رواية سجين الحب الفصل الحادي عشر11بقلم زهراء الحريري

زمـــــــــزم 

‏اخاف ان اصارحك بحُبي

فأخسرك ثم اندم ..

واخاف ان لا اصارحك

 فتضيع فرصة الحب فأندم.. 

علمني كيف احُبك بلا ألمٍ

وكيف اصارحك بلا ندمٍ..؟!

  ••----------- ♡♡♡♡ ------------••

بســـــــــــــمة

خالي طلع يركض وزوجته هم لحكته 

مـاڪو صوت هدوء جا شبيهم طلعوا يتراڪضون شمالها الوادم

بقيت ويا جهالهم منتظرتهم يرجعون اريد انام راسي مفجور من فرت الجامعة، شوية وكب الصريخ احضرنا  ياعلي

شلت البنية ومشيت لباب الحوش فتحته قليل اباوع شڪو، اشوف الوادم تركض على بيت اخـو درة وصوت خالي يصيح لا تكربون عليها لا تحرڪونها وخروا 

رجعت للبيت امشي سريع نــزلت البنية لبست الجبه على دشداشتي شلت البنية وطلعت بسرعة علاوي وراي وما منتبها على رجلي شلابسـة

 النسوان تصرخ والزلم مخبوصة طك منا وترجع منا وواحد يحجي ويا الاسعاف، عيني صارت على بنية كطعت نفسها وهي تدفع بيهم تريد تشمر روحها للكاع وهي تصيح كوكي

باوعت بالكاع غمضت عيني من المنظر والدم، باوعت منا لڪيت وحده من البنات واكفة تبجي كتلها 

ـ الزمي البنيه امانه عدج لا اطرحينها بالكاع

ترتيل:- هاا؟

ـ بلا فهاوة الززمي دومك يالابيض فاهي

اخذتها مني مشيتلهم خالي من شافني صاح وهو فاتح اديه مبعدهم

 

لؤي:- خالي الله جابج تعـاي تعـاي 

البت طاحت من السطح

بسمه:- يمـه حبيبة 

وخروا عنها لحد يحركها اشوه بـله نطوني مجال

دنكت على البنيه واني اوخر ايد المرة قبل لا تحركها شفت التنفس والنبض مو مال تنتظر هنا تموت

ـ خالي السيارة الي بالباب  المقعد اخلفي اطبكه واذا تكدر دخلها هنا بسرعة 

ووياك حصلي ثيبرة اذا تكدر وكون ماكو شوفولي حتى لو دوشك ولو خطر

صاح عليهم

ـ نريد ثيبرة بساع

جاوبه رجال مدنك كبالي على البنيه صفرة التصرخ كوكي

يونس:- ڪرم اركض للبيت تلكى بالمخزن 

ڪرم:- هسه اجيبها

لؤي:- بساااعك اخوي اركض

ثبتت راسها ورقبتها دنكت شفت التنفس بعده موجود 

تقدم واحد منهم  جا خالي لازمه، يريد يشيلها وهو يحجي بابا كوثر

صحت بيه وخرررر دير بالك تحركها

صحت على النسوان اريد شي نظيف اوكف بيه النزف

دخلت وحدة منهن تركض جابتلي كعدت بصفي كتلها اضغطي على راسها 

لتين: اي اي 

المرة كطعت روحها هي والبنية الرفيعة، حركت راسي واني اصيح 

ـ وخررن وخرن لا تجيسنها  تضرنها

خالي دخل السيارة  ما اكدر التفت مثبتتها وعيوني عليهن بس تغفل عيني عنهن يحركنها فاقدات مايسمعن

لؤي:- خالي هاي الفايبر

ـ حطه وجيب وياك بعد كم واحد يشيلونها

كملت واني اشر على الرجال الكبالي براسي

ـ وهذا وخره مبين فاقد وعيه 

صاح بيه اصف وخررر لا تأذيها شمالك 

اجت مره تناشغ وخالي واثنين زلم اشرتلهم براسي على الامكان الي يرفعونها منها واني اكلهم ويا كلمتي رفعه وحدة كلكم الي يشوف نفسه مايكدر يوخر بسرعة 

ثبتت راسها واني اشدد عليهم لا يثنونها رفعناها على الثيبرة رفعه وحدة ونزله وحدة 

حجيت ويا المرة الي رفعتها وياهم

ـ جرجف ومقاعد اثنين استعجلي حبيبة

سمر:- جرجف، ومقاعد

اي صاررر هسه

تحجي وهي تركض شالوها الزلم دخلوها للسيارة على توجيهي صعدت كعدت عد راسها ضاغطة النزيف بركبة رجلي

اجت المرة كتلها غطي جسمها  والمقاعد حطيهن بحوانب راسها حتى مايتحرك بالطريق 

خالي صعد يسوق ونسيـبه صعد بالصدر امها رادت تصعد منعتها تصعد ويانا

ـ حبيبه خلي يجيبونج بغير سيارة مالج مكان 

صاحت وهي تلطم على وجهها اريد ويا بنتي

 كسرت خاطري كتلها مابيها شي هسه نلحكها يلا حبيبة سدي الباب تاخرنا عليها

لؤي:- ولك يونس تعال اخذ بنت عمك خلي نطلع 

اخذها الرجال هو والبنية النشعة (النادرة تقصد سمر)  طلع خالي السيارة من البيت حجيت وياه وعيني على ابوها يريد يكمز علينا

بسمه:- خالي 

انتبه وانت تسوق 

وانت خوية شد على نفسك وابقى بمكانك  

ظليت مثبته راسها بيدي والمقاعد اباوع على وجهها مردت جبدي

لؤي:- ها لا طلعنا للمستشفى

باوعت على خالي يحجي بالتلفون وهو يسوق 

بسمه:- خالي عووف التلفون وانتبه لا تدخل بطسه 

لؤي:- سراج اسبقنا للمستشفى  وخليهم ينتظرونا بالباب

شفهمك دسده وسوي الكتلك عليه 

بلعت ريكي هذا سراج على التلفون واني صوتي يلعلع الهي لا تخليني اشوفه من اجيت لهسه ادعي ما اشوفه شني هالحظ اللي عليَّ، خالي سد التلفون وهو يدور ويحجي

ـ رقم علاوي راح من عيني

ـ اصف اتصل على علاوي 

ماجاوبه ملتفت علينا عيونه على بنتــه باوع عليه خالي ورجع يباوع على الطريق ويحجي على الساعة الناسبهم بيها وخبص الوادم بالهورن

وصلنا للمستشفى فتحوا الباب فريق من الطوارئ طلعوها، وياهم ابن زوج تماضر اعرفه بس تيهت بينهم هذا ياهو الجبير لو الزغير  

نزلت صار كبالي يحجي ويا خـالي شلون طاحت وخالي يرد عليه بعدين نحجي عيني على ابوها دخـل واحنا بعدنا

التفت عليَّ نظره سريعة ودار عينه

سراج:- شلونج 

بـسمة

خوويــة

جاوبته وعيني على خالي 

بسمة:- زينه الله يسلمك

مشيت لخالي كتله خلينا نفوت وراها 

هز راسه ايه مشى كبالي واني وراه ولازمه نفسي ما اريد التفت على اليمشي الورانـا هسه مو خالي بلعن الساعة اني العنها سـاعة طلعت واجيت 

البنية ماخذينها يسوولها رنين وابوها خطيه يلوب خالي راح عليه واني 

كعدت عيني منهم منظر البنية بعده بعيني

سراج:-راح تبقين هيج! 

اذا تردين اطلع اجيبلج

تنوعت عليه عيونه على رجليه دنكت  اشوف شڪو نشغت 

 ـ يمه حبيبه

لابسه شحاطة خالي شكبرها رجلي غايصه بيها، رجعت رجليه ليورة ضامتهن جوا الكرسي باوعت عليه نفس الوجهه بملامح جامدة ميتة متجاهل نظراتي المفضوحـة

بـسمة:- لا تسلم ماريد اتعبك

هسه ارد للبيت 

مشى عليهم واني اتنوع على الناس متعودة من دوامي بالمستشفى على هاي الهوسة 

دخلت امها اباوع عليهم البنيات كطعن انفسهن الصفرة لازمها اللي اسمه يونس وام البنية لازمتها اختها وهاي الرفيعة تذكرتها مزنة الخابصنا خالي بيها 

مشت على ابوها تدفع بيه وتصيح كله منك شكو رجعتلنا ارتاحيت هسه كتلك مو الها

يمه حبيبه على الوكاحة هاي لو عدي جا عرفت شغلي وياها، سراج اخذها على صفحة يهدي بيها باوع عليَّ بسرعة وخرت عيني منه

اجى كعدها يمي ويحجي وياي

ـ هاي مريضة سكر عينج عليها خليها.. 

بعده يحجي وياي وعيونه شبحت درت راسي دخل رجال بوسط العمر وولد شاب مرتب شايل طفلة وبينهم مرة راحت على ام البنية اللي حضنتها وتبجي بنتي ماتت 

درت راسي عليه منزل عينه على مزنة كال عينج عليها بعد ما اوصيج 

وراح وكف ويا ابوها وخالي رجعت عيني على امها تكسر الخاطر 

مـر الوقت واجاهم ابن زوج تـماضر كالهم

علي:- دخلوها للعمليات عندها نزيف بالراس ولازم يسحبون الدم

وبعد العملية يطلعونها للعناية بس يستقر وضعها باذن الله كم يوم ويدخلونها عملية ثـانية 

سألوا ليش 

ـ حسب قراءة الرنين عدها خلع بالكتف ورجعوا قبل لا يدخلونها للعملية

وكسور بالاضلاع وهم الحمد لله مو مركبة ثبتوها مؤقتاً 

بس عدها كسر مركب برجلها محتاجة بلاتين لهذا السبب 

خطية امها ڪعدت بالڪاع تنحب وتحجي مكتوب عليَّ اشوف الموت ببناتي 

انتبهت على الولد اللي اجى متأخر عينه كل شويه تصير على مزنه يعاين عليها بقلق ومخلصها يروح ويرد  

حطت راسها على كتفي باوعت عليها موطبيعية اشرت للولد العينه تروح وتجي عليها

ـ اخذها يقيسولها السكر

التفت على النسوان حجى بسرعة وقلق

ـ يمه ام آدم 

تعالي

اجتى كالتله هايمه

ـ اخذي وياي زمزم نشوف سكرها 

اخذتها بيدها تمشي بيها جنها تريد تحضنها والولد يمشي كبالهن وكل شوية ملتفت عليهن 

بقيت ڪاعدة شنو موقعي مادري عيني عليهم واغفي اجى خالي كعد يمي 

ـ ها بســومه

سراج راح يروح اوديج وياه؟ 

ـ اي خالي راسي ثار عليَّ 

راح على سراج كاله وصل بسمه وياك

طلعنا لسيارته يمشي كبالي واني وراه امشي براضه لا تفلت الشحاطه من رجلي 

فتحلي الباب ومشى صعد صعدت واني احجي بكلبي وينه عدنان خلي يتعلم النزاڪة يحرك السيارة واني رجل بالسيارة ورجل بعدهي بالڪاع

شفته مد ايده شغل مسجل السيارة طلعت اغنية عود لحبيبك غيرها على دعاء يسوق وعينه على الطريق بس عيوني مره عليه ومره على الشارع

وصلني للبيت تشكرت منه ونزلت دخلت جوه مرت خالي كاعدة تبجي وكلها يمها باوعت على البنية بعدها شايلة بنونه وتفتر بالصالة تسڪت بيها

  ••------------ ♡♡♡ -------------••

نفـــــــــــــــس

كاعدة على السرير وراس زمزم على صدري ما تقبل اعوفها واطلع من الغرفة الحجزها الهم علي ابن ثائر

عيني على اثيلة منتهية ماعافتها نوبة البجي لحد ماطلعوا كوثر من العملية حاطه راسها على كتف امها وراس أبنها بحضنها عيونها غرگانات بالدموع نظراتها تايهة فاقدة الإحساس بالحواليها والوجه احمر 

وعلى الجهة الثانيـة ڪاعد آصف بصمت ساند رأسه بجفه وهموم الدنيا كلها فوك اكتافـه

 ما نطق بكلمة وملامحه يكسوها التعب والانكسار يشرح حجم الألم اللي عايشه، الكانيولا بعدهي بجفه نظراته بالكاع مارفع راسه 

آدم ڪل شويـة يجي يباوع علينا ويرجع على ابوه وعمامـه، باوعت على سمر حاطه راس عسل على رجلها بعدهي تبجي 

دخلوا ارسلان وباسل خطية الوجوه مخطوفه كامت حضنتهم اثنينهم وهي تبجي وهم يصبرون عليها وخوفهم واضح 

بالليل حجيت ويا آصف حتى اخذ زمزم ومصطفى وياي، التفت على الباب شاف آدم واكف منتظرني حتى يرجعني للبيت

آصف:- زمزم تبقى هينا 

بس مصطفى يروح

هزيت راسي اي دنكت بستها براسها رفعته بيدي نزلته على المخده ونزلت من السرير رجلي خدرانه منها، اخذت مصطفى وطلعت آدم جاب قمر من ابوها 

سألني وهو يمشي بصفي:- ليش ماجبتي زمزم وياج؟ 

كتله أبوها ما قبل 

ـ ما عرفتي كوثر ليش شـامرة نفسها

ـ لا حبيبي ما سألت خـاف سؤالي يسببلهم أحراج 

وصلني للبيت ورجع عليهم نومت مصطفى بغرفـة آدم وطلعت للصالة اصلي صلاة الليل 

للفجر واجى ارغد وجايب وياه زمزم وآدم وراهم نام ساعة وبعدين راح للجامعة

على الريوك سألها أرغد كالها اختج ليش وكعت نفسها من السطح

جاوبته ما اعرف 

ـ يعني ماكو سبب تعرفينه! 

ـ لا عمو ماڪو 

سكت عنها ما تريكت بس اخوها ريڪته 

زمزم:- عمو تاخذني لبيتنا

أرغد:- ليش عمو ابقى هينا وام آدم عينها عليج انتي واخوج

زمزم:- لا اريد اروح 

كالها براحتج العصر اخذج

عيني عليها تتصرف مثل الغريبة بالبيت مو زمزم القديمة اللي معتبره هذا البيت مڪانها الاول 

أرغد راح للمستشفى واني على اتصال وياه كال بعدهي بالعناية الظهر اجى آدم دخل لغرفته غير وطلع باوع على زمزم كعد بالطرف الثاني مقابيلها عيونها على أخوها يلعب ويا قمر 

دا ادخل للمطبخ اجيب غداه وهو سألها

آدم:- اي زمزم اختج شبيها؟ 

رفعت راسها خازرته حجت وياه بعصبية

زمزم:- ماااابيها شي ليش كل شوية تسألون 

آدم:- صـوتج شبيج! 

هسه اني شڪتلج؟ 

نفس:- أهدي حبيبتي 

آدم اسكت عنها ولا تسألها ما تشوفها اعصابها تلفانــــه

آدم:- شنو اذنبت من سألتها ما يحتاج هالنتر والعصبية تجاوب ما اعرف وخلص 

احجي شبيج مرة دحكِ بخوف ومرة تنترين؟ 

زمزم:- انت بالذات لاتسأل ولا تدخل بينا ما عليك

باوع عليها بعصبية، كور جف ايده ونهض كال 

ـ يمه رايح للمستشفى ومناك اروح للمجمع محتاجة شي قبل لا اطلع

ـ اتغدا بالبداية

حجى وهي يباوع على زمزم

ـ نسـدت نفسي 

طلع وهي تباوع وراه، كعدت يمها مسحت على راسها

ـ شبيج حبيبتي 

ماقصـدة شي بالسؤال ليش هالعصبية؟ 

سولفتلي الصاير و هي تحلف التلفون مو لـ أختها

سألتها شنو لكى أبوج بالتلفون كالت

ـ ما اعرف بس ماما لطمت على وجهها من شوفها وظلت ترجف وتحلف هالحجي والصورة مو لڪوثر

ـ صورة شنو ما شفتي؟ 

هزت راسها لا 

ـ والتلفون وين راح؟ 

ـ عندي ضميته 

ـ اي هذا انتبهي عليه ولا تنطينه لـ أحد غير ابوج 

امج لا تنطينه الها تروح تكسره وتضيع براءة أختج من خوفها عليها

وابوج من يهدئ يعرف هو يتصرف لا تضمينه عليه اذا راده

العصر اجى ارغد اخذها لبيت اهلها هواي حاولت وياها تبقى هنا ما قبلت

ڪوثر اربعة ايام مرت وسولها عملية بلاتين لرجلها ورجعوها للعناية ڪالوا ماتطلع الى ان تشفى ضلوعها 

يوميـه العصر اروح لها للمستشفى آصف من يشوفني يدنك راسه ويبتعد 

 ••----------- ♡♡♡♡ -----------••

زمـــــــــــزم

بقيت بيت اهلي اني وصوفي عمتي درة ما عافتنا تجي يمنا ومرات تجي وياها بسمـه الي بس تدخل ڪل نسوان خوالي وعمامي يجن وراها وبيبي وترتيل يموتن على سوالفها 

الا أني مبوزة بوجهها كل ما تشوفني وكالت يمه حبيبة عشيرة ماتحملج وتكب بيناتنا اني افور وهي تتعمد 

 بالليل بيبي ام باسل تنام يمنا ما عافتنا الطبخ وڪل شي اني ما مقصرة بيه حتى صفاوي باليوم مرتين ادخله للحمام اجلفه اصلخ جلده بالليفة 

ماما كل يومين تجي حتى تسبح يظل يشكي ويبجي يكلها تشبعني كتل على ظهري وما تخليني اروح على بيت خالي

أثيلة:- ليش ماما ويا اخوج 

خلي يروح يلعب ويا جهال خالج

ـ خلي يولي بس يطلع يبقى بالشارع يفتر وحتى متعلم الفاظ محلوة يغلط بيها عليَّ 

احجي ويا إبنج يحترم ترى والله احمي السجينة واحطها على لسانه بس يغلط بعد

صاح بيها ما تحترمين انتي 

خزرتـه وهي تجره من اذانه وهو يصيح جذابة ما اغلط عليها

كفخته على ظهره واني اصيح منو الجذابة هاي بيبي تشهد على سوالفك 

صرت اكره روحتي للمدرسة من وراء اسئلة البنات ونظراتهن النا، ومطلعات علينا سمعة وكلها تسفط بكيفها

عسل مرات ما تتحمل وتتعارك وياهن اني ساڪتة رغم الحجي اللي ديوصلني اسمع واتجاهل اخذ عسل من ايدها اسحب بيها وامشي وهي تفور عليهن، المدرسات يسألني باستمرار على ڪوثر وضايجات عليها 

للمستشفى خالو باسل ياخذني وياه عسل ڪل يومين تروح ويا امها الا اني اصف واكفلي ومن يشوفني نخلصها عرك اصبعه على كد ما يعض بيه صاير بيه أثـر ويحجي على خالي يكوله بعد لا تجيبها هاي عوفها بالبيت شڪو جايبها تردون تجلطوني يأخذني خالي عنـه 

أسبوعين بعد عملية البلاتين وطلعوا ڪوثر للبيت، فرحنا بطلعتها بس هي ماڪو تعبير على وجهها غير الخوف 

آصف من يدخل يشوفها تسوي نفسها نايمة، وبس يطلع تفتح عيونها تباوع على الباب بخوف

واڪفة اغسل بمواعين العشاء دخل اخذ منفضة من الجرار باوع عليَّ كال وين تلفون اختج

ـ مو تلفونها 

هسه اجيب سماعه واصيح بيها يم اذانك مووووو تلفونها 

فرك كصته بصابعه حيل كال 

ـ خوش روحي جيبيه بلا لغـوة ساكتلج عبن أڪول مريضة

سديت المي ورحت للمخزن طلعته اله والمسدس بقى 

لكيته كاعد بالطرمه على الحافـة طابك رجليه بالطول يدخن وصافن على السياج

بقيت واڪفة اباوع عليه، اريد ارجع لحضنه مثل قبل بس من اتذكر اللي سواه الزم نفسي، حس بيه التفت كال ها جبتيه

هزيت راسي انطيته اله سويت نفسي دا ارجع ملتفته عليه براسي شفت الرمز اللي دخله رجعت اركض واني اردد بيه طلعت دفتري كتبته ورجعت للمطبخ تلاكيت وياه يدور عليَّ 

ـ منوو فاتح التلفون؟ 

ـ محد والله وهاي اول مرة اطلعه 

طلع تلفونه باوع على الشبكه مشتغله وبالتلفون الثاني ما مشتغلة

خزرني كتله شبيك هيج تباوع والله ما مطلعته أبداً وحتى الرمز ما اعرفه

كال روحي جيبيلي شاحنه راح يخلص شحنه

ـ جيبها انت اريد اكمل تنظيف

ـ زمزززم

ـ خوووش 

رحت جبتها اله لكيته مسوي كعدة بالطرمة مطلع الابتوب وجار الكهرباء

نطيتها اله علكها بالكهرباء 

ـ راح اطلع ما اتأخر لحد يطلع بره 

كتله خوش واني اسوي حركه بشفايفي انزلهم لجوه اعيب 

ضحك وطلع. دخلت كملت المطبخ ونظفت البيت حتى يصبح نظيف دخلت على ڪوثر نايمة وماما هم غافيه بتعب مصطفى يباوع على البلازمه علي شاڪر وهو يغفي وهسه عرفت منين جايب هاي الڪلمة وخابصني بيها 

طلعت بره لسه مارجع تأخر، رحت لدفتري طلعت الرمز لان نسيته ورجعت على التلفون فتحته بيه برامج اعرفها وبرامج ما اعرفها دخلت على الصور لعبت نفسي وبسرعة طلعت مصورة جسمها ما اعرف صور من النت وبدون راس

هزيت راسي اريد اشيل الصور اللي شفتها من عيوني، رجعت على التيك توك طلعت تعليقاتها كلها فشاير وهاي الكلمات الي وياها كلام اللي مثل الكلام الكوري وياها فشار  واكو ردود تعارك بيها بالتعليقات وكلها نسخ من الحافظة مال تلفون 

دخلت على اليوتيوب مشاهداتها للكورين والاغاني مالتهم ماعندها تعليقات بيه بس اسمها باليوتيوب مزخرف يختلف عن التيك توك

ناسيه روحي حتى اصف نسيت ما اباوع على الباب خاف يرجع ويشوفني فاتحـه التلفون

دخلت على برنامج محادثات ويا بنات وي ولد دخلت اقرا باول محادثة انزل بيها بصبعي

هي رسائل وصور والولد كتابه وبصمات افتحها كلامه غريب لهجة ما اعرفها ولا سامعتها قليل ڪلمات مبينة عراقيـة

هي تغار وتتعارك ويا شلون يحجي ويا بنت مكتوب اسمها هذا ما اعرف لقب، وهي دكوله انت بس مالتي الي وهو دازلها بصمة واضح بالسيارة من جان اصف يدزلي بصمات نفس صوت الهوا والمحرك يتعذر منها ويوعدها مايحجي ويا البنت لهجته غريبة أبداً ماڪو ڪلمة عراقية

مندمجة اقرا قريت كلمة بعدني ما مستوعبتها وما مارة عليَّ  وفوكها صورة فتحت عيوني شنو مصورة 

صرخت يممممممه من نلزمت رقبتي باوعت عليه اصف وعيونه تريد تصعد لكصته سحب التلفون من ايدي وصلخني بكم جف بوجهي منا ومنا وهو يصيح شجابج اله شلون تفتحينه وتقرين 

باوعت عمي لؤي واكف كبالنا استحيت منه مالابسه حجابي ما حجيت اجيت انهزم جرني من شعري  موكفني كباله

ـ شنووو قريتي بعد غير هاي المحادثة

سكت باوع عليَّ بشك حجى وهو يسحب بشعري 

ـ شلون عررفتي الرمز 

ـ شفتك من دخلت الرمز وحفظته 

اخذت راشدي وعمو لؤي يصيح خايب عوفها ما تشوفها كاضية مابيها نفخة

دفعني وهو خازرني عمو لؤي كال سويلنا جاي يبعد عمج 

رفعت شعري كطعة، مشيت للمطبخ سويتلهم جاي ورحت غيرت ملابسي ولبست حجاب اريد اكعد يمهم لكيت عمي سراج موجود سلمت عليه ورجعت للمطبخ صبيت الجاي دا اطلع وسمعت صوت رجال غريب وياهم رجعت صبيت ستكان رابع ودكيت الشباك اجى حتى ياخذه 

ـ لوما عيب جان ما صبيتلك وياهم

آصف:- لسانج حافظي عليه لا ينكص والله 

ـ عادي تكصه اصفك بديه يم اذانك ما تخلص مني الا تعوفنا وتطلع من البيت

ـ صايرة حيل صلفة بس اخلص من سالفة التلفون اعرف شغلي وياج

طلع واني رحت وكفت وراء الشباك اباوع على الاجهزة هواي اصف وعمي سراج بس يباوعون والرجال وعمي لؤي كل واحد حاط لابتوب بحضنه فتحت الشباك قليل اصف يسولف على سراج على الموجود بالتلفون ويڪله ولا شبكه من شبكات بيوتنا بيه 

ظليت واڪفة الى ان رجليه تصلبت دخلت نمت  وثاني يوم بالليل هم نفس الشي بس صاروا اثنين رياجيل مو واحد وثالث يوم هم نفس الشي يبقون للصبح على نفس الڪعدة

رجعت من المدرسة واسمع اصف يسولف على ماما 

ـ حساب التلفون على رقم … (غير دولة) 

ـ والبنت شلون عرفت الولد ووصلته 

ـ من لعبـة جانت بتلفون عمتها من تجيهم تاخذ تلفونها تلعب بيه  تتواصل وياه 

ـ والله عقلي واڪف بنت بهذا العمر وهيج بلاوي عندها 

ـ حتى كلامها بالمحادثة ما مبين عراقي امها وين عنها ما انتبهت على كلام بنتها 

ـ وشراح يصير على البنية 

اجت بنتي تروح من ايدي وهي لابيها ولا عليها

من شافوني سڪتوا اصف دخل على ڪوثر سوت نفسها نايمة كعد على السرير يبوس بوجهها ويشم بشعرها

ظلت تشهك وهو يحجي وياها ويراضيها ويكولها نعمت عيني من قريت وشفت الصورة وانتي الله يهديج ما انتظرتي يول منو معلمج على هاي الحركات وسوالف الانتحار المفروض اعاقبج 

ظلت تبجي وتتعذر بعد ما اعيدها الفطيرة بسرعة رضت عليه وتبوس بجف ايده باوع عليَّ خزرته وطلعت لو تموت ما ارضه وياك نزعت حجابي والحنطة عفتهن على القنفة ورحت شربت مي بعصبية 

آصف:- لا تغصين

ـ ان شاء الله واخلص منك

دا امشي ولزمني من كصيبتي طلعها من حوا صدريتي سحبني عليه باس خدي

ـ جمارتي مشتاقلها

ما مشتاقه لابوها

ـ انتي مو ابوي عوف شعري كطعته

سحبت كصيبتي ومشيت للغرفة.. 

من داومت ثاني يوم تفاجئت المديرة غيروها المعاونة صارت بمكانها وبنية من صف ڪوثر صاحبة التلفون ما داومت بعد شسوا الها مانعرف كوثر بعدهي على الاجازة والامتحانات الشهرية يجيبها آصف تمتحن بغرفة المدرسات ودروسها كله خصوصي 

  ••----------- ♡♡♡♡ --------------••

تمـــــــــــــــاضر

الضحى محد بالبيت اليوم بس مهند البارحة خفارة واليوم استراحته العصر يطلع للمجمع كملت تركيب الغدا ندك الجرس طلعت فتحته سراج هو غير بيته كبال بيتي الباب كصه بكصه بس شعوري من يجي عليَّ ما ينشرح احس روحي اطير بيه

دخل للصالة واني وراء ويحجي عليَّ ليش صار يومين ما دازه البنات عليهم ويا نـــونه

تماضر:- كسرن البيت كل مرة ادزهن واروح وراهن الكاهن كاسرات حاجة نونة دكول ما يكعدن راحه يعبثن بكل زاوية وبيبي عايفتهن بڪيفهن

سراج:- يابه فدوة الهن البيت وغراضه حارمتنا من شوفتهن على هاي صدك تحجين والله عدج سوالف 

رزان ليان وينجن خالوو 

سمعن صوته طلعن يركضن من غرفة مهند جان يخبثن عليه مايعوفنه ينام، دنك عليهن اثنينهن تعلكن برقبته

سراج:- آه يا بعد خالجن مو يومين جن عشر سنين ما شايفجن

طلع مهند سلم على سراج وكعد كبالهم ضيفته وكعدت وياهم سراج يلعب ويا رزان وليان واني اباوع عليهم واضحك ومهند بس اسمه كاعد ويانه عقله بغير مكان سراج كل شويه يباوع عليه ويرجع على البنات

باوعلي اشرلي براسه على مهند وهو يسأل شبيه؟ 

تماضر:- اكو ناس متعبينه 

سراج:- الشاغل بالك يتهنئ؟ 

منهد:- وياي؟؟ 

سراج:- وين صافن ماسمعنا حسـك شجاك بويه كطعت روحك بالسوالف

ضحك وهو يحك زنده وسولف سالفته ويا ترتيل لسراج وشلون يحاول وياها وهي رافضته وما تنطي فرصة 

سراج:- لكل مجتهد نصيب

مهند:- ليش هي درس؟ 

سراج:- اي درس لو تطلع منه ربحان لو تطلع منه خسران سنين عمرك

بس الخسارة الجبيرة من تخسرها كبالها ما تجي اي خسارة 

مهند:- والله تعبتني سنة ونص احاول وياها عبالك اني العفتها اربع سنين مو هي 

ابتسم سراج وهو يكول 

ـ بعدك  ما شفت شي من التعب لا تسولفلي بيه شنو الاربع سنين وتعبت منهن

بوس خدود البنات ونهض من مكانه 

سراج:- يلا اني اروح اشوفكم غير مرة وها تماضر البنات لا تمنعينهن من عدنا ترى نصير مو خوش دزيهن ويا اختهن

تماضر:- صار خوية من باجر ادزهن 

التفت على مهند وكاله

سراج:- اللي يحب صدك ما يبالي لا بالتعب ولا بسنين عمره، احجي وياها او كلف وحده تحجي وياها حتى تعرف شنو سبب رفضها 

طلع ومنهد طلع وراء وصله للباب ورجع اويلي عليك خوية صدك ضاعت سنين عمرك

مهنــــــــــــد 

واكف اصرف العلاج للبنية ودخل علي شمر روحه على الڪرسي حاسبتها فتحت السجل اكتب بيه

ـ شعندك هنا؟ 

ـ تعبت اريد ارتاح

ـ روح يم آدم اريد انظف

ـ ما ترجع تخطب ترتيل

ـ لازم اعرف سبب الرفض بالبداية ما اريد استعجل تالي اتروح من ايدي

ـ لا استعجل ترى مرة مو زاجل واطير 

باوعت عليه بطرف عيني واني امسح بالرفوف

ضحك وهو يكول والله جنـــه اخوك هم طار گلبه وحط يمهم

ـ استر علينا لا ينجلط ابوك مو وگتك خلي اعرس بالبداية وبعدين تصافئ انت وابوك

بقى ساڪت يفر بالڪرسي سألته بفضول ومنو هاي اللي اخذت گلبك ريس علي

علي:- اخـت ڪوثر

مهند:- وانت مالڪيت غير زمزم هاي من اول يومين تكعد ابوك بالشماعيـة

علي:- لا مو هاي المسودنه 

اقصد على الثانية 

مهند:- شنو الثانيه! 

قصدك ڪوثر لو اختها انت؟ 

ـ شبيك اختها

ـ اي اسمها زمزم 

ـ لا مو ام السڪري يا اخي شنو ما اعرفها

اقصد على الثانية المربربة

ـ ولك شبيك دايخ آصف ماعنده بس اثنين بنات ومصطفى

ـ شنو ماعنده ذاك اليوم لكيتها تبجي على ڪوثر سألتها هاي اختج كالت اي

طلع تلفونه فتحه شوفني صورة البنية ڪاعدة على المقعد صافنه 

ـ ولك هاي بنت عم آدم عسل 

المن مصورها شبيك تخبلت

ـ عسل اسمها لو دلعها! 

ـ اسمها

ضحك وهو يباوع عليها كال صدك عسل 

ـ امسح الصورة 

ضم التلفون بجيبه وهو يجاوبني

ـ وشلون من تشتاقلها عيوني اباوع على وجهك

اريد احجي وياه واجى آدم سكتت اخذ السجل وراح دخل لؤي ووراء بنت اخته من اليوم راح تشتغل ويانـه 

رحنا وراء ادم يردون يصفون ارباح هذا الشهر وينطونا حصتنا منها، اجى الوالد وياه خالي سراج دخلنا لمكتب آدم خالي كعد على الكرسي وابوي مقابيله واحنا على القنفة دخل عمي لؤي وحده كعد على الكرسي الثاني وجهه النا وابوي ظهره النا

آدم صاير بصف خالي مدنك ساند ايده بالمكتب والايد الثانية لازم القلم بيه، يحجي وياه بالحسابات لان خالي صاحب الحصة الاكبر 

ـ وهاي سجلات الصيدلية وكل الاقسام اني فرزتها واذا تحب تتأكد براحتك 

سراج:- ما يحتاج اعرفك دقيق بالحساب

دار طلع الفلوس من القاصة كاله 

ـ وهاي الرواتب

 وهاي فلوس الصرفيات 

وهاي ارباحكم هذا الشهر

سراج:- سبـــع والله الرواتب انت وزعها والصرفيات مهند تظل جوا ايد مهند هو يتكمل بالاحتياجات

عمي لؤي صافن على حوض السلحفاة عاقد حاجبه بتفكير عبالي يفكر بكلامهم 

شوية وضحك بصوت عالي ادم رفع ظهره يباوع عليه وابوي وخالي هم 

غطى وجهه بجف ايده يضحك وبيده الثانية يضرب على فخذه

آدم:- كلت شي غلط يستدعي هذا الضحك! 

لؤي:- ولك شنووو هاي الحاطها كبالنا

كلهم كالوا شنوو؟ 

وخر ايده عيونه تصب من الضحك يريد يحجي ماكدر اشر بيده عليها التفتوا يباوعون عليه ساكتين

سراج:- شنو شبيها؟؟ 

صفن عليها وكال بأستغراب 

سراج:- ليش صفرة مصلوخة هاي شنو! 

ضرب جفوف ايده وهو يضحك بهستيريا صاح

 ولك جنها ــــــــ

اني وعلي طفرنا سدينا حلكـه، ابوي وخالي يخفون بضحكتهم وآدم اشمر القلم بالكاع

آدم:- اني من اليوم واعذروني بعد ما اشتغل هينا مازال الحجي صار هيج

شال الحوض يريد يطلع علي راح لزمه وعمي لؤي وخرني وهو يصيح

ـ ولك فشلتنا وين طالع بيها 

انوب حاضنها يا الله

من الفشلة  ما عرف وين يوديها جابها وحطها بحضن ابوي طلع لحكوا علي وخالي واني اسكت بعمي وابوي رافع الحوض يباوع عليها يكوله شبيها حلوة 

رجعوا للمكتب دفعات وهو يحجي بعصبية وفشلة

ـ لا اعذروني ما اڪدر اكمل وياكم

عمي لؤي راح عليه كفخة على ظهره وهو بعد يضحك 

ـ ولك شكالتلك روحك من جبتها

باوع على شكلها قانوني هذا

سكت يحك بكتفه ويباوع عليها

آدم:- مابيها بس تفكيرك غلط

سحبه كعده على الكرسي اخذها من ايد ابوي وحطها كبال عين آدم

ـ عيونك جنها عيون عتوي شوووف زين هاي مابيها شي

هو هذا شكل بشرفك

دنك يباوع عليها وهو يفر الحوض بين اديـه، رفع راسه يباوع علينا ويبرر بخجل

ـ مابيها شي 

سراج:- ڪافي لؤي شجلبت وياه دعوفـه 

 ••---------- ♡♡♡♡ ------------••

آدم 

بعـــــد ما طلعوا اخذت سجل مخططه بايام الشهر الجديد 

دكيت الباب عليها

بسمه:- ادخل

دخلت حطيت السجل كبالها

ـ هذا السجل تسجلين بيه كل يوم ومن يخلص دوامج اني اجي اخذه 

باوعت عليها تكلب بيه هزت راسها اي طلعت من غرفتها من خلص وقتي اخذت السلحفاة وطلعت لبيت عمتي اثيلة

شفت سيارة اصف ماموجودة دكيت الجرس طلع مصطفى كتله نادي زمزم

راح يركض واني بالباب اباوع على باب لؤي خايف يطلع سيارته الجديدة موجودة 

طلعت متفاجئة بجيتي سلمت عليها عمتي اثيلة طلعت وراها سلمت عليها كالت تعال ادخل عمه

ـ لا مستعجل باجر عندي امتحان

باوعت على زمزم رجعت على السيارة دنكت طلعت الحوض من الشباك ورجعتلها 

آدم:- هاي الج صار كم شهر من اشتريتها ومالكيت وقت مناسب اجيبها الج

زمزم:- الي!! 

دحكت على عمتي اثيلة صافنه علي

آدم:- لا مو الج

لا اقصد الج

قصدي اشتريتها زينه للمكتب ومحد يعتني بيها وبالبيت قمر تموتها اخذيها انتي مازال تحبينهن

كتفت اديها حجت بعصبية

ـ انطيها لـفستقة عسل

آدم:- بس اني جايبها الج مو لعسل

وعسل ما تحبهن

زمزم:- الي لو للمكتب؟ 

آدم:- للمكتب وهسه الج 

تاخذينها لو اشوف احد انطيها الـه

تقدمت عمتي اخذتها من ايدي دحكت على زمزم صافنة بوجهي بسرعة بعدت عيونها على الحوض شفت الفرحة بنظراتها وهي دحك عليها شلون تسبح

سلمت عليهن ورجعت للسيارة شغلتها وعيني على الباب بعدهي واكفة ماخذه الحوض من امها ودحك عليَّ زفرت النفس براحة واخيراً تخلصت منها بعد لا اسمع ضحك أبوي ولا سوالف لؤي الماصـخة

من اخذتها الها ما جان براسي قصد غير اتخلص من السلحفاة ، اما مشاعري لزمزم ساد عليها بأحڪام ومصبر نفسي بمرور الوقت راح انساها 

ابوي فاتحني بموضوع ترتيل ثاني مرة رفضت كتله مازال صديقي خطبها مستحيل ارجع اخطبها وراه الله يسعدها بالنصيب الزين ويا غيري

بوقت الفراغ بالمجمع نخلصه يم بسمه واسمها عليها زارعـة البسمة بالوجوه اني استحي منها وماعندي ميانه وياها عكس مهند وعلي يحبون سوالفها ومايصدكون يلكون فراغ ويرحون يمها يشربون جاي لو قهوة

اشوف مهند هواي يروح ويرجع عليها ما اعرف شعنده وبشنو مڪلفها 

كاعد ادقق بالحسابات دخل آصف عقدت حاجبي على طريقة دخوله وبنفس الوقت مستغرب جيته 

بقيت ڪاعد وڪف مقابيلي واڪف وكفتي اديه وراء ظهره

آدم:- محتاج شي؟ 

ظل ساڪت يدحك عليَّ، نهضت من مكاني تقدمت وكفت كباله 

آدم:- بيك شيء!! 

طلع اديه مو وراء ظهره رفع جف ايده لكتفي ضغطه بقوة دحكت على ايده ورجعت عيوني على وجهه 

آصف:- طـلع بنتي من راسـك لا تجبرني اطلعها بنفسـي

 ••----------- ♡♡♡♡ ------------••

تمـــــــــاضر 

طلعوا الولد وثـائر بعده ڪال احس نفسي تعبان اليوم ساعة واروح اتصل على الاخصائية تلزم مڪانه هالساعة

مرت نص ساعه على طلعت الولد ورجع علينا مهند شايط عيونه بهامته وعلي وراء يريد يكمشه وكف كبال ابوه

مهند:- انت أبوي لو عدوي

انت شنوووو من أب 

شايفني طفل وتضحك عليه

واني مستغرب شلون وافقت تروح تخطبها طلعت طابخ رفضها 

              الفصل الثاني عشر من هنا