رواية سجين الحب الفصل السادس6بقلم زهراء الحريري
نفــــــــــس
أخبرنك بدمع العين والشل
وانت اللي تخيط الجرح والشل
تبي تبعد عليَّ شلون وشيل
اذا ناوي الرحيل ابتصر بيه
آدم
صبح ومسى وبالليل بويه اندعيلك
ومن حيلي اخذ الحيل حط على حيلك
❀ـــــــــــــــــ؞؞؞؞؞؞ــــــــــــــــ❀
لــــــــــؤي
نزل سراج من السيارة وهو يصيح باسمه، باوع علينا مستـغرب نزل التلفون من اذانه
يريد يسال واجاه بوكس من سراج على وجهه شمره على سيارته
التفت النار تجدح بعيونه آصف ونضرب شيلزمه النا بعـد
سراج:- انت شلوووون اطـلع هاشم
آصف:- وانت شكو
اخذ الاذن منك
هجم على سراج صاروا واحد يضرب الثاني واني بيناتهم ادفع هذا وارجع على هذا اكلت ضرب اكثر منهم
لؤي:- ولكم كاااافي
خلي ندخل للبيت
من أنعل جلاب اهلي من وراڪم
سراج:- ولك هذاااا مجرم
اغتصب انسانة بريئة
وووين ضميرك لو لان يخصك غمضت عيونك عنه
اخلاصك للمهنة وينه
ضرب سراج على وجهه وهو يصيح
ـ اي واخذ عقوبته وزيادة ما عندي حجي وياك الموضوع مايخصك لا تحط راسك بيه
رجع عليه سراج ضربه على صدره كطع النفس عنه
ـ يخصني مادام اكو انسانة بريئة بالوسط يخصننني
وقضيته قضيتي شلون تلعب من وراي ولك والله ما امركها الك
الناس التمت علينا جتفت سراج الي يعت بروحه مني ويصيح
ـ عوووفني لؤي لا والكاظم اطبكك وياه ولك عووفني لخاطررر ربك عووفني
نهض اصف يريد يجي على سراج والناس الموجودين لزموه وكلها تحجي سوة يردونهم يهدون ڪتله واني اسحل بسراج
لـؤي :- ولك عار شلون اطلعه
ماصارت وكفاتها ويا مرتك وبناتك بعينك وبزتها
فرفحت روحـه بين اديـه تملخت امتوني كوة مسيطر عليه شفت اصف اللي جان يجر بروحه منهم هدأ يباوع ورانا التفتت براسي ارغد نزل من السيارة مشيته مو طبيعية حن روحه خاوية
اجى علينا وخرنا من طريقه وهو يمشي لآصف احسه كوة يجر النفس مبين من اجتافه تصعد وتنزل
حط ايده على متون اصف، سراج عت نفسه مني وهو يدفعني ويتنفس بغضب يباوع عليهم وعيونه تجادح
ارغد:- ابن عمك لو عدوك
يول ابن العم اسناد انت شنوو؟
ليش هيج طعناتك وياي
ڪول خوية شنو مسوي وياك اني وهيج تجازيني
آصف:- خليني افهمك أرغد
ضربه بظهر جف ايده على جانب صدره مرجع جتفه ليوره الناس متكتره وتباوع صرنا مهزلـه
ارغد:- ما اريد تفهمني ما اعبرلك بعد، خلصت عمري امشي وياك مثل الماي الصافي تغدرني ليش
آصف:- ما غدرتك والله بس لأجل عمتي طلعته
أرغد:- وعمتك اني مقصرر وياها،يول السوا وياي لو مسوي ڪبال عينك جان جتلته
لزمه بضعف من ياخة دشداشته وكوة يحجي
ـ ما اسلم من غدرك ليما ينكطع هالنفس
ولك اصف انت شنو اللي تريده مني بشنو أذيتك احجي
آصف:- عمتي مررريضة باحتشاء عضلة القلب طلعته لاجل عينه والله
خلي لخاطر امه لا يوصلك ولا يدخل بغداد اعتبره لسه مسجون لخاطر عمتي
أرغد بيك شي
اررغد
طاح بين اديه ركضنا عليهم الزلمه كوة يجر النفس اصف يصيح باسمه وسراج يبعد بيه عنه
ـ ووخر خلي الهوا يوصله
اشرا للناس بيده يبعدون كعده وهو يسند ظهره بصدر اصف
سراج:- ابو ادم حاول تتنفس بهدوء
حاول يتنفس شهكة وعيونه تعلكت باعلى الجفن
سراج:- لؤي شغل السيارة بسرعة
ركضت شغلتها واني اتصل على اخوانه قربت السيارة الهم شالوه حطوا ورا اصف صعد يمه وسراج يمي طلعت للمستشفى واني احجى ويا ڪرم
سراج ملتفت عليهم اباوع على اصف بالمرايه لازمه وبيده يفرك على صدره
سراج:- ارتاحيت باوع شسويت بالزلمه شتكول لابن اذا مات
اعوذ بالله من قهر الرجال
ما رد عليه ملتهي يحجي ويا ارغد اللي نكلب لون وجهه
سراج:- لؤي دووسلها الزلمة راح يمووت
اصف تبنج بس يباوع عليه وسراج يستعجل بيه تدوهنت احس الزلمه صدك راح يتفرهد من بين ادينا راسه رجع على صدره
سراج:- ثبت راسه لا تخليه ينزل على صدره خلي يتنفس
ظل اصف منزل ايده بس يباوع عليه
ـ وكف السيارة لؤي خلي ادور عليهم ما اكدر الوحه منا
وكفتها بسرعه نزل على السريع صعد يمهم الجامات مفتوحة حط جفه خلف رگبته سند راسه رافعه شويه وهو يستعجل بيَّ
••--------------- ♥♥♥ -----------------••
آدم
كمشت اصابعها اعلمها تحسب ابوس اصبعها واڪول
ـ هذا واحد وهاي بوسه وحدة
وهاي صار اثنين وهاي بوستين
استمريت هيج للخمسة كتلها يله احسبي وحدج
كالت واحد بوفه
ـ اي بطلة
وراء الواحد شنو
طلعت اصبعها الثاني كالت
ـ نينن بوفه
ـ ورد واللي وراها
ـ ابعه بوفه(اربعه بوسه)
ضحكت شلتها كعدتها بحضني لزمت جف ايدها
ـ عجل وين الثلاثة يحلوة اكلتيها
وهذا الجف الحلو ما تقنعني بوساته آكله هسه
ضحكت وهي تدفع راسي عنها رجعت اعلم بيها اني اكول رقم وهي تطفر للسته
ـ منو علمج على السته انتظري تعلمي القبلها بالبداية شاطرة
ضحكت ورجعت تكول فففه(سته)
رفعت راسي لامي اباوع عليها مو على طبيعتها والتلفون بيدها
ـ ها يالغالية
احسج مو على طبيعتج
باوعت على قمر أبتسمتلها رفعت عينها اليَّ
نفس:- ما اعرف يوم احس اكو ضيق بگلبي
أبتسمت اجيت اكولها هذا اشتياق لابو آدم باجر يجيج، بس استحيت امي كبالي حاطه حدود بينها وبين الوالد ما اذكر مرة شفتها كاعدة يمه واني موجود
آدم:- اسأل الله ان يبدله بطمأنينة
ابتسمت وهي تكول آمين يارب
نزلت قمر من حضني دخلت لغرفتي اريد انام والعصر اروح على المجمع نشوف شنو كمل بيه
هسه تمددت ودك التلفون عند راسي اخذته عمي ڪرم المتصل
ڪرم:- عمي آدم وين انت هسه بالبيت؟
رفعت ظهري كعدت، نبرة صوته قلقتني
آدم:- اي بالبيت خير عمي؟
سڪت واسمع اصوات يمه كتله الو عمي وياي شصاير يمك؟
كرم:-: ابوك تعبان ونقلناه للمستشفى
وكفت بسرعة ما اجى ابالي غير راجع اليوم ومسوي حادث اريد احجي ماڪدرت بلعت لساني
كرم:- هساع الأطباء دا يفحصوه تعال بسرعة
اريد امشي للباب افتحه حسيت الغرفة تميل بيه كوة كدرت انطق
آدم:- حـادث؟
كرم:- لا جان يمي وما اعرف شبيه فجأة وكع
كعدت على السرير مهدود حيلي مو تلفوني بيدي كانه شايل شي ثكيل ماكدرت ابقى رافعه وكع بين رجليه
اخذت نفس قوي احاول اهدأ اضطراب نبض كلبي اللي صرت احسه بكل جسمي ينبض
ـ اللهم لا سهل الا ما جعلته سهلاً
دنكت اخذت تلفوني فتحت الباب امي بعدهي بمكانها وعلى نفس وضعها
آدم:- يمــــه
دحكت عليَّ كالت ها يروحها
آدم:- ابوي
سڪتت بس واضحة الرجفة الطلعت ويا صوتي، نهضت من مڪانها والخوف نرسم على ملامح وجهها باوعت على التلفون
نفس:- شنو اتصل عليك؟
اني اتصلت عليه بس تلفونه مغلق
كمشت ايدها احاول ابيـن طبيعي
آدم:- ابوي بالمستشفى
نفس:- يارب لطفك
يارب سـلم
لك يمه شبيه ابوك
حجيت واني ارفع التلفون لذاني
فجاة واكع عمي كرم اتصل كال نقلوه للمستشفى
كعدت وهي تحط ايدها على صدرها
نفس:- يارب احفظه ولا تشوفني بيه ما يوجع گلبي
ولك يمه آدم احس بالضيق اڪثر
سألت عمي شنو الوضع كال بعدهم ملتمين عليه يمكن راح ينقلونه للعناية
نزلت عيني على امي ترجف ملامحها قطعت الاتصال حاولت اتماسك خـايف عليها
آدم:- يمه اني راح اروح من اوصل اتصل عليج وان شاء الله مابيه شي
كمشت ايدي كالت اني وياك ما اظل هنا وابوك بالمستشفى لا تروح وتعوفني تلكاني ميته هنا بمكاني
آدم:- اسم الله عليج عمرج طويل
لا تخافين مابيه شي يمكن الضغط صاعد ساعة ساعتين ونرجع
هزت راسها لا
نفس:- لا گلبي ما مرتاح اروح وياك
باوعت على قمر تلعب بالبايسكل
آدم:- يله بس استعجلي
دخلت لغرفتها عضيت اصبعي افتر بالصالة حسيت سقف البيت نهدم على راسي
اخذتها وطلعنا بالبداية نزلت قمر على عمتي سمر ظلت تبجي ورانا ما متعودة تبقى بمكان بدون واحد منا وياها
طول الطريق ماڪو صوت بالسيارة غير اصوات الدعوات مني ومن امي
نفس:- يا رب فوضت امري وامره اليك
دارت راسها عليَّ حجت وهي تبجي
ـ مابيه شي الصبح حجيت وياه حتى ويا قمر يسولف وطبيعي وكال باجر الصبح يمكم يمتى رجع وشلون وكع
دحكت عليها ورجعت عيني على الطريق ما عرفت اصبر لا عليها وضعي مو احسن وضعها اتصلت على عمي كرم اسأله شصار وياهم كال اخذوه للعنايـة
••--------------- ♥♥♥ -----------------••
لــــــــــــــــــؤي
واڪف بصف سراج لازم ايده خاف يرجع عليه حجى بستهزاء
سراج:- متأثـر ڪلش
باوعت على آصف كاعد على الڪرسي ومدنك راسه بين اديه
واخوان ارغد وولد عمه واكفين لهناك يباوعون عليه بغضب من اجوا ورانا عندهم خبر بطلعة هاشم
لؤي:- لا ترى صدك متأثر
يعـز ابن عمه اعرفه زين
بس هو مايعرف يتصرف يريد يمشي الكل على هواه وكون محد يكله ليش هذا وليش ذاك
سراج:- اي شلون معزة الله يحرمنا منها
اكلك اشو هدني خلي اروح ظلتي هنا شڪو
لؤي:- انتظر عيب من الولد غير انت جبته شلون تروح خلي نشوف شيكولون عن وضعه ونروح سوه
سند ايده بالحايط يطكطك بالسويج، يباوع بخزرة على آصف
سراج:- لوما ابن عمه يدخل بيناتنا جا هسه الا طالع بروحه هالجلب النكس هذا
لؤي:- رحمه لاهلك اسكت تكطعت اديه وانه احيز بينكم خلي نشوف الزلمة شبيه وبعدين لكل حادث حديث
شفت ادم لازم ايد امه يمشي بيها جاي علينا باوعت على سراج بعده خازر اصف وهما صايرين بظهره
ڪعد امه على الكرسي باس راسها وراح على عمامه يسال على أبوه
اشر عليه سراج بيده
ـ هسـه هذا شنو ذنبـه؟
اذا عرف يـدمر هو وامـه
بسبب هالعار صاحبك
اسمعه يسال بعمامه على وكعت ابوه وعلى كلام الاطباء
كرم خزر اصف وجابوه كاله جنا سوة يشڪي من راسه وفجاة وكع
آدم:- مو على اساس باجـر يجي!
ظلوا ساڪتين ما عرفوا شيجاوبونه
مسح راسه راح على باب العناية دمعت عيني عليه واني اشوفه شلون يلوب رجع على عمامه يكلهم مابيه شي البارحة نحجي مايشكي من شي والصبح اتصل بالوالدة وقمر
ظلوا ساڪتين بس عيونهم على آصف باوعت على سراج مجتف اديه صافن عليهم رجعت عيوني على الكاعدة وراء ظهره فاتحه اديها على رجليها مدنكه راسها تبجي ومبينه جاي تدعي
رجعت عيوني على ادم واكف مقابيلنا ساند ظهره بالحايط ويردد بـ
ـ اللهم يا حي يا قيوم
نفخ سراج وهو يستغفر كال لا حول ولا قوة الا بالله العلي العظيم الك بيها حڪمة ربي
اجى يدور حطيت ايدي على متونه مانعه، باوع عليَّ
سراج:- ها!!
لؤي:- ماڪو شي بس رجلي طاحت من الوڪفة
سراج:- روح اكعد يم هالجلب
رفعت راسي بحركة لا
سراج:- دروح اكعد لا تظل واڪف ترى مابيه اسندك صاحبك العار كسر
نفـس:- يمه آدم
كطع الحجي عيـوني عليه تغيرت اوضاعه يحرك بعيونه منا ومنا ، ادم راح عليها التفتت وراي مدنك عليها تسأل بيـه وهو يجاوبها
التفت سراج عليهم ساند ظهر بالحايط مجتف اديه فص عينه صار احمر والنفس تخربط
لؤي:- نزل عينك لا ينتبهون
بعد عينه منها يباوع عليه، باوعت بتجاهنا انتبهت على وجودنا
ظلت صافنة عبالي متفاجئة بوجود سراج بس من شفت عيونها تتنقل بيناتنا عرفت على منظرنا، صارت عيونها على اصف اللي واضح الها من بيناتنا
نفس:- ابوك وين جان؟
آدم:- ويا عمي ڪرم
كالتله نادي اليَّ
راح على عمه وهي تباوع وراء صديت على سراج يباوع عليَّ
سراج:- كتلك خليني اولي لزمتني عيب وعيب
لؤي:- اها وانت لو تريد تروح اكدر الزمك اني
كول اني اريد اطمأن على وضعه واروح
سراج:- سـد حلكك الزلمه طاح بيناتنا شتريدني اسوي ادور ظهري وامشي
وبعدين انت السبب انت الي جبت اصف علينا
لؤي:- اهااا
اني جبته مو انتي اللي عرفتني عليه
ناسي لو اذكرك ايام الكلية
وبعدين ترى اني ناسبته ماصرت ابوه وكل مايسوي مصيبه ترجعون عليه والله حلوة هاي
باوعنا عليهم كرم واكف كبالها تسال بيه شجاب ارغد عليه، وهو يجيبها منا ويحطها منا ومبين عليها مامصدڪته
سراج:- لؤي بروح الاعزاز روح عليها مبينه شكت واذا عرفت راح تتاذه
رحت عليها سلمت سألتني على منظرنا كدرت ابعده شڪها ورجعت على سراج باوعت على آصف بعده على نفس الكعدة وتلفونه بجيبه ماسكت
سراج:- بعد ماكدر اني انزل جوه وعود اتصل بيه من تحصلون خبر
ماكدرت الزمه خله وراح مر كبالها وهو يلتفت براسه على الجهه الثانية ليما عبرها
كعدت على الكرسي منتظر وياهم باوعت على ادم كاعد كبال امه يمسح بدموعها ويصبر عليها
اجوا اهله ابوه وامه وعمامه حتى اخته خليت ونزلت جوا لكيت سراج كاعد كعدته يمه
سراج:- ها بشر شلونه وضعه
لؤي:- على حطت ايـدك
بعده فاقد ومايعرفون علته منتظرين الفحوصات
استغفر وهو يرجع ظهره مد ايده اخذت منه بطل الماي شربته كله احس ريجي يابس الله يبس ريجك آصف
نزلوا كلهم بس ادم واصف فوك والنسوان وياهم كاعدين لغاد من عدنا يحجون على آصف شلون مطلعه وڪرم يوصي بيهم ما يجيبون طاري ڪبال آدم وامه
سراج ربت على رجلي وكام سلم عليهم وهو يدعيله بالسلامه تشكروا منه على وڪفته كالهم ما تكاطعت الدنيا واحنا اهل ان شاء الله، مشى واني بقيت وياهم
••--------------- ♥♥♥ -----------------••
نفـــــــــــــــس
مر عليَّ دهرين مو يومين احس روحي طايرة مني والخوف ملازم گلبي النوم ما مر على عيني، مڪابله الغرفة اللي طلعوا الها وممنوع ندخل عليه عيوني على الباب واحس نفسي دا اشوفه رغم الباب مسدود
ياريت هاي الوڪعة الي مو الك لو بيدي الا انثر سنين عمري على طولك ولا اشوفك هيج، ڪوم وشوف حالي ادور صوتك وطولك بين صفناتي ربي لا تكتبلي عمر بدونـه هذا مو بس زوجي هذا ڪل أهلي
اجى الدكتور هالمرة بس واحد نهضت من مكاني اباوع عليه فتح الباب تقدمت عيني صارت عليه وجهه منفوخ وازرك رفعت ايدي لزمت صدري احس بتمزق گلبي
آدم:- قوي گلبج يمه
باوعت عليه ما انتبهت يمتى اجى لان كاعدين جوا بس اني هنا، رجعني على الكرسي بدون مايباوع على أبوه
آدم:- المؤمن مبتلى ورب العالمين اذا أحب عبد اختبره حتى يرفع منزلته ويشوف صبره وتمسكه برحمتـه الواسعة
ظليت اباوع عليه شفته يابسه والعيون ذبلانه التعب والحزن واضح عليه
نفس:- لا تطلب مني الصبر والقوة وكعت ابوك هاي هدت حيلي والله خايف من ڪل ساعة تمر لا تفجعني بيه
آدم:- اصبر روحي بهذا الحجي يمه بس گلبي نار والروح لايجة
دنك راسه يخفي دموعه مني الرجفة لازمه صوته وخانكته العبرة
ـ احس روحي تنسحب مني كل ما اوكف كبال هاي الغرفة بس ما بيدي غير الصبر والدعاء والله ما يضيع صبر عباده
راح يرجعلنا ابـوي ما يعوفنا؟
والله يمه الهوا كوه اتنفسـه لو صار شي لاسامح الله اني ماعيش
سحبته كعدته يمي واني احضنه بيدي دموعي تصب واني امسح على ظهره صار كبالي رجال حسيت بغرابة منه جان صافن علينا وبس شافني اباوع عليه بسرعة طلع من القسم مسحت دموعي بسببهن ماشفته زين
نفس:- ويا منو صعدت؟
بعد عني وهو يبوس راسي كال وحدي البقية جوه ليش؟
نفس:- ها عبالي وياك احد
ظليت اباوع على المكان اللي جان واكف بيه يجوز هيج صدفة ما اعرف شبيه ما ارتاحيت كل ثانية والتفت على نفس المڪان
طلع الدكتور وكف ادم وهو يوكفني وياه سألنا كال على وضعه مثل ماهو ماكو تغير ننتظر التحاليل تطلع
باوعت على آدم صار يومين نفس الڪلام وكل مرة تطلع تحاليل وفحوصات وما يبين بيها شي يسون غيرها لسه محد ڪدر يوكف على علته
••---------------- ♥♥♥ ------------------••
اثيــــــــــــلة
احتاريت شلون المها لحضني بواجيها مو طبيعية اريد احطها بروحي واضمها تمنيت موتي ولا اسمع صوت بواجيها اللي فتت گلبي بيه
رفعت عيني لـ مجد يحجيلي شبيها
مجد:- تأثرت على عمتي ام هاشم
سألته شبيها عمتي سولفلي اللي صار رفعت ايدي لراسي اخ منك يا آصف
احتاريت شلون اسكتها ربطت رجليه واديه حتى ماڪدرت اكوم اسوي عشا لعمها خليت درة تجي
نايمه بحضني وتشهك شڪول عليك اصف من عفتها غاد بستها بشعرها واني اشمه
ناديت على ڪوثر تجيبلها مخدة انومها عليها
جابت مخدة وجرجف بس بعدت راسها من صدري فتحت عينها رجعت حضنتني
ـ ماما نكسرت رگبتج خلي انومج على المخدة
هزت راسها لا بدون ما تحجي كتلها خلي اعشيج
هماتين هزت راسها لا وهي تحاوطني بيده احس برجفتها حجيت وياها احاول اطمأنها على عمتي
ـ اتصل على اوس اسأله عليها
ظلت ساكته، جابتلي كوثر تلفوني اتصلت على اوس سألته عليها كال وضعها خطر عمتي مريضة باحتشاء العضلة
استمع لـه وادحك على زمزم اللي لسه حاضنتني احس رجليه خدرت
تنهدت بحزن على عمتي اللي ماشافت راحـة بعمرها كتله
ـ امانه الله اتصل بيه كلما يصير شي وان شاء الله ما نسمع منك بس الاخبار اللي تسر الخاطر
ذبلت البنت واني محتارة بيها صار يومين على رجعتها اليَّ احسها فاصلة عن الدنيـا
كعدت على السرير اوخر بالشعر النازل على جانب وجهها واسفط بيها وراء اذانها
ـ زمزم ماما اشو اكعدي
فتحت عينها بقت ادحك ثواني كبالها ورجعت غمضتهن دنكت واني ابوسها بوجهها
ـ اكعدي يروح امج
كولي شنو تردين تا اسوي الج
اخذج لبيبي تشوفينها
هزت راسها لا
ـ ليش خلي نروح اني وياج من تشوفينها ترتاحيـن
وهم هزت راسها لا احتاريت شلون احتوي صدمتها ما عفت احد ما جبته يحجي وياها بلكي تسمع منهم على نفس الوضع يت
ولوما وضع ارغد اللي زمزم لسه ماتعرف بيه جان اتصلت على نفس بلكي تكدر تحجي وياها بس عيب منها هي بيا حال
ومن اريد اتصل على ابوها تمنعني وتظل تبجي والكلمة الوحيدة اللي تنطقها ما اريده شكيت اكو شيء غير اللي كال له مجد اتصلت عليهم كلهم نفس الڪلام نصدمت بوكعة عمتي وضرب ارغد لهاشم غيره ماڪو
حطيت ايدي جوا راسها رفعتها لحضني بستها براسها
ـ تعالي اتغدي ويه اختج واخوج
حركت راسها لا حاولت اقنعها وهي رافضة ابتعدت من حضني رجعت تمددت بمكانها
طلعت اتصلت على آصف حجيت عليه وحملته السبب لان هو خلاها غاد
يحاول يهجد بيه واني مستمرة بالحجي عاط بيه اي احجي بعد وارفعي صوتج خليها تسمع وهم تنهزم منج
سكتت واني اعض اصبعي سمعت صوته تنهد كال العصر اجي من حديثة وامر عليكم
رحت اخذت علاجي ادحك على اصابع اديه ترجف حاولت اسيطر على نفسي القلق يتعبني وبنتي بحاجتي بدون فايدة ماڪدرت بس اتوتر تهجم عليَّ ڪل الذكريات السودة تاخذ عقلي لدوامه من الصراع احس نفس دا اعيش الحدث هسه نفس المشاعر والالم
ما اكدر اتصل بنفس اتصلت على ترتيل اجتني بسرعة كتلها ابقي هينا يمي اخاف من نفسي اتخربط واوكع
باوعت على جفوف اديه اصابعي بعدها ترجف واقوى احجي ويا روحي كافي اجت لحظة وكعت مصطفى كبالي …
تـــــــــرتيل
لزمت اديها افرك بيهن واحجي وياها
ـ عمه رياحين يمكن حامل
سمعتها دكول الماما متاخرة عليها صار 9 ايام
غمضت عيونها حاولت اتعامل وياها مثل عمتي نفس شلون من تحاول تهديها
ـ ها عمه اثو شو ما علقتي على الخبر
رجعت حجيته الها بس بهدوء بدون صوت واني اضحك بوجهها
حسيتها رجعت وياي للواقع كالت صدك عمه؟
بداخلي الوم بنفسي بس مجبورة، عضيت شفتي الله يسامحني على هاي الجذبة شسوي ما اجى براسي غيرها وهن منتظرات هذا الخبر
ـ اي هسه سمعتها واني اجيج
رفعت اديها وهي تكول يا الله هيج ونشوف ضنى ارسلان
اجت تتصل على رياحين كتلها لا فدوة هي كالت لماما لاتحجين الا نتاكد ضحكت وهي تلم وجهي بين جفوفها باستني بخدي بقوة ضحكت واني اكرص حنكها
عمتي اثو نموت عليها لو الف الدنيا ما الكى مثل عماتي وحنيتهن اشكد استغرب من اسمع سوالف من البنات اللي وياي يحجن على عماتهن بالمصطلحات المكروها حيايا وغيرها
ظليت اسولف عليها سوالف شي ما يشبه شي بس كدرت اطلعها من الحالة اللي اجتها
العصر اجى عمي اصف مبين عليه التعب والارهاق وشكله مخربط مو مثل ڪل مرة نظل صافنيني على كشخته واهتمامه
دخل للغرفة على زمزم، واكفين بالباب نباوع عليهم يمسح على راسها وهو يصحيها
آصف:- جمارتي.. زمزم بابا اكعدي
نمرتي اشو بله اكعدي كافي نوم خلي اشوفج
دنك وجهه على كصتها يتحسس حرارتها بشفته
آصف:- اكعدي بابا
فتحت عينها صفنت بوجهه ابتسم وهو يحجي وياها
ـ شبيها جمارتي
كالوا مخلصتها بس نوم
خزرته ضحك وهو ينقر على ارنبة خشمها بصبعه
ـ اليوم بالخزرات تستقبلني النمرة
دفعت ايده بعصبية نزلت من السرير اجت على عمتي وهي ما مسيطرة على مشيتها حضنتها ضامه وجهها بصدرها
زمزم:- خلييي يروح منا
خلي يروح
ظل يباوع عليها مصدوم شبيها اجى سحبها من حضن عمتي
ـ زمزم بابا
دحكي عليَّ
سحبت راسها ضامه وجهها بحضن امها وهي تصيح ماريد روح منا ماريد اشوفك
عمتي اثيلة حاضنه راسها تمسح عليه بخوف وهي تصيح اسم الله ماما اسم الله
وعمي اصف نخبص يريد يعرف شبيها يحاول يسحبها اله وهي معاندة ظل يباوع عليها بحيرة وعيونه تسأل بعمتي على وضعها
اثيلة:- اطلع آصف
كالها ما اطلع الا افهم شبيها هاي مو زمزم
زمزم بنيتي اشو تعالي
حاول يسحبها وهي حاضنه امها وتبجي ماريد
كالتله عمه اثيلة:- هو هذا وضعها من جابها مجد لسه
ارتجى بجف ايده بأطار الباب يباوع عليها بتعب وقلق نزل ايده تلمس جيوبه طلع تلفونه وطلع للصاله كعد على القنفة يباوع بالتلفون
عمتي رجعت زمزم للسرير تحاول تهديها وهي ترد خلي يروح منا
اثيلة:- ليش ماما هذا بابا عزيزج
تمد اديها وتحركهن ماريده ماريده خلي يروح نزلت ايدها لزمت صفحتها
اثيلة:- راح بس اهدي دحكي بوجهي
شوفي بس اني هينا وياج
اخذتها لحضنها تحاول وياها حتى تهدأ اباوع عليها ودموعي تصب هاي مو زمزم اللي متعودين عليها ما اذكر شايفة زمزم تبجي دائماً تعارك وتغلب الكل بصوتها ولسانها اكبر واحد كبالها تسكته مايكدرلها بابا وعمي دائماً يكولون لسانها لسان ابوها ما تتلاسن اني مو قريبة الها دائما اتجنبها لان حادة بالكلام واني من النوع ما احب المشاكل وبيني وبينكم جبانة
طلعت للصالة عمي اصف يباوع على تسجيل كاميرات سد التلفون وهو يتصفن رفع راسه سألني عنها كتله تحاول عمتي تهديها
مسح وجهه باثنين اديـه يباوع على كوثر ومصطفى اشرلهم يجون لعنده.
••---------------- ♥♥♥ -----------------••
آدم
مر أسبـوع وابوي على وضعـه بعده فاقد، رجـعت امي لقمر تبجي ومحد يڪدر يسڪتها حتى متغيرة اميرة اخوها، رجعت للمستشفى صعدت لغرفته اجر بروحي كلهم شافوه الا اني ما اڪدرت ادخل واشوفه اعرف نفسي ما اتحمل شوفته هيج
وكفت كبال باب الغرفة ظليت حاير باوعت على مكان امي رحت كعدت بيه مدنك راسي بين اديـه
سمعت صوت باب القسم نفتخ رفعت راسي مجموعة من الاطباء يمشون بتجاهي فتحوا باب الغرفة ودخلوا واكفين محاوطينه ما اشوفه من بينهم
حسيت بأحد كعد بصفي التفتت عليه عمي سراج ربت على كتفي
سراج:- قوي نفسك لا تيأس من رحمة الله
آدم:- ونعم بالله
رجعت اباوع عليهم يتناقشون بحالته دنكت راسي بين اديه ومن سمعتهم شاكين عنده التهاب السحايا نهضت بسرعة سألتهم بدون ما اباوع عليه جاوبني الدكتور
ـ ما متأكدين مجرد احتمال نسوي الفحوصات اللازمة يلا نتأڪد
ماڪدرت اتماسك رجعت خليتهم بظهري كعدت بالكاع منزل راسي على ركبي انهاريت هذه ابوي وصاحبي خايف والله خايف احسه راح يروح مني، عمي سراج كعد كبالي يريد يرفع راسي، يحجي وياي
سراج:- ابوية انت الطبيب ڪال احتمال مو تشخيص نهائي
حتى لو طلع صحيح الا سامح الله والله يبعده عنه
ترى العلاج موجود والله سبحانه اكبر من كل مرض لا تستبق الاحداث وخليك قوي
كوم ادخل على ابوك من تشوفه ترتاح
هزيت راسي لا كتله ما اڪدر اتحمل شوفته بهذا الحـال اذا شفته والله اوكع وياه خليني هيج
سراج:- لا حول ولا قوة الا بالله العلي العظيم
ساعدني انهض كعدني على الكراسي البعيدة عن الغرفة ورجع وكف وياهم ظليت مدنك راسي بين اديـه
ـ يا ربي ما عندي قوة الا بك ولا حول ولا قدرة الا منك انت اعلم بحال لا تكسر گلب أمي ولا تحرمني من ابوي واجعل رحمتك أوسع من خوفي ولطفك اعظم من كل ما اخشاه
كملوا الاجراءات الازمه خليتها بيني وبين عمي سراج كتله ما اريد احد يعرف الا تبين النتائج
ثـاني يوم الظهر طلعت من الجامعة لوما عندي امتحان ما اداوم رغم ما جاوبت بس حضرت والي اعرفه كدرت عليه بس مايطلع درجة نجاح
صعدت بسيارتي حطيت راسي على الستيرن حار وحرارته بكصتي تلسع
بجيت لحد ما فرغت كل دموعي
رجعت راسي على الكرسي امسح بوجهي واني اردد اللهم يا حي يا قيوم
شغلت السيارة طلعتها من الكراج تخيلت صوته وهو يصيح بوية آدم
ـ آه يابوية
اسوق وعيوني مغوشة من الدموع كل ما اصفن يجي موقف النـا يخنكني ويترس روحي عبرات مكتومة ما اڪدر اطلعها
آدم:- الا فراگك بوية مو وقته
لا تخلي ابنك غريب بهالدنيا وكفت بـ الترفك لايت والسيارات تمشي وتوكف وصوت الهورنات الناس مستعجلة وتريد الوقت يركض الا اني أتمنى يوكف صـرت أخاف من ڪل دقيقة تمر تاخذني لساعة ما عندي حيل وصبـر الها
غمضت عيني واني احاول الـم روحي المبعثرة الخايفة تفقد اغلى ما عندها همست واني اباوع على الوقت
ـ يا حي يا قيوم برحمتك أستغيث
تحولت الاشارة انتظرت السيارات اللي قبلي تطلع يلا حركت
آدم:- يا رب انت أعلم بضعفي وانت وحدك القادر تبديله فرجاً فلا ترد دعائي
اردد بالادعيـة واصبر بروحي، شفت بنات تلاثة واڪفات اثنين يتلفتن منا ومنا والثالثة متقدمه تحاول توكف سيارة عبرت عليهن
فتحت الجام كلت السلام عليكم ردن عليه السلام
ـ اصعدن خوية اني اوصلجن
بسرعة صعدن بدون رفض سيارتي مبينه مو مال واحد يشتغل بيها تڪسي حجيت واني ادوس على البانزين
ـ خويـة وين توصلن
وحدة منهن ذڪرت اسم المكان والصراحة بعيد ماڪلت شي لوجه الله وڪفتهن وحدهن وبهالحر والوقت ثگيله، الله يجعلها دفع البلاء
اسمع بس المهامس منهن وبس كلمة ورطتينا سمعتها زين الباقي ماسمعته
فڪرت حَسن نفسهن استعجلن من صعدن وياي وهسه خافن مديت ايدي شغلت القران حتى تطمأن گلوبهن
باوعت بالمراية اشوف السيارات الوراي انتبهت على البنية الكاعدة بالوسط مدنكه راسها تبجي والاثنين الباقيات كل وحدة دايرة راسها على الجامه اللي بصفها يباوعن على الشارع
رفعت عينها اجت بعيني بسرعة بعدت عيوني من المراية واني مستغرب وضعهن استغفرت الله يعلم مافي الصدور أبداً ما خليت بداخلي سوء الظن بيهن
بعد ساعة وكم دقيقة يلا وصلت للمكان وحده منهن كالت هنا يمك نزلنا
وكفت السيارة كالت اشكد تأمر؟
آدم:- انزلن خوية والله ييسر عليجن اعتبرنها لوجه الله
نزلن الا اللي بالوسط بقت كاعدة سحلتها وحده منهن واسمعها تكلها
ـ يلا شنو لزكتي انزلي عاد وفضينا
رفعت عيني على المرآية نترت ايدها منها ونزلت وحدها
رجعت للبيت، بسرعة سبحت وغيرت ملابسي باوعت على غرفة ابوي بقيت واكف اباوع على الباب واتخيله هسه يفتحه ويطلع ومثل كل مره من يشوفني يكول ها يسبع ضلوعي
طلعت للمستشفى راح تطلع الفحوصات بعدني ما دخلت ونزلت عليه دورية شنو وشكو ما اعرف نزلوني للكاع جتفوا اديه ورا ظهري غطوا راسي واخذوني