رواية سجين الحب الفصل السادس عشر16بقلم زهراء الحريري

ســــــــــراج

شفتِ ڪيف الورد يزهر في الربيـع

ڪأنها لحظة دخـــــولكِ حياتي 

بــسمه الحڪومة

‏وفي قلبي أنت المستثنى وأنت الذي لايشبك أحد 

 ••------------ ♡♡♡♡ -------------••

تماضــــــــــــــــــر 

لازمها من زندها ساحبها عليه ويحجي بعصبية يحاول يكمش نفسه لا يأذيها وهي مبين عليها دايخة 

سراج:- اني مو ملاك بس عندي حدود وعنــدي رب اخافـه وصراعي وي الماضي احاربه بداخلي ما أعيشه وياج وأخليج بديلة مثل ماتكولين ولا ظل لغـيرج ولا لحظة مرت عشتها وياج وتخيلتج 

سڪت وهو يستغفـر  كالها 

ـ عايش الواقـع وياج ڪل شي اسويه اسوي الج والڪاظم الج انتي وبس

عيونها تصب تباوع عليه بضعف والغيره عاميتها 

سراج:- حقج تغارين وتسألين وكل شي من حقج ما الومج رغم خليتج على بينـة هم اكول حقج هذا شي مو بيدج

حجى بصياح بناتي خافن منه هاي اول مرة يشوفن خالهن هيج عصبي 

ـ بس توصلينها لدرجة تشكـين برجولتي واخلاقي هاي مو غيرة بسمه مو غيرررة هاي اهانة الـي  كلامج هذا طلعني واحد بلا شـرف مجرد تفكيرج اني هيج اهانة الي 

شنو تردين تعرفين تجين تحجين وياي ونتفاهم واذا اني غلطان نبهيني 

ما طالب منح غير الأحترام مثل ما اعاملج

مو زغار احنا عبالج هينه عليه من ضربتج بهاي مدت ايدي عليج قللت من نفسي 

سحبت ايدها منه عيونه على خدها 

صعدت فوك اجى يصعد وراها ورجع كعد على القنفة شامر ايده بتعب على المسند ويده الثانيه يعصر بجبينه 

امي وعمتي يحجن وياه وهو ساڪت بعده ما ارتاح وتلڪته المشاكل اويلي على حظك، نزل ايده على المسند الثاني انتبهت لابس الحلقة قبض جفوف اديه يضرب بيهم على المساند بخفه واستمرار عيونه كل شويه تباوع على الدرج 

سراج:- تماضــر اصعدي احجي وياه وعقليها وامي اني اخذها 

عيوني صارت على الدرج نزلت لابسه صايـة ولافه شالها وبيدها تلفونها وجنطة ملابس صغيرة والعيون تصب التفت على الدرج من شافها عقد حواجبه، وكفت بدون ما تباوع عليه كالت اريد اروح لبيت خالي 

بقى ساڪت ما حجى، عمتي حجت وياها وامي هم كسرن خاطري عوزهن يتوسلنها حتى تبقى امي حتى دموعها نزلت وهي تحجي بيناتهم تريد سراج يوكفها

تماضر:- العني الشيطان بسومه هاي انتي العاقلة الزعل مو الج حقج هسه منفعلة تعالي نصعد والله بعد ساعة تهدين راح تشوفين ماڪو شي يستوجب الزعل بينكم والله لا يجيبه

ام سراج:- يوم سراج حجيلك ڪلمة وياها وطيب خاطرها 

وعمتي تكوله لا تخلي مريتك تطلع زعلانه من بيتك، كوم راضيها لا تكبرون السالفة اثنينكم غلطانين وعايلين

بعده يباوع عليها مسح اطراف شفته بقبضة ايده

سراج:- مادام هيج تريد عوفنها خلي تروح

جاوبته بدون ما تباوع عليه 

ـ اي طبعاً ما فارقـــه عندك

ـ فارقة عندي اكثر مما تتصورين بس بعد الحجي اللي سمعته منج اني هم ما اريدج تبقين 

باوعت عليه والدموع تجري بغزارة عيونه عليها اني عفت مشكلتهم وجلبت بنظراتهم خاصة نظرته الها والله عقلي صار يألف بسيناريو احسه يريد يكوم وياخذها لحضنه وهسه يراضيها ويعتذر على الڪف وعاشوا عيشة سعيدة هذا مهند وترتيل مأثرين عليَّ بسوالفهم 

تنهد وهو يكوم تقدم عليها عبالي راح يحقق السيناريو اللي كتبته براسي  ويراضيها تالي اخذ الجنطة وطلع كبالها حاولنا وياها بدون فايدة قفلت الا تروح باست راس امي وراس عمتي تتعذر منهن وطلعت وراه 

«بـــــــــــــسمه» 

لكيته صاعد وفاتح الباب الي صعدت سديته بهدوء كال بعده مفتوح  فتحته وسديته وهم ما نسد 

ـ ابوية ايدج ميته شنو  

فتحته وطبڪته حيل ما حجى شي والحسين لو خالي جا حطني جوا التاير، ظليت دايرة وجهي على الجام دموعي تنزل بسكته تمنيت الدرب ينطوي وانزل بسرعة 

صوت المحرك يكسر الصمت اللي بينا 

دقائق ووصلنا لبيت خالي باوعت عليه يباوع كباله بجمود واديه بعدها على الستيرن مديت ايدي اخذت جنطتي ونزلت

دكيت الباب بدون ما التفت عليه سمعت صوت درة تسال منو كتلها اني بسمه ردت بهلا قبل لا تفتح الباب دخلت واني التفت عليه شفت سيارته تحركت، باوستني وهي تهلي بيه من شافت وجهي سكتت 

درة:- اسم الله شبيج بسووومه 

عليش هيج تبجين! 

ڪتلها اني وسراج سألتها واني امسح بعيوني

بسمه:- خالي هنا

درة:- اي ديسبح

حطت ايدها على ظهري وهي دكول تفضلي جوه لا تبقين واڪفة

كعدت جوة جابت لي ماي شربته بلكي النار البصدري تطفى 

درة:- شصاير وياڪم ؟ 

طلع خالي من الحمام وهو يغني ربيتك زغيرون حسن من شافني كال 

ـ ولك هلا باسم حڪومة اليوم زلمتج راجع شعدج عدنه

تقدم يريد يسلم عليه تغيرت نبرتـه 

ـ شبيج خالي! سراج صاير عليه شي

بسمة:- خـالي اخذني لاهلي

سحب الخاولي من كتفه كال شني خالي 

ـ ما اريده بعد خلي يطلڪني

ـ ليش هو لبسه وما تردينه شنو هالحجي اشوه اكعدي احجيلي شصاير 

حجيتله من لحظـة سمعتهم لهاي اللحظة خزرني على ڪلامي ويا سراج

»« درة»«

ادحك عليها خطيه نار صـايرة تحجي بين الخنكة والبجي لؤي صار عصبي بسبب كلامها 

لؤي:- هالحجي ما ينڪال لسراج غلطج جبير خالي ڪلش جبير شلون هيج تحجين ووياه وڪبال اخته والحجيات اذا انتي حديثة عهد على اخلاقه ترى اني وياه عشرة عمر مايوم طلعت من الموزينه ولا مشى بدروب الحرام تجين انتي اطلعينه قليل شرف يتخيل اعراض الناس بيج شنو هالحجي خالي ازغيرة انتي واكول ماتعرف هاي انتي الراڪزة افاا عليج 

بسمه:- شمنتظر مني واني عرفت منو يحب

ـ هي أو غيــــرها شنوووو الي مختلف انه حجيتلج كل شي عنـه وكتلج بعده يحبها والقرار الج جبرتج عليه لو حاولت وياج وقنعتج 

غير انتي رضيتي بيـه

ـ يفرق خالي يفرق 

ضربت على رجليها احس الحرگة والغيرة ذابحتها 

ـ عبالي وحده بعيده تالي تطلع نفس 

و ابنها طول الوكت وياه ويشوفه ابنه لو كايل اللي يحبها نفس وهيج قريبة الهم والله ما أفڪر ولا اوافق 

ـ ونفس بحالكم انتي وياه المرة رجلها يدنك يبوس التراب التمشي عليه لا تشوفج ولا تشوف زلمتج لا تذكرررين اسمها بينكم وابنها مو بس سراج يعزه ويحبه كلنا عزيز علينا بسمه اياج تسمعين الولد حجياه ترة ما تخربين الا على نفسج وطيحين من عيون الڪل

ـ لااااا مختلف ويفررق هواي

شما احجي ما راح تحس بنار گلبي اني ما اڪدر والله اموت من الشـك والمقارنـــة والغيرة خلي يطلڪني وهيج نرتاح اثنينا

ـ طلاك ماكو تكعدين هنا علما تهدين وترجعين لبيتج وزلمتج لا ادفرين نعمتج برجلج شايلج بعيونه وما مقصر عليج ويمتى ما سألته عليج يحمد بيج ويحمد الله على دخلتج لحياته شنووو تردين بعد هي المرة شتريد اكثر من الاحترام والاهتمام وسراج موفرهن اثنينهن الج وزود

كام من مكانه دخل للغرفة شوية وطلع مغير ملابسه راح واني تقربت منها احجي وياها بس كل كلامي يوكع بصفها ما يفيد ولا يبرد نار الغيرة ولا تكدر تعبـر بالحجي عن اللي بداخلها تتلخبط بافڪارها

دحكت عليَّ كالت لازمتني الدوخة اريد انــــام احـــس راسي يريد يطك

رحت فرشتلها فراش بالغرفـة خطيه نامت، لليل لؤي اجى سألني عليها كتله وراك مباشرة نامت 

سالته هم حجيت ويا سراج؟ 

كال لا بعد كلامها وياه حتى استحي اشوفه وجهي مالي عين اطلع ڪباله 

دخلت كعدتها تا تتعشى ماقبلت كالت ما اشتهي من اجوع اڪعد اكل

تمـــــــــــــــــاضر

رجعت امي للبيت لڪيته ڪاعد بالصالة وبنفس ملابسه الي اجى بيها التعب واضح على ملامحه نمرد گلبي عليه ماصدڪنا لكى راحته صار بخاطري منها شلون هيج تجذب عليه وتسحب لساني

عمتي ڪاعدة ڪباله تفر بخرز سبحتها وساڪتة مبين عليها تعبت من الحجي وياه

تماضر:- خلي نروح وراها وطيب خاطرها ورجعها لا تخليها تظل زعلانـة الليلة

سراج:- لا محد يروح وراها

تماضر:- ليش لا 

صح ڪلامها جبير بحقك بس الغيرة تموت شنو منتظر منها بعد ما عرفت ڪل هالتفاصيل اعذرها بس تهدأ تعرف غلطها 

ام سراج:- يلا يمه لا تردني خلي نروح وراها نرجعها خليها تعرف معزتها عندك

نهض باسها براسها كال ما عاش اللي يردج بس اني اريدها ترتاح وتصفي بالها وتهدأ وعڪبة اروح اجيبها 

ما صـعد الغرفته طلع من البيت، سويتلهن عشاء وعزلتله اخذت البنات ورحت لبيتي بقيت بس نونه يمهن باجر دوامها عصري …

  ••----------- ♡♡♡♡ ------------••

 بســــــــــــــمه 

روحي تكلب والدوخة لازمتني كوة شلت راسي من المخده شفت تلفوني ادور بالشعارات لا رسالة ولا مكالمـة منه

طلعت من الغرفة ابتسمت رغم اللي بيه على صوت خالي يغني

ـ ارنب ارنب ارنوبي

ليش تفتش بجيوبي

مو انطبتك جزراية

ليش تركض وراية

وصوت ضحكات درة ، دخلت للمطبخ اريد اكل شي احس روحي مبهوته حميت العشا استورحت ريحته واحس روحي لاڪته ونسدت نفسي ماكدرت اڪله عبالي من القهر اللي بيه حتى الماي روحي تلاڪيه 

طلعت للطارمة لعبانة نفسي كلش اريد اشتم الهوا كعدت على المرجوحه بكل صفناتي موجود مسحت دموعي كل اللي جنت عايشته مو الي الها والله لو باقي بارد وياي أهون عليَّ احس روحي طحت على وجهي بعد ڪل ذاك العز والدلال الغيرة تطحن بيه على كد اهتمامه بيه صرت ڪل متملڪه

سحبت شعري اباوع على لونه حتى هاللون الها اڪيد من القهر اللي بيه اريد احضن نفسي وواسيها ياريتني ماعرفتها منو 

رفعت عيني لظلام السما اذكر اول شوفتي الـه جانت بفاتحة جدي الله يرحمه بوكتها خالي تخربط جنت ارتب بالحوش من دخلوا اذكر جني هسه اشوفه كبالي كعدوا على كبال شباج الديوانيه على  الكراسي الجهال جايبينها من الجادر خالي لاف وجهه بالجماغ وهو كاعد كباله يصبر عليه وكل شويه بايسه براسه حسيت بحجم حنيته 

التفت يريد يصيح على واحد من الجهال شافني واكفه منكبه بس عيوني طالعه وصافنه عليهم بساع نزل راسه

سراج:- خوية بلا امر عليج اريد حبوب راس

كتله صار رحت ادورله على حبوب كطعت نفسي يلا لڪيت اخذتها اله استغرب جايبتهن اله بنفسي اخذهن مني انطى لخالي حباية والباقي ضمه بجيبه

سراج:- سويله شي يأڪله صارله يومين على لحم بطنه

خالي شافني كال لا خالي بسمه ماريد شي 

سراج:- خليها تسويلك شي تسند روحك بيه 

روحي خوية سويله ماعليج بحجيه

جاي يطبخن دجاج حتى يشونه على العشاء اللي ماياكل لحم ياكل منه طلعت نص شويتها بالطباخ ودرت على النسوان جاي يخبزن اخذت منهن كم رغيف رتبتله صينية وخضرة اخذت من البادية شلت الصينية وطلعت الهم بعدهم كاعدين كام من مكانه اخذها من ايدي وعينه أبداً مارفعها اباوع عليه لابس دشداشه سودة ولاف الجماغ على امتونه بارز بياض رگبته وجفوف اديه تلمع يمكن اربعه وعشرين ساعة يجلف بيهن

دخلت جوا اباوع عليهم من شباج الديوانيه خالي مايرضى ياكل وهو  يجبر بيه وعبالك ابنـه كباله مو زلمه مشورب يسويله لفات ويحجي عليه 

سألت وحده من خالاتي كتلها منو هذا الرجال 

باوعت عليه من الشباج كالت هذا سراج اخو المرحومة مرت لؤي رجعت على النسوان واني ماڪدرت اتحرك مدري شجاني ظليت مفهيـة عليه وبين انقباض گلبي وانبساطه الم خفيف وحلو ظليت واڪفة خلاي يكوم يغسل وطلع دقائق ورجع بيده استكان جاي انطاه اله شربه خالي وهو واڪف والابيضاني يحجي بالتلفون شويه وانطاه لخالي هم حجى بالتلفون وسراج شرب الجاي الباقي بالاستكان صارت عيونه على الشباج بسرعة سديت البردة فلك طرني هسه يكول شبيها هالبت تبوهز 

وثـاني شوفتي اله بأستشهاد أخوالي ماعاف خالي حيدر أبداً سد مڪان خالي لؤي ووڪف ذيج الوڪفة اللي لهسه يحمدون بيها، وڪل فترة يجي على حبوبتي وبالاربعين هو وياهم يرڪض لڪل شي قبل خالي حيدر وولد عمامهم جنـه واحد منهم وبيهم

وراء اربعين خوالي تمرضت امي ماخلينا عليها لا الشطرة ولا الناصرية  كل فترة ناخذها لدكتور يوصفونه النا تالي حـولوها لبغداد رحت وياها وهناك شفتـه من أجى علينا حظي المگير ما اشوفه بس بالمصايب 

كعدنا عدهم ڪم يوم، سحل گلبي بلهجته البغدادية كل مرة اشوفه احسه يلمع من النظافة اشوف الزلم مرات رجليهم تصير خشنه هو جنهن زبد، والله طحت على وجهي ذيج الطيحه سكن بالي ما فارگني بعد روحي صارت بيه 

كبل لا نرجع تصرفت بندفاع وغباء مدري شجاني وكتها ومنين جبت هالجرئة واعترفتله احبـــه يمكن خفت يزوج ردته يحس بيه احبه عبالي بهاي السهولة راح يحبني 

سراج:- راح اعتبر نفسي ما سمعت شنو حجيتي وهالموقف بينا ينتهي هنا انتي تنسينه واني هم انساه، والله يوفقج خوووية ويا اللي يسعدج 

حسيت اخذت راشدي منه على وجهي من الفشلة اللي حسيت بيها اشهر اني كارهه نفسي وكارهته وڪرهت الساعة الـ حبيته بيها، الموقف الحطيت روحي بيه سلب النوم من عيني تمنيت نفسي ميته ولا متصرفة برعونيه شكالتلي روحي وكتها من وكفت كباله وكتله احبك والله من الحمسه تمنيت اطلع گلبي واعضه 

بعرس خالي حاولت شما اڪدر ما اتصادف وياه من صعد حتى يجهز خالي ضميت روحي لحد ما سمعت طلعوا يلا طلعت ومن خالي اخـذ درة  صعد هالمسلول يرمي وهو يباوع على البيت صارت عيونه عليَّ باوع على ملابسي ونزل عينه 

تنهدت والغصة حشرت بنص صدري طـرته طر، لو باقيه هيج احبك من بعيد ولا هالنار التحرك بأفادي بقربك 

هسه شجاي يسوي نام لو بعده باوعت على الوقت السـاعة عبرت الـ 4 الفجر أڪيد نام عضيت شفتي بقهر من تذڪرت لهفته وهو يفتحلي اديـه الله يلعن الحب وسنينه

دزيت رساله لترتيل كتلها لا تمرون عليه ما اداوم، الصبح خالي حجى وياي حتى ارجع كتله ما ارجع واخابر عدنان يجي ياخذني بعد مالي رده لسراج

لؤي:- لا تكبرينها خالي وراح احجي لمصلحتج ترى محد يطلع من هالزواج خسران غيرج تردين لاهلج ولنفس الطاسة والحمام

وتظلين تتحسفين العز والدلال العشتيه وياه

بسمه:- اهون عليَّ من ظلتي وياه وهو يشوفها بيه ما اريد لا عز ولا دلال واني احس نفسي ظل لغيري اغم هيج عـز 

لؤي:- هم ردينا لنفس السالفة لا تملن ولا تجلن بابا شنو يشوفها بيج الا اڪلج ماراح توصلين مكانتها عنده لا انتي ولا ميـه منج تڪدر تنسي حبها جان يسميها عضيدي ليش تخليني احجي والحجي يغثج يا خالي حطي عقلج براسج حتى ما تتندمين بعدين ترى زلمتج مايتعوض والله لو تلفين الڪون ماتلڪين هيج واحد يحترم ويقدر مثله 

عافني وطلع استهضمت مدري شمالني احس نفسيتي متغيرة وصايرة كلش ما اتحمل واتحسس من ابسط ڪلمة واني مو هيج طبعي معروف عني قالب ثلج ما اتأثر واللي يسمعني ڪلمة اغثـه بسڪوتي اشڪد جانن جناينا يسمني البايرة لان هن مسويات انجاز عظيم ومزوجات بسن الـ 14 و الـ 16 اظل اضحك عليهن 

وڪدرت اثبت نفسي واثبتلهن حجي البنت بس للبيت مو صحيح مـن حصلت شهادتي اللي بعد تواسيل وتوسيط خـالي لؤي يلا ڪدرنا نقنعهم يخلوني ارد وامتحن خارجي ومن توظفت  بالمستشفى هالسنة الوحدة اشڪال الحجي اسمع منهن ولا اعبـرهن بڪلمة برودي يستفزهن مادام اعرف نفسي شنو وما عاصيـة ربي مستحيل ابرر لڪلام يطلع عليَّ من وادم كاتلتها الغيــرة والحسـد

  ••---------- ♡♡♡♡ ------------••

نفــــــــــــــــس

هي شهڪة هي فـزة من النوم تلمست جسمي اتفقد ملابسي واني اتنفس سريع تعبت من مقاومتي وصياح بالحلم اللي اشبه بالواقع والتعب دا احس بيه حتى صوتي اختفى 

رفعت ايدي امسح برقبتي عرڪانه ومخنوكة دموعي تنزل بحرارة 

باوعت على مكان ارغد اريد يلمني بحضنه ما موجود رفعت الغطا لجسمي رغم لابسه ملابس بس احس نفسي مكشفه الغرفة هدوء مابيها صوت بس يتخيلي صوت انفاسـه وضحكته وهو يڪول صحيت يحلو خلينا نعيد التجربة وصوت السلاسل المقيدة أرغــــد رجع عليَّ ابشـع يوم عشتـه مديت ايدي على مكان ارغد اريد احس بالامــان 

نفتح الباب تسلل الضوء منه دخل ارغد رفعت جسمي ماكدرت احجي بس رفعتله ايدي اجى بسرعه كعد كبالي وهو يحضني

أرغد:- اغاتي نفس

دكتورتي هذا اني يمج

حضنته أبجي لفني بين اديه بقوة سألني هم رجعتي تحلمتي 

هزيت راسي اي اسمع صوت انفاسه حضني اقوى ڪال حلم وهذا اني يمج اخذ جف ايدي رفعه لوجهه حتى اصـدك وجوده

نفس:- اريد اسبح احس لمساته على جسمي گلبي راح يوڪف أرغد 

حسيت برجفته عصرني بحضنه واسمع صوت اسنانه يحد بيهن، رجع راسه ليورة يباوع عليَّ ويبعد الشعر الازك بوجهي

أرغد:- نروح باجر لابو مهند حتى اني محتاج جلسات علاج وياج

نزلت راسي على كتفه ابجي ماحجه وياي عافني ابجي براحتي بوجوده وحضنته محسسني بالامان ڪل سنـة بهذا اليوم تجيني هالحاله

اخذني للحمام بيده سبحني ورجعني للغرفة كعدني بالكاع وهو وراي كاعد كامش المنشفة وينشف بشعري 

مشط شعري بهدوء عافه مفتوح ودارني عليه رجع ظهره على الكنتور واخذ راسي لصدره 

أرغد:- نروح للعمرة

رفعت راسي وبعدني مستندة على جسمه يباوع بعيوني رجعت راسي على ڪتفه كتله 

ـ ياريت حتى ارواحنا ترتاح احس شايلة اثقال بروحي 

أرغد:- عجل تمام هذا الاسبوع ارتب لسفرتنا 

تلمس شعري بيده كال بعده رطب سحب الفروة غطاني بيها لان الكهرباء طفت مالحك يجففه بالفير

حسيت بالدفئ غفيت بحضنه كعدت الصبح على وضعنا بسرعة بعدت عنه خطيه متكسر طك كتفه ورقبته فتح عيونه ابتسم وهو يحضن وجهي بيده

أرغد:- شلون صرتي

نفس:- ابقى موجود واني اظل دوم بخير 

غسلنا ونزلنا جوا يونس كال لارغـد 

ـ مجد رجع لاهله 

بس شصاير بيه ما تعرفه من تشوفه يكلك تا مشي مايكدر يمشي ولا يكدر يحجي ما اعرف شمسوين للسانه وهيج منفوخ

نفس:- استغفر الله 

شلون يكدر هيج يسوي بأخــوة شنو هاي القسوة والتعذيب صح اخوه 

سكتت باوعوا عليه ارغد سألني تعرفين شي هزيت راسي لا 

أرغـد بلش يـرتب لسفرنا سمعت  ترتيل تسولف على سمر بسمه زعلانـة وتڪلها مهند يڪول السبب حبيبته القديمة وسمر ترد عليها بعصبية

ـ والمره شدخلها يمهم كرابهم شلها بهاي الكلكه نسوان تريد بس تلكى سبب تا تزعل حرارة بعرج الاذان

فرڪت عيني بجف ايدي وتالي وياك سراج …

 ••----------- ♡♡♡♡ -------------••

لـــــــــــــؤي 

رحت للمجمع لڪيته موجود استحيت منه سلمت عليه ورحت كعدت يم علي اباوع عليه مغندب موش الاولي يشاقي ويضحك 

ـ شبيك ريس؟ 

اجى كعد كبالي سولفلي سالفته ضحكت كتله

ـ مالڪيت غير عسل ولك هاي ينشلع افادك وما تحصلها محد ينطيها الك

ـ ليش 

محجوزه لادم؟ 

ضحكت كتله اي من جانوا زغار كالوا عسل لادم وما تصير لغيره 

ـ شنو احنا بياعصر عايشين مو منطق هذا يحددون مصيرهم وهم اطفال 

رجع ظهره على الڪرسي كال شكيت والله من امها كالت احجي لادم 

لزم زنده يعصر بيه ڪال لو ادري والله ما احطها ابالي احجي وياي عمي شسوي بهالحال صار ايام التفڪير ماڪل راسي واحس روحي بنارين صارت

ـ شسوي انساها مو قسمتك كتلك محجوزة لابن عمها

ـ غيـر لو اڪدر انسـاها والله وڪعتي سودة عمي خلي اسافر وبلكي اڪدر انساها من تصير بعيده عن عيني

سراج:- لـــؤي شنو مهوزم مني ولك مو اجي ارفس ببطنك 

باوعت عليه كتله لا ليش مهزوم منك بس لا مسوي مڪسورة ولك ترى ايق بطنك يق

ضحك اجى لزم اكتافي عاصرهن 

ـ لعد اول تـــالي ما تڪعد يمي كتلك اخاف اخسرك والظاهر خوفي بمحله

ـ وانـه شنو كتلك 

ضربته بظهر جفي على صدره 

ـ ما اوڪف بوجهك وياك حك باطل 

ابتسم وهي يربت على جانب وجهي دنك باس راسي 

ـ تعال خلي نطلع اريد افضفضلك 

هزيت راسي اي طلع كبالي مشيت ورا باوعت على علي يباوع ورانا مبتسم راح يطكنا ليزر السڪط كتله 

ـ اتقشمر وياك ولك مو تصدك ترى البنيه ما محجوزة واصلاً مو براس آدم ما يشوفها غير اخيته 

عفتـــه يرطن عليَّ ويضحك فرحان طلعت وراء سراج واڪف كبال سيارتي 

لؤي:- جا وين سيارتك

سراج:- بنجرت 

لؤي:- سيارتك مبنجرة ومرتك مبنجرة حظك وين طامس ومبنجر

ضحك كال من وراء عينك انت وذاك الحقود ما اشوف الراحة

لؤي:- اني شعليه فوك ما مزعل بت اختي ومكدر خاطرها 

تعال بوس راس عمك حتى يرجعها الك

فر رجلي برجله صعدنا بالسيارة شغلتها  كال 

ـ شلونها الحڪومة

ـ مثل حالك 

ـ قللت منها من ضربتها ماڪدرت الزم نفسي الله يلعن الشيطان وسجين بغداد الندم يــــاڪل بيه 

ـ على كلامها تحتاج تكسير راس مو بس راشدي كتلك الدلال يخلي المرة تتفرعن

ـ لا حقها ما ألومها الغيرة تكتل

واني مقصر وياها 

ـ ولك شمقصر احنا اللي ماخذين على حب مادللنا مثلك 

ـ جرحها جان اڪبر من كلامها وانـي أذيتها بجوابي والغيرة تخلي الواحد يحجي شي ما يقصده المفروض احجي وياها بهدوء مو اتسرع وأمـد ايدي عليها 

باوعت عليه لازم الحلقة ويفر بيها بصبعه 

ـ راح اطك وتموت شمالك 

أبتسمت كتله 

ولك سراج حبيتها؟ 

ـ اي غير زوجتي طبعاً احبها

كتله لا تصير غشيم ندري تحبها وصارت بينڪم مودة بس قصدي

ضربته بيدي على كلبه 

ـ حب منا هذا دكلها لو بعده ؟ 

شوف صار اشكد على زواجي انه ودرة ومن ارجع للبيت گلبي يظل يرعد بشوفتها 

عاف الحلقه وباوع من الجامه كال 

ـ بعده عليل گلبي ونسي شلون ينبض لغيرها

تنهدت بضيق كتله

ـ جا تعودت عليها

ـ تمسكت بيها بسمـه مثل طــــوق النجاة جانت روحي تايهة بثقب أسود وهي طلعتني نورت وحدتي طلعتني من العزلـة ضحكتها اخذتني لجانب مشرق بحياتي 

رجع عيونه عليَّ كال من جنت بالـ-----

واتصلت عليها من سمعت صوتها ولهفتها حسيت 

سڪت كتله بشنو حسيت ڪمل؟ 

ـ حسيت ما اڪدر اعيش بعد بدونها صارتلي حياة فاقدها ما عرفت طعمها الا وياها 

لؤي اعرفك تثڪل بالحجي بعد أخوك  لا تحجي وياه وتضغط عليها خليها ترتاح اليوم  وباجر اروحلها واطيب خاطرها 

  ••----------- ♡♡♡♡ -------------••

بســـــــــــــمه

طلعت البوم الصور من الغيرة جبته وياي خاف يباوع على صورها وراي

اڪلب بصورها من طفولتها لشبابها اكو صور الها بامريڪا اباوع على الشعر اشو ما محجبه 

سديت الالبوم عفته على صفحة كتفت اديه على ركب رجليه وحاطه وجهي على زندي تذڪرتها من اجت تبارڪلنا فرحانه ما مبين عليها ضايجة من زواجه جن فرحت عمرها 

عضيت زند من أذڪرت شـلون يوصينا بيها ما عبالي هذا الاهتمام ورا شي عبالي لان أم آدم وهم هنا انتبهت الڪل يعزونها ويقدرونها صغار وكبار وحتى خالي حيل يحترمها عبالي هم لهذا السبب شدراني تطلع هي الحبيبه الماحصلها

يا اللهي راح اموت من الغيـرة اخذت الالبوم رجعت اباوع على صورها وانتبه على الوان ملابسها مالڪيت الها صورة لابسـه عنابي ابد 

دخلت درة شافت الالبوم بيدي اجت كعدت يمي كالت المن هاي الصور

خليته بحضنها واني اكلها لـ نفس

ظلت تڪلب بالصور وكل صورة اطلعها من الالبوم تباوع بيها بتركيز وعلى وجهها ابتسامة 

درة:- دحكي هين بطفولتها جثير تشبه قمر 

اخذتها منها مركزة بيها الصورة قديمة ما تبين بس صدك عدها رصعة الحنج ودورة الوجه بس العيون مختلفة مدري جنها مختلفة

رجعتها لدرة كتلها هواي تحبونها شنو السبب؟ 

باوعت عليه وهي ترجع الصورة وتكلب للوراها

درة:- ملاك عائلتنا ام آدم 

لا عبالج ابالغ شنو احجي عنها ما أوفي وڪفاتها للڪل وبوقت الحصار صارت أم للڪل تتفقدنا ڪلنا اللڪمة ما تحطها بحلكها اذا مو كلنا أڪلنا 

ما اذڪر بيوم أذت احد بكلمة دائما جانت الايد الحنونه خاصة لبنات أخوي صارتلهن امهم الثانية 

اذا حجت ويا أحد ما اذڪر نرفضلها طلب الها مڪانه عند الڪل والله من تدخل بيوت واحد من ولد عمامي لو بيتي لو بيت أخوي ننخبص بيها ونطير بيها طيور عندها قبول ومحبة الله يزيدها

بسمة:- وشلون اخذت ابن عمج وهي جانت تحب 

سكتت ما حجيت اسمه باوعت عليها تغيرت ملامحها سدت الالبوم 

درة:- مو من حقي اجاوب على سؤالج واريد اطلب منج طلب اللي عرفتيه لا تحجينه لاحد هين معرفتهم ما راح تأثر على مكانتها عبن هي ما مسوية شي غلط بس هذا شي خاص بيها مو من حق احد يحجي بيه 

هزيت راسي اي هو اني أصْلا مستحيل اسولف 

ـ اريد احتفظ بصورها اخذهن؟ 

ـ اي اخذيهن جا شسوي بيهن اني جبتهن وياي خاف يباوع عليهن 

««درة»» 

دخلت على لؤي يحجي بالتلفون طلعت صورة نفس وهي طفلة يمكن بعمر الـ 4 سنوات حطيتها كبال عينه باوع عليه وهو ياخذها يحجي بالتلفون ومركز بيها، من خلص اتصال ڪال منو هاي المدنفشة؟ 

درة:- انت توقع منو

ظل يباوع عليها ويكلبها بيده هيج وهيج اخذ وقت مركز بيها، عقد حاحبه وهو يقرب وجهه للصورة

ـ واني اڪول شلون شبه البت بيها طلعت صدك تشبه امها لا يالوتي

ـ ها عرفتها

ـ أم آدم 

أبتسمت اخذتها من ايده رجعتها للالبوم كتله منو شبه البنت بأمها مافهمت؟ 

لؤي:- هذا سراج بيوم شاف قمر اول مرة، ڪال تشبهها ثاري ناسخ هاي الصور براسه 

تنهد وهو يمشط شعره بصابعه ضميت الالبوم بالكنتور ورجعت تمددت بصفه راسي على ايـــــده

تارس الغرفة بصور جهال ولد عمامي واخواني ضحكت دحكت عليَّ كتله

درة:- ان شاء الله اذا ولد يطلع هيج يشبهك نفس السمار والملامح وخفة الدم

أبتسم وهو يصد عليَّ كال ولج اريد انتاج انكريزي اتكشخ بيه 

درة:- شنو هو لبسه وتكشخ بيه

لؤي:- اريد اسد حلك سراج بيه 

كل مرة يشوف جهال اهاليتكم يغمني الساڪط   

ضحكت يدحك على ضحكتي بنظرات تربك نبض گلبي قلبني جوا

حط جف ايده كبال وجهي يدحك بأبتسامة على التناقض بين لون بشرتي ولون بشرته اللي اعشقها

رفعت اصابعي امشيهن على حواجبه وعيونه على طول خشمه وشاربه نزلت اصبعي على شفته تسارعت انفاسنا ونبضات گلوبنا

درة:- اعشقك 

لؤي:- ارنوبتي الفطيرة ام شڪراً منو السكط اللي علمها على هالحركات والغزل وخرب فطرتها

رفعت اديه معاكستهن على رقبته بحضنه، رفعت راسي قليل بسته بطرف شفته واني اهمس

درة:- تعلمت من ذيبي الاسمر 

«عشقٌ مشبع بالحنين، وهيامٌ لا يعرف الاكتفاء» 

كتله حجيت ويا سراج شنو لا اجى ولا اتصل عليها والله منهارة ونفسيتها مدمرة هينوب عليش ما يجي يراضيها شنو هالغرور

لؤي:- باجر العصر يجي يحجي وياها

أبتسم وهو يحرك جبينه على جبيني كال

لؤي:- والله بت اختي مو هينه خلته بفترة قصيرة يتعلق بيها واكلج ماراح يطول ويحبها مريت على العجايز كالن مايلفي لغرفتهم وكلما يريد شي يصيح باسمها ناسـي هي مو بالبيت

ضحكت كتله ليش اڪول عاقل ما يحبها وخالها لؤي 

ضحك وهو يعض خدي …

  ••----------- ♡♡♡♡ ------------••

بســـــــــــمه 

دك تلفوني باوعت عليه حجي ڪشوم خليته صامت اباوع عليه خلصت الدڪة ورجع اتصل انطيته رفض 

دز رسالة 

ـ شنو هالحركات باسم ضلعي صاير ترفضنا 

عضيت شفتي بعصبية اني نار الغيرة حاركتني وانت تتشاقى 

سراج:- البيت وحش بدونج وكل حياطينه باردة 

دزيتله شغل الصوبات 

دز ضحكه طويلة وكتب وراها اريد صوبتي العايفتني وزعلانه 

تنهدت طفيت النت اتصل على الخط هم ما جاوبته بالدڪة الثانية جاوبته 

سراج:- شاڪرين كرمج بالرد علينا ست بسومه الحڪومة

بسمة:- شنو تريد؟ 

ـ سلامتج 

اريد مريتي اذا يمج انطيها التلفون خلي احجي وياها بلڪي اڪدر اتفاهم وياها واقنعها هي اشڪد عزيزة عليَّ واني ضايع بدونها 

ـ تنكت شنو 

ـ بسومه 

ام ضحكت الحلوة شنو اللي يرضيج؟ 

ظليت ساڪتـة سمعت صوت باب نسد وصوت انفاسه كانه ديصعد

سراج:- الغرفـة تخنكني بدونج طلعتيني من وحدتي ليش ترجعيني الها 

بسمه:- ما رجعتك سراج انت بعدك متمسك بهاي الوحدة حس بيه شلون الغيرة جاي تاڪل بگلبي وتموتني على البطيء 

ـ حقج ماڪول شي

بس خليني اصارحج هالحب صارلي سنين عايش عليه لا تتأملين أڪدر انساه لو يجي يوم وانسـى، واني خليتج على علم بيه قبل لا اروح لاهلج واطلبج حتى نتجنب النقاش بيه شنو اللي تغير بسمه؟ 

شنو تردين مني اسـوي احجي ساعديني ڪل اللي اڪدر عليه سويته الج واحس نفسي مقصر بحقج 

ـ اريد انام تصبح على خير

سديته قبل لا اسمع جوابـه وصلت لمرحلة اريده يجذب عليَّ اني قابـلة  بس لا يعترف لي هيج جاي يذبحني بالحقيقـة مسحت دموعي مستغربة كمية الدموع اللي ما اسيطر عليها 

حسيت روحي تملخت على مشاوي وملوحه مسحت دموعي وطلعت اشوف شأڪل من الوضع اللي اني بيه عقلي مو عدي وما فڪرت اڪو حمل اجت ابالي الصينية اللي يجيبها والله احس گلبي نبهت ونخلبت روحي طلعت طماطه شويتها مالزمت گلبي روحي ترجف على مشاوي ودسومه

ثــــاني يوم اجى عليَّ طلعتله مكتف اديــه يباوع على حذائه ويكلب بيها برجله 

رفع عينه عليَّ اجت بعيوني وجعت گلبي نظراته وتعب ملامحه

وكفت كباله بعدت عيوني عنه كتله لا تظل واڪف تعال ادخل للديوانية 

سراج:- لا خليني هنا ما اكدر ادخل وخالج ما موجود اصلاً حتى وكفتي هنا صعبـة عليَّ 

بسمه:- جا ليش اجيت كون صعبة عليك

سراج:- الحڪومة جابتني

يلا نرجع لبيتنا

بسمة:- بيتنا؟ 

ماعندي بيت وياك 

سراج:- بسومه أبوية انت شنو هالحجي اعرفـج عاقلة وفاهمة ما تكليلي شجاج يا عيني، هسه خلينا نمشي وهناك نسولف ونتفاهم

بسمه:- ما ارجع وياك 

اريد الطلاك

شهگت واني اصيح 

ـ يمه حبيبه شجاك حجي طيحت گلبي 

عاصرني بحضنه لزم فكي خفيف رافع وجهي اله 

سراج:- طلاك شنوو! 

عاقلة انتي شنو أريد الطلاك والله لو تجمعين اهل السما واهل الارض عليَّ ما اطلڪج

بسمه:- ليششش 

مادام ماتحبني وبعدك تحب شتسوي بيه خليني أولي 

سراج:- منو كال ما احبج

رفرف گلبي الاغـم وحسي ضاع 

سراج:- اڪو واحد ما يحب زوجته 

يامرة قابــــل اڪرهج والله الج مودة بروحي بس الله يعلم بحجمها

يبووي حتى ماعرف شلون ابلع ريڪي ضعت يعني يحبني مثل ما احبه لو شنو قصده حطيت اديه على زنوده راح اطيح من طولي اشڪد صايرة خفيفة انــه 

أبتسم كال شنو نبقى هيج واڪفين بهذا الوضع ببيت العالم خلي نرجع لبيتنا وادللي اظل وياج هيج يومين

بعدت عنه يعرف بتأثيرة عليه ويتعمد هيج يقربني الـه رفعت بس عيني مبتسم وهو يباوع عليَّ 

ـ يا بويه يا حبيبه ولج ليش حارمتني من هالشهگة الحلوة 

قرب راسه يحجي قريب من وجهي خاطف انفاسي برحفة انفاسـه 

ـ ما مر يوم واني بعيد عنج وما تذكرتها وتلهفت اسمعها واني اسحبج لحضني اصفن واتخيل بشهگتج 

درت وجهي على جهج واني انفخ الهوا من حلكي تيهت شلون ازفر النفس سند راسه براسي اسمع صوت انفاسه المتسارعة 

سراج:- لا تعـذبيني ولا تعذبين نفسج اثنينا مانكدر انتي تكمليني واني اڪملج 

درت وجهي اباوع بعيونه كتله ما اڪدر الشك يموتني 

استغفر وهو يبتعد عني كال والحل شنو نبقى هيج ڪل واحد بمكان زغار احنا خوما ازغار كعدتج هنا ثگيله عليَّ 

نسمة:- وحبك الها واحتفاظك بكل شي يخصها هم ثكيل عليَّ حس بيه 

سراج:- حاس بيج بس شنو اللي يطلع بيدي 

نسمه:- اطلكني أرحملي من هالـعذاب 

سراج والحسين ما اڪدر اموت حس بنار گلبي عليك انت ليش ما تحس

اخذت تلفونه دخلت التاريخ نفتح كتله شوف هذا ابسط شي ماڪدرت تغيره 

هاي لهفتك وقربك وڪلامك كله مااڪدر اصدڪه بعد حتى اذا صدكتك ارجع اشك بيك مثل ماصار هسه بينا من ڪلت احبج صح تأثرت بيها لان اول مرة بس اختفى تأثيرها بثواني لان مو صادك بيها

ـ لا تطلبين مني أثبت لج غلاتج بـ نسيان الماضي خليني أثبته لج بالطريقة اللي اعاملج بيها 

انت ما تعرفين شكد حاولت حتى اتجاوزه واعيش حياتي

ـ ما حاولت لو حاولت جان ما خليت كل اثارها يمك

تقرب مني يحجي بحده عبالك مطالبته بموته

ـ گلبي مو جهاز تمسحين منه الذكريات بضغطة زر 

ـ واني مو مجبورة اعيش ويا ذكريات مــرة ثانية

حط اديه بجيوبـه يباوع عليَّ بحيرة واني دموعي تصب وما عندي استعداد للتراجع عن قراري

ـ اريد الطلاك

ـ واني كتلج ما اطلك

ـ مادام بعدك تحبها ما الك حق ترفض 

ـ وإنتي ما الج حق تهدمين زواجنا بسبب غيرتج من حب قديم ماراح يأثر عليج ولا على معزتج عندي ولا اقصر وياج بشي

ـ شلووون ما يأثر عليَّ جاي اموت ليش ما تحس بيه انت 

ـ واني شطالع بأيــــــــدي وماسويتـه

طلاك ماڪــــو خوش

وبيتج موجود يمتى ماڪلتي اريد ارجع اجي ارجعج معززة مڪرمـــة

مشى بتجاه الباب حجيت وراء اسمعه

ـ رده الك ما أرد

دار وجهه عليَّ يحجي بعصبية

ـ الله يساعدني عليج

ـ اي مسودنــــــة

رجع عليَّ لزم تلفونه غير الرمز كبالي وهو يحجي هذا الغاثج هالغيرته حطه تاريخ زواجنـا رمز

شفت الحلقة لابســـها هسه يلا انتبهت، رفرف گلبي بس بسرعة رجعت غيرتي تغلبني

 رجـع التلفون لجيب جاكيته وهو يباوع بعيوني كال 

ـ وهالغيرت الرمز برأيج راح يغير شي من اللي بداخلي؟

عافني واڪفة وحـدي ومشى بالليل أجت تماضر ووياها الحجيات حاولن وياي ڪتلهن ما أرجـــع كدرت اتفاهم وياهن باللي اريده عكس من احجي وياه احس اللي اريد اوصله اله يتبخر واظل اخبط من الغيرة التاڪل بيه وبروده اللي يستفزني

تماضر:- بسمه احجي وياج بصراحة ولا تزعلين من ڪلامي ترى مالج حق بمحاسبته على ماضي عاشـه قبلج 

يمكن الج حق لو ماتعرفين بس انتي عرفتي قبل لا ترجعين الموافقة ليش تهدمين بيتج والله من طلعتي لحد جيتنا الج هو حالته صعبة وماتنوصف 

ـ انتم ليش ما جاي تفهموني اني مو زعلانة لان عنده ماضي، زعلانة لان  هالماضي بعده حاضر بتفاصيله بيناتنا ما اريد منـه ينكر سنين عاشها 

بس أريد اعيش وياه واني مطمئنة  اللي صار قبلي صار وانتهى مـــو احس نفسي داخلة بحياة مرتبة الها 

اذا رجعت هسه قبل لا انحل هالمشڪلة بيناتنا ما راح نرتاح يومين ونـرجع لـنفس الخلاف رجعتي وياجن مو حل تأجيل للمشكلة

تماضر:- والحــل شنوو؟ 

بسمه:- الـحل يمَ سراج اني ما اعرف واللي عنـدي حجيته 

•

•

اتصل عليَّ يحجي بعصبية:- شنو الحل اللي يرضيج بسومه حكومة

اسمع صوت محرك السيارة وصوت الاشارات من يستدير  طن طن اشتاقيت لڪعدتي وياه بالسيارة وللاغنية الدائما يشغلها ويڪلي هاي الج 

سراج:- لا اطلبين المستحيل مني عبالج بيدي انـي لو اڪدر جان من زمان شلت هالحب عبالج مرتاح بهذا حالي حاولت والڪاظم حاولت قبلج وبعدج شي مو بيدي

عضيت شفتي احجي بگلبي شجلبت حب حب بس انت حبيت وما حصلت حبيبتك

حجيت بنفس عصبيته 

بسـمه:- جا ماعــدك حل بعد غير اطلڪني ونخلص من هالتعب انت ابقى غرگان بأثار حبها واني اعيش حياتي 

جــاوبني بصياح وعصبية كانه جاي اشوفه كبالي شلون مورث

سراج:- تمام مثل ماتردين

شنو اللي يريحج الطلاك خلص نطلك وشوفي حياتج بسمه اهم شي تشوووفين حياتج 

ظليت ساڪت وهو هم سكت نزلت التلفون من اذني قطعت الاتصال بجيت بجي بس الله يعلم بحالي وقتها احس روحي تتكطع ارجع المها وترجع تتكطع  

 ••------------ ♡♡♡♡ -------------••

اثيــــــــــــــلة

نزلت راسه على المخده احس اضلاعي ڪسرها دحكت عليه شلون غافي تا ماحس من حرڪته اجفان عيونه حمرة وبيها شلون هاي الشعيرات الزركة جوا الجلد 

طلعت البنات ڪاعدات ڪوثر تلبس بحجابها وزمزم تحضر بالريوك كتلها روحي ماما جهزي نفسج اني اڪمل

زمزم:- اثو ڪدرتي تقنعينه؟ 

اثيلة:- نسيت احجيلج

اي حجيت وياه واقتنع 

وهساع مجد العار عند أهله لا تخافين عليه عنده الف روح

حضنتني وهي تبجي نزلت راسي بستها براسها 

اثيلة:- ليش هالبجي مجد وطلع ڪافي ماما لايصعد سڪرج 

زمزم:- خــفت يموته واخسر بابا

اثيلة:- هذا اخوه صح عاقبه بس ماتوصل بيه يموته 

عافتني ومشت جهزت نفسها تريڪنا وطلعن للخط، آصف بقى نايم للظهر رجعن وهو على نومته وجسمه مشتعل نــار 

جبرته يدخل للحمام يسبح وراء الغدا نطيته علاج ڪاعد بالصالة كوب الجاي بيده ماشرب منه صافن على البلازمه مصطفى كاعد على جيجي ورانيا 

صديت على باب غرفـة البنات زمزم واڪفة بالباب ادحك عليه من كتلها ها ماما زومه ليش واڪفة

صد عليها دنك مد ايده عاف الڪوب على الطبلة ربت على القنفة وهو يڪولها تعالي نمرتي

اجت بسرعة ڪعدت يمَ حاضنته وهي تبجي بصوت وهو حاضنها بين اديه ودموعه تجري 

زمزم:- خفت منك تمووته 

آصف:- يستاهل الموت 

هزت راسها لا وهي تحضنه اقوى سند راسه على جانب راسها 

آصف:- يمتى أرجع اصف المزيون بعيون جمارتي

ضحكت وهي تبجي كالتله تبقى دوم بعيونها آصف المزيون وبطلها القوي

أبتسم ڪالها عجل رجعي السلحفاة لراعيها 

ابتعدت عنه كالتله علكت علكت موو سلحفاة صارت ضرتك 

آصف:- اجيبلج احلى منها

زمزم:- لا ماريد واصلا جاي تڪبر واحبها 

عصرت وجهه بين قبضات اديها ضربت راسها براسه تنهدت وين راح بالي لـ ايام أرغد وهاشم نفس ضربت الراس من جانوا يتراضون تخيلي اسمع صوت ضحكاتهم يضحكون على زعلهم بعد الرضا مسحت عيوني محد بينا تخيل بيوم هيج يصير ويا الجانوا ضلع واحد 

من نشوفهم متاڪدين هالاثنين ما يتفارڪون اخوة لاخر العمر خاصة حب أرغد لهاشم دائماً يدافع لـه ويوكف كبال جدي تنهدت واني اصفن على آصف مصطفى كاعد فوك اكتافه وكوثر حاطها جوا ايده خانكها وزمزم ساحلها من شعرها ومصطفى يجر براس ابوه عود يدافع لـ اخواته 

اسأله بداخلي بعدك واڪف بينهم لو صدك اختاريت توكف بصف هاشم؟ 

ضحكت على زمزم عضته بيده ما كال اخ يكلها هاي ڪل قوتج وهي تصيح مو جلد حديد كوثر تكرص ببطنه تريد تخلص روحها خنكها

نهضت حطيت ايده على كتفه دحك عليَّ غمزتله بدون ما ينتبهون رخت اديه مالحك يسيطر عليهم مصطفى كعد على صدره يضرب بيه بوجهه راشديات وزمزم مقيده اديه تربط بيهن بالكيبل مال الشاحن وكوثر نايمه على رجليه وتصيح فتشوا الجيوب كل شي يطلع منهن النا بعد

زمزم:- ام فلس 

عوفي جيوبه واربطي رجليه بسرعة لا يدفرج وهالمرة تنلزكين بالحايط مو اطيرين من فوك السطح

رجعت عليه تكرص بصابعه وهي تحجي تريد تشمر سلحفاتي يالمزيون

ولك مصطفى عضه بخشمه المغتر بيه

اجت كوثر وهي تركض جايبه شالي من على الباب تربط برجليه وتجاوبها

ڪوثر:- علوا يشمرها متت من ريحتهن 

رغم يڪدر يطويهم تلاثتهم بحركة بسيطة منه بس هو عايفيهم ماخذين دور النصر ويضحك مسوي نفس مايكدرلهم ويصيح ولكم 3 على واحد 

•

•

كاضب ابرة الانسولين بيده ويتكاون ويا زمزم هي تريد تضربها وحدها وهو يريد يضربها الها

زمزم:- باباااا

اني اضربها وحدي

جيبها حباب 

آصف:- كتلج اني اضربها يلا جيبي ايدج اخرتيني اريد اطلع

دحكت عليَّ كالت:- اثو احجي وياه خلي ينطينياها

رفعت اديه كتلها انتي وأبوج ما ادخل بيناتكم

دزلي بوسه وهي دحك عليَّ ما عاجبها

آصف:- يلا يول جيبي ايدج ترى اضربها بيدي

ماڪدرت عليه استسلمت ضربها دنك باسها كالها بگلبي ضربتها مو بيدج باسته بخشمه 

رجعت علاقتها بابوها مثل قبل واحلى وما تخلى من مشاڪلهم كتله احسك تفرق بالتعامل  بينها وبين ڪوثر 

كال ابد والله اثنينهم نفس المعزة عندي بس ڪل وحده الها اسلوب حسب شخصيتها زمزم قيادية وصاحبة مسؤولية وكوثر حساسه وام مصلحة انطي كل وحدة الها اشباع عاطفي يناسب شخصيتها واحتياجها بدون ما أحسس الثانية هي اقل قيمة

من تحجين هسه وتسألينهن راح كل وحدة تكلج اني يحبني أڪثر 

وفعلا لمراقبتي الهم ماشفت وحده اشتڪت من التفرقة كل وحدة تشوف نفسها المقربـة اله ما اعرف شلون هيج محتويهن واني اتعامل وياهن بنفس الاسلوب، وصفاوي حبيبي امه مسوي زلمة البيت الصغير حتى زمزم حذرها ممنوع بعد تمد ايدها عليه اذا يسوي شي غلط تجي تخبره الـه وهو يحاسبه

  ••----------- ♡♡♡♡ -------------•• 

(مــــــن ميقات) 

لابسة ملابس الإحرام وكل شي بداخلي ساكن حتى أفكاري متوقفه 

رفعت عيني للسما وبصوت خافت

ـ يا رب نويت العمرة تقرباً اليك فتقبلها مني

اخذت نفس عميق وحسيت رهبة تسري بصدري هنا ماكو مجال للرياء ولا للدنيا ولا للأشياء اللي نركض وراها كل يوم هنا الانسان واڪف بين يدي ربه بقلبه وحده

نويت العمرة:- لبيك عمرة

وبعدها بدأنا بالتلبية

ـ لبيك اللهم لبيك، لبيك لا شريك لك لبيك، إن الحمد والنعمة لك والملك، لا شريك لك.

رددتها، ودموعي نزلت كل مرة اڪول لبيك احسها جواب لدعوة الله

أكرمني ووصلني لهذا المكان

ـ يا رب جئت إليك

طول الطريق البي التلبيه

 احس بعظمة المشهد واني اباوع على الناس كلنا مختلفين لكن بهاللحظة ما يجمعنا غير عبادة الله

 بدأت مكة تقترب وگلبي صار يخفق ما جنت أفكر شراح اڪول اريد بس اوصل للامـان

اسمع صوت دعاء ارغد 

ـ يا رب بلغني بيتك وأنا مغفور الذنب مطمئن القلب مقبول الدعاء

 اللحظة اللي انتظرتها قريبه مني

لحظة اشوف الكعبة لأول مرة 

وقبل لا اشوفها ضميت ليدي إلى صدري وهمست

ـ يا رب البيت لا تحرمني من رحمتك ولا ترجعني من هنا إلا وقد غسلت قلبي من كل شي لا يرضيك

بدون تخطيط وتفكير اول نظرة للڪعبـة نظراتي معلقة بيها كان دعائي الاول من نصيب سراج

نفس:- اللهم أخــرجني من نفسه ومن قلبه ومن عقله 

بقيت واڪفة اباوع للكعبة ودموعي تنزل بصمت ما أعرف شكد ظليت صوت أرغد رجعني للواقع

ـ أم آدم

 تعالي نبدي الطواف

مسحت دموعي هزيت راسي

مشيت وياه باتجاه الكعبة وگلبي بعده يرجف وڪفنا عند بداية الطواف رفعت ايدي باتجاه الحجر الأسود 

ـ بسم الله، والله أكبر.

بديت أمشي الشوط الأول أردد الأذكار وأستغفر

ـ يا رب اغفرلي كل ذنب أعرفه وكل ذنب لا أعرفه

الشوط الثاني حسيت نفسي أهدأ

ـ يا رب طهر قلبي واغفر تقصيري وثبتني على طاعتك.

الشوط الثالث رفعت عيني للكعبة

ـ يا رب لا تجعلني أخرج من هنا إلا وأنت راضً عني

كل شوط كان يمر، وكل مرة أحس  شيء من الثقل اللي بداخلي ينزل

الشوط الرابع والخامس دعيت لـ آدم وقمر 

ـ يا رب أستودعك أولادي فأحفظهم بعينك التي لا تنام اللهم احرسهم من كل سوء وأبعد عنهم المرض والحزن والشر وافتح لهم أبواب الخير والرزق والتوفيق

يا رب لا تريني بيهم بأساً يبكيني، ولا وجعاً يعجزني واحفظهم لي ما حييت وان سبقتني إليك يوماً فاحفظهم بعدي

بالشوط السادس دعيت لامي واختي وڪل اللي اعرفهم والنصيب الاكبر لرفيقة روحي سمر ودعيت  للمرضى وللموتى دعيت لكل شخص أعرفه وما أعرفـه

بالشوط السابع نزلت دموعي من الخشوع

ـ يا رب لا تحرمني من هذا المكان مرة ثانية 

حسيت خطواتي أثقل بس گلبي أخف، انتهى الطواف 

ـ الحمد لله الذي بلغني وأعانني

ابتعدنا وصلينا ركعتين احس  كل شي حولي اختفى بس اني ورب العالمين، كملت الصلاة رفعت ايدي

ـ يا رب تقبل مني لا تردني خائبة

طلعنا باتجاه الصفا وڪفت عند الصفا وكبرت وهَلّلت، ودعيت

بديت السعي

أول شوط أمشي وأتذكر هاجر عليها السلام شلون سعت تبحث عن الماء وهي واثقة برحمة الله

ـ يا رب ارزقني يقينها اذا ضاقت بي الدنيا 

مشينا من الصفا إلى المروة شوط ورا شوط كل ما أتعب أذكر أن العبادة مو دائمًا سهلة وأن التعب اللي يكون لله اله معنى ثاني

وصلنا للمروة بالشوط السابع صح جسمي متعب بس روحي ساكنة

رفعت إيدي

ـ يا رب، تقبل سعيي واغفر ذنبي وارحم والدي واشف مرضانا واقض حوائجنا ولا تجعل هذا المكان آخر عهد إلي

  ••------------ ♡♡♡♡ -------------••

بســـــــــمه

مر فوك الاسبوع واني بعدني بيت خالي حالي حال ماينوصف حتى ناسية الشهرية ولا على بالي تماضر تتصل عليَّ تكول والله وضعه شلون متعذب ويڪابر ڪل يومين يجي للمجمع بس ولا مرة مر على غرفتي ما اڪول اني ملاك لا والله اول ايام صرت اتحسس من آدم وكرهته يمكن بس بعدين عاتبت روحي شبيه نجلبت الولد شدخله وكرهته الله يلعن الشيطان الرجيم 

رجعني علي للبيت لڪيت درة جاي تمسح بالڪاع لعبت نفسي ڪلش من ريحة ڪعدت برة منتظرتها تڪمل حطيت راسي على كتفي بتعب ونحول

بنفسي معلاك شوي مشوي زايد وكرفس وياه وخبز حار ڪون من التنور مو من المخبز رفعت راسي فلك بس لا حـامل

بسرعة فتحت تلفوني دخلت على برنامج Clover اخر مرة اجتني ورا زواجنا بكم يوم وبعد ما اجت يمه حبيبة بس لا شلت من اول ايام

احس بفرحة وخوف اي والله اظني حبلة ضحكت باجر من اروح للمجمع اصعد احلل

ثاني يوم اول مادخلت للمجمع صعدت سويت تحليل حمل بلغتها لا تنزله اني اصعد 

نزلت لغرفتي شفت آدم يفتر واخته حاطه الدب جوا ايدها وتفتر وراه صارله كم يوم يجيبها وياه وين مايروح هي وراه وهذا الدب ما مفارڪها 

دخلت للغرفة ماڪدرت احصل وقت واصعد ڪل شوية داخل احد ماصدكت فرغت طلعت بسرعة اريد اصعد اشوف النتيجة صارت عيني على آدم كاعد على الڪرسي واخته على رجله ويربط بشعرها محتار بيها يجبها منا ويرجعها منا تقدمت عليهم

بسمه:- خايب كطعت شعرها جا هيج 

آدم:- والله احتاريت بيها بيها شلون تربط اديه تلسعت

كعدت على الڪرسي وكفتها كبالي اخذت من ايده الفرجة مشطتها وربطته فريت شعرها على جف ايدي تشڪر مني كتله شمسويه هسه اني هن شعرتين ربطتهن الها وانت مادبرتها

ضحك وهو ياخذها راح على صيدلية مهند واني صعدت للمختبر الطابق هذا زدحام على ام التجميل دخلت للمختبر اخذت التحليل الضحكة نرسمت بوسعها على وجهي البنية تبارڪلي ضيعت شرد عليها بس اهز براسي أي من ذكرت الحجي ضاعت ضحكتي شنو نسيت وضعنا تشكرت منها ونزلت دخلت للغرفة اباوع على التحليل كعدت على الڪرسي وبعدني اباوع بالورقة

دخلت بنيه تريد تضرب ابرة ضربتها الها وراحت وراها دخل ولد شاب وياه مره جبيره نامت على السدية رجعت البردة كشفت على عمليتها نظفتها الها ضمدتها فتحت البردة اخذت العلاج من ابنها ضربته بالمغذي وعلكته الها شفت حرارتها وضغطها كله طبيعي

كعدت على الڪرسي وابنها بصفها شفت سراج مر كبال الغرفة بيده لابتوب شعنده صاعد فوك هالحجي طلعت عينه واستخف وراء الزواج 

الولد اخذه امه وراحوا حطيت ايدي على خدي فتحت تلفوني اريد اوصي على معلاك شوي رفعت راسي دخل وهو يقفل الباب بسرعة قلبت الورقة على ظهرها

سراج:- السلام عليكم 

شـلونها الحڪومة بعدهي زعلانه علينا

رديت السلام واني اتجنب اباوع عليه 

واحجي بگلبي زين ومتذڪر اڪو وحدة تخصك وزعلانه عليك

كعد على السدية كال شوفيلي الضغط يمكن هابط من الاهمال

كتله تعال على الڪرسي خلي نشوف الاهمال اقصد الضغط 

كال لا هنا اريد يلا استعجلي حتى هم نحجي بالطلاك

نغزني گلبي من الوجع اخذت المقياس بعصبية تقدمت وكفت كباله ارتبڪت من قربنا، مد ايده سد البردة باوعت عليه 

اريد الف ربطة الضغط على ايده حضن خصري بيده الثانيه مقربني عليه يضغط بجبينه على جبيني وضعنا اثنينا ابداً مو قانوني حطيت ايدي على كتفه اريد ابعده ماكدرت ايدي احسها ماتت تشبثت بكتفه تلاڪت عيونـا وكل محاولات الابتعاد ذابت شدني لحضنه بـ لهفة واشتياق مكبوت 

ضعفت بين اديـه دفنت وجهي بكتفه وهو حاوطني بكل جسمه كل واحد من عدنا يريد يعوض بهاي اللحظة الايام اللي ابتعدنا بيها 

محد من عدنا ڪدر يقاوم ويبتعد ماڪو كلام بس صوت دڪات گلبي الصارت اطبول رجفتي بين اديـه كافية حتى يعرف شكد  مشتاقتله

رفعت وجهي جاي احاول اتمالك نفسي ابتعد عنه بسرعـه احتواني بحضنه مرة ثانيه، ارتجفت أنفاسنا  

اباوع على ملامحه تعبانه من كـد ما حاول يخفي اشتياقه 

ايده ارتفعت لوجهي حضنه مثبته حسيت بطراوة شفته لامست شفتي 

نظرات عيونـا متشابكة أنفاسنا متسارعة  حطيت ايدي على صدره نبضه مثل نبضي ينبض بقوة…

                 الفصل السابع عشر من هنا