رواية بيتزا وشنب الفصل الاول1بقلم شيماء يسري زهران
- عايزة بيتزا ايطالي، بس متحطش زيتون.
- عيوني يا استاذة.
لفيت اتكلم مع صاحبتي:
- بس وربنا يابنتي العيشة كده مبقيتش نافعة، الواحد عايز يصرف على نفسه عن كده.
- عندك حق بصراحة، محتاجين نضاعف السعي.
- يعني أنتِ شايفاني بعمل ايه يا ناهد يعني! هو أنا يعني عشان واقفة بشتري بيتزا! ايه يارب ماكلش!
- بيتزا؟ يا شيخة اركني على جمب ده الناس بيطلبوا اكل غالي دلوقتي، حبيبتي البيتزا دي اصدار قديم مبقيتش بتاعت الطبقة الكلاسي.
- كلاسي ايه وبتاع ايه يا ناهد، لا اله إلا الله هو الأكل كمان بقى برندات! عايزين نسد جوعنا يا عالم.
- ششش وطي صوتك يا مرام هتفضحينا، ده محل كبير نضيف، ارجوكي حاولي توطي صوتك في الحياة عمومًا.
شوحت بايدي وقولت:
- بس بس، قوليلي صح، عملتي ايه في حوار خطيبك؟
- شكلي هفركش.
- ليه! يابنتي اتقي الله حد لاقي فراشات!
- فراشات؟ ده بيطفحني دبان.
ضحكت بصوت عالي، والضحكة بتاعتي مش ضحكة أنثوية زي مانتوا متخيلين لأ دي ضحكة غريبة عفوية بس عالية.
- ششش يابنتي صوتك.
لقيت الشيف بيتكلم:
- صوتك يا فندم ميصحش كده!
- نعم؟ بتكلمني أنا؟
قالت ناهد وهي بتشد ايدي تسكتني:
- اسفين يا شيف والله.
- هو ايه اللي اسفين يا شيف؟ هو أنا عملت ايه يعني!
قالي بهدوء:
- يا فندم ضحكتي بصوت عالي وده ميصحش عشان قواعد المكان.
بصيتله بقرب ومرديتش عليه، قالت ناهد:
- بعتذر تاني والله.
مشي الشيف رجع يكمل شغله، قولت:
- مش كل حاجة تعتذري كده، بطلي تبقي هبلة.
- هبلة؟ دي اسمها قلة ذوق يابنتي اللي أنتِ بتعمليها، الراجل من حقه يقولك ع الغلط غلط اللي ممكن يض.ر شغله.
- على نفسه يا ناهد، المهم كمليلي، ماله خطيبك؟
- يابنتي بقى عصبي اوي، بيغير عليا من اقل حاجة.
- ما الراجل راجل اهو أنتِ عايزاه يحلق شنبه ولا ايه!
- مرام أنا عايزاكي أنتِ تحلقي شنبك.
- ايه!!
- مش قصدي والله، بس يا مرام ليه مش بتهتمي بنفسك عن كده، أنتِ ٢٥ سنة مش صغيرة!
سكت مردتش عليها، كنت في نص هدومي من الإحراج، كملت هي في احراج بردو:
- انا .. انا والله العظيم مش قصدي..بس تيجي تيجي مني احسن ما تيجي من الغريب صح؟
حطيت رجل ع رجل وقولت:
- ححح، يابنت الحلال طبيعة شغلي عملت فيا كده.
- يا مرام أنا بصراحة مش فاهمة امتى هتسيبي الشغل ده! اصل يعني ايه والله!
- بقولك ايه! كله إلا شغل بابا!
- هو أنا شتمتك؟؟ شغل بابا؟؟ مش كنتي لسه عايزة تشتغلي وتصرفي ع نفسك؟؟؟ خليكي في الشحم.
- شحم ع الهوا؟
ضحكت ناهد وطلعت مني ضحكة عالية تاني، خرج نفس الشيف:
- انا اسف يا فندم ممكن حضرتك تستني الاوردر برا؟
- استني الاوردر برا ازاي؟؟ وليه؟؟
- اتفضلي يا فندم.
قالت ناهد:
- حاضر أنا احنا اسفين، اخرجي يا مرام مش عايزين مشاكل.
خرج سيف تاني شاب متعصب:
- في ايه يا شيف سعد؟
- الزبونة دي مش محترمة المكان.
بص ليا من فوق لتحت الشيف الشاب، وقال:
- ده زبون مش زبونة ولا انا دايخ.
قال الشيف سعد:
- والله يا شيف مانا عارف، المفروض مش اي حد يدخل المطعم.
الناس بدأت تتفرج وتسمع، كل اللي على ناهد إنها عايزة تخرج برا المطعم من الكسوف، قال الشيف الشاب:
- هي طالبة ايه دي؟
- طالبة ايد امك..
بعدها سمعت شتايم وألفاظ مش حلوة وطردوني برا بعد ما ادوني الفلوس.
- عجبك كده!
- بس يابت، أنتِ اللي اسلوبك طري، ده بيقوله "طالبة ايه دي" انا دي!!! ابويا علمني محدش ميحترمنيش!
- ياستي اتنيلي بقى، بقولك ايه انا مش طايقة نفسي ولا طيقاكي، سلام يا مرام.
- هقول ايه مانتي بت بياعة، بلا بيتزا بلا بتاع هروح اضر.ب سندوتشات فول وطعمية.
ـــــــــــــــــــــــــــ
|داخل محل بابا|
- يا صباح الفل يا حاج.
- ايه يابت يا زلطة ايه مصحيكي بدري كده إيه النشاط ده كله يعني!
- اهو بقى، نزلت مع صحبتي مشوار كده وكنا راجعين ناكل وعملت مشكلة.
- يا نهار مش فايت، بلعتي مين؟
- لأ قدر ولطف، كنا هنطلب بيتزا كده بس حصل مشكلة مع الواد اللي واقف هناك، عيل فافي بيكلمني وحش مقدرتش اسكت.
- بيتزا؟ و سندوتشات البيض قصرت معاكي في ايه؟ مانتِ كل يوم تفطري بيض وفول جات النهاردة تطلب بيتزا وتعملي مشاكل مع الناس!
- جرا ايه يا يابا انت هتخاف عليا! من امتى الكلام ده! ده انت مشيلني مسئؤولية المحل من وانا عيلة.
- يابت مش عشان أنتِ بمية راجل يبقى مخفش عليكي، أنتِ بنتي، محبش حد يضايقك بكلمة بردو.
- معلش بقى يابا انا اتربيت ع كده خلقي ضيق وعصبية وبنت بلد، قولي، مين النهاردة بقى بعت العربية الحلوة دي؟
- اه بقولك ايه صحيح، عايزك تشتغلي ع العربية دي حلو عشان بتاعت واحد باشا.
- هيدينا كام يعني؟
- هيدينا ايه يا ظلطة! الله من امتى بتسأليني كده!
- جرا ايه يابا هو مش من حقي اسأل! انا تعبت في شغلانة الميكانيكا دي طول عمري وبصراحة بقى من حقي دلوقتي اسأل كل فلوس بتاخدها بتكون كام.
- نعم وحياة امك؟؟ عايزة تقولي اني بخنصر فلوسك؟
- اللي انت شايفه بقى يابا، أنا كده كده هشوف شغل مع شغلانتك دي.
زعق وقال:
- تشوفي ايه!!! عايزة تسيبي أبوكي لوحده؟؟؟ بعد ما كبرتك وربيتك في الورشة هنا؟؟ وهتشتغلي ايه ياختي؟؟
- اي حاجة بس عايزة فلوس كتير في أيدي انا مبقيتش صغيرة.
- طب مفيش فلوس هتاخديها النهاردة يا ظلطة!
رميت المفك في الأرض وقولت:
- طب وانا مش هشتغل يا طلعت! يلا بقى.
سيبته وطلعت البيت:
- ظلطة..ظلطة..
- اقعد بقى انده مع نفسك.
ـــــــــــــــــــــــــــــ
- يارب يا ساتر.
- جرا ايه يابت! خضيتيني!
- ما عشان كده بقول يارب يا ساتر لأن عارفة تلاقيكي مش قاعدة بلبس محترم.
- طيب ياختي كويس انك عارفة انك راجل في نفسك، مسم عَجب، ما اقعد ياختي بلبس مش محترم هو في حد في الشقة!
- لأ بس ملهاش لازمة المياعة دي يعني أنتِ ولية على وش الق.بر.
قامت تقف بعد ما شهقت وقالت:
- ق.بر يلهفك ما تاخدي نفسك يا بعيدة، جرا ايه يابت!
- بقولك ايه يا مرات ابويا والله ما نقصاكي، ريحي على جمب وأنتِ شبه الجمبرياية كده بالبرتقاني ده.
- جمبرياية لما تعضك ما تسيبك يا بعيدة، انتِ ايه يابت مطلعك! ما تنزلي تشوفي شغلك مع أبوكي!
- اتخانقت معاه.
- منك لله ربنا ما يريحك زي ما دايمًا تاعبة الراجل.
- يا ولية يا شايطة زي البيض ع النار بتدعي ع واحدة من دور عيالك؟
قلعت اللي في رجلها وحدفتني بيه، قومت مسكتها من شعرها.
ــــــــــــــــــــــــــــ
الساعة ١٠ بالليل كانت، بابا واقف متعصب، بيشخط فينا احنا الاتنين:
- انتوا الاتنين محتاجين تربية.
- ما تلم بنتك يا طلعت! شايفة نفسها!
رديت:
- بس يا ولية.
رد بابا:
- قولت بس!! والله اتجوز واجيب التانية تربيكم!
شوحت وقولت:
- ياعم انت قادر تديني مصروف.
- بطلي برطمة..انا هروح ادخل الحمام وانزلي يلا المحل في شغل كتير.
- ححح، ماشي، كله عشان ربنا بس، اوعي كده وسعي بريحتك دي.
- ريحتي انا؟
قال بابا من الحمام:
- وبعدييين!!!
ـــــــــــــــــــــ
نزلت تحت اكمل شغل لكن..
- انت كمان مراقبني وعرفت عنواني!! اه يا راجل يا نا.قص.
- احترمي نفسك يا بت أنتِ!! عنوانك ايه؟!؟
- ده محل ابويا بتعمل ايه هنا!!!؟؟
- أبوكي!
نزل بابا بيجري ع الصوت وقال:
- في ايه!!!
- ده الز.بالة اللي اتخانقت معاه الصبح.
- ششش ده البيه صاحب العربية دي اللي قولتلك عليها.