رواية سجين الحب الفصل الثاني عشر12بقلم زهراء الحريري
ســـــــــــــراج
الگلب بس للبيَ عف واكتفه وكف بس رحلة بيه للهواي دلالي مو صف
••----------- ♡♡♡♡ ------------••
توقف الزمن ولم يبقى سوى أب انهڪه احساس الذنب والعجز
اثيــــــــــــلة
صديت على البـاب اصف واكف عيونه على ظهر زمزم الڪاعدة على الكرسي والابرة على الميز مقابيلها ما تقبل أضربها الها
نزلت البدي من كتفها لنص زندها ورفعت الابرة دتضرب وتراجعت تحجي وحدها
ـ بله خلي أجرب بالفخذ صدك ما تأذي؟
دنك راسه وهو يستند بأطار الباب دحكت عليَّ كالت
ـ دوري وجهج
درت وجهي اباوع عليها بجام الكاونتر نزلت بجامتها قاست خمس اصابع وضربتها بفخذها رفعت بجامتها وهي تحجي
ـ صدك ما تأذي هنا
يلا أثـــو كملت دوري وجهج بعد
درت وجهي على آصف بعدهي ماحست بوجوده، دموعه تصب تحجي وياي وهي تنهض وتمشي بتجاه الباب تريد تطلع للحاوية
ـ ڪولي لزوجج يجيبلي أبر ترى هاي اخر وحدة
لكحتها ورجعت ضم روحه قبل لا تشوفه كعدت على الكرسي تلعب بالتلفون والنحول مبين عليها
بالليل طلعت لكيته بالمطبخ كاعد والابر كباله يدحك عليهن اشوف اكتافه تهتز
تقربت عليه وجهه مغسول بالدموع و محتقن مسح وجهه من شافني، اخذت الابر حطيتهن بباب الثلاجة كعدت مقابيله
دفع تلفونها عليه فاتحه على اليوتيوب وسجل البحث
آصف:- تبحث وأدور على اماكن ما تأذيها من تضرب الابرة
احجيلي شنو اسوي
اريد اخذ هالمرض منها الابرة تنغرز بكلبي مو بجلدها
هاي جمارتي اللي اخاف عليها من الهوا ياذيها والله اظل واكف هيج عاجز اسوي شي الموت اسهل عليَّ
زمزم:- ليييش ڪاعدة هنا
بسرعة مسح دموعه اجت اخذتني بدون ما اتصد عليَّ شافت تلفونها على الميز اخذته هم
دخلنا للغرفة عبالي سامعته كالت
ـ شعندج كاعدة كباله وتسولفون شنو نسيتي شنو سوالج
بقيت ساڪته بالي مو وياها ادحك على وجهها وگلبي يعتصر من الالم بعدج صغيرة على ڪل هاي الهموم
تمددت بفراشي وهي نامت على سريرها بعدني ماغفيت ودخل آصف تمدد بسدها
اثيلة:- راح تكعد وتسممون ليلتنا
اشرلي بجفه اسڪت، دخل ايده جوا راسها وايده الثانيه حاضنها بهدوء نهضت غطيتهم دا ارجع وشفتها فاتحه عيونها قليل ساڪتة وما مبينتله هي صاحيـة
الفجر طلع لغرفته قبل لا تصحى واليوم خلصوا مناڪر ما نعرف الهدوء الا من يطلع آصف
زمــــــــــزم
سديت الباب دخلت اركض للبيت ماما وراي تصيح لا توكعين
رفعتها كبال الاضاءة تجنن نزلتها كعدت بالكاع طلعتها من المي ضمت نفسها بالصدفة
قربتها لعيوني اباوع عليها واحجي وياها
ـ طلعي راسج خلي اشوفج
أثيلة:- الله يكمل عليج العقل
درت راسي عليها كتلها ها اثو شبيج بس لا غيرانـة ماعندج نفسها
اجت عليَّ دنكت تباوع عليها بتركيز كالت هي هاي ليش هيج لونها اصفر مو اخضر!
ـ هاي البينو
نـادرة ڪُلش وغالية
باوعت عليَّ ورفعت نفسها رجعتها للمي رجعت تسبح مصطفى دنك راسه يباوع عليها اجى يدخل ايده بالمي ضربتها
ـ والله اذا لڪيتك مطلعها اعلكك من اذاناتك بالسكف
دخلتها للغرفة عفتها بالصندوق ويا القديمات بين ما ارتبلها مكان
ڪوثر:- ترى والله لعبت نفسي من ريحتهن
زمزم:- عندج معطر ورشي بالغرفة ما اطلعهن منا اذا تردين انتي اطلعي
ڪملت تحاضيري عفت اثو تشطب بالبيت كوثر ومصطفى ناموا طلعت غسلت الطرمة وباب البيت لكيت عمي لؤي هم يغسل بباب البيت
زمزم:- والله عمو انت معدل اللي عندنا بس اكل ونوم وصياح
حجى وهو ينظف بزوايا الباب
لؤي:- اني لوما اخاف من عمتج جا هسه لاف راسي ونايم
زمزم:- اي صدكتك صدك تخاف
ضغط المي على وجهي ضحكت اعرف يشاقى وهو دائما يحب يغسل الطرمة بالليل، كملت الباب ودخلت لفيت الصوندة وشمرتها بالحديقة
دخلت جوا طفيت الاضوية دخلت للغرفة لكيت ماما ماكو بفراشها طلعت راسي باب غرفة اصف مسدود وهو كل ليلة يعوفه مفتوح رحت دكيته بقوة
ـ ماما
اثووووو
اثيلة
نفتح الباب اثنينهم خايفين عبالهم صار شي سحبتها من ايدها خزرتها واني اكولها
ـ شنو مغيررة مكانج الليلة
آصف:- اي هاي زمزم اللي تغار على ابوها
باوعت عليه كتله لا اخاف عليها منك
ضحك بصوت وهو يرفع ايده ورا راسه ساند راسه بين الايد والزند
اخذتها للغرفة وهو يضحك بعده تخوصرت كبالها ضربتني كف بالشقى وراحت نامت بفراشها
اثيـــــــــــــــــلة
غافية واحس احد يهز بكتفي عبالي مصطفى محتاج حمام
فتحت عيني واشوف اصف مكرفص كبالي حجى بهمس
ـ تعالي نامي بالغرفة شنو اخلص عمري هيج نايم وحدي
عجل شنو اتفقنا
رفعت الغطا اريد انهض وياه اتفقنا ننسى ڪل خلافاتنا لخاطر البنات ومصطفى
زمزم:- ارجعي نامي وانت ارجع لغرفتك مو زين عايفينك تكعد وتنام بالبيت
ضحك وهو يعض شفته هي على نومتها وتحجي صعد على سريرها تريد تنزل وقيدها بحضنه
ـ عجل انام هينا
سد حلكها بجف ايده وهو يكولها
ـ ولا كلمة خلي انام باجر وراي دوام
عضته بجف ايده ونزلت بسرعة يحرك بيده متألم اجت نامت بحضني وبقى هو نايم بمكانها
ثاني يوم الظهر كال ادخل انام وصاني مايريد صوت وهي سمعته انتظرته يغفى وشغلت الشاشة وعلتها على اعلى صوت مصطفى يكمز فرحان وكوثر تصيح اريد اقرا شلون
آصف:- مصطفى والله اجي اكسر راسك
اثيلة:- يول طفيها خلي ابوج ينام
زمزم:- شلون بله ما نتابع شي حضرت السلطان المبجل نايم
طلع عيونه تجدح من العصبية والنعاس عباله مصطفى شاف الريموت بيدها وكاعدة على القنفة عيونها على البلازمه ما مهتمه والصوت احسه طير راسي
آصف:- طفيها
ـ من تكمل الحلقة
اجى شال البلازمة ودخلها للغرفة اجت تدخل دفعها وقفل الباب عليه
اثيلة:- ولج عووفي ابوج ينام وتالي وياكم مانرتاح
كالت اي اثو صايرة دافعين الـه خير سلامات
ڪوثر:- لان الصبح انطاها فلوس
دحكت على كوثر كتلها اسكتي انت ام فلس
كوثر:- علواه وهيج يصير عندي فلوس ماڪو احلى منها
زمزم:- وسخ دنيا
كوثر:- هيج وسخ اني اريده قابلة بيه
اثيلة:- يول انتي على منو هيج طالعة
زمزم:- على ابوها
مرة خنك عمي لؤي على الف وربع
ضحكت واني اكلها لابس ويا لؤي هذا شقاهم
ظلت دحك عليَّ بطرف عينها ما قابلة بدفاعي العصر شافها مڪابلة السلحفاة هاي اول مرة يشوفها
ـ مشتريتلها جديدة شعجب ما ڪتيلي
كتله لا آدم جابها
فقد النطق وعيونه تجدح بالغيرة تقدم عليها شال الحوض يريد يطلع وهي وكفت كباله سحبته منه ادحك عليهم هسه هي هذا عقلها انت شبيك يحظي عبالك طفل هي تسحب وهو يسحب
ـ وووين ماخذها
ـ اذبها بالشارع
شكو جايبلج اخته بنته
ـ والله اذا شمرتها اطلع للشارع بهذا شكلي واظل اصرخ وافشلڪم
ـ اطلعي تا رجلج اكسرها
ـ اي كسرت رجل ڪوثر بقى كسر رجلي بنفسك وأدور حجج
حضنت الحوض والمي نصه بالكاع وهو يرجد بروحه ويصيح شعرررفه ادم بيج تحبيهن
صاحت مجاوبته جايبها للمكتب مو الي ولان محد يعتني بيها جابها الي
ـ هاااي السالفة مشوها على غبي غيري مو عليَّ
اشو خلي اشوفها
دنك يدحك عليها صاح هاي سعرها وحدها ب90 الف شنووو المناسبة ويشتريلج بهذا السعر
زمزززم زمزززززم
اني شنووو كتلج كتلج الا ثقتي بيج لا تكسرينها
صاحت يبوووي على راسي
بالخطف ضرب الحوض وكعه نكسر ظلت تنكز من العصبية شالت السلحفاة تڪلب بيها تأكدت مابيها شي
زمزم:- والله لو ميته جان
ـ جان شنوووو؟
ـ جان سويت مثل كوثر وشمرت روحي من فوك السطح
خزرها وطلع وهو يرجد الكاع برجله راحت للمطبخ اخذت كدر صغير ترسته مي ونزلتها بيها...
••------------- ♡♡♡♡ ---------------••
رفـعت ايدي نزلت ايده بنتر كتله
ـ بنتك ڪاعدة ببيتك مو براسي
ضحك بعصبيه عيونه تتلفت بلمڪتب رجع يدحك عليَّ
ـ آدم خليني زين وياك وطلع بنتي من راسك وهاي سوالف الهدايا هالمرة امشيها
ـ واني ما اريد منك لا زين ولا شين ابتعد عني وهدايا شنو؟
حجى بتهديد
ـ ابتعد عن بنتي تموت وما يجي يوم وانطيها الك
رفعت شعري واني اردد بالاستغفار
وگلبي يدك من العصبية ما اعرف كلامه القصد منه حقيقتي أبن شلون لو لا
بس اني هيج فسرتها
آدم:- لو يبقن بس بناتك بالڪون ما اخذ منهن واحط ايدي بايدك
حرك راسه بحركه مستمرة اي كال
ـ تمام عجل متفقين
ظليت ساڪت وهو يدحك عليَّ بعصبية محسسني اخذتها منه من طلع ضربت الكرسي بيدي ڪلبته بالڪاع
كعدت على القنفة واني افتح مقدمه القميص احس نفسي اختنكت
ندك الباب حجيت بعصبية غير مقصودة
ـ ادخل
دخلت بسمه سديت القميص واني اتعذر منها
نسمة:- بيك شي؟
ـ لا خويه
ظلت تباوع بوجهي وهي شايلة السجل
كالت تعال اقيس ضغطك
ـ ما بيه شي خوية
لا تتأخرين
ـ جَنـِه ضغطك صاعد
تعالك اقيسه الك
رحت وياها قاست الضغط وصدك ضغطي صاعد
نسمة:- شبيك عفتك مساع ڪل شي مابيك عين الله عليك
ـ من التعب والسهر
علكت المغذي كتلها
ـ روحي خوية اني اتڪفل بالباقي
ـ بعده خـالي ما اجاني
شصاير وياك هذا المسلول شيريد منك
ـ منوو!!
ـ نسيب خالي شفته من طلع
ما جاوبتها، دخل عمي سراج من شاف المغذي بيدي اجى يسأل
كتله ضغطي صاعد ماكو شي
باوع على بسمه ورجع عينه عليَّ وهو يحجي وياها
ـ لؤي مايـڪدر يجيج عنده شغل طلب مني اجي اخذج
ما جاوبته بس حركت راسها اي ماقبلوا يـرحون الاخلص المغـذي
ادحك على ايدي وافسر كلامه بسوء الظن ومخاوفي
بســـــــــــــمه
طلع يمشي كبالي اديه وراء ظهره يفر بالسويج عيوني عليه
التفت شافني اباوع عليه وخر عيونه وهو يسأل
ـ شنو مهند وعلي اليوم ما اجوا
ـ لا ما اجوا، آدم خابر على الولد من الشفت الصباحي يرجعون يلزمون مڪانهم
ـ ها خير ان شاء الله
فتح الباب ودار صعد صعدت سديت الباب حط ايده على الڪرسي دار وجهه اجت عينه بعيني بعدها يباوع ورا واني درت وجهي الجام رجع السيارة ليورة وفرها من رجع راسه يلا تنفست هسه وكت شغلك يا خالي
••----------- ♡♡♡♡ ----------••
دخل عمي سراج نظراته توسعت من شاف الفوضى بالمڪتب
سراج:- توقعت بعدك هنا بس بهاي الحالة لا
نهضت من الكاع وايدي ماذيتني الغضب عمى عيني، نساني كل شي هينا املاك غيري وامانة عندي تعذرت منه واني خجلان منه
سراج:- عيناي كل شي فدوة الك
تعال نطلع خلي نحجي ونشوف شنو سبب هاي العصبية
ـ تمام بس ارتب المكان
ـ بعدين نرجع نرتبه سوه
قفلت الغرفة دخلوا فريق الشفت المسائي جنت منتظرهم
سلمت عليهم ووصيتهم على بعض الامور وطلعت وراء عمي اخذني كعدنا كبال الشط
سراج:- احجي شنو سبب هالعصبية؟
آدم:- تعبت من نفسي، تعبت من الصوت اللي داخلي يفسر ڪل نظرة اليَّ أدانـه وڪل رفض احتقار
تعبت من هالوجه اللي يحمل ذنب غيري
سكتت ادحك كبالي ما اشوف شي غير الفراغ زفرة النفس بتعب
آدم:- من شفته ذاك اليوم مرة وحدة شفت وجهي بالمراية من ذاك اليوم ولهذا اليوم اتجنب اشوف وجهي عجل شحالها هي كل مرة تصد بوجهي؟
صرت اتجنب الڪعدة وياها، وافسر ڪل نظره منها
ها تذكرت، ها كرهتني، ها شافته بوجهي
شنو ذنبي حتى أدفع ثمن ذنب غيري؟ شنو ذنبي كل ما أحاول أتناسى واعيش طبيعي مثل غيري يطلعلي شي ويذڪرني ؟
شنو ذنبـي اعيش هيـج قـــدر؟
سراج:- الله ما سألك قبل لا يخلقك شلون تريد تنولد ولا سألني ولا سأل أي انسان
كلنا دخلنا هالدنيا بأقدار ما اخترناها
اللي انولد فقير واللي مريض واللي يتيم واللي مشوه وانت انولدت بهذا الامتحان
هذا القدر مايحدد قيمتك انت تحددها، لا تتعايش عيش الحياة بحقيقة وحدة انت ابن الرجال اللي رباك اللي تعب عليك ويعزك أكثر من روحه هذا هو ابوك الوحيد افتخر بيه وبتربيته الك
ابوية انت لا تخجل من قدر كتبه الله عليك لأن الحياة الحقيقية بأخلاقك وإيمانك مو بظروف ولادتك امشي ورأسك مرفوع وخل ثقتك بالله أكبر من نفسك ومن التخيلات اللي جاي يصورها الك عقلك
امك ما تشوفك غير آدم ابنها قطعة من روحها انت عوضها لا تبتعد عنها وتأذيها بيـك
لا تعاقب نفسك باحتمالات ولا تحمل ذنب الله ما حملك اياه
اسمعني زين النفس ما تحمل ذنب غيرها
هسه انت ابن من؟
بقيت ساڪت جاوب بمكاني
سراج:- ابن المرأة اللي صبرت
ابن الرجل اللي رباك
ابن الأخلاق اللي وفقك الله الها
ابتسمت ڪتله
آدم:- اني مو معترض على رب العالمين حاشاه اني معترض على ضعفي والله يا عمي اني راضي بقضاء الله ومؤمن باختياره
بس اني بشر تجيني لحظات يضعف بيها گلبي وتغلبني هواجسي وأنسى كل شي أعرفه وبعدين أرجع ألوم نفسي وأستعيذ بالله
سراج:- كلنا ابوية مو بس انت معرض للضعف
ربت على كتفي وكال
سراج:- وهس احجيلي السبب اللي صعد ضغطك وخلاك تنفجر وطلع كل هذا
آدم:- احب وحدة من بنات عمامي
أبتسم اي:- وشكو بيها تستاهل تحب وتنحب
ـ ابوها شك
سكتت وهو يدحك عليَّ منتظرني اكمل
ـ عادي ابوها ومن حقه يريد لبنته النصيب الزين
بس من افڪر اني انرفض عبن اني أبن
زفرت النفس بتعب كتله
ـ جاي احاول انسى هالمشاعر لان مالي نصيب بيها
سراج:- الي تحبها وحدة من بنات اصف مو؟
بقيت ساكت وهو جاوب وحده
ـ بنت باسل مالك نصيب وياها بعد خطبة مهند وبنت يونس مثل أختك مابقن بس بنات اصف ماعدكم بعد غيرهم
واتوقع زمزم واضح من خوفك عليها بيوم وكعت اختها
هزيت راسي اي
سراج:- لا تستبق النوايا يمكن هو يشوف بنته بعدها صغيرة او عنده أسباب ثانية ما إلها علاقة بيك لا تبني أحكام على الظنون ترى آصف محد يعرفه كد ما نعرفه اني ولؤي يحبك واللي ابالك مو اباله
واذا انت تحبها صدك لا تخلي مشاعرك لعبة ساعة انساها وساعة لا
وبالك ترتبط بوحدة ثانيـة حتى تنساها ترى ظلم لنفسك وللبنية الثانية
تحبها اصبر للوقت المناسب اذا هي نصيبك الله راح يهيئ الاسباب
ابتسمت واني اكول
آدم:- واذا مو نصيبي الله مختار لي الأنسب منها ما اوڪف حياتي واعـوف نص ديني
صفن بوجهي رجع وجهه يباوع على الشط وهو ياخذ النفس بقوة ويزفره بهدوء
كال كبالك حياة طويلة خليها ابالك الناس الها الكلام والله اله العدل ما يحاسبك على شي مو بارادتـك
يحاسبك على أعمالك وأخلاقك
سڪت احسه يريد يضيع شي من تفڪيره
سراج:- اذا تحبها شلون تكدر تنساها!
مسح عيونه التفت عليه ابتسم
سراج:- يلا نروح
آدم:- بعدك تحب؟
اختفت ابتسامته ما جاوبني ، نهض قبلي يريد يمشي للسيارة نهضت نفضت التراب
ـ عمي سراج
التفت عليَّ
ـ عيناي
تقربت حضنته تفاجئ، ربت على ظهري كتله
آدم:- وجودك بحياتي نعمة لو أسجد لله طول العمر شكر عليه ما وفيت حقها
اني مو بس ابن امي وابوي واخلاقي
انـي ابنك
انت ابوي الروحي
••------------ ♡♡♡♡ -------------••
نفــــــــــــــس
أرغد دخل لغرفة آدم باوعت عليهم نايم بتعب والكاع مفروشة بسجلات المجمع وملازم الجامعة والمراجع
غطاه ابوه وهو يمسد على راسـه شاف المسودة سحب الحاسبة وكعد يصفي بالحسابات ويسجل بالمسودة
عفته وطلعت افتريت على البيت بتعزيلة سريعة ورجعت عليه بعده بغرفة ادم الحاسبه على رجله والسجل كباله والمسودة على رجله الثانية
نفس:- ها حبيبي تجي تنام؟
ـ من اكمل
نامي انتي حبيبتي
رحت نمت للفجر كعدت اصلي لڪيته بعده ڪاعد ديصلي وآدم هماتين ڪاعد
استمر أرغد كل ليلة يصفي بالحسابات سهل عليه حتى يتفرغ لجامعته اباوع عليه ضعفان من التعب مخلصها بين الجامعة والمجمع وبالليل ماينام الا قليل، فلوسه يجمع بيها عند أبوه
أرغد طلعنا بسالفة بناء طابق ثاني خاص بآدم وهم فرد مرة يرمم البيت مكمل اموره ساحب قرض ومتفق ويا مقاول وحتى مواد البناء بلشوا ينزلوها
حجينا وياه اني وآدم يأجلها للعطلة هسه ويا الدوام نتبهذل ما قبل، احسه خايف يجي يوم وآدم يطلع من البيت يريد يضمنه طول العمر كبال عينـه
اضطرينا ننتقل لبيت اخوانه اني وارغد استقرينا فوك بغرفة وآدم جوا بغرفة احمد بس يخلصها بالاستقبال من يجي تقيد حبيبي واني تسهل عليَّ من ناحيـة اعوف قمر عند سمر واروح للدوام قبل اضطر أخذها وياي
••----------- ♡♡♡♡ -----------••
تمــــــــاضر
ثائر:- طابخ شنو؟
رفض شنو
دفع مهند وهو يحجي وياه بعصبية
ـ اني أبوك لو أخوك الصغير وواكف كبالي تحجي بهذه النبرة
رجع على ابوه يحجي بعصبية بس بدون صوت عالي
ـ جهزت رفضها يلا رحت خطبتها اليَّ
تشكك بنسبها وانت تمشي بالحيلة والمكر ويا أبنك؟
هي هاي الصفات الوراثيـة الخايف عليها؟
صفن ثائر مسح جبينه
ـ يعني رفضت بسبب ڪلامي وياها
منو ڪالك
ـ ليش بعد اڪو بعد أسباب
احجيهن خلي اعرفهن مقدماً خلي اسمعهن منك
ـ صح حجيت وياها بس بعد كلام عمتك أم آدم عنها وعن اهلها فعلاً رحت بنية صادقـة حتى اخطبها الك
مهند:- لو هي لو ابقى بلا زواج مثل خالي سراج مثل ماعقدتها انت تحلها
نتر ايده من اخوه وطلع جان هذا اول كلام بينهم من يوم فسخ الخطوبة مايتحاجون
كعد وهو يمسح جبينه أشر لـ علي
ـ الحڪه لا تعوفه وحده
كم يوم مر والبيت متوتر بسببهم ماصدڪنا لكينا هدنـة رجعنا لنفس الاجواء المشحونـة خاصة مهند يوميـه يسمع ابوه حجي ما سڪت الا علي بلغه بكلام ابوه كاله يكول يصبر عليَّ ڪم يوم وارجع اطلبها من أبوها
رجعت للبيت تعبـانه احجي على أمي وعمتي عايفات البنات يهرجن بالبيت ما يصيحن عليهن
علي واڪف ڪدام المراية اللي بالصالة يهز علبة البروتين ويشرب منها كتله
ـ هذا اذا يسوي طاقة انطيني منه احس روحي هلكت من وراء اخواتك على يوم الكاهن كل وحده شايلة بيت على راسها وتفتر بيه
ضحك وهو يجاوبني شبيج يوم وياهن بعدهن اطفال خليهن هذا اللعب زين الهن ترى
ـ اي زين
حقك تحجي هيج
ما تنظف وراهن بيتين انت
هز العلبة كال وهو يرفع شعره بيده الثانيه بترتيب
ـ خالي لو يفتح عيونه جان شاف العيون الهايمة بيه ويخلصج من هالتعب والفرة بين البيتين
مشى للمطبخ مشيت وراء
ـ شنووو شنو ياعيون تعال سولفلي
حاول يتهرب مني ماعفته غصغصته لحد ما حجى منو هاي الهايمة
علي:- بنت اخت عمي لؤي بسمه
حجيت بفرحـــه
ـ شعرفك
الله عليك صدك هالحجي
بسووومه تحب سراج!!
ـ انـي ومهند منتبهين عليها، والله يـمه البنية حبابة وحلوة ومن الاخلاق كاملة والكمال لله، رزنـة ومحترمة ما تجاوزت حدودها واعجابها بيه صح واضح بنظراتها بس لا فرضت نفسها ولا حاولت تلفت انتباهه
تماضر:- وخـالك يعرررف؟
علي:- ما اعتقد بس مهند يكول خالي يعرف بس مغلس ومسوي نفسـه ما حاس بيها ودائما يتعمد يخاطبها بخوية
ما صدكت خبر صريته وركض رحت لامي وعمتي عبالك سراج وافق على فرحتهن وسوالفهن
تماضر:- العله بأخوي شلون يقتنع
والله البنية ماتتفوت وكلنا نعرفها
ورجعت اتحدت فرنسا وبريطانيا عمتي كالت نروح نخطبها وامي صفت وياها
كتلهن على كيفجن لا تاخذجن الفرحة زايد خلي نعزمها باجر هي وارانب لؤي على العشاء وكم يوم ونعزمها تروح ويانا للكاظم ونخلي سراج هو اللي ياخذنا
ثـاني يوم عزمنا بيت لؤي على العشا كلنا مجتمعين بالصالة اني والحجيات عيونا على بسمه والله ناقص انطلع قلوب بنظراتنا وكلما تحجي شي وكالتله عمتي فدوة لهذا الحلك معدلة وامي مدنكه مادة راسها تباوع عليها وهي ساندة عكوس اديها على رجليها
درة مبتسمة بفهاوة وبسمه تباوع علينا بشك جنها نظرات لؤي ما تفوتها فايته
كرصت عمتي حتى تسكت صاحت
ـ دهر فرج شجاج اصابع لو جلابتين
كتلها بفشلة ما ادري بيج
رجعت اباوع على بسمه مرتبڪة من وجود سراج اللي كاعد هو ولؤي لهناك منه يسولفون بيناتهم وما تخلوا الڪعدة من سوالف لؤي الكاعد على القنفة براحته رجل جواه ورجل طابكها بالطول يفر بالسبحة ورتجي على جانب سراج الكاعد نفس كعدته ومرتجي عليه
باوع علينا كال
لؤي:- شني وراكم عشه لو لا اريد اروح انام
تماضر:- كامل بس منتظرين جيت ثائر والولد
باوع على سراج كاله نسيبك يسوي جالي شلون متحمله
سراج اجى يحجي من شاف درة سكت وغير كلامه
سراج:- ابو مهند والنعم منه معدل
تقرب حجى بذان لؤي الي ضحك بصوت عالي وهو يفرك السبحه
لؤي:- جا شسوي بلووة وعلي
سراج:- لعد سد حلكك واسكت
باوع علينا صارت عيونه على بسمه فتحنا حلوكنا بالابتسامه ونباوع تلاثتنا وحدة على الثانية مسوين اقتران
سراج:- شلونج بسمة خوية
مرتاحة بداومج
اني وصية مهند والولد مايقصرون وياج
عمتي فرت حلكها ماعاجبها كلمة خوية
جاوبته تسلم ولؤي كاله شنو تذكرت هسه تسأل صارلها فوك الشهر تشتغل بالمجمع
سراج:- لا ماتذڪرت ويومية اسأل ووصي عليها اختي هاي
واليوم شفتها وحبيت اسألها خاف مقصرين وياها
شفتها ضاجت منه باوعت عليه نظرة سريعة وهو نظراته على علاوي ابن لؤي ابتسم صافن عليه طول بصفنته
سراج:- هذا ابنك شايل عيون خـاله
لؤي:- بس بالعيون كعدت وياي
ضحك سراج وهو يحجي بهمس ويا لؤي اللي فضحنا بصوت ضحكته ويحجي بصوت عكس سراج
لؤي:- ما ارتاح يعني اخر شي اعلك حبل بالمروحة واشنق روحي
مشى علاوي عليهم يجر بروحه كعدوه بينهم عليه لسان وكح ومحبوب كلش وهما متونسين على سوالفه
اجى ثائر والولد انتقلوا للاستقبال حسيتها تنفست براحة بس مؤقته لزمنها امي وعمتي اسأله ماخلنا شي حتى النايم بالكبور من الف سنه سولفن بيه
بعد يومين خابرتها تروح ويانا للكاظم عليه السلام رفضت كالت ماتكدر عندها دوام طول اليوم كتلها بالليل تعذرت كالت ارجع تعبانـة
امي وعمتي ما أستسلمن كل يومين او اربع ايام وراحن عليهم ويجرن بيه وياهن بالليل ياخذنا مرات مهند ومرات علي، لؤي شك بينا كال لان جياتنا كثرت عليهم
لؤي:- الخوينسة والعجايز شنو الي براسجن ترى من العشا شاك بيجن ومغلس
عمتي ربتت على الكاع بينها وبين امي اجى كعد بناتهن وهو يمرر اديه على اكتافهن حاضنهن براسه يضرب روسهن
لؤي:- انتن ليش هيج عزيزات عندي
انعالجن احس بيجن طاكجن توحد لازم تبجن
ضحكن عمتي باسته بخده وامي تمسد على صدره
دنك اذانه بيناتهن يحجن وياه ما نسمعهن واحنا نسولف بيناتنا اذاني ويا درة وبسمه وعيوني عليهم اباوع عليه عقد حواجبه سحب اديه من اكتافهن لملم دشداشته بحضنه
باوع على بسمه ورجع عيونه بيناتهن
لؤي:- بس الله يعرف شكدها معزتـه عندي واتمنى هاليوم حتى اكثر منجن
سكت وهو يطلع جكارة ورثها وكمل
ـ اخوي واعرفه راح تنظلم وياه وهي خلصت عمرها مظلومه من اهلها هالسالفة هنا وسدنها ولا تحاولن بعد
عمتي كالتله ها اشوفك هونت جا مو جنت ادك بصدرك النا وتكول بس خلي يأشر
لؤي:- وهو كال اريدها حتى امشي بيها وطاوعجن؟
ظلن ساكتات وزعلانات منه يباوع بيناتهن ويرجع يباوع على بسمه وهو ينفخ بالهوا بتفڪير
باوع على أمي اللي دمعت عيونها تمسح بيهن قبل لا يوكعن مرر ايده حضنها لصدره وهو يبوس راسها
لؤي:- لو عليَّ ما اڪول لا وعلي بيدي ازفـه بس المشكله يم سراج الزلمة رافض شطالع بيدي انه
رجعن ضايجات والزعل مبين على تجاعيد وجوهن، مهند انتبه عليهن كاللهن وهو يسوق
مهند:- امهات البرڪة الحنينات منو مزعلهن
ما صدڪن واحد يسألهن نزلن بالحجي على لؤي المسكين عبالك الموافقة واڪفة عليه مو على سراج والله اللي يسمعهن يفڪر سراج رايد بسمه من سنين ولؤي معطل قسمتهم خو عمتي طلعت لؤي ناكر الزاد والملح والله طلعته حتى ملحد
اندس بمهند يسكت عنهن لا شلون ماصدك كام يجيب نفط ويصب على النار وفاتح التسجل بتلفونه يوثق الحجي
بعد ما قطعن الامل من لؤي بلشت محاولاتهن بأقناع سراج اللي رافض بشكل نهائي حتى وصلت بيه ينهزم طول اليوم من البيت من ملحتهن من ينامن يلا يرجـع للبيت ويطلع الصبح بالبوڪة
رقم ام عدنان حصلنا من درة ووصيناها ما تحجي جنت رافضه هالخطوة بس شلون بامي وعمتي
اتصلت على ام عدنان نطيته لاعمتي حجت وياها وكالتلها الاصول نجيكم البيت بس لان درب بعيد واحنا تعرفينا كبار والعمر كاضي مانتحمل الدرب كلنا نسأل ومن تردينه الخبر نجي نطلبها بالاصول
كالتلها اشوف ابوها واخوانها وصار جا انه افرح كون بسومه تصير لسراج والنعم منه دوم الولد يمدحون بيه
والله ما مار ذاك الوقت وطب علينا سراج مفرفح وشايطه روحه
ـ انتن شلون تصرررفن من راسجن
تالي عمري وهذا الشيب تردن تجبرني
اني شنووو حجيت كتلجن ما اريد لعنة الله عليَّ انتن لو شنو عوووفوني اني مرتاح هيج هي حياتي لو حياتجن، الله ياخذ هالعمر مني واخلص منجن
هاي اول مرة يسويها يعلي صوته عليهن ويحجي بعصبية ما منتبه شنو ديكول من شافهن يبجن سكت وكوة يأخذ النفس التفت وهو يستغفر ويمسح بوجهه
رجع التفت عليهن مهضومات منه حيل وعمتي حتى نعاوي كامت تنعي
دنك يبوس بروسهن ويتعذر حتى غلط غلط على نفسه
رادن يرحن لبيتي لزملهن الباب يحلف بس يطلعن يشب النار بالبيت رجعن كعدن بالصالة والعيون بعدهي تصب حتار شلون يراضيهن
سراج:- بنت الناس تنظلم وياي شنو ذنبها لو هاي بتجن ترضلها هيج زواج؟ ما اريـد اكسر بخاطرجن وفرحتجن بس والله العظيم خايف اتحمل ذنب البنت هي مو مشروع حتى أجرب حظي بيه اذا نجح الحمد لله، واذا فشل اكول نصيب هاي انسانة الها كرامة وحق تعيش ويا شخص يحبها مو ميت بحب غيرها وعايش على سراب ومسجون بالذكريات
ما حجن وياه صادات بوجوهن عنه حاول هواي حتى يرضن قفلن اثنينهن لثاني يوم ووكعت امي ولا عبالك متعودة على رفضه هالمرة ڪلش نقهرت ماصدكنا رجعت تمشي سنين يفتر بيها ما عاف دكتور بين ليلة ويوم رجعت فقدت أمي القدرة على المشي
كل الفحوصات الرنين وحتى تحاليل الاعصاب وتخطيط الدماغ سليمة
بالتشخيص السرير الدكتور كال عدها الاضطراب العصبي الوظيفي
سراج من القهر كبر عمر فوك عمره ومحمل نفسه الذنب اشكد نحاول نخفف عليه ما يفيد وهن مايخفن عليه بعدهن على زعلهن وياه أبداً ما يحجن وياه يموتنه من القهر
ويوم بعد يوم يذبلن لؤي يجي عليهن يوميه بس ما تدخل بهذا الموضوع
عمتي كاعدة بالكاع تفر بخرز سبحتها بدون نطق الذكر بكلبها تنطقه
وامي ايدها ترجف وهي تاخذ الحباية من ايدي رفعتلها المي شربت منه طلعت الحباية الثانية هم خليتها بيدها
اسمع صوت خطواته وهو ينزل الدرج بهدوء طول يلا دخل علينا باوعت عليه يباوع بين امي وعمتي وهن متجاهلاته ولا التفتن عليه
اباوع عليه عيونه مرة توزع نظراتها بينهن ومرة يدنك يباوع على الكاع نزلت عيني على جفوف ايده قابضهن بقوة لدرجة ابيضت
باوع على امي فتح حلكه راد يحجي ماڪدر تنهد تنهيدة طويلة
ڪعد على القنفة يهز رجله بتوتر ما اعرف عصبية باوع عليَّ ورجع عيونه بين امي وعمتي اللي بعدهن متجاهلات وجوده
مسح وجهه بجف ايده وهو اخذ النفس برجفه مبين مختنك
بلع ريڪه حسيت اخوي دا يموت نقهرت عليه اريد احجي ويكلهن ڪافي خفن عليه وعوفنه
حجى بصوت متقطع
ـ يــــمه، بسمه او غيـرها الي تشوفنها مناسبة وتـرضيجن
سڪت يـاخد النفس بصعوبة ويبلع بريڪه تقطع گلبي عليه ودموعي صارت تنزل بدون سيطرة على منظره تمنيته يعاند مثل ڪل مرة ويكول لا، ولا اشـوفه بهذا الحال
امي وعمتي باوعن عليـه لزم رگب رجليه ضاغطهن بقوة وحجى بصوت مبحوح من غصته اللي ما يعلم بيها بس الله عيونه بالكاع
سراج:- اني موافــق عليها