رواية بيتزا وشنب الفصل الثالث3بقلم شيماء يسري زهران
- ا.جنن صح؟
- ا.قلعي يابت بدلة أبوكي!
- جرا ايه يا ولية يا قر.شانة!كفاية غيرة ده أنتِ لو كنتي مخلفة كان زمانك معاكي قدي!
- يا ام لسا.ن عايز قصه غيرة ايه! ا.قلعي يابت البدلة بتاعت أبوكي هيبهدلك دي غالية بتاعت كاب كتابنا.
- كتب كتابكم؟ يا شيخة اوعي اتنيلي من وشي كتك الهم، يارب يتجوز عليكي ولية بومة، بقولك ايه احط حزام في وسطي؟
- شوف ام لسان طويل السا.فلة!
- طب ردي بس عليا ضروري.
- حزام في وسطك ازاي! هي بدلة رقص!!
- هي بدلة الرقص بيتحطلها حزام في الوسط يعني؟؟ هو اي هبد؟؟
- هو أنتِ ياختي اللي هتعرفيني بِدل الرقص بيتعمل فيها ايه؟؟ مش شايفة نفسك يا د.كر!
- لأ كده هنقل ادبنا وهتتاكلي علقة يا ولية أنتِ.
بعدت لورا وخافت:
- طب والله يا زلطة هجيبك تحت رجلي لو لمستيني.
- بس بس مش هقربلك متخافيش، قوليلي طيب ايه رايك في البدلة احط الحزام ده ولا لأ.
- اقلعي البدلة قولتلك دي غالية على أبوكي هتخرجي بيها!
- وبعدين معاكي؟؟ انجزي قوليلي ايه رايك في الحزام؟
ابتسمت في مكر وقالت:
- طب بقولك ايه، تعالي كده هاتي الحزام البني ده والطرحة اللي هناك دي.
ــــــــــــــــــ
|تحت البيت|
- ايه ده! ده ايه الأراجوز اللي نازل من عندنا ده!
- اراجوز!! سمعتك يابا.
- يامااا، زلطة؟؟؟ ايه ياض اللي انت عامله في نفسك ده!!!
- ايه رايك؟؟ نيو لوك محصلش مش كده؟
- نيو لوك ايه ياض! انت ايه اللي مهببه ف نفسك ده!
- جرا ايه يابا، اهو تغيير اصل ورايا مشوار مع البت صاحبتي زي ما قولتلك.
- وايه مخليك صارف ومكلف يعني ولابس بدلة و..
داريت وشي بكف ايدي وانا ببص بعيني، قال وهو بيمسك لياقة البدلة:
- ايه ده ياض، وريني كده، ايه ده ايه ده، بدلة كتب كتابي دي؟
- ها؟؟ كتب كتابك ايه بس يابا وحد الله.
- اطلعي يابت اقلعي البدلة دي.
- يابا البت معاها ناس عايزة اشرفها.
- تشرفيها ايه ده انتِ هتعريها بالكرومبة اللي على راسك.
- يابا بص حد بيسرق حاجة من المحل
بص وراه.
- ..امووواه اوعى يا عسل.
طلعت اجري.
- بت خدي هنا، طب وربنا لما ترجعي يا زلطة.
ــــــــــــــــــــــــــــ
وصلت ناهد قدام محل بابا بعربيتها، أدت كلاكس:
- ايه يا اونكل طلعت فين مرام؟
- نعم ياختي!!!! فين ايه؟؟؟
- في ايه يا اونكل؟
- دي قالتلي رايحين مشوار سوا!
- هي راحت فين يعني!
- معرفش جريت مني لقدام!
- جريت منك ليه!
- أنتِ هتحققي معايا أنتِ كمان هو أنا ناقصك! انت يا زفت ايه الشاي ده ناقص سكر.
طلعت ناهد تليفونها ورنت عليا.
- الو، أنتِ فين يا مرام؟
- انا على اول الشارع مستنياكي.
- ايه وداكي اول الشارع!
- ياستي انجزي بس.
لقيت اللي جاية قدامي وبتبص شمال ويمين:
- بسسسس
بصيتلي بقرف.
- جرا ايه! بتبصيلي بقرف عشان وقفتلك على اول الشارع!
- مرام!!!!!!! أنتِ اتجننت!!!!!!
مسكت البدلة وقولت بابتسامة:
- ايه رايك؟
- ايه ده يا مرام؟ عايزة افهم ايه ده؟ أنتِ رايح تعملي نمرة في حفلة على شط جمصة؟؟؟؟؟
- لأ بقى ده انتوا عالم جا.هلة، مالوا الطقم، قولت هشرفك.
- تشرفيني!!!! ايه ده يا مرام!!! لابسة بدلة رجالي بتاعت راجل عِجل!
- بتاعت طلعت على فكرة.
- مش قصدي يعني، بس بردو مش مبرر، وبعدين ايه ده؟ ايه الاشرب ده؟ لافة راسك كده ليه بجد!!!
- مرات ابويا قالتلي شكلي كده هيبقى شيك ع البدلة.
مسكت حزام وسطي وقالت:
- وحياة أبوكي ايه ده؟ حزام فساتين بناتي لفاه ع قميص رجالي؟؟؟؟ أنتِ يابنتي قاصدة تاكلي وشي النهاردة وتشربي وراه شاي؟
رقعت ضحكتي المتعارف عليها طبعا وفتحت كفي وانا بقول:
- حلوة يابت ناهد والله، خلاص بقى متزعليش، يمكن الاستايل يعجب الناس في المناسبة، ابقي قوليلهم اني من البرازيل مثلا او من اي بلد ودي عاداتنا في اللبس.
ـــــــــــــــــــــــــ
قدام الفندق، كان لابس عماد اليونيفورم بتاع مراد العجمي ومكتوب عليه اسمه، جمبه مراد ايده متجبسة وبيعرج برجله.
واقفين قدام الفندق، اتكلم عماد بنبرة خوف:
- هو انت متأكد ياعم؟
- ايه ده ايه ده!!! فينا من ده!!! دلوقتي هجيب ورا وتخاف!! بقولك المناسبة دي قبضها ماشاء الله كويس حرام يضيع.
- ماشاءالله ايه بس ده احنا داخلين ننصب.
- لأ وحياة امك احنا مش داخلين نسرق المطبخ احنا بس داخلين نسهل الدنيا وربنا شاهد.
- طب ما تدخل انت الأول؟
- يابني هتودي سمعتي في الأرض بغباءك ده لو حد شك فينا، ادخل الأول ازاي وأنت المفروض انك الشيف مراد دلوقتي وهتقول اني المساعد بتاعك بس ايدي متجبسة وتعبان شوية.
- طيب طيب.
قدام الفندق كنت واقفة انا وناهد:
- اوعى، ايه ده يابت، ده ولا برج القاهرة.
- وطي صوتك يا مرام.
- حاضر حاضر، هندخل منين بقى.
- من الباب ده، تعالي.
دخلنا الفندق، كان منظر تحفة اوي من جوا، اشي بلالين وناس اوبها وفساتين:
- يا ابوي!! ايه ده!! ايه النسوان المايعة دي كلها!!!
- مرام وطي صوتك!
- ياستي اسكتي بقى، الحقي البت لابسة ايه، يالهوي الحقي الحقي دي كمان.
- اومال لو شوفتي دي بقى، عاملة شنبها.
رقعت ضحكة، بصت الناس علينا، ضحكت ناهد وقالت:
- مرام، تعالي سلمي على بابا.
- يالهوي ده احنا عينينا.
- بابي، بابي..
- لحظة واحدة من فضلك، ايه يا حبيبتي.
- دي مرام صحبتي.
استغرب ابوها وقال بابتسامة فيك:
- اهلا وسهلا.
- اهلا يا باشا، راجل اوبهة بحق وحقيق ماشاء الله تبارك الله يعني.
اتحرجت ناهد وخدتني من ايدي تقعدني على الكرسي اللي هناك وقالت:
- ثواني اقعدي هنا وهجيلك.
لكن بعد ما مشيت هي قولت:
- واقعد ليه! اكيد المكان ده في اكل! يا ترى المطبخ فين!
كان واقف مراد مع عماد في المطبخ:
قال بصوت عالي:
- ياعم الناحية التانية، امسك عدل الز.فتة!
- ما توطي صوتك ياعم!!!
- أنا جيبت أخري منك مش عارف تمسك العجينة؟!!!!!!
- ولاااااا
- ايه ياضضضض هتشوحلييييي
- بقولك ايه انا مستحمل قرفك من الصبح عشان فلوس هتديهاني والله اطلع اقول حقيقتك.
- انت اللي منتحل شخصيتي يا حما.ر هبيعك.
لكن في لحظة صوتهم سكت بسبب حلة وقعت..اتخضوا..قال عماد:
- ايه الصوت ده؟؟ وربنا لو فيران هجري.
- فيران ايه يا مخ عجل اللي توقع حلل، يكون عفريت!
- نعم؟؟؟؟
- طب اكتم نشوف مين في المطبخ معانا..مين هنا؟
حاولت استخبى لكني قلبت بالغلط اكتر معالق وشوك، جري وشافني واقعة ع الأرض بتأوه:
- ااااه، مش قادرة الشوك والمعالق وقعوا عليا يابني.
- معلش يا حاج قوم قوم.
يالهوي ده هيمسكني من دراعاتي، بعدت عنه، شك فيا لما انتفضت ..لفيت.
- انت مين؟؟؟
- ايه ده ايه ده!!! هو انت تاني ياض!!!! ياض هو انت عايز ايه مني ياض!! كل شوية هتتمسى بعلقة؟؟
حرفيًا وشه كان مصدوم وهو باصصلي بعد ما عرف إن أنا ووشي مليان شوكولاتة من اكل التورتة.