رواية سجين الحب الفصل الرابع4بقلم زهراء الحريري

مهنــــــــــــد

‏كون اضمك ضمت اغراض العجوز هيج كون بروحي اريدك تنعكد وكون اكض عيوني وشمرهن عليك حتى اشوفك يمي كل ما تبتعد

تــــــرتيل

احببتك كـ حب البجعة، مرة واحدة والى الأبد

••----------♡------------♡------------••

كملت العشاء باوعت عليها واكفة تسوي بعشاها ما تتعشى ويانه دائما تعزل صدور الدجاج وتسويهن لو صاج لو ريزو لو فاهيتا وڪل ليلة تسويلها اكله سمنانة على هاي الاكلات مرات امنعها وابوها مايقبل يكول شتردين منها خليها تاكل اللي تريده

لابسة تراك وعادتها دائما اطبك اطراف البجامة مطلعة حجل رجليها الضايع لمعته من لمعتها جلدها

سمـر:- عسولاتي

صدت عليه وهي تهز راسها تبعد كذلتها من وجهها 

ـ ها ماما 

ـ ابن عمج على جية لبسي دشداشتج وشالج

ـ صار 

راحت تركض لغرفتها دك الباب صحت ماما حمادة افتح الباب لاخوك 

اجت تركض وهي تعدل بشالها ووكفت تكمل نزلت رداناتي وطلعت 

سمر:- هلا بالغالي ابن الغالية 

عاف كتف احمد واجى عليه باس راسي هلا بيج عمه شلونج 

بخير يعين عمتك شلونك 

تفضل لا تظل واكف 

دخلنا جوه وهو حاضن كتف حمادة كعد بالصالة نزلوا جهال كرم يركضون وامهم وراهم وكفلها باس راسها 

صعدت نزلت عشاهم للمطبخ آدم دائما من يجينا نجتمع كلنا وبالايام العادية كلمن يتعشى براحته على الوقت اللي يريده 

ـ حمادة يمه روح جيبلنا صمون 

راح احمد عيني على آدم دزيت الجهال وراء امهم تقربت عليه احجي بيني وبينه

ـ ها رجعت خاتونتك الهترة

ـ لا عمه ما رجعت

ـ ياا ليش مو سمعت اليوم المصكوع يرجعها

ـ هي تريد تبقى هناك 

ادحك عليه ضايج اجت بنان سكتت ماكدرت احجي وياه لان محد يعرف بيه يحبها كشفته وحدي وهو ناكر يكول يتصورلج ماكو هيج شي 

عسل:- شلونك آدم

رفع راسه ابتسملها كالها

ـ هلا هلا فستقة ... شلونج خويـة

ـ زينه 

اجت كعدت بصف بنان وهو دنك راسه يسد بجف ايده ويفتحه اتصلت على يونس استعجلهم بالجيه كال بالباب وصلنا وصدك شوية ودخلوا واحمد وراهم بيده علاكة الصمون وصمونه بيده ياكل بيها اخذت عسل منه العلاكة وهو كعد بصف آدم قسم الصمونه بينهم 

دنتعشا وعيوني على آدم ما يأكل بس يصفن انتبه عليه عمه كرم كاله اكل عمي 

هز راسه وياكل لكمه ويصفن فترة يلا يرجع ياكل اللي وراها رفع راسه اجت عيونه على عسل ابتسم مد ايده كاله

ـ فستقة انطيني الببسي 

ردت عليه

ـ شاربه منه انتظر عندي مامفتوح هسه اجيبلك

ـ لا اريد هاي 

انطتها اله كالها:- ممنوع بعد تشربين ببسي وغيره من المشروبات الغازات

ڪتله اني

ـ يعمر عمتك الله ويدك تارسة الثلاجة 

دحكت على يونس وكملت

ـ هي وابوها وهاي يومية ما تتعشى اذا مو قوطيتها بيدها

آدم:- هسه اخذه وياي كله ما ابقيلها منه

دحك عليها يحجي وياها وهي دحك على ابوها وتضحك اعرف بس يطلع ترجع ادز ابوها يشتريلها 

آدم:- لا خوية اني احجي لمصلحتج وخوفي عليج لا يصير عندج سكر وغيره من الامراض لا سامح الله 

اعرفج عاقلة وتاخذين بالحجي

بعد الليلة ما تشرب منه مو فستقة؟ 

هزت راسها أي ابتسملها وهو يكلها الله يحفظج 

كعدوا على القنفات يسولفون وياه على المجمع الطبي، وبنان وعسل بالمطبخ ينظفن آدم صد على احمد كاله

ـ الوالدة زعلانة منك 

ـ ليش كل شيء ولا زعل أمي

ـ ليش ما تمر عليها

ـ احجي وي عمامك مستغليني جيب وودي على طول اليوم مشغليني بالطلبات 

ضحك ادم وكال باجر تعال عليها وانتبه من الدراجة لا تستعجل بيها كثرانه حوادث اهل التوصيل بسبب الاستعجال بتوصيل الطلبات 

دك تلفونه طلعه من جيبه 

ـ هلا عمي 

تمام هسه اجيـك

لا ما اتاخر دقائق

نهض من مكانه كال يلا اني اترخص منكم 

يونس:- وين عمي بعد وقت ما شفناك

آدم:- اريد امر عمي لؤي اخذ منه فلوس الاجهزة

••----------♡------------♡-----------••

دخلت لبيت عمي لؤي حتى اخذ منه الفلوس، عمي آصف وسراج فلوسهم ما تغطي ڪل التكاليف، مهند جابلهم واحد على معرفته ماقبلوا يشاركونه كالوا ماكو غير لؤي يدخل ويانه بالشراكة حتى نتجنب المشاكل مستقبلاً

بالبداية جان رافض يكلهم كافي ناسبتكم وطاح حظ حظي انوب اشارككم حتى ينغسل صبغي ما اعرف شلون كدروا يقنعونه بعد اصراره بالرفض

كعدنا بالاستقبال اجت عمتي درة نهضت سلمت عليها واني ابوس راسها كعدت وهي راحت جابت الضيافة عمي لؤي كاعد كبالي رجل بالكاع ورجله الثانية مصعدها طابكها بالطول ومرتجي عليها يدحك عليَّ بنظرات شــــك ما اعرف شعنده

لؤي:- عمتك ما حصلت منها ومن اخوها بس التعب لا جابتلي توم مثل الارانب ولا طلعوا جهالي انكريز طلعوا جلحان ملحان على جهرتي

خزرته وهي تطلع ضحك ويصيح وراها 

لؤي:- هاا أرنوبة اليلة مطرود

اروح اتوسد راس اخوج وانام 

اخذت العصير واني اضحك كتله

ـ شبيهم ماشاء الله عليهم 

الله خلقهم بأحسن صورة

مو مهم جمال المظهر المهم جمال جوهرهم واكيد مثلك 

لؤي:- لا خطبت زمزم من ابوها لابن اخوي بلكي هالمرة تكعد ويانه ويتعدل النسل ويطلع انكريز

طلع العصير من خشمي اختنكت عفت الكلاص وطلعت كلينكس امسح بوجهي واني اكح

ضحك واجى كعد بصفي محاوط اكتافي بيده

ـ اييييه شجابك على عشك الزغيرونه شورطك بيه 

ـ ياعشك هذا بس فاجئتني 

ـ يعني اخطبها لابن اخوي

بقيت ساكت امسح بقميصي ضحك كام جاب الظرف ورجع عليَّ 

ـ هذا نص من المبلغ الباقي عليَّ 

وكم يوم وادبر الباقي 

طلعت الفلوس احسب بيها وهو يدخن وصافن عليَّ

توقفت من كال 

ـ عمك اصف شاك بيك مساع جنت واكف يمه 

انت عزيز عليَّ اخاف عليك منه وهو هالايام مستجلب كلش ومدري شعنده يتخشخش الله يستر من ضمايمه

تنهدت ورجعت احسب بالفلوس بدون ما اجاوبه وهو هم سكت عني اني اعرف حدود الله وما متعديها لا رفعت عيني عليها ولا تجاوزت الحدود الأخلاقية وياها

والمشاعر لا يؤاخذ عليها، يؤاخذ على الڪلام والأفعال وحبي الها طاهر ما اتبع الهوى بيه بالعكس اتبع بيه تهذيب النفس وغض البصر والصبر 

رجعت للبيت دخلت جوة هدوء شفت امي كاعدة بيدها تلفونها صافنة عليه تقربت اريد ادنك ابوس راسها شفت صورة شمس وصافنة عليها ودموعها تصب

بستها براسها شلونج يالغالية

مسحت دموعها وهي تجاوبني 

ـ هلا امي حبيبي

ليش تاخرت 

ـ من بيت عمي ورحت على عمي لؤي وبعدين مرت على مهند كعدت يمه ساعة واجيت 

اي ليش كاعدة وحدج عجل ابوي وقمر وين؟ 

ـ راح يدفع فلوس الامبيرية وقمر جلبت الا تروح وياه طمعتوها انت وابوك

آدم:- تدلل أميـرة بيتنا 

••----------♡---------♡------------••

نفـــــــــــــس 

دخل آدم لغرفته واني بقيت بمكاني منتظرة رجعتهم رجعت فتحت التلفون اباوع على صورتها ما مر يوم ونسيتها شمس باقيـة غصة بصدري لا نسيتها ولا نسيت نظرات امها الاخيرة 

دخل ارغد وقمر تمشي كباله فات للغرفة حتى ينام وبعده على نفس البرود من اشوف هيج انقهر وحتى نفسيتي تتعب، بقيت ويا قمورة الى ان نامت يلا دخلت للغرفة غيرت ملابسي وتمددت على السرير حسيت بيه بعده مانايم مشيت جف ايدي على ايده 

ـ بـعدك كاعد 

رد وهو مغمض عيونه 

ـ جاي احاول أنام 

تقربت منه فتح عيونه مشيت اصابعي على لحيته هاي حركتي المفضلة ومكاني المفضل

ـ من اشوفك بهذا الحال اتعب واحس ينطفى كل شي بداخلي والله، احس روحي ضايعة انت ملجأ لروحي ارجع واكولك انت عشيرتي ووطني 

رفع ايده مررها حاضني بيها، باسني بجبيني

ـ اعتذر لان تعبتج بدون قصد من بس هالشي خارج عن ارادتي اغار عليج حتى من ذكر اسمه كبالج، وآدم الله يسامحه ما مقصر مسوي اسمه مثل المنبة بالبيت اسمعه أڪثر من السلام عليكم

رفعت راسي من رقبته كتله بتفهم

ـ اني باجر احجي ويا آدم بس لا تظل هيج بارد مو آرغد اللي اعرفه

ـ لاااااا 

ما اريد آدم يعرف 

ـ لعد والحل نبقى هيج؟ 

رجع راسي حضنه لصدره شميت عطره واني اتنهد كتله 

ـ أحبـك لحد كطع النفس 

دخل اصابعه بين خصلات شعري وهو يحضن راسي بقوة 

ـ الله ياخذني قبلج ولا يشوفني بيج يوم

ـ اسم الله عليك 

••------------♡-----------♡------------••

تمـــــــــاضر

اخذت البنات ورحت العصر على بيت اهلي امي وعمتي بالحديقة كاعدات سويتلهن جاي واكليجة امس سويتها عفت البنات يمهن ودخلت انظف بناتي كل ما يجن هنا يلعبن لعب ومحد يصيح عليهن ماخذات راحتهن كم مرة اوصي امي ولا يفيد عايفتهن براحتهم ومن الـــومها تكول فدوة الهن ونيسات البيت

دامسح بالاثاث واسمع البنات يجيني صوتهن من الحديقة بس كلمة احووو ابوووو (يبوو) 

عفت الملمع على المعرض وطلعت اريد اشوف شبيهن لكيت لؤي كاعد على الكرسي ياكل ڪليجة وينعى وبناتي ورا يكمزن احوو احوو بس نونه كاعدة تباوع عليهم، عمتي وامي نفس كل مرة بس يردن حجه حتى شكيت بيهن هن يخابرنه ويبلغنه سراج ما موجود 

ركضت اخذت تلفوني وطلعت عليهم اتصلت على سراج على الوات ساب كاميرا موجهتها على لؤي كال عوفيه اني اصلاً قريب من البيت بس انزل ثائر واجيڪم

لؤي:- سير علينا عاد بحلم سير علينا

يعمه يرد علينا كون المات يرد علينا

جاوبته عمتي فدوة لحلكك يعمه

لؤي:- وينشف بجينا تكف دموعنه وينشف بجينا

ـ خاااايب عمه شينشفها بعده اهييي اهيي

لؤي:- يعماتي الروحه حنينه شال ومشه الروحه حنينه 

ـ اي ولك يمممه مشه وماله رده 

لؤي:- والله خلاف عينه يعمه ضلمه دنيانه خلاف عينه

نفتح الباب ظهره على الباب مايشوف دخل سراج، امي وعمتي بسرعة سكتن يأشرله اسكت وهو عبابه متفاعلات وياه وبناتي يكمزن وراه ويقلدن بيبياتهن بالبواجي وهاي رزان خوش تجرها باهيييييئ 

لؤي:- عمه ونكعد وياه هم يرد ونكعد وياه

لزمه سراج من كتفه ضاغطة على الكرسي

سراج:- افاا عليك يخوي تريد تكعد وياهم جا مو تدلل هسه ادزك للمكبرة حتى ارتاح منك ومن سوالفك

شبعه كفخات باثنين اديه تصعد ايد وتنزل ايد على ظهره وعلى راسه يريد ينهزم والبنات معرشات برجليه يخاف يسحكهن وسراج يكلهم حيل يبعد خالجن عاونني عليه هالسكط

لؤي:- ولجن وخررن منعولات الصفحة خلي اكومله وخرررن اشتعلوا

سراج:- لا صدك حكك عليَّ اني مقصر وياك ڪلش واليوم اموتك على ايدي وانهي اشتياقك للموتى 

لؤي:- اخذك وياي وعلي ما اعوفك ولك وخر هاي جزاتي مونسهن عجايزك صاير بيهن توحد من وراك 

دفع البنات وكام على سراج ومكافخ اثنينهم واحد قيد ادين الثاني وصار مناطح بالروس ودفرات بالرجلين وضحكهم واصل للشارع 

دنكت على تلفوني يدك شفته علي جاوبته 

ـ ها يوم علاوي

ـ يمه تعالي بسرعة للبيت مهند وابوي علكت بيناتهم وما اكدرلهم وحدي

اسمع صوت مهند يصيح بعصبية وثائر يرد بأستفزاز وبرود

علي:- يابه انعلوا الشيطان 

كولوا يا الله 

شجاكم سموا بسم الله

مو تعبتوني هسه اهجك من العراق ڪله بسببڪم

مهند انت شبيك اسكت يا اخي اسكتت لا تنسى الواڪف كبالك ابوك

اخذت عباتي ما ادري شلون لبستها دا اطلع وصار كبالي سراج اذان وياه واذان ويا التلفون

سراج:- شكو شصاير؟ 

تماضر:- مهند وثائر اكو غيرهم لازم يوميه حفلة ومهرجانات مسويلنا

طلعت بسرعة من بيت اهلي دخلت لبيتي اصواتهم تلكتني بباب البيت 

مهند: اسألني ليش وافقت عليها؟ 

ثائر:- الف مرة رجعت عليك وكتلك بابا متاكد من قرارك وهسه تريد اسألك ليش! 

مهند:- انت السبب لا تباوع عليَّ هيج اي بسببك ما خليتلي مجال للتفكير والرفض

كل يوم لـوم ودائماً تحسسني ما أفتهم واختياري غلط انت وحدك تعرف مصلحتي كل مرة تصغرني كبال نفسي وكبال الكل وافقت حتى أسكتك مو لان اريدها

كل مرة اكول أقتنع بعدين وأتقبلها ويا الايام بس لا كل ما اڪعد وياها لو احجي وياها اتصال الكى نفسي رافضها 

بسببك وبسبب ضغطك دا أظلم البنت اللي تستحق واحد رايدها بقناعته مو جابر نفسه حتى يرضي ابوه، 

بسببك عايش بتأنيب ضمير 

انت ماعليك اني اروح وحدي واعتذر منها ومن ابوها وافسخ هالخطبة ما اريد اظلمها اكثر الخطأ اللي سويته حتى أرضيك اني اصلحه حتى ارضي ضميري

ثائر:- وشنو عبالك من تفسخ خطبتك منها اروح اخطبلك ترتيل 

اكلك هالبنت ما تفيددك ما تفيدك الف مرة كتلك هاي حقيقة اهلها 

دفر الطبلة اللي عليها لابتوب وڪتب ابوه 

مهند: ومنو نصبك قاضي على الناس؟ شدخلها بيهم ليش تحملها ذنبـهم

ثائر بعصبية تقدم على مهند اجى يضربه بسرعة لزم ايد ابوه وهو يقرب وجهه اله يحط عينه بعينه 

مهند:- لا تخليني انسى الواكف كبالي ابوي وانسى الاحترام

ثائر:- وانت خليتلي احترام

مهند:- وانت شنو خليتلي؟ 

من سنين ما تشوف بيَّ غير الغلط إذا اختلفت وياك اصير قليل أدب واذا رفضت قراراتك أصير عاق 

سحب ايده ثائر وهو يدفع مهند يبعده عنه 

ثائر: لا تحملني فشلك أني دليتك على باب بس القرار جان الك وهسه تريد تسوي نفسك الضحية وتكول واني الظالم

مهند:- اي جبرتني وخليتني ضعيف شخصية كبالك كل ما أختلف وياك تحسسني رأيي تافه وصلتني لمرحلة الموافقة على ارتباط ما اريده لان تعبت من محاربتك اليَّ

تعرف شنو اكبر مفارقة بيك؟ 

نجحت تكون دكتور نفسي ناجح لكل اللي يجوك تسمعهم وتحتويهم 

أشر على صدره وصوته يرجف من القهر

مهند:- الا ابنك ما سمعته ولا احتويته خيرك بس للغريب

بره هذا البيت الكل يشوفك الدكتور ثائر الناجح، الا اني اشوفك انسان فاشل 

ضربه راشدي دار وجهه بيه على جهه، علي واكف بمكانه ساكت واني هم تعبنا من التدخل بينهم بلكي هيج يوصلون لنقطة تفاهم 

حجى بألم وهو يلزم وجهه مهند يدوره عليه

ثائر:- صدك اني اب فاشل لان ما عرفت اربيك 

دخل سراج سحب مهند كاله روح اطلع يم خالك لؤي بالباب منتظرك 

يباوع على ابوه ويتنفس بعصبية كال له

مهند:- لانك ماعرفت تحتويني

اخذه علي وطلعوا، كعد ثائر وهو يلزم صدره يفرك بيه بألم

سراج كال خوية جيبيله كلاص مي 

رحت بسرعة طلعت المي بالثلاجة وبيه اقراص ليمون دائما اسوي لثائر صبيتله منه واخذته اله شربه وهو يكول رحم والديج 

سراج:- ما تكلي شبيكم 

صدك تحجي ابو مهند هذا انت الجبير واحنا نتعلم منك شبيك ويا ابنك؟ 

يحجي ثائر بعصبيه وهو ياشر على صدره

ـ لا يحترمني ولا يكول ابوي، يوكف وياي طول بطول ويتجاوز بالحجي

اليوم قلل من احترامي باجر توصل بيه يضربني

سراج:- لا مايسويها صح هو صاير عنده طفرة وعصبية بس ما توصل بيه يمد ايده عليك 

مو رجعنا سوة وعيني الله عليكم شصار وكلب حالكم؟ 

دنك راسه ثائر ولسه على نفس العصبية 

ـ اخطبله بنت الحسب والنسب وهو بعده يركض وراء وحدة جدها ارهـ..ابي وابن عمتهم واحد مغـ...

سكت قبل لا يمكلها، تنهد وهو يڪوله

سراج:- والبنية شنو دخلها بجد أهلها وابن عمتهم ليش تحملها ذنب مو ذنبها وابوها وعمامها وخوالها والنعم منهم معدنهم أصيل صار كم سنة من عرفناهم ما طلعت المو زينه منهم 

ثائر:- والرسول عليه افضل الصلاة والسلام يكول اختاروا لنطفكم، فإنّ الخال أحد الضجيعين 

سراج:- صلِّ الله عليه وعلى آله

ثائر:- ليش الرسول كال هيج؟ لان الزواج مو بس زوج وزوجة هذا نسل وذرية بالمستقبل تجيب أولاد والطبع والأخلاق والصفات الوراثية تمشي بالنسل مثل ما تمشي الملامح

اني أخاف على أحفادي أخاف يورثون صفات من اهل امهم الشرع وصى نختار من البداية الاختيار الصح

اني ما اباوع بس للبنية لا اباوع للجيل اللي يطلع منها واخاف باجر يجيني حفيد بصفات جدهم وابن عمتهم 

سراج:- صلِّ على محمد وآل محمد

ثائر:- اللهم صلِّ على محمد وآل محمد 

سراج:- ابو مهند الحديث وصى بحسن الاختيار مو الحكم على الناس بأخطاء أجدادهم إذا نفسرها بهاي طريقتك جا محد يزوج بعد وانتهت البشرية

كل عائلة بيها الصالح والطالح وحتى بيوت الأنبياء طلع بيه المؤمن وطلع بيه الكافر لو جانت الطباع تورث بهالشكل الحتمي جان ما شفنا ولد صالح يطلع من بيت فاسد ولا ولد فاسد يطلع من بيت صالح 

البنية نختارها على أخلاقها ودينها مو نظلمها على ذنب جدها غيرها الله سبحانه وتعالى يكول ولا تزر وازرة وزر أخرى إذا رب العالمين ما حملها ذنب غيرها شلون احنا نحملها ذنوبهم ونحكم عليها 

ومال نخاف من إنسان لأن واحد من أهله طالح هذا مو عدل وياخوية جا التربية شنو دورها وعندك اكبر مثال الدكتور آدم 

تنهد ثائر وهو ينفخ الهوا من حلكه واعرف ما مقتنع بكلام سراج وقفل راسه على رايه وحكمه السابق

ربت سراج على رجل ثائر وحجى وياه بمحاولة اقناع للمرة الثانيـة

ـ لا تخسر ابنك 

ومهند خوش منهد ضغطك عليه والملأمه وصلوا لهاي العصبية وحقه هو بشر مو حديدة 

واخذها نصيحة من اخوك الزغير لا تكرر تجربتك الاولى بأبنك مادام ماله نفس بالبنت لا تظلمونها باجر لا انت ولا ابنك راح تتحملون نتائج زواج فاشل هي اللي راح تتحمل أغلب تبعاته وتدفع الثمن 

طلعت حتى اشوفهم، مديت راسي من الباب لؤي كاعد على بنيد سيارة ثائر ويسولف عليهم ومهند بعدها العصبية والقهر واضحات عليه

طفر من على السيارة وهو يكولهم

لؤي:- تعالوا وراي خلي اكمل نعاوي لعجايز سراج بعرضي طاكهن توحد بسبب سراج زليخة

رجعت جوة اسمع سراج يحجي بأقناع بعده

سراج:- نروح سوا لابوها ونحجي وياه ونفهمه ونعتذر منه قبل لا تتعلق البنية بابنك وتصير الخسارة عليها اكبر 

ترى فسخ الخطوبة اليوم رغم صعوبته والاحراج أهون بألف مرة من الطلاك بعد سنة سنتين، لو زواج مستمر بس اثنينهم يتعذبون بيه طول العمر وأحفادك اللي خايف عليهم وانت دكتور وتعرف اكثر مني بالمعاناة اللي راح يواجهونها

لا تظلم ابنك باجباره ولا تظلم البنية بزوج گلبه مو وياها دخلتوا عليهم بالمعروف اطلعوا منهم بالمعروف والله يعوضها ويعوض مهند بالخير

وافق ثائر على كلام سراج وصدك ثاني يـوم اخذوا مهند وراحوا لبيت البنية القلق ماكلني كل دقيقة اتوقع يتصلون ويكولون صارت مشكلة، الحمد لله ابو البنية كان محترم وعاقل تفهم الموقف وانفسخت الخطوبة بالتراضي وبدون اي خلاف وثائر أصر يدفع كل الغايب رغم رفض ابوها وثائر لسه يحس بالاحراج منه

واخر كلام بين ثائر ومهند بيوم رجعوا من اهل البنية كال لـه

ثائر :- اسمعني زين وافقت على فسخ خطبتك حتى ما اظلم بنت الناس وياك لا تنتظر يجي يوم واروح اخطبلك حفيدة الارهـ..ابي نجوم السما اقربلك منها مادام النفس بيه لا تتوقع اغير قراري

بعد هالكلام انقطعت كل جسور الصلح بينهم لا حديث ولا سلام يجمعهم واذا دخل واحد منهم لمكان الثاني يطلع منه ماكو تنازل بينهم بالعناد والمكابرة بنوا جدار صلب بينهم

اشكد علي حاول ويا مهند حتى يعتذر من ابوه على كلامه ماكدر يقنعه رافض يعتذر ويشوف نفسـه ما كال الا الصحيح 

••-----------♡------------♡-----------••

لــــــــــــــــــؤي

دخلت على مڪتب آصف لكيت اثنين كاعدين وياه مرتبين وقوطهم والرباط وذيج الكشخة الزينة سلمت عليهم وكعدت على صفحة 

آصف: يعني تشوفون اكو امل بقضيته؟ 

جاوبه واحد منهم:- مو أمل وبس اكو طرق قانونية ندخل بيها بس يحتاج صبر 

آصف:- واذا ما مشت؟

جاوبه الثاني :- الملف بيه نقاط تستحق المراجعة وهذا اللي راح نعتمد عليه 

رجع الاول كال له:- وبيه ثغرة قـوية تصب بصالحنا 

دنك راسه يكلب بأوراق الملف بين اديه سده ورجعه الهم 

كمل الاول:- وإذا مشت مثل ما متوقعين راح يتغير مسار القضية 

آصف: يعني متأكدين؟

ـ متأكدين من شغلنا والباقي على المحكمة

وهاي مو اول مرة نمسك مثل هيج قضايا بس نحتاج وقت وصبـر الاستعجال ما يخـدمنا 

آصف:- اعتمدت عليكم وإن شاء الله ما تخيبون ظني مثل اللي قبلڪم صار اڪثر من سنتين احاول 

ـ راح نسوي اللي علينا واڪثر

ـ باذن الله الأمور تمشي مثل ما نريد

وكفوا وهو همات مد ايده تطالس وياهم من طالعوا رحت كعدت كباله وانه اسأله

ـ من ذوله الجماعة

ـ ما تعرفهم 

عندي شغل ووكلته الهم

اي شعندك جاي لازم وراك شي

احازة ماڪو من هسه اكولك 

ـ ما اريد اجازتك ماصارت طلبت منك مرة وحده ذليتني بيها 

هسه خلينا بالمهم أجرت بستان جمعة وسبت بالدورة منطقة الخمسة دونم

ـ المن؟ 

ـ اني وياك وسراج وناخذ الشباب ويانه تنوس طلعت روحي من البيت للدوام 

ـ اي شكو بيها خوش فكرة 

مديت ايدي كتله يلا جيب الفلوس

ضرب ايدي مرجعها وهو يكول

ـ والله ياذيبي الاسمر الفكرة فكرتك وانت اللي أجرت ادفع وحدك لو روح لسراج يدفع وياك اني ربع مايطلع من جيبي 

ـ ليش تخليني اخليك تدفع فلوس الايجار والمسواك وحدك، ابو الصوف جيبهم بالتي هي احسن 

رجع ظهره على الكرسي يباوع عليه بتحدي وهو مبتسم ابتسمت وكتله

ـ جا خوش انت اللي ردتها 

طلعت من مڪتبه اتصلت على الشباب عزمتهم كتلهم الجمعة الصبح نطلع علي كال نروح بسيارة وحدة صديقي عنده ستاركس اخذها منه

ليلة الجمعة اخذت علي وراحنا تسوكنا والسيارة رحنا جبناها والصبح افتريت عليهم لكطتهم مثل الواوية

رحت لبيت آصف صعد واني اكله ياهله بالنسر وجثير الهلا 

رحت على ولد ثائر اخذتهم واني ارحب بيهم ياهلا بالاغا منهد والريس علي وجثير الهلا عمي

دكيت هورن لسراج اجى صعد واني اكوله ويا هلا بسراج زليخة وجثير الهلا

سراج:- اطلع لا اشك حلكك مو محترمك ليش تخليني اهينك مو كتلك خليني اخر واحد 

لؤي ليش تتونس بشوغة گلبي؟ 

آصف:- يابة شكو شبيك خالي اني زليخة بس اهجد

طلعنا لبيت آدم هو البعيد عنا وسراج البارحة خابرني واني نايم كال تجيب ادم يلا تجيني واني والله نسيت ومالي قصد بيها هذا صويحبي شلون اتونس بعذابه ماكدرت ابررله كبالهم

ضجت من موقفه وياي شلون اتونس عليه واني شهدت على ذاك اليوم من عرف بيها ردت لارغد بجى بواجي واحد نفجع بكل اهله كلت هاي هيه الزلم راح يموت على هالنوح والبجي گلبه راح يوكف

ومن بعد ذاك اليوم لاذكر اسمها كبالي ولا جاب طاريها اباوع عليه بالمراية يباوع على الطريق بأنزعاج

لكينا أرغد بالباب هو وبنته شايل علاكة صمون يريد يدخل للبيت طلعت راسي من الجام واني ساند ايدي على الاطار

ـ هلا والله بعين الصگر شلونك ابو آدم الورد

اجى عليَّ وهو مبتسم مد ايده تطالسنا

ـ هلا بذيبنا الاسمر شلونك خوية 

ـ زين بشوفتك 

تعال ويانه

كتله من باب الاصول واعرف بيه ما راح يجي بس كلمة التنكال

أرغد:- غيــر مرة ان شاء الله 

لؤي:- وهاي الدبدوبة ما تجي ويانه

ـ ترحين وي عمو

كالت لا 

لؤي:- ارفعها الي خلي ابوسها 

شالها الي بستها وهي بسرعة ضمت راسها بصدر ابوها اصف والولد نزلوا سلموا عليه كتله هاي البطيطة ترى محجوزة لابني 

ارغد:- اذا الهم نصيب ليش لا وين نلكى احسن من ابنك 

لؤي:- اي والله وهيج وتعدل النسل 

مو مثل اخت ذولاك الناس 

آصف:- والله اذا ما تسد اثمك الا اربطك فوك السيارة

لؤي:- شحدك 

ولو خبيث ماكر تطلع منك 

اسفي على الايام والعشرة ضاعت على الموخوش

آصف:- راح يذلني هاليومين 

اجوا حتى يصعدون، سراج بقى كاعد مانزل وياهم باوعتله بالمراية صـافن على البنية طلع آدم رجع ابوه عليه وبنته تمشي وراه 

آدم:-: ها يابة ما غيرت رايك وتجي ويانا 

أرغد:- لا بابا يلا روح ويا ربعك وان شاء الله غير مرة

سراج:- يلا لؤي تأخرنا

باوعت عليه بالمراية خازرني صحت على آدم 

ـ يلا باشا تعال اصعد راح يحترك شيب اهلي

باس راس ابوه ودنك على اخته باسها بخدودها واجى صعد وهو يسلم علينا واحد واحد كعد يم سراج وأرغد يباوع عليهم حركت السيارة واني ارفعله ايدي بالسلام رفع ايده وبنته تقلده 

هسه شغلت ياس خضر امشيا يا هوى مد جسمه المثقف طفاه وهو يكول

آدم:- والله انزل 

لؤي:- جا شلون بله نخلصها واحد يباوع للثاني

آدم:- اطبك يمك اني انزل وانتم اخذوا راحتكم 

لؤي:- ترجع لمكانك لا اهدم سنونك

رجع لمكانه وهو يضحك وسراج يكله بس انت دواه باوعت على اصف طاك النظارات وكاعد جنه عنتر زمانه مديت ايدي اخذتها منه لبستها

آصف:- هو اني صوجي وكعدتك يمك

طلعت تلفوني بيدي وايد اسوق بيها ربطته بالسيارة شغلتلهم نعاوي واباوع على آدم فاتح حلكه 

لؤي:- ايدك اذا مديتها اكسرها

رفع اديه بحركة استسلام هالنعاوي من اسمعها لو من اروح للحجيات انعالهن عبالهم اضحك بيها مايدرون گلبي يبجي دم بس ما ابين اخفي اللي بالروح بالضحكة والمداهر

وصلنا للبستان رتبنا كعدتنا والاغراض والمسواك اني وادم وكفنا نشوي بالسمج والولد غسلوا الخضرة وباقي النواعم عليهم واصف وسراج كاعدين يسلفون ويثرمون بالطماطة والخيار

طلع تلفونه من جيبه على صوت رساله فتحها اباوع وياه ما منتبه عليَّ شسوي سوله بيه 

ـ هلووو 

دز هلا 

منو حضرتك؟ 

ـ اني زمزم

ابتسم وهو يكتبلها هلا خاتونه شلونج

دزتله صورة راس طلي بماي خابط وعليه بصل بعمرته وفصوص ثوم 

كتبتله طبخت باجة وذكرتك لان تحبها 

ـ يعني هاي مطبوخة؟ 

ـ اي وهسه طفيت عنها

كلت بگلبي ولي لا بارك الله بيج گلبتي معدتي 

كتبلها زمزم ناصبة عليَّ شنو؟ 

ـ لا والله ليش ناصبة عليك 

صوجي اني ذكرتك المتكبر 

باوعت على اصف لكيته يباوع بين تلفونه وبين آدم 

تمشيت عليهم سويت نفسي رايح على ترمز لماي وكفت وراء اشرب ماي باوعت على تلفون الملعون فاتح واتسابها بتلفونه ويقرأ شيكتبون 

رجعت على ادم جاي يدزلها بصمه 

ـ لا تاكلونها لا يصير بيكم تسمم 

شنو محد شافج وانتي اطبخينها وينهم عنج 

كتبت له البارحة جدي جابها والصبح طلعتها اني طبختها وحدي بيبي ماتدري نايمه اليوم مريضة 

ـ يلا مو مشكلة والله يشافي جدتج، المهم عرفتي لا تاڪلونها يصير تسمم لا سامح الله 

صورلها السمج اجى يدزه وبطل سد التلفون ورجعه لجيبه 

لؤي:- وعشك الزغيرة مثل الرمد بالعين احا عشك الزغيرة 

باوع عليه حركت حاجبي اله، هز راسه وهو يستغفر كتله ابوها فاتح الواتساب بتلفونها

آدم:- اي واذا ما مجاوز بشي 

يراقب الواتساب يراقبني ماعندي مشكلة مازال اعرف نفسي ما مسوي غلط

لؤي:- لا تاخذك الثقة الزايدة بنفسك، 

ابوها شراني وما يتأمن ماريدك تتاذه خوش بوية 

بالليل الولد واكفين لغاد يسولفون وبس ضحكهم اسمعه واصف ممطول على بطنه وطابك مخدتين جوا صدره ويباوع على فلم اجنبي بتلفونه باوعت على سراج متكتر مرتجي على ايد ليورة وايد ساندها على رجله الطابكها وصافن وحده

تدنيت عليه حطيت ايدي على جتفه

ـ العضيد

شنو زعلاني عليَّ؟ 

سراج:- بعد هالعمر مايسوة الزعل

لؤي:- اشو عاين عليَّ، وداعت الخذاهم تراب النجف نسيت ولا على بالي ومن اتصلت عليه جنت نايم وحاجيتك وانه اغفي 

ولك سراج انه اتونس على شوغة گلبك خايب هنه شوغاتك كلهن بوسط روحي ياڪلن 

دنك راسه وهو يرجع ايده الجان مرتجي عليها ربت على رجلي 

كـال بصوت مخنوك صار سنين ما سامعة

ـ بتها هواي تشبها

الجروح اللي خذت مني عمر واني انوم بيها اليوم كلها فزت بشوفتها

البنية تشبه ابوها وهو يڪول تشبهه باوع على الشباب ابتسم كال

ـ شوفهم كبروا كل ما تجي عيني عليهم اكول ضاع العمر يسراج اللي ربوا على ايدك صاروا زلم بطولك

ـ بعده العمر وبعدك شيخ الشباب اتزوج وعوض الفات جيبلك طفل طفلين

انت بس كول اي والله اجيبلك بت شيوخ 

هز راسه لا باوع عليه يحجي بغصة خنكتني وياه 

ـ روحي ماتريد غيرها 

حاولت وماكدرت 

تدري حتى اطباء راجعت بلكي انساها والتفت لعمري عجزت ما ڪدرت 

مسحت عيوني قبل لا ينتبهون علينا ابتسم وهو يكول هذا هو رضيت بالمكتوب الله يسعدها ولايمر حزن وفراك احباب عليها 

لؤي:- يابه وفينا ووفينا شڪثر وي ناس ما توفي

سراج:- وفيييينا

حطيت ايدي على اجتافه واني اكمل

لؤي:- وذانـه صارر بس الهم ووفيينا

لو بيـدي اكض دهري

سراج:- وافييييينا

لؤي:- ومن الطكات احطن بيه ميه

مهند جاب اخوه وادم واجى كعد كبالنا واصف طفى تلفونه وتدنى علينه

رفعت راسي حبيت سراج براسه ضحك وهو يربت على صدري

لؤي:- معلم على اللوعات گلبي 

تظل عيني بخيال اهواي ماراح ماراح

ماراح وردته يريحني بدنياي ماراح ماراح 

سراج:- يمعاي دوسن بالتكطع حيل 

لؤي:- يمعاي

سراج:- يمعاي وعلى گلبي لدكن بثنين اديه

لؤي:- يمعاي

سراج:- يمعاي ومثل جمع الثريا جان

لؤي:- يمعاي

سراج:- ولك مثل جمع الثريا جان يمعاي بنات النعش يبوية ڪل وحدة بنوية

سكتنا دنك راسه لازم تلفونه بيده ويثبت بيه بين اصابع رجليه

مهند:- ليش سكتوا كملوا

آدم:- خلي يسكتون كافي نعاوي لعبت نفسي

اجى علي يكله مو نعاوي واني صحت ريس علي ماي من يمك من باوعلي غمزتله حتى يسكت لا يخلص الليل محاضرات علينا الباشا 

كال سراج وهو على وضعه 

سراج:- هدمني يسير الگلب عندك 

صاح مهند هدمني 

سراج:- ولياليك سبني وهدمني 

مهند:- هدمني

سراج:- وعليَّه خفف عذابك هدمني هدمني نحيل انه كضيت بهجرك وهاي الاذيـة

آصف:- على الجرج

باوعت عليه مسدوح على بطنه رافع رجليه ومجتف اديه على المخاد

لؤي:- ليش انت هم عدك جرح 

اخذ باكيت الجكاير الكبال مهند وشمره عليَّ، اجى بكصتي صحت ولك يابوية طفت عيني اريد فصل 

كلهم ضحكوا وهو يصيح عار مايصيرلك شي كتله من مد ما ماشيتك صرت عار مثلك

كمت اغني وهم يصفكون ادم طفر وراح يتمشي لغاد من عدنا 

ـ واهنا يمن جنه وجنت 

جينا ووكفنا ابابك 

ولف الجهل ماينسى 

شمالك نسيت احبابك

فركاك ذوب مهجتي

ظليت بس امشي رسم

اهنا يمن جنه وجنت 

روحين لكن فرد جسم

تدري بنحولي شوصلت ع

جزان من شيل الهدم

يالصوبت گلبي بسهم 

لزمن تشد صوابك

سراج:- كافي ابوية عيب من الولد خلي يجي يكعد نجر بالمواويل وهو عباله نعاوي استغفر الله ياربي شلنا ذنب الولد

لؤي:- خـايب هنه اثنينهن عنده حرام 

صحت:- ولك آدم تعال اكعد بوية بطلنا طرب لخاطر عيونك

اجى كعد وهو يباوعلنا بعدم رضا وعرفت راح يخلصها علينا محاضرات كبل حطيت راسي بين مخدتين ونمت 

ثاني يوم العصر يلا ردينا لبيوتنا وقطيت اصف ذيج القطة الزينة فلوس أجار البستان والمسواك كتهن كلهن ما ناقصات ولا ربع وهو يتوعدلي اردها الك ما انساهه هاي الثانية وياك 

البخيل ماناسي فلوس العشاء من كعد ادم عندي يوم اللي عرف منو ابوه 

••-----------♡--------------♡---------••

اثيـــــــــــلة 

اول مرة بحياتي افـرح من يجي دوام المدارس اتصلت على زمزم 

ـ مزمز ماما باجر اجي اخذج حضري روحج هم يلا اجهزج للدوام 

ـ جهزت نفسي من أسبوع

ضجت بس ما بينتلها كتلها

ـ تمام خوش سويتي باجر اجي اخذج ما بقى للدوام بس كم يوم

ـ شنو بابا ما كالج نقلني هنا 

اني سمعت حجيها واني فقدت من الشوطة ما خليت بالحجي والغلط عليها وعلى ابوها وعلى نفسي وعلى اهلي فرفحت روحي وراسي موتني من الالم وجسمي كله يرجف وتشنج

اثيلة:- شنوووو السويته وياكم انتي وابوج واستاهل كل هذا منكم

ولج اني امج لو مررت ابوج وهيج جاعلتني غريبة عنج واخر من يعلم

ولج زمزم يجي يوم وتعضين اصبعج على هاي حركة گلبي 

خلي ابوج يفيدج انتي من طينتة ما اترجئ منج شي بعد اطلع گلبي واعضه اذا فكرت بيج بعد

ما اسمعها شنو تحجي وياي واڪيد ما تبررلي سديت التلفون، رحت للصحيات ذبيت من راسي ليما طلعت روحي غسلت وجهي والصحيات وطلعت كعدت برة اريد اتنفس ضاگ الهوا عليَّ 

رفعت راسي للسما واني اجر زيج دشداشتي حجيت بلوعة 

اثيلة:- ربي اني شنو السويته عندك وهيج يصير بيه ليش مكتوبلي الظيم وعذاب الگلب ليش هيج اتلوع

دنكت راسي ابجي عليها كلما اكول خلص رجعت لحضني تبتعد عني أڪثر

ـ ولج يمه زمزم ليش هيج وياي گلبج يحن على الڪل وما يحن عليَّ 

ماكدرت اسيطر على نفسي حتى اروح للصحيات ذبيت من راسي بالحديقة احس روحي طارت من بين اجنابي 

احس جسمي يفور من الحرارة ماكدرت انهض تمددت بمكاني ليما استقر وضعي نهضت غسلت وغسلت الطرمة والحديقة واني كوة شايلة روحي

دخلت جوه ڪوثر وصفاوي بعدهم نايمين كعدتهم خليت كوثر تسوي ريوك واني واڪفة وياها بس ماڪدر ارفع ايدي جسمي تشنج حيـل

من تريكوا وكملوا دزيت صفاوي يشوف منو من اخواله موجود راح يركض كولت لكوثر جيبيلي شي البسه اريد اروح لابوج واشوف بيش طالبني شنو اللي يريده مني

اجى صفاوي كال محد بيهم موجود كتله عجل كول لـ يمان يجيني راح وكوثر جابتلي ملابس ساعدتني البسهن 

ڪوثر:- ماما وجهج صار اصفر شلون كشر الليمون

اثيلة:- مابيـه شي روحها لامج يمكن هبط ضغطي هسه يستقر 

باست جف ايدي وهي تكعد بسدي ودحك عليَّ بقلق وخوف اريد احجي وياها وطمئنها ماكدرت راسي يفتر اريد اركض للصحيات ماسيطرت على نفسي تقيئت على ملابسي 

ما اشوف صرت بس اسمعها تصيح ماما فدوة شبيج ماما لا تخوفيني اسمع صوت يمان يكولها شبيها عمتي 

ـ عمه تسمعيني عمه

ولك مصطفى اركض صيح امي خلي تجيها بين ما اتصل على أبوي 

اسمع اصواتهم بس ما اشوفهم الرؤيا ضبابية بعيوني وراسي مثل المضروب حسيت امعائي تتقطع بسكين على كثر ما تقيئت واحس احشائي راح تطلع

••-----------------♥♥ -----------------••

نفــــــــــــــــــــس 

اخذني ارغد للمستشفى لكينا الكل واڪف كبال الطوارئ آصف واخوانها وسمر وامها ولتين حتى كوثر ومصطفى حاضنين ابوهم ويبجون 

سلمنا عليهم واحنا نسأل شنو الوضع وشكالوا الاطباء

باسل:- ما عرفوا شنو علتها

وخايفين عليها من الجفاف

باوعت عليها من الباب شادين مغذيات الها اثنين منا ومنا 

ظليت اباوع عليها بقهر ودموعي تارسه عيـوني اني اڪثر وحده اعرف شنو معاناتها وشنو اللي مرت بيه عيوني عليها وادعي بسري الله يشافيها وترجع بعافيتها لـ بناتها وابنها 

وما اعرف راح اعيش هذه التجربة واقوى منها ويه ابو بيتي اشهر سلبت مني طعم الراحة والنوم والاحساس بالحياة 

مر يومين يلا وضعها استقر وكدرت تنتبه افضل من اليومين الفاتوا 

بالبداية اشتبهوا التهاب بالدماغ بس الرنين والتحاليل استبعدت هذا الاحتمال

عرفت مرضها نفسي من كالوا كل تحاليلها سليمة ماكو مشڪلة عضوية اتصلت على دكتور ثائر ومن خلال اللي وصلته اله رجح اللي تعاني منه هو اضطراب الكرب الحاد طلبت منه يجي يشخص حالتها بشكل ادق

اثيلة جانت معرضة بنسبة كبيرة لهذا المرض من اول يوم زواجها من آصف الصدمات اللي تلقتها منه مو سهلة، رغم مرور السنوات ما تخطت اللي عاشته ظلت الذكريات تعيد نفسها عليها و تعيش نفس الاحساس اللي عاشته كانه بعده جديد

وصدمتها باخر الاحدث ويا زمزم جان الضربة القاضية الها حملت نفسي اللوم والذنب لان جانت تشكيلي من الاعراض شلون ماڪدرت اعرفه من البداية 

اجى دڪتور ثائر دا يسلم عليه وصفن على ترتيل اللي واكفة بالغرفة وسانده راسه بالحايط تباوع على عمتها بحزن

ثائر:- تبارك الرحمن احلى من الصورة

حقه يفقد عقله

عقلي ويا اثيلة ما فهمت شقصده سألته

نفس:- شنو ابو مهند؟ 

ثائر:- لا هيج بابا موضوع خاص 

أبتسمت كبرنا وبعده يخاطبني بكلمة بابا، دخل على اثيلة حجيتله اني بـ الاعراض اللي جانت تحجيها الي من اعراض جسدية ومشاكل نفسية وخوف وقلة نوم وضعف التركيز شاف فحوصاتها والدكتور المسؤول عنها بلغه ماعندها مرض عضوي 

كعد يحجي وياها بالتفصيل وبعد ما سألها عن الاعراض الحالية واللي سبقتها كال كل اعراضها تتوافق ويه اضطراب الكرب الحاد

كتب العلاج وكال من تخلصه بلغيني وهم بلغيني بكل المستجدات بوضعها 

ديطلع وصل للباب التفت على ترتيل اللي كعدت على السرير ولازمه ايد عمتها وهي تمسح بدموعها متأثرة بالكلام اللي سمعته أبتسم وراح 

استغربت شبيه لو ما اعرفه جان ڪولت حط عينه عليها استغفرت ورجعت على اثيلة طلبت مني اني وترتيل ما نحجي بمرضها لاحد وحلفت ترتيل ماتحجي اللي سمعته لاحد

••------------------ ♥♥ ------------------••

مهند:- السـلام عليكم

بقيت اباوع عليه بسرعة نزلت عيني طلعت القلم واني افتح السجل ما اعرف شنو دا اسوي المهم اشغل نفسي عنـه

كعد على المقعد المقابيلي رفعت عيني اباوع عليه والرؤيا غوشت من الدموع شدتسوي وشجابك هنا اسأله بداخلي وعيوني تتأمل بشعره واكتافه

دخل استاذ المادة اللي مسجلة يمه بعد السلام والسوالف مع الطلاب والشقى دا يكتب وانتبه على مهند سأله جديد رد اي كاله بس احنا متقدمين هواي بالمادة شلون بهاي الحالة رد عليه مو مهم هسه اكمل وياكم وبعدين ارجع على باقي الفصول والمواضيع كاله تمام براحتك انت اعرف

مجنون والله يعني مكمل صيدلة شكو راجع على ظيم السادس تنهدت واني اركز ويا الاستاذ جبرت نفسي اتناسى وجوده ما اريد يفوتني الشرح

سحب سجل من جنطتي ولا انتبهت عليه شلون فتح السحاب ظليت اعض بشفتي بعصبية وتوتر

شفته فتحه ويڪتب بيه عاصرة القلم بيدي واضرب بيه على خشبة مقعدي بعصبية 

ـ شبيج، ما جاي اسمع بسببج 

اعتذرت من البنية احس فقدت تركيزي بشرح الاستاذ ومدا افتهم عليه حسيت الدمعة بطرف عيني هذا اهم واصعب موضوع 

كمل الاستاذ وطلع ضميت سجلي واقلامي بالجنطة لبستها اخذت تلفوني وطلعت واني امشي سريع اسمع صوته وراي 

ـ ترتيل 

اوكفي 

هذا دفترج نسيتي

ما وڪفت كملت احس نفسي خايفة منه ليش هذا الاحساس ما اعرف 

ـ اوڪفي اريد احجي وياج، دقيقتين ما آخــــرج

ظليت امشي شبه اللي ارڪض اريد بس اطلع منا ما اريد اتصدام واحجي وياه 

قطع الطريق وهو يوڪف مقابيلي ماڪدرت ارفع عيني بعينه 

ترتيـل:- وخر عن طريقي رجاءً

منهد:- ليش؟ 

ـ شنو ليش وخر اريد امشي

ـ ليش اختفيتي بدون تبرير، وقطعتي التواصل بينا؟ 

حاولت اعبر وهو ساد الطريق واني لسـه ما رفعت عيني

ـ مهند وخر عيب من الطلاب اڪيد عيونهم علينا

ـ محد موجود بس اني وانتي 

رفعت راسي اباوع صدك محد موجود نسيت عندي درس فيزياء ياربي هم راح عليَّ 

منهد:- اهلج السبب

لو 

سكت رفعت عيوني اجت بعينة جان خازرني بسرعة اختلفت نظراته 

مهند:- كل مرة أڪول يمكن أهلها

وبعدين اڪول لا لو مانعينها جان لكت أي طريقة تخبرني وتخليني اعرف اللي صار وياها

ألـوم نفسي خـاف غلطت وياج لو ألــومج لان مشاعرج مو حقيقية مثل ما كالولي، تعبت من هالدائرة اللي افتر واتخبط بيها وحدي 

مديت ايدي لزمت السجل حتى اخذه ما تركه 

مهند:- جـاوبي شنـو السبب؟ 

اذا ما جاوبتي ماڪو النا طلعة اليـوم منا، احجي وخلصي نفسج من هالوكفة

باوعت عليه ورجعت دنكت وهو يلح احجي لا تسكتين لا تخليني أفقد اعصابي واني صاير مسودن بفضلج

حجيت بتلعثم وگلبي وانفاسي على رجفة وحدة

ترتيل:- أمـي اڪتشفت علاقتـي بيك

حجى بخـوف خوما أذتج؟ احجي شنو سوتلج ضربتج؟ 

هزيت راسي بلا 

ترتيل:- أمـي ما تضربني ومستحيل تأذيني بس حجت وياي وسحبت الايباد مني

رفع جفوفه ضم وجهه بيهن واني اسمع شلون ينفخ الهوا نزلهن وهو يحجي بعصبية

مهند:- وليش ما حجيتي ليش ما دزيتي رسالة من اي تلفون موجود بس ردت خبر منج ليش عفتيني مثل بلاع الموس ما اكدر ارد على أبـوي وتحريحه اليَّ 

عاف السجل نزلت ايدي واني لازمتـه 

ترتيل:- ما يفيـد العتب بعد انت خطبت وعلى طريق زواج واني نسيت ذيج المشاعر وبالي هسه ويا السادس 

ما حجى شي ابتعد عن طريقي طلعت واني اتصل على عمو كال شعجب طالعة قبل ساعة ونص اليـوم 

كتله تعبت وماڪدرت اكمل كال تمام نص ساعة اقل واني يمج

كعدت على المقاعد مدنڪة راسي وگلبي لسـه يرجف عصرت السجل بيدي تذكرت بالدرس هو يكتب بيه اخذني الفضول اقرأ شنو ڪتب فتحته اقلب بالاوراق الى ان وصلت للي ڪاتبة

ـ مدري ليش اتمايزك وردة گرنفل

اتيهه روحي بريحتك واحتار من ياصفحة اشمك 

سديته بسرعة رفعت جفوف اديه كبال وجهي طبكتهن واني ادخل اصابعي بين فراغات الاصابع

رفعت راسي واكف بعد مسافـة عني يباوع عليه وهو مبتسم والجكارة بين اصابعه رافعها يدخن بيها

أبتسمت واني صافنة عليه تذكرت وعدي لامي وخطوبته بسرعة دنكت راسي واحجي على روحي وألـومها

عمو دك عليَّ انطيته رفض ونهضت من مكاني بعده واكف مشيت من وصلت قريب منه دا اعبر وكال 

مهند:- شنـو انتي حجر مرجان لو وردة گرنفل ما أڪدر الا احبج

طلعت شبه اركض لا هيج هواي عليَّ عمي سيارته بالباب صعدت بسرعة خايفة يطلع ويشوفه وهو يعرفة متخرج 

ارسلان:- شبيج عمو خوما مريضة

ترتيل:- لا شوية تعب لان اسهر اقرأ

ارسلان:- موكلنا ممنوع السهر هيج تخسرين صحتج وتركيزج 

كتله ان شاء الله سألته شلونها اليوم عمتي اثو كال الحمد لله وباجر انطلعها 

ـ وزمزم يمتى تعرف امها مريضة خطية من حقها تعرف وتجي

ـ ابوها كال لا تحجولها هسه من يستقر وضع امها اروح اجيبها 

ظل مهند مستمر بحضوره لدرس الرياضيات ودائما يوكف بباب الصف من ادخل يدخل وراي مباشرةً ويكعد بالمقعد الوراي ومن ارجع للبيت وافتح السجل الكى كاتب شعر غزل جديد يمتى ياخذ السجل ويرجعه ما اعرف

بس اللي صدمني ما حجى عن فسخ خطوبته عرفتها بشكل عابر من كلام عمه درة وهي تسولف ويا عمتي بنان واني احفلهن وجوهن

عرف حسابي الانستا لكيته داز رسالة واخيراً حصلت حسابج يا احلى وردة گرنفل

ما وافقت على طلب المراسلة خليته معلق وركنت مشاعري على جهه لان عندي معركة مصيرية ويا السادس مو مال حب وهماتين مستحيل اخلف بوعدي لأمي واخسر ثقتها بيَّ 

••----------------♡♡♡----------------••

اثيــــــــــــلة 

كلت خلص بعد اقسي گلبي واستخدم وياها غير اسلوب اتركها لا اخابر عليها ولا اروحلها خليها تحس بقيمتي جربت كل الاساليب وما فاد بيها بلكي هالمرة تفيد القساوة 

بس للاسف جانت اقسى مني عندها عادي ولا كلفت نفسها تتصل عليَّ تا بوكعتي ما اعرف عرفت لو لا، صار اشهر حتى عطلة نصف السنة بلشت وباقي ايام وتخلص وهي ابرد من الجليد ناحيتي اسال أم آدم عليها لان تتواصل وياه بشكل يومي الا حظي اللي ماعرف يكعد وياها فرحت بقطع التواصل بينا الظاهر

اتصلت على آصف وتكاونت وياه وكتله هذا تعلومك تا تضغط عليَّ وارجعك رغم رفض ابوي

ظل يرجد بروحه شنو شايفتني واستغل بنتي وابعدها عندج تا ترجعيلي ترى عندي مليون طريقة اذا اريد ارجعج مستحيل اضغط عليج بجهالي بس ما فارغلج عندي شغل اريد اكمله 

بلش الفصل الدراسي الثاني وعلى نفس الوضع واني حالفة ما اتواصل وياه قبل لا تبلش الامتحانات النهائية تقريبا باسبوعين او اقل تفاجئت من دخلت عليَّ العيون حمر والوجهه محتقن والصوت مبحوح من البجي لكحت روحها بحضني وهي تبجي بصوت عالي قطعت انياط گلبي بصوت بواجيها نفجعت بيها شلون تبجي 

••-----------------♡♡------------------••

زمــــــــــــــزم

نقلني بابا لمدرسة قريبة وأجر لي خط ويا الطالبات قريبات، اول ايام لكيت صعوبة لان جديدة عليهم مو نفس صديقاتي بس اقل اسبوع وكدرت اندمج وياهن 

وضعي الدراسي زين صح مو نفس كوثر شاطرة بس يعتبر متوسط العصر يومية اروح على بيبي ام هاشم ابقى يمها لليل يلا يجي عمو اوس يرجعني تعلمت منها الطبخ اتونس وياها خاصة من تحجيلي قصص قديمة حبيتها وتعلقت بيها حيل ويومية نصور اني وياها حنينة ڪُلش 

صرت توب بالتصوير طول اليوم اصور وادز لـ ماما نفس ومرات ادز لعمو أرغد وآدم، يجاوبوني الا آدم اخر شي صرت ما ادزله هو مو صوجه صوجي اني اشوفه مناظر حلوة ابو خشم بابا مرة سألني ليش ادزين صور لادم 

كتله عادي واذا غير اخوي الجبير 

ظل يحقق وياي يغصغص بيه وكل شوية وكال لا تخسرين ثقتي بيج شنو معنى كلامه ما اعرف اني حتى الصور الي ادزها صور مو الي بس للمناظر الي تعجبني وصور للاكل الي اسويه ولدرجاتي للطيور لكل شي يصادفني

بيلسان أبداً بعد مارجـعتها لذيج الغرفة او الاصح الحفرة كله بالبيت تبقى، واني مداريتها وعلمتها على التواليت بس تسويها على نفسها اعاقبها مو ضرب ولا كلام بس اعوفها وما اشوفها وجهي تظل تفر ادور عليَّ بالبيت اللي صار تنظيفه على زوجات عمامي تا الطبخ على زوجة عمي اوس الغدا هي تسوي ودزه النا بس الريوك والعشا اني اتونس بيهم

عمي مجد ما اعرف شبيه وياي ومن يناديني انهزم منه اخاف يسويلي شي 

العادة اجتني وعادي طبيعية الامور اني اعرفلها من سوالف بنات المدرسة عنها ومن جنت اسأل ماما نفس تعلمني اذا اجتي شنو اسوي وشلون احسبلها ومن كتلها اجتي اجتني ثاني يوم محمله بالاحتياجات والملابس وفرحانة عبالك مسوية فد انجاز اني هي وڪل مرة من تجي وتشوف بيلسان احسها تضوج ما اعرف منها لو عليها ومثل كل مرة تحجيلي على امي اثيلة بس احس گلبي جلمود يصير من قطعت تواصلها وياي ما جربت اتواصل وياه احس نفسي باردة اتجاهه حتى ما حسيت بأشتياق الها يمكن حسيت تحررت منها ما اعرف شنو مشاعري جانت بالضبط بس ابد ما ضجت ولا احس بشي

كملت كتابة واقرايـة اتصلت على بابا اخذت الاذن منه مثل كل يوم حتى اروح لبيبي ام هاشم 

لبست صايتي صرت ما اطلع بدون صاية وكل من هاي الصايات الخليجية الزينة يجيبلي 

لكيت عمي مجد كاعد على كرسي بالشارع وهو يدخن ويلعب بتلفونه

من شافني ضحك وكال تعالي اريد احجي وياج 

نهزمت بسرعة بدون ما ألتفت عليه اسمعه يصيح انتبهي لا توكعين شبيج

دخلت لبيت بيبي واني الهث من الخوف والمشي السريع هو بالبيت ابد ما يطلع كبالي ولا يحجي وياي بس من اطلع للخط لو لبيت بيبي 

غسلت وجهي بالمغسلة الجبان خوفني، دخلت واني اصيح 

زمزم:- بيبي ياشيخة البيبيات اني اجيت 

صار كبالي رجال تقريباً من عمر بابا وهي كاعدة بصفه تبجي حاضنها وحاضنته من دخلت التفت عليَّ لحظات فكرته آدم لوما فرق العمر الواضح

هـاشم:- منو هاي التينة؟ 

                    الفصل الخامس من هنا