفني يبقى يصنف ما يسكت الا اصيح لبابا لو عمو عليه
كامشة ملابسي اريد ادخل اسبح بابا بعده بالحمام ويغني أمانة الله ان متت بيدج تدفنيني
هاي الاغنية من واني صغيرة اسمع بابا يغنيها لماما حتى حفظتها بسببه ومرات وحدي اغني بيها
طلع نتظرته يدخل لغرفته يلا دخلت سبحت اليوم النتائج ولهسه ما نزلت
طلعت من الحمام عمتي سمر عندنا ويمها جيس الجكليت بس شافتني هلهلت
ترتيل:- شنووو طلعت!
ضحكت امي وكالت لا ماما بعدهي بس عمتج مستعجلة
سمر:- هي ناجحة ما يحتاج ننتظر
ترتيل:- اعرف ناجحة بس اني اريد المعدل
مشطت شعري ماما واني عيوني بالتلفون داخله على قناة نيمار بس نزل الخبر حسيت ضغطي هبط والخوف تملكني
نحاول ندخل على الرابط مايحمل اباوع على التلفون يرجف بيدي شمرته على يمان
ـ انت طلعهن اني ماعرف
حاول ونفس الشي ماڪدرنا اتصل علينا خالو أرغد شويه وماما هلهلت بلغها بنجاحي
من الفرح تشنج وجهي حتى الضحكة ماكدرت اضحكها عمتي سمر فشختني بجكليتها اليابس وبيبي تهلهل
من حجوا المعدل ضاعت فرحتي كعدت ابجي ما يدخلني القسم اللي اريده سويت عزاء الهم بالبيت
كلها اجت تبارك واني على كعدتي حسيت راسي انفخ من البواجي يحاولون وياي واني قافلة محد يعرف بالتعب اللي تعبته والضغط اللي عشته طول السنه حتى بالعطلة ماتهنيت
خالو أرغد كال شنو بنفسج القسم اللي تردينه تروحين اهليه وأول سنه رسومها عليَّ بس كافي لا تبجين
وبابا كال ماعليج والله لو تردين طب هم ادزج لو اعرف ابيع البيت وادزج لمصر تڪملين
كتلهم واني اغطي واجهي واشهك اريد تخدير
ارسلان:- سهلة ندخلج تخدير كافي عمو دحكي عيونج شصار بيهن
لا تهتمين بالفلوس ثاني سنه وكل مصاريف الاربع سنوات عليَّ
على ڪلامهم سكتت بس بعدهي الغصة بگلبي جنت متاڪدة من المعدل وحتى من اطلع احسب درجتي وهيج انصدم ماتوقعت
على كلامهم وسوالف عمتي سمر كدرت اتناسى واضحك عادي انتبهت على خالو أرغد عينه بيني وبين آدم وهو مبتسم
بالليل اريد انام واجاني اشعار على الوتساب شفته رقم ما مسجل فتحت الصورة هاي صورة مهند گلبي يدك بخوف منين حصل رقمي باوعت على الباب
ورجعت قريت رسالته مبارك وردة گرنفل كم يوم واجيب اهلي لاهلج
حذفت الرسالة وحظرته بعد كلام ابوك وياي مستحيل اقبل بيك
••------------ ♡♡♡ --------------••
نفــــــــــس
أرغد يوم عرف بوفاة عمته كعد وحدة يوم ڪامل بالغرفة قفلها عليه واني وادم بالصالة منتظرينه يطلع ما طلع الا لليل عيونه حمر
آدم نهض من مكانه حضنه وهو يحجي وياه ثاني يوم راح زار قبرها واجى منها منتهي خفت عليه لا يوڪع وأسبوع وحالته يرثا لها
مرت فترة يلا تقبل موتها وبكل صلاة وقراءة قرآن يذڪرها واللي سمعته من لؤي أبنها سافر للخارج وين ما اعرف المهم طلع من العراق وابتعد عن أبني
بلش الدوام والحمد لله آدم نجح وصعد مرحلة جديدة، كاعدين بالصالة ادم وابوه بيناتهم صحن فواڪهة يآڪلون واني مقابيلهم أوڪل بقمر
أرغد:- شرايك بترتيل؟
باوع على أبوه مو فاهم عفت العنب من ايدي عرفت القصد من هذا السؤال
أرغـد:- اذا ماكو ابالك وحده اخطبها الك؟
سكت آدم هز راسه لا وهو يجاوبه
ـ لا ماڪو أبالي
فتحت حلكي اريد احجي باوعلي آدم مسكتني بحركة عيونه
أرغد:- يعني اخطبها الك؟
ـ اذا هي توافق الله يتمم علينا بالخير
ابتسم أرغد بفرح ربت على ظهر آدم وهو يكوله باجر اروح لعمك باسل احجي وياه ونسألها واذا وافقت نعقدلكم قبل دوامها
هز راسه بالموافقة خزرته نهزم بعيونه مني
آدم:- يلا اني اروح للمجمع عيب من الولد وحدهم
دخل غير ملابسه وطلع طلعت وراء بسرعة
ـ آدم
التفت عليَّ سد الباب واجاني
ـ ها يمه
ـ شنو هذا
شلون تقبل
ـ وليش لا؟
ترتيل بنت عمتي وأعرفها زين وأعرف تربيتها وأخلاقها واذا الله كتبها من نصيبي هذا فضل منه
ـ وحبك لزمزم لا تقنعني نسيته!
ـ اي حبيتها وما انكر هالشي بس مو كل انسان نحبه يصير من نصيبنا الله إذا صرف عني شيء فـ أكيد صرفه لحكمة واني مؤمن بحكمته
وزمزم مالي نصيب وياها ايدي ما احطها بيد ابوها
ـ انت مصدك نفسك شنو دتحجي؟
انت ماشايف نفسك شنو يصير بيك من تنذكر كبالك
تنهد وهو يحجي وياي بتفهم
ـ يمه زمزم مو من نصيبي الحب وحده ما يبني حياة وعائلة واني ما اريد الا الشي اللي كاتبه ربي اليَّ
واذا ترتيل نصيبي فـ أهلاً وسهلاً بنعمة اختارها الله
ـ راح تظلم ترتيل
ـ ابد والله يشهد عليَّ ربي ما يجي يوم وافكر بغيرها شلون تعامل ابوي وتقديره الج نفسه وافضل بأذن الله، هاي هديـة ربي وحقها عليَّ أصونها وأكرمها وأعاملها بما يرضيه
باس راسي التفت دا يفتح الباب وكتله
ـ بس ترتيل يريدها مهند
دار عليَّ عاقد حواجبه حجيت كذبه من راسي لان اعرف بعلاقة مهند وترتيل مؤخراً من تماضر من طلبت مني احجي ويا ابو مهند بلكي يقتنع
ـ قبل كم يوم شايفها بالصدفة ومبلغ اهله يخطبوها اله عمتك تماضر سألتني عليها
رفع ايده مررها على شعره أبتسم وكال
ـ مهند خوش مهند واذا نصيبها اله الله يسعدهم ويهنيهم
عافني واڪفة ودخل على ابوه بلغه يأجل الموضوع ڪم يوم
حجيت ويا ابو مهند وما عفته الا اقتنع وڪال بصريح العبارة راح اخطبها اله لان انتي مدحتيها
راحوا خطبوها واللي صدمني ترتيل رفضت رغم القرار جان الها ابوها وعمها موافقين على مهند والڪل حمد لهم بيـه
••------------- ♡♡♡♡ ---------------••
درة
دخـــل يسبح واني اخذت ملابسه للغسالة من الحمام يجيني صوته
لؤي:- ربيتك صغيرون حسن ليش نكرتني ياحسـن ليش نڪرتني
نومت بنتي وعلوش حاضن طوبته ويباوع على البلازمه
طلع و اصبعه بذانه يحرك بيه يطلع المي، دنك على علوش بوسه بخدوده
ـ شلونه ابو سمِيرة؟
ولا صد على ابوه مركز ويا البلازمه كال
ـ على خالك طالع انفــه
اجى عليَّ ديحجي كال اي ارنوبة ماوراج ضنه، دك تلفونه كولت الحمد لله خلصت من لسـانه ابتسمت واني اباوع عليه صافنه بوجهه من يضحك اضحك وياه واني كل شي ماسمعت
صادني غمزلي وهو بعده يحجي بالتلفون سده واجى كرفص كبالي كامش وجهي
ـ يزغيرونه شني اهلج ماعدهم خبز ونطوج
ـ عدهم خير من الله بس اكو شايب ذبح نفسه عليَّ
عضني براسي واني احجي و اضحك
ـ لا الله عليك أذيتني
رتب شعري بجفوف اديه باسني براسي
لؤي:- احبج ولج
مقصر وياج هالفترة
درة:-واني ماحبك وجهك مجسب
ضحك كعد بسدي يثاوب
ـ ويا منو جنت تحجي
لؤي:- ويا اختي أم عدنـان
تذكرين بسمه اللي حجيتلج مرة عنها
رفعت عيوني للسكف اريد اذكرها منو اني ما عندي علاقة باهله وتواصلي بس ويا الحجيه
ـ منو بيهن نسيتها وهن جثيرات الله يحفظهن
ـ بسمه اللي كتلج مامكملة اعلامها بس للخامس ابتدائي وكملت خارجي من كم سنه وكملت جامعة قبل سنتين
شسالفة صابج زهايمر
ـ اي اذكر سولفتلي بس نسيت اسمها شبيها؟
ـ تريد تكمل ماجستير هنا بغداد
ـ اي
ـ اي تكعد ويانا هالسنتين
ـ اي هلا بيها ماتشيلها الكاع تشيلها عيونا
ـ والنعم منج اصيلة
وصدك بداية الدوام جابها خوش بنية حبابه عمرها بدايةالثلاثين عليها السان حلو مثل لؤي وسوالفها عذبـــة ماتنمل
••----------- ♡♡♡♡ ------------••
ڪــــــــــوثر
كبرت بوسط عائلة أحسها كاملة من كل شي الا من وجود أب بالبيت أبويه موجود بحياتنا يزورنا ودائماً على اتصال ويانا وما مقصر أبداً لا هو ولا ماما لا بالحب ولا بـالدلال
بس مهما كان مو مثل وجوده مثل باقي الاباء بالبيت اكو فراغ ماڪدروا يسدونه وشعور حياتنا بيها شي ناقص
اني هادئة بطبعي عكس زمزم تماماً اكثر مكان أحبه هو المدرسة و حلمي أصير دكتورة نسائية، مرة سألت خالتي سمر
ـ منو فلوسها اكثر الدكتورة النسائية لو دكتورة الأسنان؟
ضحكت وهي تجاوبني
ـ طبعاً الدكتورة النسائية تكصب بالنسوان وتكرف بالفلوس
ومن ذاك اليوم ثبت حلمي بهذا المكان اللي اريد اوصله وكل ما انجح من صف احس قربت اوصل
أما عسل فحلمها يختلف عني تريد تصير دكتورة أسنان لسبب يضحك أسنانها الأمامية السن الأيسر بنهايته صاعد قليل على الايمن مخلي ضحكتها أحلى وبيها براءة وهي متعقدة منهن وتريد تسوي تقويم وعمي يونس دائماً يكولها
ـ ازعل منج إذا تخربين هاي الضحكة الحلوة مخبلة انتي غير جنها العافية
عسل بالنسبة إلي مو مجرد بنت خالتي لا توأم روحي وتفهمني أكثر من اي احد حتى اكثر من ماما
اما توامي زمزم فهي ضحية شقاوتنا الدائمة دائماً نخبث وياها ونسويلها مقالب حتى تظل تحجي علينا وتعصب بس مو كره لا نحبها حيل
بس هي عصبية وما تتحمل
بيوم سمعت كلام زمزم عن خالتي وبابا صحيح أمي نكرت وحاولت تقنعني مو مثل ما فهمت بس ماصدكتها وصدڪت بكلام زمزم لان اعرفها ماعندها جذب دائماً تحجي الصدك هيج تعودت عليها
ابتعدت عن عسل كم يوم حتى من تجي علينا أحجي وياها قليل وبطريقة تبين الها ما أريدها تجينا بعد وهي من لاحظت بطلت تجي عليَّ بس ما بطلت عادتها ادزلي يوميه عشاء من اللي تسوي بيد أحمد
كم يوم وتناسيت اللي سمعته ورحت عليها وتعذرتلها وسولفتلها جنت ضايجة بسبب وڪعت زمزم
استلمنا اوراق امتحان شهر الاول رياضيات اجت درجتي 80 واني متاڪدة منها ميه ڪاملة ظليت اڪلب بالورقة وابجي من راحت المدرسة رحت وراها لغرفة المدرسات من شافني ابجي يحجن وياها
ـ لا سامية الا كوثر
ضحكت وهي تباوع عليه واكفة بالوسط ابجي واني لازمة ورقتي
ـ كالت اعرف مستوها بس عندها سؤال غلط واخذت حقها مثل البقية
ـ لا والله ست ماعندي كلهن صح
حجت وياي بعصبية مصطنعة وهي تخفي ضحكتها
ـ شنو تعلميني انتي
عندج سؤال خطأ
ـ والله ست ما عندي هسه راجعت الاجوبة كلها صح
عيوني تفتر على مدرساتي كلهن يعرفني يحجن وياها يتوسطلي عدها تعدل درجتي
كالت تعالي ماما اشرحلج السؤال الغلط
دك الجرس للصفوف ست زينب ام الاحياء كالت كملي وتعالي
كعدت بصفها تشرحلي السؤال الثالث وفعلاً طلع الحل خطاء شرحتلي الموضوع من جديد فهمته منها قبل لا اروح كالت درجتج 90 راح اسويها تشكرت منها ورحت فرحانة للصف
لڪيت المعاونة والمديرة بصفنا مسويات تفتيش
سألتني وين جنت جاوبتها ست زينب بمكاني
أبتسمت وهي تكول ادخلي ماما دخلت لرحلتي قبل لا اكعد شفت اللي وراي وجوهن صفر والشفايف بيض كعدت طلعت كتابي الاحياء اراجع
التفتيش وصل الي بالي ويا التحضير اراجع بيه على گلبي وعيني على المعاونه رفعت جنطتي طلعت الكتب والدفاتر ماكو شي
دخلت ايدها بالجيب صفح الجنطة ظليت مصدومة اباوع على التلفون التفتت على جنطة صديقتي خاف هاي جنطتها مو جنطتي لا جنطتي
ظليت افر براسي المديرة والمعاونة يحجن عليَّ واني بس اباوع بينهن وبين التلفون نخرست من الخوف
ست زينب تحجي وياهن تكولهن ڪوثر كلنا نعرفها البنية مؤدبة وشاطرة ومايوم طلع منها تصرف سيء البنية فقيرة
اخذوني للادارة وعيوني الطالبات عليَّ اريد احجي اكول مو الي والله
دخلتني لغرفة المديرة واكفة صافنة عليهن فاتحه حلكي وابجي
اجت زمزم وراي جابتها المعاونة يسألن بيها هذا تلفون اختج
زمزم:- لا اختي ماعندها تلفون
كالتلها المديرة لكينا بجنطتها احجي الصدك؟
زمزم:- مو لاختي
يعني شنووو كوة اكول الها
اختي ماعندها تلفون بس اني عندي وبالبيت تلفوني
المديرة تحجي علينا اني ارجف من الخوف وزمزم من العصبية حتى عسل جابنها وترجف وياي خايفة وتحلف للمديرة التلفون مو الي
المدرسات كلهن دخلن ورانا دنكت راسي ابجي واخيرا كدرت احجي
ـ ست والله مو الي وهاي اول مرة اشوفه والله
جفلت منها من صاحت
ـ لعد شجابه لجنطتج؟
درت عيوني على ست نور ام العربي استنجد بيها اجت تحجي ويا المديرة ادافع عني زمزم كامشه ايدي وتحجي وياهم تحلف التلفون مو الي
المديرة كالت اتصل على ولي أمرها
زمزم:- اي اتصلي على ماما
ردت عليها
ـ لا تصل على أبوج مبلغنا كل شي يخصجن يوصله
تقدمت على ست نور احجي وياها
ـ ست والله مو الي وتعجبت من طلع من جنطتي
كالت
ـ ڪوثر طلعته من جنطتج
ـ اي ست بس والله مو الي ولا اعرف بيه
كالت للمديرة
ـ انطيني التلفون خلي نشوفه بلڪي على البصمة
انطته الها وهي تحجي ويا بابا طلع بدون بصمه بس رمز
عسل:- ست والله مو الها كوثر ماعندها تلفون
المدرسات يباوعن عليه بين مصدكات وبين لا ڪلهن درسني ويعرفني ودائماً من زمزم تتعارك يكولن معقولة هاي توأم ڪوثر الفقيرة
كعدتني زمزم على القنفة وهي تحجي وياي
ـ لا تخافين ماعليج
ـ زمزم والله مو الي
كالت:- اعرف شنو قابل ما اعرفج
بقينا بالادارة اجى بابا المديرة سولفتله اخذ منها التلفون
ـ جيبن جنطجن ولحكني للسيارة
ماكدرت امشي عسل مشتني وياها نرعبت من صوته وعيونه شلون يباوع عليَّ زمزم دخلت جابت جنطتي
صعدنا بالسيارة وراء وزمزم بالمقدمة كعدت تحجي وياه وهو مطلع راسه من الجام يباوع ورا السيارة
ـ باوع خلي اسولفلك التلفون مو الها والله
دخل راسه دار عليها حاط اصبعه كبال حلكه
ـ اشش ولا ڪلمة
باوع عليَّ بالمراية كال
ـ اخذي افتحيلي الرمز
بلعت ريكي اريد اكله بابا ما اعرف عاط بيه اخذي وافتحي الرمز
زمزم:- ما تعرررفه شلون تفتحه مو الها
ـ اسكتي انتي
كتله:- بابا والله مو الي والله
كال
ـ افتحي الرمز كوثر احسن ما افتحه بنفسي
ظليت ساڪته حتى ما مديت ايدي رجعه وهو يكول يصير خير
نزلنا للبيت كال ساعة واجي دخلنا جوة عسل وزمزم حجوا لماما الي تباوع عليَّ فاتحه عيونها
ـ ماما والله مو الي
حجت زمزم وياي
ـ ماما ترى مو الها كوثر طول اليوم تقرا بالغرفة لو مكابله التلفزيون ماشفتها كامشه تلفون غير تلفونج وتحجي ويا عسل
لطمت على خدها وهي تحجي وهذا المسودن شنو يقنعه ظلت تفتر وهي توصينا من يجي ندخل للغرفة بين ماتحجي وياه
ووصت عسل ماتحجي بالسالفة ليما نعرف لمنو هذا التلفون راحت لاهلها وهي ملتفته عليَّ وقبل لا تطلع كالت لماما خلي اخذها وياي للبيت
دخلت غيرت ملابسي واني ارجف واحلف لزمزم مو الي
عاطت بيه اعررف مو الج اكيد اكو ڪلبه من صفج حطته بجنطتج
بقيت بالغرفة ما طلعت ابجي وحدي سمعت صوت بابا يصيح باسمي ضميت روحي ورا السرير
دفر الباب ماما تتوسل بيه وزمزم تحلف بمكاني
صاح بعصبية
ـ اخذي اقرررري كلام بنتج شنو كاتبه للولد
صار هدوء شويه وماما اسمعها تصيح
ـ عززة العزاني اصف والله هالحجي مو لبنتي والله بنتي ماعندها هيج سوالف
زمزم:- الي هذا التلفووون الي
رفعت راسي اباوع على زمزم عبالي صدك الها وماما هم تباوع عليها مصدومة
سحب التلفون بابا من ايد ماما بعصبية شڪله يخوف، قفله وانطاه لزمزم كالها بصوت
ـ الج مووو
اخذي افتحي الرمز
باوعت عليه بحيرة كالتله
ـ ها نسيت الرمز
من شافني اجى عليَّ بخطوتين وماما وزمزم يسحبن بيه ومصطفى وياهن حسيت شعر راسي من السحب كله نشلع واسمع صوت طكات براسي
اثيـــــــلة
نحاول اني واختها واخوها نحميها منه ما نڪدر اقوى منا، اصرخ واضرب بيه اريده يعوفها راح تموت بيده ادفع بيه بكل قوتي
دفعها عليَّ كعد بالكاع خشمه ينزف دم وكعت بالكاع حضنتها واني ارجف اريد اضمها بگلبي منه، حيلي مات والنفس من اخذه ياذي بلعومي وصدري
دحك علينا اعرف نظراته بس هذه النظرة ما اعرفها هذا مو آصف كانه مات
نهض من مكانـه يسحل بنفسه وهو يستند بالحايط والباب طلع واني اضمها اقوى لحضني تصرخ بخوف ماڪدر احجي وياها وافتهم منها لساني احسه نبلع
مديت ايدي هزيت مصطفى واني اتلعثم بالحجي
ـ جيب تلفوني
راح يجيبه وهو يبجي بخوف اخواني اليوم بحديثة على حظي ويونس وڪرم مو ڪده ولا يكدرون يتفاهمون وياه بالحجي ما عندي غيـره هو الوحيـد يسيطر عليه
اتصلت على درة نفتح الخط اريد احجي وياها ودخل علينا بيده سلاحه وكع التلفون من ايدي
اسحل بيها اريد اضمها ورا ظهري عجزت من ضعف اطرافي اتوسل بيه بصوت عالي ما يسمع صوتي بسبب صراخهم
أثيـلة:- اصف لا تسووويها
ساڪت عيونه عليها نزلت عيوني على المسدس يرجف من رجفت ايده
ادحك على المسدس واحجي وياه
اثيلة:- اصف تعووذ من الشيطان بنتك هاي بنتك
ابوس ايدك ورجلك اطلع منا اصف تعووذ من الشيطان سايمة الله عليك اذكره
ظليت اصرخ بخوف ولك اصف لا تسويها لا تسووويها لا تاخذ بنتي مني موتني اني كبالك
مسح الدم من خشمه عيونه تخوف اريد اكوم اخذها وانهزم رجليه ميته الهبطة بيهن صارت عجزت من الحرڪه بس لساني عندي
صحت يا الله من دخل لؤي جتفه من وراء وهو يصيح شبيك ولك تخبلت
دفع لؤي وكعه بالكاع رفعه المسدس حطه براسه زمزم دفعتني وركضت حضنته وتصيح
ـ الله عليك بابا لا تسويها
والله اموت روحي وراك
فدوة لاتموووت بابا
لؤي رجع عليه سحب المسدس من ايده بعدها عيونه على كوثر اللي ترجف وراي
سحبه لؤي طلعه بره زمزم اخذت السلاح والتلفون وطلعت تركض ما ادري وين ضمتهن حضنت ڪوثر واني ارجف بزفرة النفس
بلعت ريكي صوت انفاسي يخرش دحكت بوجهها اثار الضرب بلشت تطلع بيه شفتها مورمه وتصب دم
اجت زمزم حضنتها وياي وهي تحجي وياها
ـ هسه يهديه عمو لا تخافين اكلهم الي التلفون
كتلها
ـ ممنوع تحجين هيج التلفون مو الجن خلي يدورون لمن ولجن يمه لا تسودن وجوهنا
عفتها يمها وطلعت بره اصف كاعد راسه بين اديه ولؤي واكف عند راسه يحجي وياه يسأل شصاير
اجت زمزم وراي دحك عليهم بخوف كتلها
ـ ليش عفتي اختج
ـ هي كالت اطلعي شوفي بابا
ـ ارجعي يمها وقفلن الباب عليجن
دا ترجع وما اشوف الا كوثر واكعة بوسط الطرمه من السطح …