رواية سجين الحب الفصل الرابع عشر14بقلم زهراء الحريري
بســــــــــــمه
اجيت انت عوض عن كل وجــع بالروح ولفهاوات دنيتي رشت ملح خليت
ســــــــــــــــراج
وتغيرت اني …
عبالي ابقه شخص مهموم ويعاني لمن فقت الامل اجت محبتك الي تعويض رباني يالتستحق العمر ايامي كلهن الك واحد وره ثانــي
••-----------♡♡♡♡--------------••
طـول يلا التفت بسرعة دنكت راسي بس اشوف خطواته من تقرب وڪفت
كشف وجهي عيوني بعيونه الطافيه مرر جفوف ايده حضن حواف وجهي ورقبتي قرب راسه باسني بجبيني
سراج:- مبارك
الله يوفقني لسعادتج
ما راح اقصر وياج اخليج ماي بعيني
ماڪدرت ارد ابتعد كال اخذ راحتج راح اغير بالحمام من تكملين دزيلي رسالة
راح للكنتور طلع دشداشه فرغ جيوب سترته وبس التلفون اخذه وطلع
رفعت ايدي لمكان گلبي احس بالانهاك، رديت كعدت على الجرباية ليش احس نفسي داخـلة معرڪة
باوعت على الڪنتور وكفت واني ارفع بالبدلة مشيت للخانة الوسط فتحتها طلعت السيت وكفت كبال المراية صفح اباوع على السحاب مديت اديه من فوك وجوه وفتحتها بس احس كتفي نخلع
نزعتها لبست السيت باوعت على التسريحة حلوة ما افتحها دنكت اخذت البدلة حطيتها على القنفة اللي يم الشباك عجبني منظرها جبت تلفوني صورتها دزيتله رسالة كملت
فتح الباب القاط على ايده باوع عليَّ وكف بمكانه سد الباب بدون مايلتفت تنهد تقدم بتجاهي يباوع على البدلة أبتسم
سراج:- اعلك القاط لو اخلي يمها
بسمه:- خلي حتى اصور
نزله على القنفة اخذت كم صورة باوعت عليه واكف يباوع عليَّ منتظرني اكمل
سراج:- اذا تردين اطلعين للحمام اخذي راحتج اول ماطلعين على يمينج
هزيت راسي اي اجيت اطلع صاح
سراج:- اي صدك كلت اخذي راحتج بس مو طلعين هيج
التفت عليه واني انزل ايدي من ايد الباب لكيته مبتسم كال
ـ خاف لؤي يصعد مو أعرفه خالج ما يكعد راحة اني خايف شويه والكاه يباوع من جوا الباب
رجعت على الكنتور فتحته اخذت عبايه لبستها وطلعت وهو وراي واكف بباب الغرفة يباوع على الدرج
دخلت للحمام غسلت وجهي هسه ارتاحيت احس جنت محنطه طلعت بعده منتظرني دخلت يلا دخل اتصل على تماضر كالها صعدي عشانا
ما تاخرت وصعدت صينية مشاوي وهي تباوع بيناتنا مبتسمة وعيونها متروسه دموع باركتلنا تريد تطلع وحضنها باسها براسها ربتت على زنده وطلعت قفل الباب واجى اخذ ايدي شبيه تكهربت كعدني وكعد مقابيلي باوع على ايدي وكف تلفت بالغرفة راح جاب تلفوني ورجع
سراج:- لا تتقيدين وتستحين مني سوي اللي يعجبج
أبتسمت صورت العشا مديت ايدي من فوك الصينية بحركة السلام رفع ايده الي صورت ادينا اخذ التلفون من ايدي وهو بعده لازم ايدي الثانيه شاف الصورة رجع أخذ غيرها وهو يقلبه كان التصوير من جانبي
سراج:- هيج تمام
سحب ايده وحط التلفون يمي نتعشى بهدوء كل شويه اباوع عليه من يحس يرفع عيونه عليَّ يبتسم
«لا تغرك الضحڪة ترا الوجع بالروح»
كملنا اني لبست عباتي طلعت اغسل وهو طلع الصينية وعطر الغرفة رجعت للغرفة وهو دخل للحمام ندك الباب فتحت الباب تماضر جايبه جاي
تماضر:- سراج مدمن على الجاي مايرتاح اذا مايشرب ورا العشا
اخذته من ايدها واني اتشكرها اجى قبل لا تنزل من شاف الجاي كالها اجيت اتصل عليج عاشت ايدج
اخذت الصينية من الصالة ونزلت سد الباب اخذ صينية الجاي من ايدي تقدم كعد واني هم شربنا جاي و عيونه تتلفت منا ومنا كانه واڪع بحيرة ومحتار شلون يطلع منها
بعد الاستكانات مد ايده الي نطيته ايدي سحبني كعدني قريب منه باسني بخدي غمضت عيوني من الارتباك نسيت شلون اتنفس
زفر النفس وهو يبعد راسه باوعت على ايده قابضها تنهد رفع ايده لزم جف ايدي ويحرك بأصبعه الابهام على ظهر جفي توصلنا صوت الهلاهل والصفڪات
أبتسم كال
سراج:- شنو مـا يتعبن لساني يوجعني بمكانهن وجفوف اديه تحكني
ضحكت واني ادنك راسي رفعه بصابعه مرر جف ايده حاضن رقبتي وبالابهام يتحسس نهاية اذاني ملت راسي على جف ايده
همس بصوت مبحوح خلي نصلي
هزيت راسي اي عافني وطلع بسرعـة رجعت راسي ليورة ساندته بالجرباية
حجيت ويا روحي بعدنا بالبداية لا تستسلمين
غيرت السيت بدشداشة حطيت حجابي على راسي دخل وهو يمشي المي على ايده
طلعت توضيت ورجعت عليه فرشت مصلايتي ورا صلينا كملت لفيت المصلاية وهو بعده كاعد رافع راسه مرجعه ليورة حتى رگبتي اذتني من منظره
نزعت حجابي ورجعت على نفس السيت، تمددت على الجرباية خليك تصفي ذهنك وحدك تنهدت جاي احاول بس ما أڪدر مرارة الغيرة تموت
يمكن عباله غفيت لان مغمضه عيوني وماتحركت طفى الضوه واجى تمدد بعيد عني مر الوقت واحنا على وضعنا سمعت صوت رسائل بتلفونه مد ايده عند راسه اخذه فتحه
آصف:- ها يوول دبرتها
اعرفك هساع مبوز وجهك
بسرعة قلل الصوت بس بعدني اسمع الصوتيات
لؤي:- ولك سراج لا تسود وجهي وتضحك الشماته عليَّ رجليه تكطعت من الدبج
سد التلفون وهو يحجي وحده لا ياهتليه من وراكم ماراح ادبرها
فتحت عيني قليل متمدد على ظهره اديه على بطنه وهو مشابك الاصابع ورجليه مادها وحاطهن رجل على رجل ويباوع على السقف، غمضت عيني اسحب عطره ويا النفس الى ان غفيت صـدك
ـ بسمه
بسومه
باسم بسوم
فتحت عيوني سراج واڪف أبتسمت بوجهه ابتسم وهو يعقد حاجبه
ـ باسم خوية اڪعد
رفعت راسي اتلفت منو باسم! ضحك وهو يكول
سراج:- ابوية انتي شسالفة داخلة بحلبه مصارعة بنومج مردتي سكت وهو يضم ضحكته كال
ـ صباح الخير يلا اكعدي
فاتتنا الصلاه
مشى ومبين عليه متوجع لازم نهاية بطنه طلع من الغرفة باوعت على روحي نايمه بمكانه عيوني صارت على الشباك دنيا الصبح اخذت تلفوني الساعة بالتسعة
نزلت من الجرباية مطيت اديه اثاوب دخل بسرعة سديت حلكي اخذت ملابس اسبح يلا اصلي راسي نشنط من التسريحة مايسوه عفتها
دخلت للحمام سبحت واني اطلع اسمع تماضر تبشر بعمته تكولها البنية جاي تسبح يمكن فضوها البارحة
دخلت للغرفة مكمل صلاته و كاعد على الجرباية مشابك اصابعه وساند حنجه بيهن
نشفت شعري الجو بارد مشطت وفرشت المصلاية اصلي هو عيونه عليَّ كملت بقيت اسبح رفعت عيوني مبتسم وعيونه بعدهن عليَّ كملت تسبيح الزهرة ولفيت مصلايتي
سراج:- ارجعي جففي شعرج لا تتمرضين
رجعت جففته صدك الجيوب تهيج عليَّ اذا بقى شعري بيه رطوبة اجى وكف وراي كتمت النفس لم شعري على كتفي الايسر يتلمس بالاثر اللي بكتفي الايمن حسيت بحرارة ذوبت مو بس گلبي حتى روحي
سراج:- هذا الاثر شنو سببه
حجيت وصوتي ضايع:- من جنت زغيرة العب بباب الحوش وبت جوارينا بجامه مكسوره شكت جتفي وظل هيج اثره
اريد اغطيه منعني يمسح بيه بابهامه زفرت النفس بتعب بسبب دكات گلبي السريعة
دنك باسه غمضت عيوني ذايبه حتى المشط وكع من ايدي رفع وجهه يباوع على انعكاسي بالمراية اخذ جف ايدي بيده يمشي بتجاه الجرباية ويمشي بيه ورا
ندك الباب باوع عليَّ وباوع على الباب صوت تماضر جايبتلنا الريوك
عافني وراح فتحلها الباب اسمعها تباركله شفته دنك باسته بخده اخذ منها الريوك سد الباب برجله كعدنا نتريك من كمل اخذ ملابسه وطلع للحمام واني سحبت شعري وخليته مفتوح حطيت مكياج ولبست مخور ملكي لونه برتقالي نحاسي مشغول يدويا تطريز بخيوط الزري الذهبية و مرصع بالاحجار الكرستالية الثقيلة وفصوص زجاجية ملونة بلون مغاير للون الفستان
جاي البس بالذهب ودخل سد الباب وهو يباوع عليَّ اجى وكف يمشط بشعره
سراج:- يعجبني ذوقج بالملابس
أبتسمت باوع عليَّ كتله بگلبي واني يعجبني شعرك الرمادي
سراج:- ما سألتي من يمتى
كتله واني اسد السوار
ـ من يمتى
سراج:- بعرس لؤي شفتج ما قصدي اباوع والله ولا ابالي هيج فجاة صارت بس عجبني بوقتها، وبوكعت بنت آصف استغربت منظرج
أبتسمت كتله:- طلعت فجاة من سمعت صوت الصياح خوما اكشخ يلا اطلع وحتى ما منتبها شنو لبست برجلي تكرم
اخذ محبسه لبسه والساعة وهو يدور عليَّ كال كملتي حتى ننزل
هزيت راسي اي رفع الطرحة الشفاف اللي بلون المخور على راسي رجع ليورة قليل يباوع عليه نظره شاملة كال ماشاء الله
اخذ ايدي بيده نزلنا سوة تلكنا الحبايب بالهلاهل والهوسات والتبريكات والدعاء، بقيت ڪاعدة يمهن الحمد لله محد سألتني مر وقت واجى كال خالج يريد يجي يسلم عليج
كتله هلا بيه
بقى واڪف ما اعرف شيريد وهو ياشر براسه عليَّ
تقرب مني كال
ـ شنو تبقين هيج البسي شال على راسج
ـ راح يدخل وياه احد؟
صاح تماضر صعدي سكت بعدين كال نونه تجيب شال لخالتها
ـ اذا وياه احد اصعد البس غير هذا هز راسه لا، شوية واجت بيدها شال لبسته يلا راح على خالي وكاله ادخل
وكفت لخالي باس راسي وهو يتبارڪلي كعد بصف الحجيه عمته لسراج وسراج بصف امه
يسولفون والسوالف ما تخلى من شقى خالي عيوني على سراج انتبه عليَّ صافنه بوجهه ابتسم وبقت عينه عليَّ اعرف هاي الابتسامة مجاملة بس مضيعة احوالي ومخربطة دكات گلبي
لؤي:- جنت احسب الصفنات صفنه انت منهن لمن كطعت الياس صرت انت كلهن
استحيت يمه حبيبة خالي مفتش كلش سراج ضحك وكاله تعال نطلع للعالم
اخذه وراحوا بقيت جوه بعد الغدا صعدت جاي ابدل ودخل اعتذر وهو يدور وجهه، بسرعة لبست كتله كملت تقدم على الكنتور اخذ تراك اله كعدت على الجرباية عبالي يطلع للحمام خجلت ودرت وجهي كمل وراح طفى الضوه واجى تمدد بمكانه واني هم اريد انام همس بسم الله
نشغت بفزة من رفعني على جسمه يباوع بعيوني قلبني جوا نزل جبينه على جبيني يزفر النفس برجفه حسيت گلبي ذاب من حرارة انفاسنا
سحب النفس بصعوبة باوعت على وجهه مغمض عيونه عاقد حواجبه مبين عليه متشنج رفعت اديه لـ أكتافه فتح عيونه نزل ايده يفتح بحزام الروب بعده وهو يدخل ايده جوا ظهري
بسرعة طلع ايده دنك وجهه على المخده استهضمت من حركته مشمئز مني شنو؟ حسيت بالاهـانة نزلت اديه من اكتافه اباوع على السقف وهو بعده على وضعه
بسمه:- من رخصتك اريد اروح للحمام
ابتعد عني وهو يكعد وجهه على الكنتور وظهره عليَّ، نزلت من الجرباية اريد بس اطلع من الغرفة اختنكت حيل حتى نسيت استر نفسي فزيت من حضني من وراء مكتف اديه فوك صدري راسي جوه حنكه
سراج:- أعتــــذر
رفعت ايدي بعدت اديه عني واني ارجع على الكنتور اخذت ملابس ولبست عباية طلعت للحمام سبحت واني ابجي من خاطري كلت اصبر عليه بس والله صعبـة
رجعت للغـرفـة الحمد لله مالڪيته موجود احتاج ابقى وحدي اصفي راسي لليل وهو مـارجع نزلت تعشيت جوا ويا الحجيات البيت فرغ بس هن وتماضر وهم نومتهن وراحت لبيتها بقيت جوه منتظرته عبرت الوحدة ولهسـه مارد صعدت نمت كعدت على صلاة الفجر باوعت على مكانه فارغ
صليت ونزلت لكيته نايم على القنفة بالصالة باوعت على غرفة الحجيات جاي يصلن دخلت للمطبخ سويتلهن ريوك
نحضنت من وراء دنك وجهه باس كتفي
سراج:- صباح الخيــر
رديت عليه وابتعدت كتله اروح اشوف عماتي خلصن صلاة ما جاوبني بالليل هم سواها ونام جوه
ثالث يوم اجوا اخواني ونسوانهم وخالي حيدر وخالاتي وعمامي عازمهم على الغدا ماقصر بيض وجهي كبالهم وهم همين ماقصروا بالهداية
بالليل هم عبالي ينام بالصالة بس اجى للغرفة شافني بالدشداشة اريد انام بيها كال غيريها تقيدج
بسمه:- لا عريضه وارتاح بيها
باوع عليَّ ساڪت نطيته ظهري التجاهل يفيد وياك لو اني لو انت نشوف
ثواني ورفعني اله شهگت واني اصيح يمه حبيبه
ضحك وهو يكول شنوو عيدي شكلتي
ما حجيت اريد افتح اديه وهو مقيدني بكل حيله حتى رجليه قيد بيهن رجليه
باوعت بعيونه حجيت بهدوء
ـ سراج كسرت اضلا…
كتم صوتي بقبله تسارعت الانفاس من شدة التوتر ارتبكت الحركات وتداخلت النظرات في فوضى من المشاعر المتناقضة محبة تحاول أن تتمسك واحتياج ورغبة في الاقتراب
السرير بدا كساحة لفوضى المشاعر لا أحد ينتصر كل حركة كانت تحمل اعتراضاً وكل صمت يخفي كلاماً كانا يتجاذبان بين الغضب والعتاب بين الرغبة في الابتعاد والحاجة إلى البقاء حتى صار الصراع الحقيقي ليس بينهما بل داخل كل واحد منهما
وفي اللحظة التي ظنا أن المواجهة ستنتهي عاد الشد من جديد كان شيئا غير منطوق كان يقول لهما إن هذه المعركة لم تحسم بعد …
خمدت الفوضى وتراجعت حدة النظرات لم ينتصر احد ولم يهزم احد فقط انتهى الصراع وكل واحدٌ منهما يلتقط انفاسه ويستوعب ما حدث تحوّل الشد الى هدوء والغضب إلى ارتباك والارتباك إلى فهم صامت كانت نهاية المعركة بسيطة لا غالب ولا مغلوب فقط قلبان انهكهما الصراع واختارا أخيراً ان يهدأ ولم تعد بينهما تلك المسافة الثقيلة
حاولت اتنفس بشكل طبيعي بس من استرجع اللي صار بينا ترجع انفاسي تتخربط بلعت ريكي باوعت عليه بطرف عيني متمدد على ظهره صافن بالسكف عصر عيونه بين اصابعه رفع راسه التفت عليَّ ابتسم وهو ينزل راسه باسني بجبيني
سراج:- مبـارك
والله يجعل ايامنا ڪلها محبة وسڪينة
همست:- امين يا رب
غيرها ماڪدرت انطق من الخجل، دنك باسني بكتفي اخذ ملابسه وطلع للحمام بلعت ريكي متألمة نزلت من الجرباية بهدوء باوعت على النزلة غطيت وجهي مستحية بسرعة لميتها وفرشت جديدة اخذتها طلعتها لباب الحمام بعده يسبح
رجعت عطرت الغرفة وجهزت ملابس الي دخل وكف كبالي المراية يمشط مهووس بترتيب شعره منتبها عليه حتى قبل لا ينام يمشط شعره وشاربه
طلعت سبحت وغسلت النزله وياي اجى اخذها للسطح شرها واني دخلت جففت شعري على السريع مشطت ودخلت جوا الغطا بردت واحس اعظامي كلها متحركة من مكانها والالم موتني عيوني على الباب اغفي انتظرته يجي ما اجى غفيت واني بعدني انتظره الصبح لكيت نايم بمكانه على ظهره …
مر اسبوعين تعامله وياي كلش حلو ومحترم ويناديني ڪل بسومه وما يطلع اذا مايشوفني شنو محتاجه ويبلغني وين طالع بالليل اذا يشوفني مجهزة نفسي يتقرب احتياج وتسقيط واجب ماڪو حب حتى البوسة بس باول تقارب بعد ماڪررها واذا شافني ما متجهزة مايطلب مني بالعكس اشوفه يرتاح من حسيت هيج بعد ما جهزت نفسي
ادور على تلفوني ما ادري وين خليته دورت الغرفـة ماخليت مكان نزلت حتى غرفة الحجيات دورتها خطيه زعجت نومتهن طلعت للمطبخ واكف يسوي زلاطة هاي كل ليلة يسويها اول مرة شفته يسويها ردت اسويها اله كال احب اسويها بيدي يثرم الخضروات ويفرط عليهن رمان وطرشي
سراج
التفت عليَّ كال ها ابوية
ـ اشو انطيني تلفوك خلي اتصل على تلفوني
كال تعاي اخذي من جيبي
تقدمت طلعته من جيبه الرمز جان 2003620 كتله شنو هذا تاريخ
هز راسه اي وهو يكول تاريخ يوم مميز عندي
دخلت بالاسماء كتبت بسمه ماكو كتله مامسجل رقمي جا شلون اني ماحافظة بس بدايته
ـ مسجل بــاسم
ـ يابووية ياحبيبه
باااسم!
ضحك وهو يعوف السجينه كال حبيتها اكثر من يايمه
بقيت فاتحه حلكي عود صدك هيج مسميني باوعت على الرقم اي والله هاي بداية رقمي
اريد احجي وحط قطعه خيار بحلكي
كتله راح اغيره
اخذ التلفون كال اني اغيره غيره وشوفـه الي مكتوب (باسم حڪومه)
كال والله غير هيج تغير بعد ماڪو
ـ امري لله وياك حجي
اخذته منه اتصل على تلفوني دك فوك الثلاجة رحت جبته كتله اني هم ما اخلي اسمك
غيرته اسمه بتلفوني كتبت (حجي كشوم)
حط راسه يباوع ضحك بصوت عالي
مد اصابعه بطراف شفتي يعرض بيها بحركة الابتسامة ڪال
ـ اضحكي أبتسامتج دوة لخلگي
ـ ليش انت عندك خلك عبالي ميت
ـ شنو هاي اليوم متوليتني قصف ارض جو
كعدت اكل وياه عودني على هاي الزلاطة اذا مرات هو خفارة انزل اسويها اني وبنفس التوقيت اللي يسويها هو
سراج:- عڪبة ترحين لحفلة مهر مهند
ـ أي اروح
ـ محتاجة شي نطلع باجر
ـ لا شمحتاجه عندي ملابس هواي واختار منهن وببالي أصلاً الفستان
ابتسم كال اليوم واني اعلك دشداشتي بخانتج لان خانتي متروسه شفت فستان كلش حلو
ـ وينه شنو لونه؟
ـ من نصعد اشوفه الج
من صعدنا فتح الڪنتور وطلعه فستاني الماروني ابتسمت كتله والله على بالي من العصر البسه للحفلة
ابتسم وهو يرجعه كال حلو لعد متفقين بس ممنوع بدون عباية اطلعين
ـ هههه لا ماطلع بيه بدون عباية
ـ اي عبالي
ظل يباوع عليَّ تنهد وهو ينزل عيونه
تقدم خطوتين سد الفراغ اللي بينا بلعت ريڪي من نظراته رفع جف ايده حضن ركبتي باسني بكصتي وابتعد كال يلا انام
باوعت عليه بغضب يمشي للجرباية المكشم خربط انفاسي ووضعي على بوسه فوك الكصه
••----------- ♡♡♡♡ --------------••
نفــــــــــــــس
آدم يدخل يطلع يسال يمتى ترحين تسلمين وتباركين
احـاول كل مرة اجلها يوم باجر يوم عڪبه بس اريده ينسى هالمرة أبداً احتاريت بينه وبين أرغد اللي من يسمع يضوج اليـوم ڪله
آدم:- يمه ترى والله زحمة لا ابوي حضر من عزموه ولا انتي رحتي تباركتيلهم
حتى بجيتهم من الحج هيج سويتوا اريد افتهم شنو المانـــــع
نفس:- ماڪو مانع حبيبي بس تعرف ابوك ما عنده اختلاط واني هم مشغولة يومين واروح
آدم:- اليوم العصر نروح عليهم هي نص ساعة سلمي على امه وعمته وتباركي لزوجته يوم اني اعلمج الواجب!!!
باوعت على أرغــد اللي كعد بعصبيه وهو يحط رجل على رجل ويهز رجله بقوه مسوي نفسه مشغول بتلفونه
آدم:- بويه احجيلك ڪلمة
ترى عيب من عمي اني اقرب اله من الكل تالي محد من اهلي يروح يتبارڪلهم
عاف التلفون على القنفة باوع بخزره على آدم الي استغرب نظرة ابوه
آدم:- اعتذر اذا حجيت شي غلط؟
هز راسـه وهو يرد عليه
أرغد:- ها يابه ما سمعتك بالي بسالفة شنو حجيت
آدم:- أڪول حسوا بموقفي كبال عمي سراج محد منكم راح تبارڪلهم اريد امي اليوم تروح تقوم بالواجب وترجع كلها شغلة نص ساعة
أرغد:- اي عـــــادي
باوع عليَّ أرغد كال العصر روحي سلمي عليهم بس لا اطولون
أبتسم راح باس راس ابوه وطلع للاستقبال اريد احجي ودخلت عسل لعمها تريده يشرحلها مسألة بالفيزياء
بقيت اباوع عليه يشرح والعصبية واضحة عليه فهمها عليها اخذت كتابها ودفترها ورجعت لغرفتها
كعدت يمَه كتله لا تضغط على نفسك هيج ما اروح
ـ لا روحي ما اريد آدم يشك وتعرفينه اذا دخل الشك راسه يظل يدور بالموضوع
اخذ تلفونه وطلع العصر جاب آدم علبة شوكولاتة من هذا الزين اخذت قمر وياي قبل لا نصعد السيارة اتصل آدم على سراج بلغه بجيتنا
أرغد واڪف بالباب ويوصي بينا ما نتأخر وآدم يحاول يقنعه يجي ويانا يسلم
من وصلنا شفته واڪف بالباب باوعت على آدم مايعرف بحجم النـار اللي حطني بيها ابوه من جهه وسراج من جهه
نزل آدم سلم عليه واجى فتحلي الباب نزل قمر راحت على سراج تعودت عليه لان اخر فترة تطلع ويا اخوها شالها وهو يبوس خدها
نفس:- ألف مبارك الله يهنيكم ويسعدكم ويجمع بينكم دوم على الخير والمحبة ويرزقكم الذرية الصالحة اللي تفرّح قلوبكم وتملأ بيتكم ضحكة وبركة
ضام وجهه ورا راس قمر رد عليه بــ
ـ تسلمين عيناي فرحتي كملت بكلامج ودعواتج أم آدم
طلع وجهه من وراء راس قمر باوع عليَّ وبسرعة نزل عينه، آدم حط ايده ورا ظهري مشينا ورا فتح الباب ووكف على جهه مشيت بخطوات سريعة لباب الصالة
تلڪتني بسمه فدوة لعينها اشڪد نازڪة ومرتبه تاخذ العقل باوستها واني اتباركلها قدمت علبة شوكولاتة ودخلت سلمت على الحجيات ام سراج مثل كل مره تحضني وتشمني تكول اشم بيج ريحة تبارك هسه كعدت ودخلت تماضر نهضت سلمت عليها
كعدت وياهن سوالف نسيت نفسي آدم موصيني اتصل عليه من اريد اطلع
التفتت على تماضر تسال على ترتيل كتلها شيبت راس امها بالتجهيزات تريد ڪل شي على تخطيطها صحن الكيك اللي ياڪلون منه هي اختارته
ضحكت وهي تجاوبني كالت
تماضر:- تتواصي وياي حتى ملابس مهند هي اختارتها تتناسق ويا الوان بدلاتها يصور ويدز الي واني احوللها
تقربت عليَّ حجت بذاني
ـ جانت امنيتي حفلة مهر هيج لسراج وبسمه بس ما صارت يلا اعوض بحفلة مهند وترتيل
باوعت على بسمه كتلها آدم يكول المجمع فارغ بدونها
كالت بعدني ماحجيت ويا الحجي
دك التلفون بجنطتي كمشتها الي تماضر واني افتحها طلعت تلفوني ادم يتصل
ـ ها امي حبيبي
ـ الغالية شنو طابتلج الڪعدة ههه
ـ اي والله نسيت نفسي
ها اطلعلك
ـ لا اني طلعت عمي سراج ماقبل الا تتعشين عدهم واتصلت على ابوي بلغته
نقبض گلبي اريد احجي عليه ماڪدرت كبالهن
ـ لا حبيبي ارجع عليَّ ابوك عنده علاج وتعرفه ما ياخذ اذا ما اذڪره واوكف على راسه
ـ زحمة يوم وراء العشاء اجي اخذج
سديته بوجهه اتصل علي رفضته شلون هيج بدون ما يسألني
اتصلت على أرغـد ما جاوبني رجعت كررت الاتصال غلق تلفونه استغفرت واني ارجع التلفون لجنطتي اخخخ منك آدم
سمعت صوت سراج:- بسوومه وينج ابوية
راحتله بسرعه أبتسمت، شويه واجت قمر كعدت بحضني وبسمه وراها كعدت بمكانها
رتبوا العشا كبالي عيوني صارت على اضلاع مشوية لليوم محد غيره هو وتماضر يعرف هاي اڪلتي المفضلة باوعت على الزلاطة مثل ما احبها بالطرشي والرمان تنهدت اوف منك آدم رجعت اتصلت أرغد تلفونه مغلق
تعشيت وياهم متونسة على سوالف عمتهم دا اشرب جاي واجى استاذ آدم دخل جوا سلم عليهن كعد شوية يمهن طلع كبالي حطيت سبحة بسمه بيدها ترجع بيها عليَّ واني احلف ازعل منها طلعت ورا لازم ايد اخته ويسولف ويا سراج
فتحلي الباب صعدت كعدت قمر بحضني سلم واجى صعد من ابتعدنا عن بيتهم مديت ايدي سحبت اذانـــه
نفس:- أبـــــوك شنو وصاك
آدم:- أخذت الاذن منه
نفس:- واني هسه اريد اخذ هاي اذانك الصايرة ماتسمع الكلام
ضحك اخذ ايدي باسها كال فرحت من بقيتي يمهم غيرتي جوا على سوالفهن؟
ـ اي
لكيت ارغد بالبيت ما حجى شي بس واضح عليه الانزعاج صعد قبلي عفت قمر يم سمر وصعدت وراه كاعد بالكاع وكباله سجلات ادم يصفيله الحسابات
نفس:- ماشفته والله بس من دخلت ومن طلعت الرجال تزوج وراح تصير بينكم قرأبه وهو اقرب صديق لابنك هيج مواقف ولقاءات راح تتكرر هواي
حجى والغيرة مبينه بصوته
ـ اي تمام ماڪلت شي
هذا عزيز أبنج يدلل علينا
يحقلنا نحجي ونعترض لا مايحقلنا
سديت السجلات بعدتهن واني اكعد كباله يتجنب النظر بعيني
أرغد:- اريد اكملهن لآدم محتاجهن باجر
نفس:- وام آدم محتاجتك هسه شلون بهاي الحالة قرر منو الاكثر اهمية
اخذ نفس زفرة بهدوء باوع عليَّ رفعت ايدي حطيتها على صدره
سحبني لحضنه همس وهو ذايب
أرغد:- شنو محتاجة اني بخدمتها
يعيشان ذلك النوع من العشق الذي لا يحتاج لـ لمس كي يشعر به يكفي ان يقترب أحدهما من الاخر حتى تتبدل دقات القلب وتصبح النظرة الواحدة اصدق من ألف اعتراف
ابتسامة منه تكفي لتربك قلبها، وصوتها القادر على جعل كل شيء من حوله أقل أهمية العشق بينهما لم يكن مجرد رغبة في القرب بل مشاعر تربكهما بطريقة جميلة تسرق منطق التفكير ويترك مكانه ذلك الشعور الغريب بأن هذه اللحظة بالذات أهم من كل ما حولهما
راسي على كتفه ايده على راسي يرفع بخصلات شعري بشكل مستمر
رفعت وجهي بسته بخده همست هواي أحبك وهذا الحب متعبني أبتسم بغرور يحق له، ندار عليَّ حضني بكل قوته ضامني بين ضلوعه هذا جوابه اليَّ
•
•
•
دخلنا للقاعة كلنا اخذوا تلفوناتنا بس زمزم ترتيل وصتهن يدخل تلفونها مصورة العائلة هاي
كعدنا بجهه اهل البنية واقارب مهند بالجهه الثانية عيوني على زمزم تفتر تصور بكل التفاصيل والديڪور
يارب اكتبلي عمر واشوف يوم الها هي وآدم عيوني عليها قبل جنت اشوفها بنتي هسه نظرتي اختلفت اشوفها بنتي وجنتي بنفس الوقت
تماضر تفتر بفرحة على الطرفين اللي يشوف فرحتها يكول امه الحقيقية مو زوجت أبوه
بنات عمامه واكفات يركصن انتبهت على البنات ديسولفن
اثيلة:- حيل متعبني هالحمل وخايفه توم
درة:- لا اثيله كلش مو وقتج والله لؤي يطين عيشتي
سمر:- والمعطب شدخله؟
درة:- راح يتخبل من يسمع
ضحكتنا من قلدت صوته وكلامه
درة:- ولج شني فرقج عن بنات عمج ما تخلفين انكريز عاد خلفيهم دبل
اجت زمزم بتجاهنا واثيله كالت اسكتن لا تسمع ضحكنا على خوفها من زمزم
سمر:- دحكن اجت بسمه تبارك الرحمن حليانة اڪثر
التفتنا على الباب دخلت بحضور جميل فستان انيق فاخر بلون الاحمر العنابي (برغندي) يتميز بقصة طويلة مجسمة على طراز حورية البحر
بياقة عالية واكمان طويلة مما يعطي طابع ملكي محتشم القسم الامامي من الفستان مغطى كله بأحجار براقة كثيفة من الخرز والفصوص اللامعة بلون جميل يبرز الخصر بحزام رفيع مُكسر يلحق بالفستان من الخلف ذيل اشبه بالرداء الطويل بقماش حريري ناعم ولامع ينساب بسلاسة من الخصر للاسفل يمنح الفستان حجم اضافية وحركة فخمة اثناء المشي
دارت على الڪل سلمت وتماضر وياها تعرفها عليهن اجت سلمت علينا
درة:- شطالعه خطفتي الانظار
أبتسمت كالت هسه وين اكعد بيا طرف سألت سراج كال حطي كرسي بالوسط بين الطرفين وكعدي
سحبتها سمر كالتلها تعالي اكعدي بطرفنا ما صار اسبوعين من تزوجتي ابنهم بعدج النا ترى
ضحكت وهي تكعد دك تلفونها اباوع على دره عيونها على الشاشه وتضحك
بسمه:- ها حجي
اي دخلت
دار وجهه قليل وهي تنزل راسها وتحجي بهدوء
بسمه:- تمـام سراج
اي البسها من يدخل سراج ترى اعرف ما يحتاج تعلمني
سمر:- شعجب دخلتي تلفونج
بعدهي ما مجاوبه واجت البنية المسؤولة اخذت التلفون
درة:- شبيه سووراج
بسمه:- يكول من يدخل مهند البسي عباتج
سمر:- فستانج مستور
اجت تماضر تحجي ويا بسمه باوعت سمر على عباتي قربت راسها تحجي بذاني
سمر:- هذا بس لا يريدها تشبهج ويشوفج بيها ولا احبه هين واكف بوسط بلعومي لا يصعد ولا ينزل
خزرتها سدت حلكها بجف ايدها حجيت بذانها
نفس:- ما عنده هيج شي واضح يغار عليها
اجت عسل ضايجة سحبت الكرسي وكعدت بصف امها لازمه ايدها والانزعاج واضح عليها زمزم واكفة وراي مقدمة التلفون كبالي تصور سيلفي اني وياها وتفتر تصور ويا الكل
سمر:- ها ماما شبيج
عسل:- هذا المنفوخ يسمعني حجي يتحرش يكولي شنو هالعسل الذايب عندي هبوط بالسكر يمتى يومنا اني وياج وتعدلين السكري
شهكت سمر وهي تكلها منو ولج
ما انتظرت تسمع اخذتها وطلعت نريد نلزمها مالحكنا وزمزم وراها وهي تغني صارت عركة بصراوية بين الديج والواوية
امها حاولت تلزمها ماكدرت سحبت ايدها ووراهن تريد تعارك هم لبست عباتي كتلهن لا اطلعن هسه اجيبهن واجي طلعت بسرعة اريد اكمشها
لكيت عسل واكفة وراء الباب تباوع وزمزم واكفه تباوع بين علي المدنك راسه بخجل وسمر اللي ترزل بيه
سمر:- جان استحيت رجال شطولك وشعرضك تصجم بطفلة اذا هذا انت الدكتور المثقف هيج عجل شبقيت لغيرك
لزمتها من ايدها صايره نار تريد تاكله باوعت عليه بعتب حجى وياي
علي:- عمه اعتذر ماحجيت شي يستوجب هالحجي
سمر:- كل هذا الحجي وما حجيت شي
شاف عسل تباوع بخوف من وراء الباب دار وجهه يخفي ابتسامته وسمر تحجي
سمر:- احجي لآدم وهو يعرف شنو يحجي وياك
ما خليت اعتبار لعرضه لو هاي اختك تقبل صديقك هيج يحجي وياها
ندار علينا مزعوج كال
ـ رجاء الا صداقتي ويا آدم وعلى كلامي ويا بنتج اعتذر وزلة لسان ما تتكرر بعد
باوع عليَّ كتله يمي ماما ماعليك روح هسه
مشي وسمر تحجي وراء ماخلت عليه وزمزم تزيدها نار رجعنا على عسل كالتلها شلون شافج
عسل:- طلعت من الحمامات وهو صار كبالي يريد يدخل لهاي الغرفة بيده ملابس اخوه ومن شافني هيج حجى
أبتسمت على رجفتها خجل وخوف وسمر وجهها احتقن من العصبية كالت اخذ بنتي وارجع اني لا حفلة ولا بطيخ
لزمتها احجي وياها
ـ وتعوفين حفلة بنت اخوج لا تكبرينها وتصير مشكلة اني باجر اتصل عليه واحجي وياه بعد ما يتعرضلها وين مايشوفها يدور وجهه يبتعد
زمزم:-اي صدك لا تكبريها ترى علاوي حباب وفقير هو يحب يشاقى
اخذت عسل من ايدها ودخلت واحنا وراها كرصة زمزم من ايدها اريدها تسكت تضحك عليهن
كعدت سألن البنات كتلهن سوء فهم ماڪو شي عيوني على سمر ضايجه ما حجت بعد حتى من يسولفن وياها تخلصها امم و اي وعيونها كل شوية تصفن بنظراتها على عسل اللي رجعت طبيعيه تسولف وتضحك ويا ڪوثر
اجت لتين والحجية كالن كملوا العقد القاعة نترست بالهلاهل من وصلوا رتبوا البنات المسؤولات لدخوليتهم
عيونا صارت على الباب منتظرين ينفتح ويدخلون القاعة ضلمة صار الضوء على الباب نفتح ودخلوا يمشون بهدوء حطيت ايدي على خدي اتأمل جمالهم فدوة ياخذون العقل لابسه قفطان ابيض اللي عقدت بيه وهو قاط بلون جوزري
وصلوا للوسط وكفوا يرقصون عيوني على زمزم رافعه تلفونها تصور باوعت على سمر تباوع عليهم مبتسمه الحمد لله فكتها
اشتغلت الاضاءه كعدوا على الكوشه تماضر راحتلهم هي ولتين ساعدوهم بتلبيس الحلقات والذهب عيوني على مهند فرق بين العقدين فرق واسع الفرحة مبينه عليه والضحكة ما اختفت من وجهه المصورات يصورن بيهم وزمزم وياهن
اجت لتين كعدت يمنا وتماضر واكفة على المنصة تهلهل ورافعه طرف الكمام مال فستانها تهوس بيه
طلع مهند والبنات كلها كامت تركص على الاغاني والجهال وياهن شوية وطلعوا ترتيل وهم سوولهم دخوليه ثانية لابسه هي بدلة بارزتها اكثر جنها لعابه وشعرها باقي على طوله مجرد برم الاطراف ولابسه تاج كرستال ومهند لابس قاط متناسق ويا لون بدلتها وكفوا يركصون وطولوا هالمرة اباوع الكل ذايب وياهم وسمر كل شوية وكالت للتين بنتج اذا نسألها منو امج تكول منو ما اعرفها
نسى نفسه دنك باسها والهلاهل صارت تركع استحت وهي تضم وجهها وهو هم مستحي وتماضر تهوس فوك منهم
ـ حبها حبها ولاتخاف من امها حبها حبها
سمر تضحك وتحجي ويانا صوتها بس احنا نسمعه
ـ هي نست امها ونستنا ول عمه ترتيل تعرفينا لا
اشتغلت الاضاءه جابوا الكيكه الهم قطعوها وواحد يوكل الثاني وعصير هم واحد يشرب الثاني سوولنا عرض ازياء كل فقرة يرحون يغيرون ملابسهم اخر استايل هو لابس زي عربي بس ما شاء الله عليه الله يحفظه من العين
لتين تباوع على ترتيل وعيونها مدمعة كتلها حلوة حفلتهم تستاهل التعب اللي تعبتي
مسحت على جف ايدي
لتين:- اطلع الروح يلا تقتنع ما اعرف لمنو طالعة هيج صعبه
والبارحة نكسر الصحن شسوت بيه شلعتها لروحي ومن الصبح اخذت يمان ورحت جبتلها نفس الصحن ونفس لونه
ابتسمت باوعت عليهم كاعدين على الڪوشة يسولفون بيناتهم عيونه ماشالها عنها وهي تباوع علينا وترجع تباوع عليه بخجل واضح
تعشينا بالقاعة خطيه تماضر ولا كعدت تفتر بين الطاولات
••------------ ♡♡♡♡ -------------••
لــــــــــــــــــؤي
ڪاعدين بمكتب آدم يتناقشون ويا الدكتورة على قسم التجميل راح ينفتح فوك بعد ما اتفقوا آدم وصلها واني ڪاعد اشرب جاي وبـالي ويا الدفتر ڪاتلني الفضول اريد ارجع اقراه واعرف شصار
سراج:- هلا باسم
ها ضلعي شلونك
باوعت عليه يحجي بالتلفون ابتسم يستمع لباسم ما اعرفه منين اول مرة اسمع هالاسم على لسانه
ـ كملت لو بعدهي؟
باوع على ساعة ايده وهو يكمل الحجي
ـ ها مو تاخرتوا الساعة ب8
ها لعد الف عافيه
باوع عليَّ دار وجهه صفح يحجي بهمس
سراج:- اطلالتك بعدهي براسي والله
لا القالب غالب
والحلو حلو
والله احجي الصدك شبيك ما فاركت عيني
دخل آدم واني اباوع على سراج عاقد حاجبي تفكيري شطح شنو اطلالتك شنو حلو شنو الزلمة تزوج وانحرف استغفرت ربي لا هذا مو سراج أخوي وصويحبي
سراج:- ماكدر احجي هسه يمي آدم ولؤي
تمام من اجي ارجعكم اشوف اذا كدرنا نطلع
آدم باوع عليَّ سالني شبيك صوفرت عمي واني اذاني لسراج ما سمعت شنو حجى اخر شي بس الضحكة اسمعها وكلمة تدلل ابويه
عفت الجاي وكمت عليه بهمه سحبت التلفون صدك واحد اسمه باسم حكومه حطيته على اذاني هذا صوت بسمه
كفخني وهو يسحب التلفوني سد الاتصال ويحجي بعصبية
ـ شبيك لؤي تقبلها لو اجي اسحب التلفون منك وانت تحجي ويا زوجتك
كعدت على الكرسي مهدود حيلي نعلله عليك وعلى مرتك اشرت لادم ينطيني ماي
لؤي:- اسحب التلفون راضي بس وخر عني الله لا ينطيكم ساعة السودة الناسبتكم بيها
ولك شنو باسم شنو طلالتك شنو حلو تاء التأنيث بشنووو مقصرة وياك ولك كلت الزلمة شماله استهتر من تالي الله يلعن الشيطان
آدم نطاني ماي وهو يجاوب بمكان سراج اللي ڪعد على الكرسي مزعوج ويكتب بالتلفون
ـ ترى واضح يحجي ويا زوجته بس انت عمي تفكيرك دومه بعيد ما انسى سالفتك على السلحفاة
باوع عليه سراج ويحجي
سراج:- لؤي بعد لا تعيدها اي خالها انت بس احترم الخصوصية بيني وبينها يا أخي
لؤي:- ولك أرعن ياخصوصية جا المن كاعد تحجي وياها كبالي
ضحك وهو يشمر التلفون على المكتب
سراج:- انت لزڪة ماعندك احساس من سمعتني احجي وياها جان استحيت وطلعت
لؤي: واني شعرفني وياها احد كالك ڪبل نسميها باسم
اخذ القلم شمرة عليَّ باوعت عليه تنهد نسى وجودنا صافن كباله
سراج:- لؤي جاي اظلمها هواي
احاول اغطي شي على شي بس ماكو فائدة
لؤي:- كل هالغزل والمدح وجاي تظلمها ولك صارلي اشكد من ازوجت أم علي وما مسمعها هيج حجي
اشر على گلبه بصابعه
سراج:- بس حجي لسان ما طالع منا
لؤي:- اليوم من اللسان وباجر من الگلب، وبعدين مو خصوصية المن تحجيهن اليَّ
أبتسم رجع راسه على الڪرسي يحجي وحده
ـ يا خصوصية ردت اقنع هالگلب اني متزوج حالي حالڪم
بعد شهر تقريباً من هذا ڪلامنا جنت ملتهي بطلايب آصف واخو مجد واجت عليَّ بسمه المكطعة وجهها من البجي
بسمة:- خالي اخذني لاهلي ماريده بعد خلي يطلڪني