رواية بخور الحب الفصل الاول1بقلم شيماء يسري زهران
- يا مامااا، مامااا.
- بسم الله الرحمن الرحيم، كوابيس وقر**ف.
- انا تعبت، مش عارفة اعيش، زهقت من حياتي.
- يابنتي قولتلك حطي المصحف جمبك قبل ما تنامي، وكفاياكي اغاني وقر.ف بتجيب شياطين.
مسحت وشي مطرح عرق النوم وقولت:
- ينفع تناوليني ماية من التلاجة معلش؟
- ماشي، بس قومي صلي الفجر خلاص ادن، قومي ياختي صلي يا بتاعة الاغاني.
خرجت، اتنهدت وقومت من على السرير وانا متوترة ومضايقة من كمية الكوابيس اللي بشوفها دايمًا.
خرجت برا الأوضة لقيت بابا بيصلي الفجر واختي الصغيرة بتشوف التليفزيون، قولت:
- هي رحمة تقعد تخلص كرت الكهربا وطول الليل تليفزيون لكن أنا اجي بس انسى ماتور الماية القيامة تقوم؟
سلم بابا من الصلاة وقال:
- أنتِ عاملة عقلك بعقل البت اللي في الحضانة؟ قومي يا مرام صلي الفجر ربنا يهديكي.
- يا بابا ايه ربنا يهديني دي؟ هو أنا يعني مجنونة!
قرب مني يبوس خدي بسخرية:
- لأ يا حبيبتي أنتِ هبلة وكلنا عارفين.
اتعصبت، قربت اطفي التلفزيون، اختي عيطت وشغلته تاني.
دخلت المطبخ:
- فين يا ماما الماية، خليني اطفح وادخل اتوضى.
- يابنتي اتهدي بقى، بلاش عصبيتك وخلقك الضيق ده..خدي الماية اهيه كنت بحطلك ماية ساقعة.
خدت الازازة شربت وحطيتها تاني في التلاجة، دخلت الحمام اتوضى، بصيت لملامحي اللي مش بطيقها وخرجت اصلي.
خرجت مسكت المصلاية في أيدي وقربت أتوجه ناحية القبلة، لقيت ماما بتقول:
- بت بقولك ايه، احنا هنروح للشيخ شعبان.
- استغفر الله العظيم، شيخ شعبان مين يا ماما؟ تاني يا ماما؟
- اعمل ايه فيها ياربي، يابت يا ام دما.غ جز..مة افهمي، مسألتيش نفسك ليه لحد دلوقتي مفيش ولا عريس اتقدملك؟
- هو ايه يا ماما الكلام ده بجد!! ماهي معروفة أنه نصيب عادي الحمدلله راضية.
- نصيب؟ نصيب يابنت الموكوسة؟ وصحابك وبنات خالتك معندهمش نفس النصيب ليه؟
- يا ماما هو أنتِ ايه اللي بتقوليه ده؟؟؟ استغفري ربنا، انا شايفة أنه نصيب وابتلاء من ربنا ليا خلاص.
- و الكوابيس اللي كل يوم تقومي مفزوعة منها؟؟؟
- عادي يا ماما، خلاص يا ماما انا وحشة ومتحبش والبنات كلها لقت الحب والجواز، حلو كده؟ ممكن بقى اصلي؟
- صلي ياختي وصلي يبعتلك نصيبك زي البنات كلها.
اتعصبت، قومت خدت المصلاية ودخلت اوضتي اصلي فيها احسن..
دعيت كتير لربنا وكنت بعيط..ولما خلصت صلاة الفجر قومت عشان اكمل نومي.
كانت اختي رحمة قاعدة قدام التليفزيون ماكسة كيس شيبسي، لكنها وقعته فجأة وقعدت تعيط..وده كان عشان صوت صريخي.
قومت اسيب السرير وانا متعصبة وباخد نفسي بالعافية، دخلت ماما متعصبة عليا:
- فزعتي البت يا مجنونة يابنت المجنو.نة عليكي جوز عفاريت مظبطين اهلك.
- يا ماما سيبيني لوحدي بقى!
- طب ورب الكعبة بكرة هنروح للشيخ شعبان.
- يا ماما شيخ شعبان ايه ارحميني، دول ناس دجالة.
قربت مني بغضب:
- شششش يابت اكتمي بوقك هتأ*ذينا وتأ*ذي نفسك.
- ده كلام بردو يا ماما؟ ازاي بتصلي ومصدقة الحاجات دي..
دخل بابا وقال:
- الجن مذكور في القرآن يابنتي.
- مش قصدي على ده يا بابا، انا قصدي على الناس الدجالة دي، ماما مصدقة أنهم يقدروا يتحكموا في سلامتنا أو لأ! يعني مش عيب طيب واحنا عارفين ربنا تقولي كده!
- سيبنالك الصح يا روح امك، بكرة هتيجي معايا يابت انتِ.
- بكرة ورايا شغل يا ماما.
- يغو.ر هتيجي يعني هتيجي.
خرجت ماما ووراها بابا من اوضتي..بصيت للسرير وانا بتنهد وخايفة انام.. مسكت تليفوني اسكرول شوية فيسبوك طلعلي صفحة احمد يونس..
- ياعم اوعى الله يسترك هي ناقصة رعب.
ــــــــــــــــــــــــــــــــــ
صحيت تاني يوم لقيتني اصلا اتاخرت على ميعاد الشغل، الساعة كانت ٨ بدل ما اصحى ٦، بس طبيعي..هو أنا يعني نومي هيعرف يتظبط من العبث اللي بيحصل معايا ده..
- يا مرااام، انزلي يلا هاتي الفطار عشان نلحق ننزل.
خرجت برا الأوضة..
- انا لسه صاحية يا ماما افوق واجيب الفطار حاضر.
- طب انجزي حالك عشان المكان بعيد شوية، جدعة انك اهتميتي ومروحتيش الشغل.
- لأ أنتِ فاهمة غلط يا قلبي، انا راحت عليا نومة.
- ابوس النوم، خدمني لأول مرة بدل ما يخليكي تخرمي وداننا بالليل.
ـــــــــــــــــــــــــــــ
وصلنا المكان ..كان مكان يوحي للي يخطي فيه أنه بقى رعب واشباح والكلام ده بس على مين!!!
- اااه يا مااااما.
- ايدك والاشرب انا متلبشة لوحدي، وبعدين مش دايمًا عاملة قلبك جامد؟ خايفة ليه دلوقتي من ر.اس خروف متعلقة؟
- حرام عليكي وربنا أنا عايزة اروح..
- تعالي تعالي..بقولك يا آنسة، الدخول بكام؟
- اي فلوس الشيخ شعبان اللي بياخدها، لكن لو مستعجلة ممكن تديني انا فلوس ادخلك.
بصيت للبنت اللي قاعدة دي بقرف بسبب اني عارفة أنه استغلال، ودخلتنا فعلًا قبل واحدة تانية كان ده دورها.
اوضة الشيخ شعبان، عظيم..دي اوضة شيخ ولا جنينة الحيوانات؟ ايه كمية الحيوانات المحنطة دي!
- تعالي انتِ وبنتك اقعدوا هنا..تعالوا متخافوش.
قربت انا وماما قعدنا..حط بخور كتير وصرخ:
- مش ممكن، مش معقول!
اتخضت ماما وسألت:
- في ايه يا شيخ شعبان؟
- بنتك..بنتك مش كويسة خالص.
بلعت ريقي وبصيت لماما في توتر، سألت ماما بخوف:
- ليه؟ ليه بتقول كده؟
غمض عينيه وقال:
- بتقول ايه؟؟؟ من ملك القبيلة نفسه!!!
قولت لماما بسخرية:
- انا عليا عفريت بدوي؟
صرخ وقال:
- ششششش، وايه طلباته؟
اتفرجت عليه انا وماما مستنيين رد، قال:
- حطي اي فلوس معاكي بسرعة هنا في الطبق ده..
فتحت ماما شنطتها رغم اني مكنتش راضية عن العبث ده، حطت ١٠٠ جنيه، قال:
- دلوقتي قوليلي..ايه مشكلة بنتك اللي جاية عشانها!
قولت بسخرية:
- نعم؟؟ اومال ايه بنتك مش كويسة خالص وقاعد كأنك بتقرأ الفنجان؟
بص ليا نظرات غضب، ماما قر.صت دراعي وقالت:
- حقك على راسي يا شيخنا دي عيلة، بص ياخويا، بنتي كل يوم كوابيس وصريخ وحالها واقف ونفسي افرح بيها.
- هتفرحي..وعشان تفرحي لازم تجيبي الطلبات دي.
قولت بسخرية تاني وانا بحاول مضحكش:
- هو عامل منيو؟
زغدتني ماما وقالت:
- هات يا شيخ، الورقة دي فيها طلبات اجيبها ليك صح؟
- أيوة..ويلا وقتكم خلص بسرعة لا تتأ*ذوا اخرجوا.
قامت ماما مرعوبة ووخداني في أيدها.
ـــــــــــــــ
|في البيت|
- يعني يا بابا والنبي ده كلام؟ انا سمعت كلامها وروحت للراجل ده قولت اريحها، في الأخر بص مديها منيو..ايه معمولي عمل على ايد الشربيني؟
مسك بابا الورقة يقراها:
- عشر علب تمر، خروب، فرختين وديك، وبخور...ده عزومة اول يوم رمضان؟
طلعت ضحكة عالية بعد ما بابا ضحك بصوت عالي، فتحت ايدي اخد كفه وانا مش قادرة اتنفس من الضحك.
اتعصبت ماما:
- طب هات الورقة هات، ولا انتو عارفين حاجة، هتروحي معايا بكرة.
- لأ بقى، هو أنا هفضل اسيب الشغل عشان الكلام الفارغ ده!
- روحي شغلك وهنروح بعد الشغل عادي.
ــــــــــــــــــــــــــــ
|حي السيدة زينب|
في وسط السوق والزحمة دخلنا شارع غريب كله ناس بتبيع حاجات غريبة..يعني حاجات شبه اللي شوفتها في اوضة الشيخ شعبان ده.
- هو ايه يا ماما الشارع ده؟؟ عرفتيه منين؟
- كنت باجي مع مرات اخويا زمان، اصلها كان معمولها عمل وكانت بتيجي تجيب مشتريات من هنا.
- مشتريات ايه بس يا ماما، ماما الله يسترك شوفي اللي هتجيبيه عشان جاية من الشغل تعبانة.
- تعالي اهو، بقولك لو سمحت عندك بخور؟
- بخور؟ جاية شارع الاتربانة ومش عايزة تشتري بخور من البخراويين؟
انا وماما كنا مش فاهمين حاجة.. سألت قولت:
- مين البخراويين؟
- شاور بأيديه لقدام.
روحنا المحل الكبير ده، كان كله ريحة بخور تكتم النفس..
- بقولك يابني، عايزة بخور.
- قال لماما:
- جاية من طرف مين؟
- من طرف شيخ شعبان.
بص لينا في تردد كأنه عايز يقول حاجة وبعدين قال:
- المشكلة تخص بنتك دي؟
- أيوة..في حاجة يابني؟
- بنتك دي معمول ليها عمل على ايد شعبان نفسه.
- ايه!!!!!!