رواية سجين الحب الفصل الثامن8بقلم زهراء الحريري

زمـــــــزم

من عيني طاحت ناس جنت اني

آجِلها ولينزل من العين ما يرجع الها

••------------- ♡♡♡♡ ---------------••

درة

بنـان دزتلي صحن مطبك بيد عسولة، قبل لا تطلع دخل لؤي من شافها كال

لؤي:- اليوم العسلية عدنا

شلونج عمي

كالتله وهي حاطة ايدها من الشمس على عيونها 

ـ الحمد لله عمو 

انت شلونك

دحك عليَّ وكال

لؤي:- جا شمالج ما تخلفيلي مثل هاي

انكريزيه شوفيها راح تموع من الشمس

عليج الله شووه باوعي عليها مو جنها قطرة عسل والعندي جنهم رماد تنور لاهمه رصاصين لا همه ملحان لونهم محير الوادم

ضحكت وهي دحك بيناتنا متعودة عليه وعلى سوالفه سلمت وطلعت 

وكف بالباب يباوع وراها منتظـرها تدخل لبيت اهلها، سد الباب وهو يحاوط اكتافي قرب راسه على راسي ويحجي بجديـة

لؤي:- نروح للغرفة ونجرب بلكي هالمرة تضبط 

درة:- لؤي والله ترى اخذ جهالي واروح اكعد ويا اثيلة وبعد ما تشوف وجهـي خوووش

لؤي:- لاااا ولج تصير بيهم عقد نفسية 

درة:- وليش اسم الله 

لؤي:- جلحان ويكابلون حلويات شيصير بنفسيتهم؟ 

ضربته على بطنه ودخلت زعلانـة عقدني بسوالفه والله جهالي حلوين معانيهم مرسومة رسم وسمارهم يجنن ڪل اللي يشوفهم يحبهم خاصة علوش تجنن ملامحـه وعيونه على خاله آصف واحلى بعد ومكحلات 

بس اخخ من لؤي أبو الانڪريز ما يرتاح الا اخذهم وأهج منــه صدك 

وكفت على الطباخ اصب بالغدا واحجي عليه وحدي واضرب الجفجير بحافة الگدر بعصبية 

ـ يعني اذا انت اجلح اني شدخلني  مخلفتهم وحدي غير عليـك طالعين وجهك محترك على ڪولت زوين ابن رشك وجهك مجسب

حضني من وراء وهو يبوس رقبتي وخدي وينزل على كتفي

لؤي:- شبيها ارنوبتي ترطن وحدها منو مشعول البخت مزعلها

درة:- وتسأل شبيه؟ 

غمضت عيوني من بوساته اللي يمشي بيها من ڪتفي لرقبتي همس

ـ ها ماهداج الله ونروح نجرب هالمرة احس راح تضبط وياي واخلف أرانب ملونـة

دفعته عني واني اصيح شبيه خبلة واخلف بعد توووبه 

ضحك وهو يسحب الخاولي من على كتفه طلعه برة فتحه على الحبل ورجع يتغدا 

سألته على أرغد كال بعده على الله تنهدت بحزن ورجعت سألته على آدم كال بس يلڪون البنات يصعد للقاضي واذا البنات حجن الحقيقة يطلع

ـ واذا ما حجن؟ 

ـ ينحڪم 

وڪعت دموعي رفع عينه مد ايده يمسحهن

لؤي:- لا تبجين راح يطلع بعون الله 

سولفت لـه على زمزم هو يعرف بيها هينا بس ما يعرف بحالتها بالتفصيل 

حجى عليَّ ليش ما سولفتله من البداية كتله امها موصيتني ما اسولف 

لؤي حيل يحب زمزم معزتها تختلف عنده ودائما كلمته عنها تنغمش بالگلب البارعـة

نقهر عليها تا غـداه عافـه، العصر رحنا عليها وصيته ما يحجيلها عن وفاة عمتي لان بعدهي ما تعرف

وڪف بالباب واني دخلت جوة كتلها 

ـ مزنـه عمو لؤي يريدج بالباب

ما قبلت تطلع قنعتها امها كالتلها 

ـ عيب من عمج يجي تا يشوفج وما اطلعين الـه شيڪول عليج 

يلا ماما 

لبست حجاب وطلعت لـه من شافها تفاجئ شصاير بيها برفع العود والوجـه شاحب والعيـون الجانت تلمع بالوڪاحة طافيـة 

لؤي:- ولج يبعد عمج شصاير بحالج

ليش هيج متغيرة! 

ما رفعت عينها بوجهه

ـ عمو مزنه 

اشو بله ارفعي راسج 

شصاير بيج وين ذيج مزنـه ام طحش وين ذيج الخدود وين ذاك الثرب

احتاريت ديحسن من نفسيتها لو ديجعصها الها، اثيلة حجت وياه من وراء الباب 

ـ خـوية هذا حالها من يوم رجعتها من حديثة ماتفعل تحجي ومخلصتها نوم والاكل اذا ما اجبـرها ولا تگرب عليه

اثيلة تشرحله حالتها بالتفصيل وهو عيونه على زمزم اللي متضايقة وتريد تـدخل، حطها جوه ايده يحجي وياها

لؤي:- احجيلي شنو صاير وياج هناك

زمزم:- ما صاير شي عمو

لؤي:- لا تقنعيني بهذا وضعج ماڪو شي 

مزنه عمي احجي خلي نفتهم شبيج هيج طـافيـة

زمزم:- على بيبي ام هاشم وكعت بحضني عبالي ماتت وعمو أرغد اصيح بيه مايسمعني يضرب بهاشم

لؤي:- جنتي يم هاشم!! 

هزت راسها اي رفع عيونه خازرني لان ما مسولفتله عن هـاشم وتواجد زمزم ببيتهم

لؤي:- تعاي وياي لبيتي اريد احجي وياج

زمزم:- لا عمو اريد انام

سحبها من ايدها اخذها وراه غصباً عليها لحكتهم طلع كراسي اثنين من المطبخ للحديقة اشرلي براسه ادخل جوه 

دخلت وكفت وراء شباك الصالة كاعد كبالها يسولف وياها ما اسمع شنو يحجون بس ما طولت زمزم وهي تضم وجهها بيدها وتبجي واضح الي بحرقـة 

تقرب عليها وهو كاعد الكرسي مال وياه نزل اديها كاضبهن بين اديه ويسولف عليها وطولت كعدتهم للمغرب دخلها جوه وجبرها تتعشى ويانه وڪل شوية وڪالها شوفي أبن عمتج الاملح بلكي من يكبر اخطبج اله وهي تصد على علوش تكرصه بخدوه  

يوميه العصر يروح يجيبها يكعدون بالحديقة لحالهم يسولف عليها ومثل ڪل مرة تبجي وما يعوفها ترجع للبيت الا تتعشى ويانا اثيـلة كل نوبة اروحلها تدعيله  

دا يلعب ويا علوش كاعد على القنفة يضرب الطوبة برجله وعلوش يركض وراها ويرجعها عليه بيده دك تلفونه من جاوب طلع للطرمة مستعجل احجي وراء لؤي شصاير وين رايح 

ما جاوبني يحجي بالتلفون ينبه على الطرف الثاني ينتبه ولا يتهور، طلع ركض وهو يسد الباب وراء 

••--------------- ❀❀❀ ---------------••

صوت بداخلي يصرخ انهزمي عيوني بعيونه مرت اسوء ايامي وصوت صرخاتي دا اسمعه وانفاسه اتخيلها على ڪتفي بيها 

حجيت بضعف وصوتي مخنوك متقطع

ـ ار…ار…غد

احاول ادفع بجسمي للخلف اريد اتحرك عاجزة عن الحرڪة تحنطت من شدة الصدمة بوجوده كبالي

هاشم :- اهدي والله ما سويلج شي 

راح اروح بس ابتعدي عن الباب 

احس عيوني تعلكت بأعلى الجفن هذا اخر شي اذڪره ما اذكر بعد شلون وڪعت ومنو نزلني للطوارئ

فتحت عيوني اباوع منا ومنا بخوف نبض گلبي احسه بكل جسمي ينبض مرة بقوة ومرة بضعف جنت اتخيل لو حقيقة؟

 رفعت ايدي لصدري احس روحي دتگلب، عيوني على الباب اريد احد يجي ويحميني احس بيه موجود وعيونه عليَّ مراقبتني احساس الخطر لازمني 

رفعت ايدي للممرضة ما اڪدر احجي اريدها تشوفني دتفتر على باقي الاسـرة ما منتبة عليَّ 

عيوني صارت على الباب شفته موجود وبسرعة اخفى جسمه 

غمضت عيوني عاصرتهن واحس برجفة حواجبي تخيلت جسمه عليَّ وكل حرڪه منه رجعت عليَّ كانه هسـه حقيقة مو عقلي يصورلي ابشع اللحظات واني جوا 

بدون وعي بالواقع بعدني بذاك اليوم عطت بأعلى صوتي باسم سراج واني  اڪلب راسي واتقيئ 

الكادر الموجود كله التم عليَّ اريد اسيطر على روحي ما ڪدرت اختنكت واني استفرغ بقوة من اقطع اصرخ 

ـ بعدوا عني 

ما اذڪر كل اللي صار وياي بالتفصيل مجرد لحظات اذكرها رافعه ايدي ادفع بالفراغ واصيح بعدوا 

سمــــــــــــــــر

دا نمشي للطوارئ شبه نركض اتصلوا على يونس وبلغوا بوڪعة نفس قبل لا ندخل الطوارئ سمعنا صوتها تصرخ 

دخلت عليها اركض كاعدة على السرير تدفع بالاطباء وتضرب بيهم بيدها السليمة يردون يكضبوها وهي متهسترة

دنكت راسها تستفرغ كمشتها من اكتافها ويونس رفعلهم ايدها مثبتها ضربوها ابرة اسمعها تهمس بصوت مبحوح 

ـ سراج الحكني 

ارغد ساعدني

عووفني 

وكع راسها على كتفي يونس طلب منهم يبعدون سد البردات وهو يحاجيني من وراهن

ـ راح اجيبلها ملابس واجي 

ـ لا تتاخر استعجل شصاير بحالها سودة عليَّ 

تأخر يونس والممرضات الله يوفقهن جابلي من هاي الملابس مال العمليات نظفتها ولبستهن الها علما يرجع ونطني حجاب لفيته على راسها جمعت ملابسها المتلفة بعلاكهة بس عباتها نظيفه عبن باقية عند رجليها

نقلناها لغير سدية غطيتها بالعباية نايمة وتهمس باسمائهم تستنجد بيهم واڪثر اسم تهمس بيه سراج  

عفتها وطلعت اريد اتصل على يونس شصار عنه دا افتح بالتلفون رفعت راسي من حسيت احد وڪف كبالي 

شهگت بصدمة من شفته وبدون سيطرة وتفكير رفعت ايدي وضربته راشدي بكل قوتي حسيت جف ايدي خدر

العالم الموجودة كبال الطوارئ كلها عيونها صارت علينا صحت بيه 

سمر:- شسووي هينا يانذل 

بسببك وكعت؟ 

المن جاااي شنو تريد منها

هاشم:- ماردت اطلع كبالها والله ردت اشوف ارغد 

سمر:- على شنووو تشوفه على سواد وجهك بيا عين جاية هينا! 

اللي مثلك يروح يدفـن نفسه 

امشي منا ترى والله اروح اجيب الشرطة الواكفين بره عليك اخليهم يسحلونك 

هز راسه اي وبكل قوتي تفلت عند رجليه ورجعت على نفس واني كامشه مكاني گلبي ديأذيني من العصبية وعلاجي صار كم يوم اخربط بيه نفعلت بسببه 

كعدت على حافة السدية قريب من رجليها سانده عكس ايدي بالاطار و مايلة راسي على جفي دموعي تصب ياكبر معزته جانت بگلبي احبه مثل حبي لاخواني ولا تخيلت يجي يوم وهيج اوكف كباله وادحك عليه بكره وقـرف من فعلته الشنيعة

ـ دمرت روحك الطيبة ودمرتنا وياك وسـفة

صديت براسي على نفس سودة عليَّ بعدهي تهلوس تقربت عليها حضنت جف ايدها بين جفوفي ظليت ادحك عليها بحزن مر وقت هجدت وبينت الراحة على ملامح وجهها 

سمعت واحد يسال عليها فتحت البردة قليل هذا سراج صديق آصف

ادحك عليه طرف شفته ينزف دم وملابسه مبعثرة واضح جان بڪونه

دحك عليَّ بين اللي عرفني وبين الـ لا أشروله على مكانها تقدم وهو يرجع شعره بتوتر وكفت واني اسد البردة بعصبية، وكف كبالي عينه بالڪاع

ـ شلونـه؟ 

ادحك عليه وساڪتة تحمحم كال 

ـ اقاربي هنا وهو اتصل عليَّ بلغني بوضعها لان يعرفها مقربة لاهلي

عباله ما اعرف بيه ما يدري ڪل شي اعـرف، حجيت وياه بعصبية بسبب شد الاعصاب اللي صـار 

سمر:- اي واقاربك ماكالك احنا يمها شڪوو جاي! 

اتبعد عنها لا تاخذ المقسوم مثل ذاك النذل

سراج:- هوب هوب

رافع حواجبه وعلى وجهه ظهرت أبتسامة خفيفة

سراج:- اعتذر اذا سببت ازعاج وما يحـتاج منج هذه النبـرة 

ربت على صدره ومشى دخل لؤي وكف كباله وهو يسال ها شصار لحكت عليه؟ 

حط جف ايده على ظهر لؤي مطلعة وياه خارج الردهة، دخل يونس ظليت احجي عليه عبن تأخـر اخذت منه الملابس بنتر ورجعت يمها

فتحت عيونها بس لا حجت ولا تحركت صافنة بالسقف 

سمر:- أم آدم الحـمد لله على سلامتج

ماصدت عليَّ ولا ردت بقت صافنـة احجي وياها اريدها تنتبه عليَّ وبدون فايدة، سكتت عنها مرت اڪثر من ساعة وهي على نفس الوضع مثل الجثة ما تحرڪت بس عيونها تسدها وتفتحها

نفس:- اللي صـار حقيقة لو جنت اتخيل وجوده؟ 

تقربت عليها الدموع تنزل من زوايا عيونها صدت عليَّ بتعب

نفس:- جنت اتخيـل؟ 

ما ڪدرت اجذب عليها قبل جبرونا نجذب ومشينا بكلامهم بدون ما نعرف السبب الحقيقي لجذبنا ومن عرفت صار بخاطرها مني 

سمر:- اي جان موجود أسـود الوجـه يكول ردت اشوف ارغد 

لا تخـافين طـردته ما عاد موجود ويونس هينا ولؤي وسراج

غمضت عيونها بـألم ما حجت ولا سألت شلون طلع 

طلعت من الردهـة يونس واكف وياهم، اشرتله اجى عليَّ كتله صحت وسألتني 

ـ عـرفت؟ 

اي ما ڪدرت احذب عليها 

صـد عليهم كال روحي يمها رجع عليهم واني رجعتلها لكيتها دتنزل بسرعة تقدمت ساعدتها واني البسها عباتها

ـ اخذج للحمام تغسلين وتلبسين هاي الملابس جابها الج يونس

حجت بتعب والعبـرة خانكتها

نفس:- لا اروح لبيتي اسبح داحـس بلمساته بعدهي على جسمي 

أخذت الملابس النظيفة والمتلفة سندتها بيدي امشي بيها ماثابته ڪان اطرافها خدرانـه ويا كل خطوة تجر النفس بتعب وعيونها تتلفت بخوف

سمر:- لا تخافين راح منا اخذ روحه ملك الموت ان شاء الله 

صارت عيونه عليها قطع كلامه صديت عليها هي همات ادحك عليه 

اجى يونس علينا يتحمدلها بالسلامة وهي بس حركت راسها

كتله ناخذها للبيت تريد تسبح وترتاح

كال راح اروح اجيب السيارة للباب وانتي طلعيها على كيفج 

سلم عليهم برفعة ايده ومشى كبالنا مستعجل دا نمشي ورا ووكفت 

سمر:- ها اجيبلج كرسي احسن

حركت راسها بـ لا وهي تلتفت وترجع عليهم مشيت وياها ساندتها بس اعوفها توڪع

وڪفت كبالهم عينها على هذا اللي اسمه سراج وتحاجيهم

نفس:- شـلون طـلع!! 

غير انحڪم؟ لو جذب؟ 

احسه نصك بمكانه ما جاوبها، لؤي يرد عليها كالها آصف وراء طلعته كدر يتلاعب بقضيته ويطلعه منها براءة

ظلت عينها على سراج اللي يمسح جفوف اديه بجيوب البنطلون وعينه ما فارڪتها

حجت وياه بترجي والدموع تنزل :- سراج راح ترجعه للسجن 

غمض عينه وهو يهز راسـه لا 

ولؤي جاوبها:- ما يرجع آصف جايب ادلة قوية وشهود تثبت الكلب ما جـان موجود بـ بغداد بذاك الشهر فرجعت للسجن مستحيلة 

صدت على لؤي حجت بغصة وهي ترفع ايدها لرقبتها مخنوڪة

نفس:- ويضيع حقي بهاي السهولة وهو يسـرح ويمـرح هي هاي العدالة؟ 

حجى بصوت ضايع وهو يتنفس بقوة وياه

سـراج:- من يوم عرفت بيه طلع جاي احـاول بڪل سبيل الكى ثغرة ترجعه

نفس:- ولـڪيت

هز راسـه لا وهو يبعد عيونه عنها بقلة حيلة وعجز

دنكت راسها وهي تطلب مني نمشي طلعتها يونس واكف يتفاهم وياهم لان مايقبلون يطول بوكفته 

ادحك عليه مدنكه راسها ضامه وجهها بجف ايدها بالبداية فكرتها ساڪتة بس من اهتزت كتوفها عرفتها دتبجي

نفس:- ليش هيج آصف مو اعتبرتك اخوي ليش ضيعت حقي ومظلوميتي بالحيلة والمڪر 

عندك بنات ماخفت عليهن من حوبتي وحرگة گلبي! 

يونس يدحك عليها بالمراية بحزن وهو يحجي على هاشم بينه وبين نفسه 

وصـلنا لبيتها ساعدتها تدخل للحمام وملابسها علگتها الها والباقيات بس اروح لبيتي اخذهن وياي واحرگهن

أسمع صوت نحيبها قطعت گلبي بيه طولت بالحمام ومن طلعت العيون ممرودة، نطيتها ايدي ساعدتها تمشي اطرافها ترجف، كعدتها بغرفتها أجفف بشعرها عيوني كل دقيقه تنزل عليها دموعها ماوكفت 

نفس:- وين تلفوني

زمزم:- ما اعرف والله اعتقد بقى بالمستشفى 

نفس:- اتصلي على آصف من عندج

زمزم:- ما عنـــدي رقمه

نفس:- تلفون أرغد بغرفة آدم 

رحت لغرفة آدم من دخلتها نقبض گلبي سودة عليَّ ياندر عمتك غرفتك وحشـة 

لكيت تلفون ابوه على الميز اخذته ورجعت الها فتحته طلعت رقم اصف تصلت عليه من واتساب أرغـد لان الشريحة موقفيها

من جـاوب انطيته الها حجت وياه بغصة تحاول تسيطر على صوتها

نفس:- ليش هيج أبو مصطفى 

مو ڪولت عليك أخـوي ابو الوڪفات

شنو ذنب يمك وهيج تضيع حقي 

سكتت تستمعله بعدت التلفون عن اذانها تشهك رجعته لاذانه تحجي وياه بعبرة 

نفس:- ضـاع حقي بعدالـة البشر بس مايضيع بعدالـة الله باجر ياخذلي حقي منك ومنـه والنـا وڪفة طويلة هناك 

ما اڪولك غير هذا الڪلام بعد 

بس ادعـي الله يستر على بنـاتك وما يطلع حوبتي بيهن 

قطعت الاتصال وهي تبجي حضنتها من وراء واني ابوس راسـها

كملت شعرها تمددت كالت غطيني احس نفسي بردانه غطيتها وطلعت اتصلت على بنان وصيتها على علاج عمتي أم أرغد مو تنساه وترجع توكع المرة 

بقيت وياها لـ تاني يوم وهي على نفس النـومه ما اعرف تمثل النوم لان الليل مر وتعدى وهي تبجي 

ڪرم اتصل كالها آدم راح يطلعونه للمحڪمة ويونس اتصل عليَّ ڪال أرغد استعاد وعيـه بالكامل عرفنا ڪلنا

الخبرين هونوا عليها اللي صار أمـس اجرنا تكسي وطلعنا للمستشفى لكينا عمتى جايبها يونس ظليت احجي عليه المرة مريضة شلون يجيبها وعمي موجود وابوي واخـواني

من نزلوا يلا ڪدرت تدخـل عليه قبل لا اسد الباب شفتها كعدت على السرير وهي تنزل راسها على صدره تبجي بحرقة، وڪعت دموعي على منظرهم 

•------------- ♡♡♡♡ ---------------••

نفــــــــــــس 

رفــعت راسي من صدره مسحت دموعي واني ابتسمله، اخذت جف ايده حضنت بيه خدي اباوع بعيونه يباوعلي بتعب 

نفس:- بعيونك ألتميت 

لاتسد هالعيون وطشر روحي خلافك

بلع ريڪه بتعب، راد يحجي ماڪدر، حاول يحجي ماطلع منه بس آ…د

نفس:- آدم 

غمض عينـه وفتحها احس دموعي واكفة بطرف عيني بس ارمش توكع كتله واني اخفي عيوني بجف ايده

نفس:- بالجامعة عنده أمتحان يكمل ويجي ادعيله بگلبك الطيب 

باوعت عليه من فوك جفه، عيونه عليَّ حرك اصبعه على طرف عيني يتلمس الدمعة 

نفس:- دموع الفرحـة برجعتك النـا

رجع بلع ريڪه بصعوبـة غمض عيونه للنوم وايده ثقلت بيدي رجعتها على السرير 

نهضت من مكاني تقدمت على راسه دنكت بسته بجبينه الله لا يحرمني من صوت انفاسك وفتحت عيـونك

طلعت خارج الغرفة تلفوني بعدني مانزلت اسال عليه اخذت تلفون سمر اتصلت على ڪرم سألته شصار وياهم

كال البنات الحمد لله حجوا الحقيقة كبال القاضي وبإذن الله باجر آدم يطلع

رفعت راسي واني اڪول بصوت ممزوج بشهڪاتي

نفس:- اللهم لك الحمد حتى ترضى ولك الحمد اذا رضيت ولك الحمد بعد الرضا اللهم لك الحمد على نعمك الظاهرة والباطنة 

زين والبنات شنو صار عليهن

ـ ما اعـرف 

اخذت التلفون سمر مني ايدي مسحت دموعي واضحك على كلامها

سمر:- يول كرومي وياك مر على ابو الجڪليت اللي دائماً اشتري منه 

،جيبلي منه جڪليت اخوك مافعل ياخذني هسه

سڪتت تستمعله رجعت كالت لـه

ـاي بس خلي ينزلك من السعر ويكثر كوله لام الجكليت وهو يعرفني قبل فترة اتفقت وياها اذا طلع ادم اخذ جكليت منه نذر 

سدت الاتصال وهي تحضني 

ـ الف مبارك على طلعته وعلى سلامة أبو بيتج يارب ما تمر عليج بعد هيج شدة 

باستني بخدي رجعت حضنتها واني أبجي سمر صارتلي نعم الاخت البقية ما مقصرات اخواتي والنعم منهن لڪن سمورة مكانتها مختلفة عندي واڪثر ميـانة وياي  

اجى ڪرم وشايل اكياس جكليت اثنين اكبار كم كيلو ما اعرف الولد اكتافه تقطعت يحجي عليها يكولها

ـ اني مو صاحي واسمع منج حقه يونس من نهزم وما أخذج يول لوما عيب من ابو المحل ولا اجيب شنو راح تصيـر ازمـه بالجكليت

ـ غير نذر ياعيني بس انت تحجي من غيظك عبن ماطشيت بعرسك حكليت

دخلت على أرغد دنكت باسته بـ راسه وترست السرير جكليت عينه فاتحها قليل يباوع عليها ويحاول يبتسم 

طلعت تنثر الباقي خلصت الكيس والثاني كالت لآدومي بيرغ العراضة عزيز عمتـه

صح فرحانـة بأرغد وبرائة وليدي بس من افرغ لنفسي واصفن اشبع بجي مو بيدي احساس الظلم اللي دا احس بيه الله لا يشوفه لأحد يذبح الروح  

بالليل يونس جاب قمر لابوها الولد ساعدوا يكعد بعده ما يكدر يسيطر الدكتور كال طبيعي كم يوم ويرجع يتحرك وحده 

حاضنته من رقبته وتبجي مغمض عيونه يشم بشعرها حاول يحجي وياها ماڪدر 

حاولت ابعدها عنه لان تعبته ماقبلت معلڪة برقبته اشرلي بعيونه اعوفها كدر يرفع ايده بهدوء سند ظهرها بجفه 

من شبعت منه كدر حمودي فدوة لعينه ياخذها وهو يڪولها نروح نشتري 

باوع علينا نظراته ادور على عزيز گلبه حجى بس اول حرفين من اسمه بتقطع

يونس:- بالطريق 

ظل يباوع علينا بشك نظراته تسأل شصاير ڪرم طلع للدكتور طلب منه ينطوا منوم لباجر نخاف عليه وهم بلغونا ممنوع الصدمات 

ثـاني يوم رحت ويا يونس بقينا بالسيارة منتظرينا يطلع وسمر حايرة بالجڪليت خلصت الطريق تفلس وتاكل وكل شويه مدت ايدها وحطت بحلك يونس وهو يصيح السكر اليوم يعلك من وراج ام الجكليت 

شفت لؤي وسراج طلعوا وابني بيناتهم فتحت باب السيارة ونزلت بقيت واڪفة منتظرته يقرب علينا من شافني وكف بمكانه ظل يباوع عليَّ مدة ثواني التفت سلم عليهم بيده واجى بتجاهنا سمر تنثر بالجكليت عليه تقرب مني وحضني بين اديه بقوة حضنته واني ابجي اشم بصدره ورقبته اخذت وجهه بيد بوسته بوجهه وعيونه وجبينه

نفس:- ولك يمه گلبي مات اخلافك

مايحجي رجع حضني بقوة وهو يبوس راسي 

سمر:- يونس اخذ من هذا الجكليت انطي لزوج درة وصديقكم 

نفس:- آدم يووم يهيل ريتي اشو شوفني وجهك خلي عيوني تشبع منه

بقى حاضني اكتافه تهتز يبجي بدون صوت بسته بكتفه

نفس:- لا تبجي ياروح امك دموعك تلجم بگلبي اروحلك فدوة لا تبجي

آدم:- اسم الله عليج

بعد عني مسح عيونه ووجهه اخذ اديه بديه دنك باسهم 

آدم:- الغـالية أم آدم شلونج يمه 

نفس:- برجعة ابوك ورجعتك اني بخير لا تعوفوني ما يتحمل هذا الگلب بعدكم مـرة ثانيـة انتم الامان والسند اليَّ

رجع دنك على جفوف ايدي يبوسهن رفع راسه حضن راسي بين اديه طبع بوسة بوسط جبيني

صعدنا بالسيارة كعدته يمي وطول الطريق حاضنه راسه لصدري سمر كاعدة بالمقدمة ملتفتة علينا تضحك 

سمر:- كسرتي ركبته 

رد عليها 

آدم:- بالعكس مرتاح هيج 

رفع وجهه اليَّ مبتسم بس نظراته غريبـة مو ذاك آدم ابني اكو شي بيـه 

رفعت جف ايدي دخلت اصابعي بشعره احركهن على فروة راسه بلطف 

اخذ جف ايدي الثانيه حاضنه لوجه ويبوس بيه بوسات متفرقة 

وصلنا للمستشفى نزلنا من السيارة غمض عيونه يزفر النفس برجفة 

رفعت جف ايدي لظهره التفت براسه عليَّ كال

ـ ها يالغالية؟ 

نفس:- يلا امي اصعد لـ ابوك ترى منتظرك عباله بالجامعة كرم كاله البارحة نايم يمك بس ما مصدك 

رفـع ايده حضن اكتافي دخلنا للمستشفى صعدنا لغرفة ارغـد نزل ايده آدم وكف بمكانه الدموع تارسه عيونه متردد

اخذت ايده بيدي مشيته وراي ابوه كاعد على السرير ابو أرغد موجود وعمامه وولدهم، يباوع على قمر الكاعدة بحضن ڪرم وتلعب بتلفونه التفت علينا عيونه على آدم 

تحركت شفته حجى اسمه بصوت متقطع 

ـ آد…م

عاف ايدي وتقدم على ابوه بخطوات سريعه كعد على السرير وهو يحضنه بقوة، اكتافه تهتز وصوت بواجيه هالمره مسموع محتار شلون يبوس ابوه مرة براسه مره بعيونه مره برقبته نزل على جفوف اديه باسهن

رجع حضنه اباوع عليهم وابجي وارغد يرفع بيده بصعوة يريد يحضنه والدموع تصب شمه من رقبته 

حجي بصوت متقطع ابني

جاوبه وهو يبجي

آدم:- روح ابنك 

بوية هسه يلا رجعتلي روحي يافخـر العمر وجـنة الدنيا لا تغمض عينك عني 

اباوع عليهم واني اشهك والكل وياي يبجي عليهم صوت شهگات آدم تفتت الگلب 

آدم:- ادعيلك مو بالعمر بوية ادعيلك بالعمرين 

عيوني على أرغد حاضنه ويبجي وماكو غير كلمة ابني متقطعة تطلع منه 

ڪرم:- كافي عمي بعد عن ابوك بعده تعبان خلصتوا دموعنا

اجى يبتعد وارغد منعه بقى حاضنه، الولد وعمامهم ماتحملوا طلعوا برة الغرفة يمسحون بعيونهم وسمر واڪفة على صفحة تباوع عليهم وتشهك بالبجي

تقدمت عليهم امسح على ظهر آدم

نفس:- كافي قطعتوا گلبي ارحموني عاد 

ابتعد عن ابوه لزم جفوف اديه ودنك عليهن باسهن مرة ثانيه، يبـاوع بعيونه ويحجي وياه 

آدم:- ابو آدم الحمد لله على سلامتك بوية، يامن ما تلوك ڪلمة بوية لغيره

نزل راسه بحضن ابوه، ارغد رفع جف ايده بحركة بطيئة وحطها على شعـر آدم 

••-------------- ❀❀❀ ----------------••

اثيـــــــــــلة 

اجت علينا درة فرحـانة بخبر أرغد رجعله وعيـه، بنتها بنان بحضن كوثر تلعب بيها، وعلوش ابو سمرة يركض بالصالة كبالنا هو ومصطفى يلعبون

واني ويـاها نشرب عصير ونسولف سولفتلي على هـاشم لؤي مسولفلها 

اثيلة:- جلطها للمره شعنده رايح للمستشفى هساع تذڪر أرغد عزيز 

درة:- لؤي يڪول سراج كامشة مكسر اضلاعه ولوما الناس تدخل بينهم وتكمش سراج عنه جان ميت جوا ايـده 

اخذت قطعة كيك وهي تصيح على أبنها

درة:- لك علوش لا توڪع ماما، ابوك يڪسر راسي 

صدت عليَّ سـألتني 

درة:- راح يسولفون لـ أرغد عن وفاة عمتي ام هاشم؟ 

اثيـلة:- ما اعتقد باسل كال الدڪتور مبلغهم ممنوع يبلغوا بشي يصدمه

جفلنا اثنينا على زمزم

زمزم:- بيبي توووفت!

سألت وهي تغص بعبرتها الظاهر جانت واڪفة من زمان وسمعت ڪل كلامنا وعـرفت أرغد مريض وڪلامنا عن هـاشم

جنت مقررة ما احجيلها هسـه عن وفاة عمتي ليما تهجد أوضاع الڪل والكى الوقت المناسب نهضت الها بسرعة 

رجت البيت بالصياح والبجي حضنتها اريد اهجدها درة اجتي وياي تحجي وياها  

ما تسمع شنو نحجي كطعت نفسها وهي تصرخ وتصيح بجرة:- بيبي ليش بيبي

وكعت بالكاع كاعدة تبجي وتصيح لا بيبي ما ماتت عمو كال بالمستشفى ما ماتت فدوة ماما اخذيني الها اريد اشوووفها 

تعبت بس ما بطلت البجي وتصيح بصوت مبحوح ضعيف ماتت بيبي لا بعدهي مريضة هسه اروحلها وتڪعد تسولفلي وتعلمني 

ساعدتني درة ناخذها للغرفة ڪعدتها على سريرها وهي مستمرة تبجي وتنكر موتها ومن تجي لحظة تستوعب تصرخ باعلى صوتها ليما احسه ينجرح ويختفي 

كامشة وجهها باثنين اديـه احجي وياها بصوت عالي وهي تهز راسـها بلا 

حاولت اشربها مي دفعته مني وهي تحضني وتصرخ اهجد بيها وهي سادة اذاناتها 

بعدت من حضني ومن بين شهكاتها رفعت جفوف اديها كبالي تحجي وياي بصوت متقطع تطلع الشهگة وياه

زمزم:- ڪل مرة اسويلها شي تكمش اديـه تبوسهن 

ضربت جفوفها بالسرير وهي تصرخ ليش ماتت 

ولج بيبي 

اخذت راسها ضميته بين كتفي ورقبتي واني اصبـر عليها واشرحلها عن المـوت اريدها تستوعب لسه مستمرة درة تحجي وياي عووفيها تبجي وطلع اللي بگلبها

نامت وراسها على كتفي ثـاني يوم من ڪعدت ساڪنة تا دموعها ناشفه ما حجت ڪل شي بيها جامد 

حاولت اخذها وياي تهز راسها بـ لا عفت درة يمها تا اروح اسـلم على نفس وآدم كتلها ساعة وارجع وانتي روحي وصدك ماطولت اقل الساعة ورجعت ودرة راحت عليهم

 ••------------- ❀❀❀ ----------------••

نفــــــــــــــــــس 

آدم العصـر اخذوه مهند وعلي حتى يحلق راسه ولحيته صاير حيل كثيفة 

اني رجعت للبيت ارتبه هاملته من يوم وڪعت أرغد وبـاجر بإذن الله يرجع راعيـه وينوره بوجهه وهيبته 

البـنات كلهن اجـن وحتى ياقوت زوجة محمد اخو بنان وياهن، ڪاعدين بالصالة نسولف ودخل ابني واعرفه مو طبيعي متغيـر

عماته كامن سلمن عليه باسهن كلهن من روسهن ڪعد وياهن بالصالة عيوني عليه عيونه ما تجي عليَّ 

هن يسولفن وهو صـافن يباوع على جفوف ايده حتى من يحجن وياه ما يسمعهن، رفع راسه اخـذ نظرة سريعة على الڪل ڪأنه مفتقد أحـد

شاف عسل وڪوثر وترتيل كاعدات سوة يسولفن بيناتهن ويضحڪن باوع على عمته اثيلة وخفض راسه 

نفس:- ليش ماجبتي زمزم وياج

رفع راسه بحرڪه سريعة،عيونه عليها منتظر جوابها ما منتبه عيوني عليَّ 

اثيـلة:- ما قبلت تجي اشكد حاولت وياها تأشر براسها لا بدون ماتحجي

وصاير مهربها النـوم 

نفس:- بس يطلع أبو آدم وتخف الرجل علينا اجيـها 

اثيلة:- وامـس عرفت بوفاة عمتي شسولفلج عن حالها والله تبجي الصخر 

عقد حواجبـه تدنى بڪعدته لطرف القنفة، اثيلة تسولف عن ردة فعل زمزم وهو مرڪز ويانا الى ان انتقلنا بالحديث بعيد عن زمزم

دنك راسه ترخص من عمـاته ودخل غرفتـه، اثيلة كالت درة تريد تجي خطيـة واني وعدتها ما اطـول عليها لازم اروح طلعت وآدم هم غيـر ملابسه وراح لـ أبوه

ثـاني يوم جابوا أرغد بكل خطوة يخطيها للبيت بمساعدة آدم وڪرم اني اردد بالحمد والشكر لله البسمه على وجهي ودموعي تجـري بس باقية الغصة منغصة على فرحتي برجعتهم احـاول اتناسى واڪول حقي يم الله مايضيع بس مو بيدي القهر سهام ونـابته بضلوعي

البنات الله ينطيهم العـافية وياي ما عافوني اسبوعين والرجل علينا ما قطعت وارغد يـوميه يجي علي يسويله جلسات علاج طبيعي رغم الدڪتور كال ما يحتاج 

زمزم اجت ويا امها ورا الاسبوعين

من شافها أرغد فتحلها ايده دخلت حضنه تبجي وهو يمسح على راسها ولسه ما يعرف بوفاة عمتـه 

حجى وياها بصوت ضعيف بعده 

أرغـد:- شلونها شيخة البنات 

ظلت ساڪته بحضنه باسها براسها 

أرغـد:- زعلانة مني بابا؟ 

هزت راسها لا وهي تجاوبه همس

زمزم:- ما زعلانـة منك خـايفة انت زعلان مني 

ارغـد:- اني ما ازعل من بنيتي زينة البنات وشيختهن 

رفعت وجهها باسته براسه ورجعت ختلت بحضنه أبتسم يمسح على راسـها

آدم ما اعرف وين طالع كثرانـه طلعاته حتى مايكول لـ أي مكان طالع يطلع بدون ما اعـرف 

ارغـد لسه ما حجيت وياه على انفراد ولا جمعنا مكان وحدنا لان عمتي وعمي يمه طول الوقت وهو هماتين احسه مهزوم مني عينـه أبداً ما أجت بعيني ومن يحتاج شي ينادي لـ آدم يساعده ڪاني غير موجودة 

اثيـلة وزمزم راحـوا وآدم بالليل رجع نومت قمر اللي اصرت الا تنام بحضن بيبيتها بس اكعد كبالها تريد من غفت اجيت اخذها لمكانها 

أم أرغد:- عوفيه عمه تنام بحضني 

عفتها صار فوك الشهرين اللي خلصتهم بالمستشفى هي تنام بحضنها تعودت عليها وهماتين عمتي ڪلش تحبها 

طلعت للصالة عمي نايم بالكاع على فراشه وارغد متمدد على السرير ابو النفر شفته فاتح عيونه من حس بيه بسرعة غمضهن يمثل النـوم 

ما ضغطت عليه عفته ورحت على آدم فتحت الباب نايم على سريره اباوع على وجهه ضعفان كعدت بطرف السـرير عيوني عليه رفعت ايدي ابعد شعره عن ڪصته

انتبهت على شاشة تلفونه ومضت ويا صوت اشعار، اخذته فتحته دخلت على صاحب الرسالة كاتبله 

تمام باجر الظهر نلتقي

صعدت بالمحادثة وانصدم بيه مشتري سلاح والتسليم باجر بحديثة اباوع على صورة المسدس وايدي ترجف ابني والسلاح! 

 ••----------- ❀❀❀ --------------••

 اثيـــــــــــلة 

قرب موعدة جلستي ما اريد افوتها نفس القبلها وما عندي احد اخذه وياي نفس مشغولة اضطريت اروح على ترتيل اخذها خطية دتقرأ واني طلعتها واخذت نص يومها

بقيت درة يم زمزم ماڪتلها للدكتور كتلها عندي احتياجات من السوك اجيبهن واجي 

دخلت على الدڪتور وسولفتله الاعراض اللي خفت واللي زادت والعلاج شنو يسوي بيه وهم استغليت الفرصـة وحجيتله على زمزم 

كال عندي خبر ابوها على تواصل وياي 

ردت يحجيلي اي شنو شبيها ما حجى وهم استحيت اسأله خاف مايصير الا اجيبها وتدخل بباص 

عيونه على ترتيل الڪاعدة على القنفة بعد مسـافة عنا مكتفة اديها وصافـنة اعرفها دتراجع الحافظته براسها بالها أبداً مو ويانا

رحنا جبنا العلاج ورجعت عليه فهمني شلون اخذه اريد اطلع والتفتت عليه كال اريد احجي ويا البنية خمس دقائق على انفراد

ظليت محتارة شنو على انفراد وهي همات استغربت طلبه 

ثائر:- اذا ما تصير زحمة ضروري احجي وياها 

دحكت على ترتيل هزتلي راسها ما اعرف

كتله تمام راح انتظر بالباب طلعت بقيت الباب مفتوح واڪفة ادحك عليهم

كعدت على الڪرسي اللي مقابيله ما اسمـع شنو يحجي وياها وظهرها عليَّ صاير ما تبين تعابير وجهها بس وجهه اشوفـه

نهضت من مكانها التفتت وهي تجي ناحيتي والانزعاج واضح عليها كضبتها من ايدها واحنا نطلع من العيادة

اثيـلة:- ها عمـه شنو حجى وياج! 

جـاوبة بعصبية 

ترتيل:- شي مو مهم عمـه 

يلا عمـه خلي نرجع بسرعة اريد اكمل مراجعة

اثيـلة:- تمام حبيبتي 

اجرنا تكسي عيني عليها تآڪل بشفتها بعصبية والدموع مغرڪة عيونها 

اثيلة:- عمه شغلتي بالي احجيلي شنو حجى وياج؟ 

صدت عليَّ وهي تبتسم 

ترتيل:- ياا عمه على شنو ينشغل بالج حجى وياي يشجعني وكلام تحفيز ومن هذا البـاب لان الامتحانات قربت

اثيـلة:- وشعرفة انتي بالسادس

ترتيل:- يعرف مرة التقينا بيه بالمڪتبة واني اشتري الملازم وبابا كال له 

بقت مبتسمة بوجهي كتلها 

ـ عجل شنو سبب هاي الدموع! 

ترتيل:- دموع شنو عمه عيوني تعبانة من القراية واليوتيوب والسهر 

خلصت الطريق مبتسمه ادحك على الشارع النوب حجتلي على طموحها جان صيدلة ومن فترة تفڪر بالتخدير تكول أشـوف نفسي بيه أڪثر من الصيدلة، وعلى ڪلامها صدڪت كلامه وياها تحفيز وتشجيع

نـايمه والتلفون يدك عند راسي ڪوة فتحت عيني مديت ايدي اخذته آصف ديتصل 

تربعت على السرير خير يارب شصاير ويتصل بهذا الوقت من الليل

جاوبته كال اريد ادخل اشوف زمزم

ـ بهذا الوقت! 

عاقل انت بالنهار وكلنا عادي 

بس تدخل بالليل واڪفة ترى 

ـ عجل والحل اريد اشوف بنتي بالنهار هي رافضة على الاقل وهي نايمة گلبي يريد ينفجر عليها

اريد بنتي مشتاقلها روحي تريد تطلع عليها

ـ لا ما اڪدر آصف 

تعال الصبح وشوفها قبل لا تكعد

ـ اثيلة نبقى هيج مربطين وزمزم ما نعرف شبيها 

ـ عجل شبيدي! 

والله ما عايفتها ابداً واحاول وياها بكل ساعـة

ـ ارجعج لذمتي بـاجر هـا شتڪولين اذا موافقة تا اجيب الشيخ الصبح والمحكمة بعد كم يوم

ظليت ساڪتة اعصر براسي كتله لا ابوية ما يقبل

ـ نعقد ونخلي كدام الامر الواقع 

شنو نضيع بنتنا والله حضرت جنابـه لابوج رافض 

ظليت اعصر بجبيني وتفڪيري بزمزم رجوعي لابوها يصب بصالحها

ـ ما اعرف لازم افڪر واستشير أخواني خوما اتصرف من راسي 

ـ لا تخليني ابلش بتفكيرج وبخوانج ترى مايهمني الزواج والرجعة ڪد ما تهمني زمزم الداخلة بـ الاكتئاب على تشخيص ابو مهند

                 الفصل التاسع من هنا