رواية بيتزا وشنب الفصل الخامس5بقلم شيماء يسري زهران
- يابنتي اصطبحي بقى، انا جيت عشان اديكي ده.
بصيت على ايده لقيت دبلة دهب، استغربت، قولت:
- ايه ده!!!
- لقيتها وقعت من بدلتك وأنتِ خارجة امبارح بس ملحقتش اندهلك.
قال ابويا:
- وريني كده يا باشا.
- يابا اوعى بيكلمني أنا.
- يعني ايه بيكلمك أنتِ يابت، وريني ايه ده.
خد منه الدبلة بالعافية، اتخض وقال:
- يا نهار حلويات!!!!! دبلة صفاء اللي ضايعة بقالها سنين اتاريها في البدلة هنا.
- هات الدبلة اطلع ادهالها أنا يابا.
- وحياة امك ياختي؟ فاكراني اهبل؟ هتروحي تبيعيها طبعا، الدبلة ليا وبالنص وهي مش هتعرف هي كده كده مفكراها ضايعة بقالها سنين.
بصيت لمراد تاني باحراج، قال:
- ياريتني كنت رميتها في بحر ومجيتش لوجع الدماغ ده.
- هو انت غ.بي؟ جاي تديهاني قدامه؟
- مانا معرفش والله إنه هيعمل كده، مين صفاء اصلا؟
- مرات ابويا.
بصت من البلكونة الدور الأول وقالت:
- يا طلعت، طلعت.
اتوتر ابويا وخبى الدبلة في جيبه ورفع عينه لفوق وقال:
- أيوة؟
- هنزلك السبت هاتلي خضار من الست اللي هناك دي.
- ما تنزلي يا ولية انا ورايا شغل.
- يوووه، ده انت راجل فقري اومال.
كان مراد رافع عينه عليها ومركز معاها:
-احممم هو في ايه يا غالي؟
- هي دي صفاء؟
- اه في حاجة؟
- لأ بس انثى.
- انثى؟؟؟ دي انثى؟؟؟
نزلت صفاء بعد دقيقتين كده وعدت ع الورشة، بصت على مراد وقالت لأبويا:
- أنت عندك بشوات ولا ايه؟
- روحي هاتي حاجتك يا ولية وانجزي، عايز اطلع الاقي الغدا.
وهي ماشية ضحكت لمراد، ده باصصلها!!!!
- انت بتعمل ايه!!! كتك القرف امشي غور من هنا!!
- جرا ايه! انا عملت ايه! انت بتبص لمرات ابويا وانا واقف! قصدي وانا واقفة!
ضحك وقال:
- انت سيد الرجال مش قصدي يا زلط.
- زلط لما يقع على دماغك يعو.رك، غو.ر يا مق.رف.
- دلوقتي مضايقة اني ببص وأنتِ واقفة؟ مش كنتي لسه بتقولي ازاي دي انثى؟
معرفتش ارد كويس والكلام اتلغبط في بوقي، قولت:
- انت انسان ز.بالة وبيئة! وانا مش ناسية اللي حصلي امبارح بسببك على فكرة!
- محدش قالك تجري وأنتِ بتبصي وراكي يا حما.رة، التورتة اترفعت ونزلت طرخ على دماغك شكلك كان عا.ر.
جزيت على سناني جامد، خاف مني رجع خطوة لورا، بدأت ادب على عربيته:
- أنتِ اتجننتي يابت، ياعم شوف بنتك.
- وبعدين يا زلطة!! هو الزبون ده بقى بينك وبينه طار! ياعم مش رجعت الخاتم! متجيش هنا تاني عشان مفيش داعي للمشاكل.
رجعت مرات ابويا تتمخطر بالخضار وبتبص لمراد تاني وتضحك، كان باصصلها تاني ومركز معاها، كسر*تله مراية عربيته.
- ينهار أبوكي اسود!!!! بتكسري المراية!!!
- يا عيال الحارة، تعالو عايزاكم في مصلحة.
ركب العربية زي المجنون وبقى يدور الفرامل وهو مش فاهم ايه اللي هيحصل بعد دقيقة.
اتلموا العيال، قولت:
- عايزاكم تمسكوا زلط الشارع كلوا وتنزلوا بيه ع العربية دي كلها.
- ههه خد الزلطة دي يا عمو، خد دي كمان.
كنت مش قادرة امسك نفسي من الضحك على منظره وهو بيجري بالعربية والعيال بيحدفوه بالطوب، أما صفصف..مسم حبيبتي:
- ليه يابت كده! الراجل معملش حاجة وشكله ابن ناس!
- مش عيب يابا مراتك واقفة تبص للراجل!
- يا مصيبتي!! بتقولي ايه يا مقصو.فة الرقبة!
برق بابا والعصبية جريت في وشه وقال:
- أنتِ بتقولي ايه يابت الكلام ده مفهوش هزار!
- طب واللي خلق الخلق عمالة تبص للراجل وتبتسم.
- اه يابنت ال***.
- اااه دي كدابة ياخويا.
مسكها من شعرها وطلع بيها البيت، وقفت ارقص في نص الشارع مع العيال.
-__________________
طلعت بالليل الشقة لقيت مرات ابويا قاعدة:
- والنعمة هجيبك من شعرك.
- ششش ريحي يا صفصف بدل ما اكمل عليكي مع ابويا، بتبصي لواد قد ابنك؟
- ابني؟؟ مسم، ده منزلش عينه من عليا يابت، ولا تكونيش غيرانة عشان مشافش فيكي ريحة أنوثة.
- وأنتِ اللي فيكي؟ ده أنتِ صابغة شعرك اسود، روحي روحي اتنيلي نامي كتك الهم.
ـــــــــــــــــــــــــــــــــ
دخلت اوضتي لقيت الفون بيرن:
- ناهد!!!
- وحشتيني.
- حقك عليا والله، انا قولت مش هتعرفيني تاني.
- أنا فعلا مش هعرفك تاني .
- ايه الإحراج ده!
ضحكت وقالت:
- بس من ورا اهلي هعرفك، بقولك ايه، بكرة عايزاكي في موضوع مهم اوي اوي هيغير حياتك يابت يا مرام.
فرحت وقولت:
- هيغير حياتي ازاي!!!
- بكرة هقولك، بس عايزاكي تقابليني بدري عند جنينة الورد.
- عيوني.
ـــــــــــــــــــــــ
|تاني يوم الصبح|
- بتقولي ايه يا ناهد! أنا اشتغل طباخة!!!! أنتِ اكيد بتهزري، اطبخ مفكات ولا مواتير عربيات بقى؟
- يا غبية افهمي، هما عايزين بس بنات يقفوا يساعدوا الشيفات وكده مش تطبخي بالمعنى الحرفي، ده أنتِ هتاخدي في الشهر عشرتلاف جنيه.
قومت وقفت من على الكرسي وقولت:
- ايه!!! كام!!!
- زي ما بقولك كده، بالنسبالك مبلغ كبير و..
- أنتِ هتزليني يا ناهد عشان أنتِ بنت أكابر يعني.
- يا حيو.انة مش ده قصدي، قصدي المبلغ ده هيغير حياتك يا مرام، هيخليكي تطلعي من شخصية الراجل دي بقى وابقي بنت يا مرام، احلقي شنبك يا مرام.
صرخت وقولت:
- لأ شنبي لأ!!
ض.ربتني وقالت:
- ودني، خرمتي ودني أو.لعي بشنبك اللي فرحانة بيه ولا كأنه شنب محمد علي.
- طب..طب هو الشغل ده فين؟
- فندق لاڤيتا.
- هي مش دي شركة علب الجبن؟
اتنهدت وقالت:
- لاڤيتا يعني الحياة بالإيطالي، الفندق كله شيفات إيطاليين أو معظمه.
- نعم يا سكر؟؟ وأنتِ شايفاني عارفة اجمع مصري لما توديني مع خواجات!
- متقلقيش في هناك مصريين عادي هما هيقدروا ده، طالما الحوار عن طريق واسطة هيتصرفوا، انا قولتلهم إني عن طريق خالي وكده بس خالي مايعرفش خدي بالك.
- يالهوي يابت يا ناهد!! يعني الفلوس هتجري في أيدي!!! مش قادرة أصدق يا ناس!!!
ضحكت وقالتلي:
- إن شاءالله يا مرام، أنتِ طيبة والله، هو صح حوار الواد الطباخ ده كان موجود بجد في الحفلة!!!!
- اه يابنتي، ده جيه صح امبارح وخليت عيال الحارة ياكلوه علقة.
ضحكت جامد وقالتلي:
- هو عمال يلف وراكي ليه!
- لأ بتحصل صدف عادي، بس عيل بارد كل ما اشوفه همسيه بعلقة، المهم هستلم الشغل من امتى!
- من بكرة.
- يالهوي طب وابويا!
- اتصرفي بقى..هو عموما الشغل من ستة الصبح ل١٢ الضهر يعني ممكن تلحقي ترجعي قبل ما أبوكي يفتح المحل اصلا.
- العب يا ناهد ايوه بقااا.
ــــــــــــــــــــــــــــــــ
رجعت بالليل لقيت ابويا قاعد في المحل بيعد فلوس قام مخبي نصها.
- يا مسا السرقة يا طلعت.
- سرقة ايه ياض!
- بلاش الشغل ده شوفتك، فلوس الدبلة مش كده؟
- اه، عايز النص مش كده؟
- اممم، لأ، خليهوملك يا عسل.
- وده ليه الكرم ده كله إن شاءالله؟؟
- عادي يعني ابويا طول عمره تعبان عشااني من حقه ياخد شوية فلوس بردو.
ابتسم وقال:
- عفارم عليك ياض يا زلطة، ابن اصول بصحيح ياض، وعشان كده اطلع ارتاح النهاردة مفيش شغل ليك.
- يا اخي الله يكرم اصلك والله تصبح على خير يا طلعت.
وقفت في حوش العمارة اضحك وطلعت.
ـــــــــــــــــــــــــــــــ
|تاني يوم الصبح|
- يالهوي يا ناهد هيقبلوني انا ازاي في المكان ده؟
- متقوليش كده يا مرام على نفسك.
- مش شايفة المكان؟ ده بينور.
- طب تعالي اوضة المدير اهيه.
دخلنا اوضة المدير، اتكلمت ناهد:
- صباح الخير استاذ علي.
- صباح النور آنسة ناهد.
- مرام اللي كلمتك عنها.
بص عليا من تحت لفوق وقال:
- مرام؟؟؟
رديت بإحراج:
- أيوة أنا مرام يا باشا.
- اممم، بتفهمي في المطبخ؟
بصيت لناهد في توتر:
- هي مش هتطبخ قد ما عايزة تبقى مساعدة يعني.
- اممم طيب يا آنسة ناهد، تقدر تستسلم الشغل، الدور التاني.
خرجت من المكتب فرحانة اوي وبتنطط، طلعت الدور التاني معاها بعد ما استلمت اللبس ولبسته، قالتلي:
- بصي، شايفه الشيف اللي هناك ده؟ هتقفي جمبه تساعديه.
- ماشي.
- عايزة حاجة؟
ابتسمت وحضنتها، قالتلي:
- سلام يا حبيبتي.
قربت من الشيف بلهفة:
- صباح الخير يا باشا.
لف وراه لقيت البسمة اختفت من على وشي :
- يا نهار أبوك مش فايت!