رواية سجين الحب الفصل الثامن عشر18بقلم زهراء الحريري

السجــــــــــين

ثم جاء العوض الرباني بهدوء يشبه الطمأنينة ليعلّمه أن ما كُسر لم يكن نهاية وأن ما رحل لم يكن نصيبه أدرك بعدها أن الله حين يأخذ شيئًا أحببناه لا يترك مكانه فارغًا بل يملؤه بما هو أرحب وأجمل مما تمنّينا فــ خرج من سجن الحب لا بقلبٍ خالٍ بل بقلبٍ عرف أخيرًا أن أجمل العوض هو أن يعوّضك الله

 ••------------ ♡♡♡♡ --------------••

نفـــــــــــــــــس

وصلنا لفرع الشرڪة، شفت آدم واڪف وقمر بصفـه كامش ايدها ضحكت واني اشوف سمر وكيس الجكليت 

أرغد:- راح نشبع تفشخ

نفس:- فدوة لعينها

عيوني على آدم يباوع علينا الضحكة ماليه وجهه ودموعه تجري 

انتظرنا اللي قبلنا ينزلون اجى دورنا نزلنا اسمع صوت الصلوات والهلاهل واصوات الفرح، اجى علينا فاتح اديه حضني قبل ابوه يشم بعباتي 

آدم:- يمه ياهلا بالغالية الراجعه من اطهر بقاع الارض، هنيئاً لكم زيارة بيت الله وتقبل الله عمرتكم 

وهنيئاً لنا عودتكم بالسلامة ويكتبها النا ولكم مرات ومرات يمه الج وحشه بروحي والله 

نفس:- الله يكتبها الك ويرزقك زيارة بيته، ياهيـل ريتي بكل خطوة انت على بالي ياروحها لامك الله لا يجيب الوحشة لـروحك

باس راسي رفعت ايدي لوجهه دنك لمستواي بوسته بوجهه واحس ما اشبع منه رجعت حضنته عيوني على ارغد يسلم على ابوه وامه راح ادم عليه اجوي سلموا عليَّ عيني على اماني وسندي شلون متحاضنين

آدم:- تقبل الله عمرتڪم وغفر ذنوبكم وجعلها بداية خير وبركة عليكم الحمد لله على السلامة يا زوار بيت الله نورتوا الديرة برجعتكم

ما اسمع ابوه شنو رد عليه من اصوات الهلاهل، رفعت ايد احمي عيوني من الجكليت مو بس جكليت سمر اللي جاي يستقبلون الزوار هم جكليتهم يجي علينا، حضنت قمر يمه بنيتي اريد ادخلها لروحي تبوس بوجهي وحاضنه رقبتي بقوة احس كسرتي رقبتي لان مرجعتها بالعباية ليورة بستها بكل وجهها يانبض امج قمورتي شلون ماما ردت عليه بلهجتها دينه(زينة) سمر حضنتنا

سمر:- عمرة مقبولة وسعي مشكور

والحمد لله على رجعتكم سالمين

نفس:- الله يسلمج، يارب نفرح بعمرتج باقرب وقت

اجت لتين هم سلمت وهي تاخذ قمر من ايدي ، باوعت على ارغد يسلم على اخوانه وولد عمامه واحد واحد اخرهم آصف حضنه كاله 

آصف:- بس تبعدني عنك الله مايقبل عمرتك لا تخليني ضايع بدونك مو هساع رجعت من بيت الله مايصير تظل شايل زعل 

رفع اديه حضنه طولت حضنتهم عيوني على أرغد مبتسم ويحجي وياه مبين بعتب ما جاي اسمعهم بس واضح الي،ارغد رفع ايده من وراء ظهر آصف يمسح بعيونه ابتعد عنه ورجع آصف حضنه ايده تمسد على ظهر آصف سمعت منه بس مانسيتك بالدعاء

 الولد تقدموا سلموا عليه ڪلهم واني ارد عليهم اللهم آمين الله يتقبل منا ومنكم ويكتبها الكم قريبا يا رب

آصف وخر ايده عن أرغد بس بقى حاضنه بيده الثانية 

آصف:- ام آدم عمرة مقبولة وسعي مشكور ان شاء الله

نفس:- اللهم آمين تسلم ابو زمزم 

ويوم الكم بإذن الله ونفرح برجعتكم سالمين غانمين

آدم اخذني اني وعماته للسيارة وقمر ويانه اباوع عليهم يسحبون بالجنط 

طبكت سيارة لؤي نزل وهو يتلكى أرغد ويهوس 

لؤي:- هلا بالزار مڪة وطاف بيت الله، اهلا وسهلا بيك يا حيـــاك 

وهذا اليوم يأبو آدم فرحت بيه كل اعضاك ها وها

مبارك والف مبارك عمرة ومقبولة

خلاهم يهوسون بيها وهو تقدم حضن أرغـد اباوع على وجهه ارغد تختلف تعابيره وتستبشر من يسلم على لؤي محبته عندهم مختلفة 

آدم جاب جدته صعدها بالصدر عيوني على أرغد صعد بسيارة يونس ويا ابوه وڪرم طلعنا لبيوتنا هناك لڪيت الكل منتظرنا احلى استقبال بلمة الاحباب 

ارغد ما اشوفه الا من يجي ينام العالم ما قطعت الرجل عنهم والصوغات آدم وسمر متكفلين بيهن اما صوغات عوائلنا اني بيدي اوزعهم الجهال ماعافوني وين اروح هم وراي  

سمر:- مضيعين امهاتهم ويفترون وراج، وانت يول ابو سمرة لو بيدك تنام هين

نفس:- عوفيه فدوة شحلاته وشحلات سمارة 

حاضني يباوع على سمر يعيب عليها بلسانه وسمر تضحك على حركاته

سمر :- ترى مو محبه بيج هذا فرحان بالجڪليت ابو درب على أبوه 

ضحكت عليها هي تحبه تموت عليه واذا احد من الجهال ضربه تتخبل عليهم والجكليت هي اللي تلمله اذا ماڪدر يحصل، بس تحب سوالفه وتجاڪره راحت تساعد البنات دزيت عسل على اثيلة 

اثيلة:- ها ام أدومي 

نفس:- بجعتي ليش ما تجي وياج! 

منو مضوجها 

باوعت على عمتي وامها يسولفن بيناتهن ڪعدت يمي وحجتلي شنو صاير وڪلامها ويا زمزم 

عـرفت بشكل غير مباشر وبدون تفاصيل سراج مرجع هاشم للسجن فـوك الراحة اللي جنت احس بيها حسيت ثلج نزل على صدري ما اعرف شلون أوفيه حقه على هاي الوڪفة لو اظـل عمري كله ادعيله احس دعواتي بعدهن ما يوصلن لذرة من الفضل السواه اليَّ 

مر ڪم يوم ڪاعدة بالصالة راس عسل بحضني هاي عادته من كعدت عندهم لليوم ڪلما تتعب من الدراسة تجي تحط راسها بحضني ولازم ايدي تلعب بشعرها وتغفى نص ساعة واڪعدها 

اجن ام سراج وعمته تماضر مو وياهم مسافرة هي وبناتها وزوجها لايران بس بتها الجبيرة باقية هنا ويا اخوانها، وهسه جاية وياه بيبياتها

فرحت من عرفت بحمل بسمه بلڪي هالحمل سبب حتى يتخلص بيه من ڪل اثار الماضي ويبدي حياة جديدة بقلب حاضر بس الها مو عالق بحبال الماضي 

نطيت الحجيات صوغاتهن وبنت تماضر هم، اخوانها دزوا عليه طلعت سلمت عليهم وكف قريب يحجي بيني وبينـه

علي:- عمه ترى سالفتي يمج مو تنسيني مأجـل السفر للسنة الجاية علمودها

ابتســمت وعيوني على الحجيه ام سراج السعادة واضحة عليها الله يديمها ڪتله

نفس:- الله كريم ماما خلي تڪمل السادس واذا الك نصيب وياها، بيها الخير وقتها هسـه ما اڪدر اوعدك بموافقتها من تخلص امتحانات افتح الموضوع ويا ابوها وامها

اول يوم رمضان اجت عليَّ تماضـر وبناتها وبسـمة وياها 

••-------------- ♡♡♡♡ ---------------••

  تمــــــــــــاضر

ما صدكت وصلنا حجيت ويا ثائر اني حدي لهنا وياكم اروح اشوف اخوي وتبارڪله

دخلوا للبيت واني مشيت لبيت سراج والجڪليت بيدي من يوم خابرني وبلغني بخبر حمل بسمه حسيت الدنيا ڪبرت بعيوني بيومها بجيت بجي احتار ثائر شلون يسڪتني

دخلت للبيت اسمع صوته يسولف على الحجيات حجيت بيني وبين روحي فدوة لصوتك الله لا يحرمنا منك

سراج:- ابوية انتن ليش زعلانات عليَّ، هيج اهون عليجن افااا من عجايزي واني ازمط بيجن واڪول بس هن يتحملني خرزات ظهري

أم سراج:- من تراضي اخوك نرضى عليك 

وعمتي تڪول:- شمالڪم من تالي تتخاربون لا تخسر رفيجك عمه ترى محد يوڪفلك ويسندك غيره

سراج:- الله يوڪف للكل ما احتاج بشر يسندني هسه شلون وياجن  كرهت رجعتي للبيت ما اتحمل زعلجن

اشوه خلي ابوس وجوهجن فدوة اروح اني لهاي الوجوه ابوية انتن  تلعبن على گلبي 

ضحكت على سوالفه وياهن ڪعدتهن ثابته بالغرفة ما يطلعن منها بس وقت الضرورة عايفات البيت فارغ بس العاملة تفتر بيه طلعت جكليت بجفي ايدي واني اهلهل من الفرحة ما عرفت شلون اطفي نفسي ومنا عمتي هم وياي كابلتني بالهلاهل وهي تصفك طشيت الجكليت عليهم حضنته ابارڪله وابجي هالفرحة القطعنا الامل بيها بس الله مايقطع بعبده الف الحمد لله والشكر على نعمته

سلمت على أمي وعمتي اني ابارڪلهم وهم يكولولي الزيارة مقبولة والحمد لله على السلامه

تماضر:- لعد حڪومتك يمتى ترجع

اباوع عليه ضاعت فرحته كانهُ رجعت للواقع بسؤالي

سراج:- بيت خالها ما تريد ترجع تعبت من المحاولات وياها خلي تجيب بالسلامة والله ڪريم لذاك الوقت

باوعت على امي وعمتي ساڪتات رجعت عيوني عليه

تماضر:- لا تڪول دتفكر بالطلاق

غمض عيونه فرك جبينه بجف ايده

سراج:- لا بس تعبت منها ومن الـزعل ما انڪر صح لڪيت راحتي وياها بس زادت التعب عليَّ اضعاف، اكول حقها وبڪل شي معذورة بس اخر فترة احسها  ڪل يوم تتمادئ ويزيد عنادها اذا هي ما تريد شنو أجبرها هاي طاقتي وياها خلصت هنا حاولت بڪل الطرق اوصللها ما قصرت وياها هي رافضة تشوف معزتها عندي ڪافي تعب اريد ارتاح 

تماضر:- ترى مو سهلة عليها سراج وهم الحمل والهرمونات زادت عليها لا تلومها والله لو انحط بمكانها مستحيل اتحمل

فرك وجهه وهو يحط اديه ورا رقبته 

باوعت عليهن هم مثلي ماقابلات على حجيه اللي هو بنفسه مبين ما قابـل بيه 

كالت عمتي انــوبة دار على لؤي وزعل عليه 

تماضر:- يااا صدك عود تزعل من لؤي

ما جاوب طلع من الغرفة، اوف من طعبك اللي متعب نفسك بيه ومتعبنا وياك سراج بيه طبع اذا حط شي براسه بعد خلص أنتهى ومايفكر ولا يحاول يغيره، طلعت وراء لكيته يغسل بسيارته وكفت احجي وياه

تماضر:- مو كلت اخسر الدنيا ڪلها ولا اخسر لؤي

سراج:- هو خسرني من اختار يوكف ويا نسيبه ويتجاوز عليَّ بالحجي موقفه هذا وصل للعظم وڪسره 

تماضر:- وتبقون هيج عيب عليكم مو اطفال انتم ونعلمكم الصح من تالي خلصتوا عمركم سوة من شابت روسكم تذڪرتوا الزعل 

سراج:- اني مرتاح هيج ماريد علاقات متروسة دغش

كتله مبينه الراحة كلش عليك تريد تبجي من اذڪر اسمه كبالك سراج لا تظلم لؤي انت اعرف بيه اشڪد يعزك ويشوفك اخـوة مو بس صديقه

جان يجلف بالاطارات توقف كال 

ـ تماضر انتي شنو خـوية ما تعبانة من السفر روحي ارتاحي 

تماضر:- عززا تطردني سراج

رفع راسه يباوع عليَّ فاتح عيونه واني امثل الزعل ضحك نهض وهو يحضني

سراج:- نظر عيني ونورها والروح وسورها، شنووو أطردج حتى بالشقى لا تحجينها 

لزمته من ذقنه منزله وجهه اباوع بعيونه كتله احجي الصدك حبيت بسمة؟ 

أبتسم ڪال اڪو واحد عاقل ما ينجذب الها ام الانوثة الطاغية الحڪومة المسيطرة والله لو تعرف بحجم المودة الشايلها الها ما تفڪر تزعل ولا ساعة 

بس آه منها ما جاي تنطيني مجال تعيد وتصقل بنفس الموضوع الا تنسى ابوية انتي دكمه ادوسها وخلص نسيت 40 سنة من عمري اني بشر لو روبوت ترى احتاج عمر ڪامل يلا اڪدر انسى

كتله امممم وبعد استاذ سراج شنو اللي يجذبـك الها كمل منا وعوف الدڪمة

حك شعره يضحك مثل اللي تذكر موقف مبين من ضحڪته حجيت بسري الله يدوم هالضحكة على وجهك 

سراج:- طبيعتها ما تصنع عيونها مليانة وقنوعة روحها مرحة واحس عليها الاعتماد كل شي بيها حلو حتى من تزعل ماتڪدر تخفي لهفتها وحبها انجذب لضياعها من تصير بين أديــه وشهگتها هاي عالم ثاني تضيعني بيه

من حس على روحه شنو يحجي ضحك خجلان وهو يضربني على راسي 

سراج:- صرت اراهق بسببها ام البصل

حطيت ايدي على صـدره كتله ڪل هذا وبعدهي ما وصلت هنا 

سراج:- هذا واڪع ببحر ومقيد بسلاسل وهي الله يسلمها ما عندها صبـر تريد ڪل شي كن فيڪون

تماضر:- وتضوج من تزعل على هذا ڪلامك لا تلومها 

سراج:- تعرفيني ما اعرف اجذب الراحة عندي بالصراحة من البداية قبل الخطوبة بلغتها بكل شي حتى نكون واضحين ونتجنب هالنقاشات

بس شلون بيها وهي حاطتني براسها شما احجي ما يوصلها غير الشي اللي هي تريد تسمعه ما تساعدني اتخلص من الماضي هي ترجعني بقوة عليه 

تماضر: هذا گلبك راح يجي يوم وتسحله من هالسلاسل الوهمية وتحرره من كل شي رابطه بالماضي ووقتها راح ينبض لبسمة بالغصب بالطيب راح يصير الها 

سراج:- وشنو عبالج اني ما افرح اذا صار هالشي؟ لا اني اڪثر منها اريد اتخلص من هالعذاب اريد من يمر اسمها ما يرجف هالگلب اريـد من اصفن ما تطلع بوجهي ذكرى النا اريد الماضي يصير مجرد ماضي مو كل ما حاولت اعيش حاضري يسحبني الـه واريد من اشـوفها ما انسى نفسي واضيع بيها ڪل هذا اريده والله 

تماضر:- انت مرتاح لهذا العذاب وماتريد تطلع منه ولا دتحاول أصلاً 

سراج:- استغفر الله ليش محد يصدڪني ابوية انتي وسجين بغداد تعبت من هالقيود اللي مربطتني من سنين ومن هالسجن اللي محد يشوفه غيري احسه روحي مسجونه بيه كل ما احاول اتنفس واطلع شي بداخلي يسحب روحي من كل أطرافها يگطعها قطعة قطعة وبعدين يرجعني اعيش بالالم 

والله اريد اتناسى تعبت احب انسانه مالها مكان بحياتي وحياتها لغيري اريد اتحرر اريد اعيش ويا بسمه بدون ما اظلمها بماضي يجرح كرامتها ومشاعرها جاي احاول بس احتاج وقت ليش ما تفهموني من اڪول ما اڪدر انسى مو مصر ما انسى 

اريد منها تصبر عليَّ وتنطيني وقت وتساعدني بوجودها وقربها مو ببعدها عنـي 

باس راسي ڪال اكمل غسل السيارة واجيب الحجيات واجيڪم نسلم على أبو مهند

مسحت على صدره كتله الله يبرد هالمڪان ويحول الالم لراحة وسڪينة

همس أمين رجعت للبيت ما تـأخر وجابهن واجى سلموا على ثائــر 

 ••------------ ♡♡♡♡ -------------••

دخـل خالي وهو مورث من الاعصاب ويسب بروحه وبسراج وبآصف كبل طب لغرفته وطبك الباب بقوة لدرجة احس شك طبلة اذاني الصوت 

دخلت درة عيونها على باب الغرفة باوعت عليَّ تحجي تهدي بروحها

درة:- الله يهديهم بلڪي للصبح ويتراضون ان شاء الله ما يدخل بينهم الزعل والله لؤي يتاذه ڪل شي عنده ولا سراج 

هيج متأملين زعلهم يبرد والڪلمة الجارحة تتعالج بڪلمة طيبة بينهم  بس صار العڪس تكاطعوا اثنينهم العناد دخل بينهم كل واحد شد روحه اكثر وتحول الزعل لمكابرة رفعت بينهم جدار عزلهم واحد عن الثاني

قطع اتصاله وياي وحتى للمجمع ما يجي وخالي هم رجله ما وصلت المجمع آدم ياخذني ويرجعني وياه، مر كم يوم والوضع مثل ما هو ما تغير ولا احد تراجع وحاول يمد ايده للثاني حتى الحجيات حاولن يصلحن بينهم وماڪدرن ڪل واحد منهم يذب الصوج بالثـاني ويبرر لنفسـه زعلن من خالي وراحـن 

سلمت على آدم ونزلت من السيارة دخلت للبيت امس تماضر رجعت من إيران والعصر خابرتني كالت بالليل أجي أشوفج 

لڪيتها واصلة قبلي تنتظرني بالهلال وبيدها جكليت اول ما شافتني فتحت اديها وتلكتني بالاحضان 

تماضر:- الف مبارك بسومة الله يكتب السلامة الج وللي ببطنج ويجعله من الذرية الصالحة ويقر عينج وعيونا بيه وتشوفينه باحسن حال

بسمه:- حبيبتي تماضر، الله يبارك بيج الحمد لله على سلامتك والزيارة مقبولة ان شاء الله 

تماضر:- تقبل الله اعمالج والله اكثر دعائي جان الڪم يافرحتي من وصلني الخبر ربي يتمم علينا الفرحـة

ترخصت منها دخلت غيرت ملابسي ورجعت عليها ڪاعدة تسولف ويا درة على خـلاف الحجي وخالي

باوعت عليَّ ابتسمت ڪالت أريد احجي وياج 

بسمه:- عن شنـــو أم مهند

تماضر:- عن سـراج ووضعڪم هذا 

بسمه:- الله يخليج ام مهند لا تضغطين عليَّ وحطي نفسج بمكاني تقبلين على روحج هيج؟ 

تماضر:- بسومة اني ما اريد اضغط عليج ولا اريد ابرر لاخـوي بس بعد ما سمعت كلامه اڪولج من باب خوفي عليكم شنو عاجبكم كل واحد بجهة؟

بسمه:- بالنسبـة الي طبعاً ما عاجبني بس اخـوج ماجاي يحاول ويساعدني عاجبه هيج وضـعه هو مابيه غلط اني الغلطانه حبي اله خلاني اتسـرع بالموافقة لو عندي عقل جان سألتڪم عليها منو هاي قريبة لو بعيدة نعمى گلبي  

تماضر:- حشاج من الغلط وهو بنفسه ڪال اني تعبت من هالقيود ويريد  يتخلص من ڪل اثر قديم ليش ما تفهمينه من يكلج ما انسى ما قصده يدافع عن ماضيه ولا يكلج اريد ابقى متعلق بيه هو يحجي عن عجزه يريدج تساعدينه مو ترجعينه 

لا تخلين غيرتج تخليج تفهمين نص كلامه وتركين النص الثاني هو طالب مساعدتج حتى يتحرر ويڪدر يعيش حاضره وياج بس اذا ڪل واحد منكم بمكان شلون راح توصلون لهاي المرحلة؟ ترى الزعل بينڪم من يطول ما يصغر المشكلة بالعكس يكبرها وخاصة انتم بعدڪم بالبداية  

ظليت ساڪتة وما مقتنعه بڪلامها جاي تبررله لو تسمع ڪلامه وياي جان عرفت اخوها رافض وعاجبـه وضعه واصلاً متمسك بيه

تماضر:- ترجعين وياي

بسمه:- لا تزعلين مني ما اڪدر ارجـع 

تماضر:- لعد شحجي بعد الله يهديڪم تروحين وياي على ام آدم نسلم عليها

تنهدت واني احرك راسي أي، رحنا عليها طول الڪعدة ما رفعت عيني عنها شوية ولتمت ڪل نسوانهم سمر دزت عليهن تحب الجمعات والسوالف 

عيوني على جهالهم يلغفون ارواحهن يم نفس عبالك حبوبتهم مو مرت عمهم وهيج يتغذون من محنتها، ترتيل ڪل شويه تميل عليها وهي تحضن ايدها وتسولفلها على تجهيزاتها وتخطيطها وتأخذ برأيها وهاي الصفرة تتمايع عليها يمه ترفس بالبطن احسـها الله يساعدك علي

باوعت على مرت المسلول كتلها جا وينها مزنه شعجب مو وياج 

اثيلة:- ما تقبل تطلع تحب ڪعدت البيت تخلص وقت من التحاضير للسلاحف للحياڪة 

باوعت على نفس لڪيتها تباوع عليَّ أبتسمت بوجهي تنهدت، تدري بيه اعرف لو ما تدري عيوني على تماضر منطلقه بالسوالف وياهن ومن تحجي ويا نفس انتبهت عدهن عادة وحدة تلزم أيد الثانيـة 

ثاني يوم ڪملت دوامي منتظرة آدم يكمل ونطلع اجى سراج وڪف كبالي  

بدون سلام وسؤال كال يلا نروح

بسمه:- انت توصلني؟ 

سراج:- اي اني شنو الغريب! 

زوجج اني لو واحد غريب وهيج استغربتي

بسمه:- ما اعرف 

شد على شفايفه غمض عيونه زفر النفس يهدي نفسه كال 

سراج:- يلا ضلعي 

اخذت جنطتي لبستها بكتفي كتله نمر على آدم نبلغه كال بس امشي تعلين الگلب وآدم اتصلت بيه عنده علم

فتحلي الباب اخذ الجنطة من كتفي واني اصعد من كعدت مد جسمه شمر الجنطه للكرسي الورا كتله نحتاج كاميرات ونصير مسلسل شلون هذا البطل من يسد الحزام للبنية ويظلون ساعة يفهون 

سراج:- اي يلوڪلج باسم حكومة تردين اختارلج دور يجي عدل وياج

بسمه:- اممم بله اختار خلي نتعرف ذوقك الحلو 

سراج:- اكو مقطع دوم يطلعلي بنية اسمها نعمة تسكي بالزرع وهي تركص ومن تشوف الولد واكف فوك السطح ظل تصيح بق بق بققق منا لمن توكع على وجهها يلوكلج دورها راهم عليج ڪلش 

بسمة:- شنو دجاجة الحمد لله شلون ذوق الله يحرمني منه واكيد الديج هذا انت 

سراج:- ما اڪول بس آآه منج الله يساعدني

سد الباب اجى صعد درت وجهي على الجام مبتسمه يعني تصالح ويا خالي الحمد لله 

سراج:- على شنو تضحڪين؟ 

بسمه:- فرحانه الحمد لله من تراضيوا اخيراً والحسين خالي كلش تأذه من هالزعل الله لا يرده بينڪم وما اطب بينكم بس العافيــة

ما جاوبني يسوق وملامحه كلها برود

شوية وڪال 

ـ ما متزاعلين ابوية كبــرنا على الزعـــل

ـ جا هذا خلافڪم شيسمونه؟ 

ما جاوبني ظليت اباوع عليه كتله يمكن اني فهمت غلط

بعدكم ما تراضيتوا؟؟؟ 

سراج:- ما يفيد بعد تراضينا أو لا الخوة بيناتنا انتهت  

بسمة:- الخوة ما تخلص الا اذا جانت سطحيه وهشه وانت وخالي بعمرها خوتڪم ما جانت سطحيـة صرتوا وصف ومثل للصحبة الزيـنة

ما جاوبني درت وجهي على الجـام ينفخ الگلب من ما يـــرد رجعت عيوني عليه 

كال ليش تباوعين عليَّ هيـج؟ 

ـ خالي يعزك وانت تعزه لا تخسره مو انت اللي يعاب وينكر اخوه وصاحب عمره

سراج:- اڪو كلام كلش جميل للشيخ علي المياحي يكول لقد بعتُ السفينة وانتهى الامر 

سكتت عنه اكتشفت بيه صفه صعب وما يتجادل ومتمسك برأيـه يقنع المقابل بس محد يكدر يقنعه، وصلنا لبيته كتله شنو شو جبتني هنا!!!! 

سراج:- غير بيتج هذا لو اني غلطان وجبتج لبيت غريب

بسمه:- سراج رجعني لبيت خـالي كتلك ما اريـد ارجع ويــاك انت ليش هيج عندك اهم شي نفسك 

سراج:- اني هيج؟

بسمه:- اي انت  

نزل فتح الباب مال البيت ورجع صعد دخل السيارة واني احجي وياه بعصبية

بسمه:- سراج مو جاي احجي وياك رجعني لبيت خالي سررراج شبيك

ما التفت عليَّ ولا حجى دخل السيارة طفاها ونزل سد باب الحوش نزلت واني اسد الباب بعصبية 

اجى عليَّ كال ما اريد صوت ومشاكل كبال امي وعمتي من نصعد نتفاهم والي عندج احجيه بيناتنا 

اخذت جنطتي ودخلت جوه ما سويت مشڪلة سلمت عليهن وما مبين عليَّ العصبية اللي ضامتها بصدري لكيت تماضر مسويتلهم فطور بس حميته 

 

اتصلت على خالي وبلغته سراج مر عليه ورجعني وياه لبيته

لؤي:- الله يسعدكم ويهدي عليج ويهدج عليه انتبهي على بيتج خالي وترى مو ڪل شي يستاهل الزعل

صعدت لغرفتي باوعت عليها مرتبه مثل ماهي بدلت ونزلت بسرعة صبيت الفطور بس اني وياهن هو ما اعرف وين طلع وموصيهن ما ننتظره

بعد الفطور طلعت علاجهن خطيه فرحانات برجعتي بقيت ڪاعدة يمهن لحد ما نامن سديت الباب عليهن 

 اخذت ملابس ورحت للحمام واني أفور من طلعت صار بوجهي ديصعد دخل الغرفة قبلي دخلت وراه اكف يفتح بدكم قميصه

بسمه:- ليش سويت هيج ليش جبتني لبيتك وانت تعرف ڪلش زين ما اريد أرجع وياك 

ما حجى توجه على الكنتور جاي يفتح سديته بقوة

بسمه:- مو جاي احجي وياك لا تتجاهلني هيج 

سراج:- اني ما جبتج لبيتي جبتج لبيتنا خووش 

بسمه:- لا مو خوش ما دام ما اريد ارجع هذا مو بيتي

سراج:- اي بسمه والمطلوب مني شنووو اظل اركض وراج واترجاج يلا تقتنعين وترجعين 

شمرت الخاولي من راسي لزمت خاصرتي بيدي بتعب 

بسمه:- انت ما جاي تحاول تفهمني

سراج:- اي خوش احجي خلي افهمج 

باوعت على غير جهه شحجي احس ڪل اللي اريد احجي ماڪو كلام يعبر عنه او يمكن اڪو بس اني عاجزه بالتعبير 

دنكت اخذت الخاولي مشيت ڪعدت كبال المراية امشط وامسح بدموعي باوعت عليه بالمرايه واكف يباوع عليَّ تنهد فتح الكنتور اخذ ملابس  وطلع 

كملت لميت الشعر وطلعت غسلت اديه رجعت تمددت على الجرباية اريد اجمع كلام يعبر عن اللي احس بيه واحجي اله، غير جمعته وعدته براسي كم مرة بس من اريد احجي وياه ڪله يتبخر وتفڪيري ما الـه علاج حتى من انام يلاحڪني بالاحلام 

دخل وكف كبال المراية عيني عليه تعطر مشط شعره وشاربه طفى الضوه بس الثرية عافها اجى تمدد بمكانه وجهي كبال وجهه حط ايده جوا راسه عاڪسها وعيونه ما بعدها عني اثنينا ثگلت انفاسنا الانجذاب اللي يصير بينا والثقل اللي يصير بصدري ويخليني اشهك النفس يلا اڪدر اتنفس ما افهمه 

قرب راسه مني وزحف بجسمه عليَّ تغطى وياي وراسه على مخدتي اجيت ابتعد لزمني من دلعه البدي مانعنـي

سراج:- احجي خلي نوصل لنقطة نتفق عليـها حتى هالمرڪب يستمر

حجيت ورجفت النفس واضح عليه مو بس عليه 

بسمه:- ما اريد اسد فراغ بحياتك واحساس اني مرة ثانية جاي يذبحني 

سراج:- منو ڪال انتي تسدين فراغ 

اوهامج هاي جاي تأذيني وياج مو بس تأذين نفسج بيها 

بسمه:- يعني شنو تريد مني افڪر واني اشوفك بعدك عايش بحياتك القديمة انت ما حسيت على نفسك شصار بيك وشلون طلعت مهزوم مني عيوني، من ذڪرت اسمها كبالك 

سراج:- اول شي ما عايش بحياتي القديمة مثل ما سميتيها، وثاني شي اني احاول اتناسى وانتي ترجعيني بهاي أوهامج لا تستعجلين بالحكم على نفسج لا تكولين بديلة ومرة ثانية انتي زوجتي الاولى والاخيرة

كتلج ما عندي زر اضغطه وانسى 40 سنه من عمري احتاج سنين مو اشهر أني هم ما مرتاح لا تفكرين هاي الشدة سهلة عليَّ واڪع بين ماضي جاي احاول اطلع منه  وبين زوجة ما اريد اخسرها وهي ما ترضى تصبر عليَّ وتفهم اللي تطلبه مو بيدي ويحتاج مني وقت ومنها صبـر

بسمه:- واني ما جاي اكلك دوس هالزر اللي زرررفت راسي بيه جاي اطلب منك تحاول لا تظل متمسك 

انت تخاف تحاول تخاف صدك تنساها تخاف تحس بالخيانة اتجاه حبك الها

سراج:- جاي احاول بس انتي ما تنطيني مجال تردين ڪن فيڪون

بسمه:- اذا انت مستمر تذڪر بحبك كبالي 

ما خلاني اڪمل كال 

سراج:- لان ما اريد اجذب عليج

بسمه:- جذذذب اني راضيه 

باوع عليَّ وشوف حالتي وين وصلت قابلة بالجذب لان ما جاي اشوفك تحاول انت كل مرة نحجي تكلي اي احبها شنو شايلة حجر بصدري وتريدني اتحمل ڪلامك

سراج:- باوعي على روحج شلون رافضة تفهمين وتسمعين شلون جاي احاول واطلب منج وقت وصبـر 

تعبنا اثنينا من هذا النقاش العقيم وما حسيت يمتى غفيت 

  ••------------ ♡♡♡♡ ------------••

طلعت علاوي يلعب بدراجته حطيت كرسي وكعدت بالباب عيوني على ابني ومنتبه للشارع اخاف تمر سيارة وما أنتبه عليه وبالي يم العضيد

ليالي رمضان اللي جنت اخلصها وياه سنة ورا سنة هالسنة راح أڪضيها وحدي

زمزم:- صيام مقبول عمو الحنين

طالعة تغسل بالباب رديت عليها، كالت وهي تضحك

ـ شنو اليوم ما تغسل وين عمه درة عنك ؟ 

ـ غسلي ما يعجب الارنوبة 

وهالطردتني أني وخطيبج (يقصد أبنه) تستقبلينا يمج؟

باوعت على علاوي ضحكت وبعدين رجعت عينها عليَّ

زمزم:- هسه اجي أغسل كراجكم بس اڪمل مسح

لؤي:- لا يروح عمج اتقشمر وياج من العصر عمتج غسلتها

وهسه نايمة هي وبنونه

زمزم:- من باجر اجى قبل الفطور اساعدها 

كملت غسل عيوني عليها الله يسلمها نادرة على ڪولت اهلنا نمرة ترفس الكاع 

زمزم:- اسويلك جاي؟ 

لؤي:- خاف اتعبج

زمزم:- لا تعب شنو

هسه اخدرلك شلون جاي على ڪولتك يرد الروح 

دخلت وهي تلف بالصوندة سدت الباب، رجعت عيوني على علاوي

عرضت كبالي كل كعداتنا سوالفنا ضحكتنا ليالي والايام اللي تمر علينا وجنها ما راح تڪضي 

لؤي:- ها سراج هي هاي خوتنا بساع هيج تهون عليك من موقف واحد؟

حكيت رگب رجليه احس عندي ذبحه بخيط النفس 

رفعت اصابعي لزمت المنطقة البين عيوني تريد الوجع راسي يهيد

لؤي:- مالك فخر بيها كطعتك وياي

درت عيني على علاوي وصحت عليه

لؤي:- لا تبعد ولك ارجع هنا

شفت أرغد جاي من فرع الجامع لابس دشداشة بيضة، والحدرية على راسه من وصل قريب من علاوي دنك عليه وباسه بوجهه، وكفتله من وصلني مد إيده والسبحة معلگة بيها تطالسنا وحنا ندك متن بمتن

أرغد:- الله يتقبل طاعاتكم

رديت عليه، أشرتله على الكرسي

لؤي:- حي الله بعين الصگر أبو آدم استريح هنا

وصيته على ابني ودخلت ترست ماي اخذت الكرسي وطلعتله نطيته ماي حطيت الكرسي بصفه بيناتنا مسافة

اخذت السبحة من ايده وفر بيها على اصابعي

أرغد:- شبي ذيبنا الأسمر مو على سجيته؟ 

تنهدت، ورجعت ظهري على الكرسي، واجر بالسبحه بيد اديه واصفط بخرزاتها 

لؤي:- الصاحب يا ابو آدم نصب جادر هنا بنص روحي وذبح لي النفس

نزع حدريته ونزل شعره على كصته كل ما يرافعه يرجع يطيح 

أرغد:- على كد المعزة الزعل وزعل الاخوان فترة ويخلص

انفتح باب بيت آصف واڪفة زمزم بيدها صينية

زمزم:- شلونك عموو رمضان كريم عليك

أرغد:- هلا بشيخة البنات علينا وعليكم كريم بإذن الله 

رحت حتى اخذ الصينية منها حاطه ماعون كعك أبو السمسم وماعون بقلاوة وزلابية وكاسه على شكل بطه بيها حب 

لؤي:- مو جاي راس باجة لو مبقيته للسحور

ضحكت بخجل:- جنت مسح بالبيت نسيت الجاي ماخـدرته من سمعت صوتك تصيح على علاوي يله تذكرت

راح اصبلكم بعد استكان واجيب طبله وياي

رجـعت على أرغد نطيته الجاي و الصينية حطيتها على الكرسي طلعت راسها رحتلها اخذتهن منها الاستكان 

زمزم:- الف عافية اني كاعدة بعدني من تردون أصبلكم بعد راسلني على الواتساب

لؤي:- معدلة يبعد روح عمج 

رجعت خليت الطبلة ورفعت الصينية عليها باوعت على علاوي ورجعت عيوني على أرغد

أخذ قطعة من الكعك اجى علاوي نطيته اله رجع على دراجته

أرغد:- اعرف بخلافكم من آدم لا تخلي الزعل يخسرك هيج صاحب

الأخو الحقيقي حتى لو يبتعد يبقى مكانه ثابت بالروح ما ينشال

سكت شوية وبعدين كمل

أرغد:- خليه يهدأ، وأنت هم اهدأ وبعدين تواجهوا،تعاتبوا ولا أدخلون طرف ثالث بينكم

واذا بيكم عشرة حقيقية راح تلڪون طريق للصلح

سكت، ومرر ايده على شعره وباوع على باب آصف، وبعدين رجع عينه عليَّ

أرغد:- الدنيا ما تسوه نخسر بيها صاحب العمر اللي عشنا وياه ضحكتنا وتعبنا وسوالفنا وفرحنا وحزننا مو سهل واحد يمشي وياك ڪل هالسنين وبالاخير تخلي موقف واحد يمسح كل شي بينڪم

تنهدت حطيت الاستكان بالصينية طلعت باكيت الجكاير من جيبي مديتله جكارة حطها بحلكه مديت الجداحة حط جفه بين الجكارة والنار ورثها رجعت ايدي ورثت جكارتي

لؤي:- انه ما غلطت الغلط منه ما حجيت شي يستاهل هالزعل هانت عليه عشرتنا على سالفة ما تسوه يا أخي كل اللي ردته منه لا يدوس بالحجي ويا آصف لا أكثر ولا أقل

سحبت نفس من الجكارة حسيت الدخان ما نزل لرئتي نزل لگلبي وجواه

لؤي:- مادام هيج عشرتي وخوتي وياه تكضي بسبب موقف بسيط بلاها هالعشرة.

أرغد:- لا تستعجل بالحكم

لؤي:- استعجل؟ سنين خوتنا تنحط بكفة وموقف تافه ينحط بالكفة الثانية ويغلبها ياوسفة وعلي نار وشابه هنا بنص ضلوعي ماتطفى ولا تبرد

سكت وعيوني دارت على علاوي من لمحت ضوء لايت سيارة

لؤي:- علاوي وخر عن السيارة

وخر على صفحة سيارة آصف طبگها بمكانها ونزل وبيده علاڪة جبيرة ما باوع علينا هم زعلان مني، بس رفع صوته بالســــــلام

ردينا عليه باوعت على أرغد دنك راسه يكتب بتلفونه

آصف:- تعال خالووو

عاف دراجته وركض عليه كرفص آصف كباله، باسه بوجهه وفتح العلاكة

آصف:- أخذ اللي تريده

مد ايده اخذ اللي يعجبه آصف دخل للبيت وعلاوي وياه ظليت أباوع على الباب وبعدين التفتت على أرغد هم لڪيته يباوع وراهم بصفنه

لؤي:- عمك صائب 

التفت عليَّ بحركة سريعة وصدمـة

أرغد:- منين تعرف عمي صائب؟

لؤي:- عرفته وعرفت شلون مات هو وعايلته الله يرحمهم

أرغد:- منو سولفلك!!

آصف ما يسولف مستحيل من آصف درة سولفتلك؟ 

باوعت على باب آصف وحجيت بهدوء

لؤي:- من هاشم عرفت

بقي ساكت بس يباوع عليَّ 

لؤي:- انتظرني هسه اجي

دخلت للبيت اخذت الدفتر ورجعت لگيته صافن على باب آصف من حس بيه مسح عيونه بسرعة كعدت وانه أمد لـــه الدفتر 

لؤي:- هذا من هاشم مكتوب لآدم

أخذه فتحه وظل يقرا بدون صوت عبر خمس صفحات وعينه تمشي بين السطور ببطئ وكل صفحة يكلبها بتعب 

اخذته منه وفتحته على المكتوب عن عمهم صائب

لؤي:- منا عرفت عمكم 

أخذه مني يقرا بيه زفر نفس طويل  الدفتر ڪانهُ فتح باب لسنين مدفونة

أرغد:- آصف جان عمره أربع سنين بيوم الحادث وبعد الحادث يمكن بشهر لو أقل من  انتقلنا لحديثة هذا سبب انتقالنا الحقيقي مو مثل ما تعرف قبل، وجدي جمع الكل ببيته ومنع أبوي وعمامي يكعدون ببيوت منفصلة يخاف عليهم من الموت عباله هيج يضمن ارواحهم

لؤي:- إي عرفت من هاشم ڪل هذا 

سكتت اباوع عليه، وبعدين حجيت الحجي اللي بصدري 

لؤي:- تريد الصدگ كرهت أبوك وعمامك أڪثر من جدك ولك ما بيهم واحد حوك يوكف بوجه طفل يا أمـه الاسلام ماكو رحمة سنين يعاقبون بيه شنو هالوحشية

سكتت ارغد بعده يقرأ والحزن واضح على تعابير وجهه، ڪتله

لؤي:- الله يرحم عمتك والله كل عمامك يرحون فدوة لخيط واحد من شيلتها

عصر جبينه وباوعلي وهو يسد الدفتر

أرغد:- عوف هالسالفة مدفونة لا تحجي بيها ويا آصف اعرفه ما ناسي بس من يحجي بيها واحد وياه يتأذى اڪثر خليها مدفونه ولا تبينله بمعرفتك

لؤي:- تخاف عليه؟

أرغد:- إذا اكلك لا اجذب عليك وإذا اكلك لان ابن عمي هم اجذب آصف عزيز واخاف عليه شما يسوي وياي يظل بعين ذاك الطفل

باوع للباب وكمل:- لمعت عينه والخوف بعده شايلهن بنظراته

لؤي:- كبرت بعيني على وكفاتك وياه من وأنتم زغار لهذا اليوم

مسح عينه وهو يباوع عليَّ

أرغد:- جان يغار مني لان مقرب الجدي سوه وياي صكعات اذا اسولفهن هسه تبجي على حالي

عكش وجهه ولعبت نفسه

أرغد:- هاي مره لو ما هاشم يتلاحڪني جان تسممت

سكت حط ايده على حلكه ولعبت نفسه اكـثر

أرغد:- بريعصي وحاطه اليَّ باللفه لجوه ضامه

كلبت معدتي واني توني ماڪل كعك وبقلاوي كتله

لؤي:- بسك ولك 

أرغد:- عجل شتڪول عليَّ ايام واني بلا اكل واهلي محتارين بيه حتى مستشفى دخلوا بيه بسبب الجفاف 

سكت شوية وبعدين ابتسم 

أرغد:- هذا ابسط شي من سوالفه وياي بس يظل عزيز على گلبي 

لؤي:- وهو هم يعزك ويحترمك

ودائما يڪول محد يريدني ويحبني غير أرغـد

ارغد:- عبن محد يتحمله غيري  

سكت بـاوعت للدفتر ڪتله

لؤي:- تصدك حبيت صداقتكم انت وهاشم وبراسي أڪول لو ما صار هذا كله هسه اشوفكم سوه رادين من الجامع

رفعت الدفتر واني اڪمل

لؤي:- هالدفتر من اقره بيه افصل عن الدنيا اشوفكم كبالي مو بس كلام أقراه وصلت بيه حتى اعيش وياكم بهذيج الايـام واشوف كل شي صار وكأنهُ جاي يصير هسه

لبس حدريته سند اديه على الكرسي ونهض انطاني ظهره وهو يمشي

أرغد:- لا تخسر خويك حتى ما تربي روحك على الاستغناء

مشى باتجاه بيت أخوه واصابعه عاصرة السبحة نزلت عيني على الدفتر ڪل مرة اضوج ارجع اقره بيه

  ••------------ ♡♡♡♡ -------------••

انتظرت مهند يخلص مكالمته ويا ترتيل اريده يسولفلي شصار اليوم بينهم تحاجوا لو لا

كمل واجى يضحك وحده كعد كبالي كال ها يوم؟ 

تماضر:- ماسولفتلي شصار بين خالك ولؤي بشر ما تحاجوا؟ 

رجع ظهره على القنفة وهو يسولفلي الصار وخيب امالي 

مهند:- تجمعنا بغرفة الاجتماعات اللي سويناها بالطابق الفوك خالي سراج  اول واحد اجى 

فتح اللابتوب وفرش السجلات والحسابات ڪدامه يدقق الارقام بتركيز وآدم كاعد يمه يحجي وياه على اقتراح فتح عيادة باطنية 

هو متفق مبدئياً ويا الدڪتور المختص بس منتظر موافقة الشركاء حتى يباشرون بترتيب العيادة خالي مدنك راسه بين السجلات وبين فترة وفترة يرد على آدم لحد ما قنـعه وكاله باجر نحجي ويا الدكتور بعد ما ياخذ راي البقية نفتح الباب دخل خـالي لؤي كال 

ـ السلام عليكم صيام مقبول

ردينا عليه السلام وخالي رد باقرب للهمس واحنا الثلاثـة وڪفنا سلمنا عليه عيوني بينهم الاثنين تعمدوا محد يحط عيونه على الثاني

بينهم جدار ما ينشاف بس الكل حاس بيه 

عمي لؤي كعد على الكرسي حط رجل على رجل ومد ايده كرة  كريستال صغيرة اللي بقاعدتها الخشب يحركها باصبعه عـــلي مال عليَّ وهمس ورا راسي باوع شلون ڪاعدين على اعصابهم

ـ حطينا عيوننا عليهم وحسدناهم

كتله:- اني لا ما حطيت عيني انت وادم  أربع وعشرين ساعة تسولفون بخوتهم خوش ليزر معدل عبالك غربـة صاروا 

انفتح الباب مرة ثانية : ـ الســــــــلام عليكم.

كلنا التفتنا دخل آصف ردينا السلام، صار يومين من رجع الوالد حصته اله والوضع هنا بين مد وجزر ڪعد على  الكرسي المقابل لعمي لؤي حط رجل على رجل وهو يسحب السجلات المفتوحه يدقق بيها

بدأ الحجي بينهم بصراحة ما فهمت من كلامهم شي حجيهم مختصرة وڪله احسه تلميحات يحجون وكانهُ بينهم اتفاقات قديمة ما تحتاج شرح

عمي لؤي بقى مركز ويه حركة الكرة  ولا رفع عينه عليهم ولا شارڪهم بالڪلام

سراج:- اذا تريد تلعب وياي 

لا تلعب هنا ترى هالمكان مصدر رزق لهواي عالم 

آصف:- ما العب برزاق العالم 

فتح السجل الثاني وهو يكمل اللعب على مڪان ثاني

باوع على آدم كاله هاي الحسابات ابوك مرتبها

آدم هز راسه اي وكاله شلون عرفت جاوبه من رقم التسعة ابوك يكتبه مثل حرف q وهم اعرف خطه من بين الف خط ما اضيعه

المهم بعد ممنوع الحسابات تطلع اذا انت مو ڪد المسؤولية نشوف غيرك

آدم اجى يطلع خالي سراج لزم ايده

ـ انت هنا نائب عني مو عنه ومادام اني صاحب الحصة الاڪبر ڪلمتي هي المهمة

رجع آدم لمكانه ورجع الجدال بين آصف وخالي كل واحد يرد الثاني بنفس الاسلوب

اباوع عليهم وما فاهم شنو اللي دا يصير بالضبط لحد ما عمي لؤي تنهد وعلى نفس وضعه ڪالهم

ـ ترى الصيام مطير راسي كملوا اللي جبتونا عليه خلي نولي 

رفع آصف عينه عليه بس خالي سراج عيونه تمر علينا واحد واحد ويتعمد يتجنب لؤي 

دخل خالي بالموضوع الرئيسي من ڪمل سولفلهم على فتح عيادة باطنية بالمجمع محد اعترض  باوع على آدم وكاله

ـ باجر خلي يجي الدكتور ونحجي وياه

انتقل الحجي لموضوع القطعة الورا المجمع صاحبها عارضها للبيع اقتراح  يشترونها حتى يوسعون المجمع

آصف وافق، وعمي لؤي ظل ساڪت

خالي ينتظر جوابه القلم بين أصابعه يحركه ببطى حسيت بالتوتر اللي بينهم كلنا نباوع بين عمي وخالي 

سراج:- احـد عنده اعتراض؟ 

ظل ساڪت كل تركيزة بالكرة عبالج احنا ما موجودين 

حجيت وياه اني طولوها ڪلش وعايف الصيدلية فارغة

مهند:- عمي لؤي بالك هنا ويانه؟ 

عمي ابو علي الوو 

باوع عليَّ كال ها بوية وياي؟ 

جاوبته:- اي دنحجي على القطعة اللي ورا المجمع صاحبها عارضها للبيع وفكرنا نشتريها ونوسع بيها المجمع شتڪول؟ خالي وعمي آصف اثنينهم موافقين منتظرينك

ظل ساڪت ثواني بعدين حرك براسه اي كام من مكانه وهو يرتب حزامه وسترته يحجي ببرود مو عمي اللي تعودنا عليه 

لؤي:- اللي تشوفونه مناسب اني وياكم بيه اللي تردون تسووه سووه عسى ما تردون تهدونه 

سكت لحظة وبنبرة خالية من الاهتمام ڪمل

ـ ما عندي اعتراض على شي ولا اجي بعد حصتي كل شهر دزوها بيد مهند 

ما انتظر رد احد طلع بقينا كلنا ساكتين واحد يباوع على الثاني خالي مد ايده سد اللابتوب بعصبية عينه على آصف يباوع عليه بنظرات حادة وغضب وآصف يباوع عليه بنفس النظرات 

آصف طلع وخالي جف ايده مكورة ومدخل اظفره بين اسنانه الفوك يباوع على مڪان لؤي ترخصنا منه وطلعنا

علي:- ولك شنو هاي حسيت جاي انضغط من التوتر هذا عمي لؤي لو مبدلينه علينا خفت على لحظة يشيل الكرة ويركعها براس واحد منا

ضربت على رجلي كتله

تماضر:- شلووون بينهم ييقون هيج 

مهند:- بالعيد يتراضون بيهم مجـال ان شاء الله 

••------------- ♡♡♡♡ --------------••

جوه نبين ماڪو احلى منا ومن نصـعد للغرفة نرجع لنفس الوضع ڪلت خلي اصبـر عليه بس ڪل مرة يطلعلي بسالفة صح بغير قصد بس تجرح بروحي

بسمه:-انت يرادلك گلب مامدشن

سراج:- هيييج اني

صحت جا انه

ـ فدوة للـ انه 

ضحكت يارب وتالي وياه ساعة يسويني ثلج وساعة يسويني نار

سراج:- اي هيج وضحكي 

اريد اطلع بسرعة رجعني عليه صار بظهري لازم اديه رفع ايده زاح كتف الدشداشة 

سراج:- شنو نبقى هيج ناشفـة

باس الاثر اللي بكتفي كتله جا شتريد مني وانت مرجعن وياك غصب

سكت لحظة قرب أكثر وكل ما حاولت اتماسك لمساته تربكني وتضيعني نضغط الهوا بصدري والنفس صار متقطع ملت براسي عليَّ دارني عليه بحرڪه سريعة خفيفة غمضت عيوني على اثر بوساته بوجهي رفعت اديه لڪتافه احس راح اطيح روحي ذابت 

حسيت رجليه بيهن قوة تراجعت خطوة اختل توازني شدني عليه بسرعة نرفعت من الكاع بس طرف اصبعي طاخ انتهينا متمددين بعرض الجربايـة طكت الريك اسمعها من يبلع ريڪه ورجفت انفاسه ترجف گلبي وانفاسي وياه

سراج:- اروح

اتوضى واجي

حجى بصوت متقطع باسني بوجهي ابتعد عني طلع واني حطيت ايدي على گلبي النبضة الوحدة احسها شلون دوي الانفجار 

عيوني صارت على الباب يمسح بديه أبتسمت رجعني لاول ايـامنا طفى الضوة واجى عليَّ بلهفة ضعنا بينها وبين الاشتياق ما اڪدر افلت من حرڪاته التكتم انفاسي واسمي ما بطل ينطقه بكل فرصة حتى يثبتلي هو وياي بهاي لحظاتنا ويتقصد يفاجئني بحركات يخليني اشهك بحضنه ويكتم الشهگة ببوساته 

صار بيناتنا تردد غريب هو يقرب واني ابتعد وبعدين ارجعله بدون ما احس اجسادنا بحرب هادئة كل واحد بيها يريد القرب ويخاف من قوة تأثيره بنفس الوقت 

ما بقى بيناتنا غير نبضين متسارعين وأنفاس متقطعة وذاك الشعور الغريب اللي يخلي الواحد يعرف مهما حاول يحافظ على تماسكه أكو شخص واحد قادر يخلّي كل دفاعاته تذوب 

ابتسم بنصر وهو يباوع بعيوني ضميت وجهي خجلانه من نظراته دنك باسني بجبيني 

سراج:- عديـمة الرحمة 

تمدد بصفي داير عليَّ حاضني واصابعه مرة تكتب على ظهري ومرة يرسم دوائر 

سراج:- ليش ترجفيـن

بسمه:- تعرف الجواب

سراج:- لا اريد اسمعه

ضميت وجهي برقبته ما جاوبتـه شميتها واني ابوسها حضني اقـوى رفع ايده وقت تلفونه قبل موعد السحور بساعتين رجع ايده حضني رفعني اله كال هيج نامي أبتسمت نزلت راسي على كتفه غفينا بتعب اثنينا

من قررت امشي بڪلام تماضر رجعـنا لاول ايامنا واحلى والراحـة مبينا على وجوهنا اثنينا والحق يقال ڪل تقصير ما اشوف منه بس الغيرة مو بيدي

 اللي منغص هالفرحة زعلهم هو وخالي مرات اخذ الحجيات ونروح على بيت خالي نحاول وياه رافض وڪل مرة رفضه اقووى نحاول ويا سراج ونفس الشي تماضر ڪالت خلي نصبر عليهم للعيد ما معقولة يسونها وما يتراضون بعيـد الله الا تخبلوا

كملت التمارين لعمتي باوعت على عمتهم خطية متربعة وسانده راسها بجف ايدها وسبحتها بين اصابعها وغافية كمت حطيت ايدي على كتفها وحجيت وياها بهدوء عمه عمه تعاي نامي بفراشج

فتحت عيونها وهي تجاوبني ها يبعد عمتج

ـ تعالي نامي بفراشج

انطيتها ايدي ساعدتها تكوم خطيه رجليها خدرانه توسدت عد راس عمتي وغفن بسرعة اباوع عليهن واذڪر كلام سراج يكول هذني عيوني الثنين يوم الـ ماشوفهن احس بالعمى همست الله يحفظهن ويطول بأعمارهن

طفيت الضوة عليهن وطلعت فريت فرة سريعة على البيت عطرته شفت الثلاجة افكر شنو اسويلهم سحور قررت وصعدت غيرت ملابسي وكعدت اقرأ 

دك تلفوني جاوبته واني احط القلم بشعري 

سراج:- باسم ضلعي

بسمه:- ها حبيبي 

سراج:- روحه 

بنفسج شي اجيبه وياي 

وللسحور شنو تحتاحون

بسمه:- مشتهية بسكت وحلقوم

وللسحور لاتجيب غير الصمون ڪل شي متوفر

سراج:- مو عيب 

معمل الحلقوم بوجهج وتخليني اشتري 

ضحكت كتله على كولت هالجيل غزلك گرنج

ضحك كال ما اتاخر سديته رجعت اقرا صار انعكاس الضوة على الشباج 

سفطت الكتب عفتهن على صفحة وكفت بالشباج اباوع عليه منظري المفضل هذا ما احب افوته نزل من سيارته يتلمس بجيوبه راح سد الباب وباوع على الشباج ما ابين بس يعرف بيه واڪفة اباوع عليَّ 

طلعت وكفت براس الدرج سد باب الصالة وصعد يركض مثل عادته 

حضني برفعه يادوب اصابعي طاخه بالكاع

سراج:- انه گرنج بسومه 

بسمه:- انه شعلية هالجيل هيج يڪول

باوع بوجهي اشر بحاجبه على شفتي كال هذا الحلقوم هنا قصدي 

بسمه:- عيب حجي 

باسني بخدي حط ايده ورا ظهري دخلنا للغرفة وهو ينطيني العلاكه غير ملابسه كال اشوف امي وعمتي واجي

نزل يشوفهن واني اعلك بملابسه ماتأخر بسرعة صعد اخذني من ايدي كعدنا بالكاع فتح البسكت يحط بين كل اثنين حلقومه وينطينياها سوة لنفسه ڪال طيبه وين رجعتيني لايام الطفولة وتبارك كتله الله يرحمها  همـس آمين يارب 

بسمه:- خالي وياك جان بالعزيمة؟ 

جان يسويلي بقطعة ثانيه نكسرت بيده مـارفع راسه جاوبني لااا، رجع يسوي بغيرها اباوع عليه ضاج مديت ايدي حضنت بيها جانب وجهه

بسمه:- راح تظلون هيج 

شنو زغار انتم الزعل مو الڪم والله 

ليش جاي تخربون بعلاقتڪم الحلوة

سراج:- ماڪو زعل ڪم مرة اعيدها زعل ماڪو 

بسمه:- اي جا هذا شيسمونه مو حيرتونا وياڪم انت تڪول ماڪو زعل وهو يكول زعل 

سراج:- العشرة اللي بينا خلص عمرها

سڪتت عنه جا شڪول بعد والله تعبونـا وبعدهم بهذا الراس المحجر بالزعل

خلصت ايـام رمضان على خيـر بليلة العيد تلفوني بيدي وما عفت احد من اهلي ما اتصلت عليه وعايدتـه خو الواتساب لازم ارد على الصور والمقاطع بصور ومقاطع ما انزل اللي ادزلي ادزلها التدزهن غيرها وهي مشيتها ويا الڪل 

نزلت على الحنينات عايدتهن شحلات دعواتهن تريح النفـس بقيت يمهن ڪاعدة اسوي ڪليجة تماضر اجت عايدتنا وكعدت تساعدني هناك عند اهلي نسويها قبل العيد بيومين هنا يردونها بـ ليلة العيد البيت نترس بالريحة تخبـل 

دخل عيـــدي كال السلام عليكم عيدكم مبارك ردينا عليه اجى على امه وعمته عايدهن وهو يدعيلهن بطول العمر ودعواتهن الـه يمطرن بيهن عليه، تماضر حضنته عايدها اشكد احب حنيته

تماضر:- الله يعيده عليك بالصحة والعافية

 باوع عليَّ ابتسم تقدمت عليه حضني مثلها 

سراج:- عيدج مبارك بسمتي

بسمه:- عيدك مبارك الله يتقبل طاعاتك

سراج:- منا ومنج إن شاء الله وعساج من عواده

قرب حجى بذاني عيدنا فوك تطبيقي هنا شفوي 

أبتسمت اخذت گليجة حطيتها بحلكة كتله شوفها طيبه

سراج:- لا اخذ غيرها هاي ماراح اڪدر اميز طعمها

عضيت شفتي اريد يسڪت خجلت منهن مد ايده رجعني يمَ

تماضر:- الله يعيده علينا وعليكم بالخير وان شاء الله السنة الجاية نكون كلنا باحسن حال 

حط ايده على بطني يباوع بعيوني عيونه تلمع بالدموع

سراج:- آمين يارب

من صعـدنا فوك شوفني المعايدة تطبيقي باس راسي 

سراج:- ها فهمتي لو اعيد الشرح ترى محسوبج بالخدمة واڪون ممنون اذا طلبتي اعيد

ضربته على كتفه كتله ڪافي والله صاير ڪلش فد نوب انت

ثاني يوم لبست مخور من شافني ڪال مافهمتج المعايدة البارحة عدل تعالي اعيد الشرح نهزمت منه وهو يصيح وراي

سراج:- ابوية انتي لاتنسي نفسج حامل

ما فرغ بيتهم من عوائل اصدقائه واقارب ابو مهند احس رجليه تقطعت منتظرين خـالي يجيهم تماضر ڪالت ڪل سنـة هو اللي يجي يسبقنا للعصر ومابين ولا سراج يسمع ڪلامنا ويروح يعايده من نحجي وياه يعوفنا وينهزم 

بالليل خالي خابرني اني من البارحة اتصلت عايدتهم والصبح هم رجعت اتصل

سألني منو بالبيت كتله محد فرغنا بس اني وعماتي 

كال راح اجي اسلم عليهم واذا زلمتج رجع قبل لا اوصل دزيلي رساله

ما طول اجى عايدهن كاعد بيناتهن حاضن اكتافهن بـ اديـه كالهن ما تخلني اخذجن للنجف نعايد الموتى وانعيلجن

ظل يسولف عليهن ويضحك كلما يريد يمشي يلزمنه ويطلعن بسالفة واني ڪل شوية اطلع للصالة اباوع امنتظره سراج تالي خالي تعب منهن وعرف شنو اللي براسهن كالهن عوفني شجلبتني خلي اروح اعايد الخوينسة لا تزعل 

راح وسراج ماڪو صعدت حتى اغير ملابسي نصدمت بيه موجود بالغرفة يمه من المڪابر هذا يمتى صعد وما حسينا عليه 

كملنا الدوام ودخلنا بالعطلة وبعد زواج مهند تقريباً باقل الشهر الظهر صعدنا انام العصر دك تلفون سراج اخذه فتحه وهو بعده بين الغافي والصاحي ولان قريب مني وهدوء اسمع الڪلام واضح 

مهند:- عمي لؤي طلب مني اشوف واحد زين وثقه يبيعه حصته

سراج كعد على حيله كعدت واني ارفع بشعري نومت الظهر تسطر

سراج:- اها هيج صـارت

مهند تحجي صدك لو تشاقى وياي 

اذا شقى احجي 

مهند:- لا والله خالي احجي الصدك وكلت اخبرك لان كال يريد يبيع بهاليومين

قطع الاتصال من مهند عاف التلفون رافع اديه يمسح بشعره بعصبية ويحجي شجاي تسوي ولك تسد باب رزقك

دك آدم وصدمنا الصدمة الثانية من ڪال هذا عمي لؤي داك لافته على بيته وعارضه للبيع 

                  الفصل التاسع عشر من هنا