رواية سجين الحب الفصل السابع عشر17بقلم زهراء الحريري

لـــــــــــــــؤي

‏اذا قـدمت ڪــل شيء ولـم يڪـن ڪافـياً، فـقدم غـيـابك..

 ••------------ ♡♡♡♡ --------------••

««درة»» 

دخلت للغرفة اريد اخذ ملابس لعلوش تلف نفسه بالنوتيلا

شفت الدفتر على الميز باوعت على الصالة ديحجي بالتلفون تقدمت بفضول اريد اعرف شنو هالدفتر الـ يخلصه ويرجع يقرا 

فتحته جان بأول ورقة مكتوب بالوسط 

أنا الرجل الـذي صـدق كذبـــــة لانها كانت تخدم غضبه ثم اكتشف متأخراً أن الانسان الذي عاقبه لم يكن مذنباً

قلبت للورقة الثانية مڪتوب تاريخ بالسنة واليوم والشهر دا اقرا واتنقل بالسطور وصوتي الداخلي يكول لهاشم الدفتر

جفلت من نسحب من ايدي يدحك عليَّ بخزرة 

لؤي:- جم مرة كتلج ممنوع توصلين هالدفتر ليش ما تاخذين بالحجي 

درة:- شبيك لؤي قابل سويت جـريمة وتحجي بهاي النبرة وياي

لؤي:- فوكاها هي الما راضية

كم مرة كتلج اذا اوصيج على شي لا تسوين العڪس 

مشى بتجاه الڪنتور يريد يقفل عليه دا اطلع بالملابس ورجـع عليه 

لؤي:- درة شتعرفين عن هذا

التفتت عليه يقلب بأوراق الدفتر سالته شنو! 

رفع الدفتر كبال وجهي ڪال اقري بالبداية رفعت اديه مثبته الدفتر من جوا وهو بعده كامشه بين اديـه قريت وكلما انزل لسطر يرجف گلبي 

أڪثر

لؤي:- مثل ماتوقعت تعرفين 

رفعت عيوني كتله 

ـ لا ما تشوف التاريخ قبل ولادتي

يدحك عليَّ بشك ونظراته تڪول تعرفين

لؤي:- معقولة ما سامعة من اهلج هيج سالفة جبيرة ما اصدك ما تعرفين بيها 

 بلعت ريڪي اجيت امد ايدي واخذ الدفتر سده ونزل ايده

درة:- لؤي امانة الله لا تفتح هالسالفة وياه 

تنهد وهو يرجع للكنتور ضم الدفتر وقفل عليه 

لؤي:- لا بوية ما اسألـه 

قريت هالدفتر للمرة الرابعة ولهسه مالڪيت جاوب للي براسي منو صائب

عضيت شفتي اريــد اعرف شنو غايته وڪاتب هالسالفة 

درة:- ما اعــــرفه ولا اعرف غير المڪتوب ما مسولفين ڪبالنا هيج بالصدفة مرة سمعت ومو اڪثر من المذڪور بالدفتر

يباوع عليَّ مـــا مصــدك 

كتله:- لؤي هالذڪرى ادمـره وترجع عليه سنين من العذاب

ڪال:- كتلج ما اسألـه شبيج لحيتي

همـس اروح للمرڪز قبل لا يحولونه  لسجن_  واسأله 

سڪت سألـــــته

درة:- للسجن!

تسأل لمنــــو؟ 

باوع عليَّ كال:- محد هيج سالفة براسي مو يــم الدفتر، 

راح تـا يجيب بسمه واني اخذت ملابس علوش وطلعت غيرتله وفڪري سـارح بقلق …

 ••------------ ♡♡♡♡ ------------••

بســــــــــــــــمه

اخذ نفس وتنهد براحة يباوع عليَّ كال طلاك شنو هـذا واحنا هيج حالنا اذا انتي تڪدرين اني مـــاڪدر بعـد بدونج

مسحت شفايفي بجف ايدي واصابعي ترجف يباوع عليَّ وعلى وجهه ابتسامة  

بعدت البردة ورجعت كعدت على الڪرسي اعدل بالشال، تقدم فتح الباب واجى كعد على الكرسي المقابيلي يرتب بقميصه وعيونه مني

سراج:- اي يالحڪومة كولي شنو اللي يرضيج 

جاوبته واني اطبك الورقة 

بسمه:- تعرفـه 

سراج:- لا ما اعرفه انتي احجيلي خلي نتفاهم عليه بدون انفعال وعصبية

جاي احجي وسمعنا صياح واحد يصيح سراج وينك اطلع سراج

كال هذا صوت آصف 

طلع واني وراء شفت آصف المسلول مورث والعيون طايرة للهامه سراج كال شكو آصف 

اجي بكل همته على سراج لزمه من خوانيڪه

آصف:- شلووون رجعته! 

سراج:- منووو 

صاح بصوت كمزني والله حتى شهگت من صياحه

آصف:- هاشم شلووون رجعته للسجن

سراج:- شنو توك دريت صباح الخير 

ابن عمتك صار يومين على محكمته وباجر ينقلونه

المسلول ضرب سراج على وجهه براسه شهكت واني ادك على صدري

سراج رفع ايده لخشمه نترست دم وضرب اصف بيده الثانية على وجهه حسيت بطني مغصتني من الخوف واني اباوع عليهم شلون واحد يضرب الثاني ما اشوف منو صار بيناتهم صارت هوسه عيوني على سراج الدم نزل منه قطرات لقميصه

ويحجي بصياح وهو رافع اصبعه 

سراج:- خلصت عمري ادور عليه عبالك اخليك اطلعه واسكت بهاي السهولة؟

لا غلطان مثل ما الك ملعب الي ملعب واذا صار وڪدرت وطلعته هالمرة للاعدام اوصله والڪاظم للاعدام 

سراج يحجي واصف يشيل بروحه ويدكها واسمعه يصيح

ـ لؤي وياك مووو؟ 

أڪيد وياك هو الرتب التهمة 

رجع على سراج لزمه يعت بيه ويصيح:-  و تسالني وين اخلاصي للمهنه عجل وهذا اللي سويته انت شنو 

سراج:- لا تخلط بيني وبينك اني اللي سويته عدالـة، رجعت مجرم مطلوب للقضاء لمكانه الصحيح ما ساعدتـه يفر من عقابه 

آصف:- يووول هذا أمانة عمتي

سراج:- بنظرك أمــانة، بنظري مجرم 

لا انت ولا غيرك يكدر يخلصه مني كتلك قضيتي وياه لاخر العمر ما اعوفها، لا تلعــــب من وراي افضلك حتى ما تخسر وظيفتك ومنصبك

آصف:- انت تخسرني وظيفتي بعدك الظاهر ما تعرف زين منو اللي ڪبالك

سراج:- ما يهمني منو واڪف كبالي صدڪني بس تلعب بقضيته هالمرة تورط نفسك وياه 

ابن عمتك مذنب واخذ العقاب اللي يستاهله 

آصف:- تلبسه هيج تهمــــــــة مالـه ذنب بيها!!! 

سراج:- مادام الحڪم نفسه ما يهمني السبب

أبتسم بانتصار وهو يدفع آصف عنه

ـ واعتبر رجعته للسجن هدية منصبي الجديد 

اجى يحجي آصف وسكت من شاف ادم بيناتهم يفاكك بيهم

يباوع على سراج والله لزمني گلبي وخفت من الشر الشايله بنظراته نغزني گلبي زعم يسوي شي الـ سراج هذا شراني 

آصف:- سهلة نتواجه بعدين 

جاي يمشي وسراج صاح وراه 

ـ الحساب بيني وبينك لا ادخـل لؤي بيناتنا 

ما اندار بس هز راسـه بتوعد وهو يمشي، آدم يباوع على سراج سأله شصاير شعنده وياك 

سراج ربت على كتف آدم وكال له بعدين نحجي باوع على الموجودين تعذر منهم 

بسمه:- حجي 

التفت عليَّ اجـاني كتله تعال خلي اشوف خشمك

سراج:- لا تخافين مابيه ڪسر

ـ واذا تعال 

مشينا للغرفة شفته اله مابيه شي نظفته من الدم  

رفع ايده لزم ايدي كتله ها بس لا لجمتك. ڪسر بيده المسلول 

ضحك وهو يڪح، نظفت قميصة من الدم كتله 

بسمه:- ما فهمت شبيه اللي اسمه هاشم 

سراج:- واحـد مجرم واخذ العقاب اللي يستحقه

بسمه:- جا شماله اصف مفرفح 

آدم:- عمــي

التفتنا على آدم ووراه اخته شايله كيكه وعصير بيدها

سراج:- هــا عيناي

اجى شاف خشم سراج كتله:- ما بيه شي ما مڪسور

سراج رفع حواجبه ماشر عليَّ ويحجي ويا آدم

ـ تريد بس هي تڪسره

أبتسم آدم وهو يجاوبه:- الله يصفي النفوس

باوع على قمر ڪالها:- تعالي بابا 

باوعت عليه ولا عبالك ڪلمة يستخدمها حتى ويا جهال تماضر وأبن خالي وابن اصف فسرتها غير شي دهر فر هرموناتي المخبلتني

اجته كعدها بحضنه وهو يكمش فكها ويبوس خدها 

آدم:- تعلمت الا تجي وياي من اعوفها عند عمتي تظل تبجي وراي 

سراج:- لا تخليها تبجي ازعل منك 

فتحلها الڪيڪه والعصير هم وظل لازمه بيده وهي تاكل من كيكتها ودنك تشرب منه باوعت على ايد آدم لازم دبها من رجله 

اجى ياخذها وسراج كال له عوفها يمي راح واني كعدت على الڪرسي عيوني عليه من خلصت نظف ايدها من الكيك نزلها كباله لازم جفوف اديها يلعب بيها وهي فرحانه وتسولف عليه بـ لهجتها الطفولية 

باوع عليَّ ڪال اي بسومه شو ساڪته 

ما جاوبته ظل يباوع عليَّ صافن بعيوني

كال لا مو لهاي الدرجة لا تكولين غرتي من الطفلة

حجى بتبرير اني احب الاطفال وخاصة البنات يدغدغن گلبي 

لا عبالج احبها لان بنت

سڪت واني هم ما حجيت ظليت اباوع عليه وهي رفعتله اصابعها تشوفه شلون تعلمت الحساب للخمسة

سراج:- عفية بقمر الشطورة 

بسمه:-راح تبقى هنا ما تروح

سراج:- مرتاح هنا

اذا ضايقتج اروح 

التفتت بوجهي على جهتي اليسرى وجاوبته ما ضايقتني

لزم جفها يضرب بيه بجفه سألني

ـ يمتى ترجعين

ـ ما أرجـــــــع 

كال بسبب هالحاقد هسه ما اڪدر اتفاهم وياج 

ـ ليش انت يمتى ڪدرت تتفاهم وياي أصلاً ما اهمك 

باوع عليَّ بدون مايلتفت

ـ اذا انتي ما تهميني منو اللي تهمني

اجى ولد عنده علاج شديتله كانيولا وركبت المغذي اله رجعت كعدت بمكاني اباوع على سراج يحرك بفڪه الاسفل منا ومنا وصوت احـتكاك اسنانه يڪزبر الجلد 

دخلت مرة وبنتها سراج طلع ما ڪدرنا نحجي بــــعد اجى خالي حتى يرجعني بالطريق كتله اريد اخذ معلاك 

كال جنج على معلاك راح شلون اجيبلج من واحد اصابعج تاڪلينها وراء، وصلنا كبال المطعم قريت اسمه ابتسمت نفس اللي يجيب منه سراج

نزل خالي بقيت ڪاعدة بالسيارة روحي ساحت على ريحة الاكل حطيت ايدي على بطني اباوع كبالي بدون تركيز ومبتسمه واني اتخيل فرحته سألت روحي شنو يمتى اخبره بالحمل  

لكيت روحي صافنة على رجال واكف كبال سيارتنا فلك طرني شوف الفشلة نزلت عيوني هسه شيڪول عليَّ الرجال انوبه منتبه عليَّ 

اجى خالي فتح الباب الوراء متت على الريحة خالي صعد واني ما اتحملت مديت ايدي طلعت قطعه اكلتها

ضحك خالي وهو يفر الاستيرن وصوت طن طن

لؤي:- شني خالي مكطوع بيج 

حجيت واني اريد اخذ وحده ثانيه كتله

بسمه:- والله من النساوة تعرفني مو

وكف السيارة صحت يمه حبيبة

باوع عليَّ ايدي بعدها ممدودة ليورة

لؤي:- حامل خالي!!! 

ييبووي جفصت كباله ماراح يصبر ويروح يخبره 

أبتسمت كتله اي اليوم حللت وطلعت  حامل

ضحك وهو يرفع اديه يكول يا الله 

دار عليَّ كال اشو تعالي 

حضني وهو يضحك وبعده يحجي يالله نعمتك 

رجع اديه على الستيرن كتله 

ـ هاي الفرحــه أليَّ لو للحجي

ضحك ما جاوبني ظل ساكت بعدين جاوب

لؤي:- الڪم اثنينكم

باوعت عليه اعرفه يجامل والفرحة هاي خاصة لسراج التفت عليَّ كال شنو بنفسج بعد

بسمه:- بس المعلاك 

اكلت قطعتين وعلى الريحة راحت مشتهاتي 

ـ بسومه خالي من تشتهين اڪله لا تستحين وصيني اجيبلج اللي بخاطرج يعمي تدلل علينا مرت الحجي وابن الحجي 

رجعنا على المطعم كتله ها خالي شو ردينا 

نزل وهو ياخذ تلفــون كال راح اعزم سراج وعجايزة على العشا

راح جاب اڪل وهو يحجي بالتلفون حطه ورا لا بعد ما اتحمل كلش نزلت كعدت ورا فتحت منه واڪل صايرة كلش مهورعة ماجنت هيج خالي يباوع عليَّ بالمراية ويضحك

وصلنا للبيت واني شبعانه ولعبانه نفسي حتى ريحة الاكل شبعتني اريد استفرغ

نزلت بسرعة غسلت وجهي سألني ها خالي بسوم اخذج للمستشفى

هزيت راسي كتله لا واني هم من باجر اشوف دڪتورة اتابع عدها الحمل سديت الماي ودخلت وراء صاح ارنوبي وينج

اجت وهي شايلة بنتها فدوة اشڪد حلو ملڪاها حتى لو نطلع نص ساعة ونرد تلاڪينا بملڪه حلو 

خالي كالها هذا عشاء جبت وشعندج رتبيه وياه الحجي وعجايزة يتعشون هنا شوية ويوصلون

درة:- هلا بيهم تحل علينا البرڪة 

أبتسم خالي باوع عليَّ وكالها بسمه حامل

انطته بنتها واجت بسرعه حضنتني باوستني وهي تبارڪلي وتدعيلي بالسلامه 

بدلت وطلعت خالي يباوع على الساعة كال شصار عدهم اتصل على سراج فاتح حاڪيه كاله 

ـ ولك شبيك خبصتني هسه راح اطلع 

لؤي:- وسم وزهر عشاڪم برد

سراج:- هذا مو عشه سم

ترى اخلي وابـطل 

لؤي:- اجيب العشاء والاهل واجي عليكم

سراج:- بروح ابوك سويها وجيب الحڪومة وياك 

بنت اختك مثلك ما تنجرع بالزعل طلعت روحي وماترضى وحتى هي ماتعرف شنو تريد

خالي باوع عليَّ وحجى 

ـ الحكومة زعلانه بسبب الوزارة 

سراج مافهم عليه كال له يلا دقائق واني يمكم حتى ارجعها وياي 

گلبي يدك واني اتخيل فرحته عبست وجهي منو يڪول يفرح فركت كصتي فلك الهرمونات لاعبة بعداداتي دك الباب طلع علاوي يركض وابوه وراه 

اسمع اصواتهم يمه حبيبه شبيه صرت ارجف كمت تلڪيتهم ويا درة الحجيات فدوة لكلبهن يشمني شم

عمته دخلت وامه خالي دفع الكرسي دخلها باوعت على سراج كال

ـ اي باسم ضلعي شنو مالي سلام ترى اني سلامي مختلف

ـ شلون مختلف بله 

باوع وراي مد ايده سد باب الصالة وسحبني باسني بشفتي وخرت عنه كتله فلك صاير كلش انت

ضحك سحبني باس خشمي لزم ايدي ودخلنا جوه اجرها منه عاصرها حيل ويحجي بيني وبينه ابوية عيب استقري شبيج 

خالي باوع علينا يريد يشوف حجيت لو لا عرفني ماحجيت لان مابين على سراج 

كعد مكعدني يمَه حجيت ورا راسه 

ـ عوف ايدي عيب اريد اروح اساعد درة

باوع عليَّ والله اثنينا خطر سريع الاشتعال ابتسم عاف ايدي مشيت بسرعة للمطبخ درة شافتني وضحكت كالت صدك سلامه مختلف 

ـ يمه فلك شفتينا

ـ اي عبالي دخلتوا ردت اطلع من باب المطبخ وشفتكم 

يول ليش ماترجعين ترى مبين عليه يحبج

كتلها لا هو هيج تعامله وياي ماله علاقة بالحب 

رتبنا العشا واني الف شالي على خشمي اجى خالي اخذ السفرة رحت حتى اكابله عليها لكيته هو وياه جاي يفرشون بيها 

نقل الاڪل نزلت الشال عن وجهي كوة متحمله احس نفسي شبعانة كلش والريحة جاي تزيد عليَّ 

سراج:- ليش ماجاي تاڪلين

بسمه:- اكلت بالطريق وشبعت

منا لمن خلصوا اهيس روحي تصعد وتنزل انوب لا اكدر اكوم عيب منهم خاف ياخذونها بغير قصد 

جاي يشربون جاي واني لا، كارهته ولا ذيج المدمنه عليه خالي يباوع والضحكة على وجهه 

لؤي:- اي حجي اذا يجيكم ولد اني اسميـة مثل ما انت اختاريت اسم أبني 

سراج نزل الاستكان على الطبله وهو يضحك ويجاوبه

ـ ابوية انت بس خليها ترجع وسمي حتى الثاني والثالث

اباوع على الحجيات يحجن وياي حتى ارجع 

لؤي:- لا خليها تخلص النساوة هنا يمي

عيوني عليهم ودرة تضحك وتباوع بوجوهم اشوف سراج بقى ساڪت بعده جاي يستوعب والحجيات طكنا بالهلاهل عيوني على امه تبجي وتهلهل وتصفك وتصلي على محمد احتارت شلون تعبر عن فرحتها وعمته ما حفظت هوستها عيوني على سراج يباوع عليَّ والعيون يمه شكت گلبي نظراتها حجى بصوت مشحوط 

ـ حــامل! 

هزيت راسي اي 

ضحك وهو يكوم اديه تمسح بجيوبه يتلفت وين يروح وعلي فقد الزلمه خالي كام حضنه وعمته وياه وامه فاتحه اديها تريد تكله تعال 

عيوني على اكتافه شلون تهتز وخالي دموعه تصب مرر ايده من ورا رقبة سراج ويمسح بدموعه 

باسه بجتفه وخر عنه وهو يلزم وجهه ويحجي بصوت يرجف من البجي ما اعرف العبرة ما اعرف فرحة

لؤي:- ولك عليمن تبجي

ماجاوب سراج رجع حضن لؤي ضام وجهه ودموعه عنا

خالي اشرلهن بيده يسكتن 

لؤي:- كافي ولك طريت گلبي

بعده عنه يمسح بوجهه صاير احمر دنك لمستوى عمته حضنته وهي تبوس وجهه باس راسها وايدها وراح على امه ركع كبالها حاضنته وتبجي وهو وياها بس بدون صوت 

خالي حضن عمتهم من اكتافها ويباوع على سراج وامه وهو يمسح بدموعه 

لؤي:- بويه ڪافي كلبتوا الفرحة مناحـة

باس راس امه ويمسح بدموعها وجهها احمر اخذت راسه حضنته رافعت وجهها تدعي ومحتارة شنو تحجي 

وهو ضام وجهه بصدرها وهالمرة يبجي بصوت 

باسها بوسات هواي براسها نهض وهو يلتفت عليَّ اجاني بسرعة حضني باوعت على خالي خجلانه شفت دنك وطلع 

باس جتفي ووجهي وراسي حجى بذاني بصوت رايح

ـ شسوي 

والله لو اصبج ذهب على طولج ماراح اكدر اوفي حق هاي الفرحة 

مسح دموعه بكتفي وهو يحضني اقوى بعد عني اريد اضمه بگلبي عافنا وطلع امه اشرتلي رحتلها بسرعه حضنتني وتبجي خلتني اناشغ وياها تريد تاخذ ايدي تبوسها سحبت ايدي ودنكت اني بستها بديها

بجيت خلتني افرفح وهي تكلي خلي ابوس بطنج خاف ما مكتوبلي عمر والحك اشوفه 

ـ عسى عمرج اطول من اعمارنا 

باذن الله تلحكني وتزوجينه بيدج

مارضت الا تبوس بطني وهي تناشغ وتحجي ولك يمه سراج هيج واشوف  ضناك واشم ريحته يابعد امـك

رحت لعمته حضنتها واني ابوس راسها وامسح دموعها 

عفت درة تهدي بيهن وطلعت للديوانية لكيته كاعد على السجادة وحاضن خالي 

سراج:- ولك لؤي والله خايف هم ماتكمل فرحتي

لؤي:- لا تحجي هيج تكمل بعون الله

ولك تعال كلي اني شصير جده لو عمه

مد ايده لازم راس خالي 

ـ طبعاً عمه شنو تخلي ابني بدون عم

رجع على سراج حضنه:- شتريد اصيرله حتى لو حبوبته

ضحكوا اثنينهم خالي كال اذا ولد اسمه حسن خوش حسن اذا غيرته اعرض بزردومك

سراج:- اذا ترضى امه هاي هي حسن

لؤي:- ترضى عود اذا مارضت اني اقنعها

باوع واحد على الثاني وضحكوا خالي ضرب سراج وهو يكول

لؤي:- ولك عيب وفشلة اني خال البت اشو جني استحيت من روحي

ضحك سراج وهو يلزم ايد لؤي رفع نفسه باسه براسه ورجع كعد وياشر على صدره

سراج:- انت اخـــوي الكاعد هنا بالنفس فرحتنا وحده ما تتغير بسبب العلاقات الثانية 

 رجع سجد سراج خالي دنك باس راسه وكام كعد على القنفة رجعت للصالة امه مدت ايدها كعدتني يمها وكل شوية تبوسني 

كالن ترجعين ويانه ماكو بعد ما ارجع 

تفاهمت وياهن وقنعتهن ارجع بس احتاج ڪم يوم 

دخل خالي ڪال بسومه روحي للديوانية زلمتج يريد يحجي وياج 

رحت للديوانية كاعد بعده على السجادة من شافني ابتسم وهو يمد ايده تقدمت عليه انطيته ايدي سحبني مكعدني كباله يباوع على بطني حط جف ايده عليها رفع عيونه لعيوني

سراج:- اجـمل خبر سمعته بحياتي

ابتسمت رفع ايده الثانيه حاضن بيها جانب وجهي ويحرك ابهامه بلطف جوا عيني

ـ طول عمري اخاف من الفرح اخاف من اللي احبـه يروح مني

ما ادري شلون اشرحلج بس احس الدنيا كلها تغيرت بعيوني جنت اڪول لنفسي خلص العمر واللي ما صار بوقته ما راح يصير ورضيت بواقع اني اختاريته وحرمت نفسي من الحياة واليوم فهمت مو كل شي احنا نختاره ارادة الله هي اللي تختارلنا،، اختارلي حياة جنت اني رافضها واختارلي فرحة جنت بس احلم بيها الله اخر هالفرحة مو حتى يحرمني منها لا حتى تجيني بالوقت اللي اعرف قيمتها ومو كل شي حسبناه انتهى يكون انتهى فعلاً

ضم اديه بين اديـــه دنك باسهن 

سراج:-ارادة الله اكبر من كل شي ڪلت عنه مستحيل يصير 

نزلت راسي على راسـه رفع وجه باسني بخدي وانتقل باسني بخدي الثاني سحبني مكعدني بصفه 

سراج:- راح ترجعين وياي

بسمه:- من اتاڪد انت نسيت ارجع وياك

سراج:- هم رجعنـا لنفس السالفة 

بسمه:- ليش احنا ابتعدنا عنها حتى نرجعلها 

سراج:- باسم بسوم بسمتي ضلعي حكووومتي كتلج ما عندي زر ادوسه وانسى شي عشت عليه من مراهقتي لهذا عمري 

ترديني اجـــذب عليج واڪلج نسيت ما اڪدر اجذب اريد اظل دوم صادق وياج 

حطيت اديه على صدره ومايلة عليه بجسمي

ـ مادام هيج احجي الصدك هسه ما ازعل اللون العنابي من يمتى تحبه؟ 

ـ من شفته بكنتورج وحبيته عليج بيوم عقد مهند من لبستي الفستان قبل لا اعرف هاللون ولا منتبه عليه 

فرحت بداخلي بس ما بينتله

ـ يعني خاص بينا

يحرك بصبعه على شفتي كال بتنهيدة :- كلش خاص بينا

على كولت لؤي روحي تهذرف

وهسه اني روحي تهذرف على هذني

سحب الشال من راسي رفع ايده فتح الكماشه منزل شعري اللي بلش لونه يخف اخذ خلص نزلها على جانب وجهي 

دنك وجهه باسني بشفتي غمضت عيوني واني اخذ النفس بصعوبه وكلبي يرفرف برفات توجع وحلوة

سند جبينه بجبيني وجفوف اديه بعدها حاضنه راسي 

سراج:- راح ترجعين وياي والله من ارجع للبيت عيوني تدور عليج

البيت احسه فارغ مابيه روح بدونج ما اريد اعيش هالوحدة مرة ثانية صح كل شي بمكانه مثل قبل بس ما اله معنى بدونج 

يحجي واني ساكتة اسمع كل ڪلمة منـه ابتسمت جنت اريد يـفهم اني مو شي مضمون بحياته لان خالي صـاف وياه واهلي ڪل شي عندهم ولا ترجعلهم بت مطلڪة حتى امي من اتصلت بيها وكتلها زعلانه رزلتني وحطت كل الصوج بيه 

وهيج عادي عنـدها يضربني ويكسرني بڪلامه اليَّ كرامة ومشاعر واليَّ قيمة لنفسي مو بس هو عنـده ونجرح من ڪلام حجيته بـلحظة غضب هو حتى ما بين ندمه على الراشدي الصلخ وجهي بيه وطلعتي من البيت زعلانه

جان عندي احساس غيابي ما راح يفرق وياه وراح يكمل حياته مثل ما هي عادي عنـده بس بعد هذا ڪلامه تأڪدت أول خطوة تمت وعرف قيمة وجودي بحياته من حس بغيابي

وهسه اجى دور خطوتي الثانية اريد اتأكد هالفراغ والغياب اللي حس بيه مو مجرد اشتياق مؤقت يختفي من يتعود اريد يرجعني لان ماڪدر على فراگي مو لان ماڪدر يتحمل وحدته ويكدر بعدين يتعود عليها مثل ماصار وياه قبلي لو يمليها بغيري

ڪون من ارجع لان اختارني صدك وهاي ڪلمة مو زر ادوسه وانسى الا اخليك تشيلها من راسك واخليك فعلًا حاضر وياي مو بس جسد يمي وگلبك بعده عايش بمكان ثاني 

رفعت عيوني عليه كتله

بسمه:- خلي افعالك هي اللي تقنعني مو كلامك وخلي الأيام تثبتلي  المكان اللي تريدني أرجعله فعلًا صار اليَّ اني احبك ومو شلون ما جانت لا والله هيج احس اشهك حبك بالنفس بس حبي الك ما يعني اقبل بـ اي شي 

اني مو مجرد مكان تنهزم عليه من وحدتك 

نفخ وجهه يباوع منا ومنا حجه بعصبية يعني سشوووي وتتاڪدين بسمه بطلي عناد 

رفعت ايدي لوجهه مشيت اصبعي على عقدة حاجبه حسيته انزعج ونزل ايدي لخده كتله

بسمه:- عناد شنو اني ما امشي  بالعناد ولا اعــرفه شنو هذا اڪله لو لبسه وانت هم بعدك ما عرفت بنت الشطرة زين

سراج:- اها هيج الحجي صار باسم حڪومة

كتله واني اقرب وجهي اباوع بعيونه 

نسمه:- اي حجي ڪشوم هيج صار الحجي

باوعت على العكدة اللي بحاجبه هاي دوم ظاهره حتى من يضحك مررت اصابعي عليها لزم ايدي كال تاذيني

بسمه:- هاي عقدة حاجبك يعني انت دوم بحيرة ومتردد

ضغطت عليها بأبهامي وارفع بيها لفوك غمض عيونه اشوفها زادت وطلعت ببداية حواجبه اثنينهن

بسمه:- الظاهر المكان يذڪرك بموقف وهيج نزعجت

فتح عيونه يباوع بعيوني هز راسه لا

سراج:- عوفينا من هالسوالف وهسه شنو 

بسمه:- اللي براسي كتلك بيه ما ارجع الا اتأڪد

هز راسـه اي نزل ايدي بقى لازمها بيده ڪال

سراج:- شنو بنفسج وشنو تشتهين تتصلين عليَّ ما تخلين شي بخاطرج وما يهمج بالوقت لا تحرميني من هالشي خوش ابوية انت

هزيت راسي اي 

سراج:- هسه الزعلة انتهت

والمطلوب مني اثبات مو

بسمه:- اي

قرب وجهه باسني بجبيني وهو يڪول تمام تأمــر الحڪومة اهم شي الزعل خلص

كال اي ما باركتِ لي على المنصب الجديد 

استحيت صدك ما سألته ولا باركتله كتله هو نسيب خالي غير طير عقلي 

••------------- ♡♡♡♡ --------------••

طلعت بره لسلاحفي بابا امس سوالهن مكان بره بالحديقة لان ڪوثر الانتحارية زاعجتها ريحتهن بس مڪانهن صار يجنن على شڪل دائرة مسوي حاجز من خشب ربع منها مسوي بركة مي وجسر خشبي صغير تصعد منه وتنزل منه والباقي تربه وصخور ومسوي سقيفة خشب صغيرة يحتمن بيها ومحاوط الدائره بشبكه حماية 

صورتهن بتلفون اثو دزيتها لادم كتله ها حلو مكانهن؟ 

شاف الصورة ورسالتي تاخر بعدين دز راسه الباجة اللي قبل دزيته اله وكاتب جواه اي حلو خوش تصميم

صورتله فيديو السلحفاة اللي جابها شلون دتسبح وكبرانه دزيته اله من شافه كتبتله 

ـ وهاي امانتك يمتى تاخذها

شوية ودز ليش اخذها جبتها الج 

ـ الي لو للمكتب

ـ الج مزنه 

ابتسمت جنت متأڪدة بس اريده يحجي

دز اشتريلج هاي

باوعت بالصورة سلحفاة صغيرة خضرة وبيها صفار بصدفتها تخبل

زمزم:- ڪلش حلووووة

آدم:- تمام عجل راح اشتريها

بسرعة دزيتله لااااا ترى بابا مايقبل على هاي ويوميه يريد يشمرها النوبة اجيب ثانية منك

مادز شي سديت التلفون فتحت الشبكه دا انطيهن اكل واجتي رسالة

ـ ترحن وياي باجر

سايقنا من امس عنده فاتحه وبابا كال اني اخذجن علما يرجع

كتبتله لا بابا ياخذنا 

دز ها عبالي اوصلجن ويا عسل

كتبتله انت توصل عسل ويمها عشرة علامات استفهام

دز اي بالدوام الصباحي اخذها بطريقي

ـ عووفها احنا ناخذها ويانا 

مارد انتظرته يرد طول وصار 9 دقائق على رسالتي اتصلت عليه 

من جاوبني كتله ليش مارديت

ـ عندي شغل 

ـ ترى كلها حرفين لا 

ما تاخذ منك نص ثانية

آدم:- وليش لا 

زمزم:- يعني راح توصلها

آدم:- اي عمي وصاني عليها

زمزم:- اي تروح ويانا ترى ماراح نخطف الفستقة 

آدم:- نبرتج تخوف واخاف على بنت عمي منج 

زمزم:- آددددم

آدم:- هـــــــــلا

حجيت بهدوء احنا ناخذها ويانا

ظل ساڪت حجيت بسؤال ها؟ 

آدم:- تمام 

أبتسمت سألته شنو ماما نفس يمتى ترجع

ـ باذن الله هاليومين

ـ ترجع بالسلامه 

من ترجع نزل قمر علينا مشتاقتلها

آدم:- صار 

ظليت ساڪته وهو هم بس اسمع صوت حرڪة قريبه منه وصوت قمر تحسب مديت ايدي احط بالاكل للسلاحف والتلفون بعده على اذانـي

آدم:- مـــــزنة

جاوبته ها 

سڪت سديت الشبڪة كال يلا مع السلامة رديت مع السلامة …

بالليل جاب قمر علينا وصى ماما عليها من الباب وراح بقت يمي ساعة واجى اخذها دخلت ماما عليَّ بيدها ريزو كالت آدم جابه الج

أبتسمت واني اخذه منها انتبهت عليها تباوعلي وما عاجبها 

فتحت تلفونها شوفتني المحادثة اني ماحذفتها عادية 

اثيلة:- ليش تتواصلين وياه

زمزم:- شنو ليش؟ 

اثيلة:- زمزم اللي براسج شنو؟ وشعليج يوصل عسل لوما يوصلها

ظليت ساڪته افر بعلاڪة الريزو وهي تحجي عليَّ 

اثيلة:- تواصل وياه ممنوع مو صغيرة انتي ترى لا ابوج يقبل ولا اني خووش وبعد ممنوع تفتحين تلفوني وجيب تلفونج 

زمزم:- بس اني ماسويت شي غلط ليش تاخذين تلفووني

اثيلة:- تواصل ويا آدم شنو صح؟ هذا أڪبر غلط 

دمعت عيوني كتلها ترى مابيها شي محادثتنا وآدم شنو جديد عليَّ ترى ابن عمي

اثيلة:- مو جان اخوج اجبير 

عفت الريزو طلع من نفسي مدت ايدها اخذت تلفوني من ايدي الثانية

اثيلة:- ابن عمج تمام بس مو معناها كل الحدود تنشال

زمزم:- ترى ماحجينا شي يخليج هيج عصبية كل كلامنا عن السلحفات 

فتحت تلفونها دارته عليه كالت 

ـ شووفي مدة المكالمة ساعة وفوك شنو تتناقشون بطريقة تشريح السلاحف

ـ صدك هذا الوقت اشو ماحسيت!! والله كلهن كم كلمة كتله ناخذ عسل ويانا وسالته على ماما نفس ووصيته يجيب قمر علينا 

باوعت عليها كتلها:- والله بس هيج حجينا شنو دتشڪين بيه شنو ما تثقين بيـة؟ 

اثيلة:- اني مو شاكة بيج اني مسؤولة عنج وأكو فرق جبير بين الاثنين

وعندي ثقة بيج بس مو معناها اعوفج بدون حدود والثقة اللي بينج وبين ابوج تلتزمين بڪلامه حتى لو ما جان يمج 

ظليت ساڪتة بسبب بابا وتحذيره خلاني اغير نظرتي عن آدم وهسه زادتها عليَّ اثو مسحت عيوني 

اثيلة:- ما اريد ارجع افتح وياج نفس الموضوع أول مرة اعتبريها تنبيه واضح اذا تكرر ما احجي وياج وافهمج المرة الثانيـة الها عقاب

مو تشوفيني متراخيـة وياج معناها اقبل بالغلط واطبطب على ظهرج 

كالت يلا اڪلي الريزو قبل لا يبرد كتلها ما اريد راح انام 

عفتها ودخلت حضرت جدولي ونمت حتى تنظيف البيت مانظفته ولا غسلت الكراج 

يومين واجت ماما نفس رحت سلمت عليها ورجعت بسرعة قبل لا اشوفه ويشوفني اثو رجعتلي تلفوني وهي توصي وتحذر ما تواصلت وياه ولا هو هو أصلاً من الاساس مايتواصل وبس هالمرة صارت واڪلت حجي حسيته كسر بيه شي 

 ••------------ ♡♡♡♡ -------------••

بــــــــــــــــــــسمة 

مـــر يومين على معرفتـه بالحمل وبڪل وقت يتصل ها بنفسج شي اجيبه 

من اڪول لا يظل يحلف بيه لحد ما اڪله شنو استحي منك ترى والله ما بنفسي شي

سراج:- راح اجيب مشاوي لا تتعشين نتظريني ترى من البارحة على لحم بطني

بسمة:- يمه حبيبة ليش حجي ترى موزين عليك؟

سراج:- مشغول وحتى للبيت هسه يلا رجعت 

يمتى ترجعين؟

بسمه:- لا تسألني اسأل نفسك

سمعت صوت باب الڪنتور كال تمام بسوم 

المهم راح اسبح واطلع انتظريني خوش

بسمه:- خوش 

قطعت الاتصال نهضت جهزت نفسي لبست بينصل اسود نص ردن وفوكاه بشت بيجي رتبت وجهي والعطر سبحت بيه حتى خنكت روحي اباوع على نفسي بالمراية اعدل بشعري واحجي وحدي

ـ يلا خلي اعيش شعور البدايات 

طلعت لدرة خالي بعده مارد للبيت وكفت كبالها سألتها شلوني

درة:- من علايم الحجي باليستية

ابتسمت كالت بسومه ام آدم اجتج وقامت بالواجب ترحين تسلمين عليها موو؟ 

بسمه:- ما اڪدر اروح الا أخــذ أذن الحجي

سمعت صوت خالي دخلت للغرفة لبست حجابي لان البينصل دلعته جبيه شلون الطبكات ونازل 

طلعت سلمت عليه وڪعدت وياهم بالصالة اسمعه يڪولها اخوج شنو مارجع

درة:- لا بعـــده 

ندك الباب طلع خالي شوية ودخل وبيده صينية مشاوي كال سراج ما رضى يدخل يريدج بالحديقة

دنكت راسي مستحية اريد اطلع وكال

لؤي:- بڪل حبالة تعالي اكعدي هنا خالي بيت مفتوح الج ولصياني المشاوي

طلعت واني اضحك لكيت سراج كاعد على المرجوحه ويم صينية مشاوي وعليها خبز وبطل لبن

تقدمت عليه جان يحجي بالتلفون سده ونهض مديت ايدي حتى اسلم عليه لزمها وهو يسحبني صرت بين اديه باسني بخدي كال هيج السلام وهسه شلونج

بسمه:- اي هيج السلام الله يرحم ايام جنت تسلم عليَّ بطرف اصابعك

ضحك كال جيبي كلاصات وتعالي ترى تملخت بطني واحس ضغطي هابط مو وقت تصفية حسابات

رحت بسرعة جبت جهاز الضغط من خانتي ومريت على المطبخ اخذت كلاصين غسلتهن  واخذت الملح طلعت عليه يعصر بكصته وكفت كباله نطيته الكلاصات والملح وسحبت ايده لفيت الربطه عليها لبست السماعة قسته اله 

بسمة:- سراج صدك تحجي الواطي نازل درجتين

كال ماعليه هسه اكل واشرب لبن يصعد 

بسمه:- شنو هذا الاهمال

سراج:- غير انتي هاملتني

بسمه:- ليش يمه اني شمسوية شني اڪل بمكانك انت مهمل لا تركب الصوج براسي

سراج:- كتلج ما أڪل بس بالليل واذا وحدي ما اكل وانتي عايفتني وڪاعدة هنا هاملتني ڪلش وصايرة عديمة الرحمة 

حطيت الجهاز على صفحه كعدت بالطرف الثاني صبيتله لبن اخذه مني شربه كال صبي بعد الدوخة ساطرتني صبيتله وفتحت الصينيه اخذت خبز حطيت شيش كباب وعليه طماطه ملحتها لفيتها رفعتها اله

بسمه:- اخذ يبعد روحي اكلها 

سراج:- تسلملي روحج 

اخذها من ايدي سندت عكسي على حديد المرجوحه الي وراي وهو يحرك بيها برجله اباوع عليه ضحكت على افكاري، من خلص لفته سويتله ثانية حطيت بيها تگة دجاج نطيتها اله واني اخذت قطعة من عرايس لحم اڪل بيها كوة مجرعته بس حتى اشارڪه

سويتله لفة ثالثة ماقبل ياڪلها كال ما اريد اشو شبعت 

بسمه:- بس هاي لخاطري

ابتسم اخذها من ايدي وهو يبوس اصابعي اباوع عليه ڪوة اڪلها كال صبيلي لبن وحطيت عليه ملح

صبيتله ورشيت عليه ملح قليل شربه وهو يلزم كصته

بسمه:- بعدك دايخ

سراج:- لا زين هسه بس انعس شوية واروح

كتله هذا الزاد اخذه وياك اعرفك ساعة وتكعد من تڪعد اڪل منه 

سراج:- شتڪولين لو ترحين وياي ونرتاح اثنينا من هالتعب والبعد

حركت راسي لا ابتسم راح غسل واني رحت جبت طبلة حطيت عليها الصينية وغطيتها رحت سويتله جاي ورجعت عليه كاعد يدخن 

سراج:- انزعي حجابج 

شوفي الهوا شلون حلو واعذيبي

نزعته خليته على كتفي سحبه خلاه بصفه يباوع عليَّ مبتسم 

 

عيونه نزلت على دلعـة البينصل رفع عيونه لعيوني

سراج:- خوما طلعتي هيج كبال خالج

بسمه:- لا شلقصة لابسه حجابي 

ابتسم مد ايده يمشي بظهر اصبعه السبابه من نهاية رقبتي لنهاية الدلعه يصعد وينزل بعدين ظل يرسم بدائرة مفتوحه على نهاية رقبتي

سراج:- ليش رگبتج فارغة!! 

جنها على كلادة ناعمة بس خلي افرغ واخذج للصايغ 

بسمه:- ما اريد غير شي واحد وانت تعرفه

تنهد ماجاوبني، اخذت حجابي لبسته رحت صبيت جاي بس اله ورجعت عليه اخذه من ايدي 

سراج:- عاشت ايدج اجى بوقته 

نزعت حجابي وكعدت بمكاني مد ايده ساندها على الحديد واصابعه تكتب على ظهري النوب فتح الكماشة من شعري

سراج:- خلي الهوا يلعب بيه 

اخذ الشال لفة على رقبتي وينزل بيه وهو يكول

سراج: ترى اني مو ذاك سراج الاعزب حارمتني ومطلعه هالجمال ڪبالي ماڪو رحمة   

ظلينا نسولف ماشال عيونه عني اخذت الجهاز جاي الفه على ايده سحبني كعدني بحضنه بعد الشال ضام وجهه برقبتي رخت اديه واني انزل وجهي على راسه 

بسمه:- سراج خلي اقيس ضغطك

جاوبني صعد مايحتاج تقيسينه

اخذت ايده قستله اباوع على الجهاز وانفاسي متخربطه بسببه، شفت القراءة طبيعي نزعت السماعة وفتحته من ايده اريد اكوم وحضني مانعني

بسمه:- عوفني سراج لا خالي يطلع  

سراج:- مايطلع مادام اني كاعد هنا 

فتحت اديه كتله:- يسويها الحظ ويطلع كعدت بمكاني احاول اسيطر على نفسي باوعت عليَّ 

سراج:- ڪافي دلال وارجعي وياي محتاجج يمي

بسمة:- دلال! 

لهسه ما جاي تشوف حقي وتفسره دلال لو اعناد وتريد ارجع وياك لا ما ارجع

عدل شعره بصابعه اخذ تلفونه والسويج ووياهن جهاز وكام

سراج:- تصبحين على خير 

كالها بدون ما يباوع عليَّ مشى بتجاه الباب واني احجي وراه

ـ اخذ هاي الصينية 

ـ تسممت ماريد

ـ ياا شماله الزلمه

التفت عليَّ كال لا شماله مابيه مرته بمكان وهو بمكان

ابتسمت خزرني مشى على الباب فتحه وطلع من سده كلت

ـ يايمه الزلمة تسودن 

ثاني يوم رجعت من الجامعة وبنفسي زوريات هيج روحي تلوب، اتصلت عليه جاوبني هلا بالحڪومة

بعد ما سلمت عليه كتله مشتهيه زوري شوي وبصل احمر وطرشي مدبس 

سراج:- اشوي الج لو انتي تشوينه بالبيت؟ 

بسمة:- لا اذا اشويه واشتم ريحته اشبع وهم مرت خالي خطيه تلعب نفسها من السمج

سراج:- صـار أبوية

قطعت الاتصال واني مبتسمه، مرت ساعتين يلا اجى رتبه الي كال جيبي سجينه اقطعلج البصل 

كتله لا فدوه بدون سجينه تلعب نفسي وما اكله بعد

ضحك وهو يكول بالشقى

سراج:- جا شلون افتحه اعضه بسناني

حطه بالكاع وافشكه بيدك التفت عليَّ مفهي بوجهي كال هااا! 

بسمه:- شنو ها افشكه بيدك

ضحك وهو يكعد على حيله كال 

ـ ولج باسم هاي ضربه قوية لانوثتج الطاغية 

كتله واني افشك البصل:- هي ظلت انوثة من وراء ابنك 

كال الف عافيه عليه والفين على أمه

كعدت اكل وهو كاعد على القنفة كبالي يدخن يباوع عليَّ نسفت السمج ڪله 

من كملت كتله جا ليش ما اڪلت 

سراج:- شوفتج وانتي تاڪلين شبعتني

اذا تردين اوصيلج بعد

بسمه:-لا شبعت كلش

ضم ضحكته وهو يكول الف عافية ابوية 

لميته على السريع شمرته بالحاوية البرة لا تشتمه درة تتخبل منه غسلت ورجعت للمطبخ اخذت هيل اكلته

فتحت الثلاجة اخذت ثلج كسرته ورجعته للدولكة روحي بيه على طول كعدتي بالبيت اكرط ثلج رجعت كعدت كباله دولكة الثلج بحضني اطلع منها واكرط عكش وجهه 

سراج:- خررب اسناني 

بطلت كتله يمتى تروح

سراج:- اخذج وياي للمجمع فرد مرة لؤي اليوم هو والليل يلا يرجع للبيت

هزيت راسي اي وعيوني على الثلج اريد اكرط ولازمه نفسي

تذكرت امس ماكتله

بسمه:- عادي بالليل اروح على ام آدم اسلم عليها

اباوع على وجهه عصرت الدولكة بين اديه من شفت ملامحه شلون تغيرت طول يلا كال اي عادي

ما حجيت شي بس هزيت راسي اي 

سراج:- راح اروح من تكملين اجي اخذج

كتله خووش بدون ما اباوع عليه وهو هم ماكال شي طلع مثل الشارد من عيوني

بقيت كاعدة عيوني على الثلج طالت كعدتي وحتى الثلج ماع واني على نفس الڪعدة اجى علوش جايب تلفوني اخذته منه 

فتحت خط كال ها كاملة اجي اخذج

رديت عليه:- ما اروح اليوم

رد براحتج 

مارديت نزلت التلفون واني افصل الاتصال عيوني بعدهي على الماي ما تحركت بعد ڪل هالتعب والكى نفسي وياه بنقطة الصفر من مجرد ذكر اسم

بالليل حاولت اجبر نفسي واروح اسلم عليها ماڪدرت، طلعت للصحيات اسمع صوت مصايح طار گلبي هذا الصوت لسراج ما صدكت اطب والڪف حجابي لبسته واني ارڪض للباب ودرة وراي تصيح شڪو 

وصلت للباب اشو ماڪو اصوواتهم مثل مساع فتحت الباب مديت راسي لهناك واڪفين آصف وسراج وخالي بيناتهم ماد ايده على سراج لازمه من ياخته اجى يسحب ايـده بسرعة سراج لزمها قابض ايده عليها بقوة

سراج:- هيـــــج صار الحجي لؤي 

اني انعثل! 

لؤي:- هاشـم ورجعته للسجن حجي زايد لا تحجي يا اخي الدنيا ما ادور بس بيـك 

سراج دفع ايد خالي مثل اللي شمرها شمر، دك على صدره أبتسم وهو يڪول لخالي

سراج:- ممنون منك لؤي 

صحبتك وعشـرتك هنا تنڪطع

لؤي:- سد حلكك شنو هالحجي 

ما حجى انطاه ظهره ومشى خالي حاول يحجي وياه مارد عليه رڪب سيارته وطلع

خالي وكف متخوصر يباوع على آصف رجعت راسي ودرة تسال ها شڪو شبيهم

كتلها ما اعرف بس جـنِه سراج زعل من خالي

أبتسمت وهي تجاوبني:- كلها تزاعـل الا سراج وخالج هذول روح وحده 

رفعت اكتافي بمعنى ما أدري دخلت جوه تلفوني يدك شفته أسم سراج 

فتحت الاتصال كال بسـمه هي ڪلمة و رد غطاها ترجعين لو لا

ـ كتلك ما ارجع ويــاك

سد التلفون بوجهي، صحبة خالي وسراج وخوتهم الحلوة ما فڪرنا بيوم ولا توقعنا تخرب، لان فعلاً اللي يتقرب منهم ويعرفهم يڪول هذوله روح وحده ما تنشطر بس صدمونا اثنينهم