رواية سجين الحب الفصل الاول1بقلم زهراء الحريري
آصـــــــف
وما أحببتك لأجل شيء ولكن قلبي تعلق بك
كملت الغدا وصحت على نفس تجيب عباتي، اخذتها من ايدها لبستها على راسي
تماضر:- نونه ماما انتبهي على اخواتج علما اغدي بيت خالج وارجع عينج عليهن لا يدخلن للمطبخ
اخذت الكدورة وطلعت وهذا روتيني اليومي اطبخ لبيتي وبيت اهلي والعصر بعد مايروح ثائر للعيادة امشي انظفلهم البيت واغسل ملابسهم وارجع على بناتي ، نونه تبقى ويا بيبياتها تساعدهن
سحبت السيم واني ادفع الباب بكتفي شفت حذاء رجالية بـ باب المطبخ مو لسراج لان مو من عادته يعوفها بالباب كبل يصعدها فوك
دخلت للمطبخ واسمع امي بس النحيب وعمتي ترد وراه
لؤي:- لا لبسوا جديد ولا معيدين
ـ يمووووي اححه
لؤي:- يوم يومين حسبالي الفرگة يوم يومين
ـ اي يمه صدك عبالي يومين آآه
لؤي:- اييه شبيدي على امر الله وشسوي
ـ اه يمه شسوي ولك يمه
دخلت عليهم لؤي كاعد بيناتهن ينعى مرة يلتفت على امي اللي بس مدنكة تبجي ومرة على عمتي الي متجاوبة وياه، اخ منك لؤي ما ترتاح الا تموتهن والله لو يشوفه سراج يطلعه مكسر من البيت
لؤي:- آخ آخ آخخخخ
ـ آخ فدوة الك يبعد امك
لؤي:- كل الهلا كل ساع كل ساع
ـ كل ساااع
لؤي:- ياعمه وكل الهلا بحلوين الاطباع
ـ الاطباع هئ هييييئ
لؤي:- يمه حملتك تسع تشهر اصحاح
صاحت امي اخ يا يمه ياتبارك عمت عيني عليج يمممه
لؤي:- يا يمة ووكت الطلوگ الموت لاح
واكفة بمكاني اباوع عمتي لطمت على صدرها وهي تصيح خايب يمممممُه
لؤي:- الولد يبني ردتك براس النعش لووااح
اخخخ اخ آخ وجم آخ مرنج يروحي
ميوولي ميولي اعزاز الكلب راحوا ميولي
صحت واني بمكاني مقاطعته اجاكم سراج
لؤي طفر من بيناتهم كعد على القنفة وهو يكلهم عفية نسوان لا تملن ولا تجلن شعدجن اربعة وعشرين ساعة تنعن تهيدن
لتفتت عليه عمتي وهي تضربه على رگبته
ـ يا دهر فرك
تماضر:- لؤي وتاليها وياك
الله عليك ارحمهن ما تشوفهن يردن بس حجه حتى يبجن
لؤي:- جا انه شمسويلهن
تماضر:- لا ابد كل شيء ما مسوي اني اللي جنت كاعدة بيناتهن وانعي
لؤي:- اسكتي لا يسمعج اخوج
هزيت ايدي ورجعت للمطبخ رتبت غداهم على الميز اجى وراي كال جا وينه سراج؟
تماضر:- اجذب عليكم بعده ما اجى
لؤي امشي عليك كل عزيز اعتقهن من سوالفك ما تشوفهن شلون مكطعات ارواحهن
لؤي:- هو انه دومها گملتي بكعة وياكم سوي زين واشمر للشط
باوعت عليه يدخن ويضحك هزيت راسي ما يتوب والله
تماضر:- شلونهم جهالك؟
لؤي:- يبوسون ايدج وراسج
طلع واني وراه كتله وين رايح ابقى اتغدى هنا
لؤي:- لا يبعد اخوج دايمة ان شاء الله بغير وكت
درة منتظرتني
دنك حتى يلبس حذائه، دخل سراج سلم علينا ولزم لؤي من رقبته عاصرها بجف ايده
سراج:- وين رايح مسودن حتى تطلع وقت الغدا
لؤي:- جا شني مستحي منك وما اكل
بس اخاف من المرة
سراج:- افه لؤي يخاف من مرته
لؤي:- وداعتك وانت ما محلفني ارجف منها رجيييف جا غير جنها اخوها
ضحك سراج وهو يسحب بيه مرجعه للمطبخ ما خلاه يطلع الا يتغده وياهم ، سراج انتبه على وجوهن باوع على لؤي
سراج:- والله لوما نعمة الله كبالنا جان عرفت شغلي وياك يا اخي وتاليها وياك تموتهن يلا ترتاح
لؤي مدنك ياكل ولا كانه يسمع مغلس عليه خدرتلهم الجاي ورجعت لبيتي بعدهم ثائر والولد مارجعوا ...
•
•
•
اجهز بالغدا وادم وياي يساعدني ويسولفلي على المجمع واقسامه بلهفة وحماس
نفس:- لكيتوا مكان لو بعدكم؟
عيوني صارت على الباب خيال ارغد هسه اجى دا يدخل
آدم:- الصبح اتصل علينا عمي سراج وكال حددت كم مكان العصر نطلع وياه نشوف المكان المناسب من بينهن
وكف بمكانه يستمعلنا بدون ما ينبه على وجوده
نفس:- بأذن الله خير
وبكل خطوة نجاح وبركة يارب
فكرتكم حلوة وعاجبتني احب الطاقة الشبابية اللي تستثمر وقتها وقوته بالشكل الصحيح
الله يجعل عيني باردة عليكم بحق محمد وآله
آدم:- عليه الصلاة والسلام
تدرين مهند البارحة طلب مني اسألج اذا توافقين نفتحلج قسم اخصائية
ارغد:- السلام عليكم
ردينا عليه السلام دخل بدون ما يباوع علينا مو من عادته هذا البرود
نفس:- انقل الغدا ماما بين ما اشوف ابوك واحتياجاته
آدم:- صار
دخلت للغرفة، واكف كبال الكنتور فاتحه وصافن
ـ ارغد
ـ هلا آغاتـــه
تقدمت عليه وهو يلتفت براسه عليه حضنته من ظهرها بسته بكتفه
ـ شلونه حبيبي خوما تعبان
دار عليَّ حاوطني باثنين اديه رفعت راسي بسته بذقنه أبتسم مجاملة
ـ استعجل قبل لا يبرد الغده
هز راسه اي بدون ما ينطق كلمة وياي اخذ ملابسه وطلع للحمام شما احجي واسوي نار غيرته ما تبرد رغم من رجعتي اله ولليوم لا شفت سراج ولا شافني لاسمع صوتي ولا سمعت صوته
طلعت لآدم مكمل ترتيب الغدا وكاعد منتظرنا وهو يحاوب يحفظ بقمر سورة الفاتحة ، كعدت مقابيلهم وعيوني على باب الحمام ابتسمت من طلع تقدم علينا كعد بمكانه وهو يسمي بسم الله مدنك ياكل ماشاركنا الحديث ماخذ وضع المستمع
آدم:- ها يمه شكلتي
نفس:- على شنو حبيبي؟
ـ تشتغلين ويانا
باوعت بطرف عيني على آرغد مارفع راسه بس الانزعاج واضحة عليه وهو يقلب التمن بالخاشوكة
ـ لا يمه كبرت على التعب وهم بيبني وبينك مشاكل الناس دا تأثر على نفسيتي وتستهلك طاقتي
ـ لا اذا هيج المهم راحتج اني هم ما ارضالج التعب
أبتسمت له دنك ياكل وهو يسولف على ابوه عن المركز وخططهم المستقبلية هو ومهند والاقسام اللي يفتحونها ويا الوقت، حجيت بسري الله لا يضيعلك تعب يابعد امك وعمرها
آرغد:- اي ليش لا شڪو بيه بس المهم هسه ما تأثر على دراستك
آدم:- بأذن الله ما تأثر
ها واحتمال عمي اصف هم يدخل شريك ويا عمي سراج بالاستثمار
ـ خير ان شاء الله
الحمد الله
كالها ارغد وهو يدفع الكرسي
كتله شنو كملت حتى ما اكلت شي؟
ـ شبعت الحمد لله
كملوا غداكم على راحتكم
راح للمغسلة جوا الدرج غسل ورجع علينا كال داخل انام ما اريد جاي دخل للغرفة سد الباب ماكدرت اكل نفسي نسدت ...
•
•
•
كوثر:- وينج ماما تلفوونج يدك
ـ جيبيه الي حبيبتي
شوية ودخلت عليه كوكي (لقب كوثر) بيدها تلفوني
ـ بابا داك عليج مرتين
عفت الماعون بالحوض مسحت ايدي واخذته منها
اتصلت عليه اجاني صوته هلا بأم الصوف
ـ هلا بيك
متصل عيه جان بالغرفة واني بالمطبخ محتاج شي؟
ـ شعندج وياه زمزم اتصلت عليه تبجي
اجت زمزم مكتفة اديها وواكفة باب المطبخ
ـ ما سالتها بنفسك على شنو تبجي ست زمزم
حجت من مكانها
ـ اريد اروح لـ ماما نفس ما اريد ابقى عندج
كتلها على كولت لؤي كنطة وشلعيها من اذانج روحه ماكو كبرتي عيب كاعدة عند العالم
آصف:- شبيج وياه ما كاعدة عند غربة كاعدة بيت اخوي، خليها تروح
ـ ماكو روحة بعد الا وياي نروحلهم زيارة ونرجع، تكعد هين وتسكت كافي دلال وعين زايدة
شكو رايحة وسالبة راحت الناس وبعدين هي كبرت وعندهم ولد شاب بالبيت
ـ والله ما ابقى هنا اريد اروح لبيت عمو
ـ واني كولت ماكووو كعدة عندهم بعد
ـ شبلاج وياها حاجيها بهدوء
ضربت الباب وراحت لغرفتهن وهي تحجي والله ارووح والله
تنهدت بتعب وتالي ويا هالبنت
ـ بالراحة وياها
ـ ما يفيد وياها لا مسايس ولا عصبية تعبتني والله
وانت حجي وياها وفهمها هذا كله سبب دلالك شنو تكولك وكلت نفذولها
راد كوثر نطيتها التلفون حجت وياه بعدين سالها على صفاوي كالتله عند بيت خالو يلعب اسمعه يكولها لا تعبين امج حضنتني وهي تكوله
كوثر:- شعندي غيرها اثو بعيوني اضمها
ضحك وهو يكولها عجل واني؟
ـ انت بوسط روحي اضمك
ـ لا اني اريد هم بعيونج ويا امج
كليلها بابا يكول حيل مشتاقلج ام گلب الصخر
ابتسمت على كلامه، عفتها تحجي وياه مازال كوثر كمشت التلفون بعد هي والساعة يلا تعوف ابوها كملت تعزيل وتشطيب المطبخ على السريع ودخلت للحمام اسبح
طلعت واني الف شعري بالخاولي دخلت للمطبخ اخذ مي
ـ ها ماما ليش بعدج هين حارة عليج
ضحكت وهي تجاوبني نسيت نفسي بالسوالف ويا بابا هسه يله قطعت الاتصال جنت احجي وياه كاميرة
طلعت قوطية الببسي من الفريز هاي عادتها دائما تجمده، كتلها راح ادخل امشط شوفيلي زمزم اذا تريد تشتري ادز على يمان يجي يشتريلجن
دخلت لغرفتي امشط بشعري دخلت عليه كوثر
ـ ماما زمزم ماموجودة
شمرت المشط من ايدي طلعت من غرفتي واني اكولها شنو ماموجودة تبخرت
دورتها بالبيت كله حتى للسطح صعدت كلبي وحيلي ماتوا من الهبطة
لبست عباتي وطلعت لبيت درة اركض ادك بالباب بكل قوتي طبكت سيارة لؤي وراي
لؤي:- ها ام مصطفى خوما صاير شي
ـ خوية زمزم عندكم؟
رفع جسمه يفتح بالباب من السركي الفوك
ـ ما ادري والله هسه اجيت اني
دخلت قبله باب المطبخ هم مقفول دكيته وهو وراي رافع التلفون على اذانه
ـ درة افتحي الباب نايمة شنو
شفت خيال درة من الجام اجت تركض فتحت الباب تفاجأت بوجودي
درة:- اثو هلا تفضلي
ـ زمزم هين؟
دحكت بيني وبين لؤي
ـ لا مو هين اني جنت نايمة
عفتهم وطلعت اركض لبيت اخواني اسمع لؤي وراي يصيح انتظري انه اروح اشوفها ولا وكفت اهجس فقدت
دنكت فتحت الباب من جوا دخلت اركض اسمع صوت الجهال يلعبون بالمنور
ـ صفاوي ماما اختك هين
طلعت ترتيل وهو يكولي ما ادري
ترتيل:- ها عمه شبيها زمزم
ـ ما اجتكم
ـ لا عمه ما اجتنا
اسمع صوت لؤي من باب الشارع يصيح ها خوية لكيتيها؟
كضبت كتف ترتيل قبل لا اوكع
ـ ماما بيبي
تعالوا بسرعة
اجت لتين تركض وتصيح ها ماما اسم الله شبيج
تفاجأت بيه سندتني بسرعة
لؤي:- ووينج ام مصطفى
موجودة البت يو لا
ـ لتين بنتي ما موجودة لا بالبيت ولا عند عمتها
وكعت من ايدها للكاع بعد ما عندي حيل اوكف والف فكرة سودة اجت براسي
•
•
•
اثيلة فقدت عقلها بين اديه وهي تصيح اصعدي شوفيها بيت ارسلان يجوز ما شفتنها من دخلت
ركضت ترتيل صعدت لبيت عمها وهي تنادي عمووو عمووو
دخلت علينا درة تصيح ها لكيتنها
لطمت وجهها اثيله وهي تجاوبها ماموجودة
درة:- عززززا بعينج البنت وين راحت
لتين:- بس اهجدن
اثيلة متاكدة ماموجودة بالبيت
ماكدرت تجاوبني بس هزت راسها بلا وهي ترجف وكوة تتنفس
اسمع صوت زوج درة يصيح بعصبية شبيجن ووينج البنت موجودة يو لا
طلعتله درة تركض نزل ارسلان وهو يدنك عليها كمشت اديه كوة تحجي
اثيلة:- ارسلان بنتي ماكووو
ارسلان:- شنو ماكو وين راحت
هسه نلكاها ضامه روحها ما تعرفين سوالفها
لتين خوية عينج عليها اروح
طلع واثيله سنتدت نفسها اريد اكضبها ماكدرت سحبت روحها وطلعت وراء وهي تتعثر بعباتها
ترتيل كعدت جدتها ورياحين اخذت عباتي وطلعت وراهم دخلت لبيت اثيلة ارسلان يصيح وينج خالو زمزم وزوج لؤي يصيح ولج ام طحش زمزم بس اطلعي وانه اعلمج حضنتني كوثر وهي تبجي واثيلة تصيح اطلعي ماما والله هسه ادزج بيد خالج لنفس
ـ عمه والله دورت البيت كُله ما موجودة
ام باسل:- ها لكيتوها
ـ لا عمه ماكو
شلون ظهرية سودة مرت علينا موتت گلوبنا شنسوي مانعرف رجعنا ندور ببيوتنا وارسلان حتى للاسواق الموجودة بالمنطقة طلع يدورها واني ودرة ركضنا لبيت يونس بلكي عند خالتها وهم مالكيناها
آصف زوج درة بلغه، خطيه اجى الوجه مخطوف لونه وريكه يابس، اجت سمر وبنان وراها
سمر:- شبيكم اتصلوا على ارغد يجوز راحتلهم
اتصل عليهم آصف كالوا لا ما اجتنا وكعت اثيلة مغمي عليها واصف كضب صدره وكوه يتنفس وجهه صار احمر
آصف:- لؤي بنتي نخطفت ماكو غيرها..