رواية سجين الحب الفصل السابع7بقلم زهراء الحريري
عائلة أبو آدم
گطرة بشط عشرتك راحت ويا الروج اذا رايدنا نرجع غربل الماي
اثيــــــــــــلة
دخلتها للحمام تا اسبحها ما قبلت تستحي مني
زمزم:- وحدي اسبح
عفتها براحتها وكفت بالباب منتظرتها تكمل دخلت سمر ووراها بنان وجهالها وعسولـة رحت سلمت عليهن واني استقبلهن
يسألن على زمزم عرفـن بوضعها من ڪوثر مسولفه لعسل هاي واني عود موصيتها ما تحجي لاحد عن وضع اختها
حجيتلهن وضعها وحتى الامتحانات رافضة تروح تمتحن أبوها كال يسويلها أجـازة مرضية وتمتحن ويا الدور الثاني
رحت حتى اجيبلهن ضيافة التفتت على صوت زمزم تحجي بصياح وعصبية
ـ شعندج ببيتنا
اطلعي منا
بالعجل تقدمت عليها احاول اهجدها وهي ترجد بروحها
ـ ما اريد اشوفها خلي تطلع منا لا تدخل بيتنا
ادحك بتجاه عسل، عبالي تقصدها لان بيناتهن غيرة على ڪل شي ودائماً يتكاونن، عيونهن عليها مصدومات بيها
زمزم:- خلي تطلع منااا
ما اريد اشوفها
عسل بسرعة ضمت روحها ورا ظهر امها كاضبه اكتاف امها وتصيح بخوف
ـ شبيها هاي والله ما مسويتلها شي
ـ اطلعي مناااا ما اريد اشوف وجهج اطلعي
سمر التفتت على عسل تهجد بيها لان خافت وحقها هو اني اني بكبري وخفت من ردة فعلها حضنتها مقيدتها تريد تهجم عليها تصيح
ـ دا اكوولج اطلعي من بيتنا
سمر:- زمزومه حبيبتي شبيج وياها اهجدي حبيبتي هسه ترو…
زمزم:- انتي دا اكولج اطلعي مناااا
حطت اديها على جوانب وجهها وتصرخ خليها تطلع
اثيلة:- عسولة اطلعي حبيبتي بس تهدأ اخليها تجي وتراضيج
زمزم:- لا خلي هااي تطلع ما اريد اشوفها اكرها
عسل كضبت ايد امها وتسحل بيها تكولها
ـ ماما امشي وياي لا تركض وراي هاي مسودنه
وتصيح لـ كوثر
ـ كوكه تعالي ويانا لا تخنكج وانتي نايمة
طلعتها امها وبنان وراهن هي وجهالها خطيه خافوا ڪعدتها على القنفة اكتافها تصعد وتنزل وهي تسحب بالنفس
زمزم:- لا تخلينها تدخل بعد
شكو ادخلينها لبيتنا
بعده لسه يحبها
يكول هي الاولى
ما مرڪزة على ڪلامها اريد بس اهجدها
اثيلة:- صارر بس اهجدي ما اخليها بعد تدخل
حضنتها بعدها ترجف من العصبية حطت راسها على كتفي تبجي وتحجي بتعب لا تخلينها تدخل
كتلها صار ماما ماتدخل بعد
رفعت راسها كالت عطشت حيل
صحت على ڪوثر المهزومه للمطبخ
ـ كوكه ماما بالعجل مي لاختج
جابتلها شربتها بيدي سحبت الخاولي من راسها بعصبية لكحته بالكاع شفتها ترجف وصوت انفاسها مسموع
كعدتها كبالي مشطت شعرها من كملته اباوع على رقبتها من وراء بيضة وبيه هدب اشقر دنكت بستها
اثيلة:- يمه بنيته فداوي شلون ريحة طيبة
صدت عليَّ عيونها حمر متروسه دموع
زمزم:- بعده يحبها ومن تتمرض يضوج عليها
عقدت حواجبي سألتها منو يحبها؟
ظلت ادحك بوجهي نزلت عينها وهي تكول اروح انام
اثيلة:- على منو تحجين ماما؟
هزت راسها لا ونهضت دخلت لغرفتها دخلت وراها تمددت بسدها حطيت راسها على ايدي امسح على ظهرها
وافڪر بكلامها منو تقصد يحبها لا بنتي مو طبيعية كله من ڪعدتها ويا بيلسان شڪول عليك آصف خبلت البنت
دحكت بوجهها غافية والدموع مبلله رموش عينها بستها بخدها سحبت ايدي وحدرت من السرير طلعت كعدت بالصالة
اتصلت على سمر وبنان مكالمة جماعية اعتذرت منهن وهن يحجن عليه شسالفة غربة وتعتذرين
ظلينا نحجي بوضعها فوك الساعة
بعد ڪم يوم وصيت ڪوثر على زمزم اريد اروح على لتين عيب منها ولا مرة وصلتها بس على الاتصال خجلانه منها بس شسوي مو بيدي زمزم مربطتني تا ماتقبل اطلعها وياي واروح عليهم ولا اڪدر اعوفها واطلع
طلعت لبيت اخواني مالڪيتها، ترتيل كالت راحت لـ بيت خالو يونس عمه نفس يمهم
رحت عليهم فتحلي الباب حمادة واني ادخل اسمع اصواتهن ديسولفن
ـ السلام عليكم
كلهن ردن وكفلي باوستهن باوعت على نفس شصاير بيها قبل ايام جان الوجه متفح وهسه الوجهه مسفوط حضنتها سودة عليَّ يا ام روح الحنينة
كعدت بينها وبين بنان واسألها على وضع أبو آدم، تسولفلي عليه ودموعها تجري برهاوة تمسح دمعة توكع اللي وراها وصوتها تعبان تسولف بتعب
نفـس:- شلونها بجعتي
دحكت عليها الظاهر سامعة بحال زمزم، كتلها
ـ لسه ما اعرف شبيها مخلصتها نوم والاكل بالغصب اجبرها على كم لكمة
وابوها الي جان بعز النفس عندها ما تقبل تشوفـه كل مرة يجي تظل تصرخ عليه وصلت بيها تضرب على وجهها وراسها
صار يخاف عليها لا يوڪف گلبها لو يصيرلها سڪر من باب البيت يسأل عليها ويوصي ما يـدخل كال كم يوم واخذها لابو مهند
ربتت على جف ايدي
نفـس:- اعذريني دادة
قبل شوية يلا سمعت من لتين والبنات ما جنت اعرف بوضعها
اثيلة:- يا أم آدم صدك تحجين انتي اللي تعذريني فوك همج زدتج هم الله يساعدج ليش اللي انت بيه سهل
بقيت يمها بالنص سـاعة وترخصت كتلهن اروح ما اڪدر اعوف البنات وحدهن
صديت على نفس من كمشت ايدي
نفس:- نروح سوة اريد اشوف زمزم قبـل لا يجي آدم ياخذني
طلعنا اني وياها اسولفلها على وضعها مرة ثانية وڪلامها الغريب عن عسـل
دخلنا للغرفـة زمزم متمددة على السرير متغطيه لحد اكتافها
كعدت نفس على طرف السرير رفعت ايدها السليمة لشعر زمزم تمسح عليه
نفس:- بجعتي شلونها
شنو ناسيتني لا اتصال لا رسالة حارمتني من سؤالها
رفعت راسها صدت عليها متفاجئة بيها ظلت ادحك بوجهها فاتحه عيونها
نفس:- شنو ماكو سلام واشتياق اليَّ!
بجت وهي تكعد حضنت نفس وتبجي نفس اول يوم جابها مجد
نفس:- ليش البجي حبيبتي
بعدتها نفس وزمزم مستمرة تبجي بصوت شبه عالي
دنكت راسها ادحك بوجهها
نفس:- زمزم لا تخوفيني احد مسويلج شي من اللي محذرتج منه؟
هزت راسها بلا
ـ لا والله تا بجامه البس جوا الدشداشة
نفس:- لعد ليش هذا البجي يا أمي
زمزم:- ما جنت اعرف والله
نفس:- شنو الي ما تعرفيـنه!
حضنت نفس وتكهد بالبجي دحكت عليَّ نفس ورجعت ادحك عليها وهي تحاول تثبتها كبالها بيدها
نفس:- احجي لي شنو اللي ماجنتي تعرفينه؟
ماحجت واشكد حاولنا وياها على نفس السكته بس تبجي نفس ڪالت بس نطلع من هاي الشدة احجي وياها اڪو شي مأذيها
الفجر كعدت بالطرمة احس البيت خانڪني افڪر بوضع زمزم
دخلت جوه اخذت تلفونها وطلعت فتحته مقفول من يوم اجت دورت بيه ماڪو شي
دخلت على الاستوديو مليان صور ومقاطع اكثرها بيت عمتي ام هاشم مصورة وياها جثير صور وكلهن حلوات مرة وهي تبوسها ومره وهي تحضن اكتافها واكو بس لعمتي وهي على السجادة والقرآن ڪبالها واكو لعمتي وهي صافنة بالكاع واڪو لهاشم صفنت عليه صار سنين طويلة ماشايفته ولوما اشوف شكل آدم جان نسيت ملامحه
فتح المقاطع شفتهن كلهن واخر واحد بالحديقة يشون سمك على الحطب
هاشم:- وهاي السمجة الزينة لاحلى تينـة
زمزم:- ما تعرف تشوي مثل بيبي
باوع بعدهي بيضة اطرفها رجعها
الڪاميرا متوجهه السمجة وهاشم وزمزم بس صوتها توجهت الكاميرا على عمتي كاعدة كبال باب حديد وكبالها علاڪة خضرة وسلة
زمزم:- بيبي ابنج فاشل بالشوي
رفعت راسها عمتي تضحك وهي تكولها انتي علميه
زمزم:- ما تعلم منج يتعلم مني
هاشم:- اليوم حلويات الخاصكي حنها زعلانة مني
ضحكت زمزم وهي تكول منو يزعل من هاشم المزيون
رفعت راسي على صوت الدعاء يجي من سيارة لؤي دائما بـ 6 الصبح يشغله نفس الدعاء يظل مستمر ويعيد الى ان تطلع سيارته
ـ اللهم يا من دلع لسان الصباح بنطق تبلجه
وسرح قطع الليل المظلم بغياهب تلجلجه
واتقن صنع الفلك الدوار في مقادير تبرجه
وشعشع ضياء الشمس بنور تأججه
يامن دل على ذاته بذاته
العصر اتصل عليَّ ابو التوصيل ڪال بالباب اخذت الفلوس وطلعتله اخذت منه الريزو
دا اطلع بيه انتبهت على ڪوثر صافنة عليَّ خفت تحس بالتفرقة وينعاد الصار وياي اني وسمر ببناتي
ما اريد من يڪبرن علاقتهن تصير فاترة مثلنا
ـ ڪوڪه ماما شنو تردين اطلبلج؟
ـ ماريد شي واني زعلانـة ترى
ـ الله لايجيب الزعل لگلبج
كولي شنو اللي مضوجج
ـ انتي وبابا شنـو ولا كانه اني طلعت إعفاء عام شنو ناسين؟
أبتسمت بوجهها كتلها لا طبعاً هو هذا الحدث الحلو ينسي
وبس يطلع عمج أرغد من المستشفى اسويلج احلى احتفال والهدية اللي بنفسج اجيبها الج، وابوج هم على بـاله ما ناسيج
وهسه شنو مشتهية اطلبلج؟
رفعت عيونها ادحـك على السڪف تفڪر كالت لا ماريد من المطاعم عسل تسوي اطيب اتصل عليها ادزلي من اللي تسـوية
باستني وراحت على التلفون تتصل بعسل، ڪوثر هادئة وحسـاسة على عمتها درة
وقتها تخلصه بين التحاضير والتلفزيون تباوع على المسلسلات السورية حيل تحبها وصديقات ماعندها غير عسل اللي هم ماعندها غير ڪوثر
دخلت على زمزم كاعدة على السرير حاطه راسها على ركبها وبديها حاضنه رجليها
كعدت كبالها كتلها وهذا الريزو الطيب لزومه
رفعت راسها عيونها الحلوة ذبلانه والوجه ضعفان، ظلت صافنه بوجهي رفعت ايدي حتى آوكلها
زمزم:- ما اريد مو جوعانة
اثيلة:- شوفي وجهج شصاير بيه من الضعف لخاطري أڪلي
مو تحبين الريزو
دحڪت عليَّ ورجعت عيونها ادحك بتجاه الباب
حاولت وياها وبالغصب يلا كدرت اوڪلها كم خاشوكة اريد ارجع الصينية للمطبخ وكفتني بحجيها
زمزم:- شفت خالو مصطفى
ظليت صافنة عليها شنو شافته!
زمزم:- بالحلم جان واڪف وكباله قبر يصب عليه مي
هزيت راسي اي، رجعت كعدت كبالها
زمزم:- جنت واڪفة بعيد اباوع عليه واحس بروحي ابجي على اللي بالقبر
اثيلة:- ومنو بالقبر تعرفينه؟
زمزم:- لا ما اعرفه بس حيل ابجي عليه واحس بالالم بضلوعي حتى من كعدت الالم مستمر
خالو مصطفى من شافني اشر لي بيده اتقرب واني بسرعة رحتله هي رجليه وحدها تمشي
وصلت له جان اكـو ملابس وراء جديدة وتلمع ڪُلش اخذها وحطها بيدي كال هاي لأبـو آدم
لهنا وكعدت بس لسه الحلم براسي كانه حقيقة مو حلم واحس بيه
بجيت مو على الحلم لان ما اعرف بتفسير الاحلام بجيت على أخوي مصطفى
مدت ايدها مسحت دموعي تقربت عليَّ وهي تحضني
بستها بخدها واني اكول
ـ شنو هذا الخد أترف من الورد نفسه
أبتسمت والدموع تلمع بعيونها
زمزم:- تحبيني؟
اثيلة:- طبعاً احبج بنيتي وقطعة من گلبي وروحي
زمزم:- اني اشبه منو؟
دحكت على وجهها واني احط خصلات شعرها ورا اذانها
اثيلة:- تشبهين خالتج سمر واحلى منها
زمزم:- يعني تحبيني؟
اثيلة:- طبعاً ماما احبج
ليش اڪو ام ما تحب بناتها!
طبكت رجليها بالطول ودنكت راسها على ركبها
زمزم:- لا تخلينه بعد يدخل للبيت
اثيلة:- منو؟
زمزم:- آصف
عقدت حواجبي مديت اديه رفعت راسها الدموع تصب
اثيلة:- آصف! بدون بابا
زمزم شبيج ويا ابوج احجي وياي خلي افهم عليج شنو هذا التغير المفاجئ وليش هيج ڪارهته لابوج
زمزم:- اني ماعندي اب بعد
اثيلة:- هذا أبوج اللي تحبينه!
شنو اللي مزعلج منه؟
زمزم:- اريد انام
تمددت وهي تتغطى حاولت احجي وياها ماردت غطت تا راسها، طلعت من الغرفة اتصلت عليه ونقلتله كلامه اريد اوصل لسبب يخليها هيج تنفر ابوها ظل محتار وياي يكول قبل رحعتها مابيها شي وبالليل احجي وياها حتى كالت مشتاقتلك
ـ عجل شغيرها عليك
ـ ما اعرف وحاير بيها وتواصلت ويا ابو مهند حجيتله وضعها واخذت منه موعد
••-------------- ❀❀❀ ---------------••
نفــــــــــــــس
تلفوني على اذاني ما اعرف للمرة اشكد دا اتصل عليه وماكو جواب من القلق والخوب احس حلكي يابس
اجى يونس كتله ها لكيته
ڪال لا بس سيارته موجودة
ولك يمه آدم وين رحت
ماڪدرت ابقى واڪفة كعدت النفس ضاگ عليَّ
ـ يارب سلم
اجى كرم ماڪدرت انهض يونس سأله كاله ماڪو فريت المستشفى ڪله
يونس:- راح اتصل على اصدقائه
وكف على جهه اتصل بيهم ماعنده اصدقاء مقربين بس مهند وعلي وابن الشيخ اللي ديدرس عنده
رفعت ايدي لڪلبي يأذيني والرجفة لزمتني من رگب رجليه
يونس:- محد يعرف عنه
ڪرم:- اتصل على آصف
هز راسه اي اتصل عليه بلغه باختفاء ادم ديحجي وياه بعده واجى لؤي
لؤي:- السلام عليكم
بشروا شلونه الصگر ما صحى
ردوا عليه السلام بس اني ساڪته احاول اتنفس الهوا احسه ثقيل
ڪرم:- بعده على وضعه
لؤي:- شبيڪم صاير شي!
ڪرم:- ادم ماكو بس سيارته بره ونتصل عليه التلفون يدك ومايجاوب
باوع عليَّ حاول يطمئني وهو يطلع تلفونه من جيبه ابتعد عنا وهو يكول الو سراج
دنكت راسي احسه ثقيل ورگبتي ما متحمله ثقله سندته بين اديه وداخلي يلهج بالدعاء من بين النيران المشتعله بصدري
نفس:- اللهم اكفني ما أهمني وأخرجني من حلق الضيق الى أوسع الطريق، يا من ربطت على قلب ام موسى اربط على قلبي ونزل عليه السكينة والاطمئنان وبشرني بما يشرح به صدري ويجلو همي
رفعت راسي الهم ما اشوفهم زين وصوت وشه داخـل ذاني
لؤي:- اني طالع من احصل خبر عنه اتصل عليكم
الولد تشكروا منه، اجى عليَّ
لؤي:- ام آدم خليج قوية كل غايب وعذره وياه وأبنج امانتنا
ماكدرت ارد عليه بس دموعي تنزل كالهم انتبهوا عليه
مشى يمشي سريع وهو يصعد التلفون لاذانـه لزمني الم بطراف جسمي اللي تيبست، عين اشوف بيها أرغد وعين اشوف بيها آدم
سندت ايدي بظهر الكرسي ونهضت رجليه لزمتها رجفه قوية ما كدرت ابقى واڪفة، وكعت على الكرسي
يونس وكرم احتاروا بيه راح كرم يركض جاب الممرضات الكاعدات ورا باب القسم اجوي اخذوني قاسوا الضغط والسكر اثنينهم هابطات
ياربي على منو اصد على راعي بيتي اللي لهسه على وضعه لو على ابني اللي ما اعرفـله مڪان
••---------------❀❀----------------••
طلعوني كوة امشي من التعذيب والاستجواب وكل مرة احجي ما اعرفهن مجرد ساعدتهم اكل ضرب اقوى من اللي قبله
اعظامي كسروها وراسي يريد ينفجر من الالم عيني اليمنى واحد منهم ضربني عليها ما اكدر افتحها بالي يم ابوي شلون صار وضعه وامي شنو حاله هسه وهي ماتشوفني ڪبالها
دخلوني للمكتب اجت عيني على عمي آصف حسيت بالفرج ارتاحت روحي وطمئنت، نهض بسرعة من الكرسي اجى عليَّ كضب وجهي بين اديه يدحك بعيني وعلى اثار الضرب
آصف:- بس هاليلة انطيني وباجر ومعزتك بالروح اطلعك منا
آدم:- عمي امي عرفت بيه هينا؟
آصف:- من عرفت بمكانك كبل اجيتك ما بلغتها محد يعرف غيري
آدم:- الحمد لله
عمي امانة الله لا تخبرها گلبها ما يتحمل ڪافي عليها وكعت ابوي ما اريد اكمل عليها اني
دخل سراج و لؤي سلمت عليهم، لؤي كضب وجهي يتفحص بيه
لؤي:- شمسوين بيك ولد ال-----
كعدوني كبالهم عمي سراج سألني على كتفي لان كاضبه بأيدي كتله ضربوني عليه
سراج:- هسه احجيلنا هذني البنات شجابهن لسيارتك؟
ترى شفنا تسجيل الكاميرات وصعدن وياك بسرعة يبين للي يشوف يعرفنك وتعرفهن
آدم:- واني راجع من الجامعة شفتهن واكفات بالشمس صعدتهن لوجه الله
لؤي:- وين نزلتهن؟
آدم:- بحي ال-----
سراج التفت على الضباط يستفسر منه اكثر فهمت من ڪلامه البنات مهزومات من بيت اهلهن وأبوهن اله ثقله
لؤي:- هي مال مساعدة بهذا وكتنا من شفتنهن بنات وحدهن المن صعدتهن شتعرف عنهن
آدم:- عمي مو قتها الي صار صار ما ينفع الحجي وهذا ما يخليني اكطع سبيل المعروف خوفاً من هيج الناس ما اغير مبدئي والنية صادقة يعلمها الله
ابوي شلونه مريتوا عليه شكال الدكتور؟
آصف:- بعده على وضعه
لؤي:- هييي انت احاجيك ما تكدر اطلعه
آصف:- ما اكدر الا نلكى البنات وياخذون افادتهن وابوهن يتنازل عن الدعوة
التفت على عمي سراج حجى وياه
سراج:- بس كدرت اطلع ابن عمتك
لؤي:- سراج مو وكت هالحجي
آدم:- يوواش منو طلع؟
دحكت على عمي آصف عيونه على سراج يدحك عليه بعصبية
آدم:- طلعت هاشم!؟
ها ... لهذا السبب عمي سراج وعمي لؤي ما يحجون وياك؟
وابووي يعرف؟؟؟
هذا سبب وكعته!
لــــــــــــــــؤي~~
آصف طلب من الضابط يعوفنا وحدنا من طلع وسد الباب جاوبـه بتحريك راسه بـ أي
آدم:- طلعت اللي انتهك حرمة الله
وتعدى ڪل الحدود الاخلاقيـة
آصف:- افهم مني السبب بالبداية يلا تحجي
نهض من مكانه هاي اول مرة نسمع ادم يرفع صوته على شخص اڪبر منه
آدم:- شنووو اللي افهمه منك
ماڪو سبب يشفع عملتك انت بايع ضميرك
تقرب عليه سراج لزمه من جتفه موكفه عباله راح يضرب عـمه
آصف:- جدتك مريضة وتحتاجه لهذا السبب والله
ضحك بعصبيه باوع علينا احس نار تلهب بنظراته يسألنا دتسمعون السبب القوي اللي يخلي ينصر الظالم على المظلوم
رجع على عمه يحاول يحجي بهدوء
آدم:- وياك امه مريضة
وهو شنو دڪتور؟
مالها علاج بس عنـده
آصف:- تبقى بحاجة ابنها
بشنو راح يضركم بعيد ما يوصل بغداد خلوا لاخر ايام عمرها
آدم:- بشنـو يضرنا!!
مازال بعيد عادي خلي يفلت من العدالة!
المهم يبقى بعيد عنا ويعيش حياته طبيعي
مقتنع بهذا الحجي حضرتك
صاح بوجهه بصوت عالي وهو يرفع جفه يده كبال اصف
آدم:- هذا اعتدى شرف امـي وهز عرش الرحمن بفعلته
ظل اصف ساڪت مدنك راسه سراج عاصر ايده بس ساڪت ما تدخل
صدمنا آدم بقوة كلامــه على آصف
آدم:- واحد أامن عرضه سنين يم انسان تعدى حدود الله ما انتظر منه يفهم اشكد الشرف غالي
ضربه راشدي سراج صاح بيه
ـ اصف ايدك اكسره اذا مديتها بعد عليه
ماجاوب سراج حجى ويا ادم بعصبية
آصف:- اكضب لسانك
مو انت اللي تعلمني شنو الشرف
آدم:- مازال امثالك موجودين يبقى المظلوم مخذول وضحية انت بعت قيمك من وكفت بصف مغتصب
آصف:- كافي شنووو هالحجي
نسيت منو الواكف كبالك
آدم:- لا الي واكف كبالي شخص طبعه طبع اخوة يوسف والغدر يمشي بدمه يريد يحس بالتميز حتى يعوض النقص الموجود بروحه
فرك وجهه بعصبيه كال
آصف:- ما راح ارد على هالكلام واعتبره طلع بـ لحظة غضب
ما ابررلك فعله ولا احجي بيه
بس هو هم عاش مظلوم سلبوا حياته منه
آدم:- ظلم نفسه من تعدى حدود الله
تقرب على اصف اڪثر وهو يسأله
ـ يستاهل تخسرنا علموده؟
ظـل آصف ساڪت يعاين على الواكف كباله بغضب وحيـرة شلون يتفاهم وياه
ـ احجي يستاهل تخسرنا ؟
حـرك راسـه لا
آصف:- عمتي تستاهل طلعته لأجل عينها
عيني على سراج مدنك راسه بنفسي اخذه ونطلع منا ڪافي عليه
باوعنا على آدم من ڪال
أدم:- حضر نفسك لليوم اللي راح تقبض بيه عليَّ بجريمة قتله
سحبه من ياخة القميص يحاول يحجي بهدوء
آصف:- ارجع لعقلك بلا رعونية اعرفك عاقل شنو هذا الحجي!
آدم:- عندي ثار وياه السجن جان حامية مني ومن اطلع منا ما يحمي مني شي
ضرب ايد عمه منزلها عنه وهو يكمل
آدم:- واي مساعدة منك ما اريد ، عمري يخلص هينا ولا اطلع بجهودك
اصف لزم جف ادم يريد يسحبه يكعده ويحجي وياه سحب ايده بقوة حطها ورا ضهره عاصر جفه ولازم معصمها بيده الثانية
ـ ايد اكسرها ولا تنحط بـ ايدك الحطيتها بـ ايــده
آصف:- جثير تجاوزت مقدر وضعك وساڪت بس لاتنسى الواڪف كبالك عمك لا تخليني ادوس على راسك
آدم:- الواڪف كبالي صلة القرابة اللي تجمعنا بيه من هالساعة تنقطع
أبتعد عني وعن أبوي لا توصلنا ولا نوصلك
لزمه من القميص بعصبيه
آصف:- يول ومنو انت تا هيج تحجي وياي
آدم:- أبـن ابـوي
تدخل سراج بينهم بعد اصف اللي بعده يباوع على آدم بصدمة وعصبية
سراج:- كافي مو هذا الوقت المناسب لكلامكم، خلينا نلكى حل لـ ادم حتى يطلع منا
آدم:- ما اتقبل حل ومساعدة منه
هز راسه مشى بعصبيه بتجاه الباب فتحه وطلع دخل الضابط
كعد ادم على القنفة الجلد ردنا نحجي وياه منعنا كال
ـ رجاءً هذا الموضوع ما اريد احجي بيه هسه
سأل سراج على تحاليل ابوه جاوبته اني
لؤي:- تحـاليله نظيفه
تنهدت وهو يڪول
ـ الحمد لله
لؤي:- امك طاير عقلها عليك
قبل لا اجيك جنت يمهم بالمستشفى وعمامك مخبوصين باختفائك
آدم:- عمي ما اريدها تعرف سبب وجودي هينا حاول تفهمها ودبر سالفة على معرفتك
سراج:- احجي وياها بتلفون عمك لؤي وطمئنها عليك
آدم:- شڪولها حتى ماكو سبب مقنع براسي واذا احجي وياها راح احجيلها الصـدك
تنهار امي ما تتحمل كافي عليها وكعت أبوي
طلعنا منه اتصلت على ڪرم طلع يعرف من آصف بس ما مبلغين امـه بعدهم ومحتارين شلون يحجولها، مهزومين منها ڪاعدين جوا بس حماتها ومرت حماها يمها
باوعت على سراج كتله
ـ المصايب التمت عليهم من كل حدب وصوب
رد عليَّ وهو يسوق
ـ الزود والفضل لنسيبك الزين
هسه احجيلي بامه شنو تظل هيج طايرة بين السما والڪاع
لازم تعرف الصدك خوما تظل تأكل بروح وهي ماتعرف وينه ابنـها
••--------------- ❀❀ ------------------••
ســـــــــمر
واكفين كبال السدية اني ولتين نفس كاعدة المغذي بيدها، لايجة روحها عينها بالكاع وتحجي ويا نفسها تعاتب بارغد وآدم والدموع تصب
دحكت على لتين تبجي وياها، تنهدت اخذتها بعيد عنها
ـ شنو نبقى هيج ندحك عليها خلي نحجيلها الصار
ـ خلي ننتظرهم بلكي يكدرون يطلعونه
ـ يول شوفتها هيج تقطع بگلبي عليها
دحكنا عليها ذبلانه واثار الهم واضحة عليها للبعيد
لتين:- واني همات ما اڪدر اتحمل روحي اهجسها تريد تطلع من اجنابي
، راح اكعد بـرة عينج عليها
طلعت لتين كعدت بالممر واني كعدت على السديه احـاول اصبر عليها وهسه يجي تهز براسها لا
نفس:- گلبي يكول ابني واڪع بشدة
ولك يمه آدم وينك يعين امك ونظرها
ليش هيج تعذب بگلبي عليك
كمل المغذي نزعته الها ساعدتها تمشي طلعنا وصار كبالنا آصف عافتني ومشت عليه قبل لا يوصلنا واحنا وراها
نفس:- ها ابو مصطفى ابني وينه؟
دحك علينا ورجع عيونه عليها يحجي وياها
آصف:- موقفينه بالمرڪز
كضبتها بالعجل قبل لا توڪع، حجت بصوت يرجف وضعيف
نفس:- اسم الله عليه
ليش شمسوي!
آصف:- صايرة مشاجرة بينه وبين واحد باب المستشفى واخذوهم اثنينهم وسهلة ان شاء الله ڪم يوم ويطلع بس يعرضونهم للقاضي
نفس:- مشاجرة شنو!
ادم ما عنده سوالف العرك اللي يغلط عليه يرد بـرحم الله والديك
آصف:- صح وياج بس هو اعصابه تلفانه هالفترة بسبب وضع ابوه وذاك الظاهر متجاوز عليه
ديحجي وياها ودك التلفون بجيبه طلعه دحك عليها وهو يفتح الاتصال
ـ ها ڪول
نخطف لون وجهه فتح عيونه والدموع غورگت بيها
نفس:- آصف ابني بيه شي احجي بداعت بناتك وابنك شبيه آدم
احجي اصف شبيه ابني
شوصلك عنه
نزل التلفون والدموع تنزل وياه
ـ اصف احجي عليك الله شبيه ابني
فكه يرجف حجى بعبره
ـ عمتي ام هاشم ماتت
مد ايده وراه يريد يستند على شي ماڪو بس الفراغ ادحـك عليه وابجي بدون صوت
نفس:- الا اله الا الله
انا لله وانا اليه راجعون
تلفت براسه منا ومنا يدور ما اعرف على شنو حجى وحده
ـ ماتت عمتي
نفس:- ابو مصطفى اهدأ خوية اذڪر الله وترحملها
هز راسه بلا وهو يكول
ـ لا ما ماتت اني وعدتها تعيش وياه
اعرف بآصف شڪد يحبها ويعزها تا اڪثر من أمـه وهي الوحيـدة اللي يسمع منها وما يرفضلها طلب لو تريد روحه ينزعها الها
يريد يطلع ضيع اتجاه الخروج مشى عكس الاتجاه نحجي وياه مايسمعنا
اجـوا يونس وڪرم ومبين عليهم عرفوا بالخبر، مشوا ورا ندحك عليهم وكفوا يحجون وياه
نفس:- اللهم اغفر لها وارحمها وأكرم نزلها ووسع مدخلها وأعذها من عذاب القبر وعذاب النار
دحكت بيني وبين لتين وهي تڪول
نفس:- البقاء لله بنات الله يصبرڪم ادعولها بالرحمة هذه الساعة محتاجـة منكم الدعاء بالرحمة
الولد اخذوا اصف اللي فقد عقله بصدمة خبر موتها واحنا صعدنا ويا نفس للطابق اللي بيه ارغـد كل وحدة بينا صافنه وحدها خبر الموت صابنا ببرود عجيب
صديت على نفس كل شوية تدعيلها بالرحمة ولتيـن وياها بس اني بعدني بصدمـة الخبر وكل موقف الها عقلي يذڪرني بيـه
••------------- ❀❀❀ ---------------••
لـــــــــــــــؤي
البنات البحث مستمر عليهن ومالهن ذڪر اخـوان أرغد وباسل راحوا لـ ابوهن يحجون وياه رافض يتنازل عن آدم وما يصدك ما يعرفهم مشوفهم تسجيل الكاميرات من مصعدهن آدم
آصف بحديثة موت عمته منسيه نفسه مو بس آدم رحنا اني وسراج على آدم شفناه وطلعنا بالطريق تصلت عليه امه بعد السلام كالت
نفس:- ابو علي صـار ڪم يوم وابني ماطلعوا
لؤي:- اي خـوية بعدهم ما مصعدينه للقاضي
نفس:- سألت وكالوا يطلع بكفالة انت اكيد تعرف بهاي الاجراءات
باوعت على سراج كتلها
لؤي:- مايصير يطلع بكفالة الا يصعد للقاضي
نفس:- خوية ابني عنده امتحانات وراح تروح عليه سنه كاملة بطولها وتعبها يمتى يصعد مر يومين لا ليلي ليل ولا نهاري نهار وابني بالسجن
لؤي:- رحنا للعميد كدرنا ناخذ منه موافقه بمساعدة ابو مهند وسوينا اجازة مرضية يكدر يمتحن بيه بالدور الثاني وان شاء الله مايضيع تعبـه
نفس:- اريد ابني يطلع المن اروح اصف بعده بحديثة ووضعه مو مال انخاه والولد ما بيدهم شي وحتى مايقبلون ياخذوني اله انطيني اسم المركز خلي اروحله
لؤي:- وين ترحين خوية جا احنا وين رحنا آدم امانة ابوه النا ما نعوفه ولا نرتاح الا نطلعه
سمعت صوتها تبجي باوعت بحيرة على سراج شلون اصبر عليها وافهمها ما اعرف
نفس:- خوية انطيني اسم المركز
لو اني اروح ادور عليه بالمراكز
حاولت وياها وهي قافلة الا انطيها الاسم وتروح بنفسها جذبت عليها كتلها راح اجي للمستشفى وافهمج
قطعت الاتصال بضوجه باوعت على سراج
ـ ما تحجيلك شي شو ساڪت
ـ شحجي من البداية كلت احجولها الصدك خلي تفهم سبب اعتقال ابنها وتفهم قضيته تحتاج وقت احسن من اللف عليها ترى جاي تضرونها ما تساعدونها، هو مبدأ واحد النجاة بالصدق وخلص
ـ يعني احجيلها الصدك؟
باوع عليَّ ورجع عينه على الطريق
ـ خلي اخوان زوجها هم يحجولها ويفهمونها، اتصل عليهم وفهمهم القضية مطولة خلي امه تعرف
اتصلت على يونس بلغته باتصال ام آدم كال هو احنا مقررين اليوم نحجيلها وهسه باسل صعد يحجي وياها
شفته يمشي بطريق المستشفى كتله شنو وين؟
باوع عليَّ ورجع عينه
لؤي:- سراج ارجـع لعقلك بصفتنا شنو رايحين؟
سراج:- اني ما اصعد ابقى برة منتظرك انت روح الها وفهمها زين محد راح يكدر يفهمها قضية ابنها احسن منك
وصلنا لكيت الولد بره واكفين سألتهم كالوا انهارت من عرفت انطوها ابرة مهدئ نامت عليها
اجى سراج وراي سلم عليهم بيده بقينا نحجي بقضية آدم هي مو من ضمن مسؤوليتنا بس نكدر بعلاقاتنا نتواصل ويا الجهات المختصة ونأثر عليهم ونتساعد وياهم
اباوع عليهم التعب والهم واضح على ملامحهم خاصة عمه ڪرم متأثر حيل عليه
سألتهم آصف يمتى يرجع؟
جاوبني ارسلان كال منتهي وعايش على المغذي
حجى بظهري سراج
ـ دهر العالم وتمرض
ـ بعد صـار اللي صـار
مرت ساعة وفوك واحنا يمهم ضربني بكتفه يمسح بحلكه ويحجي وياي
ـ يلا روح احجي وياها
اڪيد صحت هسه
استغفرت وبقيت واڪف ما صار ناسبتهم حاطيني بكل شي بعد بس جدر المركة ما حطوني بيه
يباوع عليه بخزرة يريدني اتحرك
لؤي:- شوفولي ام آدم اذا كعدت حتى احجي وياها
راح ڪرم وباسل اخذني على صفحة يسولفلي بيني وبينه شصار بيها من عرفت
بـاسل:- احتارت شنو تسوي تروح على غرفة ارغد تحجي وياه من ورا الباب تريده يكوم ويشوف شصار بابنه
وترجع عليَّ تحلفني بداعت جهالي اطلع ابنها
اجى ڪرم كال فوك يم ارغد
صعدت وياه وصلنا لغرفة ارغد فتح الباب حتى يصيحها الي ، شفتها كاعدة على الكرسي منزله راسها على ايد ارغد وتبجي من سد الباب اختفى صوتها
شـوية وطلعت حالها يمرد الجبد والله منظرها هزني شصاير بحالها الله يعينها عيونها تترجى بيه اطلعه عبالك بيدي لزمت مكان گلبها وهي تكعد
حجيتلها كل التفاصيل من لحظة الصعدهن بيها ادم لاخر حدث بالقضية رفعت راسها صوتها ضايع حجت بتعب
نفس:- ابو علي الله يخليلك عافيتك اريد ابني رجعه اليّ، بداعت جهالك والله ابني فقير ويخاف الله وانت تعرفه زين
لؤي:- خوية أم آدم بس اهدي يطلع والله بس نلكى البنات ويقدمن أفادتهن كبال القاضي الباقي سهل بعون الله بس قوي نفسج ما عرقتج هيج ضعيفة
نفس:- واذا مالكيتوهم ابني يروح من ايدي
اخذني لابو البنات اني احجي وياه وافهمه نيـة أبني
لؤي:- والله خـوية مابقى احد ما اخذنا اله وتوعدلنا اذا ادم طلع وبناته ماڪو دمه مهدور
دنكت وجهها بين اديها تبجي بصوت مبحوح مسحت عيوني واني اباوع على ڪرم اللي دموعه تصب وهو يباوعلها
نفس:- ارغد افتح عينك وكوم شوف شصار لابنك خلافك، كوم وشوف عزيز گلبك
••------------- ❀❀❀ ---------------••
نفـــــــــس
مرت ايام واني اتمرجح بهمي بين ارغد اللي نايم بين الحياة والموت
وابني اللي ما اعرف شنو مصيره
اتحرك جسـد بلا روح، اللي مخليني لهسه اكدر اوكف هي بنتي اتقوى بيها واصبر نفسي برحمة الله
آصف رجع حاله يكسر الخاطر كال يمي ابنج ما يرتاحلي بال الا اطلعه وان شاء الله قربت اوصل
الكانيولا مافارقت ايدي اذب وحده ويركبون الثانية دخلت للغرفة واني ابتسم بتعب ودموعي تصب اسمع صوته يأن عيونه فاتحها قليل تتحرك منا ومنا بغير سيطرة
نفس:- ارغد تسمعني
بجيت دنكت على وجهه وسأل بيه
ـ ابو آدم تشوف وجهي
بس يئن وعيونه تتحرك ما ثابته طلعت لڪرم جان يم الدكتور بلغته بوضعها كال اي الدكتور كال من البارحة بلش يستعيد وعيـه
رفعت راسي واني اردد يا الله رحمتك ولطفك
مر تلاثة ايام وارغد على وضعه يستجيب لصوتي بأنين عيونه اجفانها بلش الورم يخف، ڪاعدة جوا اشرب جاي احس راسي يريد يطك من الالم والسهر
دك تلفوني بأسم آصف جاوبته حسيت صدري نشرح وگلبي نبض بأمل من ڪال
ـ البنات موجودات بأحد فنادق اربيل
نفس:- ابني راح يطلع؟؟
آصف:- باجر يصعدونهن للقاضـي يسمع منهن وبعدهي بإذن الله يطلع
نفس:- يارب رحمتك
اللهم لك الحمد بعدد ماخلقت
ابو مصطفى والله ما اعرف شلون اشكرك وادعيلك الله ينطيك الصحة والعافية ويبرد گلبك ويحفظلك بناتك وابنك
آصف:- اريد منج شي واحد
ما اريد احـد يعرف اني لڪيت البنات خاصـة آدم من يطلع اني هم وصيت الجماعة خاف يسألهم
نفس:- ليش؟
آصف:- سبب خاص بيه ما اريد احجيه
تفهمت وما حجيت بعد تشكرت منه وسديت الاتصال صعدت للطابق الموجود بيه ارغد مبتسمه وحدي طلعت من المصعد توجهت على القسم دخلت الرقم السري نفتح الباب الزجاجي العريض
مشيت للغرفة وصلت للباب رفعت ايدي نفتح قبل لا الزم ايد الباب قبل لا اشوف منو، فكرت هذا دكتور لو واحد من الممرضين
ردة فعل الجسم من يحس بالخطر اختفت، اوصالي كلها ارتعدت من الخوف والصدمة
يمكن متت بهاي اللحظة ما احس نفسي دا اتنفس ولا اسمع صوت نبض گلبي
صار وجهه بوجهي محجر عيني احسه مثل المخيط بخيط ودينسح بقوة اريد احرك جسمي وانهزم عجزت كانه جسمي كله نصب بـ جبس