رواية سجين الحب الفصل الخامس5بقلم زهراء الحريري

هـــــاشم

وكنا دائمًا نعود، إلا هذه المرة…!

أرغــــــــد

‏لو غلطة جان تهون

لاجن كسر عود

كلشي اسمه صحبه وياك 

من كاعه مردود

••-----------♡------------♡------------••

هـــــاشم:- منو هاي التيـنة؟ 

ظليت سـاڪتة صافنة على الجرح اللي بوجهه 

بيبي مسحت عيونها وهي تكول تعالي جدة لا تظلين واڪفة هذا وليدي 

عمج هاشم 

هو بعده يباوع عليَّ كالت له

ـ يمه هاي نمرة آصف زمزم 

كال شلونج عمي 

تعالي اكعدي لا تستحين مني اعتبريني مثل أبوج 

كتلهم ها لا اني اروح وباجر اجي 

جلبوا بيه كعدت اباوع عليهم واني مستحية من الرجال يسولفون بيناتهم وبيبي تبجي وكل شويه تبوس وجهه وهو يدنك يبوس جفوف ايدها هو سـاڪت وهي بين العتب والاستياق، رفع عينه عليَّ ابتسم بوجهي استحيت منه دنكت راسي 

دك تلفوني باسم بابا من جاوبته وصـاني ما احجي لـ احد عن وجود عمي هاشم خـاصة لبيت عمو ارغـد

من سألته ليش كال ماعليج انتي بس لا تحجين اعرفج راح تصورينه ودزينه الهم

وصدك هو براسي اصوره وادزه لماما نفس اكلها تشوفه اشكد يشبه أدم من كتلها على بيبي ام هاشم تكلي لا يتصورلج ماڪو شبه بينهم

زمزم:- هواي يشبـه آدم

صاح ياطلبة آدم اللي صاير مايوكع من على لسانج ترى ها بلشت اضوج 

زمزم:- شنو الي صاير مو قبل احجيلك عنـه

آصف:- ماصاير بس هواي تلحين بذڪره، يلا ومثل ماوصيـتج ما تحجين عن عمج هاشم كبال احد زمزم اذا عرفت ذاكرته كبال احد ازعل منج خوش

كتله اي ماڪول ليش متعصب هسه اني شسويت 

كال ااعرفج مثل القلق 

زمزم:- ترررى والله هالمرة اني ازعل منك آصف المو مزويون 

 آصف:- لا ماتزعل مني نمرتي وجمارتي اتحمل كل شي ولازعلج 

باجر اجيج شنو تردين اجيبلج وياي؟ 

ما اريد شي منك ڪلش زعلت صاير وياي مو خوش

آصف:- حقج عليَّ باجر اجي وابوس راسج

واذا تردين هذا عمج لؤي دخل اخلي يضربني بوكس

اريد احجي واجى صوت عمي لؤي اني متعودة دائماً يسلمون عليَّ هو وعمي سراج اذا بابا يمهم ياخذون التلفون منه واذا يمي ومن يتصل واحد منهم يكول انطيني زمزم اسلم عليها 

لؤي:- ولج ام طحوش  شلونج 

زمزم:- زينه عمو انت شلونك عمه درة شلونها والملحان والله مشتاقتلهم

لؤي:- جا ما تجين منو رادج 

هالمرة بس تتنسئ عمتج اجيبج واكعدج كباله وانه اضيع ذجري من البيت كله

اسمع بابا يضحك ويحجي عليه بابا حيل يحبهم وصدك هما ينحبون هواي، اخذ منه التلفون بلشت اعددلـه باللي اريدهن واني منطلقة ناسيتهم ماخليت شي واهدي بيه اذا ينسى شي ارجع البقية عليه 

آصف:- مرة وحدة نسيت ذليتيني بيها يول بيج عدوة من عمج لؤي  

صار هسه اسجلهن حتى ما انسى 

انتبهت عليهم هو وبيبي يضحكون عليَّ خجلت منه بيبي متعودة عليها وتعرف بسوالفي 

رجعت حجيت ويا بابا 

ـ تماما وها صدك مر على ماما نفس امس وصتني من تريد تجي تروح عليها دز وياك ملابس كمل خياطهن

سـديته اباوع عليه صافن عليَّ بس ما مبتسم مثل قبل شوية، دنك راسه واسمع بيبي طلعت حسرة من صدرها وهي تهز راسها بلا 

سمعنا صـوت الباب يندك اشوفها مثل الخافت وهي تلزم ايده ابتسم بوجهها 

ـ كوم ادخل للغرفة يمه

فرك وجهه بجف ايده بعصبية وهو يكولها شنو اخلص عمري هيج ما ادخل وهالطالع اشوف منو بالباب محد اله يمي شي 

دنكت باست ايده بسرعه سحبها وهو يبوس راسها، تبجي وتحلف بيه لخاطرها يدخل للغرفة

دخل وهو يسد الباب بقوة، طلعت بيبي تشوف منو بالباب واني وراها تفاجئت بخوالي قبل فترة طويلة زعلوا مني وما اجوا بعد لان ماقبلت اروح وياهم 

سلموا على بيبي وهم يبوسون راسها دخلتهم جوة وعينها على باب الغرفة كعدت بصف الباب واني كعدني خالو باسل يمه 

ـ اليوم ذاڪريني التوأم الماكر؟ 

كفخني على راسي بشقى خالو باسل وهو يكول 

ـ النوب مسويتنا ماكرين 

ضحكت واني احمي راسي كتله بابا هيج يسميكم اني ما عليَّ 

ارسلان:- والله محد ثعلب ومـاكر غير ابوج

ضجت خالو ارسلان دايما هيج يحجي على بابا رغم احبه لخالو وڪُلش حباب ويانا عكس جدي ابو ماما، بس اضوج من احد يحجي على بابا انتبهت على خالو باسل يأشر له عليَّ 

باسـل:- لا هذا النسر ابو زمزم الغالي هو صدك عنده طلعات بس خفيفات  ڪلهن بالريش

ضحك خالو ارسلان النوب سكت بـاوع عليَّ حجى بعتب 

ارسلان:- خالو انتي ليش هيج متعبة امج نريد هالمرة ما نوكف وياج على العله مانروح الا نعرف شبيج 

بقيت سـاڪتة كل مرة يجون هيج حجي وضغط عليَّ اكولهم ماعندي شي وياها وهما مصرين اكو شي 

باسل:- من نسألج جاوبينا زمزم، ليش تاركة أمج وكاعدة هينا؟

زمزم:- اني حابة ابقى هنـا وين المشكلة كل مرة اكولكم حابة وجودي هنا ليش مدا تصدكون والا تحطوا سبب

خالو ارسلان حجى بعصبية وخالو باسل يحاول يهدي بيه ويكول جان اني شنو فهمتك من اجينا 

ارسلان:- ما تسمعها نفس الحجي تكلي عوفها فترة وتشتاق لامها وهي تطلب نرجعها كتلك تحتاج ضرب يلا تجر عدل 

امج گلبج حديد عليها ليش فهمينا السبب يجوز هي الغلطانة واحنا مانعرف 

زمزم:- ماكو شي بس اني اريد ابقى هنا وبابا قـابل

ارسلان:- والله طاير عقلي بيج شلون تكدرين تبتعدين عن امج يول بهذا عمري واذا امي تغيب يوم عن البيت اظل افتر مثل اليتيم حتى انهزم من البيت 

ابوج شنو تارس راسج احجي خلي نفتهم حتى حجينا يصير وياه وبعد 

زمزم:- خالووو لا تحجي على بابا واصلا ما يحجي شي عليها ودائما مايذكرها بس بالزين حتى كعدتي هنا ما جان قابل بيها 

ارسلان:- من يم أبوج لسانج السان محامي زين شنو الفرق هذا  أبوج وهاي  أمج؟ لو لان وأبوج على المزاج عندج عـزيز 

امج بسببج مريضة وتعبانة كل يوم يذبل عودها اكثر من القبله من يوم كعدتج هينا ماشافتها العـافية

اليوم ترجعين ويانا اني مو ابوج وامشي بمزاجج كل شي ولا صحة اختي 

زمزم:- واني شنو مسويتلها مو مبتعده عنها مو اني عرمة واشبه بيلسان اللي ما اعرف شنو مسوية 

شنو تريد مني عندها كوثر ومصطفى خلي تعووفني، حرمتني من الكعدة ويا ماما نفس وهم تريد تحرمني من الڪعدة هنا 

اني مرتاحـة هنا وعاجبني ليش ما تعوفوني ما اريدها شنو جبر 

ارسلان:- يول انتي شنو من بنت الله لا يرزقني ولا يرزق مسلم ضنى مثلج

باسل:- ارسلان بالهدوء مو هيج زمزم عاقلة وتسمع الحجي واكيد ما يرضيها امها تتعب بسببها وحجيها هذا مو صدك ولا تعرف شنو تكول 

خالو زمزم خاف عبالج امج ما تحبج  لو عدها عشرة بعد غير كوثر ومصطفى محبتها الج نفسها ماتنقص 

هاي امج سندج  والبنية كلما تكبر تحتاج امها اكثر  وباجر من تكبرين تشوفين حاجتج الها شلون مختلفة عن ابوج 

ارسلان:- اليوم ترجعين ويانا 

ارحمي امج ماتلكين احد يحبج اكثر منها 

زمزم:- ما ارجع اني مرتاحة هنا 

ضرب على افخاذ رجليه بعصبية 

ارسلان:- كتلك الحجي مايفيد مستقوية بأبوها مطلع عينها 

كومي يلا خلي نمشي لبيت جدج جمعي ملابس تا نروح

نهضت من مكاني كتله واني ما اريد اروح 

ارسلان:- غصباً عليج هسه ترحين ويانا 

اجى يلزمني نهزمت ركض للغرفة نسيت عمي هاشم بيها دخلت بسرعة وقفلت الباب ظليت واكفة حاطة اذاني على الباب

ارسلان:- زمززم بلا رعونية وافتحي الباب

اسمع بيبي تهدي بيه صوتها يرجف وهي تقنع بيه يعوفني وهو يڪولها خلي تفتح الباب بس نحجي وياها

هاشم:- مثل أبوج محد يكدرلج

فزيت درت وجهي كاعد ظهره على بوفية بيبي يباوع عليَّ احجي ويا روحي ما يسويلي شي اخوالي هنا اظل اصرخ بس يلزمني 

كتله بصوت مبحوح نسيتك هنا 

هاشم:- ليش ما ترحين لامج 

زمزم:- ما اريدها

رفع حواجبه كال اكو بنية ماتريد امها الا اذا اكو سبب قوي

اسمع صوت خالي ارسلان يحجي عليَّ وخالو باسل وبيبي يحجون وياه

زمزم:- حرمتنا من بابا 

وابوها يكرهنا ويكره بابا 

غمض عيونه وهو يمسح بكصته بجف ايده منا ومنا 

هاشم:- مجرب هالشعور 

بس امج خطية مالهـا ذنب بڪره جدج 

قبل جنت اسمعه من تـاخذنا عليه بالاعياد، يكولها ذبيهم على أبوهم وهو يحير بيهم شنو تبقين معلڪة بيهم  هو آصف شلونه اكيد خلفته مايله مثله 

كتله واني اكعد يريدها تزوج حتى خطبوها منه وهي رفضت وزعل عليها كم شهر بعدين هي اجت وراضته

هاشم:- اي خلي تزوج ليش رافضة  انتي 

خزرته شنو تزوج لعد وبابا اللي يحبها 

هاشم:- ليش هيج عصبية انتي مو ماتحبينها!!!! 

التفتت على الباب بيبي ادك بيه كالت اطلعوا 

فتحت الباب وطلعت سألتها وين راحوا كالت لبيت جدج 

اخذت تلفوني باقي بمكاني اتصلت على بابا حجيتله اللي صار 

كال والله تعبتوني انتي بصوب وامج واخـوانها بصوب 

هسه اتصل عليهم واتفاهم وياهم

قطعت الاتصال وعيوني على باب الصالة خاف يرجعون ياخذوني، رجعت اتصلت على بابا كال حجيت وياهم وكتلهم بالعطلة ترجعين

- اني ما اريد ارجع 

ـ الله ڪريم لذاك الوقت 

تعشيت ويا بيبي وابنها طلعت لعمي اوس رجعني لكيت مجد بالباب ماحجى ولا باوع عليَّ 

ثاني يوم اجى بابا ورحنا سوة على بيت بيبي بالطرمة لكينا هاشم تسالموا بيد وايد تحاضنوا بيها 

هـاشم:- ما انسى وكفتك 

آصف:- كل اللي سويته لعيون عمتي ما اريد منك شي بس تهجد بمكانك ولا تصادم ويا احد 

ابتسم كال راح اخذ امي وانتقل لبغداد

استغفر بابا باوع عليَّ كال روحي يم جدتج 

دخلت جوة التفتت عليهم بابا حاط ايده على كتف هاشم وياشر بصبع ايده الثانيه 

ساعدت بيبي بتحضير الغدا وهما لسه بالطرمه كملنا الصب والترتيب كالت نادي ابوج وعمج شعندهم بره

طلعت لكيتهم كاعدين بالحديقة يسولفون تقربت عليهم قطعوا الكلام 

ـ بيبي تكول يلا تعالوا

مد ايده بابا ساعدته ينهض دخلنا جوة نتغدا احس كل كلامهم الغاز ما اربط، من اسمع ذكر عمي ارغد اركز وياهم  وما اعرف ليش  بابا يوصي بيه مايشوف وجه لارغد 

بقى هاشم ساڪت بقينا يمهم للعصر يسولفون وحدهم واني مرتجية على رجل بيبي بعكس ايدي اباوع عليها شلون تحوك عندي فضول كل شي اشوفه احـب اتعلمه 

دك تلفون بابا رفعت راسي اباوع عليهم هاشم اخذه من ايده فتح السماعة الخارجية يستمع وياه

آدم:- شلونك عمي

آصف:- هلا يابة بالشيخ

الحمد لله

آدم:- دوم بإذن الله 

اڪلك عمي

ادم يحجي ويا بابا صايرة مشكلة يمهم وهاشم ناقص يحضن التلفون لازمه بيده وبابا يخوزر بعيونه وياشر بحواجبه يظل يرفع بيهن ويحرك براسه اعرف معنى حركته وخر لان دوم يسويها وياي، وهاشم ولا يمه  مبتسم وعيونه تلمع بالدموع وشفته تتحرك كانـه ديحجي بدون صوت 

آصف:- اني مو كتلكم اني اتفق وياه شنو اللي اختلف انتم ليش تسرعون 

آدم:- طلعني من الدائـرة منك الهم 

آصف:- عوفه عليه باجر من اجي اروح عليه

آدم:- اي كله على اذا بقى هذا السعر   نتفق وياه غيـره 

آصف:- يصير خير 

سد الاتصال وهو يخزر هاشم اللي بعده بوضع مريب بالنسبة الي 

النوب يريد يحجي مايكدر رفع اديه يمسح بجوانب راسه ويتنفس مثل المخنوك بابا ظل يباوع عليه وبيبي دموعها تصب 

زمزم:- شڪو ليش تبجون؟ 

آصف:- ماكو شي بابا 

واني شنو وصيتج مو كتلج لا تسألين على كل شي

هزيت راسي بـ اي وعيوني على هاشم لزم ايد بابا يلكى شوفني صورته

كام بابا وهو يكول يلا زمزم شنو ماعندج اقراية ترى بس توكعين بمادة ارجعج لبغداد

اخذني ورحنا مجـد مثل جلب الحراسة يمتى ما شفته وشافني حاط كرسي بالباب وكاعد 

اروح وارجع على بيت بيبي هاشم من اشوفها وحده ابد ما اوكف وياه مامسوي شي هو بالعكس محترم وياي بس من التوصيات والتحذيرات اللي جنت اخذها من ماما نفس صرت اخاف واتجنب مكان بيه رجال وبس اني يمه، اظل افتر ويا بيبي 

الجمعة رحت اتغدى وياهم من البارحة بيبي عزمتني وتعرف اموت على السمج الشوي خاصة اللي تشوي هي على الحطب، شغلت التنور تخبز واني ارفعله القبق واللي تكول صرت اعرف امد ايدي واطلعها ودائما تخليلي اخر اثنين اني اخبزهم مرات الرغيف ينزرف من الوسط ومرات لا 

عفتها اطفي التنور اخذت الخبز دخلته واخذت القوري هو كال اجيبه اله حتى يحطه على الجمر لكيت بيبي ما موجودة داخلة للصحيات

هاشم:- جيبي 

تقدمت حطيته بصفه ما انطيته اله بيده 

كال دخلي السمجه 

بقيت واكفة منتظرتها تطلع يلا ادخل 

ـ رفع جف ايده يأشر 

ـ زمزومه بالج هينا

دخلي السمجة بابا

من شفتها طلعت وكفت مقابيل المغسلة كتلها ها ماسمعتك غير انتظر يحجي حتى ما ابين اجذب لا كبل شلت السمجه ودخلت  اجى وراي وهو يدخن من شفته تقرب وكف كبالي قريب حسيت گلبي وكع بين اديه 

هاشم:- عندج صورة لـ آدم

جاوبته بصوت مبحوح من الخرعة 

زمزم:- هــــا!! 

هاشم:- شبيه صوتج بس لا من الدخان؟ 

بلعت ريكي من دخلت بيبي يله كدرت اسحب النفس زين باوع عليها ورجع عيونه عليَّ يحجي بيني وبينه

هـاشم:- صورة لادم عندج؟ 

ادم بيه حاله ابد ما يحط صورة شخصية اله على الواتساب وحتى حسابه الفيس باقي بدون صوره ولا ينشر صور ذكرت صور عقد مهند كتله

زمزم:- نشر على الفيس صور بيوم عقد صديقه

هاشم:- حسابه مقفول 

انتي ماعندج

زمزم:- ها 

ام هاشم:- يلا اكعدوا ليش واكفين

 يباوع على امه يشخط جف رجله بالارضيه يقدمها ويرجعها صـار عندي فضول اعرف ليش هاي المعزة لآدم 

كملت غدا وساعدت بيبي بتنظيف البيت وتبخيره اعرفها الظهر  ماتڪدر الا تنام ساعة اريد اطلع واجى وراي 

هاشم:- ها زمزومه رايحة؟ 

زمزم:- ها اي خطية بيلسان هسه تلكاها ادور عليّ 

تغيرت ملامحة وجهه خفت منه شبيه هذا خبل كل شوية شكل مرة لطيف ومرة ما اعرف شلون اوصف شكله بس شلون بابا من يعصب بس بابا على سبب هذا هيج وحده يدون سبب ، اريد اطلع وكال

هاشم:- ما جاوبتي عندج صورة لآدم

زمزم:- انت ليش هيج تلح هواي بـ آدم 

هاشم:- بابا مو كالج لا تسألين

عابت فشلني كتله اي عندي كال اريد اشوفه 

هزيت راسي طلعت صورته هو وقمر درت شاشة التلفون عليه اجى ياخذه بعدت ايدي 

ـ لا بيه صوري الي بدون حجاب وصور لماما نفس 

رفع ايده لزم بيها كتفه عاصره وعيونه تتحرك منا ومنا 

ـ يلا شوفينياها وهو بيدج 

رفعته اله يباوع عليه شبيه نقهرت عليه ما اعرف بس حسيته صار يقهر من دموع عيونه 

زمزم:- يشبهك هواي

أبتسم على كلمتي عبالي هالشبه عادي لان اني هم اشبه خالة سمر 

هاشم:- دزيها الي

ـ ما اعرف واتسابك

رد رقمه الي حفظته دزيتله صور آدم اللي عندي ماخذتهن  من ماما نفس  كال امسح المحادثة من يمج لايشوفها ابوج هزيت راسي ومسحتها

هاشم:- سولفيلي عليه

زمزم:- شسولفلك

ـ كلشي تعرفينه عنه كعد على طرف الكاشي مال الطرمه وماد رجليه بالحديقة  كعدت كباله على البلوك اللي محاوط الماطور 

بلشت اسولفله كل شيء سفطتهن عليه تسفط، وهو تاڪدت بيه خبال مثل بيلسان مرة يبتسم ومرة عيونه ادمع ويمسح بيهن مرة يضوج بحزن ومرة يضحك ويبجي سوة

رفعت راسي اريد اذكر طارن من راسي ابتسمت من ذكرت عمو ارغد 

كتله وهاي مرة عمو ارغد مهزوم من البريعصي للمطبخ وادم يڪمز على القنفات والماسحة بيده يريد يطلعه والبريعصي على الحايط يجي منا ويروح منا 

وعمو من المطبخ ويصيح هاا طلع وادم يصيح انتظر انتظر لاتجي وعمو يحجي بعصبية شصار عندك طلعه لا اطلع اني من البيت

اسولف بالموقف وهو كبالي يضحك حتى عيونه تصب دمع من الضحك 

زمزم:- هواي سوالف عمو ويا البريعصي هاي مرة يسبح وشايفه كباله على الحايط طلع علينا بس الشورت لابسه وراسه كله شامبو ماما نفس سدت عيوني بيدها وادم يصفك بيده ويصيح افااا ياصياد الدواعش والمحتلين ابو بريص يخوفك 

ضحك بأعلى صوته واني اكوله والله ما اجذب عليك هو يخاف منهن ودائماً ماما نفس اطلع بيهن حتى دوه تجيب 

هاشم:- اي اعرف موته ولا يشوفهن كباله يڪش منهن وأبوج نمرود خبيث كل مرة يصير بينهم خلاف يضمها اله يخلي ايام تمر ويجي بجيبه بريعصي ويحطه بحضن ارغد 

هذا جتفي ياما وياما انخلع واني اهفهن بالنعال حشاج 

زمزم:- يلا تجيك حسنات ماما نفس تكول سبعين حسنة على كتل الواحد وبابا مو خبيث 

هـاشم:- هههه اكبر خبيث ابوج النمرود

باوعت عليه ما عاجبني كال

هاشم:- اشاقى وياج

اي وبعد سولفيلي

زمزم:- بعد هواي بس ما اذكرهن هو آدم المتكبر ما اشوفه دائما 

هـاشم:- ليش تسمينه هيج شنو بيه طبيعة يتكبر

زمزم:- بس وياي يضوج مني ويغار حتى يڪرهني

هـاشم:- لا مو خوش اكو واحد عاقل يڪره هاي الحلاوة، حلويات الخاصڪي انتي

ظليت صافنة عليه يمكن ديتحرش بالحجي لو ديجامل

هاشم:- اي بعد سولفيلي عن سبع ضـ

سكت وكمل عن عمج أرغــد

تحول الڪلام كله على مواقف عمو ارغد ومن اخلص فد موقف يكول شلون شلون بالله عيدي واني اغرد وحتى امثله اله بديه وملامح وجهي

طلعت بيبي كالت ها بعدج هينا 

كالها نسولف اني وياها

سألت على شنو غمزلي وهو يڪولها اسرار بيني وبين بنت اخوي

دحكِ عليها جنها حلويات الخاصكي هي وسوالفها

كالتله الله يحفظها زمزومه حنها خالتها المصڪوعة

ضحك وهو يكولها صدك تشبه هذيج المسودنه 

سألني شلونها وشصار عندها وسألني على مرضها مال القلب بيبي سألتني على عسل واني شلون اضوج منها 

صارت دنيا المغرب واني بعدني يمهم سلمت عليهم ورجعت للبيت لكيت جلب الحراسة بالباب رفعت التلفون سويت نفسي احجي ويا بابا

زمزم:- هـا بابا حبيبي اي رجعت حتى وصلت راح ادخل 

وهاي طريقتي صارت حتى ادخل بسرعة للبيت 

يومية اروح عليهم وهو يتلكاني هلا بحلويات الخاصكي وما يسميني باسمي ڪله تينـة يصيحلي اول ايام متشنجة ومتحذرة منه الى ان تعودت عليه 

كلش حباب حتى سوالفه تشبه سوالف عمو أرغد وحتى احس عندهم اطباع متشابهه صار روتين يومي احجيله مواقف عن آدم وعمو حتى المواقف اللي حاجيتها اله يرجع يذكرني بيها ويطلب ارجع احجيها 

بيبي ڪاعدة بمكانها فارشـة سجادتها والقرآن بيدها تقرا، واحنا بالمطبخ احس نفسي راح اصير فيل من كد الاكل اللي اڪله 

واكفين على الطباخ يسوي هو مخلمة بزيت الزيتون اباوع على المكونات حتى احفظها امس اكلتها وحيل عجبتني وهسه ديعلمني عليها

هـاشم:- وهاي اطيب مخلمة للتينة

كعدنا بالصالة ناڪل بيبي ماتاڪل اكلها حيل قليل ودائما مريضة 

كتله عمو مبين عليـك هواي تحب عمو أرغـد 

انطاني رغيف خبز لان اللي عندي كملته كله 

هـاشم:- اي احبــه وأتمنى احضن الهوا اللي يمر عليـه 

زمزم:- لعـد ليش ما تتواصل وياه

لو تروح تـزوره؟ 

عمو أرغـد طيب واذا متزاعلين بسرعة يرضى دائما هو وبابا يتزاعلون وبسرعة يتصالحون

هـاشم:- ما اڪدر لان طعتني الـه ما النا وراها ملاڪه وصـلح 

زمزم:- ليش على شـنو هيـج زعلتوا؟ 

ما جاوبني بقى سـاڪت مدنـك راسـه وبيده يفر بالطاوة وهي بالصينية

جان عندي امتـحانات امتحان وراء امتحان ماڪدرت اروح عليهم اذا اوكع بمادة بابا يرجعني من كملت يله رحتلهم ظل يحجي عليه شلون هيج تكطعين بيـنا وبيبي تكول البيت فـارغ علينا بدونج 

هـاشم:- لا تكطعين تينـة انتي الأنيس الي 

زمزم:- ما اڪطع والله بس امتحانات شي فوك شي واليوم اخر امتحان

من خلصت الامتحانات صار عندي وقت فراغ وهماتين ماكو تحاضير تقريباً المنهج خلص ظليت هواي ابقى عندهم ماعندي شي بس بيلسان اكملها واروح عليهم بسـرعة حبيت بيتهم اڪثر  

السبـت الصبح تريكت وياهـم بعدنا مارفعنا الريوك كاعدين دا نسولف وسمعنا صوت عمي أرغد ينادي من الطرمة 

ـ يا ام البيت تستقبلين ضيف

هاشم نهض بسرعة فاتح عيونه وملامح وجهه ما تتفسر صدمـة لو فرحـة لو خـوف اباوع عليـه رفع ايده مسح حلكه بحركه سريعه 

اجى يطلع وعمتي لزمته وتترجى بيه يدخل للغرفة خطيه صوفر وجهها وترجف اديها 

سحلته للغرفة وهو بعده يباوع على باب الصالة رحت اباوع من الباب عمو ارغد فاتح باب الشارع سيارته بالباب ينزل منها المسواك يدخله للطرمه ويرجع على الباقي من كمل سد الجنطة وهو يدوس الدكمه اللي ويا السويج دخل سد البـاب طلعت عمتي تلڪته بالهلا باس راسها ودنك باس اديها يسال على حالها ويتعذر منها لان ما اجاها جان ايفاد بالموصـل وهسـه اجى كبل عليها حتى ما رايح لبغداد ولا شـايف اهله

تقدمت عليه حضني باس راسي 

أرغد:- هلا بشيخة البنات 

شلونج عمو 

يول فصعونـة وحشـه الج يمتى ترجعين 

زمزم:- بعد ما ارجـع ابقى هين 

ضربني راشدي خفيف سحب جفه باسه  باوع على عمتي اللي عيونها تباوع على باب الصالة بخوف وقلق 

لزم ايدها دخلها جوا نقلت المسواك اني وهما كعدوا بالصالة رتبته بين الثلاجة والمجمدة ورجعت عليهم يسال بيها شبيه وجهج اصفر وليش ترجفين خلي اخذج للدكتور وهي تحلفله ما بيها شي 

باوعت عليها بحضنها اكو علاكة مال علاج هو جايبه الها عيونها كل شويه تصير على باب الغرفة وهي تحرك جفها على الكاع 

ڪعدت يمه يسألني على وضعي هنا وعلى دوامي شلوني بيه وخوما مقصرة بدراسـتي 

عيـونه صارت على باڪيت الجكاير والجداحة ضحك وهو يڪولها  بشقى

ارغد:- شنو عمه صايرة ادخنين من وراي 

خطية فوك ما مخطوف وجهها نخطف زيادة والشفايف صارت بيض وتبلعم بريكها جنها غاصة النوب لزمتها الشِركة ركضت جبتلها مي من تجيها تخنكها 

شربت المي وعمو كاعد كبالها ايد مادها على كتفها وايد لازم ايدها

أرغد:- عمه خلي اخذج للدكتور وضعج ما عاجبني 

هزت راسـها بلا ما تكدر تحجي واني امسح على ظهرها نفتح باب الغـرفة رفع راسه عمو يباوع عليه بصدمه كانه مامصدك بقى هيج والله يمكن فوك الدقائق فاتح عيونه 

رجع راسـه على عمتي اللي ڪامشه زنوده وتحجي بصوت مخنوك كوة يطلع 

ـ لخاطري عمه لخاطري خليه لأخـر أيامي 

وكعت اديه عنها باقـي صافن عليها وعيونه حمر 

هـاشم:- أبو آدم

نهض عمو بعصبية طفر عليه كمشه من يم رقبته مرجعه على الحافة مال الحايط اللي يم الباب

ارغد:- هذا ابني

 شطلعك؟ 

شلووون طلعت؟ 

هـاشم:- هو أبنك ماڪلت شي أبو آدم

ضربه على حلكة خلا يصب دم عمتي تدفع بيه عليهم، وعمو ارغد مو ذاك الحباب اللي اعرفه لزكت ظهري بالحايط وخاتله ورا بيبي واني اشوفه شلون يضرب بيه وهاشم مسلم كلش يرفعه من التشيرت ويرجع يضربه بكل قوته بالكاع 

هاشم ساكت بس صوت ونه من الالم وعمو أرغد يصيح باعلى صوته ومن الخـوف حتى ما ركزت بشنو يحجي 

بيبي رجع راسها على صدري مغمضه عيونها وبلا نفـس صرت اصرخ ما يسمعوني دفعتها عني خايفة منها ما ابالي غير ماتت وصارت تخوف

ركضت على عمو ارغد واني اصرخ وابجي واصيح عمو ماتت ماتت 

حضنته من ورا اصرخ من الخوف التفت عليَّ جان فاقد حتى ما يسمعني دفعني ورجع عليه يضرب بدون رحمه وهو يبجي ويصيح ولك ليش ليش وشنو اليش اللي يحجي، بيه ما اعرف

طلعت اركض واني اصرخ ماتت نضربت بولد يصيح اسم الله اسم الله اوكفي خوية 

يريد يهديني واني اصرخ ماتت بيبي ماتت عفته وراي ما ادري لحكني لو لا اركض لبيت جدي صار بوجهي عمي مجد ناسية خوفي منه ذبيت روحي بحضنه واني اصرخ ماتت حضني وهو يصيح اوس اوس 

اهجدي عمو 

يريد يبعدني واني حاضنته بديه وكامشه دشداشته من ظهره واصيح لا لا تعوفني اخـاف ماتت وهاشم 

وارغد

بعدني بكل قوته من حضنه صاح ارغد عرف طلع عمي اوس يصيح شكو

دفعني عليه وراح يركض لبيت بيبي واني حاضنه عمو اوس مقيدته واصيح لا تعوفني طلعت زوجته دفعني عليها دخلتني لبيتها وهي تصلي على محمد وتسمي باسم الله واني اصرخ بماتت عمي ارغد عمي هاشم

بيبي ام بابا دخلت علينا حاضنتني وهي تصيح اسم الله وتسال بصياح زوجة اوس شنو صاير وهي تجاوبها ما اعرف احس صوتي يجرح بلعومي  اجت بعيوني شلون وكع راسها على صدري رجعت اصرخ اريدهم يوخرون هذا الموقف من عيني  اريد اضم روحي 

دخل عمي ارغد اخذني منهن وهو يتنفس بقوة قميصه مفتوح ما ادري مشموك اباوع عليه بخوف ادفع بيه عني وهو يجرني عليه 

سحبني يغسل بوجهي ويحجي وياي بصوت اقرب للصياح محد مات محد كولي يا الله يلا يابه كولي وراي ياالله 

كعدت يم المغسلة ايدي ما اكدر ارفعها واحس راسي خدران جاب مي بيده وغسل بيه اديه ورجع غسل وجهي نزعني حجابي وهو يقرا عليه ايات ورجع غسلني كعد بصفي حضن راسي لصدره اسمع صوت نبض گلبه شلون قوي ويخوف وصوت انفاسه اللي يجرها بتعب

حاضني ويحجي وحده اصف محد غيره اي اصف 

 

رفع وجهي يباوع عليه بخوف رجعني لصدره حاضن راسي باثنين اديه وهو يكولهن مي وشكر بالعجل 

من كدرت احرك اديه حضنته واني ابجي بصوت رفع ايده لراسه يعصر بيه خشمه نزف دم عبالي مضروب عليه اخذ حجابي ضاغط خشمه بيه موقف الدم 

كعدت بيبي كبالنا شربتني مي وهي تردد اسم الله عليج من شر الجن والانس اسم الله جدة اسم الله 

جدي ابو ماما دخل كعد كبالي اخذني من حضن عمي ارغد اللي زحف على كعدته وارتجى بسياج الحمام ماد رجليه اثنينهن

رفعت راسي من حضن جدي كتله بصوت يرجف ومبحوح اريد انام 

زحف الي عمي ارغد اخذني من جدي يحجي بصوت مخنوك لا بابا كومي خلي نتمشى ما يصير تنامين 

وكف وهو ينطيني ايده ساعدني اوكف يمشي بيه بالطرمـة واجدادي ونسوانهم الي هنا كلها تجمعت ويسولفون بأصوات عالية ما مركزة وياهم ولا استلمت كلمة 

دخلني عمي ارغد جوة بس اني وياه كعدنا بالكاع ضهره على القنفة حط راسي على صدره اصابعه يدخلها بين شعري يحك فروة الراس ويسحب الشعر ويرجع يكرر الحركة جان يسويها لقمر 

رفعت راسي كتله ما ماتت صدك 

ما جاوبني صافن بالفراغ عيونه منفوخة 

عموو

انتبه عليَّ 

ـ ها بابا 

ـ صدك ما ماتت

ـ لا بس فقدت الوعي واخذوها عمامج

سألني هذا النذل من يمتى هينا؟ 

كتله صار هواي ما اذكر ڪم يوم 

كال ومنو يعرف بيه موجود 

كتله محد وهو مايطلع من البيت بس بالليل 

هز راسه بـ اي لزم وجهي يسألني شلونج هسه كتله زينه 

بعدني من حضنه وكف اباوع عليه مشيته مخربطه كانه يريد يوكع 

طلع بره واني رجعت راسي على القنفة اسمع اصواتهم برة غمضت عيوني نحلانه حيل ما اعرف اريد افقد الوعي لو انـام

حسيت بأحد دخل فتحت عيني عمي مجد رجع الخوف عليَّ ردت اكوم واطلع

اجى كعد كبالي كال اخذج للمستشفى هزيت راسي لا بدون ما احجي 

أبتسم وما اعرف ليش حسيتها ابتسامة خباثـة باوع على الباب ورجع عيونه عليَّ رجليه ميته اريد انهزم ما يساعدني 

مجد:- تردين تعرفين شبيهم ارغد وهاشم 

ظليت ساڪتة بس اباوع عليه كال 

مجد:- وهم اسولفلج أبوج ليش اميـزج عن اخوانج لان تشبهين عشيگته تردين تعرفينها منو؟ 

ظليت اباوع بوجهه كال لا ما اسولفلج انتي ترحين تكولين لابوج

اجى يكوم كتله ما اكول والله 

مجد:- وشنو الضمان ما تڪولين 

زمزم:- حلفت والله وما احلف بيه جذب اني 

ـ لا …تكولين ما اثق بيج

زمزم:- والله ما اڪول

دخلت زوجة عمي اوس غير الكلام وهو يكولي خلي اخذج للمستشفى حتى ترتاح گلوبنا 

زمزم:- لا ما اريد اروح 

حجت وياي هي تحاول تقنعني اروح تكول وجهج اصفر وبعدج ترجفين واني عيوني على مجد اريد اعرف  

كالها خوية سويلها شي تـاڪله 

راحت هي للمطبخ كال راح اسولفلج بس انتي حلفتي ما تكولين عمي مجد سولفلي

ـ والله ما أڪول ابد

تقرب كعد بصفي اجيت ابتعد لزم ايدي مثبتني بمكاني 

كال بالبداية خلي اسولفلج على ابن عم واخوات اثنين بلش يسولفلي عن الولد اللي حب بنت عمه الصغيرة فاتحه عيوني رغم ما جاب اسم بابا بس عرفتـه المقصود وعرفت منو الاخوات هو يسولف واني دموعي تصب 

دفعته واني اصيح بوجهه جذااااب 

ماكو هيج شي بين بابا وخالتي 

رفع اصبعه يكول اشش صوتج ترى ما اكملج

حجيت واني اشهك ما اريد اسمع عوف ايدي 

امجد:- براحتج ردت اسولفلج شنو سوة بأمج هو وخالتج 

سڪتت اباوع عليه حجيت 

زمزم:- شنو اللي سوة

باوع على باب الصالة وباب المطبخ يريد يحجي واجت زوجة عمي حطت صينية كبالي واني عيوني بعدهي على مجد لهذا السبب اكو زعل بين امي وخالتي 

دخلت بيبي كعدت كبالنا عيوني عليه ما منتبه عليهم حتى الاڪل اللي كبالي ما انتبهت شنو صار حنين وهو  بيده يوڪلني بعد ما سوا گلبي كطن وشب النار بيه  اجى ابالي وضع بابا شلون جان يتخربط اذا اڪوله بسمر مريضة يظل يلوب وحتى بالـه مو ويا راسي خدر لا جذب ماڪو هيج شي مجد جذاب 

طلعني غسلني ورجعني كالهم راح انومها بغرفة الجهال ما اكدر اعوفها وحدها بعدهي تخـاف

بيبي كالت اي يمه عينك عليها اروح على اختك لا تطلع 

دخلني لغرفة الجهال كعدني على سرير على شكل سيارة ورجع يسولف عليَّ واني اهز راسي لا واحس الشهكات ما تطلع مني الا تمشي مثل السجين بصدري لزمت راسي لا ماڪو هيج اني شايفة صور عرسهم هذا جذاب

تدرين تعرفين شبيهم هـاشم وأرغـد ما حجيت واصلا ولا ابالي بالي باللي سولفه عن بابا وخالتي وامي نزلت ايدي كامشه بلعومي وابجي احس اكو شي جبير غاصه بيه من وسط بلعومي لصدري

مجد:- ما راح تكولين اني سولفتلج

بلش يسولفلي احس كل اللي يحجي اكبر مني لازمه راسي باثنين اديه وابجي اريده يسكت كافي ما اريد اسمع وهو ما عاف شي حتى بيلسان شنو سوت سولفلي عليها ويكول انزعي ثوب الطيبة اللي لابسته انتي مثل طبع ابوج 

دخلت زوجة اوس كالتله شبيها تبجي كالها بعدهي مصدومه بالصـار

كالت له اتصل اوس يسأل عليها يكول خلي مجد يجيبها للمستشفى يشوفونها احسن

مجد:-  اي هسه اخذها 

بس استري راسها

لبستني شال منها واني على نفس البواجي والشهگة، اخذني من ايدي يجر بيه وراء بلا حول ولا قوة حتى خوفي خاف يسويلي شي ما مر عليَّ دخـلنا للمستشفى واني لسه ابجي سحبوا ايدي وهم يرفعون بالردان ما منتبه شديسون ولا مهتمه ضغطت اسناني اريد انسى اللي كالـه احس الم بصفحتي كانه بيه شي ضخم يريد ينفجر 

فتحت عيوني واحسهن متروسات شي خشن شلون الحبيبات وراسي يريد يطك من الالم نايمه على السدية وبردات محاوطاتني شفت عمي مجد ڪاعد بنهاية السدية فاتح البردة قليل ويباوع منها 

ذكرت شنو سولفلي ظليت اشهك وابجي التفت عليَّ نهض من مكانه مبتسم كانه فرحان ومتشفي بيَّ

مجد:- ها شلونج

زمزم:- اريد ارجع لامي تاخذني

مجد:- جاي نتصل على ابوج وماكو

من يرد علينا يجي هو ياخذج 

صحت بيه لااا ما اريده انت رجعني 

أبتسم وهو يكول مو تدلل حبيبة عمها كم زمزم عندي  

دنك راسه عليَّ كال ما تڪولين اني سولفتلج اني لان احبج وعزيزة عليَّ حجيتلج اذا عرف يموتني ماعنده رحمه  

انتظري اروح اشوف عمج اوس ابلغه وارجع اخذج 

اريد ارفع راسي ما اكدر وجسمي كله ثكيل واديه احسهم مقطعات  والم صفحتي يوصل لنص ظهري

رجع عليه يحجي بالتلفون وهسه شلونه؟ 

ساعدني انهض اجيت اوكع بسرعه لزم ايدي غير لزمها بهدوء بس اذتني مستمر يحجي بالتلفون كمل حط بجيبه وهو يسألني

ـ بيبيتج ام هاشم هينا نمر عليها

 كتله لا ماريد اخذني لامي

ضحك كال اي هيج بين معدنج على معدن أبوج بسرعة تشيلين بگلبج

ما جـاوبته احس حلكي فارغ من لساني 

كاعدة بالسيارة واحـس سكين ودخلت صفحتي الالم موتني غمضت عيوني الدموع حارة واحسها تلجم بالجفن 

بـاوعت عليه ذڪرت آدم كتله يعني هو ابن هاشم! 

مجد:- اي ابنـه 

كتلج هاشم اغت…

ـ كاااافي عرفت 

دنكت راسي على الدشبول ابجي على منو بيهم ما اعـرف على امي اللي ابتعدت عنه وطلعت هي المظلومة 

لو على ماما نفـس اللي جنت اڪل واشرب ويا اللي دمروها، بجيت وما حقدت على بيلسان توصيني بيها هسه اني شنو اسوي ما اعرف بس اريد امي اول مرة احس نفسي محتاجتها حتى ماما نفس مافڪرت اروحلها 

رفعت راسي كتله وين عمو أرغد

مجد:- بالمستشفى 

عبالي يقصد بقى ويا بيبي ما حجيت رجعت سندت راسي واني اذكر امي ومشاڪلي وياها، عضيت اصبعي 

زمزم:- ليش سولفتلي اذا هيج خايف من بابا ما تعرف بيه ما اضم عليه شي

ما جاوبني بقى ساڪت مركز بالسياقة 

ـ ما راح تكولين لابوج 

يموتني ويدخل السجن يرضيج هيج يصير 

بقيت ساڪتة باوع عليَّ ورجع باوع على  الطريق وهو يخفف السرعة ويقنع بيَّ مطلع نفسه مسكين وحجى اليَّ لان نقهر على أمي اثيلة عباله ما افتهم اني اكدر اميز الطيب من خبيث 

وكف السيارة كبال الباب نزلت وهو وراي سحبت السيم ودخلت جوه واذكر كل المشاكل اللي سويتها هنا وياها علموده 

••-----------♡-----------♡------------••

لـــــــــــــؤي 

ربطت الذبايح بالحديقة اتصلت على سراج يجي عليَّ ياخذني بسيارته اروح اتسوك باقي السـوالف باجر عندي ثواب لـ أرواح الموتى

سيارتي بعتها ودفعت فلوسها للمجمع احس احوالي تكسفت على هالشِراجه الكشرة دفعت الوراي والكدامي 

اجى عليَّ اخذني لازم ضحكته 

لؤي:-  اضحك اضحك كشرتني تكشر ولك والله احس نفسي مكسر بدون سيارة

سراج:- افاا جا اني وين رحت عنك اني والسيارة بخدمتك 

 بعدنا بالسيارة ندور على مكان حتى نطبكها دك تلفوني باوعت عليه أرغـد 

أشرت بيد لسراج منا اطلع 

لؤي:- هلا بالغالي

خوش اتصلت بوقتك باجر معـز…

أرغد:- ليش هيج لؤي ليش ما ڪتلي اصف مطلع هاشم ما توقعتها منك

لؤي:- اوڪف انطيني مجال 

اصف مطلع منو؟ 

مطلع هاشم! 

هاشم ماغيره ابن عمتكم؟ 

نسحب التلفون مني، سراج فتح الصوت 

أرغد:- انت وياه اربعة وعشرين ساعة وتعرف لاتنڪر

ما توقعتها منك لؤي ما توقعتها ابن عمي اعرررفه غدار بس انت مع الاسف عليك 

لؤي:- عمي وحك هو الله ما اعرف هسه سمعت منك شني كوووة  اطلعني أدري

اكلك ما اعرف والله وروح اهلي ما اعرف هسه منك دريت

زين يمتى طلعه وشلون شفته شوف عينـك لو حجي وصلك يخوي خاف جذب 

تذكرت ذاك اليوم بمكتبه يعني جان عن هاشم الحجي

اباوع على سراج ملتفت عليَّ بكل جسمه خازرني عبالك صدك اعرف الله يطيح حظك اصف ويطيح حظ اللي يرافگك على هالدڪات الناقصة

حجيت ويا ارغد اللي اخذني حاصل فاصل

لؤي:- بس هدي اعصابك وفهمني وين لكيته انت مو بالموصل؟ 

سولفلي رايح على بيت عمته وشايفه وصار فترة مو قليلة على طلعته 

طلع راسه من الجام ورجع السيارة ليورة عدلها وشخطها 

لؤي:- هسه انت وين 

وهالجلب هاشم وين وِلـــــه

ما جاوبني الاتصال مقطوع اباوع على سراج طاير بينا وصلنا للمنطقة الي كاعد بيها 

شفته طلع من البيت مخبوص التلفون على اذانه رافعه بجتفه وبديه يسد بدكم الدشداشة واضح عليه جان نايم 

                     الفصل السادس من هنا