ملك: مش ناوية تريح قلبك دا بقى؟
تقى: مرتاح يا ملك
ملك بثقة : لا مش مرتاح يا تقى ، لو مرتاح ليه لحد دلوقت لا اتخطبت ولا اتجوزتِ؟
تقى ببرود: لسه نصيبي م جه هنعترض
ملك بحذر: طب وليه لسه بتدخل تشوفي صوره على انستا وليه محتفظة بصوركم؟!
عز دخل في الوقت دا كان عاوز الشاحن من ملك
عز : ملك أنا كنت...
ملك بخضه: هششششش
ملك كانت فاتحه الإسبيكر
عز برفع حاجب: بتكلمي البيه جوزك ولا ايه ،خدي بالك أنا لسه مش موافق على اللي بيحصل هه
ملك بتضرب على جبهتها من غباؤه،حمدت ربنا إنها عملت ميوت وإلا كانت تقى قفلت في وشها
ملك: ممكن تسمع وبس!
عز سكت وقربوا هما الإتنين من الفون
تقى: يبنتي روحتي فين أنا بكلم نفسي يا دُبّه انتِ
عز أول ما سمع صوتها واللقب المحبب لقلبه لما بيسمعه منها ابتسم
ملك اتوترت من عز
،عز شاور ليها تتكلم معاها ،عاوز يسمع صوتها بـ أكبر قدر ممكن
ملك بتردد: كنا بنقول ايه؟
تقى: انتِ بتسيبيني وتروحي فين هه؟
ملك: معلش كنت برتب حاجة بس
عز كان في قمة انبساطه، من زمان أوي م سمع صوتها ولا ضحكتها ،دا القلب من غير حبيبه صحراء بجد والله
تقى: ماشي يستي
ملك بقصد: م جاوبت على سؤالي؟!
تقى بحجه: قولتلك لسه النصيب يا ملك،متحاوليش تلمح لحاجة تانية..
عز فهم سؤال ملك وشاور ليها تكمل
ملك: بس عز بيحبك يا..
تقى بضحك: بيحبني وبدأت تضحك أكتر بشكل هستيري لا بجد أحلى فزورة سمعتها ،دا حبيب مين دا اللي يستخدم حبنا آلة انتقام لا وملقاش غيري اللي ينتقم من أهلي فيه
ملك: تقى اهدي ..
تقى بهدوء مش طبيعي: ملك لو سمحت أنا مضطرة أقفل دلوقت سلام ومن غير ما تنتظر ردها قفلت
عز اتنهد هو فعلاً حاسس بالذنب اتجاه البنت الوحيدة اللي حبها ،وعلى قد حبُّه ليها أذاها
عز بيبص في الفراغ قدامه: تفتكري هتديني فرصة؟
ملك: حاول يا عز اللي عملته مش سهل بس أعتقد تقى لسه شايله مشاعر ليك ، المهم ناوي تعمل ايه؟
عز بثقة: كل خير ، يلا هقوم أنا بقى
عز قام وخرج وملك فضلت قاعدة م عارفة اللي عملته صح ولا غلط بس هي عاوزة كل حاجة ترجع مكانها تاني
-----------------------------
عند ياقوت
فضلت تذاكر علشان الميد تاني يوم لحد ما جالها اتصال من تقى
ياقوت استغربت: لا لا الست تقى صاحيه لحد دلوقت ، طب تيجي ازاي؟!
تقى بإرهاق: ياقوت محتاجه أتكلم معاكِ شوية
ياقوت اتعدلت على الكرسي: سمعاكِ يحبيبتي فيه ايه؟
تقى دموعها بدأت تنزل
قوليلي يا ياقوت أنا ذنبي ايه في كل اللي حصل زمان ، وليه مش قادرة أشيله من قلبي لحد دلوقت ، قلبي مهزق ومش قادر يكرهه بعد كل اللي عمله
ياقوت بزعل: حقك عليا أنا ،اهدي متعمليش في نفسك كدا
تقى بإنفعال: ليه لحد دلوقت مهتمه بكل تفاصيله،قوليلي أعمل ايه علشان أنساه
ياقوت: ممكن تهدي علشان خاطري، أحيانا الإنسان يا تقى بيغلط ،بيكون مش واعي..مش قادر يتقبل الواقع أو الحياة عموما لإنه فقد أغلى ما عنده
تقى بذهول: انتِ بجد بتبرري ليه؟
ياقوت: أنا مش ببرر يا تقى أنا بشرح ليكِ عز كان حاسس بـ ايه ، أنا معاكِ إنه غلطان وغلط كبير أوي بس هو حس إنه الدنيا غدرت بيه وخطفت باباه منه بدري أوي ،حس بالوحدة
تقى: وحدة ايه،دا أنا كان فاضل شوية وهقتل نفسي قدامه علشان يفوق من اللي هو فيه ، طب كان يتكلم معايا..يعاتبني..يحاول يفهم اللي حصل
لكن هو اختار أسهل حاجة بالنسباله يا ياقوت،إنه يكسرني أنا..وبدموع أصل أنا طلعت سهلة عنده أوي
ياقوت بحزن: استهدي بالله يا تقى،عز والله بيحبك
أنا مكنتش عاوزة أقولك بس لازم أتكلم دلوقت
تقى بإستغراب: تتكلم في ايه؟
ياقوت: كل تلخيصات الكلية من عز ، يوم ميلادك أشتري ليكِ كام هدية كانت هدية منهم بتاعتي والباقي من عز وكذلك لما كنت أجيبلك عروسة مولد معايا كانت بتكون من عز
تقى بصدمة: انتِ ازاي عملت كدا ، بتساعديه بعد اللي عمله فيا؟!
ياقوت: تقى اسمعيني..
تقى بضياع:ياقوت أنا هقفل دلوقت وبكرا لينا كلام تاني
ياقوت بزعل: زعلتِ مني
تقى بتعب: بكرا نتفاهم يا ياقوت، سلام
ياقوت بتفهم: ماشي يا حبيبتي، سلام قفلت معاها واتنهدت ودعيت من قلبها ربنا يريح قلب صاحبتها ويجمعهم تاني على خير لو هو خير ليها
------------------------
عز في أوضته وبيتفرج على صورهم كلها سوا وصوتها لسه سامعه كإنها قدامه وكل مكان كان بيجمعهم فيه ذكرى حلوة..حلوة شبهها
فجأة فونه رن..
عز أول ما شاف الرقم اتعدل بسرعة ورد
عز بإبتسامة: كنت متأكد إنك هتغير رأيك
=بطل لماضه،وأنا مش ناسي اللي انت عملته واخد بالك
عز: قلبك أبيض يا كبير ، استر عليا يسترها عليك ربنا
=انت هتشحت يا ولد ، اخلص واحكيلي ايه اللي حصل الفترة اللي فاتت كلها
عز بضحك: قال يعني مش عارف ، بس ماشي هقولك حاضر
بدأ يحكي كل اللي حصل سواء جوازة ملك لحد ما قاله على مكالمة تقى لملك والطرف التاني كان بيسمع بإهتمام لحد ما عز خلص
=تمام تجهز المزرعة عاوزها الجمعة الجايه تكون عروسة
عز بعدم فهم: هي مين؟
= بضحك المزرعه يا ابن حامد
عز: طب ناوي على ايه؟
=بتفكير سيبها لله ، يلا أنا مضطر أقفل وهكلمك تاني في أقرب وقت
عز: في أمان الله يا حبيبي
-------------------------
عند ملك
أحمد بغضب: انتِ ازاي تعمل كدا من غير ما تقوليلي؟
ملك بخوف: هتفرق ايه يا أحمد مش هدفنا واحد إننا نجمعهم من تاني
أحمد بعصبية: لا يا ملك هدفنا مش واحد وأنا لو بحاول أصلح معاكِ دا علشان العيلة مش علشان عز بيه
ملك: يعني ايه؟
أحمد: يعني عز دا واحد جبان وغلط في أختي كتير أوي وغلطة أنا مش هقدر أسامحه عليها وتقى ليها الحق تسامحه أو لا وأنا لو منها هكرفله خالص
ملك: أحمد لو سمحت أنا معاك إنه أخويا غلطان لكن مش من حقك تقول على أخويا كدا
أحمد بصوت عالي:زي ما انتِ زعلانه على أخوكِ اللي ظلم أختي وبسببه أختي حياتها واقفة ،أنا كمان هزعل أي حد كان سبب في زعل أختي
ملك بزعل: انتَ بتتكلم كدا ليه يا أحمد كإني ضد تقى
أحمد: علشان دا اللي أنا شايفه، حرام أخوكِ يسمعها من غير ما تعرف وانتِ كدا خونتِ ثقتها علشان بس خاطر أخوكِ ،باين كدا اتسرعنا
ملك: اتسرعنا!!
وبحذر اتسرعنا في ايه يا أحمد؟
أحمد استوعب هو قال ايه..سكت
ملك: لا كمل قول احنا اتسرعنا في ايه؟!أحمد بتعب: ملك..
ملك بتماسك: أنا هقفل دلوقت ونبقى نتكلم بعدين
أحمد: أنا لسه مخلصتش كلامي طيب!
ملك والدموع في عيونها: أظن بعد اللي قولته مفيش كلام نقوله ،سلام
ملك قفلت ودموعها نزلت غصب عنها هي كلمته علشان مضغوطه وحتى هو مش فاهمها، هي مفتقدة باباها أوي في الوقت دا ، كل المشاكل اللي في حياتهم دي حد واحد بس كان يقدر يخلصهم منها بعد باباها..بس حتى الشخص دا كمان م موجود
---------------------------
عند أحمد
بعد ما ملك قفلت فضل رايح جاي في الأوضة متعصب من اللي ملك عملته ومن اللي هو قاله لـ ملك
،وقال لنفسه
غبي غبي شكلك هتبقى نسخة من عز ولا ايه يا أحمد فوووق دي ملك..حبيبتك!
مسك الفون وحاول يتصل بيها مرة واتنين م بترد رجع يتصل بيها تاني الرقم مغلق..
هو عارف إنه غلط بس أكيد هي عارفة إنه كان هيصالحها ليه تقفل الباب في وشه كدا
قفل فونه وقرر ينام ويصحى يشوف هيعمل ايه
-------------------------
تاني يوم
ياقوت صحيت وصليت وبتجهز للكلية فونها رن وكان حمزة
ياقوت: السلام عليكم
حمزة:وعليكم السلام ورحمة الله وبركاته يا أخت ياقوت
ياقوت ابتسمت بخفه: والله انتَ رايق
حمزة: والحلو بتاعي مش رايق ليه ، طب دا أنا حتى معزوم عندكم النهاردة
ياقوت: تنورني وتنور البيت كله
حمزة بحب: منور بـ ست البنات ، هه بقى مالك صوتك م عاجبني ليه؟
ياقوت اتنهدت وحكيت ليه اللي حصل مع تقى وإنها قالتلها على موضوع عز وحاسه إنها اتسرعت ومكنش ينفع تصدمها كدا
حمزة: بصي يا حبيبتي كله بقى على المكشوف دلوقت وعز باين عليه مش هيسكت غير لما يجنن تقى طول ما هو متخفي كدا ، صدقيني صاحبي وأنا عارفه
وأحمد لو حس بحاجة هيخربها على دماغ ملك ودماغهم كلهم
ياقوت: هو انت صحيح عرفت ازاي إنه متجوز ملك؟
حمزة بضحك: كنت شاهد على كتب الكتاب يحبيبتي..
ياقوت: امم ومتعرفنيش ، طلعت مش سهل
حمزة: الموضوع لو يخصني يحبيبي انت عارفة إنك أول واحدة هتعرف لكن مادام م يخصني أنا يبقى دي خيانة للأمانة
ياقوت:عندك حق ، أنا خايفه تقى تكون زعلانة مني
حمزة: تقى بتحبك متخافيش ولما تتكلمِ معاها اشرحي ليها موقفك وحاولي على قد ما تقدري تقف معاها دلوقت هي محتاجه حد يسندها كفايه عليها الصدمات اللي بتنزل عليها كل شوية
ياقوت بتفكير: حاضر
حمزة بنكش: ياااه عيشت وسمعت كلمة حاضر
ياقوت بإبتسامة: عدي اليوم يا أستاذ حمزة
حمزة: عيونه ، يلا علشان م تتأخري على امتحانك ، أنا مستنيكم على أول الشارع أهو
ياقوت: اشطا هكلم تقى ونازلين أهو
-------------------------
أحمد صحى وقرر يقابل ملك ويتكلم معاها وتقى صحيت وصليت وجهزت للكلية
كلهم كانوا بيفطروا وفجأة
والد تقى: كان فيه حاجة عاوز أقولكم عليها؟
كله انتبه ليه
أحمد: خير يا بابا فيه حاجة ولا ايه؟
فيروز بصيت ليه:طب اصبر لما نفطر علشان الأولاد
والد تقى(حسن): أنا جاتلي مكالمة من برا مصر النهاردة، اعملوا حسابكم إننا هنسافر كمان يومين
تقى بإستغراب: هنروح فين يا بابا؟
والد تقى بهدوء: المزرعة