رواية سجين الحب الفصل الثالث3بقلم زهراء الحريري

ســـــــــراج

‏وكلي هم يمر وگت تنساني بيه؟ 

كتله من جنازت ييشيعونها ومانسيتك لا وحق ذيج السنين

الدنيا اذا انساك اغير كونها

انه لو ناسيك ومغادر هواك الرجفه هاي بجسمي شيسمونه؟ 

وليش اغاني التطلع اذكرني بيك؟ دموعي تنزل كبل ما يبدونها

••----------♥--------♥-------••

~~زمـــــــــــــزم~~

حسيت باحد تمدد وياي بفراشي يشم بشعري وحاضني بقوة ومن شعري ينزل لوجهي يبوس بيه بكل مكان ويرفع بجفوف اديه ويبوسها 

من عطره عرفته حضنته واني ابجي بصوت 

آصف:- مرضتيني والله 

ليش بابا ليش هيج تسوين بيه وتخليني اقسئ عليج 

زمزم:- والله ماتنعاد والله بس لا تبقى زعلان مني والله عرفت غلطي ومتندمة عليه فدوة بابا لا تزعل

كعد وبابا لسه حاضني اخذ شعري يشم بيه ويبوسه ظليت حاضنته وابجي اول مرة بحياتي ابجي هيج واعرف الالم شنو 

بعدني من حضنه وبيده يمسح بوجهي رجع باسني بخدي ودنك على جفوفي باسهن وظل مدنك راسه عليهن 

بسته براسه سحبت اديه منه وحضنته باسني بكصتي 

اصف:- جمارة گلب ابوها ام الگمل

ضحكت واني اضربه على ظهره 

زمزم:- هسه اعديك واظل اكصعلك كملاتك بصابعي 

آصف:- مونساتج موو؟ ام الگمل

ضحكت كتله احب صوت الطكه ضحك بصوت عالي وهو يكعدني كباله بجيت واني اعتذر منه على طلعتي بدون علمه حجى وياي هواي مرة يرزل ومرة ينصح ويسولفلي شصار بيه من كالوا زمزم ما موجودة

تمدد على فراشي نمت على ايده بسرعة غفى وكامش جف ساعد ايدي بيده بقوة غفيت واني اتبسم كعدت الفجر بنشاط بسته بخده وطلعت بسرعة سويت ريوك كملته ورحت لعمتي طلعتها سبحتها ولبستها ملابسها كعدتها بالحديقة ورجعت للحمام ركض غسلت ملابسها وغسلت الحمام طلعت شريتهن ورجعت على غرفتها نظفتها وخليتها مفتوحة تتهوى واجيت مشطتها من كملت شعرها بستها بخدها 

زمزم:- اووووخ فدفد وهسه ريحتج صاررررت تخبل يا احلى عمه لا عمه درة احلى وانتي وراها 

انتبهت عليها اكو ابتسامة خفيفة طلعت على وجهها رحت بسرعة جبت ريوكها تاكل طبيعي وحدها قفلت الباب مال البيت خاف تطلع ورجعت جوا حطيت الريوك لجدي وبيبي واني ابوسهم فرحانة بوجود بابا دخلت عليه بعده نايم 

كعدت عند راسه اكصع براسه واني احجي 

زمزم:- آصف يامزيون شنو ما شبعت نوم 

لاااا هاي گملة طافرة على شعرك اكعد احطلك علاج يومين ويروح من راسك

مد ايده سحب ايدي عضها 

آصف:- جاي اريد بابا راسي مأذيني 

طلعت بسرعة صبيتله جاي طلع يغسل طلعت وراء واني شايلة الكوب باوع على عمتي ورجع عليه اخذ الكوب مني شربه مرة وحدة كله جنت من اشوفه يشربه هيج احاول اقلده بس يحترك بلعومي واظل اكمز من الالم

زمزم:- تتريك؟ 

كال لا بابا اريد اروح اشوف عمتي ام هاشم البارحة خابرتها اتريك وياها 

زمزم:- منو هذه اني ما اعرفها 

آصف:- عجل اليوم اعرفج على اطيب مرة بالدنيا

زمزم:- ماكو اطيب من ماما نفس

ضحك وهو يكول يلا لخاطر جمارتي ثاني اطيب مرة بالدنيا 

لبست حجابي وطلعت وياه جف ايدي بيده لازمة بحنية مثل قبل واحنا نمشي اباوع على جمال المنطقة وصلنا لبيت صغير دفع الباب ودخل تلكتنا ريحة الخبز الحار الله صار اشكد ما ماكلة خبز حار كله مجمد بالمجمدة اطلعه واحمي ويصير جنا لاستيك اسناني تاذيني منه وريحة جاي مهيل ضحكت واني احرك الجاي ما اعرف اضبط تخديره

آصف:- اويلي يابة 

ام هاشم عممه 

تستقبلين ضيوف

طلعت مرة جبيرة وجهها عريض مثل القرص وابيض بيه تجاعيد بس حلو يجذب العين 

استقبلت بابا بترحيب حار وهو هم ، حاضنته مرة تبوسه بهذا خده ومرة بالثاني وهو باسها براسها ودنك باس جفوف اديها

آصف:- جمارتي تعالي سلمي على جدتج

ام هاشم:- هاي نمرتك

آصف:- اي عمه هاي نمرتي وجمارتي

تعالي بابا لا تستحين

قربت عليها حضنتني غمضت عيوني عطرها يجنن وحضنها مريح يدفي الروح 

آصف:- بوسي راس جدتج

سويت نفسه بستها براسها وجفوف اديها رجعت حضنتني وهي تكول لبابا

ام هاشم:- الله يحفظها الك عمه صدك جنها جمارة

دخلنا جوة وياها كعدت بصف بابا يحجي ويا عمي لؤي بالتلفون والمرة كبالنا كاعدة تكشر بالبيض صافنة عليها 

صبتلنا جاي وهي تكول يلا يمه تقدموا الف عافية باب قربلي الجبن وكوب الجاي

اكل وعيوني عليها هي تسولف على بابا وكل كلامهم عن واحد اسمه هاشم بجت وهي تكوله نظلمت باول عمري ونظلمت بزواجي ونظلمت برجعتي لاهلي ونحرمت من ابني سنين عمه طالبته منك اريد لاخر سنين عمري اريد اشبع منه كبل لا اموت

بابا نزل الاستكان وهو يباوع عليها مقهور مد ايده مسح دموعها يكولها وعدتج وتعرفيني عند وعدي ابنج يرجعلج بس اصبري احتاج وقت

شربت جاي واني لسه اباوع على وجهها وعيونها التعبانات كتلها

ـ بيبي هواي تشبهين آدم ابن عمو آرغد

صفنت عليَّ وبابا صار يكح باوعت عليه قابض ايده يدك على صدره غاص وهو يضحك

آصف:- مو كتلج نمرة واذكى مني 

أبتسمت كالت له الله يحفظها الك يمه، بعدين بلشت تسال على آدم وبابا يسولفلها اريد اقاطعه واكلها شايف نفسه ويكرهني يغار لان ماما نفس تحبني اكثر منه 

اني أبداً ما اكرهه بس احب اعانده احسه اخوي الاول ومصطفى الثاني فتح تلفونه طلعلها صورة آدم تباوع عليه وعيونها تصب استغربت من باست صورته من فوك الشاشه وهي تدعيله 

باوعت على بابا حط لفة بيض بحلكي وهو يبتسم لي رجعت عيوني عليها ظلت ساكتة وبس تباوع على صورة آدم سألها بابا آرغد بعده يجيج لو كطع رجله كالتله كل اسبوع هينا يتغدى عندي ويتفقد علاجي 

طلع بابا يغسل واني لملمت الريوك غسلت الاماعين وغسلت ورجعت عليهم اخذت تلفون بابا العب بيه وهم يسولفون صورتها وبابا طابع نص منه بالصورة، دزيتها لادم كتبتله شوف اشكد تشبهك شافها وما رد المتڪبر ولا يشبه ماما نفس هو حتى ما اجى وياهم من يجوني اكيد فرحان البيت فرغ اله 

رجعت اباوع على التيكتوك دز رسالة زمزم؟ 

جاوبته اي اني 

ارتاحيت مني وبقت بس قمر مشاركتك دزها الي حتى يفرغلك البيت وترتاح منا

مارد عليه رجعت على التيكتوك وبعد دقائق دز شلونج مرتاحة؟ 

كتله الحمد لله 

دز يمتى ترجعين؟

صفنت على بابا راح يرجعني وياه دزيتله اليوم العصر يمكن لو باجر

سديت التلفون ما اعرف شبية ضجت واني افكر ببيبي وعمتي 

آصف:- يلا عمه اني اترخص 

ـ بعد وقت يمه ما شبعت من شوفتك

ـ اجيج قبل لا اروح هسه اريد اطلع زمزم مازال بعده الجوء زين 

طلع واني وراء امشي وضايجة حجيت ويا روحي اني ليش ضايجة بالعكس خلي افرح راح ارجع واتخلص من التعب والحصرة هنا

دخلنا لبيت جدي بيلسان بعدهي بالحديقة كاعدة وبيبي كبالها تسقي بالزرعات بقيت اباوع عليهن هزيت راسي لا ارجع ويا بابا شسوي بالتعب هنا اصلا مو مكاني هذا 

طلع بايسكل جبير وصاحني اطلع وراء طلعت لكيته صاعد عليه كال اكعدي وراي كعدت واني الزم قميصه من وراء 

المنطقة تجنن ومتروسة نخل دخلنا بفرع صغير عرضه اقل المتر يمكن وبوسطه نهر مي على طوله عفنا البايسكل وكملنا مشي سالت بابا على النهر ضحك وكال هاي سواقي للبساتين من النواعير 

اباوع على المكان كل مانتقدم يضيك وكل شويه اعثر لزم ايدي بابا خايفة كوة امشي اباوع على النواعير شلون تفتر 

آصف:- لا تخافين ماتوكعين.... 

اويلي على الهوا عذيبي 

كعدنا جوا اباوع عليهن شلون يفترن وبابا صافن طول بصفنته مسح وجهه وهو يكول ايييه يا اصف وافترت سنين عمرك مثل الناعور

باوع عليَّ باسني بكصتي وايده مررها على اكتافي حضني بيها وهو يسولف عليَّ 

ـ ابوج خلص طفولته هينا مهزوم من جده وابوه 

سكت بعدين ضحك وكمل ونوبات ننهزم بهاشم اني وارغد من جدي ونجي هينا نلعب ونسبح ما نرجع الا يجينا خالج باسل يكول تعالوا يلا جدي نام، خلصنا طفولتنا ومراهقتنا هينا 

أبتسم ما اعرف يسولف عليه لو يسولف على روحه

ـ هاشم جان الهادئ بيناتنا اني وارغد نار وبارود من نجتمع دايما نتكاون ارغد عصبيته تخلص بوقتها وعلى كد الموقف ومايحقد واني عكسه عصبيتي تظل نار بصدري وما انسى ليما نسيت نفسي 

سكت صافن وحده سالته وينه عمي هاشم ليش ماموجود 

كمل وعلى صفنته وهالة الحزن

ـ افترقت عنهم اول مادخلت الكلية العسكرية وغاد تعرفت على عمامج لؤي وسراج 

بقوا هم سنين سوة حتى صاروا روح وحدة بس فرقهم درب العشك 

ـ يعني ما عشكت

باوع عليَّ ساكت ابتسم 

ـ هما عشكوا مرة وحدة الا اني عبن ابوج گلبه جبير عشك مرتين 

خزرته واني اكول

ـ واااامي؟ 

ـ امج هي عشكي الثاني الماحافظت عليه

حجيت بغيرة ومنو هاااي الاولى؟ 

صفن وظل ساكت هواي واني اباوع عليه بعصبية وغيرة اختفت عصبيتي من شفت الدموع تارسة عيونه بس مانزلت 

تنهد وهو يكول مشت بقسمتها الله يسعدها 

رجع عيونه عليَّ كال بشقى 

ـ وعبن گلبي جبيييير خسرتهن اثنينهن 

كتله واني اكور جف ايدي واضربه على رگبة رجله المهم تبقى تحب بس امي

صاح بصوت وهو يجعص وجهي بين اديه

ـ امج اثو قااااااسية 

وكف وهو ينطيني ايده لزمتها وبقيت كاعدة 

ـ وعمتي بيلسان شنو ذنبها

كال اساس هذا الخراب كله عمتج بيلسان 

ـ شنو سوت؟ 

ـ لا تسالين ولا تحاولين تعرفين حتى ما تكرهينها 

وكفني حضني بيده وصعدنا مشينا مسافة وصعدني بقارب صغير تونست ڪُلش بابا اشترى سمك مسكوف للغدا رجعنا للبيت لكيت بيبي طابخة نقهرت عليها ساعدتها بتحضير الغدا وعزلت غدا بيلسان نايمة من كعدت غديتها يلا نمت ساعة 

كعدني بابا وهو يكول يلا بابا تأخرنا كعدت واني اثاوب وافرك بعيوني طلعت غسلت ورجعت لبست ملابسي اللي اجيت بيها ولميت باقي ملابسي بجنطتي وادور خاف ناسية عبن نفس وصتني على ملابسي وعلى كل حاجة مني ما اعوفها 

طلعت واني اسحب بجنطتي لونها عسلي قريب من البرتقالي وحجمها وسط اجى بابا اخذها مني سلمت على جدي وبيبي وطلعت لغرفة بيلسان لكيتها تبجي بدون صوت مسحت دموعها بيدي

ـ كل اسبوع اجي ويا بابا 

تقربت بستها بخدها وكع گلبي عبالي راح تخنكني بس تفاجئت بيها من حضنتني بجيت واني احضنها وافكر شلون بيها بيبي ما تكدر عليها هي روحها وكوة شايلتها 

اسمع صوت بابا يصيح يلا زمزم يلا بابا تأخرنا

كوة كدرت افرغ نفسي من اديها حضنت وجهي تبوس بخدودي غصيت من القهر عليها واني اشهك 

سحبت نفسي مسحت دموعي طلعت بسرعة مهزومة، لكيت بابا واكف كبال السيارة يحجي ويا عمامي بعصبية ويكلهم وحدة العصر ووحدة الصبح لا تجبروني اطلع من طوري عليكم وعلى نسوانكم التفت شافني واكفة فتحلي الباب صعدت 

عمي اوس جاوبه اني ادزها جنت ما احتاج توصية بأهلي بس هسه لان مريضة وعمليها مانعرف شبيها تندي جراحة لليوم بس اطيب ترجع مثل قبل 

بابا ربت على كتفه ويكله ما جنت اعرف بيها مريضة الله يشافيها الك اذا هينا ما عالجوها جيبها لبغداد

باوع على عمي مجد دنك راسه وهو يكوله 

ـ ما ادري بيها ماتنزل كل مرة اسألها تكول نزلت الصبح نظفت 

باوعت عليه بطرف عيني الجذاب أصلاً يعرف بيها ويخاف منها ما مر يوم مانسمع صوتها وهي تحجي عليه وعلى قسمتها الجابتها اله وهو مانسمع صوته

اجى بابا صعد وهم واكفين يباوعون علينا باوعت على الباب بيبي تباوع علينا منظرها شبعني قهر اني كلش انقهر من أشوف نسوان كبار ما اعرف ليش لزمت ايدي بابا قبل لا يفر السويج

ـ اريد ابقى هنا يم بيبي

باوع عليَّ متفاجئ بقراري 

ـ ما اريد ارجع خليني هنا عند بيبي فدوووة 

كال لا امج تمرضت عليج واختج تبجي حتى صفاوي زعلان مني غير محاضرات اللي كورعت راسي بيها ماما نفس

ضحكت عليه من كال اخر كلمتين وهو يقلد صوتي

ـ مو بعيدة عليكم تكدرون تجوني بين مدة ومدة حباب عوفني هنا شوف بيبي شلون تباوع وراي

ـ ما اكدر بابا كوة كدرت افرغ نفسي واجيج اذا اعوفج اني والاسبوعين يلا اكدر اجيج

بجيت واني اكوله بس اني ما اريد ارجع اريد ابقى هنا هاي اول مرة احس روحي تنتمي لمكان 

ظل يباوع عليه بحيرة كال ادزج بيد خوالج كل اسبوعين تبقين يوم يومين باللي تريدي بس ما اكدر اعوفج هينا 

ـ لا ما اريد 

بقى يقنع بيه واني رافضة الا ابقى هنا ويا بيبي حلفلي حتى يبقيني عند بيت عمي ارغد واني على نفس الرفض 

ـ يول امج القاسية تموتني 

ـ اي وانت خايف منها كُلش، فدوة بابا خليني هنا 

ـ ودوامج ما بقى عليه غير الشهر ونص

ـ منا للدوام نشوف 

ما قبل اخذت ايده ابوس بيها واقنع بيه وعمامي صافنين علينا سحب ايده مني لزم طرف شاربه يسحب بيه بتفكير واني الح سطرته سطر

ضرب الستيرن ضربة خفيفة مد راسه يحجي ويا عمي اوس

ـ اوس جيبلها تلفون وشريحة والحساب اني اسويه وادزه الك ما تنزل بيه غير الواتساب اي برامج تواصل ما اريد بيه

فرحت حيل كمشت راسه وبسته بخده بوسه قوية كتله وتيكتوك 

هز راسه اي حجى بيني وبينه بدون ما يسمعهم 

ـ لا تخسرين ثقتي بيج 

جربتي زعلي منج لا تجربينه مرة ثانية لان اني نفسي ما اضمن لج شنو اسوي

هزيت راسي اي تقرب عمي مجد ارتجى بجف ايده على اطار الجام من فوك مدنك راسه يحجي ويا بابا

ـ ما تكدر ترفضلها طلب ولا تقسى عليها لان تشبه 

عاط بيه بابا جفلني ويا عمي مجد

ـ هااي بنتي قطعة مني، ما يهمني تشبه منو عسى ما تشبه جدك هم تبقى جمارة گلبي الاسود ولا راح تفرق معزتها مقدار ذرة

دحك يول هالمرة حجيتها واكتفي وياك بالكلام مرة ثانيه تشوف الفعل مني وتعرفني زين مجد تعررررفني زين اصير مو خوش صووون لسانك لا تجبرني اكصه واحطه بيد مرتك

اباوع على عمي مجد نخطف لونه ابتعد وهو يعتذر ويكوله ما اقصد شي شبيك ما مستاهلة هالعصبية

بقى بابا خازره ويتنفس بعصبية ما ركزت وياهم لان فرحانة راح ابقى هنا، عمي اوس حاول ينسى بابا وهو يكوله 

ـ اخذها وياي هي تختار التلفون لو عندك نوعية ابالك؟ 

تنهد وهو لسه خازر عمي مجد 

آصف:- لا لاتاخذها جيبلها ايفون مثل نوعية تلفوني هي تعرف له متعودة عليه

ـ يالون تردين عمو؟ 

كتله اسود اريده 

اشر على عيونه وهو يكول تدلل حبيبة عمها

كال له بابا باجر احولك الفلوس ما قبل عمو بس بابا سكته من كاله هو راتبك ما يكفيك لنص الشهر ومرتك حامل باجر احولك الفلوس ما اريد اسمع اعتراض

نزلت واني اضحك فرحانه كلش، نزل جنطتي يباوع عليَّ وضايج 

ـ لا تضوج اصف المزيون يومية اتصل عليك كاميرا 

كال ترى حاط كاميرات بالبيت واشوفج ما فاركتي عيني ولا يوم بس هم ما اكدر على فراگج اذا ما احضنج لگلبي 

حضني وهو يبوس براسي بوسات خفيفه وحدة وراء الثانية 

••------------♡-----------♡------------••

اثيـــــــــــلة 

البارحة اجتني درة تبشرني وهي فرحانة كالت لؤي يكول اصف راح لحديثة تا يرجع زمزم وياه 

محد يكدر يتخيل فرحتي من سمعت الخبر من الفرحة كعدت ادعي لاصف واني خلصت شهرين ونص ادعي عليه بگلب ام موجوعة واليوم من فرحتي نسيت هو اللي بعدها عني ما اريد شي بس يرجعلي بنتي ليش مكتوب عليَّ حضني وبيتي فارغ منها شنو الذنب السويته وهيج كارهتني حوبة منو هاي 

كعدت من الصبح طبختلها كل اكله تحبها ما حسيت لا بتعب ولا بـ حر صار وقت الغدا وهم لسه ماكو اتصلت على آصف كال العصر نجي ماحجيت شي على ولا نقصت فرحتي المهم اليوم هي كبال عيني واخذت عهد بيني وبين نفسي ما امنعها من الكعدة ببيت نفس بس تبقى قريبة مني وبمكان آمن واعرف آدم مستحيل يطاول ويتصرف تصرف مو اخلاقي وياها

خلص اليوم واني كاعدة كبال شباك الصالة ادحك على الباب هسه يدك هسه ينفتح وتدخل وهي تضرب بالكاع برجليها وتتمشكل ويا الكل

اشكد تطاول وتتمادة وياي بالحجي ابد ما ضربتها اعرف بنيتي بس لسان ومن جوة خامة بيضة وترفه وهشة بسرعة تتعلق ماعدها لا كره ولا حقد وبسرعة تنجرح وتنقهر 

مشاكلها وياي لان تحب ابوها حيل ومحملتني ذنب الانفصال واعرف بهاي سوالفها مو لان تكرهني وحتى ما تحبني بس عبالها هيج تضغط عليَّ وارجع لابوها اللي تغار عليه من الكل وتخاف يجي يوم ويزوج غيري هاي اكبر مخاوفها 

لخاطرها ردت ارجع لابوها وادوس على نفسي المهم هي بس ابوي رافض وماكدرت اقنعه ولا اكدر اكسر بيه 

ما جان عندي مشكلة بكعدتها عند نفس واروحلها بين يوم ويوم رغم لا تحجي وياي ولا تخليني اكعد يمها دايما مهزومة مني وماتقبل اجي عليها 

بس قبل كم شهر بنهاية دوام المدارس قبل الامتحانات بأيام اجت زعلانة من ادم نازل عليها بالحجي من شافها قبل لا تطلع للمدرسة لابسه حجابها على نص راسها ومطلعة كذلتها منا ومنا

اجت ويا اختها من المدرسة وهي تحلف والله ما ارجع عليهم الا هالمتكبر يعتذر مني يغار مني وهيج حاط راسه براسي 

اسمع عسل اللي كاعدة وياهن تكولها لا تحجين عليه على شنو يغار منج شنو احلى منه انتي؟ 

وزمزم تجاوبها اي احلى منه ويغار مني مو لهذا السبب لا يغار لان ماما نفس تحبني اكثر منه 

ضحكت على سوالفهن عسل ما تقبل عليه ادافع له وزمزم تذم بيه وكوثر تحاول تهجد الوضع بيناتهم النوب انتقلن بالمعركة من الذم والدفاع لمنو اقرب له 

ـ شدخلج انتي احجي عليه ما احجي شنو اقرب اله مني 

ـ اي اقرب لان ابن عمي واخوي

ـ وهم ابن عمي واخوي

ـ ابوج يصير ابن عم ابوه 

وابوي يصير اخو ابوه 

فأني اقرب منج 

اسمع زمزم فرفحت وتحجي بعصبية 

ـ نجبي اني اقرب عايشة عندهم وحتى يعلم بيه ويطلعني بسيارته ويا قمر انتي ولا مرة اجى وطلعج حتى على الصلاة هو علمني 

ـ لان يشوفج زعطوطه وبعمر قمر اما اني عكسج يشوفني جبيرة وفاهمة واعرف للصلاة ويحترمني حتى ما يحجي عليَّ نفسج 

وبعدين اني اكبر منج شلون تكوليلي نجبي الا هسه اكول لخالتي عليج زمزم ما تحترم وتغلط

اسمع كوثر عاطت بيهن:- اثنينجن اخواته بس اسكتن كافي ملختن اديه شبيجن 

عسل طلعت زعلانه ارضي بيها وابوس بوجهها وهي ولا تصد عليَّ تجاوبني من تروح زمزم لبيت عمي الا اجي على كوثر 

بالليل اجى ادم مادخل جوة من الباب وكال هذا ريزو لمصطفى والبنات 

احنا محد يحبه كوثر ولا تحطه بحلكها وصفاوي يظل يطشر بيه كتله 

ـ ليش كلفتك نفسك عمه محد ياكله 

حجى بدون ما ينتبه على نفسه وبعفوية

آدم:- لا زمزم الخاتون تحبه 

والله ماكدرت اكل غصيت بيه من تذكرتها 

من حس على نفسه تلعثم وهو يبرر كلامه 

ـ يعني لان زعلتها وزودت بالحجي وياها وابوي جاب ريزو علمودها استغربنا من كالت امي من المدرسة رجعت لبيت امها 

عرفت عنده مشاعر الها جنت شاڪة من اهتمامة الزايد بكل شي يخصها هي الوحيدة، ما سمعت ولا شفت بيوم تدخل ببنات عمامه لو بنت عمته الوحيدة زمزم اللي دوم معلق عليها جنت شاكة بين اكو مشاعر وبين لا لان كبرت عندهم هيج مهتم ويعتبر نفسه مسؤول عليها 

وبسبب هذا الموقف تأكدت شكي صحيح ومن هذا اليوم منعتها من الروحه لبيتهم اشكد تحجي وتطاول وياي وتتكاون ويا اختها واخوها ولا خليتها تروح حتى ابوها يقنع بيه واني رافضة ونفس اجت عليَّ من اتصلت عليها بدون ما ادري صارحتها بدون ما ألف وادور بالحجي وطلعت تعرف ومنبها آدم ودائما زمزم جوة عينها 

اني اعرف آدم خلوق وعندي ثقة بيه بس بنتي بعدهي طفلة وتصرفاتها طايشة ومدللـه فرق بينهم من السما للارض اريدها تعيش طفولتها ما اريد تنتبه على حبه الها بهذا العمر وتعيش مشاعر اكبر من عمرها راح تضيعها ولو على حب ابوها الها اعتقد ماراح تقتنع بحب أحد بالمستقبل 

فزيت من الموقف على صوت كوثر

ـ تأخروا ليش ما تتصلين عليهم؟ 

اخذت منها التلفون اتصلت على آصف انطاني رفض فرحت واني اكلها مازال رفض الاتصال يعني وصلوا 

وراء نص ساعة اقل ودك الباب راح صفاوي فتحه اباوع من شباك دخل اصف وهو يدنك على صفاوي اللي تعلك برگبته باسه براسه وخدوده 

ضاعت فرحتي من سد الباب عجل وينها بنتي ليش ما جابها اخذت حجابي لبسته بعصبية وطلعت عليه

ـ وينها زمزم ليش ماجبتها انت اب لو جلاد حتى ويا بنتك ماترحم 

كال لمصطفى ادخل جوه بابا خلي نتفاهم ويا امك 

دخل مصطفى يركض كوثر اجت سلمت على ابوها وهي تسال على زمزم كالها روحي لاخوج وهسه اجي وراكم

من دخلت كال هي بنتج ما رضت تجي 

ـ شنو مارضت تجي كل مرة اروحلها تكول ارجع وي بابا كول انت ماتريد تجيبها

ـ يابة وحق دين الله ورسوله هي ماقبلت تجي وتوسلت بيَّ تا تظل غاد تكول اول مرة احس بروحي تنتمي لمكان وحابة وجودي يمهم

ـ شنووو تحس بروحها شنو هالخرابيط ليش ما جبرتها مثل ما أخذتها ترجعها الي شنو ذنبي وياك تا هيج تحرمني منها انت ليش هيج ويانا 

ـ جاي احلفلج والله هي ما قبلت شبيج 

ـ اي هي ما قبلت وانت فرحت حتى تخدم اهلك واختك مووو

خزرني بجيت واني ارفع ايدي لكصتي كتله 

ـ والله ما عندي مشكلة اذا تريد جيب امك وابوك وحتى بيلسان جيبها هينا واني اخدمهم واحطهم على راسي والله البيت الهم واني الخطار بس رجعلي بنتي لحضني كافي مرمرتوني بعيشتي

بعدهي صغيرة والله ملابسها اني اغسلها فراشها اني ارتبه وراها وشوف هسه حالها شصاير بيها اديها الجانت انعم من الحرير صايرات خشنات من الغسل والمنظفات 

سايمة الله عليك رجعها الي وجيب عمي وعمتي وبيلسان واني اخدمهم بعيوني والله وداعت جهالي ما اقصر وياهم 

آصف:- يابه والله ماكدرت اقنعها هي حابه غاد تظل روحيلها باجر وحاولي وياها بلكي تسمع منج وتجي وياج

أثيلة:- منك ما سمعت تريدها تسمع مني الله عليك ارجعلها وجيبها

آصف:- صار يابة تدللين بس لا تبجين وكم يوم واروح اقنعها 

اثيلة:- باجررر روح

كال باجر ما اكدر عندي شغل لفوك راسي ما افرغ اذا كلش كلش كدرت بعد اربع او خمسة ايام

بقيت كاعدة بالطرمة ابجي وهو دخل لكوثر ومصطفى اخذت عباتي من الشباك ورحت على اخواني لكيت بس باسل موجود كتله اخذني هسه لزمزم كال الصبح نروح كتله لا هسه اريد اروح 

رجعت للبيت حتى اغير ملابسي لكيت اصف كاعد بين مصطفى وكوثر يسولف عليهم وكل شويه يبوس خد واحد منهم

أثيلة:- باسل راح ياخذني الها تبقى هينا وياهم لو اخذهم لبيت اخوالهم

آصف:- يول وقت روحه هساع انتظري الصبح وروحي الها

ـ لا هسه اروح اريد اشوفها ليش مافعلت ترجع وياك

تنهد وهو يكول روحي وخليهم اني هينا وياهم 

غيرت ملابسي اسمع هورن سيارة باسل كملت على السريع وطلعت آصف طالع بره واكف ويا باسل اريد اصعد بالسيارة وطبكت سيارة آدم نزل سلم عليهم كالهم عمتي سمر عازمتني على العشا 

دحك على آصف وسأله رجعت زمزم

ـ لا مافعلت ترجع وياي تريد تبقى غاد

هز راسه اي بدون ما يحجي سلم عليهم ومشى متوجه على بيت يونس صاح ورا آصف

- شنو يابة سيارتك تبقى بنص الشارع

صد علينا وهو يفرك بكصته رجع صعد بيها حركها وطبكها كبال باب بيت عمامه باسل يضحك واصف صافن عليه رافع تك من حواجبه اعرف من نظرته ووكفته صار عنده شك والله يرحمنا من يتأكد

واحنا دنطلع شفت لؤي طلع من بيته ووكف ويا آصف، تقريبا بالتسعة وصلنا دخلت لبيت عمي ماكو صوت جوه بس فوك اصوات جهال مجد باسل على على بيت ابوي كال انام غاد واذا كدرتي تقنعيها الفجر نطلع 

دخلت لغرفة اوس واني مشغلة فلاش التلفون اضوي بيه اجى الضوء على وجهها بجيت واني اشوفها شلون نايمه وفاتحه اثمها مبين عليها التعب اريد اطفي الفلاش ونصدمت من شفت بيلسان نايمة لغاد منها 

مسحت وجهي خايفة تأذي بنتي ما اريد زمزم تبقى هينا لزوم اقنعها ترجع وياي 

كعدت كبال وجهها امسح على شعرها ما حست عليَّ، نزعت حجابي وتمددت بصفها حطيت ايدي جوا راسها وحضنتها لصدري بيدي الثانيه واني ابوس براسها بوسات خفيفة خاف تكعد ليما غفيت ...

صحيت على صوتها وهي تهز بكتفي

ـ ماما،،، ماما اكعدي ههه ماما

فتحت عيوني كاعدة كبالي ومدنكة وجهها عليَّ 

ـ يمتى اجيتي! 

كعدت لزمت راسي الصداع مدمرني من يوم جابها اصف هينا واني احس راسي ألمه مو طبيعي

اثيلة:- عليش مارجعتي ويا ابوج ماما وتالي وياج ليش متعبتني 

زمزم:- ما اريد ارجع اريد ابقى هنا

ـ شنوو السبب مو جنتي كارهة كعدتج هينا شنو اللي تغير وفجأة حبيتيها

صدت على بيلسان الي كعدت من صوتي وهي مخروعة

راحت عليها تهجد بيها واني فاتحة اثمي هاي زمزم العرمة بنتي 

ـ ماكو شي لا تخافين 

تحتاجين تواليت؟ 

ساعدتها تكوم اخذتها بتجاه الباب وهي تكولي هسه ارجع 

لبست حجابي عدلت ملابسي نمت متضايقة منهن طلعت وراهن لكيت عمتي وعمي كاعدين يتريكون سلمت عليهم وطلعت غسلت وادور على زمزم لكيتها واكفه باب الصحيات منتظرة بيلسان 

طلعتها جابتها بتجاهي مدت اديها جوا الحنفية وتغسللها بالصابونه واني بس ادحك عليها العرمة من جنت اكولها غسلي اخوج تشبعه راشديات وترجعه الي يبجي واصابعها طابعه على خده

دخلتها جوه واني وراهن امشي كعدتها بمكان بعيد عن امها وابوها وراحت جابت ريوكها حطته كبالها ورجعت عليَّ كالت

ـ تعالي تريكي وياي

ـ ما اريد ريوك ويلا جهزي نفسج تا نرجع لبغداد 

دنكت اخذت الصينية من مقابيل جدها وهو يكولها ارجعي ويا امج جدي تعبتيها كل يومين جايه وراج 

اخذت الصينية وراحت للمطبخ كعدت بصف عمي احجي وياه حتى يقنعها وعمتي ام اصف ماخذه وضع الصمت تريدها تبقى هينا بس عمي رافض وكال هساع احجي وياها ترد وياج

اجت جايبة ريوك الي والها ماكسرت بيها اكلت وياها والجاي ثخين ومحترك بس البيض زين سالكته 

ـ يلا ماما جهزي نفسج بين ما اعزل المطبخ

ـ مو كتلج ما اروح ابقى هنا وبابا قِبل 

ـ واني ما اقبل تبقين شنو انتي بمكان واحنا بمكان

ـ اي بيت جدي مو ناس غربة

ـ على راسي بس اني اريدج يمي ليش تحرميني منج شنو اللي سويته وهيج نافرتني 

ـ ما نافرتج بس اني حابة ابقى هنا ليش ما تفهميني 

ـ شفهمج ماما كعدتج هينا ما راضية عليها اني، وبعدين شلون تنومين بيلسان وياج بالغرفة خاف ابوج يعرف 

ـ ماما نفس كالت تجاوزي الساعة يوم ساعتين ويوم 3 لحد ما تخلينها يوم كامل واذا ابوج عرف وماحجى وياج يعني موافق فطلعيها من الغرفة ذيج وخليها تنام بالبيت 

ـ اي عادي طلعيها بس شلون تأمنين تنام وياج بنفس الغرفة لو خانكتج بالليل جان نومتيها بغرفة عمي لو بالصالة

ـ لا تحبني ما تاذيني 

راحت عليها اخذتها للحمام واني وراهن احجي وياها واقنع بيها ترجع وياي واكفة بالباب احجي وهي تسبح بعمتها كملتها وطلعتها للحديقة تمشط بشعرها ومخلصتها عليه لا ولا وما ارجع 

حطتلها مخمرية لشعرها وعطرت جسمها كضبت اكتوفها مدت راسها باستها بخدها حيل وهي تكولها

ـ اليوم عمتي صايرة ورد جوري ريحتها فدفد

ظليت اتحسر على محبتها وحتى بداخلي حسدت بيلسان وما ابالغ من اكول تمنيت حالها حالي وهيج زمزم تعتني بيه ولا تصدني هالصد والبرود

مشت للحمام واني وراها تغسل بملابس عمتها واني مستمرة بالاقناع بلا نتيجة راسها مثل راس ابوها مثل الصخر ماينفع الحجي وياهم وضايع

طلعت شرت الملابس واني بقيت بمكاني رجعت على الحمام غسلته وغسلت اديها تقربت مني خلتني مصدومة من باستني بخدي صار كم سنة على انفصالي من ابوها ولا مرة باستني وهاي اول مرة تسويها حتى من بعدها احس نفسي فقدت حقي عليها

رحت وراها وبمكان ما اني اقنعها ترجع هي قنعتني بأعنادها تبقى هينا اجى باسل وهماتين حاول وعلى نفس الحجي ما ارجع باسل كال 

ـ عوفيها كم يوم راح تتعب وهي بنفسها تكولكم تعالوا اخذوني 

اخذت رقمها وثبتت رقمي عدها وصيتها الف وصية على نفسها ورجعت لبغداد خلصت الطريق ابجي وباسل يحجي عليَّ محد يحس بنار گلبي عليها 

الولد خطيه تعبوا من الطريق وكمت بمكان ماكل يومين اروحلها صرت كل اسبوع او اقل اروح ابقى يمها ليلة وارجع وبكل روحه احاول وياها بلكي ترجع وياي وكل مرة الكى تعلقها بيهم اكبر

فرحت من قرب الدوام كلت خلص بعد راح ترجع مجبورة بس صدموني هي وابوها 

••-----------♡----------♡-----------••

تــــــــــــــرتيل

وصلني عمو ارسلان للمعهد لان بابا داخل مستشفى ويا عمه اثيلة 

ارسلان:- قبل لا تخلصين بربع ساعة دزيلي رساله حتى اجي اخذج

تقربت بسته بخده ابتسم وهو يكرصني خشمي بظهر اصابعه السبابه والوسط

ارسلان:- انتبهي زين لشرح الاساتذه

سلمت عليه ونزلت دخلت من باب المعهد والتفت عليه بعده واكف يباوع وراي رفعت ايدي لوحتله باس اصابع ايده وحركها الي بحركة باي 

دخلت للصف جان اول درس كيمياء كمل استاذ حسين الشرح وطلعنا لغير صف عندنا رياضيات كعدت بنفس المكان اللي دائما اكعد بيه ابد ما اغيره واللي بالاخير جايات للسوالف والتصوير وعلى طول الدرس يسولفن ما اكدر افتهم اذا اكعد يمهن طلعت السجل الخاص بالرياضيات مدنكة بعدني اسد بالسحاب رفعت راسي من شفت رجلين ولد واكف كبالي وقريب 

مهند:- السلام عليكم 

               الفصل الرابع من هنا