رواية الوصية ونور النجع الفصل الرابع4بقلم ولاء عمر
ــ أنت اتجننت؟ إبعد!
ــ بعيد اهاه بس أنا زهقت من دي عيشة، كلها لف من وش الفجر، ده غير الحاجات اللي بتتفرض على الواحد زيها.
بصيت ليه وسألته:
ــ تقصد إني مفروضة عليك؟
ــ كل حاجة هنا مفروضة عليا، مفروض عليا أعيش في مكان بدائي، الناس في بدائيين لدرجة متتوصفش، البلد حلوة تتزار مش يتعاش فيها.
حط الشال جنبه بعد ما قعد على طرف السرير وقال:
ــ مضطر ألبس الجلابية طول اليوم عشان إيه؟ عشان ده الزي التقليدي بتاع المكان، مضطر أخد باللي أغلب اليوم من الزرع والأرض والرجالة اللي فيها، وأروح وأجي مع أبوي في كل خطوة وأقعد مع ناس عقليتهم غريبة، تخيلي شوفت واحد كان زميل ليا في المدرسة وإحنا صغيرين قعد يضحك عليا وأنا مش عارف اتصرف، ده غير إن الدنيا هنا بتجري قوي، ده عياله في المدرسة.
ــ هو أنت مش قولت إنك بتنسى وبترمي كل حاجة قبل ما تدخل من الباب؟
ــ مش عارف بجد over thinking مستفز.
ــ بتدخل كلام انجليزي في كلامك ومش مستني حد يتريق؟
ــ مش بتكلم كده قدامهم بس أنا بطلع الكلام هنا لأني عارف إنك هتفهميني من غير ما أوضح معناه.
ابتسمت وقولت له:
ــ تسمحلي أرد على جزء من الـ over thinking؟
ــ لو هيفرق تمام إتكلمي.
ــ خلاص إدخل غير علشان أنت بتنام وأنت قاعد وأنا أكون روقت الأوضة في السريع وهرد عليك.
شاورت له على غياره اللي كنت جمعاه وخدت وابتسمت وشكرني ودخل.
وأنا بحاول أعتاد على الروتينية وعلى القلبان اللي حصل في حياتي وكنت بفكر وأنا بروق الأوضة في حياتنا في النجع فعلاً..
خرج وهو رايح عند التسريحة وبيهتم بنفسه إهتمام مضحك بس حلو.
ــ بتضحكي على إيه؟
ــ متعودتش حتى أسمع عن راجل بيهتم كده! كريمات وبرفانات وحاجات تانية .
ــ هي دي كمان عيب في البلد؟ ده اللي ناقص.
ــ يا بني آدم أنت بتدور على أي حاجة تعقدك منها؟ أنا بهزر بس.
ــ بتلكك علشان أمشي .
رش من العطر بتاعه وسرح شعره وساوى دقنه وبعدين قعد وقال:
ــ يلا كلي أذان صاغية أهو على الأقل بسلي نفسي بدل الزهق ده .
ــ ماشي هجاوب على أول واحد وهو إنك مش حابب تلبس الجلابية على طول، I think إنك تعرف إنها اسمها جلابية صعيدي.
ــ هنبدأ نتريق؟
كنسلته وقولت وأنا بكتم الضحكة وقولت:
ــ كل مكان ليه هويته، وإحنا كـ صعيد هويتنا بتتمثل من البداية كـ مظهر خارجي في اللبس، يعني من الطبيعي إن أي حد هيشوفك هيعرف إنك من الصعيد من غير ما يتكلم معاك ده بس بمجرد إنه شافك، ما بالك هنا، الناس هنا بتحب تتمسك بجذورها علشان كده متمسكين في الجلابية.
ــ بس مش كده بجد..
ــ دي أريح من الاطقم بس أنت اللي بتلكك.
ــ بالله أنا قاعد بسمع ومش هرد .
كملت:
ــ أما بالنسبة للأرض فـ دي أرضكم يا زيدان، مهما كانت الناس لتقوم بشغلها فيها بس ده مجرد شغل بيتقاضوا عليه أجر، عمر ما حد هيخاف على الحاجة طالما مش بتاعته، علشان كده عمي حابب إنك تأخد بالك من الأرض معاه.
ــ اشمعنا أنا؟ ليه ما اختارش حد من إخواتي الأكبر مني؟ ليه أنا اللي اتجبر من بينهم أقيم في النجع بشكل دائم؟
ــ يمكن علشان هو مستقربك أكتر منهم، ويمكن علشان أنت اللي بتحترمه أكتر منهم وبتسمع كلامه، ويمكن كمان شايف فيك حاجة أنت نفسك مش شايفها.
ــ مش عارف، المشكلة إني مش عارف، خايف اسيبه واسافر وأفضل نفسي والعيشة اللي حاببها هو يتعب لما اسيبه.
ــ البيت فاضي عليه هو وأما منيرة وأنت اللي واخد بحسهم، كل واحد من إخواتك واخد من جزء من التجارة برة البلد ومستقر يعني هما برضوا شايلين جزء من الشغل مع أبوك.
كان مستمع وساكت فأنا كملت:
ــ أما بقى بالنسبة لصاحبك اللي شوفته فأنت مش جديد في البلد وأكيد عارف إن الأولاد والبنات هنا في البلد بيتجوزوا صغيرين، البنت أقصاها بالكتير خمستاشِر ستاشِر سنة، والوِلد من خمستاشِر لعشرين سنة.
ــ متقوليش إنك كانوا بيقولوا لك يا عانس علشان تخطيتي الخمسة وعشرين؟
ضحكت وقولت له:
ــ يي كتير ولا نظرات الحريم الكبيرة والشفقة.
ــ مكنتيش بتضايقي؟
ــ عادي يعني أمي وأبوي كانوا حابين إني أكمل وأتعلم وكانوا بيدعموني، أنا يمكن تاني بنت تكون كملت تعليمها في النجع.
ــ عارف إن آخر حاجة للبت هنا الابتدائية لأن مفيش مدرسة إعدادي هنا وإن اللي بيكملوا حتى من الأولاد بيكونوا قليلين، ده اللي واخد الإعدادية باش كاتب.
ــ عارف نفسي البلد بتاعتنا دي تتنور والناس تتعلم والبنات متتجوزش وهي صغيرة بسبب جهل الأهل، بس أنا اتهاجمت كتير بسبب كده من الناس.
قال بفضول:
ــ هنكنسل النوم وعرفيني إزاي هاجموكي؟
ــ كنت كل مرة بنصح أم متجوزش بنتها تقولي وأنتِ عايزاها تقعد جاري ( جنبي) زي ما أنتِ قاعدة جنب أمك؟ أنت مش متخيل في بنات قد إيه ماتوا وهما بيولدوا ولا بعد ما اتجوزوا بسبب إنهم صغيرين وجسمهم نموه ما اكتملتش، ولا كام واحدة عايشة أكنها خدامة وبس، ولا كام واحد حلمه مات بسبب إن أهله عايزينه طالما عدا العشر سنين يا يبدأ يشتغل في الغيط بأجر يا يسافر يشتغل في أي حاجة بالنسبة لهم ده كبر وبقى راجل ولازم يجيب مصاريفه ومصاريف البيت ولو هيبني بيت عشان بعد كام سنة يتجوز.
ــ البلد معاكي حق ناقصها كل حاجة، الوحدة مفيش فيها غير تمرجي ( ممرض ) كبير في السن ومفيش حتى دكتور.
كملت:
ــ مفيش كمان غير صيدلية واحدة في أول النجع، ودي بعد العِشا بتقفل أصلاً ولو إتأخرت يبقى للساعة عشرة الليل.
قال:
ــ وأبويا مُصر أقعد برضوا؟!
ــ ليه إحنا منبدأش بالتغيير؟