رواية سجين الحب الفصل الثالث عشر13بقلم زهراء الحريري
ســـــــــــراج
لا أگـدر أضـمـنـهـن ولا أگـدر أفضفضهن
لا مـــيَـت ولا خــلــصـان مِــن عـــدهـــن
أنـا جروحي سوالف بيت ما أگـدر أطـلعهن
••----------- ♡♡♡♡ -------------••
ساڪتات نباوع عليه دار وجهه عنا ساند حنكه بڪتفه صدره يصعد ويهبط بتعب
رجعت عيوني على أمي وعمتي بعدهن مصدومات ما مصدڪات عمتي استبشر وجهها بالابتسامة رفعت ايدها هلهلت وامي دموعها تصب وهي مبتسمة
نهض من مكانـه تقدم عليهن دنك باسهن بروسهن وطلع بدون ما يرد على تبريڪاتهن
عمتي ڪالت اتصلي على لؤي خلي يجينا اتصلت عليه كتله الحبايب طالباتك بشڪل فوري وعاجل
ـ يدللن عجايز سراج هسه اجيهن وهم لو نايم بگبري هم افتحه واجي
كليلهن شلون نعاوي مجهزلهن الا تشك الگلب شك
كتله هلا بيك وبنعاويك لا هلا
ما تأخر ربع ساعة اقل وسمعنا صوته من الكراج ديقترب
لؤي:- بعد هيهات ادكنك يهالباب
رحل عني العزيز وصاير بعيد
شمالك يازمـن فركت الحباب
تذب غزلك على الطيبين وتصيد
تضحك بالـجذب ضليت يانـاب
دخل علينا رفع ايده بالسلام وهو بعده ينعى
لؤي:- وانه اظل حزنان دوم الهذا لغياب
كعد كبالهن كال
ـ خير امهات التوحد عجايز النار موديات عليه خيرجن بويـة شرايدات
كولنا زلمة مشغول يعدل على الانتاج المصخم
عمتي كالت له:- خايب تعال تدنـه هنا خلي احجيلك راح تفرح ويانه
زحف على رڪبه كعد كبالها كالها
ـ وعيونج دورتلج شايب على كدج مالڪيت كلها موته بالفتحة الاولى
ضربته جمع على ڪتفه كالتله
ـ جوز من سوالفك الغـمة
ـ جا شعدج موديـه عليَّ غير تردين ادورلج شويب يرجعج شباب
طك اصبعه وهو يڪمل
ـ وتحطين حنه وتعلسين بهالديرم وتردين ليورة
اكلج عـدي ابو المرة صح صاير عده بداية خرف بس يشتغل زين ترديـنه؟
لزمته من قميصه جرته عليها خانك ضحكته كالتله
ـ بطل من سوالفك اريد اكلك صويحبك كال اخطبولي بسمه
نزل ايدها من قميصه باوع على امي وعـليَّ
لؤي:- هو هيج كال!
لو من راسجن هيددددن خلن الزلمة مستقر لا تجلطنه ذاك اليوم فرفحتنه واليوم تردن تحطني بملعوبجن
كتله اني:- لا والله صـدك هو ڪال اخطبوها
باوع عليَّ ساڪت حك شعـره
كالتله عمتي
ـ ها شو سكتت شمالك
ـ جا شڪول بعد الي براسجن وسويتنه
ـ اتصل على اختك وولدها وحددوا المشية والملجه
نفخ وجهه ساڪت ندسته عمتي
ـ ها شمالك
لؤي:- عمـه جوزن من الزلمة انتن ماترتاحن الا تموتنه انه اريد يعرس اڪثر منجن وعلي بس مو هيج
كالتله امي:- اسم الله عليه ليش ولك يمه اريد اشوفه مستقر واشوف جهاله كبل لا اموت بلكي الحك حتى لو بس على واحد من خلفته
التفت عليها كالها وهو يحط جكارته بحلكه ويرجع الجداحه والباڪيت لجيبه
لؤي:- والله انتي بالذات ما تموتين الا تكرضينا ڪلنا يلا عود تسلمين امانتج بعد ما تعبرين عمر النبي نوح
شجلبتن ببسمه ما تڪللي ماكو غيرها لطشتن احلف عليج مابيج شي مثل الحصان تركضين قشمرتنا على سراج بس ما تقشمرني
كالتله عمتي لا تظل تربد بالحجي فوك روسنا اتصل على عدنان واتفق وياه كبل لا سراج يهون وكله هم ابطوا عليك لان ام سراج مريضة ما صارلهم وڪت وهسه يردون يجون
هز راسه وهو يڪول صار بعد شوي اتصل عليه واتفق وياه يحدد يوم حتى ترحون اطلبونها مثل الخلك
رفع راسه واصـابعه يتحسب مثل النسوان ويدعي
ـ ربي اخذ عمري ولا تبليني بهيج عجايز
كالن شبيك ما فرحان ولا جنا صويحبك هذا
لؤي:- افااا اني ما فرحان
طبك اديه يطك اصبع جكارته عاضها ويغني ويتمايل بجسمه ويجر بالونه
لؤي:- للكرنه ماخذ هالكلب والروح هل محتارة
يشكن هضمهن والجفى هناك للڪسارة
يالتوفي بهواي كل عمرك وياي وڪل عمرك وياي
عمتي بسبحتها سلكته على ڪتفه وجرت عكازت امي وهي تصيح
ـ اشوه انطيني هاي خليني افضخ (افشخ) راسه هالسربوت
بسرعة طفر طلع وهو يحجي بصوت فضحنا
لؤي:- مو عجايز انتن وهاي الخوينسة ڪل البلاء بيجن
واحلف عليجن حتى امريڪا تكدرن توصلنها وتسقطنها بس ينطوجن شوية مجال
••----------- ♡♡♡♡ ------------••
لــــــــــــــؤي
طلعت منهن واني انفخ الله يعينك يا سراج بس على ملحتهن، بوية ينفخن الگلب ويكطعن الحنيور
طلعت تلفوني واني اشغل السيارة اتصلت عليه كتله وين كال بالمڪتب تعال اذا فارغ عندي حجي وياك
ـ تمام جايك مسافة الطريق
•
•
•
سلمت على الموجودين ومشيت لغرفته فتحت الباب كاعد على الكرسي يقرأ بملف دخلت سديت الباب مشيت كعدت كباله
لؤي:- جنت يم حبايبك اللي سمعته صدك لو هم من راسهن مثل ذاك اليوم
سراج:- لا صـــــــدك
ظليت ساڪت اباوع عليه ما حط عينه بعيني
لؤي:- يعني مقتنع هذا هو؟
سراج:- اي بس بالبداية احجيلها عني وخليها تقرر وترجع الموافقه يلا امشي على اهلها وخوانها
لؤي:- اشو باوع عليَّ شبيك شارد بوجهك
رفع عينه عليَّ مبتسم
سراج:- شنو ما فرحان لاخوك
لؤي:- شلون ما افرحلك واني منتظر هاليوم بس بقناعتك مو لخاطر احـد
سراج :- لا بقناعتي
اني اريــــــــدها
لؤي:- بسمه نظلمت هواي لا تظلمها وياك
انه وياك النا عمر كامل ڪطعنا سوة بالمرة قبل الحلوة واعرفك ما راح تنسى لا تظلم بخت البت ڪون قرارك بسبب امك وعمتك ارجع عنه واذا صدك بقناعتك واشك بيه بقناعتك
سڪتني من ڪال
سراج:- ما اظلمها وراح اخليها على راسي واتعامل وياه باللي يرضي الله ماراح تشڪي من تقصير بإذن الله
لؤي:- اذا صدك هيج مقتنع بيها الخيـر ان شاء الله بسمه معدلـه راح تنسعد وياها
ظل ساكت رجع الملف للمجر سد الحاسبة طول يلا رد بـ ان شاء الله ما اقصر عليها
دنك راسه سانده بجف ايده باوع عليَّ ابتسم كال دارت الدنيا وراح اصير نسيبك خايف تصير خلافات وأخسرك
لؤي:- تظـل أخوي التدور روحه بروحـي لو شما يصير ما تلكاني واكف بوجهك، أخسر الدنيا ڪلها الا انت
سراج:- وانت هنا ساڪن بين الگلب والضلع
••------------ ♡♡♡♡ --------------••
بـــــــــسمة
رديت من الجامعة بوست ترتيل ودخلت للبيت، غيرت على السريع وطلعت غسلت ايدي ودخلت للمطبخ اساعد مرت خالي شفتها فرحانـة وهي تباوع عليَّ وبحلكها حجي ولازمه روحها
بسمه:- أرنبة خالي فرحيني وياج
درة:- لا خالج يحجيلج
بسمه:- اها!
تگربت عليها قربت وجهي اباوع بعيونها
درة:- هههه شبيج؟
بسمه:- صدك عيونج تك وتك
غطت عينها اليسرى وهي تضحك كالت لا بس هاي شويه افتح
بسمه:- اي حجيلي سبب فرحتج شيصبرني
درة:- خبر حلو راح تسمعينه من خالج وصاني ما احجي الا هو يحجي وياج
بسمه:- خير ان شاء الله
ولو اخبار خالي تخوف
لؤي:- شبيها اخباري شني ما عاجبتج بسوم
بسمه:- اخبارك تمغص البطن خالي لا تزعل احجيلك الصدك تعرفني صريحة حتى على نفسي
ضحك وهو يسحب الكرسي كعد رتبنا الغدا على الميز والله تكسرت من الكراسي اني احب الڪعدة بالكاع
كعدت واني اكرص خد علوش كملنا غدا وشربنا جاي وخالي بعده مــا حجى شنو الخبر اجيت ادخل انام ساعة واروح للمجمع
لؤي:- خالي بسومـــة
تعالي هنا يمي
رحت كعدت يمَ نكت الجكارة بالمطفاية
لؤي:- قبل فترة اكو ناس خطبوج من اخوج وامج وصار عدهم ظرف طارئ وتأجل الموضوع اني بلغت امج واخوج ما يحجولج
واليـوم فاتحوني بموضوعج يردون يمشون على أهلج
هزيت راسي أي طك رگبته كال
لؤي:- الولد اني اعرفه عز الـمعرفة لو تلفين العـراق كله ما تلڪين نفسه معدل واخو أخيته وما عليه لا زايدة ولا ناقصـة
بس اڪو شي واحد لازم تعرفينه يلا تقررين
بسمه:- شنو العنده؟ ومنو هذا الولد اعرفه؟
لؤي:- بعدين تعرفين منو
هسه خلي احجيلج عنـــه
سولفلي عنه يحب وحدة من سنين طويلة وصارت ظروف فرقت بينهم هي تزوجت وعاشت حياتها وخلفت
وهو واڪف بـ الماضي لا تقدم بالحاضر ولا تطلع للمستقبل
سڪت طفى الجكارة وطلع غيرها كال
ـ بعده لليوم من يمر طاريها يرجف عليها ولو تطلب منه روحه ينطيها الها
هسه تردين تعرفين منو هذا اللي طلبج؟
حجيت بداخلي حتى لو ما حـاجي سالفته هم ما راح اوافق عليه واني گلبي من سنين يدك بحب شخص ثاني
بسمه:- ما يحتاج اعرف منو اني رافضه ما اڪدر على هيج زواج شلي بالتعب والضيم خليني هيج مرتاحة
اريد انهض كال
ـ سراج اللي طلبج
جمدت حتى ما رجعت عدلت ڪعدتي دكات گلبي اختلت سراج سراج لو غير سراج!!
لؤي:- اني ادري بيج خالي منتبه مو عبالج اعمى ترى ما تفوت عليَّ فايتـه
بس احجيلج واكلج هذا صاحبي وهذا گلبه مملوك لغيرج
بلعت ريڪي واني احط اديه بحضني المفروض افرح لو شنو!
لؤي:- القرار الج فڪري زين ومن تقررين تعاي احجيلي لو احجي لدرة وهي تبلغني اذا موافقة اتصل بأخوج واذا رافضة ابلغ سراج واهله مالهم نصيب وياج
دخل لغرفته واني رجعت ظهري على القنفة غمضت عيوني حيلي شبيه تهدم هيج حسيت گلبي نعصر من الوجع
درة:- الرجال محترم راح يعزج ويقدرج وگلبه الا يجي يوم وينبضلج والله خوش قسمة فكري بيها
باوعت عليها كتلها
ـ ما اريد افكر ڪولي لـ خالي انه رافضه اعيش على سرابه ولا اتحمل اصير وياه وهو فڪره وگلبه لغيري
درة:- عجل ليش تبجين بسوومه!
انتي تحبينه ترى ڪلنا منتبهين عليج انطي لنفسج واله فرصة ما راح تتندمين
بسمه:- ما سمعتي خالي شيكول
درة:- وياج ينسى
مو خالج هم جان يحب المرحومة وهسه وياي ما اكلج نسى لا يذكرها دوم بس ما مقصر وياي لا بحبه ولا باهتمامه عايشة وياه احلى عيشه وانتي دتشوفين شلونها حياتنا
بسمه:- اكو فرق تبارك راحت لرحمة ربها بس سراج اللي يحبها موجودة ما سمعتي خالي شيكول يكلج لو تطلب روحه ينطيها الها
درة:- مزوجة وعايشة حياتها بعيد عنه
بسمة:- شنو تعرفينها!
هزت راسها اي وكالت
درة:- لؤي مسولفلي ڪل شيء عنهم
ومن جانبها طمئني والله المرة تحب زوجها حيل وما دحك على غيره
ومن صار بينهم انفصال ما فكرت ترتبط بسراج رغم دز امه وعمته يخطبوها اله وهو حاول جثير وياها بقت رافضته
سراج مصيره ينساها من يتزوج
كل هالسنين ما نساها لان محد دخلت حياته ولا جرب يفتح گلبه لغيرها
وياج راح ينسى كل شي قديم
وانتي تفتحين هالگلب
بسمه:- جان نسيته اني كل هالسنين
درة:- لان انتي نفسه ما انطيتي فرصة لاحد غيره يدخل حياتج بقيتي على حبـه وهو بقى على حبـها
سولفتلي على أخوها المسلول شلون جان يحب وحده وبعد الزواج تغير وحب زوجته حتى من نفصلوا ما فڪر يزوج غيرها
كالت فكري زين لباجر لا تتسرعين بقيت ساڪته شفڪر من اڪول اخبار خالي تمغص البطن لا والله تشك الگلب
دخلت للغرفة حتى النومه طـارت من عيني كمت جهزت نفسي اروح للمجمع وصلني خالي شفته بالباب واڪف يحجي وي علي التفت علينا هاي اول مرة يبقى يباوع عليَّ وما يبعد عينه، نزلت عيني مريت من يمهم سلمت واني مستمرة امشي
دخلت جوا امه موجوده جايبها لجلسة العلاج سلمت عليها مبينة الفرحـة على وجهها طلبت مني ابقى وياها بقيت الى ان خلصت الجلسة
مشيت للغرفة علكت جنطتي وكعدت ايدي على راسي يأذيني من التفڪير والتعب ما اعرف شلون خلص اليوم غاطة بالتفكير لحظة اوافق بسبب حبي اله ولحظة ارفض بسبب حبه القديم
اني غبية لو شنو يعني لهذا العمر وبعـده بدون زواج شنو جنت متخيلة واضح يحب من رفضني، لا جنت متاڪدة يحب واجذب على نفسي ردت ابقى غشيمة حتى ما انسى حبـه
دخل رجال بيده طفل جارح ايده اخذته منه نظفته وبلشت الخياط اني راسي منا ثاير ومنا الطفل يصرخ احس ضغطي علك ما صدكت كملته وراح مدري شلون بعدني مرڪزة بين الافكار وبين اللي يجوني
دخل آدم ولا ادري خلص دوامي اخذ السجل مني كتله
بسمه:- ما سجلت شي نسيت
آدم:- مو مشڪلة هسه اسجلهم
كعد يسجل واني كاعدة بمكاني صافنة على القلم
آدم:- وهاي ڪل شي تمام
رفع راسه باوع عليَّ كال
ـ بيج شي خوية وجهج شاحب
ـ شوية تعب من الدوام
خالي اجى؟
ـ سلامتج من التعب
عمي وصاني اني ارجعج وياي
بس يجي الشفت المسائي نطلع
طلع من الغرفة اخذت جنطتي وطلعت كعدت بصيدلية مهند صب گهوة الي واله
مهند:- اي شنو الاخبار، سمعت الجبل تحرك اخيراً
بسمه:- ياجبل يا اخبار؟
ضحك وهو يكعد على الكرسي يفر بيه منا ومنا دوخ راسي بالزايد
مهند:- خالي سراج سمعت متقدم لخطوبتج
بسمه:- الله ڪريم بعدني ما مفڪرة
منهد:- ويحتاج تفكير هذا الغالي اني لو بمكانج اهلهل
بسمه:- يمه حبيبة
طالعة عوينتك هاي كلها سوالف خالي عمت عليكم
ضحك وهو يكول كبيرنا بالسحر
لا صـدك ما يحتاج تفڪير ترى خالي ما ينرفض وفرصة ماتجي مرتين
بسمه:- اي مو خالك ياهو أبقراط
يمتى ماشفته وشافني مكشم وجهه
مهند:- من تعرسون تروح التكشيمه وتحل محلها بسمه
ما حجيت دخل الولد اللي بمكان مهند علينا سلم ردينا السلام مهند سلمه المفاتيح وطلع واني رحت على مكتب آدم لكيته يقفل بالباب
وصلني للبيت دخلت ودرة استلمتني زن زن احركلها راسي اي وفاتحه تك عين غفيت بدون ما احس على روحي الفجر ڪعدت متڪسرة بسب نومتي، صليت صلاة الفجر وبقيت ڪاعدة اسبح بسبحتي وبعدني محتارة وخـايفة
قررت اصلي صلاة الاستخارة جبت ورقة سويتها( 6 قصاصات) قطع تلاثة كتبت عليهن( افعل) وتلاثة كتبت عليهن ( لا افعل) حطيتهن جوا المصلاية، كملت الصلاة فتحت ايدي للدعاء
بسمه:- استخير الله برحمته خيرة في عافية اللهم خر لي واختر لي في جميع اموري في يسر منك وعافية
رفعت المصلاية، بيدي خلطتهن وهن على وجوهن عفت وحدة ورفعت خمسه كلبتهن تلاثة طلعلي افعل واثنين لا افعل أبتسمت بفرحـه رفعت راسي يارب وڪلتك إمري
قبل لا اطلع للخط حجيت ويا درة كتلها بلغي خالي بموافقتي، بارڪتلي وطلعت بسرعة قبل لا يعرف خالي
گلبي يدك حيل وتدوهنت يومي ڪله
((تمـــــــــاضر))
اتصل لؤي بلغني بموافقة بسمه كال اني اتصلت على سراج بلغته وكال انت بلغهن
رحت لبيت اهلي كتلهن بسمه موافقة عمتي رفعت ايدها تهلهل وامي تبجي وتهلهل وياه
نزل سراج يباوع عليهن ببرود نهضت عمتي اله دنكلها وجهه باسته بخده
ـ بالمبارك يمه يوم المنا والسعد هذا
باس راسها بدون ما يجاوبها امي فتحتله اديها مشي الها حضنته وهي تبجي بصوت ما حاول يسكتها بقى على نفس البرود باس راسها رحت باركتله باوع عليَّ بزعل باس راسي وطلع لدوامه
يومين وسراج اخذلهم مشيـة ترفع الراس، حتى عمامي اللي مقاطعهم من سـنين اخذهم وياه كال عزوة وسند كبال العالم ما اروحلهم وحدي شنو مڪطم، طلبوها على حسب الاصول واخذوا الموافقة واتفقوا على الحاضر والغايب والعقد لؤي كالهم ببيتي ملجتها وزفتها
من رجع عمتي تلڪته بالهلاهل وهي تهوس
ـ خشب يابس يگلبي
صارله سنين
على نفس البرود واڪف يباوع عليها وعلى أمي اللي تصفك وتهلهل وترد وراها بـ صارله سنين
انطاني فلوس الحاضر كاملة وفوكهم فلوس لحفلة المهر
سراج:- شوفيها شنو تحتاج لا تقصرين وياها، وهاي سوالف الحفلة انتن تفاهمن بيها حتى من تڪملن نعقد
••----------- ♡♡♡♡ ------------••
نفــــــــــــــــــس
زمزم يوميه العصر تجي عليَّ ساعة وتروح وهالساعة تخلصها ملاسن ويا سمر اللي لسه ماتعرف شبيها متغيرة وياها بعد ذيج المحبـة
وكل ما تكولها اصف اذا مات محد يحس بوحشته انتي موجودة
زمزم ترد عليها:- لا تڪولين آصف كولي ابو مُصطفاااااااا
تجر اخر مصطفى جر ترد عليها سمر
ـ عشتوا شلونه وشلون مووصطفا
سمر اخذت بنان للدكتورة هي واحمد
آدم ما راح للمجمع عنده باجــر أمتحان، عسل بالمطبخ بس الريحة الطيبة تجي علينا من وراها حتى سمنت وأرغد يكول من نرجع لبيتنا ناخذ عسل ام الطبخات ويانا
ڪاعدين بصالة اني وزمزم تسولف عليَّ واني بالي وياها وعيني على قمر وجهال ڪرم يلعبون واخاف يحطون شي بحلوكهم هبط گلبي من سمعت عياط عسل ما اجى براسي غير البنت احتركت الهبطة صارت بركب رجليه
زمزم سبقتني الها دخلت واشوف الدم ينزف من ايدها وهي تكمز من الالم وتصيح ماما الحكيني
دخل آدم وهو يصيح شكوو شصاير
من شاف الدم خاف عليها اجى بسرعة اخذ ايدها من زمزم رفعها فوك مستوى گلبها
ـ يمه اريد شي نظيف اوكف بيه النزف
رحت ارڪض نعمت عيني حتاريت شنو اخذ ما اشوف جريت بدي من ملابس قمر اخذته اله ضغط بيه على الجرح باوعت على زمزم اريد اكولها تنظف الدم لكيتها تباوع عليهم عاقدة حواجبها
نفس:- زمزم ماما نظفي الارضية
رحت ادور على شاش البارحة صار كبال عيني بس وين ما اذڪر مالكيته رجعت عليهم بعده ضاغط على الجرح وعيونه بالتلفون وهي تبجي وجهها صاير احمر وذبلانه روحها
زمزم تنظف وعينها كل شوية تصير عليهم وهو بعده يباوع بساعة التلفون ورافع ايدها
ضربت السفنجة بالكاع ونهضت سحبت ايدها منه وهي تحجي
ـ انطيني اني الزمها الها
باوع عليها مستغرب ورجع باوع على تلفونه وزمزم ضاغطتلها على الجرح
نفس:- ها يوم تحتاج خياط
آدم:- لا ما تحتاج
وهسه تمام عدت العشر دقائق بله خلي اشوف النزف
رفع البدي عن جفها كالها
ـ اي توقف، تعالي هسه نغسلها
حجت زمزم وهي ترجع تسحب ايدها منه
زمزم:- اني اغسلها الها
وانتي شبيج خبصتينا ترى ما مكصوص جفج هو جرح هالكدوته
نقهرت على عسل تحجي وهي تبجي
ـ والله بعده ياذيني
هاي لو ايدج جان هرجتينا
آدم:- زمزم شبيج وياها ماتشوفينها روحها رايحة
يريد يأخذ ايدها يغسلها وزمزم تبعدها عنه
زمزم:- عوف اني اغسلها الها
علمها شلون تغسلها بصابون بدون ما توصل الجرح
ـ يمه اكو شاش؟
ـ مالكيته
جاوبت زمزم عندنا روح جيب وتعال
راح يجيب كعدنا عسل على الكرسي زمزم تكفخ براسه
ـ شكووو مطلعه شعراتج الملح كبال الولد مو صرتي سادس وبكبر البغل شنو ما تعرفين الحرام
ـ زمزم ولي عني
عمه فدوة اتصلي على ماما تجي تاخذني للطبيب
زمزم خزرتها وهي تحد بأسنانها مديت ايدي اخذت حجابها على الكرسي عايفته لبسته الها كعدت كبالها رافعة وجهها بيدي
نفس:- يروح العمه ما عليج شر، جرح بسيط حبيبتي بسرعة يلتئم
غير تنتبهين على ايدج لو ڪاصه اصابعج
عسل:- استعجلت حتى ارجع اقرأ وهاي السجينه جديدة وسريعة بالتقطيع
عمه والله روحي احسها ذبلت خلي انروح للطبيب
نفس:- اوي فدوة للمايعة ام روح ترفـة والله مابيج بس شيلي الخوف
زمزم:- بلا دلع زايد هسه ساعة ويروح الالم عجل شتكولي على ڪوثر شمرة روحها من السطح
كتمت ضحڪتي كوثر صايرة مضرب للامثال عند زمزم اباوع عليها تريد تأڪلها من الغيـرة دخل ادم جايب شاش ولصقة جروح ومرهم ومسڪن اثيلة ما تفرغ من هالحاجات
آدم:- تعالي فستقة خلي اضمدها الج
زمزم:- ماما نفس تضمد لك الفستقة
باوع عليها لكاها خازرته سألها
آدم:- شبيج! وشو انتي صايرة ما تسلمين؟
زمزم:- سلمت ولا الف مرة بس ما تسمع
آدم:- اها عجل أعتذر منج خاتون وعليكم السلام والرحمة
همست وحدها تعيب:- خاتوون
اضمد بجف عسل اللي لازمه ايدها زمزم وعيني كل شوية أرفعها عليهم واكفين واحد كبال الثاني واحنا كاعدين بوسطهم
آدم:- عجبتج السلحفاة؟
زمزم:- لا هواي تفسي
فتح عيونه بسرعة دار وجهه يضحك واني ما تحملت ضحكت من خاطري حتى راسي اذاني وعسل تتلفت وتسال منو تقصد!
استحت وهي ترد
زمزم:- قصدي السلحفاة
كوثر تكول مو اني
دار وجهه احمر والعيون مدمعة من الضحك ڪالها
آدم:- نعتذر تحمليها محد يعرف يعتني بيها غيرج تورطت واشتريتها
زمزم:- اجيبها لفستقة هي اداريها
عسل:- لا عووع ما أريدها كافي عليه ظيم السادس النوب السلحفاة وريحتها ڪوثر طول اليوم تشكيلي منهن
آدم ساڪت عيونه على زمزم اللي خازرة عسل أبتسم دنك راسه باوع على ايد عسل كالها انتبهي مرة ثاني وطلع
زمزم:- اني هم أروح قبل لا يرجع آصف
رجع راسه كالها تعالي اوصلج
غسلت ايدها دنكت باست عسل وطلعت بسرعة
أبتسمت مشيت وراهم يمشي كبالها وهي وراء ديفتح الباب
زمزم:- سميها بأسمها لا دلعها
آدم:- ليش؟
زمزم:- ما اعرف هيـج ما احب تكولها فستقة
نزل ايده من الباب ما التفت عليها بقى ساڪت وهي رافعة راسها تباوع على ظهره رد عليها وهو يرفع ايده يفتح الباب
آدم:- صــار ما اخاطبها بعد بغير خـــــوية
طلع وهي وراء تنهدت ورجعت على عسل حاطـه راسها على الميز، اخذتها للصالة تمددت على القنفة وراسها بحضني بعدت حجابها امسد على شعرها
نفس:- ها امي حبيبتي
بعدهي تأذيج؟
عسل:- لا قليل
اجت سمر وشافت ايدها فرفحت احجي وياها والله مابيها شي جرح بسيط وهي حاضنتها وتحجي على روحها
سمر:- سودة بوجهي ماما شلون عفتج ورحت
نفس:- لا تبالغين سمر ما بيها شي جرح بسيط بسرعة يطيب
سمر:- دحكي وجهها اصفر سودة عليَّ بالعيادة وحسيت الم بگلبي ما ارتاحيت
بنان:- لا تكبرينها كلش ترى هي وجهها اصفر على كولت بسمة الصفرة
باوعت عليَّ بنان كالت صدك بالعيادة كضبت گلبها كالت خاف عسل تتكهرب
نفس:- اسم الله عليها شنو هالوسواس شيلي من راسج
ما صدڪنا هدينا سمر اجى يونس ومن شافها تخبل وهي الله يسلمها من تشوفهم خايفين تموع من الخوف جبانة ڪلش، كل شوية رافع جف ايدها يبوسه ويحجي على سمر كتلج لا تخلينها وحدها لو طابره جفها لو مطيرة اصبعها من عاط بيه أرغد يلا سڪت آدم وڪرم يباوعون عليه ويضحكون بيناتهم وحمادة حاط راسها على كتفه يحجي وياها
•
•
•
اتصل عليَّ لبست عباتي ودعت المدرسات وطلعت من حرارة جسمي احس الرؤيا مغوشة وراسي يهتز
شفت الحارس فتح الباب اله دخله جوا اجى عليَّ رفع ايده يعدل بعباتي
أرغد:- شبيج يالعمر
نفس:- رجعت حرارتي ارتفعت
ارغد:- حجزتلج عند الدكتور
نفس:- لا ما يحتاج بس انام اصحصح
حرك راسه لفوك بمعنى لا
أرغد:- لا خلي يشوفج ويكتبلج علاج
أبتسمت اشوفه اثنين كتله
ـ ارغد واحد ومفوت نبضات گلبي ومذوب روحي، النوبة صرت اشوفه اثنين شيصير بگلبي
ابتسم وهو يتنهد تقرب بوجهه عليَّ
أرغد:- من رجع للبيت اشرحلج شيصير بينا، هسه خلي نروح لا ننسى ارواحنا وين واڪفين احس روحي الذابت
نفس:- هههه ملاحظ كبرنا واستخفينا
أرغد:- اني وياج ما أڪبر گلبي گلب شاب بالعشرين
أبتسمت كمش ايدي ساندني الحرارة ذوبت جسمي واحس بالعطش اشرب مي ومايرويني
ساعدني اصعد بالسيارة واجى صعد حط ايده على جبيني
أرغد:- حيل مرتفعة
الله يسلمج لو سامعة كلمتي وماخذج للمستشفى البارحة
رجعت راسي على المقعد دايخة اريد بس انـام، كل شوية افز من برودة جف ايده يحطه على جبيني
بعد التحاليل اخذنا العلاج ورجعنا للبيت شفنا آصف نزل من سيارته يريد يفتح باب بيته ويدخل دك هورن اله ارغد فتح الجامه طلع راسه
أرغد:- دير بالك على جنتي مو تضوجونها
طلعنا اباوع عليه من المرايه رافع ايده يسب ويحجي بس ما اسمعه دنك على طابوكه ارغد يباوع بين المراية الامامية والجانبية
ارغد:- ول الخبيث راح يفلش الجام
وصدك شمرها اجت بجنطة السيارة نزلنا من السيارة دخل لبيته وارغد شاف الجنطة
ارغد:- اروح اكسر ايده
كمشته كتله عوفه الله عليك انت استفزيته
أرغد:- بس اڪمل بناء اخذها
نفس:- يااا شنو هالحجي وقت زواج بهذا العمر
أرغد:- لا يابة اقصد اخذها تكعد يمنا تحتاج راحه وما تلڪاها بس يمج البنية دتتغير يوم بعد يوم اڪثر
نفس:- هسه تعال ندخل راح اوكع من طولي
فتح الباب وعلاجي بيده دخلت وهو وراي سد الباب ويحجي على آصف طلعة من الــدين
ارغد عرف بحب آدم لزمزم بيوم وڪعت ڪوثر من شافه شلون نهبط من سمع بنت اصف منتحرة
فرفحت روحه عباله زمزم من كتله كوثر بقى جامد حتى النفس ڪاتمه من تمالك اعصابه يلا كدر يتنفس ويسألني بخوف شبيها ڪوثر لا تڪولين ماتت البنت
ومن ڪعدنا هنا أرغد ڪل مايشوف آصف يستفزه بـ
شلونها جنتي زمزم
ديروا بالڪم على جنتي
لا تضوجون جنتي
امانة يمكم سنين واخذها لآدم
يخلي آصف يشل روحه ويرڪعها من العصبية حتى بالبوڪه منه تجيني العصريات
صعدنا فوك ساعدني اغيـر ملابسي تمددت على السرير رجع المغذي علكه الي ماكملنا بالعيادة، عفته يراقب المغذي ونمت احس اعظامي مسحوڪه وناڪعة بالعرق ما اڪدر افتح عيني اسمع صدى صوت أدم يسأل عليَّ
بلعت ريكي بصعوبه بسبب بلاعيمي فتح عيني الباب قليل مفتوح اشوف ظهر ارغد واسمع صوت آدم يحجي وياه، حبيبي يستحي يدخل لغرفتنا
دخل ارغد وهو يسد الباب تقدم عليَّ
أرغد:- ها آغاتي كعدتي
انطيني ايدج خلي اخذج تسبحين
رفعتله ايدي بصعوبة جسمي احس كل اعصابه شبه ميته ساعدني انهض لف الحجاب على راسي
أرغد:- طلعت منج ان شاء الله
هساع بس تسبحين تصحصحين طلعت من الغرفة ادم يفتر بالصاله اجى عليَّ باس راسي
آدم:- سلامتج يالغالية من ڪل مرض
كتله الله يسلمك حبيبي
انزل ارتاح امي مابيه شي هسه اسبح واتنشط
كال بالعافية ونزل
دخلت للحمام گلبي يفز واشهگ من برودة المي اجيت اطلع ما اڪدر اڪمل دخل ارغد جبرني ابقى جوا الدوش
نفس:- ڪافي اريد اطلع احس گلبي راح يوكف
حضني مثبتني جوا المي حطيت راسي على كتفه احجي بتعب
نفس:- راح انقلك العدوة
أرغد:- ڪل مرض يجيني منج عسل على گلبي وروحي
رفعت راسي اباوع بوجهه أبتسمت
نفس:- آغاتي، الله يبعد ڪل مرض عنك ولا يحرمني بيوم منك
أرغد:- خلي نطلع عبن ماعاد اسيطر على نفسي
سد المي ساعدني انشف والبس رجعني للغرفة راسي دايخ بعده نادى على بنان تجي تمشط شعري
تمددت على السرير قبل لا تجي غفيت حاولوا وياي ماقبلت اڪعد
مر يومين يلا تحسن وضعي العصر صعدت غيرت لقمر آدم يريد يطلعها نزلت اسمعه يحجي بالتلفون ويبارك
سمر عيونها صارت عليَّ ما اعرف شبيها حسيتها مراقبتني تقدمت بتجاهم اريد اڪعد
آدم:- عجل شلون ما أروح اني أول الحضور ما احتـاح عزيمة
كعدت عيني عليه ووين يريد يروح فصل الاتصال وعلى وجهه أبتسامة فرح
نفس:- وين تريد تروح
آدم:- ويا عمي سراج باجر مشيته خطب بسمه
ظليت اباوع بوجهه كال
ها لا تعترضين يوم عيب منه ما اروح واني اول واحـد يعزمني
أبتسمت كتله
ـ لا ليش ما تروح عيب من عمك
والله يبارك لــه
اخذ قمر وطلع اجت سمر كعدت بصفي تباوع عليَّ احس عيوني غوشت من الدموع
سمر:- ليش تبجين
بعدج تحبينه؟!
نفس:- اعوووذ بالله
شنو هالحجي استغفر الله
هاي دموع الفرح شما احجي عن حجم فرحتي هسه ما يكفيها الكلام ولا يشرح ربـع منها
لزمت ايدها واني مبتسمه ودموعي تنزل بغزارة كتلها
نفس:- حسيت بشعور كانه أبني اللي راح يخطب، صار سنين منتظرة هالخبر
رفعت راسي احمد الله وأدعي يتمم لـه على خير
نفس:- اللهم لك الحمد حتى ترضّى
رفعت ايدي امسح على صدري گلبي ينبض بقوة من الفرحة
سحبت ايدي منها ورحت توضيت وسجدة سجدت شڪر لله
••------------ ♡♡♡♡ --------------••
تمـــــــــاضر
امها اجـت ويا لؤي من رجع من المشية سلمتهن فلوس الحاضر كاملات حطيتهن بيدها
تماضر:- هذا المبلغ للذهب والباقي منه تحت تصرفج والملابس وباقي الجهاز الهن فلوس وحد
الجمعة ان شاءالله نجيب السيد يعقدلڪم ونسوي حفلة بيناتنا
حجينا بأمور الحفلة وترتيباتها والصالون كالت ما اريد ترتيل تشتغلني
امها كالت باحر نطلع سوة نشتري الذهب
وهاي اكثر فقرة اكرها حاولت اتملص منها ما ڪدرت، ثاني يوم مهند اخذنا بسمه ما سألتني شعجب ما اجى بس حسيتها ضاجت الظاهر جانت منتظره يجي
اخذتهن للصايغ اللي ناخذ منه نعرفه ماعنده غش كعدت على الكرسي وهن يختارن ما ادخلت بس كل شويه وصاحني أشوف ويأخذن رأيي
طلعن ڪبالي واني وراهن اريد اطلع والصايغ حجى وياي
لحظه أم مهنـد
طلع علبة دفعها بتجاهي كال
ـ هذني الحجي امس وصى عليهن وطلب مني انطيهن الج هدية لخطيبته
باوعت عليهن اسوار ومحبس ڪلش حلوات كتله والحساب كال البارحة حوله الي
اخذتهن وطلعت ما شوفتهن الها يجوز يريد يلبسهن الها بالحفلة تحمست زايـــد
اخذت محبسه مني وراحت هي ودرة يختارن حلقة فضة اله واني واخذت أمها فصلت لحبايبهن القماش ڪل من الزين وهي والحجية أم لؤي اخذتلهن عبايات سراج وصاني حتى لبنات اخوانها اشتريلهن بدلات المرة ماتقبل واني اسحل بيها
كملنا ورجعنا عليهن منتظراتنا بالمرطبات كتلهن الحفلة شنو ما حجزنا بدله نروح هسه مادام عندنا وقت
بسمه:- ما اريد حفلة بس عقد
تماضر:- ليش؟
بسمة:- ماباقي هواي العرس بس هذا الشهر شسوي بالحفلة
درة:- ليش تا يلبسج الحلقة والذهب وهم تكعدون وتتفاهمون بينكم
بسمه:- مايحتاج يلبسني الحلقة اني البسها والذهب بالعرس البسه، واذا على الڪعدة وراء العقد نڪعد مو الا حفلة
تماضر:- ليش دادة خلينا نفرح بيكم
أبتسمت كالت لا ماريد حفلة مهر اريد حالي حال اخوات بس عقد
مدت ايدها الي كالت هاي اله
اخذت الكيس منها، اتصلت على مهند رجع علينا اخذناهن لبيت لؤي حاولت وياها بالطريق على الحفلة وهي على قرارها لا ماتـــــريد
رجعت عليه كتله كملنا الذهب وهاي العلبة الصايغ كال انت موصي عليها
سراج:- اي ليش جايبتهن وياج غير تنطيهن الها
تماضر:- غير هدية تلبسها الها وراء العقد وها ترى رافضة حفلة المهر
ودزت الك هذا الكيس بيدي
عقد حاجبه وهو ياخذ الكيس فتحه كبالي طلع الحلقة وبسرعة رجعها للعلبة وحتى ما شافها على قياس اصبعه لا
فتح العلبة الثانية بيها ساعة حلوة كلش هم رجعها للكيس وعافه على صفحة
تماضر:- ماراح تلبس الحلقة وتشوفها على قياسك؟
سراج:- ما يحتاج ماراح البسها تاڪل اصبعي
تماضر:- والحلفة شنو ماعلقت؟
سراج:- براحتها شنو اروح اجبرها
تماضر:- احجي وياها
سراج:- مادام رافضة مايحتاج احجي وياها وكلامها صحيح هو بس هالشهر ونعـرس عود تعوض بالحنة
تماضر:- تواصل وياها احجوا تعرف عليها وعلى اطباعها وهي هم خلي تتعرف عليك
سراج:- الله ڪريم بعدين احجي وياها هسه خلي نعقد بـالبداية
الجمعة رحنا عليهم ومهند وعلي راحو يجيبون السيد اباوع عليها ڪلش حلوة لابسه قفطان أبيض والتسريحة بسيطه بس حلوة ڪلش ومكياجها يجنن كالن هذا شغل ترتيل
شوية واجى لؤي كال يلا جهزوها راح ندخل
دره ركضت جابت برنص حطته على راسها والقران فتحته بحضنها وايدها عليه حطتلها هيل بين اصابعها
دخل لؤي أشرلها بحواجبه تدخل للغرفة بوزت خزرها مشت زعلانه وهو يباوع عليها بابتسامة
دخلهم وكعد بباب الغرفة فتحه وخلاها ورا ظهره طالعه بس عيونها تباوع علينا
السيد كاعد وسراج وثائر بصفه وبالجهه الثانيه عدنان واخوها الثاني وبسمه بعد مسافة قليلة وعلي ومهند بالباب واكفين
عيوني على سراج عاقد حاجبه يستمع لكلام السيد من اخذ موافقة بسمه غمض عيونه فتحهن وهو يلتفت وراه لؤي يباوع عليه
بلش السيد وياه بقى منتظر موافقته تنهد يلا نطقها بارڪلهم السيد نهضوا كلهم طلعوا بس سراج كمشته عمتي
كالها عيب من السيد اسلم عليه قبل لا يروح وارجع
سحب ايده وطلع رفعنا البرنص عنها عيونها مارفعتها بقينا ڪاعدين ننتظره تأخر اتصل عليه بدون ما ينتبهن ماڪو ما يـرد
دخل لؤي ڪال ابو مهند رادجن وكتله ما يطلعن عشاهن الليلة يمي
تقدمت حجيت وياه بدون ما اسمعهن
ـ لعد سراج وووينه؟
ـ رجع السيد لـبيته
ومارجع بعد
باوعت على بسمه بعدهي ڪاعدة منتظرته
ـ اتصل عليه اني اتصل ومايرد عليَّ
طلع تلفونه بعده مامتصل وسمعنا صوته بالباب ينادي على لؤي تنفست براحـة
راح لؤي عليه دخله كعد على القنفة الڪاعدة عليها بسمه لؤي باوع عليهم وطلع
نباوع عليهم وما ادري شجان ظلينا ساكتات نثولنا اباوع عليهم وبعدني ما مصدڪه رفع عيونه تتنقل علينا
سراج:- شنوو نبقى هيج لو شنو
درة ماڪدرت تسيطر ضحكت وهي تكول
درة:- والله ما اعرف اني همات مثلك مستغربة
نهضت واني اضحك رحنا جبنا الميز من المطبخ خلينا بمستواهم رتبنا عليه الكيكة والعصاير درة فتحت الحلقات وعلبة الذهب واني طلعت من جنطتي هديته حطيتهن هم رافع حاجبه يباوع على الميز أبداً ما التفت عليها ولا هي
باوعت على عمتي عضيتلها شفتي وين راحت هلاهلها والهوسات مخلصتها سوالف ويا الحجية أم لؤي وامي وام عدنان هم ماخذات رڪن واني ودرة وحدنا محتارات بينهم
رفعت الحلقة أريد انطيها اله و دخلت زمزم وجايبه البنات وياها وجهالهم رافعة الديجي بيد وبيدها الثانية التلفون باوع عليها سراج رفع راسه يحجي وياي
ـ هاي سوالف لؤي
واخيراً صارت اجواء بالصالة
كتله لبسها الحلقة يهز برجله مد ايده على السريع اخذ الحلقة التفت يباوع على اديها رفعت جفها اله لبسها وعدل كعدته على نفس البرود ظاهرياً وبعده يهز برجله
درة نطتها حلقته ما انتبه الا كتله ايدك مدها رفع جف ايده دتلبسه على النص وسحب جفه لبسها هو وحده
فتح اول دكمة من قميصه صوت انفاسه اسمعه لان واكفه قريب منه دنكت عليه حجيت بذانه لبسها الذهب
سراج:- انتي لبسيها ما اعرف اني
نهض من مكانه التفت عليها دنك باسها براسها وطلع بسرعة اجيت البسها ما قبلت
عيوني صارت على عمتي زمزم كاعدة وراها وخانكتها هاي ڪل مرة يتشافون هيج يتعارڪن بالجذب وهن وحدة تموت على الثانية
زمزم:- اڪيد انتي ماخليتيهم يعزموني اعرفج تغارين مني
عمتي بالسبحه ترفعها وتضربها وهي تصيح لـــيَّ
ـ ولج تماضر تعالي وخري هالفوصة العابرة عني
زمزم:- اليوم ما اعوووفج
سحبتها كعدتها يمها تباوسن وعمتي تحجي عليها
ـ خايبة ليش هيج متغيرة وليش كطعتي رجلج منا
وزمزم ترد عليها كبرت آصف مسوي علينا حصار هسه قنعه عمو لؤي يلا كدرنا نجي
باوعت على اختها وبنت سمر بصفها كاعدات سوة وام عدنان تسأل بيهم نبشت جدهن الخامس عشر وما شالت عينها عن ڪوثر
قطعن الكيكة ترتيل توزع عليهن ودرة طلعت قطعتين وعصير لسراج ولؤي
زمزم:- عمه احسبي احساب اخوج ترى وياهم كاعد لا يفشلج عمو لؤي
رجعت اخذت قطعة ثالثة وعصير وهي أدز بوسه لزمزم، بسمه طلعت من الغرفة مغيرة ملابسها دخلت للحمام غسلت وجهها نفخت وجهي بقهر جنت مخططه براسي نسوي حفلة مهر ونعزم عليها مو هيج بهاي الفهاوة
طلعت بسمه من الحمام اجت كعدت بمكانها عيونها على الڪل بس واضح بالها مو هنا رفعت جف ايدها باوعت على الحلقة بنظرات باردة مابيها فرح نزلت جفها وهي تزفر النفس بضيق كعدت يمها أسولف الها عن سراج واطباعه هو صح اخوي ماڪو منه بس اني هواي نفخته الها
••----------- ♡♡♡♡ ------------••
دا امشي ويا صديقاتي واسمع احد ينادي باسمي التفتت ممثلنا
ـ رئيس القسم طالبج
ـ اني!!
شنو يريد ما عرفت؟
ـ لا والله راسلني كال ترتيل باسل خلي تجيني للرئاسـة فوراً
صعدت لرئاسة القسم .. القسط دافعته شڪو داز عليَّ!
يبوو بس لا هم عندي نقص باوراقي
وكفت من شفت ابو مهند كاعد مقابيله يسولفون انتبه عليه رئيس القسم كال ادخلي ترتيل
التفت عليَّ ابو مهند دخلت واني اسلم عليهم ردوا السلام
ـ من رخصتكم عندي شغل بالعمادة
طلع رئيس القسم واني بقيت واڪفة اباوع على الباب
ـ اكعدي بابا ليش واڪفة
ـ عندي محاضرة من رخصتك
طلعت وهو وراي كال اريد احجي وياج ما اطول تلحڪين على محاضرتج
التفتت عليه كتله
ـ محاضرتي اهم من محاضرة النسب
من رخصتك
وكفت كبال المصعد دخلت وهو وياي استحيت منه وحدنا بالمصعد
ثائر:- اني اعتذر منج ما ڪان قصدي اجرحج والله
ترتيل:- اعتذارك مقبول
ثائر:- خلينا نحجي حتى أبرر موقفي
ترتيل:- ما يحتاج عمو انت اب وهذا من حقك تختار البنت اللي تشوفها تناسب عائلتك
أبتسم وهو يباوع عليَّ نفتح باب المصعد امشي وهو وياي تنهدت وكفت كتله تمام نحجي
مشينا بتجاه المقعد كـعدت بالطرف وهو بالطرف الثاني كامشه الاسوار بيدي متوترة
ثائر:- الظاهر لؤي أثر عليَّ وصرت ادور انتاج حلو لاحفادي
باوعت عليه كتله هاا!!
أبتسم عدل سترته تنهد يباوع كباله ويحجي وياي
ثائر:- أريد تسمعيني مو حتى أبرر خطئي الخطأ يبقى خطأ
اريد تعرفين شلون جنت أفكر وشنو الشي اللي خلاني أوصل لهذا الحكم الظالم بحقج
اني طول عمري مؤمن الزواج مو ارتباط بين شخصين وخلص لا بين عائلتين وڪبرت على فكرة النسب مهم الإنسان يتأثر بالبيت اللي يطلع منه وبالبيئة اللي يتربى بيها وبالقيم اللي تنتقل داخل العائلة من جيل لـ جيل
دائماً أشوف اختيار العائلة جزء من اختيار شريك الحياة مو احتقار لأحد لا أعتقد هذا يحمي مستقبل أولادي وأحفادي
معرفتي بعوائلڪم و الخلافات ماضي جدڪم والمشاڪل اللي اعرفها خليت هذه المعرفة تسيطر على حكمي
وبدل ما أشوفج واعرف أخلاقج وشخصيتج صرت أشوف الصورة اللي رسمتها براسي عنڪم وواجبي كأب يحتم عليَّ أكون شديد حتى لو جان قراري قاسي وجنت متمسك بهذا القرار
قبل فترة أم آدم حجت وياي وفتحت عيني بسؤالها وقبلها كلام سراج هم
نفس:- لو وحدة من بناتك انحطت بنفس مكان ترتيل ونرفضت بسبب ماضي صار قبل سنين وما الها ذنب بيه شنو موقفك؟
تقبل بهيج حكم على بنتك؟
راح تڪول عندهم حق لأن يخافون على نسبهم؟
لو راح تحس بالظلم؟
بأسئلته فهمت الواحد بسهولة يقبل المبدأ لما يطبقه على غيره بس لما يشوف بنته أو ابنه مكان الطرف الثاني تتغير نظرته ويحس بالظلم
وتفڪيري راح يتغير لو جانت بنتي هي اللي تعرضت لنفس الحكم
المشكلة مو بيج المشكلة بطريقة تفكيري، ظلمتج لأنني حكمت عليج بشي مالج ذنب بيه وماضي خلص ويا اهله اني جداً اسف واعتذر
ترتيل:- ما صار شي عمو حقك بتفڪيرك تبقى اب وتخاف على ابنك
يمكن اذا احط نفسي بطرفك واشوف والدي هيج يفكر راح اقتنع بتفڪيره
أبتسـم كال اي هسه اني جاي حتى اطلبج لابني ابو نص عقل و اريد تحسين انتاج
نشحطت من الخجل دنكت راسي اذاناتي نار صارت كتله
ـ هالشي يم بابا هو صاحـب القرار
ثائر:- حجيت ويا الوالد وكال القرار الها وترخصت منه يلا أجيت حجيت وياج
ترتيل:- ها!!
لا هو يرجعلك الجواب ما اڪدر اقرر وحـدي
ثائر:- اخرتج عن محاضرتج
نهض رفعت راسي اباوع عليه كال يلا بابا في امان الله وانتظر الرد من الوالد
مشى واني رجعت لقاعتي رغم ڪلامه وياي بس قراري بقى نفسـه ماغيرته من رجعت للبيت وسألتني ماما كتلها ما موافقة
لتين:- شنو السبب؟
ترتيل:- كبرت وعرفت مشاعري مو حقيقية وكلامج صحيح
لتين:- يولي لوما اعرفج جان صدڪت ليش رافضته يا ماما الولد الكل يمدح بأخلاقـه وشهادتـه ما شاء الله وعائلته مرتبة شنو اللي يمنع؟
ترتيل:- ما اريد ازوج وخلص
بالليل ڪعدوني بينهم بابا وعمو ويقنعون بيـه وماما وعمتي رياحين وياهم بقيت على نفس قراري
عمو ڪال لبابا لا ترجعلهم الجواب هسه انتظر ڪم يوم اذا غيرت قرارها الله يڪتبلها السعادة وياه واذا بقت رافضة الله يكتب لكل واحد منهم الخير بغير نصيب
ماما حشدت عماتي علىَّ عمتي اثيلة اكدر عليها الا عمتي سمر ابدا ما اعرف اتفاهم وياها
حتى عمتي نفس حشدتها وخلتها تجي تحجي وياي وتحمد بمهند وأخلاقه ما عافوني الا كتلهم موافقة
••------------- ♡♡♡♡ ---------------••
تمـاضــــــــر
اتصلت عليَّ ام ترتيـل مهند كامشني من ايدي وحاط اذانه وياي وعلي واكف كبالنا متخوصر ومنتظر بتوتر ويهمس هاا شنو دحجي، عبالك الخبر اله
مهند سمع موافقتها عاف ايدي وطفر ورجع على اخوه حضنه علي رفع ايده يهلهل سلمت على لتين وفصلت الاتصال
اجى مهند حضني يكول ما مصدك يعني هاي هي بعد صارت نصيبي
ـ هههه اي الله يتممها على خير ويجمع بينڪم بالمودة والرحمة
باجر نروح عليهم ونطلبها مرة ثانية حسب الاصول وفرد مرة نتفق على يوم المشية والعقد
علي طك اصبع ويغني:- مدلل البيت خطبنا له عروسه
مهند تكابل وياه يطكون اصبع ويغنون
منهد:- وسمعونا الهلال وطشوا جڪليت
رجع علي رفـع ايـده يهلهل وهو يصيح يوم الي
باوعت عليه بشك كتله خير علاوي مو على اساس تسافر تكمل دراستك شو حولت على الزواج
علي:- لا ماحولت بس فرحان لاخوي لو البنية رافضة جان زفـينا للشماعية
ونغني وراء
علي:- طـار عقلي وانتي ماڪلتي نعم
دفره مهند بعدين سحله من شعره ضاغط راسه على ميز الطعام
مهند:- فرحان الي لو فرحان لنفسك امورك تووب راح تمشي بدون تعب
تماضر:- ولكم شضامين عليَّ احجوا؟
مهند:- ابنج صاد صيدته من بيت عم آدم
علي:- عسلية يمة شوفتها تسحن الگلب
جريتهم من اذاناتهم
تماضر:- ولكم شنو كاطعين حبل سرّتكم بمكص هاي العائلة
علي:- مثل مايڪول عمي لؤي جا غير أنكريزيات يطكن بالڪاع، اني لو العسلية لو اعتڪف عن الزواج
دخل ثائر سكتوا الولد منهد طلع للصالة بعده مايحجي ويا ابوه
ثائر:- ام البنية بلغتج بالمواقفة
هزيت راسي أي كال اتفقت ويا ابوها بعد زواج سراج نزورهم ونحدد يوم العقد والمشية هذا الاسبوع
وفعلا حددوا يوم للمشية جمع عمامه واخوانه وياهم سراج ولؤي وراحوا على بيت أبوها للمغرب رجعوا مهند يريد يطير من الفرحه وعلي يهوس وراه
ـ وكلها عرست بس اني ظليت
سكت لزم كتف منهد حجى وياه
علي:- يمتى تراضي أبوك؟
مهند يباوع بيني وبين أخوه ڪال بالليل اروح خالي سراج وعمي لؤي وعمي ابو مشتاق(اخو ثائر) امشي عليه
التفتنا على ثائر واكف بالباب ويحجي ويا مهند
ـ واحتاج لمشية حتى تراضيني
تقدم على ابوه وهو مدنك راسها وكف كباله رفع نفسه باسه براسه وهو يتعذر منه
لزمه ثائر من اكتافه سحبه حضنه باس كتف ابوه ويتعذر للمرة الثانية عيني على ثائر يشمه شم علي حضن اكتافي باوعت عليه عيونه مدمعه نفسي
رجعنا عيونا عيلهم ثائر كمش وجه منهد بين اديه
ثائر:- على هذا التعب والزعل اذا انتاجك مثل لؤي اتبرئ منك
ترى اريد انتاج حلوو
ضحك وهو يرجع يحضن ابوه ولسه يتعذر منه مسح دموعه ورجع اديه محاوط ابوه بيهن
بلشنا بتجهيزات العرس، سراج أبداً ما تواصل ويا البنية يتعذر بمشغول
لؤي ما تدخل بينهم ما عاتب ولا سأل ليش ما تحجي وياها تتفاهمون تتفقون أبداً عازل نفسـه
حتى من نحجي وياها حتى يحاجيه يكول طلعني منها ما ادخل بينهم رجال ومرته
سراج يومية ويوصي بــيَّ :- خليج على تواصل وياها بشڪل يومي لا تقصرين بشي وحتى درة تواصلي وياها ترى بسمه حتى من تحتاج ماتڪول
تماضر:- والله ما اعرف خاطبينها الي لو الك حيرتني وياك لويش ما تتواصل انت وياها
ما جاوبني مسح وجهه كال
ـ غرفة الخشب هنا انصبها بغرفتج القديمة ليش ظاله فارغة
وشوفيها اكو موديل ببالها حتى استعجل مابقى وقت
تماضر :- ڪل هذا اني اشوفه لعد وانت؟
وبعدين ليش تنصب الخشب جوا لعد وغرفتك الفوك
سراج:- مالحك افرغها ورا العرس اتفرغلها
تماضر:- اني افرغها اذا هذا عذرك
وغرفتك الفوك جبيرة احسن من الجوة صغيرة شتصير كن دجاج
سكت يدور بعيونه منا ومنا كال براحتج وطلع
صعدت اريد اعزلها اليوم مادام ماعندي شي تلفتت بالغرفة صدك شيفرغها الي الظاهر راح انشك على البطانة أبتسمت بس يستاهل كل التعب واڪثر المهم فرحتنا بزواجه
اتصلت عليها ومثل يومية ماعدها طلبات حتى على سراج ماسألت ولا عاتبت ليش ما يتواصل
حجيت وياها على الغرفة كالت هو يختار ماكو موديل محدد براسي
فصلت الاتصال منها دزيتله كلامها برسالة شافها ومارد
بلشت بالتعزيل فتحت المجر اللي بصف سريره مليان دفاتر وسجلات وملفات عبالي لدوامه بس انتبهت هذني لعيادة ثائر قبل طلعتهن شفت صورتها وعليها حلقته وحلقتها طلعتهن وهو دخل عيونه صارت على المجر تنهد وتقدم على الڪنتور فتحه ياخذ ملابس
تماضر:- هاي السجلات شلون حصلتها
سراج:- اخذتهم بحجه التحقيق من عيادة ثائر وقسم منهن اخذته من بيتها
عاف الملابس واجى كعد على السرير اخذ دفتر مبتسم وصوته يرجف من يحجي
سراج:- كل مريض هنا قريت مشكلته وخطه علاجه والجلسات
حافظ كل شي مكتوب وحتى المرضى حبيتهم اسأليني عن ڪل مريض احجيلج كل التفاصيل عنه اخذ دفتر فتحه وشوفه الي مڪتوب اسمه وجوا خاطره كال هاي هي كاتبتها باوعي الوقت والتاريخ
مسحت عيوني سحب سجل طلع قلم منه كال هذا اخر سجل وهذا اخر قلم كتبت بيه
مد ايده جوا السرير سحب مسجل وكاسيتات قديمه وڪتب وروايات ومجلات كال هذني هم الها
نهض للكنتور، الخانة المقفولة كسرها كسر طلع كل اغراضها وملابسها يمتى جمعهن ما اعرف يشمر بالكاع ويصيح وهذني كلهن الها
يرجف ويتلفت بالغرفة مشى على الكرسي سحبه صعد على الكنتور سحب جنطه فتحها طلع منها بطانية قديمة ومخده شمرهن بالكاع وسحب جنطه ثانية بعصبية طلع منها دوشك وهم شمره بالكاع كال
ـ وهذني هم الها اخذيهن طلعيهن احركيهن اي شي سوي اللي تردينه
لو اكول لا انتظري اني اسهل عليج
تقدم اخذ صورتها طلع الجداحة من جيبه حركها بسرعة وهو يلهث
دنك على السجلات والكتب والمجلات يسفطن بيهن بعصبية شي على شي شالهن وطلع نزل واني وراء جمعهن كلهن بالحديقة
صعد يركض عمتي وامي يباوعن راح جاب كل الملابس مجمعها بين اديه شمرهن على الكتب ورجع صعد الفراشات حابهن واجى شمرهن بعصبية راح جاب بانزين من سيارته واجى داره عليهن اخذ سجل شعل النار بيه وشمره عليهن بسرعه كبت
النار والدخان اسود يصعد والحرارة تلهب بقى واكف يباوع على النار شوية التفت علينا
سراج:- هاي نار گلبي هيج اني جاي احترك والفضل الجن هسه بارڪلي
طلع من البيت بقيت اباوع اخاف النار تشب بالبيت لفيت حجابي من الدخان وكل شويه احد داك الباب عباله احتركنا واجاوبهم اغراض قديمة حركناها
نظفت الحديقة والكراج واني اكح من الدخان رجعت صعدت لغرفته بس الحلقات والمسجل والكاسيتات اخذتهن جمعتهن بالجنطه الجان بيها الفراش ونزلتهن جوا
ثاني يوم رحت حتى اكمل تعزيل لكيته هو معزلها باقي بس الخشب وكالت عمتي العصر يجون يشيلونه
لؤي وآصف والولد وياه ما عايفينه يرڪضون لڪل شي قبله، اتصلت على بسمه علمود الحنة رفضت كالت ماريد حنه حاولت وياها ولاڪدرت اغير رأيها اتعس من لؤي
اما حنته لؤي وآصف اجروا بستان وهم تكفلوا بالترتيب وتفقوا ويا شعراء
الخشب علي جابه وصعدوا لغرفته الفوك اني اخذت درة وطلعت تسوكت كل احتياجات الغرفة ماعفت نقص عليها الغرفة تجنن وضخمة
قبل الحنة بيومين العصر اخواتها ودرة جابن ملابسها واعراضها رتبنها بالغرفة ما خليتهن يطلعن الا بعد العشاء ورجعنها اني ومهند لبيت لؤي
من رجعنا شفته بالباب حجيت ويا مهند نزلني يم خالي اريد احجي وياه وكف السيارة نزلت ومهند راح للبيت يدك هورن لنفس حتى تفتحله الباب
حجيت ويا سراج واني ادخل كباله
تماضر:- ترى بسمه ما اقتنعت بعدهي ما تريد تسوي حنه
سراج:- ليش؟
تماضر:- اني ما اعرف المفروض انت تعرف
مد تلفونه كال سجلي رقمها
رفعت حواحبي كتله حتى رقمها هسه يلا تذڪرته بعد وقت خلي ثاني يوم العرس اخذه منها
سراج:- تماضر سجلي الرقم بدون حجي
اخذته من ايده سجلته كتله شنو اكتب عليه
اخذ من ايدي اباوع عليه كتبه (باسم)
باوع عليَّ بطرف عينه شافني فاتحه حلكي كال
ـ خوما اكتب اسمها بتلفوني بله اتصلت والتلفون جان يم احد
ضربته على ايده خفيف واني الزم زنده
تماضر:- اووي فديت اللي يغار على اسم مريته
استغفر وهو يطلع للشارع طلعت وراء عفته واكف يتصل عليها واني مشيت لبيتي..
••------------- ♡♡♡♡ --------------••
كاعدة ويا اخـواتي يشوفني بالفيديو مال الغرفة مصوراتها صح عجبتني بس بعدني لهسـه ما احس بطعم الفرحة حتى من برود اعصابي اڪول ڪل هذا حـلم هسه أڪعد منه ويرجع ذاك سراج المستحيل اوصـله
تلفوني على الشحن سمعته يدك اعرفه من نغمة الرنين مخليتها توأم يا زمان امي ام الحنان
رحت شفته نبض گلبي واني أشوف اسمه هاي اول مرة ينور شاشتي من شهر سجلت رقمه عندي ولا مرة اتصل رغم هواي انتظرته
فتحت الاتصال واني اصعد التلفون لاذاني
سراج:- الووو
زفرت النفس شبيه گلبي يرجف جاوبته بـ الو تفضل
سالني شلونج واني اتجاوب وياه صوت النفس قبل لا يحجي اسمعه وتتخربط احوالي
سراج:- اريد اجي احجي وياج
بسمه:- هســـه!
سراج:- اي
تمام هلا بيك
سديته رجعت تلفوني على الشحن طلعت لخالي كاعد بالطارمة على المرجوحة ويقرا بهذا الدفتر صارلة فترة حتى ينسى نفسه وهو يقرا ولو ادك طبول عند راسه ما ينتبه
هزيته من كتفه بهدوء رفع راسه ها بسومه
خالي سراج يريد يجي علي هسه
أبتسم كال هلا بيه
وشنو المطلوب خالي اتلكاه بالهلاهل
بسمه:- والله بعد انت وخبرتك بله هلهل خلي اشوف تعرف عدل يو لا
خزرني وهو يضحك كام من المرجوحة كال اني راح انام
بسمه:- ياا جا منو يستقبله
لؤي:- مرررته
عافني ودخل اجتني بنت اختي كالت هذا تلفونج يدك اخذته منها مكالمة فائته اله اتصلت عليه كال بالباب اني
دزيتها تفتحله الباب دخل وهو يدنك يبوسها براسها تقدم عليَّ مد ايده بحركة السلام رفعت ايدي تسالمنا بطرف الاصابع وسحب ايده
كتله تفضل باوع على المرجوحة كال لا هنا نكعد
كعد سألته اجيبلك عصير لو اسوي جاي او كهوة
باوع عليَّ ونزل عينه كال جاي
رحت خدرت جاي جديد صبيت استكان اله وكلاص مي ورحتله بقيت واڪفة اشرلي اكعد
كعدت والصينية الخشب بحضني باوعت عليه ديشرب جاي ويباوع كباله انتبهت على اصابعه الحلقة نازعها ولابس بمكانها محبس
سراج:- ليش ماتردين تسوي حنـه؟
بسمه:- ما يحتاج حفلة العرس ڪافي
نزل الاستكان للصحن عيوني عليه واحجي بداخلي ليش ما جاي تشوفني
مد ايده حط الاستكان بالصينية باوع عليَّ أبتسم حسيت گلبي طار
سراج:- باجر الصبح اجي اطلعج حتى تجهزين نفسج للحنه
اجيت احجي كال
ـ بســـومه ما اريد اعتراض
نهض واني عفت الصينية على المرجوحة ونهضت ورا وصلته للباب التفت تقرب باسني براسي بوسه سريعه اكثرها بالفراغ
ـ تصبحين على خير
كتله تلاكي ڪل الخير
فتح الباب طلع سديته ورجعت گعدت على المرجوحه بعدت الحجاب من راسي رفعت ايدي لصدري احس برفات گلبي وألم بضلاعي واصبر بروحي اخذت استخارة اصبر عليه
الصبح اجى عليَّ اخذني جهزت للحنة بواهس لان هو وياي حتى البدلة هو اختارها كال والصالون وهاي السوالف
ـ لا ترتيل تسوي شعري والمكياج
ـ براحتج اللي تشوفينه مناسب
تنهدت انتبه عليَّ كال سلامتج من الحسرة
تغدينا بره واني عيوني تغدت بيه كل حركة انتبه عليها رجعني للبيت سألته قبل لا يروح
ـ باجر تجي تحنيني
ـ لازم أجي؟
ـ لا براحتك مو ضروري
سراج:- عادي بـ 12 لان زحمه اعوف الناس وحدها واجي قبل لا يرحون
ڪلت بگلبي عادي حتى لو الفجر بس تعال
هزيت راسي اي، دخل الاغراض سلم على امي واخواتي وراح
سويت حفلة حنة بسيطة بس نسابة لؤي واخواني وهاي زمزم واكفتلي كل شويه وكالت عمو احلى منج اجاكرها تظل تشيل بروحها وتركعها
عبـرت الـ 12 ڪلها طشت وهو بعده ما اجى انتظرته للفجر والتلفون بيدي ايست من جيته نزعت البدله بقهر حتى نفتكت من وراء
لفيت راسي حاولت انام ماڪدرت بقيت اتكلب انتبهت على تلفوني فتحته داز رسالة
ـ بسومه اسف ماڪدرت اجي
مارديت عليه ولا هو حاول يدز بعد لو يتصل يجَبر ڪسر گلبي ويرجع يڪسره بالاقوى
••-----------♡♡♡♡------------••
تماضــــــــــر
بيوم الحنة قبل لا يرحون للبستان تجمعوا بالكراج وعمتي وامي وياهم اباوع عليهم من باب الصالة لؤي ايده على كتف سراج واكف كباله ويحرك بيده الثانيه
لؤي:- هوانه هوانه هلا يالي على الفطرة
هوانه هوانه يسري ولو يمر ينعيش
هوانه هوانه اذا تسأل على اليوفي هوانه افزع باول اصياحك عليَّه
حط ايده سراج على راسه وهو يكول والله والنعم
لؤي:- افزع بأول صياحك وانه اتعناك
وازيل هموم گلبك وابز عين اعدائك
احنه بالتريده، احنه بالتريده دومنه وياك
رفع ايده وهو يطك رجله بالكاع ويحجي الرباط
لؤي:- هااا وهااا
وشوف شما بينه وشوف شما بينه... ندهنا بيوم تكلف
ضحكت واني اشوفه يهوس ومهند وعلي وياه يدبجون ويرددون بالرباط وآدم مبتسم يباوع عليهم وعمتي وياهم وامي على ڪرسيها وتهلهل
تقرب لؤي على سراج حضنه وهو يكول
لؤي:- اليوم فرحـة عمري الجبيرة الما بعدها هيج فرحـة
آصف:- وفرحتي هم
دخلت بسرعة من دخل نسيب لؤي ماطولوا وراحوا…
لـــــــــــؤي
عيوني عليه يباوع على الشعراء ماڪو فرحة عريس على وجهه التفتت باوعت على آصف مخازر هو وآدم ارتجيت على الكرسي تدنيت عليه
ـ شبيك وياه؟
ما رد عليَّ عض شفته بعصبية وبعده خازره كتله
ـ راح تحط گلبه بيده مثل سوايتك وياي عوف الولد شجلبت
ـ هو وأبوه ناوين يجلطوني بس والله وتالله نجوم السما اقرب الهم من زمزم
دفعني خفيف لظهر الكرسي باوع على سراج رجع راسه يحجي بذاني
ـ عنده عرس لو جنازة شبيه لابس وجهه بالمگلوب
ـ اعذره ما يعرف يمثل نفسك ابو دميعات الجذب
ضحك وهو يفر بالسبحة، كال والله صار هواي ما مستخدم قطرات ترى صدك هاي دموعي شبيك ما تصدك
لؤي:- لا انه ما اصدك استغفر الله ولك انت سويت ازمة بالصيدليات
آصف:- لا والله من وفاة عمتي مـا اجبتهن
مديت ايدي دورت جيبه صدك ماڪو قطرة قبل يمتى ماتلمست جيبوه حاطله قطرة، المسڪينة ام مصطفى مصدڪته يبجي عليها
اشتغلت اغنية جوبي كام آدم ومهند وعلي وياه يلعبون بس مو نفسه هو مغطي عليهم يحاولون يقلدونه ابتسم آصف نهض اخذ الكوفي من ايد منهد وتكابل ويا آدم واحد يتحدى الثاني علي ومهند اجو كعدوا يباوعون عليهم
خلصت الاغنية اصف اشرله يعيدها صارت معرڪة بيناتهم مو فصل جوبي نباوع عليهم سراج مبتسم كتلها ها شو تضحك تدنى عليَّ
ـ ولك جاي احـمد الله واشڪره خلاني اناسبك ولا اناسب اصف
ضحكت كتله الظيم طايح عليَّ شال حالي واحوالي
خلصوا ورجعوا لاماڪنهم كعد يمي آصف فحطان يمسح بوجهه
رجعنا لبيت سراج كتله شنو ما تروح على مرتك تحنيها كال لا تاخر الوقت
كعدنا بباب الحوش وهو دخل بدل ملابسه ورجع علينا علي جاب النراڪيل ومهند جابلنا جاي اصف طابط رجله على الكرسي جواه ورجل بالكاع ينرگل ويغني
آصف:- عمده ماسلم عمدا بالغرة شابك وردة بالغرة شابك وردة
لؤي:- اسأل عنه وينساني گلبي شايل مودة گلبي شايل مودة
آصف:- ياشويك روح وروّح لا تتعوك علينا لا تتعوك علينا
لؤي:- والعين تنطر دربك ومن السهر ملينا ومن السهر ملينا
رفعت ايدي اله غنيناها سوة
ـ عمده ما سلم عمده بالغرة شابك وردة بالغرة شابك وردة، اسأل عنه وينساني گلبي شايل مودة گلبي شايل مودة
باوع عليَّ علي كال سجل يا تاريخ خال العروس فرحان اڪثر من العروس نفسها
ضربته بالقامقجي على متنه كتله
ـ انتم هالجيل شتعرفون عن الصاحب؟
باوعت على سراج ابتسم وهو يمد ايده لزم جف ايدي
لؤي:- ولكم هذا صويحبي اخوي واعز من الاخو عندي، وهاليوم منتظره من كبل لا يشيب شعر راسـي، والله مو بس افرح روحي من جوا حتى تهلهل
••----------- ♡♡♡ ------------••
تمــــــاضر
عوائل عمامي ڪلها اجت اصغار واڪبار احس روحي انثولت وحدي
الطبابيخ ببيتي، ثائر وعلي واڪفين وياهم زمزم جابها لؤي الصبح وياه اسخر بيها، ما شاء الله عليها حركة وسريعة كل شوية ادزها تجيبلي شي تروح تركض وهاي النسوان كساع جاي هو تخدر وتصبلهن
لؤي جاب المعاليك كال هذني ضميهن بالمجمدة اريدهن لمرت آصف
اخذتهن حطيتهن بالمجمدة ورجعت للمطبخ اغسل بالاستكانات واسمع بسوالف لؤي واصـف كاعدين يم الشباك
آصف:- اعزل غده لـ ام مصطفى تتوحم على اكل المناسبات
لؤي:- لا وصية علي يعزل لكل بيت
اجت زمزم شايلة الصواني حطتهن يم الباب وراحت تكنس بالمكناسة الكهربائية سطرت روس النسوان كل ما تشغلها يحجن عليها ولا تقلدلهن تكمل وترجعها جوا الدرج
سمعت صوت الهلاهل مديت راسي اباوع دخل سراج من باب الصالة ونسوان عمامي وعمتي تلڪنه بالهلاهل باس روسهن وصعد قاطه شويه ونزل طلع للاستقال يم الزلم
زمزم:- هاي الحجيه تكول اريد جكاير
باوعت عليها كتلها صيحيلي صفاوي اخوج
راحت صاحته يلعب جان بالصالة دزيته لمهند يجيبلهم جكاير زمزم تباوع عليَّ كالت اشو الحجيه عادي ومحد يكولها ليش ادخنين واني آدم صلخني بكف حتى اثر بعده بكصتي
كتلها هذني قبل من تموت رجولتهن يدخنن عود هنه صارن زلم البيت وهم محد يندك بيهن
زمزم:- حرام مو؟
تماضر:- حرام او لا ما اعرف
بس ظاهرة مو حلوة واصلا مكروها اجتماعياً بس بعد هاي عقلياتهن شنسويلهن
وانتي يمتى دخنتي شلون هيج تسوين
كالت هاي قبل هسه لا اصلا تلعب نفسي من ريحتهن وآصف مخيس البيت اثو تحجي عليه هاي الفترة وحتى تتقيئ بسببه
اريد اڪولها تلعب نفسها لان حامل دخل لؤي ما حجيت التهيت وياه
كعدتها هي وبنت من بنات ولد عمامي ينظفن بالخضرة منهد اخذ الغدا لنسابة لؤي واهله وآدم اخذ غدا العروس وحبايبها للصالون
العصر اجت مرت آصف وبنتها الثانية وياها ولتين والحجيه ام باسل مهند كل شوية ماد راسه للمطبخ يوصيني عليهن
قبل الزفـة صعد سراج الغرفته وهوسات النسوان والهلاهل تركع بالصالة
دخل لؤي كال سويلي درب اريد اصعد وياه رحت خليت البنات الشابه تدخل للغرف وهم بلغتهن اللي تريد تروح للزفة تجهز نفسه ترى ماينتظرون رحت صحته صعد وهو مدنك راسه
لـــــــــؤي
دخلت لغرفته ڪاعد بطرف الجرباية بعده بدشداشته باوعت على القاط حاطه على الجرباية
سديت الباب كتله يلا شمنتظر ماظل وڪت
مسح عيونه باوع عليَّ كال منتظرك تجي
جهزته بيدي كوة لازم دمعتي صار سنين منتظر هاليوم جاي البسه بالسترة ودخل آصف اخذها من ايدي لبسها اله
شلت العطر رشيتله اخذه اصف من ايدي وسبح روحه بيه
نزل واحنا ورا الجكليت بس تفشخ اصف يلم وياكل وانه اصيح بسجن
وكفت عمتي كباله تدبج وهي تهوس واني وياها
ـ اهلاً يالمنا وبينا،، وغيرك ما نهواه
ـ وهاي الرادها وهاي التمناها بنت الشيخ لابن الشيخ جبناها
شفت يباوع علينا بنظرات ما عاجبه الهوسه بسرعة غيرتها …
زمـــــــزم
اخذت ملابسي ماما جابتهن وياها دخلت للحمام بدلت ورحت لغرفة بيبي ام سراج عدلت حجابي سمعت صوت عمي لؤي طلعت يدبج بنص النسوان كبال عمو سراج واصف واڪف مرتجي على محجر الدرج ياكل جكليت ورافع ايده يهوس وياهم
لؤي:- واخينا خوش أخيي،، يستاهل الهوسـة
تقربت عليه يهوس هسه اصبعه يدخل بعين وحده من العجايز لزمته من الردن كتله اروح وياك بالزفة
كطع هوسته كال سيارتي ازف بيها العرسان اوديج ويا السيارات التروح
باوعت على آصف كتله بعده ياڪل جكليت تارس ايده عمي سراج يباوع عليه ويضحك
ـ عمو صاحبك ما راح يقبل، احجي وياه اريد اروح للزفة حباب عمو الله عليك
ـ ما عليج انه احجي وياه انتي تحضري
ـ ڪاملة ماعندي شي
طلعوا واني بقيت بالصالة منتظرة البنات والنسوان اللي تروح كلها طلعت حتى الحجيات الكبار دزوا عليهن بقيت واڪفة منتظرة، باوعت على عمه تماضر اريد ابجي اتصلت عليهم محد يرد والجهال ڪلها طلعت
سمعت صوت عمو لؤي بالمطبخ يصيح
ـ بويه مزنه وينج يلا تعالي
رحت لـه اركض طلعني ورا ظهره، صعدني السياره اللي راح يزفهم بيها
اجى آصف وكف يم الجام ويوصي بيه ممنوع اصفك اكعد واسكت
ماحجيت خاف ينزلني باوعت على آدم واكف كبال سيارته يباوع علينا مصعد الحجيات وياه ابو العجايز كانه ما قابـل على طلعتي
صعدوا عمو سراج وعمو لؤي صعد هو يسوق بس حركت السيارة وابتعدت عن اصف رفعت اديه اصفك ويا الاغنية وعمو لؤي يسوي واهس يصفك ويهلهل وكل شويه يعوف الاستيرن ويطك اصبع
رحنا للصالون نزلوا يجيبون العروس عمي لؤي طلب مني ادور للصدر طلعوا العرسان، بسرعة عمي سراج ساعدها تصعد السيارة ويغطي بيها
سراج:- يلا لؤي اطلع لا تظل واڪف
هم يلحكونا
طلع عمي لؤي فتحت الجام قليل ماده ايدي وارش واصور بيدي الثانية
اخذهم يصورون بقيت كاعدة اجى ادم وكف كبال الجام مغطيني بظهره
آدم؛- المن مطلع ايدج من الجام
ما جاوبته ما صدكت خلصت من اصف النوب انت عليَّ ظل واكف الى ان طلعوا من الاستوديو يلا رجع لسيارته الولد تهوس وترڪص وهو واڪف مثل الدنڪة
فرهم عمو لؤي فوك الساعتين وياخذ السيارة يمين ويرجعها يسار وعمي سراج يحجي عليه يكله دكافي خلي نرجع
وكفت السيارات كبالنا والزلم نزلت تهوس وهو نزل وياهم وعمي سراج ينفخ ويستغفر باوعت عليهم كاعد يم الباب وهي يم الباب الثاني صورتهم أبتسم لــي
مديت راسي مرجعته عليهم ورفعت التلفون صورة سيلفي وياهم
اجى عمي لؤي صعد وشبع تكفخ على راسه من سراج وخلص الطريق يحجي عليَّ ولا اهتم خلصها يضحك ومعلي الاغاني على اعلى شي …
••------------ ♡♡♡ -------------••
بـــــــــسمه
دخلني لبيتهم ذبحوا عند رجلي هو بيده رفع البدله قليل وبسرعة نزلها
دخلني للصالة على صوت الهوسات والهلاهل ساعدوني هو وتماضر اڪعد كعد يمي رفعوا الكبوس عن راسي باوعت عليه بطرف عيني يباوع على آمه كاعدة على الكرسي تصفك وتهلهل ويا الهوسات أبداً ما باوع بوجهي حتى بالصور عيونه تجنبي وكل لقطة تطلبها البنية يظل يتأفئف
شوية وطلع ساعدني اصعد للغرفة وامي وخواتي كعد يمي جابولهن عشاء للصالة الفوك طلعن تعشن واني عيوني تتلفت بالغرفة وگلبي على ڪد مادك احسه تعب
رجعني كعدن يمي بالغرفة يشربن جـاي مرت ساعة وسمعت صوت هوسات الزلم اختي غطت وجهي وطلعت وياهن وهي تسد الباب وراها
دقائق ونفتح الباب اسمعه يرجع المبارڪة عليهم ويتشڪر، ثواني وسد الباب عيوني على رجليه بعده واڪف بمكانه وجهه على الباب رفعت عيني قليل يسد بصابعه ايده ويفتحهن