رواية الفراق هو نصيبنا الفصل الخامس والعشرون25 بقلم حبيبة الديب
_زهرة خدي ليان شوية معلش عشان مش عارفة اقف منها..
_حاضر هتيها..
خدت منها ليان و هى وقفت مع أنور بيستقبلوا ضيوفهم و قرايبهم اللى جايين من البلد، انا خدت ليان و كنت رايحه على الترابيزة اللى حاجتنا عليها، وانا ماشية و بلاعبها لقيته قدامي، قاعد على نفس الترابيزة اللى تبعنا و باصصلي و مبتسم اوي..
انا اتوترت زيادة عشان لابسه الفستان اللى هو جابهولي، يعنى بدي فرصة لعلاقتنا من تاني و عشان كده ابتسامته وسعت و هو جاي نحيتي.
وانا فكرت بشكل جادي اني اجري دلوقتي، خلاص مفيش حل ارمي ليان على الارض و هشمر فستاني و هجري..!
_الفستان حلو عليكِ..!
دي اول حاجة قالها اول ما بقا قدامي..، خدت نفسي و بصيت له قد ايه ملامحه وحشتني بجد، قد ايه أنا كنت غبية فعلاً..
_كريم أنا اسفة..!
مسك ايدي و باسها و انا سحبتها بسرعه و توتر :
_ كريم..!
خد ليان منى و رد و هو بيضحك :
_يا قلب كريم أنتِ مراتي، يعني ضوابط الخطوبه اللى كنا حاطينها انسيها بقا..!
هو حركته كسفتني لكن اكيد مانستش اننا كاتبين الكتاب يعني..!
روحنا على الترابيزه و انا سلمت على جدو عزت و جودي، و هو ادى ليان لجودي و مسك ايدي سحبني وراه :
_تعالي معايا..!
_على فين بس، يحيى و هنا هيدخلوا دلوقتي..!
_مش هنتأخر بس احنا لازم نتكلم..
طلعنا برا القاعة و كان فيه جنينه كبيرة برا، محدش كان برا و المكان كان هادي جداً..!
اتمشينا جنب بعض بهدوء لحد ما قعدنا على مقعد خشبي،
سكتنا لحظات لحد ماخدت نفس و اتكلمت انا :
_كريم..، أنا اسفه بجد..
أسفه على تصرفي و عنادي طول الفترة اللى فاتت دي، و على فكرة انا مصدقاك بس.. بس كنت خايفة.. يعني..
مكنتش عارفه ولا ابرر و لا اتكلم، اتنهدت و انا باخد نفس و رجعت اتكلم بهدوء كل ده و هو سامعني بصمت :
_ انا فعلاً غلطت لما صدقت الصور في البداية، بس كنت محتاجة وقت استوعب و افكر تاني فعلاً، انا طول الوقت كنت بقنع نفسي ان الصور صح فعلاً، بس لما هديت شوية قولت لنفسي مالك يا زهرة..، ده كريم،
كريم اللى من ساعت ما عرفته عمره ما بص لحد غيري ولا تخطى حدوده معايا، اكيد مش ده اللى ممكن يخوني..!
تعرف يا كريم انا لما بابا قعد معايا و قالي مشكلتكوا دي مشكلة ثقة مش مشكلة خيانة، انا اتصدمت، ساعتها بس خدت بالي انا ازاي ماصدقتش، ازاي مكنتش اول واحدة تقف في ضهرك و تقول لا كريم عمره ما يعمل كده..!
انا اكتشفت ان الغلط كان مني انا مش منك أنتَ، أنا أسفة..!
كنت نهيت كلامي بعياط و هو خدني في حضنه و طبطب عليا بهدوء :
_ماتعيطيش يا زهرتي خالص..!
بعدني و مسح دموعي وانا اتكلمت :
_انا كنت غبية اوي، بس كنت ساعتها متعصبه بجد و مخنوقه على مصدومه، ماتزعلش مني انا عارفه انك عمرك ماتعمل كده..!
مسك ايدي و باسها تاني و هو بيرد:
_المهم اننا مع بعض دلوقتي، واللى حصل ده يعلمنا اننا مهما يحصل معانا لازم تكون فيه ثقة كبيرة مابينا، زهرة مافيش علاقة من غير ثقة.. كده مع كل خناقة لو مفيش مابينا ثقة العلاقة بينا هتدمر .. فاهماني..!؟
_ايوه..، فهمت متاخر اوي..!
_ولا متأخر ولا حاجة، اهم حاجة اننا مع بعض دلوقتي..، صح.؟
هزيت راسي بالايجاب و هو مسحلي دموعي و قام وقف :
_يلا بقا تعالى ندخل جوا زمان هنا و يحيى دخلوا القاعة، و قاعدين بيكتبوا الكتاب دلوقتي..!
_يا كريم حرام عليك بجد، لو كتبوا الكتاب هزعل منك و اتقمص..!
ضحك و هو بيمسك ايدي و داخلين القاعه :
_لا بلاش بالله عليكِ زعلك و قمصتك وحشين اوي..!
ضربته على كتفه بهزار و احنا بنضحك سوا
_لا بس البدله تحفه عليك بجد... و حلو الماتشي ماتشي اللى عملينه سوا.. زوقك حلو..!
_زوقي حلو من ساعت ما شوفتك اول مره و عجبتيني..!
_بس يا كريم بتكسف..!
دخلنا القاعه و العرسان كانوا قاعدين على الترابيزة مع الماذون و ابو هنا و بدؤا يكتبوا الكتاب.
طلعت موبايلي و قربت منهم اوي و بدأت اصورهم و كريم وقف جنبي و هو حاطط ايده على كتفي، يحيى و هنا اول ماشافوني فرحوا اوي و ضحكوا.. حتى بابا و ماما و جودي و كل اللى يعرفنا اتفجئوا و فرحوا اوي..!
كتب الكتاب تم و الزغاريد عليت و الاغاني بدأت تشتغل. حضنت هنا و انا بباركلها :
_ الف مبروووك يا حياتي..!
دمعت بفرحه و هى بتطلع من حضني :
_مبرووك ليكوا أنتو، بجد فرحتلكم اوي..!
_يحيى أبن العم، الف مبروووك يا عريس..!
قولتها وانا بشاور له بايدي من بعيد و هو بصلي وهو بيطلع من حضن كريم :
_أخيراً عقلتي يا شيخه.!
كفااره.!
ضحكنا كلنا و فقرة الرقص و التنطيط بدأت، هنا كانت هادية اوي و بتسقف بس زيي يعني بس جودي و كريمة هما اللى عملوا جو مع صحاب هنا و زمايلها في الشركة كمان الاجواء احلوت..!
اشتغلت اغاني كتير و منها اغنية
"اختياراتي مدمره حياتي "
_زهرة الاغنية دي اهداء مني ليكِ..!
كله ضحك وانا بصيت لكريم و انا بضحك انا كمان، بجد يحيى فاجئني:
_شايف بيحفل عليا ازاي؟!
_معلش سبيه يدلع انهارده بس ليه رؤا عندي بعد الفرح..
اليوم كان حلو وكنت فرحانه اني رجعت لكريم، حاسه اني كنت غبية لما ماصدقتهوش فعلاً..
اتصورنا كتير مع العيلة و مع هنا و يحيى ،و اتصورنا انا و كريم مع بعض صور حلوه و في صورة قعدنا على الكوشة و ليان قعدت وسطنا، كانت الصورة جميله بشكل...
حتى كريم همس لي بعد الصوره دي :
_امتى هنتصور صورة زي دي و معانا غزل..؟!
ضحكت بخجل و سكت..!
بليل عملنا الزفة و ركبت مع كريم في عربيته و اتفجئت ان جودي و جدو عزت ركبوا في عربية بابا...
و أنور كان سايق عربية يحيى و جنبه كريمة... هنا و يحيى كان شكلهم حلو و لذيذ اوي بجد
وهما بيركبوا العربية و قعدوا شوية كانت هنا نامت من التعب على كتف يحيى و هو ساند راسه على راسها، وانا اول ما لمحتهم كده لقتلهم صورة كانت تحفه..!
سبحان الله وبحمده.. سبحان الله العظيم
***
_صحيتي.؟
دي كانت اول رسالة اشوفها اول ما صحيت، بدأنا فرشات من تاني بقا، وحشتني علاقتي بكريم..!
_اه لسه صاحية اهو..!
سيبت الفون و دخلت اغسل وشي و طلعت على صوت رنة الفون
_السلام عليكم..!
_و عليكم السلام، صباح الخير يا زهرتي..!
_صباح النور يا كريم، عامل ايه.!
_الحمدلله، انتِ عامله ايه و فطرتي!؟
_لا لسه صاحية اهو..
_رايحه الجامعه انهارده.!؟
_لا مش رايحه..
_بس أنتِ عليكِ جامعه انهارده صح..؟!
_ايوة بس... يعني.. بص انا سيبت الكلية..!
قولتها بسرعه و دفعه واحده و استنيت رده، بس خو فضل ساكت كده لحظات بعدها رد ، شكله اتصدم يا عيني:
_سيبتيها ازاي يعني مش فاهم؟!
_يعني مش هروحها تاني خلاص، مش حابه اكمل في المجال ده، مش مرتاحه...!
توقعت انه هيتخانق معايا زيهم و اللى هو ازاي تسبيها و تضيعي مستقبلك و السنين اللى فاتت هتروح على الفاضي و الكلام ده، بس جالي رده هادي :
_خلاص طلاما مش مرتاحه ماتكمليش..!
_بجد؟!
_ايوة يا زهرة، انا رئي من الاول كده اصلاً، ليه تدخلي حاجه انتِ مش مستريحه فيها، او مش حبها.؟
مانتِ لو جبرتي نفسك حتى و تيجي على نفسك عشان تكملي السنة دي مش هتقدري تيجي على نفسك و تشتغلي في المجال ده، مش هتحبي شغلك كـمهندسة حتى..!
_ايوة مانا بحاول افهمهم كده..!
_بابا الحمدلله اقتنع، بس ماما زعلانه مني شوية، يعني عماله تقولي كملي السنه الباقية دي و خدي الشهادة بعدها هتتجوزي و تقعدي، بس انا مش عايزة كده انا عايزة اشتغل في مجال التصميم اصلاً..!
_طب ماتقدمي في فنون جميلة يا زهرة..!
_لا المشوار هياخد وقت اكتر، اربع سنين من عمري تاني هفضل ادرس، بجد الموضوع مرهق اصلاً.!
_طب انتِ ايه اللى يريحك؟
_حاليًا مش عارفه، مشتته و مش عارفه اعمل ايه بس الاكيد اني مش حابه اكمل في هندسة..، و بابا وافق أخيراً و سابني على راحتي..!
_أنتِ معاكي خبرة مش كده.؟ تصاميمك حلوة يعني..؟!
_ايوه، كنت باخد كورسات كتير اونلاين، اتطورت في الرسم كتير عن الاول كمان..!
_طب ماتشتغلي مصممة بموهبتك دي يا زهرة، مش لازم شهادة، انتِ معاكي كذا لغة و موهبه في الرسم و ده الاهم عندهم..!
_يعني هينفع؟
_ايوة سيبي الموضوع ده عليا و انا هشوفلك شركة كويسه تصممي فيها..
_ماشي بس مش عايزة واسطه يا كريم!
يعملوا معايا أنترڤيو و بموهبتي دي اشتغل لو ينفع كده ماشي..!
_حاضر يا زهرة، هشوفلك كذا شركة كويسه و انتِ تقدمي ال Cv بتاعك هناك، مش بتقولي خدتي كورسات.؟
جمعي شهاداتك دي هتنفع.!
_تمام..، وأنتَ اخبار الشغل معاك ايه..؟!
فضل يكلمني عن شغله و مشروعه اللى قرب يوصلله، كنت فخورة بيه و انا حاسه بحماسه الرهيب انه خلاص قرب يوصل لحلمه..!
استغفرالله العلي العظيم
***
_ياجدو حضرتك مش فاهمني ليه.؟
_أنتِ اللى عايزة تجننيني يا جودي..!
يعني جامعه حكومي و وافقت، فنون جميلة و وافقت لكن عايزة تشتغلي بجانب الجامعه ليه مش عارفين نصرف عليكي؟!
_يا جدو افهمني طيب، انا نفسي يوم ما احقق حلمي و افتح الاتليه الخاص بيا يبقا من معايا أنا،
ده مشروعي أنا و مش هحس اني حققته غير لما يكون بتعبي و مجهودي لوحدي..، لو سمحت افهمني
انا عايزة اشتغل من هنا لحد ما اتخرج و هجمع فلوس الاتليه لوحدي مش حابه مساعده من حد..!
_ده غلط، لازم تقبلي مساعده من أهلك عادي، احنا بندعمك و واقفين جنبك يا جودي، عايزة تحققي حلمك حققيه بس احنا معاكِ
ليه عايزة تكوني لوحدك..؟!
اتنهد بتعب، من الصبح عماله افهمه وجهة نظري بس هو مش فاهمني برضوا ..
_بس يا جدو، هو مين اللى عمل الشركة دي هاا؟
_جدك الحسيني..!
_اللى هو جدك حضرتك صح؟
_ايوه، هو عملها و ابويا كبرها و مسك الشغل كله لوحده و من بعده انا بعدين ابوكي، و دلوقتي كريم..
_طب لما جدي الحسيني عمل الشركه دي كانت كبيرة كده؟
_اكيد لأ احنا كبرناها معاه .!
_اهو يعني بدأ لوحده و بعد ما بدأ و نجح و الكل صدقه اهله ساعدوه و كبروا مشروعه...
_عايزه توصلي ل ايه يا جودي؟
_عايزة افهم حضرتك يا جدو اني مش برفض مساعدات منكم، بس عايزة اوصل لوحدي و اصدق نفسي فعلاً اني قدها و اعرف اعملها، و لما اوصل لحلمي بتعبي و احس فعلاً اني انجزت حاجة ساعتها انتو ادعموني عادي، و خليكوا جنبي
كبروا المشروع معايا لو حابين بس في البداية عايزة انا اوصل لحلمي لوحدي..
حضرتك فاهمني طيب..!؟
_فاهمك يا جودي، فاهمك و فاهم طموحك ده، ده حتى كريم نفسه رايح يعملي مشروع، يعني البيه مش مكفيه شغل الشركه اللى كتير عليه رايح يضغط نفسه في مشروع تاني..!
_معلش يا جدي تعمل ايه لو احفادك ناس طموحه جداً ده باستثناء ريم طبعاً اللى رافعه شعار البنت اخرها بيت جوزها..!
ضحك و رد عليا :
_ملكيش دعوة بـ ريم أنتِ..، والله وحشتني اوي، مش عارف ايه نظام الغربه اللى غاوياه ده هى و جوزها..!
_طب ايه.؟
هنزل شغل.!
نفخ بضيق و بص الناحية التانيه:
_استغفرالله العظيم، رجعنا للغم تاني.!؟
_يلا بقا يا جدو، وافق، وافق وافق، ارجوووك..!
_خلاص، ماشي.. بس هتتنيلي تشتغلي فين الاول؟!
_صدقًا..!
مش عارفه لسه..!
_بس هدور على شغل كويس..!
_انا هشوفلك شغل... ايه رايك تيجي في الشركه..!؟
_شركة ايه.؟
ماعنديش بربع جنيه خبرة..!
_لا هشغلك بحاجه سهله هناك، ده شرطي..!
_اذا كان كده ماشي، اتفقنا.!
_طب انا رايح الشركه دلوقتي، روحي الجامعه ولما تخلصي تعليلي على هناك..!
_حاضر عيوني..!
صلّ على سيدنا محمد ﷺ
***
روحت الجامعه بحماس غير العادي مستنيه اخلص بسرعه عشان ابدأ شغل... اموت في المرمطه اوي انا..!
بدأت المحاضرات و انا كنت مركزه مع الدكتور اوي لحد ماخلص أخيراً و كان عندي محاضرة عملي و انا خلصت على العصر كده، و روحت على الشركة..!
اول ما روحت كنت جايه اطلع فوق على مكتب جدو على طول بس وقفتني موظفة الاستقبال :
_مساء الخير، ازي حضرتك يا أستاذة جودي..؟
_مساء النور..، انا كنت طالعه لجدو هو فوق صح؟!
_ايوة عزت بيه في مكتبه بس هو طلب مني اول ما اشوفك اوصلك لل HR عشان الانترڤيو..!
_ااه هنبدأ بدري كده..!
ماشي طب هو مكتبه فين وانا هروح بنفسي..؟!
_الدور التالت، تاني مكتب على ايدك اليمين..!
_حاضر شكراً..!
ركبت الاسانسير و روحت مكتب ال HR و كانت السكرتيرة برا :
_مساء الخير، انا جاية اعمل أنترڤيو..
_استاذة جودي الحسيني صح؟
_ايوه..!
_تمام.. دقيقة واحدة من فضلك..!
قعدت على مكتبها استنيت، و هى عملت مكالمه بالتليفون الارضي بعدها بصت لي :
_اتفضلي استاذ حسام بانتظارك..!
_تمام، شكراً..!
دخلت جوا و لقيت رجل شكله في بداية الاربعينات كده، و علامات الغضب على وشه او دي طبيعته عادي..!
_احم.. السلام عليكم..!
_و عليكم السلام ، انسة جودي صح؟
هزيت راسي و هو شاور لي براسه ناحية الكرسي :
_طب اتفضلي.!
قعدت و هو فضل باصص لورق ف ايده بعدها بص ل الابتوب، دقيقة و التانيه و التالته و الوضع زي ماهو...
قومت وقفت و اتكلمت وانا بشيل شنطتي :
_طب لو حضرتك مش فاضي ممكن اجي في وقت تاني..!
_اقعدي.!
قالها بصوت صارم و هو لسه باصص للابتوب ، وانا بلا نقاش قعدت مكاني تاني ، دقيقة و كان ساب كل حاجة، و عدل نضارته و هو باصص لي :
_بتعرفي تعملي شاي؟
سكت شويا و بصيت حواليا، اتاكد انه بيكلم حد تاني بس طلع بيكلمني انا فعلاً :
_نعم.؟
_شاي.. بتعرفي تعملي شاي؟
_احم..، يعني اه بعرف اعمله، بس حضرتك بتسأل ليه..؟!.
بصلي بصه خوفتني و كأن سؤالي غريب و انا سكت تمامًا و هو كمل :
_طب بتعرفي تعملي قهوة؟
انا سكت دقيقة بعدها رديت :
_بص حضرتك انا بعرف اعمل شاي و قهوة و ايس كوفي و ناسكفيه كمان، حاجة تانية..؟!
_لا براڤو كده تمام، تقدري تستلمي الشغل من دلوقتي..!
_الشغل اللى هو ايه طيب؟
_office girl
قومت وقفت و اتكلمت وانا على وشك فقدان اعصابي:
_ده بجد؟! هو جدي يقولي تعالي الشركه اشغلك عشان في الاخر ابقا office girl؟!
رفع راسه و بصلي ببرود:
_انسة جودي واحد قهوة ساده من فضلك..!
_والله؟!
قولتها و طلعت على برا و روحت مكتب جدي، دخلت بعصبية و فتحت الباب بسرعه :
_ بقا كده يا عزت بيه، اخرتها ابقا بتاعت شاي و قهوة؟
هتشغلني قهوجيه في شركتك..؟!
شاورللسكرتيرة تطلع و هى طلعت و قفلت الباب وراها، بصلي و رد بهدوء :
_مش أنتِ اللى عايزة تشتغلي، دي الشغلانه الوحيده اللى موافق عليها، و كمان مناسبه مع مواعيد الجامعه بتاعتك..!
قعدت على الكرسي و انا بندب حظي :
_دي اكيد عين العيال صحابي اللى بيقولولي يا بختك اكيد مش بتعملي شاي و قهوة كل شويه ل اخوكي و عندكوا خدم في الفيلا....
بصيتله و كملت :
_اديني انا هعمل للشركة كلها دلوقتي..!
_قومي يابت، بطلي صداع و روحي اعمليلي قهوة ساده ..!
_ايه، كلو عايز قهوة سادة دلوقتي..؟!
_روحي شوفي شغلك يا جودي...!
_حاضر.. خاضر متزفته قايمه..!
سبحان الله وبحمده
***
_الو يا مازن، بترن عليا كتير ليه؟
_لازم نتقابل!
_ليه؟
_كده، موضوع مهم..!
_هو انا مش قولتلك مش عايزة اشوف وشك تاني؟!
_طب نعتبر دي اخر مره يا سلمى لو سمحتي..!
اتنهدت بعدها رديت :
_ماشي اخر مره، امتى و فين؟
_في الديسكو..!
_لا مش هروح الديسكو تاني انا... شوف اي كافيه و خلاص.!
_تمام هبعتلك لوكيشن لكافيه، نتقابل انهارده بليل علىى تمانيه كده..!
_تمام..، بس لاخر مره فاهم..!
_ماشي عرفنا..!
سلمى قفلت مع مازن اللى مسك الفون و ابتسم بخبث :
_طبعاً اخر مره يا سلمى، ماتقلقيش...!