رواية سجين الحب الفصل الثاني2بقلم زهراء الحريري

مهنــــــد

‏هل كان التخلي عني سهلاً لهـذه الدرجة

ترتيـــــــل

‏الحب لنا والنصيب لغيرنا

يا أيها النصيب رفقاً بقلوبنا

لقد أحببنا بصدق

••----------♥--------♥-------••

~~أم آدم~~

من سمعت زمزم ماكو ويدورن عليها حسيت حيل كله باد يارب ما اتوقع بس الخير احفظها واسترها يارب بنتي امانتك 

اباوع لآدم وجهه صار اصفر وهو يستعجل بابوه حتى يرحون لبيت آصف، طلع كبالنا للكراج خطواته خطوة اكبر من القبلها وهو يردد

آدم:- اللهم انك تعلم مكانها ولا أعلمه فردها اليَّ برحمتك وقدرتك

يلا يابه استعجل 

نفس:- خلي اروح وياكم المن باقيـة هنا وبنتي ماكو

ارغد:- آغاتي انتي ابقي هينا احتمال تجي علينا عاد تبلغينا، يارب لطفك احفظها بأمانك

وكفنا مصدومين من فت الباب ادم وصارت بوجهه دخلت وهي تسحب بجنطتها وراها لزمت گلبي واني اهمس لك الحمد يارب

ادم قرب عليها بعصبية بالعجل ناديته

ـ ادم امي اعصابك تعوذي من الشيطان لا تنسى نفسك

سد الباب عافها ورجع علينا كعد على الكرسي الخشب اللي مسوي اليَّ ارغد 

ارغد:- عمو شلون هيج اطلعين بدون علم امج لو صاير عليج شي لو خاطفينج 

نفس:- شلون تسوين هيج يا امي لو متصلة عليَّ ودازتلج ادم 

واني اكول زمزم عاقلة وفاهمة تربية ايدي

جاوبتني وهي تبجي

زمزم:- والله صارلي أسبوع ادخل عليها تجيبني هنا متقبل حتى بابا حجى وياها وهي رافضة 

آدم:- الوو عمي 

اجت لبيتنا 

التفتت على ادم يحجي بالتلفون

ـ هلا بيك 

لا ماتطلع شلون نخليها تطلع 

خزر زمزم وهو يكمل

ـ رجلها تنكسر اذا عبرت الباب وحدها 

ارغد:- ادخلي بابا جوه وجهج شصاير بيه من الشمس 

نفس:- شلون كدرتي تجين وحدج ما خفتي تنخطفين يا امي الى متى تبقين بهذا الطيش والتصرفات غير مسؤولة

زمزم:- ما عليَّ ما اجرت تكسي الا رجال جبير وسيارته تعبانة حتى تبريدها عاطل لوما الازدحام جان من نص ساعة اني هنا

دخلنا جوه وادم بقى برة كاعد كعدتها بالصالة نطيتها مي بارد وجهها صاير احمر من الحر وعيونها مدمعة ارغد كعد يمها يحجي وياها ويفهمها حجم غلطها 

طلعت لآدم لكيته واكف يتوضى عرفت واصل لقمة العضب وهاي طريقته حتى يهدئ رجعت على زمزم كاعدة تشكي من امها لارغد وهو يفهم بيها الحق ويا امها ولازم تسمع كلمتها 

••-----------♡---------♡-----------••

لــــــــؤي 

نزل التلفون وهو يكعد بالكاع مرتجي على الحايط وراسه بين اديه اعاين على اديه ترجف 

طلعت ام مصطفى والباقيات وراها تحلف بيه صدك زمزم بـ بيت ارغد 

مارفع راسه ولا جاوبها بقى على كعدته كتله

لؤي:- اروح اجيبها؟

لو تخليها هناك؟ 

رفع راسه انتبهت على امها من شافت ملامحه خافت منه وحتى رجعت ليورة غمضت عيوني راح يصير جلب مسعور (حشى القارئ) وياهو اللي يكدر يلزمه 

اثيلة:- الله عليك لا تاذيها طايشة وعقلها عقل جاهل تتصرف بدون تفكير اني اعلمها اصف امانة عليك لا تاذيها لا تعميك عصبيتك وتنسى هاي بنتك عزيزتك السبب بدلالك الها 

مد ايده اليَّ ساعدته يكوم مشى على الباب مال الحوش

اثيلة:- امانة عليك اصف 

اوكف لا تروحلها تعال ادخل جوه اكعد ارتاح 

طلعت وراء وهو يكلها بعصبية ارجعي للبيت اثيلة ارررجعي 

اثيلة:- ما اعوفلك بنتي اذا تروح اروح وياك 

فتح باب سيارته واجى اخوها وهو يلهث كالهم ها بشروا لكيتوها 

اثيلة:- ارسلان لا تخلي ياذيها 

والله يموتها اعرف هاي النظرات بعيونه ما وراها خير

قبل لا يلزمه ارسلان صعد سيارته وشخطها بسرعة 

لؤي:- ارسلان تعال وياي نلحكه هذا نشخط عقله لا يطك البت ويموتها 

صعدنا بسيارتي وامها جلبت ويانا الا تاخذوني وياكم اخوها ماكدر يرجعها كتله خليها تجي خلي نلحك على ذاك الخبل

اشرت لدرة براسي بعصبية حتى تدخل جوه طلعنا وراء مالحكنا عليه وصل قبلنا امها دخلت قبلنا تركض واني وارسلان بقينا بالباب مانكدر ندخل اشوفه خطيه يلوب وطايرة قمارة راسه يبهز على الطارمة من الباب ويرجع عليَّ 

••----------------♡♡♡--------------••

نفـــــــــــــس

دخل علينا آدم كال يمه عمي اصف يريد يدخل نهضت بسرعة جبت عباتي لبستها دخله آدم مبين عليه الهدوء خدعنا كلنا

اشوف زمزم فرحت بدخلته تلكت ابوها تريد تحضنه ضربها راشدي والله احس صوته ظل يرن بذاني واتبعه صوت آدم 

ـ لاااا عمي مع الاسف عليك مو بالضرب 

اخذها ارغد بسرعة حطها وراء ظهره وهو خازر اصف ويحجي وياه بعصبية

ـ شلون تضربها كبالي وهي كاعدة بيتي يول انت شنهو ماتحشم 

عيوني على زمزم لازمه خدها مرعوبة واضح اول مرة يضربها وتشوف عصبيته، لزمت دشداشة ارغد من وراء وهي خايفة والدموع تصب 

ـ زمزززم بالعجل اطلعي كبالي

آرغد:- وين تطلع 

ما تاخذها كبالي وضربتها من تاخذها تجرم بيها 

ـ ارغد خليها تطلع 

ـ واني كتلك ما تطلع 

تقدم على ارغد يريد يسحبها من ورا ظهره رفع ايده ارغد ودفعه وادم كامشه ويحاول يهديه

نفس:- عيني ابو مصطفى اهدأ فدوة لعينك صح غلطت وغلطها جبير بس مو هيج بالضرب شوفها شلون خايفة منك هي عرفت حجم غلطها وبعد ما تعيدها

كعد على القنفة كامش اركبة بديه ويهز برجلية بعصبية

آصف:- يلا هجدت انطونياها اريد اروح وراي شغل

آرغد:- عوفها هينا الليلة وباجر اني اخذها لامها

صاح ولا دقيقة تبقى هينا هساع تروح وياي 

جاوبه ارغد بنفس العصبية عجل ما تطلع منا 

دخلت علينا اثيلة شصاير بيها الوجه مخطوفة الوانه وصوتها يرجف 

ـ يمه زمزم 

الله عليك اصف عوفها هينا كم يوم واني اجي اخذها والله بعد ما تسويها

تقدمت عليها حضنتها بخوف وتحجي ويا آصف 

ـ سايم الله عليك اصف عوفها هينا لا تاذيها 

جاوبها ارغد محد ياخذها لا انتي ولا هو زمزم تبقى هينا يمي

قمر واكفة وراي وهي حاضنة ساقي وتباوع بخوف على اصف 

رفع جفوفه غطى عيونه يسحب النفس بقوة ويطلعه من صدره بهدوء كلنا عيونا عليه 

آصف:- اعوذ بالله من الشيطان الرجيم اعووووذ بالله

كعدنا كلنا نحجي وياه بهدوء وهي يا عيني بس تباوع بخوف وندم 

آصف:- وهاي شوفت عيونكم هجدت انطوني بنتي لا تجربون الصبر وياي

آرغد:- اذا حلفت ما تضربها تروح وياك

غمض عيونه بعصبية فتحهن وهو يجاوب بقلة صبر

آصف:- اذا اريد ضربها صدكني ماتكدر تمنعني اضمها الها لو بعد عشر سنين 

بس لخاطرك والله وبالله ما اضربها 

آرغد:- حلفت والكل شهد عليك

آصف:- استغفر الله يابة شبيك والله ما اضربها هذا الراشدي المه اضعاف بروحي 

ارغد التفتت على زمزم سألها تروحين ويا ابوج لو تبقين هينا 

جاوبته وهي تباوع على ابوها 

زمزم:- اروح ويا بابا 

سحبت نفسها من امها وراحت على ابوها وكفت كباله تباوع عليه وهو خازرها لزمها من ايدها ونهض 

اخذوها وطلعوا لحكناهم للباب صعدها بالصدر وحط جنطتها بالكشن الخلفي اثيلة تريد تصعد ما قبل كالها ارجعي ويا اخوج 

اثيلة:- اصعد ويا بنتي 

لو خليها تنزل تجي تصعد وياي بسيارة رجل عمتها

ارسلان تقدم عليها كالها تعالي وياي وعوفي زمزم ويا ابوها 

اثيلة:- ما اعوفها والله ياذيها اعرفه مايرحم ما تعرفونه نفسي

ارسلان:- يابة بنته ما يأذيها استهدي بالرحمن يلا خوية وكفتنا هينا عيب

اصف صعد سيارته واثيلة سحبت ايدها من اخوها تريد تفتح الباب وتصعد مالحكت شخط السيارة وطلع

لؤي:- لا يا ناقص على هالدڪة جا مردنا راسه مصفح بالطول

••-----------♡------------♡-----------••

~~زمـــــــزم~~

ليس كل عقاب يولد من الكراهية فبعض القلوب تُتقن إيذاءَ من تحب حتى تغدو المحبة نفسها أشدَّ أنواع العقاب... 

اباوع على بابا بخوف عيونه على الطريق ابد ما التفت عليه ولا حجى وياي 

هاي اول مرة اعرف شنو يعني خوف ما اذكر مرة خفت لان جنت اتقوى بيه اعرف هو دائما واكف وراي وشنو اسوي ما اتحاسب 

بس هالمرة غير اللي جنت اواجه بيه الكل واستقوي بيه عليهم اليوم واكفة بمواجهته 

العب بصابعي وكل شوية اباوع عليه من الخوف حتى ماركزت بالوقت اللي خلصنا بالطريق 

بلعت ريكي من قريت مدينة حديثة ترحب بكم 

ـ بابا 

ـ لا تسمعيني صوتج 

دنكت راسي بقيت هيج مارفعته شراح يسويلي حلف لعمو ما يضربني 

التفتت على الجام السيارة دتمشي على جسر فتحت عيوني على لون المي ازرق حيل يجنن

دخلنا بين بستاين كلها نخل اباوع على البيوت ولا كانه نولدت هنا ما اذكرها تجي مواقف بسيطة بذاكرتي بس واني بيت اهلي حتى الوجوه ما واضحة 

وكف السيارة كبال بيت بابه احمر نزل واني هماتين نزلت، اخذ جنطتي بيده تقدم فتح الباب بدون ما يباوع عليَّ 

دخلت وراء عاف الجنطة بالكاع وتقدم على باب صغير قديم من الزنجار لونه ما واضح فتحه 

دخل واني وراء اكو مرة نايمة على فراش قديم والريحة تموت تذكرت هاي عمتي بيلسان اللي دائما يحجون بيها وعمه لتين تشبهني بيها وكفت بمكاني فاتحة عيوني شنو راح يسجني وياها حجيت بتوسل واني ابجي

ـ لا بابا فدوة لا تعوفني هنا 

حباب بابا والله ما تنعاد التوبة 

كعدت رجعت ليورة خايفة منها 

لزم كتفي ياشر عليها بصبعه وهو يباوع عليَّ 

آصف:- هاي عمتج جانت حيل عزيزة عندي مفظلها على درة وعمامج وحتى على امي وابوي 

من جنت قبل اطول بالواجبات اجى متلهف الها هي صاحبة اسراري اختي العزيزة اللي مفظلها حتى على نفسي

اخذت عقابها على قـدر معزتها اللي ما خلصت ولا راح يخلص عقابها تبقى بهاي الغرفة ليما تسلم أمانتها

وانتي العزيزة عندي احبج اكثر من اختج واخوج اني حتى انفصلت عن امج من شفت مشاكلها وياي جاي تأثر عليج، شما اطلبين اكول تم وبس الج اتنازل 

كالوا كافي دلال لا طلع عينها كتلهم ماعليكم هاي جمارة گلبي شما اسويلها لحد يدخل سودتي وجهي كبال الكل 

سكت وهو يباوع بعيوني، تنهد وحجى بنبرة رعبتني فوك الرعب الموجود بگلبي 

ـ عقابج من اليوم على قدر معزتج بگلبي

زمزم:- بابا ابوس ايدك والله بعد ما تنعاد 

والله باب البيت بعد ما اوصله بدون اذنك 

عافني وطلع صارت عيوني عليها منظرها يخوف طلعت بسرعة واني لاول مرة اسمع صوت گلبي شلون يدك كانه بين اديه طير واحس بنبضة

لزمت ايده سحبها مني بسرعة 

زمزم:- بابا الله يخليك والله ما تنعاد والله 

دخل جوا واني وراء امشي واتوسل بيه 

سلم على بيبي وسالها على عمامي وجدي كالتله طالعين ساعة زمان ويرجعون

التفت عليَّ وهو يحجي وياها

آصف:- حجية اني لازم ارجع البغداد هسه عندي واجب الليلة بنت ابنج راح تبقى هينا يمج مالها رجعة لبغداد بعد 

دلال بعد ماكو تنساه ومن هالساعة شغل البيت وعمتها كله عليها،وبمكان العين الوحدة عندي هينا الف عين مسلطة اذا شفت غير اللي اكوله راح تخلص عمرها ويا عمتها بنفس الغرفة

وها رجلها اذا عبرت باب البيت مو اكسرها الها لا والله وبالله ابترها الها 

بيبي تحجي عليه وهو متجاهلها عافني بمكاني مصدومة منه ومن قساوته عليَّ وطلع معقولة هذا بابا الحنين! 

ركضت وراء للطرمة اتوسل بيه يرجعني وياه واحلف بعد ما تتكرر ولا اطلع من بيت امي اثيلة ما باوع عليه ولا حجى دفعني لحضن بيبي وطلع بسرعة

••---------♡------------♡----------••

~~ترتيــــــل~~

كملت اخر درس اتصلت على خالو ارغد اليوم بابا وعمي بحديثة اخذوا عمتي اثيلة وراحوا وراء زمزم حتى يرجعونها ووصوا خالي ارغد يرجعني

ـ الووو 

شلونك خالو 

اني كملت 

ـ هلا يابة 

اوكفي لي كبال المعهد اني قريب منج

سديت زنجيل الجنطة لبستها بكتفي الايمن وطلعت وكفت بالباب اباوع على السيارات دقائق وطبكت سيارة خالو على السايد الثاني، نزل من سيارته انتظر السيارة تمر وعبر بالعجل 

ابتسمت من قرب بتجاهي سلم عليه وهو يبوس راسي مثل عادته دائماً 

آرغد:- ها خالو تأخرت عليج؟ 

ـ لا ما صار دقائق من كملت 

كمش ايدي عبرني السايد الاول وهو يسالني شلوني بالدراسها

ـ والله خالو صعبة كُلش ما اشوف نفسي انجح

ـ لا سهلة على ظبية خالها 

توكلي على الله واجتهدي ومايضيعلج تعب

ـ ان شاء الله 

واكفين بين السايدين منتظرين السيارات تمر محد ينطي مجال عبالك عندهم سباق 

ترتيل:- اليوم تتعشى عندنا شلون عشى راح اسويلك من ايدي 

ضحك وهو يهز راسه 

كال ابن خالج سيارته اليوم عطلانة اوصله هو وصديقة وارجع عليكم جهزي عشاج 

ـ جيب عمتي وقمر وياك 

ـ صار 

عبرنا السايد فتحلي الباب صعدت آدم كاعد وراء سلمت عليه واني اصعد 

عيوني صارت على ولد واكف بعد مسافة عن السيارة ظهره صاير علينا ويحجي بالتلفون نزلت عيوني 

على تلفوني يدك باسم ماما جاوبتها واني اباوع على السيارات

ـ اي اجى وهسه اني بالسيارة

اكلج يوم خالو وعمتي نفس الليلة عشاهم عندنا 

ضحكت وهي تكول هلا بيهم 

آدم:- شنو واني اللي نصيب بالعشا لا

التفتت عليه كتله طبعاً الك نصيب ليش هو العشاء اله طعم بدونك 

ضحك وهو ينطيني بطل المي 

نفتح الباب وصعد الولد بالصدر يم خالو دا افتح بالبطل 

مهند:- اعتذر اخرتكم 

آدم:- لا يالحبيب ما اخرتنا 

عيوني على ايدي ترجف حالها حال دگات گلبي اللي مرت بيها رجفة قوية ارهقتني

حاولت افتح البطل حتى اشرب مي ريكي حسيته جف ماكدرت افتحه رفعت ايدي لراسي لزمني صداع نصفي فجأة 

آدم:- اي ما كملت شنو سؤاله؟ 

منهد:- حيرني والله لا خليت كتاب يعتب عليه وعلى النت كاعد والله ليلة كاملة ابحث على الجواب بالنت وما حصلته

آدم:- اي شنو السؤال؟ 

مهند:- تسمع يخوي كال شنو الطير الطار مرة وحدة وبعد ما طار

صرت عالم بالطيور على كد ما بحثت وما حصلت الجواب

آرغد:- طير ويطير مرة وحدة وبعد ما طار ما سامع بيه من قبل يول خالي ناصب عليك هذا

مهند:- والله عمي الظاهر هيج 

اسبوع اني دايخ بسؤاله ومالكيت جواب منو اسأله مايعرف 

آدم:- واذا اكلكم جوابه موجود 

اثنينهم كالوا لا صدك تعرفـه! شنو جوابه؟ 

التفت مهند نصف التفاته براسه يعني جانب وجهه الايسر صار على الكرسي الكاعد عليه بدون ما يباوع علينا وخالو من المراية الامامية يباوع بين ادم والطريق

آدم:- اي اعرفه جواب السؤال المحيرك بالاية 63 من سورة البقره (وَرَفَعْنَا فَوْقَكُمُ الطُّورَ) 

خالو خفف السرعة وآدم يحجيلهم بالجواب اللي حتى اني شد انتباهي وتركيزي

آدم:- طور سيناء الجبل اللي رفعه الله عز وجل فوك بني اسرائيل لترهيبهم 

ردوا اثنينهم سبحان الله 

منهد:- يا الله واني تفكيري صار محدود على الطيور وبحثي صار داخل هذا النطاق ماتوسعت

ما كدرت اسيطر على نظراتي عيوني صارت مسيرة بأوامر گلبي بين الدقيقة واللي بعدها اباوع عليه يسولف هو وآدم وخالو مركز بالسياقة 

آرغد:- خالو ترتيل 

عيوني صارت على مهند قطع سالفته حرك راسه قليل مايل بتجاه الفراغ بين الكراسي

جاوبته واحس رجفة خفيفة طلعت ويا صوتي

ترتيل:- ها خالو؟ 

آرغد:- امج راح تنخبص وتطبخ بتبذير كليلها خالي يكول لا تكلف نفسها واذا لكيت اكثر من نوع واحد على السفرة ما اتعشى 

ترتيل:- شسالفة خالو شنو راح نذبح عجول هو عشانا العادي 

آرغد:- لا خالو تعلميني بأمج

اعرفها ما راح تعوف شي يجي على بالها ما اطبخه

ترتيل:- اي واذا الف عافية على خالو ومعدته 

ضحك وكال لا خالو احجي الصحيح اذا لكيت اكو تبذير ما اتعشى وهالبلغتج وصلي لامج

ترتيل:- يدلل علينا الصقر المهم تشاركنا بالعشا عسى كعك وجاي 

ادم يحجي ويا مهند اللي ضاع صوته ما متجاوب وياه مد ايده ادم هز كتف مهند بهدوء وهو يضحك 

آدم:- ها يالحبيب شنو وين سافرت بصفنتك؟ 

رفع ايده يرجع بشعره للخلف وهو يرد على آدم

مهند:- ها 

اعذرني ما سمعتك جنت افكر بالخريطة مال المجمع

آدم:- نشوف النماذج الموجودة وسهلة بإذن الله 

رفعت ايدي لصدري احس بحرارة بين ضلوع صدري 

وصلنا لمنطقتي وكف خالو السيارة كبال الباب نزلت واحس رجليه خدرانات مو مسافة ثلث ساعة كانه 3 ساعات مرت عليَّ ببطئ 

واني افتح بالباب عيوني صارت عليه لكيته يباوع عليَّ بسرعة نزلت عيني 

‏« أنا بخير...

مجردُ رضوضٍ في المشاعر، وكسرٍ في الخاطر، وبعضِ الخدوشِ على الذاكرة. يقول الطبيب لا شيء مميت خلعٌ في الروح فقط » 

••-----------♡----------♡-----------••

~~زمــــــــزم~~

جدي وعمامي تفاجئوا بوجودي بيبي سوالفتلهم كلام بابا

جدو صفك ايده وهو يكول وتاليها ويا اصـف يمتى يعقل ويريحنا 

اوس:- يعني زمزم راح تبقى هينا عندنا، تعالي عمو هذا بيتج الثاني

مشيت كعدت بصفه حضن اكتافي بيده 

اوس:- ما عليج بأبوج اذا تردين باجر ارجعج لامج 

زمزم:- لا ما ارجع بابا هو اللي جابني وهو اللي يرجعني

اوس:- قووية زمزومه 

باوعت على عمي مجد ولا كال شلونج عمي حتى اول مادخلوا من ردت اسلم عليه تجاهلني وسوة نفسه يحجي ويا زوجته عكس عمي اوس ڪُلش حباب 

فرشتلي بيبي بغرفتها ماكدرت انام بقيت للفجر فاتحة عيوني هسه مصار هواي من غفيت واجتي بيبي 

ـ اكعدي جدة ابوج المعثور اتصل يكول خلي تكعد ماكو نوم بعد الفجر 

تربعت على فراشي عيوني افتحها وتلزك من النعاس 

نهضت وياها البيت هدوء جدي اسمع صوته يقرا قرآن وعمي اوس بغرفته القديمة وعمي امجد وعائلته بالطابق الفوك 

طلعنا للطرمة بقيت واكفة بالباب وهي دخلت على الغرفة سديت خشمي بصابعي من الريحة وين ماما نفس اللي جانت تصحيني على ريحة الورد اللي زارعه عمي ارغد وهسه اصحى على ريحة الحاجتين جوا اللي اسمها بيلسان 

نهزمت للصالة لعبانة نفسي لسه الريحة بخشمي، طلع عمي اوس التلفون على اذانه ويحجي بانزعاج

ـ ترى طفلة وين تعرف لبيلسان خاف الله بيها 

طلع واني كعدت على القنفة اغفي دخلت جدتي مبين عليها ضايجة

ـ جدة تعالي وراي اعلمج شلون تسبحينها

ـ اني اسبحها!!! 

وين اعرف 

ـ لو عليَّ ما اخليج بس هذا ابوج هيج يريد حجيت وياه مافعل حلف يجي يكعدج وياها بنفس الغرفة 

مشيت وياها دخلتني للحمام بيلسان كاعدة على الطابورية لسه الريحة بيها تموت وبعدهي مغاسلتها زين

ـ اريد جفوف بدون جفوف ما اسبحها لو يجي يموتني

طلعت بيبي تجيبلي واني طلعت احس روحي توصل لحلكي 

اكو شال على الحبل اخذته لفيته على خشمي وحلكي واخذت الجفوف لبستها

عمو اوس واكف على جهه مكتف اديه ماراضي يكولها هالطفلة وين تعرف شبيه هذا ابنج كلش نسى الرحمة حتى ويا بنتـه

دخلت عليها وكفت بعيد الصوندة بيدي واضغط على المي ما كدرت اتحمل من الريحة والمنظر طلعت اركض كعدت اتقيئ معدتي تقطعت وبس المي يطلع عمي غسل وجهي وهو يحجي على بابا 

دخلني جوة روحي لعبانة لسه الريحة بخشمي والمنظر بعيوني سديت حلكي روحي تصعد وتنزل ودموعي تصب 

ماكدرت احط شي بحلكي ابد بقيت على غدا امس اللي اكلته بيت امي صرت اتحسر على كعدتي وياها اللي جنت اكرها

العصر دخلت امي وخوالي وراها حضنتني وهي تبجي سلمت على اخوالي ورجعت كعدت بصفها 

اثيلة:- ما اعوفج هينا هسه ناخذج ويانا 

زمزم:- ما اروح بابا هو يرجعني مثل ما جابني

حاولوا وياي وحتى خوالي اشكد حجوا وياي وكالوا اذا خايفة من ابوج يمنا احنا نقنعه بقيت مصرة ما ارجع الا وياه خايفة يسجني ويا بيلسان

اتصلت عليه امي كالتله احجي وياها كلها ارجعي ويا امج اسمع صوته يكلها ماترجع تبقى بيت جدها واذا رجعت تعرف شسوي

اثيلة:- انت شنو حقدك ماله نهاية هاااي بنتك شنو من گلب عندك 

خليها ترجع وياي 

ـ كلت ماترجع

سد التلفون بوجهها وهي تدعي عليه بالمرض والموت 

زمزم:- حتى لو كالج جيبيها ما ارجع الا هو يجي يرجعني مثل ما جابني

اثيلة:- مو وقت عنادج 

ابوج لو تضربين راسج ما يرجعج يلا يمه كومي وياي

زمزم:- ما اطلع منا والله 

تعبوا مني وتاخر الوقت وراهم رجعة كالت يومين وارجع اخذج اروح اقنعة واجيج وصدك كل يومين واحد من اخوالي جايبها من تشوف حالي تظل تحمس بروحها من الحرگة والقهر وتحاول تاخذني واني رافضة 

عمي ارغد اجى ثالث يوم من كعدتي هنا دخل علينا من الصبح كال الخبيث ما اعرف بيه جايبج هينا البارحة سمعت من عمتج لتين

آرغد :- جيبي ملابسج ويلا وياي ما تبقين هينا

زمزم:- لا عمو عوفني هنا ما ارجع

ارغد:- لا تخافين من ابوج تبقين يمي 

زمزم:-لا عمو ماريد ارجع الا هو يرجعني بنفسه يجي

بقى يمي تونست وياه بهذا اليوم على سوالفه الحلوة ماحسيت بالوحشة الى ان رجع العصر لبغداد

اول اسبوعين مثل الثولة كلشي ما اعرف اسوي غير التنظيف لان جنت اشتغل لماما نفس اباوع على بيبي كوة تتحرك الفجر اطلع بيلسان تغسلها وتسبحها واني وياها روحي تطلع ليما نكملها والخاتون الفوك ماتنزل تساعد بيبي بالطبخ والبيت واصلاً مسويتني خدامة مجانية لطابقها وجهالها يعبثون جوه طاردتهم كل النهار علينا 

وزوجة عمي اوس عند امها بالموصل مسوية عملية ولادة قافلة بيتها وجهالها هناك وياها لان هنا محد الهم عمي دوام وبيبي جبيرة ماتكدر عليهم وهو كاعد هنا بغرفتة القديمة خادم نفسه وايام الجمعة والسبت هو ينظف لبيبي 

كعدتها بيبي بالحديقة ودخلت تنظف غرفتها كعدت كبالها احرسها خاف تطلع اباوع عليها من تسبح تطلع كُلش حلوة وعيونها بيها هواي شبه من عيون بابا واجمل 

اجت بيبي كعدت على الكرسي وراها تمشط بيها كتلها

زمزم:- هي صدك خبلة لو تجذب هناك جنت اسمع يكولون تجذب على اهلها مابيها شيء 

ـ اول كم سنة صدك تجذب بس هساع لا يجدة صدك مو بعقلها نوبات مابيها شي وتسولف وياي ونوبات هذه حالها مثل ماتشوفينه

ـ وليش ما طلعونها تبقى بالبيت مو حرام عليكم 

ـ ابوج مايفعل وغير ساعة وحدة ممنوع اطلعها ما بينا حيل ابوج يجدة 

جنت اطلعها بس ما اعرف شلون يعرف ويجي يعاقبها يخليها يومين بدون اكل والمفتاح ياخذه مني 

روحي جدة نظفي غرفة عمج

دخلت هي بيلسان واني رحت لغرفة عمي نظفتها واباوع على الحايط صورة جبيرة لخالو مصطفى اني ما اذكره بس اعرفه من الصور اباوع على ضحكته وهو حاضن اكتاف عمي اوس اخذت ملابسها كلها اسود ماكو الوان بيها 

بلشت اتعلم على بيلسان وحدي لان حاولت اخفف على بيبي، مامضروبة بعمري بس مرتين اول مرة من آدم والثانية من بابا وهسه صرت يوميه اكل طن ضرب من هاي الخبلة احس حتى جسمي تعود ما ياذيني مثل اول ايام

ضربتها بالصوندة واني اصيح كافي المخبلة كسرتي ايدي اوكفي خلي اغسل شعرج 

تضرب بيَّ بديها كوة كدرت اكمل سبحها لبستها ملابسها كطعتني تكطع 

سحبتها طلعتها للحديقة كعدتها بالكاع وكعدت وراها امشط بشعرها تتكطع اديه يله اكملها دا اطلع الشعر من المشط انتبهت اكو دود صغار ڪُلش ولونه بني ما اعرف شنو

ركضت لبيبي اصيح بيبي تعالي شوفي هذا الدود طلعت من غرفتها كوة تمشي شوفته الها كالت رجع عليها الگمل 

اني سمعت اسمه وبالعجل شمرت المشط والشعر من ايدي صفكت جفوفي انكت بيهن

ـ يمممممه راح يصير بيه 

طلعت بيبي واني وراها فتحت شعر بيلسان لعبت نفسي الدود اصغار وكبار يمشي براسها كالت العصر اخلي عمج اوس يجيبلها علاج 

رفعت ايدي احك بشعري احس بمكان اكو شي شلون يرف رفه خفيفة وبغير مكان مثل الكرصات وهاي الحالة صار يومين من حسيت بيها

ـ بيبي شعري من يومين يكرص بيه 

اجت شافت شعري مرة هيج تكلبه ومره هيج 

كالت جدة مابيه شي شعرج شحلاته يلمع

دخلت هي بيلسان كوة تمشي بيها واني رجعت على البيت طلعت الملابس غسلتها واكفة اشر بيهن وسمعت صوت سهام الخاتونة لقب الخاتونة آدم من جان يشوفني كاعدة وماما نفس تشتغل يكلي انطي من نفسج شوية خاتون وساعدي امي 

ـ ووووينج زمزم 

رحتلها ها عمه كالت اصعدي وينج يلا تعالي اكنسي وامسحي الارضية

زمزم:- اريد اكمل الغدا العصر اصعد انظفلج

سهام:- نجعمي وتعاي نظفي كملي وانزلي 

اخذت المكناسة اكنس وجهالها يجون منا ومنا وكل شوية اعيد وراهم طردتهم هي جوة عضيت شفتي راح يوسخون جوة

كملت ونزلت اركض للغدا سلكت اللحم وكعدت اسوي البامية نصها اطبره نسيت اللحم واني اصفن انتبهت على ريحة حرك طفرت لكيت الكدر صاير اسود من جوة طفيت الطباخ وكعدت ابجي 

اجت بيبي وهي كملت الغدا نقهرت عليها كمت اساعدها المركة صار لونها احمر غامق على سواد وطعمها حشى النعمة يلعب النفس ما اكلت منها بس هم ياكلونا ومايحجون ولا ينتقدون 

كم يوم واحس نار بشعري احك بيه باثنين ادية حتى بالليل مطير النوم من عيني بيبي ماتشوف زين من عيونها دزت على زوجة مجد اجت شافتني كالت راسها مليان گمل

حطتلي من علاج الخبلة يلا ارتاحيت بس لسه احس اكو بيه كل ساعة رافعة ايدي احك راسي 

مر شهرين على كعدتي بيت جدي باب الشارع ما اوصله امي كل يومين تجيني ومحمله بالملابس والحلويات تكعد ساعات وياي تقنع بيه حتى ارجع وياها واني قافلة الا هو يجي يرجعني ما اريد ارجع وهو بعده زعلان اريده يرضى عليَّ ويرجع ابويه اللي تعودت على حنيته وياي وبعد كل جية انتبه عليها ذبلانة والعيون محاوطة بسواد تنظفلي البيت تنظيف زين بس جهال عمي مجد ما يعوفونه نظيف 

عمي آرغد وماما نفس كل اسبوع يجون يشوفوني ومن عرفت اني اللي اطبخ وانظف واللي اطبخة يلعب النفس تجي محملة من خالتي وعماتي كدورة الدولمة وكبب تترسلي المجمدة وتعلمني شلون اطلعه واطبخه حتى كليجة وكيك وانواع الحلويات 

ومن سولفتلها على شعري وشلون انظف بيلسان البس علاكات بيدي لان الجفوف اللي عندي تمزقن جابت وياها الي جفوف وكمامات وتعقيمات ومواد تنظيف وعلاج لشعري تكول وقاية لشعرج وقبل لا تروح توصي بيه انتبه على نفسي وجسمي دائما اخليه مستور من العين 

اشوف بليسان صارلها خدود على الاكل والله لو يعرفن هذا تعبنهن اترس بيه بطن بيلسان الا يقطعن الامدادات عليَّ لان كلهن يكرهنها وشنو السبب ما اعرف

كملت تنظيفها مثل يومية وطلعتها للحديقة كعدتها بمكانها المعتاد تاكدت من باب الشارع مقفول يلا دخلت نظفت غرفتها رجعت مشطت شعرها وبقيت افلي بيه اشكد جانت تلعب نفسي هسه صرت اتونس بيه واطك بيه بين اظافري مثل بيبي واحسن 

ومن ساعة وحدة ليوم كامل صرت ابقيها برة حتى اكلها بالحديقة جوا السقيفة اخليها تاكل بس النومة بغرفتها صارت مسؤوليتي بالكامل بيبي بس تكعد تباوع حسيت نفسي تعلقت بيها وبديت احبها اني حتى ما اعرف شنو مسوية وليش هيج بابا ساجنها من سنين من اسأل بيبي ما تقبل تسولف عمي اوس زوجته قبل الاربعين رجعت لبيتها وغرفته صارت الي، نام من 8 واكعد الفجر وحدي شابعة نوم انظف بيلسان وانظف بيت جدي واصعد لطابق عمي مجد انظفة مرتين للخاتون الصبح والعصر، والغدا اطلع من المجمدة حتى العدس والفاصوليا مجمداته اليَّ بكياس 

صار شهرين ونص على كعدت وبابا لا شايفته ولا سامعة صوته حيل مشتاقتله وانتظر جيته حتى لو مايرجعني بس اريد اشوفه 

امسح بالارضية والخاتون كاعدة على القنفة تحجي ويا اخواتها اتصال جماعي وكل شوية وكالت ارجعي امسحي منا، واني مستعجلة لان عايفة بيلسان بالحديقة اخاف الجهال يفتحون الباب وتطلع

طكت روحي شمرت الوصلة بالكاع بكل قوتي 

ـ اذا هيج نظيفة كوووومي خاتون امسح بيتج بنفسج اني مو خادمة الج الف مرة مسحت وما عاجبج

سهام:- هاااا هيج الحجي صايرلج السان انتظري الا اتصل على ابوج اشوفه يقبل بهذا الحجي

بلعت ريكي عضيت شفتي اريد اكلها لا راح اكمل بس عاندت روحي ما اريد اتنازللها

قطعت الاتصال وهي تكولهن هسه ارجع بس ادبها 

اتصلت على بابا وهي تفتح الصوت تسمعني بعد السلام حجتله شنو سويت 

آصف:- اني ما عايفها تخدمج مخليها تساعد امي بنتي مو خدامة لجنابج والله وبالله يا سهام اذا طخت براسي مكان بيلسان الج ولذاك السيبندي زلمتج 

اصفر وجهها وهي تبلعم بالحجي عيبت عليها بلساني عفتها تتعذر منه ونزلت اركض لو اعرف جان من زمان اعترضت وحجيت ولا اخليها مسويتني خدامتها ام الصنان ما يعجبها تنظيفي 

تلاكيت وياي عمي مجد يباوع على طولي بصفنة بسبب تحذيرات ماما نفس وتوصياتها صرت اخاف من كل احد يباوع عليَّ حتى لو قريب وهاي مو اول مرة انتبه عليه صار كم يوم اشوفه يصفن هواي عليَّ نهزمت للحديقة وهو يصيح وراي دخليها هاي لا تعوفينها برة

عشيتها على وقت دخلتها نومتها ورجعت عشيت بيبي وجدي دخلوا ناموا واني كوة مسيطرة من النعاس كملت ترتيب المطبخ على السريع ودخلت لغرفتي نمت بتعب

حسيت باحد تمدد وياي بفراشي يشم بشعري وحاضني بقوة ومن شعري ينزل لوجهي يبوس بيه بكل مكان

                الفصل الثالث من هنا