رواية حالة حب الفصل السابع7بقلم مريم محمود
قرب منه مسكه من هدومه رفعه عن الارض وبصله بعيونه
الي كانت حمرة
"مفكر نفسك ناصح ونت جاي تدمرها تاني ومفكر هتبق لوحدها زي كل مرة"
بابا وسامر كانو بيسلكوه وبيزعقو ل سراج يسيبه بس سراج مكانش شايف قدامه غير معتصم
"اقسم بالله لاعرفك مقامك الوقت وازاي تفكر ترجع ل حياة آسيا تاني بعد الي هببته فيها ي واطي"
وقتها الغشامة ملت عين سراج وضربه تاني
كان زي الثور
زعقت فيه
بس لا حياة لمن تنادي
معتصم مقدرش يسكت اكتر من كدا وبدأ يرد ليه الضربات
وقع سراج ع الارض
ف وقتها انا وقفت بينهم وفردت ايدي
قام سراج عشان يكمل
" كفاية ي سراج
كفاية أرجوك
كفاية بقاا"
بصلي سراج
"رجعتي حنيتي ليه
ها
صدقتي الحوار الي عمله عليكي
انتي مش بتحرمي؟"
للحظة حسيت بثبات
وقوة عكس الي كان جوايا
بصتله وثبت عيوني عليه ب اندفاع غريب
"اسمع كويس الكلمتين الي هقولهم دول ي سراج
معتصم
هيبق جوزي
شئت ام أبيت
هيبق جوزي
ضحى بجزء من عمره ف السجن واتعذب
ورغم كل دا كان هامه عليا وعامل على مشاعري
مكانش بيفكر وهو ف السجن ازاي يخرج منه
كان بيفكر فيا وإزاي هيبق إحساسي وهو محبوس
انا لو لفيت العالم
مش هلاقي حد يحبني قده
وبالنسبة هو بيحور ول لا
ف دا لا يعنيك ف شئ
انا الي هعيش مش انت
وزي م قلتهالك قبل كدا
مهمتك معايا انتهت لحد كدا ي سراج
التفت ل حياتك ونا هلتفت ل حياتي
وكفاية لحد هنا
أرجوك"
كان كلامي زي الرعد على ودن سراج
مش مستوعب انا بعمل اي
اي الي وصلني ل كدا
إمبارح كانت معاه زي الفل وكارهة معتصم كره العمى
اي جرالي
بصلي شوية وهز راسه
" يعني انا طول الفترة الي كنت جمبك فيها
انتي كنتي معتبراها مهمة انا بقوم بيها؟"
" افهم زي متفهم
معنديش طاقة ابرر واوضح حتى لو التعبير خاني"
لمس شفايفه ب لسانه وهو بيبص حواليه
وبعد كدا وجه نظره ل معتصم
"لا بس لعبتها صح المرادي
قدرت تغفلهم
برافو"
بصلي وكمل
" برافو ي أستاذة آسيا
الوقت فهمت آنتي ضعيفة لي
عارفة لي
لأنك انسانة مهزوزة
بتتأثر من اي عوامل خارجية
مش بتفكر بعقلها
مجرد مشاعر تافهة بتمشيها
انتي انسانة هوائية ي آسيا
هتندمي
ويوم م هتندمي
هتفتكري كلامي دا كويس اوي"
بص للكل بقرف
" من غير سلام"
وخد بعضه وطار من قدامنا
سامر كان مش عارف يواسي مين
بس الي عارفه
ان سراج ف الوضع دا مينفعش يتساب لوحده ابدا
ف استأذن وجري ورا سراج
اما نهلة ف قربت ل آسيا وقالت بعتاب
"سراج كان هيموت عليكي لما معتصم خدك
كان قلقان اكتر من اي حد فينا
حتى لو هو غلطان
مكانش المفروض تتكلمي معاه كدا"
حضنتها نهلة
"الحمدلله اني اطمنت عليكي
دا اهم من اي حاجة
انا همشي عشان اخرت اوي
عن اذنكو"
كلهم مشيو من تحت عيني
كان قلبي بيقولي انهاري
انهاري وعيطي على الي هببتيه
بس عقلي كان بيقولي اني بعد الي عملته دا
ف انا عين العقل
وعقلي غلب قلبي أخيرا
مسحت دمعتي وبصيت ع معتصم الي متعور ف بقه
" انا اسفة ي معتصم
دا كله بسببي"
اخر كلمة قلتها ب عياط
بصلي وهو مبتسم
"انا في جملة سمعتها ف نص الحوارات دي
خلتني مش حاسس ب اي جرح ف جسمي حاليا"
بصتله ب استغراب
"جملة اي؟!"
"لما قولتي معتصم هيبق جوزي
انتي صدقتيني ي آسيا
موافقة ترجعيلي!"
قولت ب بهزار
" يعني انا كنت بحرق دم سراج مثلا بالكلام
اه طبعا موافقة"
ضحك
والضحكة دي اي إنسان يقدر يميزها
ضحكة انتصار بعد تعب طويل
ضحكة بتمحي الوجع
الهموم
"انتي حيتيني ي آسيا
رديتي فيا الروح من تاني ب قرارك دا
مش عارف اقلك اي
بس ال عارفه ان كل الي عانيتي منه ف غيابي
ان شاءالله هعوضك عنه
هخليكي تنسي كل القسوة الي الدنيا عاملتك بيها ف غيابي
اوعدك اني هكون المسئول
عن كل ضحكة وكل بسمة بتترسم على وشك
هحيِيكي انتي كمان ي آسيا زي م حيتيني"
لأول مرة احس ب ارتياح من يوم م معتصم اتسجن
دموعي نزلو وبابا بصلنا
"بكرا ان شاءالله يمعتصم هنقرا الفاتحة
مش هبعدكو عن بعض آكتر من كدا"
بصله معتصم
"كتر خيرك يحبيبي
انت متعرفش انت غالي عليا إزاي
مكانش غيرك انت وكمال بيسألو عليا طول فترة السجن
حسستني ان ابويا لسة عايش
بكرا ان شاءالله هجيب عيلتي عشان اضمها ل عيلتي الأصلية"
قال آخر جملة وبصلي
يقصد انا عيلته الاصلية
------------------------------------
" يبني أقف بق هتجريني وراك لحد امتة"
كان معتصم مش شايف قدامه
بيجري
بيجري وبس
مش عارف رايح فين
هيرسى ف انهي مكان
لي حالته عاملة كدا اصلا
سامر زعق ب علو صوته
" سراااج كفاية"
وقف سراج و
بص للسما بتعب
قرب منه سامر وهو بينهج
"انت اي ي اخي
مش بترحم
جرتني وراك ١٠٠ كيلو
انت ف سباق؟"
مشى سامر ووقف قدامه
"فهمني
هتستفاد اي من الجري دا كله
انت اصلا لي بتعمل كل دا
هي آسيا تهمك اوي كدا؟"
بصله سراج واتكلم ب عدم اهتمام
"هتفرق معاك إجابتي؟"
"مش هتفرق
بس محتاج أعرف لي بتعمل كل دا
لي بتعذب نفسك
طلما هي مش فارقالك
او حتى بتعتبرها اخت ليك"
بص شوية ل سامر وبعدها خد نفس طويل
"مش عارف لي بعمل كدا"
" ي راجل! "
قال سراج ب اندفاع
" مهما كان ي سامر أختي
واكتر من اختي
لو شفتها بتغلط
طبيعي ابق ف الحالة الي انا فيها دي"
قرب سامر ليه وبصله ب مخزى
" العب ف دماغ حد غيري ي سراج
الي فيك دا مش حب أخوات"
"اي عرفك انت ي سامر"
"انت فاكر اني مغفل؟
متعرفش اني عارف لي لغيت سفريتك واستقريت ف مصر"
عقد سراج حاجبه
" مش انت بس
كلو عارف انا عملت كدا لي
عشان عايز ابق جمب أهلي وناسي وكفاية غربة لحد كدا"
ابتسم سامر
" يعني مش عشان آسيا!"
" أكيد عشانها كمان
مهي من باقي عيلتي"
مسك سامر راس سراج ب أديه الاتنين
" سراج
انت بتحب أسيا
ومن زمان كمان
خبي حبك عن حد غيري
لاني عارف من زمان بس كنت بقاوح واقول بكرا يعترف
بكرا يعترف بنفسه
من غير م حد يزقه"
نزل أيديه بعصبية من ع راسه
" بس فضلت تتجاهل مشاعرك تتجاهلها تتجاهلها
لحد م آسيا خلاص
ضاعت منك
كانت قدامك وقت م كنت بتحبها
لي الدم غلى ف عروقك الوقت لما شفتها بتكمل حياتها مع غيرك
ها
رد عليا"
كان سراج ساكت
كمل سامر
" عارف لي
لان الإنسان مش بيعرف قيمة النعمة
غير اما تروح من أديه
ونت النعمة كانت قدامك
وكان قدامك مليون فرصة تمتلكها
بس غرورك
وعزة نفسك منعوك
قولت ف نفسك لا
مش انا سراج الي يضعف قدام بنت
مهما كانت مين
اهي ضاعت
ورغم انها ضاعت
الا انها هزمتك بردو
شايف الكسرة الي ف عنيك دي
هتفضل فيها للأبد "
ضحك سامر وكمل
" دنت حتى عشان تثبت ل نفسك انك مش بتحب آسيا
روحت خطبت ريتال
لا و خليت آسيا هي الي تمشيلك الموضوع
عشان تثبت ل نفسك إنك مش بتضعف قدام اي بنت
عشان تثبت انك مش بتحبها
وادي النتيجة يعم سراج
آسيا خرجتك من حياتها زي الشعرة م العجين
لانها لقت الي كانت بتدور عليه فيك
ف معتصم
معتصم هيعوضها
ونت شوف مين هيعوضك"
مشي سامر من قدامه بعد م أخيرا قال كل الي كان مخبيه ف قلبه
اما سراج ف هو اللحظة دي
عرف مدى خطأه
واد اي كان كبير
حاليا هو بيدفع التمن
خسر حبه
خسر آسيا
-------------------------------
تاني يوم بابا كلم معتصم يقولو انه هيأجل قراية الفتحة ل بعد بكرا
عشان يلاقي وقت يعرف في العيلة الي حصل ل معتصم ويتقبلو دا
معتصم وافق بكل صدر رحب
بابا قرر يجمع العيلة عشان يحكيلهم
ويعرفهم معاد قراية الفاتحة
لان الكلام الي هيقولو
مش هينفع يتقال ف مكالمة ع الموبايل
كل لعيلة اجتمعت ف اليوم دا
ما عدا سراج
مكانش موجود
لاحظت اختفائه بس معلقتش
قربت مني تقى
"في اي يبت ي آسيا
هو انتي رجعتي ل معتصم بجد زي م نهلة قالت"
هزيت راسي ب ابتسامة
ف بصت تقى ب استغراب رهيب
قلتلها
"اطمني
بابا هيفهمكو كل حاجة"
كلنا اجتمعنا وقبل م بابا يتكلم قاطعه تامر
"معلش يعمي
انت قولت العيلة كلها لازم تبق موجودة
بس
سراج مش موجود
مش هتستنوه؟"
ابتسم بابا
" لا مهو سراج سبقكو وعرف
يعني وجوده مش هيفرق"
ف الوقت دا كلنا سمعنا صوت سراج
"ازاي وجودي مش هيفرق ي عمي
د انا الكل ف الكل"
قرب مننا وكان مبتسم اوي
بصيت لي ب استغراب من تغير حالته المفاجئ
بابا بصله
"شرفتنا يكلهم"
" انا أشرف ي حبيبي والله"
الكل ضحك عليه ما عدا انا
وسراج قعد جمب مهاب وسند ضهره لورا وحط رجل ع رجل
بصله مهاب
"اي ياض الانشكاح الي انت فيه دا"
" يزعلك انشكاحي ف اي ي اخ مهاب
هل انا سألتك قبل كدا لي بتحب الحلويات؟"
هز مهاب راسه ب لا
رد سراج
"يبق م تسألنيش منشكح لي بق"
بصله مهاب ب غيظ ورجع بصلي
"اي ي آسيا مش هن هاا ول اي"
كان بيقول هاا وهو بيشاور ع بقه
خبط جبهتي ب ايدي من قلة الحيلة الي انا فيها بسبب مهاب
" اسمع بابا هيقول اي الأول وبعدها هجبلك طفح"
هز راسه وبعدها بص ل سراج
"عمي كان بيقول انك سبقتنا وعرفت الي كان هيقولو
ممكن تقتل حماسي وفضولي دا و تعرفني اي الي هيقولو"
"وأقتل حماسك وفضولك لي
ترضالي ادخل السجن ؟"
اتغاظ مهاب
"انت واكل مستهبلة ولا اي
اي تقل الدم بتاعك دا ياه"
كان هيرد عليه بس بابا طلب من الكل يركز معاه
"طبعا انا جمعتكو عشان اعرفكو كل حاجة بدل م تعرفو الخبر من غير مقدمات وتتصدمو"
بابا بدأ يحكي عن معتصم والي حصله
بعد م خلص قال
" واهو رجع تاني ل بنتي وعايزها
وانا مش هلاقي حد يحمي بنتي ويكون بيحبها كدا زيه"
اعترض تامر
"متواخذنيش يعمي
بس انا مش بثق ف معتصم بربع جنيه
لي ميكونش عامل الحوار دا كله عشان تقتنعوا بيه
اصل لو مشيت ورا كلام حضرتك زي مقولت
المجرمين الي اتقبض عليهم ف الوقت دا كانو معروفين ف كل حتة
حتى صورهم انتشرت وقتها
ومكانش معتصم منهم
ثم ان كمان ازاي تتشابه الأسماء لدرجة انهم يفكروه هو
لو في تشابه اسماء
المحققين بيلجأو للعناوين الي تخص كل واحد فيهم
وأكيد بالعقل الاتنين مش هيكسنو فنفس المنطقة
ولو حتى العنوان اتلغبط وشافو ان عنوانهم واحد
بيلجأو للجد الاكبر
حتى لو مثلا او ٦ او ٧ اسامي متشابه
اكيد مش هتبق متشابهة للاخر"
بص ع الي قاعد
" ولا اي يجماعة"
كلهم كانو مقتنعين بكلام تامر جدا
ولكن قاطعهم بابا
"صور المجرمين الي نزلو وقتها
مكانوش كلهم
كانو الي اتقبض عليهم ف مقر الحادثة
اما الي زي معتصم وغيره
الي اتقبض عليهم ف بيتوهم
منزلش ليهم اي صور
وبعدين انا طول التلت سنين كنت بروح لي زيارة
وكنت شاهد على حالته ف التلت سنين
حتى لو بيمثل
مش هيعرف يمثل المرض النفسي الي كان فيه
وخسارة الوزن الي وصل ليها بردو
مستحيل يكون تمثيل
بلاش تتعبو نفسكو ف التفكير
معتصم كان محبوس
ولو دورتو على مليون دليل
كل الادلة هتبق ل صالح معتصم
ف عشان كدا جمعتكو
انا ان شاءالله قررت الم شمل معتصم وآسيا من جديد
وبكرا ان شاءالله هيقرو فاتحة بينا وبين بعض
ولو الظروف امكنت
هجوزهم خلال شهر ان شاءالله"
جالهم صوت معتصم الي ماما فتحتله لما جه
"مينفعش خلال أسبوع يعمي؟"