رواية الفراق هو نصيبنا الفصل الثاني والعشرون22 بقلم حبيبة الديب
22
_بارك الله لكما و بارك عليكما و جمع بينكم في خير..!
الجمله اتقالت من هنا و الكل رددها و سقف و الزغاريد ملت المكان مع الاغاني اللى اشتغلت...
كله كان بيباركلي انا و كريم بفرحه، حتى هو مش عارف يجي نحيتي من صحابه اللى شدوه و بيهيصوا معاه..
الاغاني اشتغلت و المركب اتحركت لما المأذون مشي و حفلة كتب الكتاب بدأت.
_اوعوا كده سيبوا العريس يروح لعروسته ده حتى مالحقش ياخد حضن كتب الكتاب..!
عزت اللى قال كده لصحاب كريم وهو بيشده منهم و صحابه غمزوله و ضحكوا..
و كريم ضحك و هو باصص لي و قال لجده و هو جاي نحيتي معاه :
_الله يباركلك ياجدي والله راجل بتفهم في الاصول...، تعالي يا زهرتي..
قالها و هو بيمسك ايدي بدفء و سحبني لحضنه بهدوء، رعشه بسيطه سرت في جسمي، ابتسمت بتوتر و انا سامعه بيهمس لي :
_مُبارك عليا احلى زهره، بقيتي مراتي يازهرتي خلاص..!
طلعت من حضنه و انا مبتسمه بخجل، بقيت مراته خلاص..!
يعني كريم حبيبي بقا جوزي رسمي خلاص..!
فضل ماسك ايدي و شابكها في ايده و الناس بتبارك لنا و رجال اعمال تبعه و تبع بابا، و هو خد باله اني متوتره شويه، فـ همس لي :
_مالك.!
_مفيش متوتره شويه، الاجواء جديده عليا، مش مصدقه اني بقيت مراتك خلاص، حاسه انه حلم.!
باس ايدي و هو بيرد :
_لا صدقي، بقيتي حرم كريم الحسيني خلاص..!
=اموت انا و اعرف العرسان في الموقف ده بيهمسوا يقولوا ايه، بتقولها ايه يا كريم قر و اعترف..!
_جودي..!
انطري بعيد، يلا البوفيه مفتوح روحي كُلي يلا..!
_مانا كلت خلاص، تعالي يا مرات اخويا نرقص سوا..!
_نـ ايه يا ماما.!
ابقا المحك يا جودي انتي او زهره تعملوا كده، اخركوا تسقفوا فاهميين..!؟
جودي ربعت ايدها و لوت شفايفها بزعل، وانا ضحكت و قولت بعفوية :
_ياعم ماتقلقش مش بعرف ارقص اصلا، هقف اسقف معاهم وخلاص.!
_مش بتعرفي ايه؟ بتهزري يا زهره؟! وانا مين هيرقصلي في البيت..!
برقت له و انا باصاله بدهشه، و هنا ايقنت ان كلامنا و احنا مخطوبين مختلف تمامًا عن كلامنا و احنا كاتبين الكتاب..!
وشي احمر و اتكسفت اوي و حاولت اشد ايدي منه بس هو متبت فيا :
_اي يا كريم... الكلام ده..!
قولتها بكسوف و هو بص لجودي و هز راسه باستفهام :
_ايه هطولي هنا كتير..؟!
_احم... طب هستأذن انا بقا سلامو عليكو..!
_جودي... جودي.. خدي يابت ماتسبنيش لوحدي..!
_ليه هعضك انا يعني..!
_انا طول عمري اعرف انك جرئ في كلامك يا كريم.، بس مش للدرجاتي يعني، بتكسف يا اخي..!
_انا جوزك يا حبي خلاص، مفيش كسوف تاني خلاص
_طب سيب ايدي عشان عايزه اروح لماما، واخده تليفوني من الصبح و قافلاه عايزه نتصور سوا بالبصمه.!
_استني انا جايب حد كويس يصورنا، مصور محترف..
قال كده و شاور لواحد من بعيد و ناداه و هو جيه بالكاميرا بتاعته و بدأ يصورنا صور كتير، و صور مع العيله..
و لاول مره اتصور مع كريم و هو قريب مني كده، انا لحد دلوقتي مش مصدقه اننا كتبنا الكتاب عمتًا، بس قلبي لسه مقبوض مش عارفه ليه...!
عدا الوقت و المركب بدأت ترجع تاني و وقفت عشان لو حد حابب يمشي.، بس الاقارب فضلوا موجودين لسه و الاحتفال لسه ماخلصش،
كنت مع صحابي المقربين واخدين جنب و بيهيصولي و كريم و شلته واخدين جنب برضوا مع نفسهم
استغفروا
***
_ازاي حضرتك يا عزت بيه..!
_بشمهندس فارس ازيك، اتاخرت كده ليه كتب الكتاب خلص من بدري.!
اتكلم فارس بحرج :
_معلش والله على تأخيري، بس كنت في مشوار و اول ماخلصت جيت..!
_ولا يهمك يابني اتفضل اتفضل، لسه الاحتفال شغال للصبح، تعالى سلم على كريم.!
فارس راح معاه لكريم و بارك له و فضل واقف معاه و مع صحابه..
سبحان الله و بحمده
***
_يا كريمة يلا خلصي البوفيه فتح و الناس بتتغدى برا، عارفه لو الاكل خلص هعمل فيكي ايه..!
قولتها بغيظ لكريمه اللى واقفه في الحمام قدام المرايا بتظبط الروچ بتاعها و مشيلاني ليان، خلصت و خدتها مني و هى بترد :
_خلصت اهو يا جودي الطفسه، هاتيها ليلو حبيبة قلب ماما تعالي يا روحي..!
_خدي ياختى بنتك، جتك القرف منك ليها..!
قولتها ببرطمه وانا بديهالها و خارجه برا معاها، روحت للطاوله اللى مليانه اكل و خدت طبق و شوكه و بدأت اطلع ليا اكل..!
من كتر الفرهده من الصبح جوعت اوي، خدت طبقي و كنت رايحه للبنات بس لقيت كل ثنائي مع بعض، يحيى كان مع هنا، و كريمه مع جوزها، و ريم مع وليد و زهره مع كريم طبعاً...
وانا السنجوله الوحيده هنا، روحت لوحدي في مكان هادي مافيهوش حد ولا صوت الاغاني وصلاله، هدوء و هوا و بس..!
الله على الروقان..!
كان في طرابيزه بكذا كرسي جنب السور بتاع المركب و قدامي البحر، قعدت و بصيت للبحر و انا بستنشق الهوا باستمتاع..!
_ازيك..!
سبحان الله وبحمده
***
البوفيه فتح، و كل المعازيم بدؤا ياكلوا، كلوا قعد على الكراسي و الانوار هديت، و العرسان اختفوا، اغنية رومانسيه هاديه" للست أم كلثوم " اشتغلت..!
فكرت امشي بس مش حلوه مني امشي وانا لسه جاي..،
روحت اتمشى في النص التاني من المركب، فكرت اطلع فوق بس كنت لمحت كريم و مراته طلعوا، اكيد هيتغدوا فوق سوا مش حلوه اطلع،
اتمشيت شويه في النص التاني من المركب، كان المكان فيه ترابيزات قليله بس كان هادي و محدش موجود، صوت الاغاني مش مسموع، هدوء و بس و الهوا كان لطيف مع ريحة النيل..!
و انا بتمشى في الاجواء دي شوفت البنت اللى ركبت العربية معايا على غفله امبارح،
معرفش جت هنا ازاي اتفاجئت لما شوفتها، كانت لابسه فستان بني رقيق و قاعده بتاكل بهدوء و مبتسمه للنيل و سرحانه فيه، و كل ماتسرح تبتسم اكتر بعدها ترجع تكشر ملامحها و تاكل
مش عارف بتفكر في ايه غيّر تعابير وشها كده.!
هو انا براقبها ليه اصلا انا همشي..... بس الميدليه بتاعتها معايا، لازم اعرفها..
_أزيك..!
قولتها و انا راح نحيتها، بصت لي ثواني بدهشه تقريباً استغربت وجودي برضوا..
او ممكن ماعرفتنيش؟!
اصلي حلقت و ظبت لحيتي اللى كانت تقيله أوڨر، ظبت شكلي يعنى اكيد فيه اختلاف..
_احم، الحمدلله..، ازي حضرتك أنتَ.!
لا دي عرفتني اهي بس ايه حضرتك دي، قعدت على الكرسي اللى قدامها و رديت :
_ايه حضرتك دي، على فكره انا مش.، عمو زي مانتي فاكره يعنى ..!
اي السخافه دي! انا بقول ايه..!؟
_لا انا بقول حضرتك عشان مش عارفاك بس مش أكتر..!
رد منطقي الصراحه، انا اللى غبي..!
_احم...، ايوه صح فعلا ً... طب انا كنت عايز اقولك صح، اني لقيت ميدليه واقعه في العربية بعد ما مشيتي، بتاعتك..؟!
عيونها وسعت و ابتسمت :
_بومتي..!؟
ابتسمت بهدوء :
_اه هى على شكل بومه فعلاً..!
_طب هى فين اتها بسرعه، بجد دي جت لي من حد عزيز عليا اوي و زعلت لما ضاعت..!
_بس هى في البيت، يعنى مش معايا دلوقتي، انا لو اعرف اني هشوفك تاني كنت جبتها معايا..!
لوت شفايفها زي الاطفال و اتكلمت بزعل :
_طب و العمل؟
_ممكن........
مالحقتش اكمل كلامي و جالي تليفون مهم :
_معلش دقيقه و راجع...
_تمام اتفضل..
قومت و بعدت شوية و رديت على الراجل اللى ناوي اشتري منه الچيم، فكرت افتح چيم و لقيت مكان مناسب و باقيله تعديلات بسيطه بس...
كنت بتكلم معاه بس لقيتها باصه بعيد بتشاور لحد، تقريبا حد نادلها و راحت له بسرعه، حتى سابت طبقها..!
لا حول ولاقوة الابالله العلي العظيم
***
_يلا يا كريم بقا..
_ماشي، ثواني...، يلا فتحي..
شال ايده اللى كان مغمي بيها عيوني اول ما طلعنا فوق في الدور التاني، المكان كان هادي بشكل رهيب، و متزين حلو اوي
فروع نور بسيطه بضوء اصفر، و الارض مليانه بلالين حمرا و فيه في كل مكان ورد جوري أحمر كتير..
ابتسمت بفرحه من الاجواء و لفيت له ابصله، كان مبتسم و هو باصص لي نظرات كلها حب و دفء :
_مبسوطه..؟!
قالها و هو بيقرب يضمني لحضنه و انا ضميته و انا مبتسمه براحه :
_جداً.!
_تعالي
مسك ايدي و روحنا ناحية الترابيزه و ماكنش فيه مقاعد، كانت كنبه صغيرة يدوب لشخصين اصلاً..،
قعد و قعدت جنبه، بعدها شال الغطا من على الاكل، بدأنا ناكل سوا و كل شويه كان بياكلني
و انا كنت مكسوفه اوي فكلت بسرعه و بصيت له:
_شبعت..!
_لحقتي.!؟
_ايوه الحمدلله شبعت..!
قام معايا :
_ماشي تعالي..!
_كمل اكلك أنتَ..
_كلت خلاص.. الحمدلله
قالها و قام معايا، و فضل ماسك ايدي برضوا و روحنا ناحية كنبه تاني موجوده بس كانت مرجيحه، ليها هزه كده..
قعد و مدلي ايده، و قعدت جنبه بهدوء و انا مبتسمه ، و براحه ميلت راسي على كتفه و المرجيحه بتتحرك براحه..
غمضت عينى و اتكلمت وانا مغمضه :
_تعالى ننزل تحت يا كريم، عايزه اسمع أم كلثوم الصوت مش واصل هنا..!
ابتسم و هز راسه و هو بيطلع تليفونه :
_طب استني هجيب لك أم كلثوم هنا...
تحبي تسمعي ايه..!
بصيت للسما و انا بفكر :
_اممم، بص جيب بتاعت الليل و سماه دي..!
_حاضر..!
جابها فعلاً ، و في الاول كنت مغمضه عيني و انا راسي على كتفه و مستمتعه بالاجواء
بس بعدها اتحمسنا و غنينا سوا لحد ما الاغنية خلصت..
قومت من مكاني وانا مبتسمه اوي :
_كريم تعالى صورني..!
خُد..
ناولته موبايلي اللى لسه واخداه من ماما قبل ماطلع، خده و فتح الكاميرا و صورني كام صوره..
بعدها جيه جنبي و حطلي ورده جنب وداني كده، و اتصورنا سيلفي سوا كذا صوره..!
_استنا تعالى نعمل تيك توك..
_دلوقتي يا زهره.؟
_معلش فيديو واحد بس عشان خاطري..!
_ماشي عشانك بس.!
مسكت الفون بتاعي و فتحت تيك توك، فتحت الداتا من هنا و لقيت اشعارات كتير من واتساب من هنا...
دخلت على الواتساب بسرعه اشوف مين بعت لي، اصلي قافله الفون من الصبح، كانوا صحابي بيباركولي و يعلقوا على استوري انا كنت منزلاه...
بس لقيت رقم غريب باعت لي صور من الصبح ، دخلت على الشات باستغراب، في الوقت ده كريم راح ناحية ترابيزة الاكل يصب لنا عصير..
فتحت الشات و الصور اتحملت، و هنا كانت صدمتي وانا بفتح الصور.
صوره صوره لكريم و هو متصور مع بنت في وضع مش تمام ، وشها مش باين اوي بس هو كان باين...
الصور كانت باينه انها حقيقية مش Ai حتى..!
بصيت حواليا اتاكد اني مش بحلم، و بصيت للفون تاني و انا مش مصدقه بجد..
دمعه نزلت مني مع شهقة وجع وانا بشوف الصور..!
كريم جيه نحيتي بسرعه :
_زهره مالك في ايه؟!
وريته الفون في ايدي عشان يشوف الصور :
_ايه ده؟! ممكن تفهمني..؟!