رواية الفراق هو نصيبنا الفصل الرابع والثلاثون34 بقلم حبيبة الديب
الساعه داخله على تمانية و نص.. تاني كوباية شاي اشربها و أنا مستني جودي و هى ماجتش
قاعد من سبعه على أمل أنها تخلص شغلها و تيجي بس شكلها مش هتديني فرصه زي ماتوقعت...
سبت كوباية الشاي و حاسبت، طلعت برا ركبت العربيه و أنا مضايق...
مش عارف منها و من نفسي، بس حاسس أني مخنوق، يعني أنا قولتها اللى حاسس بيه و بس، أنا فعلاً أعجبت بيها أوي الفترة اللى فاتت دي، مواقفها معايا ماكنتش كتير بـس.... فكرتني بهاجر أوي...
و الصراحه أنا متلخبط يعني ممكن أكون شايف هاجر في جودي بس في الحالتين أنا كنت حابب أعرفها أكتر و أقرب منها أكتر.... عارف اني غلط.. و ممكن أكون أناني بتفكيري ده بس فكرت اللى هو طلاما هى كويسة و فيها صفات جودي اللى حبتها و صفات هاجر اللى مش عارف أنسها فـليه لأ...
أنا لما حبيت هاجر حبيتها ببساطتها و تفائلها على الحياة، كانت مشرقة و جميلة و كنت فاكر أن مفيش منها اتنين زي ما بيقولوا لس لقيت جودي اللى تشبها في كل صفاتها..
ممكن أكون حبيت جودي عشان فيها من هاجر... ولا حبيت جودي عشان هى جودي؟!
مش عارف بس اللى أنا أعرفه أني كنت عايز أدخل حياتها و أبقى جزء منها، مش معنى أن هاجر ماتت أني نستها لأ..!
هى لسه في قلبي و حبها هيفضل جزء مني للأبد، بس برضوا حبيت جودي.. مش عارف ليه بس.. حبيتها عادي يعني...
اتنهدت بتعب.. تعبت من كتر التفكير.. حاسس أني مشتت بس كان نفسي أشوفها أوي بس خلاص، بما أنها مش هتديني فرصة يبقى حكايتنا أنتهت قبل ما تبدأ...
زي ما كان الفراق نصيبي أنا و هاجر... هيبقى نصيبي مع جودي...
الفراق ....
مجرد كلمة تحمل معاني كتير موجعه... الفراق صعب في جميع أحواله... ممكن يكون فراق الحبيبين اللى أنا جربته..
ممكن يكون فراق الاهل و ده أصعب فراق
فراق الاخوات و ده جربته فترة
فراق الصحاب... كلهم صعبين بس أوحش فراق فعلاً هو الـمـوت....
لما شخص يسيبك ممكن تريح بالك بفكرة أنه أكيد ده احسن ليه و خير ليه... لكن فراق الـمـوت... بنفارق ناس كتير في حياتها موتهم بيأثر فينا، بـس الحياة ماشية برضوا مش بتقف على حد...
يعني مهما كان الفراق بيبقى صعب.. بس بنتخطى مع الوقت.. و مش بننسي بيبقا تخطي و بس...بس إنا عشان أتخطي جودي لازم أنساها فعلاً..، و الصراحه حاسس انه هيبقا سهل عليا عشان الفراق هنا كان في بداية التعارف..!
كنت قاعد في العربية وانا بفكر كده و سرحان و قاطع افكاري رنة موبايلي و لما طلعته لقيته عم صبحي...
_الو... ايه ياعم صبحي..!
_فارس بيه الراجل اللى جبته المخزن هنا هرب..!
ادعدلت بسرعه :
_هرب أزي أنا قافل عليه بالمفتاح...
_مانا لما دخلته أكل زقني و هرب بسرعه و مالحقتهوش... هو لسه خارج من الفيلا حالاً اهو
_طب انا جاي دلوقتي سلام...
قولتها باستعجال و قفبت معاه و طلعت عل الفيلا بسرعه، و أنا في طريقي كنت مركز في الشوارع ممكن أشوف...
لحد ما لقيته بيجري و اول ما شافني وقف لحظه و لف يجري عكس، و في غمضة عين عربية معدية شالته...
كنت قاعد في العربية لسه مصدوم وأنا شايفه بيموت و الدم مغرق المكان، و العربية اللى خبطته حتى هربت بسرعه، نزلت أشوفه عايش ولا لأ، و الناس اتلمت كلها حواليه و واحد طلب الاسعاف
حطيت ايدي على صدره و مفيش نبض... نفسه وقف...
قومت و انا مصدوم من اللى حصل كله، اهو ربنا أنتقم منه مات قبل مايتوب على كل اللى كان بيعمله
_لا حول ولاقوة الابالله العلي العظيم... انا لله و انا اليه راجعون..!
قالها راجل كبير و هو بيقفل عينه بعد ما عرف ان نبضه وقف..!
هو انا مش شمتان فيه، ربنا مايكتبها على حد الموته دي... بس من جوايا مبسوط ان حق أختي رجع
أهو ده بقا اللى فراقه حلال بجد..
استغفروا
***
تاني يوم...!
_فادية ماما فين؟
_فوق في الصالون التاني بتبخر البيت..
طلت فوق لقيتها بتبخر البيت فعلاً و مشغلة سورة الكهف على الشاشة عشان انهاردة الجمعة،
بحب أجواء يوم الجمعة دي بس مضطرة أنزل...
_ماما انا خارجة مع جودي و كريمة..!
جت ناحيتي و بخرتني مش كنا بطلنا العادة دي بـس..!
_رايحين فين؟
_النهارده أجازة جودي و عايزة تخرج و أنا كمان مخنوقة شوية بسبب موضوع الشغل ده فقولنا نتقابل و نقضي اليوم سوا..!
بعدت بالمخبرة و حطتها على الترابيزة و بصت لي :
_يا زوزا ماتزعليش و قولنالك ركزي في الجامعه دلوقتي و بـس، ايه يعني الشركة رفضتك هى مش أخر شركة يعني..!
_ايوة بس سبب الرفض أني مش متخرجة من فنون جميله أو تطبيقة أو حتى تربية نوعية، هما عايزين شهادة جامعية مش موهبه و خلاص...!
_زهرة أنتِ مؤمنه بالله و عارفه أن اللى ربنا كاتبهولنا هو الخير لينا صح؟
يعني أكيد شغلك في الشركة دي مش خير ليكِ عشان كده الموضوع ماتمش، و ياريت دلوقتي تركزي في كليتك و بـس و كمان أنتِ عروسة كلها أقل من شهر و هتتجوزي، فكري في الرسم ده بعدين أركنيه دلوقتي..!
يعني ايه أركنه مش فاهمه هو ليه محدش فاهمني ياربي..!
مش قادرة أجادل معاها فـاتنهدت و قولت :
_حاضر يا ماما..
_و مسودها كده ليه؟
بصيت لنفسي و كنت لابسه فستان أسود و طرحه سودة منقوشه بالاحمر و لفاها خمار
_مش مسوداها ما في أحمر أهو....
_لا والله..!
بوستها و انا ماشية :
_اه والله.. يلا سلام بقا..!
مشيت و كانت الساعة اربعه و نص... كنت كلمت كريم أنهارده الصبح و عرفت منه انه هيوصل هنا بليل على الفجر كده، و عرفت أنه الحمدلله خلص شغله هناك على خير و كمان عمل ثفقات مع شريكات أنها هتعرض عنده عربياتهم و لما تتباع كريم بياخد نسبة و يديهم حق عربياتهم، بس مش كل عربيات المعرض هتبقا كده،
لأ فيه عربيات مركات معينه هو هيشتريها و الباقي هيبقا أستيراد من برا... كده هو قرب يعمل المعرض باقيله شوية توكيلات و كمان عايز معاه شريك هيبقا أفضل عشان لو حثلت خسارة هتتقسم على الاتنين مش لوحده..
و ربنا ما يجيب خسارة يارب...
و كمان كان ناوي بعد ما يصنع العربية بالامكنيات اللى في باله يعرضها عندو في المعرض بتاعه و بس..!
ركبت عربيتي و روحت قابلت جودي الاول بعدها روحت أجيب كريمة هانم من بيتها
و اول ما نزلت من البيت و جت ناحية العربية حطت ليان على رجل جودي دخلتها من سقف العربية اللى أنا فاتحاه... و ركبت هى ورا...
اول ما ركبت ابتسمت و بصت لنا :
_ازيكم يابنات.. يارب ماكونش اتاخرت عليكم..!
اتكلمت جودي بسخرية :
_ لا يا حبيبتي ده يادوب أطلعتانا نص ساعه بس..!
خبطت على كتف جودي :
_خلاص بقا قلبك أبيض يا دودي..!
جودي باست ليان و اتكلمت :
_هسامح المرادي عشان جبتي ليلو بـس..!
_ماتفكرنيش بالله عليكِ قولت لأنور ياخدها معاه و هو رايح لصحابه برضوا و قالي لو ماخدتهاش مفيش مرواح في حته..
ابتسمت جودي و هى بتلاعب ليان :
_و أنتِ مش عايزة تاخديها ليه.. ده أنا كنت رجعتك تجبيها لو جيتي من غيرها، ليلو حبيبة قلبي دي..!
_خلاص خليها معاكِ ياختي أنتِ بتحبي المرمطه شكلك..!
بصت لي و اتكلمت :
_ساكتة ليه يا زهرة..؟
هزيت كتافي و اتكلمت ببساطه وأنا باصه قدامي :
_مفيش مخنوقه شوية بـس
جودي انتبهتلي :
_موضوع الشغل برضوا صح؟!
اتكلمت بضيق :
_اه بس ياريت مانفتحش الموضوع ده، ولا تقولولي ده هبل و ركزي في كليتك و لا تقولوا خليها مجرد موهبة و خلاص... فـمش عايزة اتكلم خلاص...
اتكلمت كريمة :
_خلتص يا زوزا مش هنتكلم في الموضوع ده، بس يلا نتفق الاول هنروح فين.؟
_مش عارفه..شوفوا أنتو قبل ما أخرج من مدينة نصر بـس...!
_ايه رايكم نروح بيوتي سنتر نروق على حالنا..؟
قالتها جودي بابتسامه و حماس و ردت كريمة :
_فكرة حلوة فعلاً أنا كنت عايزة أصبغ شعري أصلاً..!
الصراحه فكرة حلوة و بتغير النفسية أوي.. بصيت لكريمة من المرايا وانا بسألها :
_طب نروح فين نرجع التجمع ولا في حد كويس هنا..؟
_بصي فيه صالون ملك مكرم بيوتي... في مول رافال ده تحفه جدا و كنت بروحه مع هنا على طول... و قريب من هنا عشر دقايق ولا حاجه و نكون وصلنا..!
فعلاً روحنا المول ده و اول حاجه عملناها طلبنا أيس كوفي الاول و جودي و كريمة كانوا مُصّرين يصورا يومنا بالتفاصيل...
بعدها روحنا البيوتي سنتر و كان قمة في الروعة عمتًا
أول ما دخلنا الريسبشن كان ريحته فانيليا وورد... المكان كله إضاءة هادية وكراسي جلد بيچ وميوزك هادية جداً
الاستقبال استقبلتنا بابتسامة :
_نورتونا يا بنات.. حجزين ولا walk in؟
جودي اتكلمت وهي بترفع كوباية الأيس كوفي :
_لا يا قلبي مفاجأة كده.. عندكم مكان؟
_اه طبعاً تحت أمركم.. تحبوا تبدأوا بإيه؟
كريمة بصتلنا و غمزت :
_نبدأ دلع من الأول للأخر..
الساعتين اللي قعدناهم جوا كانوا عيد
أنا اخترت جلسة تنظيف بشرة و بديكير
جودي دخلت صبغة وتريتمنت لشعرها عشان بتحب تغير أستايل شعرها كتير.. و عملت بديكير..!
كريمة بقى قررت تجنن وتعمل هايلايت عسلي وكانت متوترة اللون يكون مش حلو فيها بس متحمسة
واحنا قاعدين تحت الدريير جودي طلعت الموبايل
_لازم توثيق اللحظة التاريخية دي...!
صورتنا واحنا 3 بالروب بتاع الصالون والطرح متشمرة ولازقين في بعض وبنشرب الأيس كوفي
جودي صورتنا أحنا التلاته فيديو و لقطت كريمة وهي بتقول للكوافيرة :
_يا مدام بالراحة بالله.. لو بوظتيه جوزي هيطلقني
كلنا ضحكنا عليها و هى شافت جودي اللى بتصورها و حاولت تقوم بس الكوافيرة منعتها...
البنات اللي شغالين هناك كانوا سكر..
اول ما خلصنا كانت النتيجة تحفة...
جودي شعرها بقى لونه بني شيكولاته بيلمع.. كريمة الهايلايت العسلي مدي على وشها نور
وأنا وشي كان منور من الجلسة وضوافري مترتبة وبتلـمع
حتى ليان كانت قاعدة في الكيدز اريا بتلون ومبسوطة
قعدنا في الكافيه بتاع المول بعدها
جودي طلبت بان كيك وكريمة طلبت وافل وأنا طلبت تشيز كيك اللى مش هبطل أحبه
_الساعه الساعه تمانية، يعني اليوم للاسف قرب يخلص و بكرا في شغل...
قالتها جودي بصياح و كريمة ردت عليها و هى بتقطع الوفل :
_أتفقنا محدش يجيب سيرة شغل ولا جواز ولا نكد.. النهاردة يومنا وبس
اتكلمت جودي و هى بتاكل :
_طب ناكل و نعمل شوبينج عايزة بيجامات جديدة حابه أنوع، و كمان مش عندي چيب ولا فساتين خالص كله بناطيل فعايزة أجيب لبس كتير..!
لما قالت كده فرحتلها أوي أنها هتبدأ تغير أستايلها واحده واحده أخيراً..!
و خلصنا أكل و لفينا على لبس مناسب ليها، و رغم أني خلصت جهازي و جبت لبسي و طلاباتي كلها لقيت نفسي بشتري حاجات تاني معاهم و كريمة فجئتني أنها جابيتلي كاش و بيجامة لجهازي هدية، و أنا جبت لليان طقم كان عسول جداً، و كلنا عملنا شوبينج تحفه
و الصراحه مودي أتغير كتير و بقيت مبسوطة أكتر و بضحك و أهزر عادي و نسيت الزعل خالص...
أنور رن على كريمة كذا مره يستعجلها عشان الوقت و الساعه بقت عشرة... و بابا رن عليا كتير حتى جدو عزت كلم جودي كذا مره...
و مع أن اليوم كان حلو بس خلص بسرعة أوي و أضطرينا نمشي..!
لما روحت البيت و خدت شاور لبست بيجامه من الجداد و حسيت بتغير جميل في شكلي..
قعدت على المكتب عشان أذاكر شوية بس مش عارفة ليه بجد نفسي بقت مسدودة كده من الكلية و مش حباها...
سبت اللاب و مسكت الفون و انا بسند ضهري لورا، فتحت الانستجرام اقلب فيه بلا هدف
ريلز ورا التاني ورا كذا واحد لحد ما شوفت براند لدريسات...دخلت على الاكونت و كان عليه فساتين بقصات مختلفة و جديدة... و للحظة جاتلي فكرة مجنونة...
ليه ماعملش براند خاص بيا..؟ أبقى مستقلة في شغلي بدل ما بدور على شركة أثبت فيها نفسي...
بس الفكرة هنا أني لما أنفذ فكرتي دي مش هقول لحد غير لما أوصل، عشان حاسة ان محدش مصدقني...
يعني كلهم عارفين زهرة شاطرة بتعرف ترسم و كده، لكن أقولهم أشتغل كمصممة مش شايفين ده فيا
انا لازم ابدأ من الصفر لوحدي من غير ماحد يعرف حتى أهلي عشان بقيت احس منهم باحباط
ولما أوصل هلاقي الكل صدقني فعلاً..!
أبتسمت بحماس للفكرة و خدت النوت بوك و اللابتوب و قعدت على السرير فضلت أسال شات جي بي تي و Gemini و اعمل سيرش من جوجل و أتفرج على فيدوز يوتيوب عن أني أزاي أفتح براند من الصفر... و كنت بكتب أهم ملاحظاتي على النوت بوك، الفجر أذن وانا لسه بجمع معلومات، بس كنت تعبت فقررت أصلي و أنام
و أول ما خلصت صلاة لقيت كريم بعت لي واتساب أنه لسه جاي من ألمانيا و وصل البيت... أطمنت عليه شات و دقايق و سبته يستريح و قولت بكرا كده كده هنتقابل...
سبحان الله وبحمده
***
_الله هوا مصر وحشني أوي الغُربة طلعت وحشة اوي يا كريم..!
قولتها بمرح أول ماخرجنا من المطار و كريم أبتسم و هزر معايا، عام على عومي يعني :
_ايوة كانوا أصعب يومين فعلاً تخيل تمانية و اربعين ساعة بحالهم برا مصر..!
ضحكنا على هبلنا الغير معتاد ده و طلبنا اوبر جيه في عشر دقايق، في العادة أنا و كريم ماكناش قريبين أوي من بعض... هو كان مجرد زميل ليا في الجامعه وبس، و بعد الجامعة لما قدمت على شغل في كذا شركة و عملت انترڤيو في شركته أنقبلت بعدها عرفت أنه حفيد المدير...
و علاقتنا كانت سطحية و ممكن تعمقت شوية بحكم شغلنا سوا، بس السفارية دي قربتنا زيادة من بعض...
ممكن عشان أنا و مش عارف أزاي حكيتله عن جودي، عرفته أني مشتت و مشاعري متلخبطة و عايز أشوفها حالاً لو ينفع، بفكر فيها كتير وانا مش عارف السبب حتى
بـس ماعرفتهوش انها معانا في الشركة، ولا قولتله على اسمها حتى... يعني لما أتاكد من احساسي الاول و أخد خطوة جدية ممكن اعرفه ساعتها فعلاً..بس عادي ياقلبي الموضوع مش مهم...
المشكله الاكبر بقا انه قالي خد اليوم بكرا اجازة وانا أصلاً مستني الشمس تطلع عشان أروح الشركة أشوفها...
و في نفس الوقت عايز أخد اجازه فعلاً... طب ماينفعش أجي أشوفها و أشرب القهوة من ايدها و أروح تاني..؟!
ايه ده أنا بقول ايه... فوق يا منهد فـوق
_ياربي ايه الهبل اللى بفكر فيه ده...
كنت فاكر اني قولت الجملة دي في سري بس طلع صوتي مسموع شوية و ماخدتش بالي، و لمحت كريم بيحاول يكتم ضحكته و بص ناحية الشباك عشان ماتحرجش
غصب عني لقتني ضحكت من الموقف و هو بصلي و ضحك معايا :
_يا عم شكلك بتحبها بجد، رئي تاخد خطوة..!
_تفتكر؟!
_أفتكر جداً كمان.. أنتَ مش شايف شكلك عامل أزاي ولا ايه؟
اتنهدت و بصيتله أوضحله :
_ايوة بس أنا لسه مش جاهز كفاية عشان اتقدملها..؛ يعني أنا حاليًا كنت عايز افتح مشروع لاول أكون مُستقل بجانب شغلي في الشركة... يعني أنا بقالي تلت سنين في الشركة دي جمعت مبلغ محترم الصراحه و كنت عايز أفتح بيه مشروع..!
لقيته ركز معايا و اتعدل :
_زي ايه؟
_مش عارف بس حاجه في مهنتي.... زي ورشة ميكانيكا كبيرة مثلاً... أو معرض لغيار السيارات و اكسسوارات و كده..
_امم.. طب ايه رايك تبقى شريك في المعرض اللى هفتحه..!
أتفاجئت من طلبه الصراحه، عرض حلو بس لا مش عايز مساعده بالشكل ده :
_لا معرضك و مشروعك أنتَ أشاركك فيه ليه...؟
_أنا أصلاً كنت بدور على حد يشاركني فيه.. هيكون أسهل عليا يعني هنقسم الشغل مع بعض في الاداره مش كله عليا لوحدي.... و كمان العربيات اللى هشتريها سعرها غالي أوي و هستورد مركات كتير، فالشغل تقيل عليا لوحدي... انتَ ايه رايك نتشارك... حتى لو المبلغ معاك مش مكمل ممكن تاخد قرض..!
مسحت على رقبتي وأنا بفكر في الموضوع بشكل جدي، حلو المشروع بس عايز تفكير :
_لا بس ماليش في القروض و الربا أنا... بُـص سبني أفكر كده و هديك الاوكيه... بس لو تمام هيبقا بالمبلغ اللى معايا... يعني هتري أسهم مش لازم بالنص... عملوا عشرين في المية تمام عملوا عشرة حتى تمام..!
ابتسم و مد ايده :
_خلاص يبقا أتفقنا...
_لا بقولك هفكر الاول.. و كمان هشير الحاج في الموضوع الاول مايصحش اعمل مشروع بدون علمهم..!
_ماشي يا مهند... أنتَ ثح عمتًا و عجبتني... ياريت تفكر في الموضوع بشكل أسرع.... ايه رايك تيجي بكرا الشركة، هى ساعة و ترجع تاني مش شغل بس هفهمك الفكرة ماشية ازاي الاول بعدها يبقا فكر براحتك..!
_تمام ماشي هاجي..!
أول ماقال كده أنا ماصدقت بجد، يادوب هروح أشوفها و هروح تاني...
الاوبر وقف عند بيتي الاول و نزلت، كنت مرهق أوي و جعان نوم... و فعلاً أول ما طلعت أوضتي اترميت على السرير زي القتيل...!
و لأنهم كلهم نايمين في الوقت ده ماصحتش حد... صحيت تاني يوم على صوت المنبه، مانت الساعه عشرة، قومت خدت شاور و جهزت نفسي و فطرت مع أهلي اللى أعترضوا اصلاً على مرواحي للشركة انهارده، بس فهمتهم أنها ساعة زمن و راجع...
و نزلت ركبت عربيتي اللى وحشتني اليومين دول و طلعت على الشركة مش عشان الاتفاق لأ
عشانها..
بعد ما وصلت الشركة طلعت مكتب كريم ، و هانيا و قفتني لحظات بعدها دخلت، كان معاه مكالمة شاور لي أقعد، وأنا قعدت و استنيته يخلص، و هو قفل على طول...
ابتسم و قام من مكانه قعد على الكرسي اللى قصادي :
_أزيك اديا مُـهند عامل ايه..؟!
_عايز قهوة..!
ايه ده يا مهند أثبت كده يا جدع، أنا بقول ايه بس...
_أحم قصدي أنا كويس الحمدلله...، بس مالحقتش أنام يعني و مصدع فعايز قهوة... ده قصدي..!
_طبعاً ثواني ثواني.... قهوتك ايه...
_سادة..!
كلم هانيا على الخط الارضي :
_هانيا واحدة قهوة سادة بسرعة..!
قفل معاها و بصلي و بدأنا ندردش في مواضيع عادية و أنا بدعي أنها تجيب هى القهوة...
كام دقيقه و لقينا صاحبتها رودينا داخله بالقهوة و أنا أول ماشوفتها أضايقت..!
حطت القوة و مشيت و أنا غصب عني فضلت اركز معاه و انا بشرب القهوة... و اخنا بنتكلم في تفاصيل الشغل لقيت الباب خبط و اتفتح قبل حتى ما كريم يقول ادخل...
و دخلت جودي... انا مش مصدق اني أخيراً شوفتها ولا مستوعب لهفتي عليها دي.. بس حاولت أبان طبيعي..
_كريم أنا مضطرة أمشي حالاً و عايزة أخد أذن ممكن..........
كانت بتتكلم بسرعة و تقريباً ماخدتش بالها مني بس سكتت فجأه و كأنعا خدتت بالها أني هنا و بصت لي و رجعت بصت لكريم بتوتر :
_احمم... أنا أسفه كنت فاكراك لوحدك معرفش أن معاك حد...
كريم بصلها و اتكلم عادي :
_في ايه طيب عايزة أذن ليه؟!
_أنهارده ماروحتش الجامعه و قولت ادي الروسومات بتاعتي لواحده من صحابي تسلمها و دي عليها درجات السنة... الروسومات ادلق عليها مايه و باظت فـلازم اروح الكلية أتصرف و ارسم غيرها بسرعه..!
_طب روحي و يبقا طمنيني، و خلي السواق يوصلك هو تحت..!
جودي بصتله و بصتلي بعدها ردت بسرعه و مشيت :
_حاضر سلام..
مشيت بس أنا مابقتش فاهم حاجه...
ايه اللى بيحصل..
_هو أنتَ تعرف جودي معرفه شخصية؟
قولتها لكريم و شربت قهوة ممكن أوقف توتر و قلق و تفكير
_ايوة جودي تبقا أختي..!
قالها ببساطه خلتني كبيت القهوة اللى في بوقي عليه من صدمتي..!
أخته..