رواية سجين الحب الفصل التاسع9بقلم زهراء الحريري
أرغــــــــد
اليالي شما طونك... وبرمنك
ابد لتضن اعوفك...وبرمنك
هاگ الخيط مني... وبرمنك
وخيط كلوبنا بصدرك سوية
نفــــــس
تختلف عن الناس بيك انتَ ميزه فضلتك عـلى هـواي وادم عـزيزه
ســــــــــراج
اطلبج بـيت وحجـايه
وجهـال اثنيـن ويـايـه
••------------- ♡♡♡♡ ---------------••
مسحت اخر رسالة رجعت تلفونه لمڪانه باوعت عليه مشيت اصابعي على لحيته
نفس:- اللهم إني أستودعك ولدي فاحفظه بحفظك وأعذه من الشيطان الرجيم ومن وساوسه وكيده ونزغه
دنكت راسي بسته بجبينه، يا هيل ريتي، طلعت من الغرفة راس ارغد ملتفت على الباب بس مغمض عيـونه ومتاكدة منه غمضهن من فتحت الباب
الصبح اتصلت على لؤي وحجيتله شنو لكيت بتلفون آدم
كال عندنا علم ماراح يكدر يطلع من بغداد سراج موصي عليه وحتى ذاك الكلب طمئني على حسب اللي وصلنا آصف جاي يجهز لسفره خارج العراق
تشڪرت منه وصيته يوصل شڪري لسراج هماتين، شفت آدم مجهز نفسه يريد يطلع
اخذت مسدس ارغد وطلعت للطرمة من باب المطبخ نصدم بيَّ من شافني ڪبال الباب منتظرته
آدم:- يمه!
ليش واڪفة هينا؟
حارة عليج
رفعت السلاح اله كتله
نفس:- اخـذه اقتل بيه امك واطلع نفذ اللي براسك لو اسهل عليك واني اقتل بيه نفسـي وانت اتفرغ لهاشم
حجى بعصبية
آدم :- شنـــو هالحجي يمه
ولا ذكرين اسمه على لسانج
تقربت عليـه حطيته بيـده
ـ لعـد لا تخلي غضبك يعمي عيـونك لان محد يخسر غيرك
راح تخسـر دنيتك واني من ضمنها وحتى ابوك واختك تخسرهم وتخسر مستقبلك وتخلص عمرك بغياهب السـجن تعض الاصابع ندم وحسرة
شنو نسيت كلام ربك وانت اللي كبرت عليه! وَلَا تُلْقُوا بِأَيْدِيكُمْ إِلَى التَّهْلُكَةِ
بقى ساڪت يباوع على المسدس
نفس:- ونجي للخسارة الاكبر والاعظم تخسر اخرتك من تقتل روح
بغض النظر عن الاثم والمعصية اللي مرتكبها صاحب هذه الروح انت ما مڪلف بعقابـه
آدم يتساهل كل هاي الخسائر؟
يباوع على المسدس وايده ترجف كتله
نفس:- اخر كلام الي وياك ما راح احجي وامنعك لكن الله شاهد عليَّ لحظة اللي تقتل بيها ذاك اني اقتل روحي واخسر اخرتي بسبب غضبك
خليك اسير الشيطان وضيع تعبي اني وابوك عليك
اخذت السلاح منه رجعته للجنطة الجلد عفته واڪف واني دخلت جوة
أرغد ڪاعد على السرير عيونه على باب المطبخ منتظر طلعتي واني واڪفة كباله لان دخلت من باب الصالة ما يشوفني
نفس:- نڪسرت رگبتك ابو آدم
باوع عليَّ وبسرعة دنك راسه وابوه يسأله محتاج شي يجيبولك جاوبـه لا
رجعت للغرفة ضميت الجنطة بمكانها ماشافها بيدي لان جانت ورا ظهري طلعت للصالة
دخل آدم والعصبية واضحة عليه كعد على القنفة مدنك راسه طابك جفوف اديه ساندهن على رجليه اللي يهزهن بعصبية رجعت عيوني على أرغد هماتين مدنك راسه
شنو هالغيمة السودة اللي استقرت فوك بيتي عائلتي راح تضيع مني يارب لطفك احميهم الي
العصـر ابوه وامه راحوا اشكد حاولت وياهم يبقون ماقبلوا كالوا تكسرنا هالشهرين ونص واحنا متعودين هناك
طلعلت ورا قمر للحديقة الا تطلع تلعب برة طلع آدم بدون ما يباوع عليَّ يبلغني وين رايح خايف من تهديدي الـه
ـ اريد اروح على مهند ما اتأخر ساعة ونص وارجع
ـ اڪيد لمهند لو إدور ثارات
ـ يمه شتعرفيني أجذب عليج مثلاً!
ـ من يوم طلعتك ما اعرفك مثلاً
حط اديه ورا ظهره اباوع على جف ايده مكورة بعصبية ولازم المعصم بيده الثانيه
نفس:- تمام اخذ اختك وياك لان تعبتني اريد ارتاح فد ساعة
باوع عليَّ يحجي بعصبية
ـ يمه شنو ماتصدكين بيه
ـ لا يوم مصدڪة بيك ليش ما اصدكك، يلا حبيبي لا تتاخر على مهند عيب منه
يلا ماما قمورتي روحي ويا اخوج
استغفر وهو يمد ايده لقمر اخذها وطلع زفرت النفس بضيق نشوف وين توصل وياڪم طاقتي
دخلت جوا ارغد ما موجود على السرير سمعت صوت طبكت باب الكنتور دخلت وراء واخيراً دخل للغرفة كتله
نفس:- اليوم الذيب منور الغرفة
بلع ريكه يدور وجهه عني
أرغد:- ها يـابه
نفس:- يابه!
لعد وآغاتي بقت داخلة غيبوبة شنو؟
أرغد:- آغاتي وآغات ناسي بعـد
اخذ ملابسه وطـلع طلعت ورا دخل للحمام بقيت ڪاعدة بالصالة عيني على باب الحمام منتظرته
من طلع أبتسمت واني اكوله نعيماً
ـ أشڪرج
اني راح اطلع محتاجة شي
ـ وين طالع بعدك تعبان
ـ ڪعدتي بالبيت هي اللي أتعبني
ـ قصدك كعدتك وياي وحدك
ـ لا يـابة بس اختنكت من البيت
ـ تمام الله ييسرلك ما محتاجة شي
بقيت ڪاعدة وحدي البيت فرغ عليَّ حسيت بتعب الروح تمددت على سرير أرغد من الوحـدة بسرعة غفيت
جريتها نومه وحدة مثل الفاقدة صحيت على بوسات قمر وآدم يحجي وياها وهو يغطيني بالجرجف
ـ قمورة عوفي ماما تعبانـة خليها نايمة
حسيت بيه نزلها من السرير ويسأل ابوه
ـ يابة شنو تريد اسويلك عشاء
ـ اللي تڪدر عليه
ابتعدت اصوات قمر وآدم، فتحت عيني ارغد ڪاعد مقابيلي عيونه بالكاع نظراته هيج تڪسرني
بسرعة غمضت عيني من رفع عينه عليَّ ثواني وحسيت بيه قريب مني فتحت عيني قليل على اثر بوسته على راسي
أرغد:- الله لا يحـرمني منج
الله يلعنك اصف ڪسرت عيني كبالها
راح وراهم للمطبخ وهو ما منتبه عليَّ صاحيـه بقيت متمددة اسمع بس صوت قمر هما سـاڪتين، بعد ما كملوا عشاء آدم سأل ابوه
ـ شنو امي اكعدها تتعشاء لو خليها تكمل نومتها؟
كال له
ـ لا بابا عوفها ترتاح تعبناها
رد عليه
ـ عجل راح انوم قمر يمي
بقيت مغمضة عيني احس بحركة ارغد بالصالة فتحت عيوني قليل ديفرش بالڪاع
رفعت راسي التفت عليَّ عيونه تباوع على الفراغ مو عليَّ
ـ اسف كعدتج
ـ لا عادي
لا تنام بالكاع نام بـمكانك
حرك راسـه اي، انتظرته يڪول يلا ندخل غرفتنا، بقى سـاڪت منتظرني اعوف له السرير
نزلت من السرير كتله تصبح على خير واني امشي للغرفة
كال تعشي مازال ڪعدتي
ما جاوبته دخلت الغرفة وعفت الباب مفتوح، عندي امـل يجي وراي مر الوقت واني انتظر باوعت على تلفوني صار فوك الساعة من دخلت تنهدت بألم على حالـه اڪثر من حالي
استمر هذا الوضع المتعب بلشت استهلك طاقتي وصبري وياهم الوحيدة تباوع بوجهي قمر
حتى الكلام وياي بس على ڪد سؤالهم والسلام اذا جانوا بره البيت، لا يجمعنا حديث ولا كعدة غير ميز الطعام وبس وقت وجبـة الغدا
••------------- ❀❀❀ -------------••
أثيـــــــــلة
اعصابي تلفانـه من الادويـة وهو ديضغط عليه بالكلام، رفعت ايدي كمشت شعري من ورا بقوة تا ألم راسي يخف الغرفة أدور بيه العلاج الجديد سطرني
اثيلة:- آصف لا تضغط عليه
انتظر افڪر بالبداية وارجعلك خبـر هسه لا تنتظر مني أجـابة اڪيدة
اسمعه ينفخ بالهوا وهو يستغفر كال
آصف:- تمام
اڪلج أثـو زمزم جانت متابعـة هاي السلاحف الملونة، اشتريتلها مجموعة راح احطهن بالباب تعالي دخليهن
اثيـلة:- سلاحف!
حجيتها بصدمة وقرف
آصف:- اي جبتلها وحدة صحراوية جبيرة وستـه صغار ملونات الها ولكوثر وصوفي
وجبت وياهن اليوفي واڪل خاص هي تعرفلهن، يلا حطيتهن تعالي دخليهن
لبست صاية لان لابسه قصير لفيت الشال وطلعت فتحت الباب مستند على السيارة يدخن ومبين عليه التعب والنعاس
نزلت عيني كبال رجليه صندوق خشب مفتوح من فوك وبداخله سلحفاة وسط والباقي صغار
وعلاكة ڪبيرة بصف الصندوق
رفعت راسي على صـوته
آصف:- يلا دخليهن ترى مايعضنج
دنكت اخذت العلاكة وشلت الصندوق واني مبعدته عن جسمي دخلت وهو سد الباب
دخلت الصندوق للصالة عفته بالزاوية وفتحت العلاكة بيها كيس احجار ملون وكيس رمل واليوفي وعلبه بيها اقراص صغار بلون الاسود
عفته ودخلت نمت والله عليك سوالف النوب سلاحف باجر زمزم حتى اني يحوز اطلعني وياهن من البيت
صحيت من اثر العلاج اسمي ناسيته اسمع عياط على ضحك فتحت عيوني بعدني ما مستوعبة جفلت هاي ڪوثر تصرخ بـ ماما تعالي، ماما الحكيني
نزلت اركض طلعت من الغرفة على صوتها تصرخ وصوت مصطفى يضحك تصادمت ويا زمزم طالعة من الغرفة تفرك بعيونها وهي تسأل شڪو
دحڪنا عليهم ڪوثر تركض خايفة ومصطفى يركض وراها وهو شايل السلحفاة الكبيرة اجت ورا ظهري النوب صرت اصرخ وياها واصيح بيه يبعدها عني ناسية منو جابها
ـ ولك بعدها عني
هاي منين جبتها
اجت عليه زمزم كمشته من ظهره اخذتها من ايده وهي تحجي عليه
زمزم:- ولك غبي راح تموتها ليش هيج وياها
حضنتها لصدرها ورقبتها بلطف وتحجي وياها
ـ اووي شكد حلوة
صوفي منين جبتها خليها الي لا ترجعها
كوثر مطلعه راسها من وراي دحك بخوف لا يلكحونها عليها واني صافنه عليه اذڪرت هاي سلاحف ابو الحجول
كضبت من كتفها واخذتها لمكان الصندوق من شافتهن شهگة كعدت كبالهن دحك عليهن صدت عليَّ بعيونها فرحة
زمزم:- انتي جبتيهن!
نقهرت على نفسي وصرت انـانية بفرحتها ردتها تحس اعرف بيها شنو تحب كتلها
ـ اي اني جبتهن الج
توسعت عيونها بفرح اجت حضنتني وهي تكول ڪُلش احبهن واموت عليهن
باستني بخدي ورجعت كعدت كبالهن ادحك عليهن مدت ايدها ترفع بالصغار وهي تمسح على صدفتهن بصابعها الوان الطبع والرسوم تجننن
زمزم:- كلجن راح اسميجن
مصطفى ڪاعد مقابيلها وكوثر ورا مدنكه وهي سانده اديها على اكتاف اخوها دحك وياهم بس بعدهي خايفة وزمزم مقابيلهم اسمع صوت ضحكتها ما ابالغ اذا اكول هاي اول مرة تضحك بهذا البيت من يوم طلاقي اني وابوها
هاي الجدران شهدت على عصبيتها وصياحها ونتـرها باختها ومن شهرين ونص بـس صوت بواجيها ونحيبها واليوم تشهد صوت ضحكتها عيوني عليها وبسـري حسدت آصف لان هو سبب هاي الضحڪة مو اني
اني ليش مافڪرت هيج مثله وفرحتها بشي تحبه؟ ليش مالي دور وياها
بقيت واڪفة ادحك على منظرهم، زمزم ترتب بالصندوق وكوثر بأصبعها تأشرلها بتوجيه لترتيب الاحجار بالاطراف ومصطفى مطلع لسانه يعيب على السلحفاة الجبيرة ويحجي وياها عبالك تفهمه
زمزم:- مصطفى لا اطلعهن منا ترى مو لعبة هن خوش
رحت غسلت وسويتلهم ريـوك رجعت عليهم دتشرحلهم شنو فايدة أنارة اليوفي وهي مشغلته على صدفة السلحفاة
ـ يلا ماما عوفوهن تعالوا تريڪوا
راحوا يغسلون عيوني على زمزم وياهم وكل شوية تصد على الصندوق تتأڪد منهن
بعد الريوك رجعوا عليهن دا اشرب بعلاجي ودزلي مسج ها شافتهن؟
كتبتله اي وحيل فرحت بيهن وهاي اول نوبة تتريك بدون اعتراض وها ترى سألت منو جابهن وما اجذب عليك كتلها اني
دز لـي
ـ صوريها فيديو الي اريد اشوف فرحتها وعادي اني وياج واحد المهم فرحانـة بيهن
اخذت التلفون وطلعت وكفت كبالهم اصور فيديو مبتسمه على اصوات ضحكهم دزيته اله شافـة وبعد كم دقيقة دز
ـ جمارة گلب ابوها مشتاق لضحكتها وصوتها
عفت التلفون واني ضايجة عيوني عليها ليش ما عرفت هيج افرحج ليش اني فاشلة وياج ابوها بحرڪة وحدة كدر ينتشلها من حزنها واني صار اشڪد احاول وعجزت احتويها
ما يحتـاج بعد وقت للتفڪير اخذت قراري النهـائي اتصلت على باسـل وفهمته شنو أريـد
كال بالليل اروح اجيب ابوي وباجر نكعد وياه ونقنعه
رجع سألني ام مصطفى اثيلة حبيبة اخوج متأڪدة من قرارج؟
جاوبته اي متأڪدة ڪافي بعد اريد جهالي يستقرون بيني وبيـنه
رد عجل الله يسهل عليڪم ويجعله افضل قرار لصالحكم وصالح جهالكم
••------------ ♡♡♡♡ -------------••
تـــــــــــرتيل
دخلت لغرفتـي نزعت الشال بنتر كلامه لسه يدك براسي على اساس نسلك نسل الانبياء
طلعت تلفوني دخلت على الانستا وطلبات المراسلة يومية يدزلي ولا مرة وافقت بعدني على وعدي لـ ماما سويتله حظر
كعدت على السرير اتنفس بقوة احجي وحدي واني ابجي لو يبقى أبنك اخر واحد بالكون مستحيل ارتبط بيه الحمد لله والشكر ما طالعة من فطر الكاع عندي عمام وخوال من اخير الناس
نهضت بعصبية طلعت السجل اللي جان يكتبلي بيه اخـذته ورحت وراء البيت والجداحة بيدي حركته واكعدت انتظر النار تهفت
رجعت لغرفتي اريد اقرا بلكي انسى كلامه ماڪدرت اركز حتى المواضيع الحافظتها وفاهمتها احسها تبخرت من راسي خنكتني العبرة اقوي بنفسي احجي وياها ما اخلي ڪلامه يأثر عليه اخلي سلم الي
فتحت تلفوني اريد اشوف شرح الاستاذ بلكي ارجـع استوعب اللي نسيته وتتنشط ذاڪرتي
اجاني اشعار من حساب اخوه كاتب وردة گرنفل ليش حظرتيني؟
دخلت على الاعدادات وسويت طلب لحذف الحساب نهائي
ثـاني يوم دا اقرا بغرفتي واسمع صوت عمـه اثيلة وجدو اصواتهم عاليه واضح على خلاف
طلعت بسرعة يمان من شاف كفشتي وقلم بذاني وقلم بيدي والبجامه تك منها صار لوسط ساقي كال سلام قولاً من رب رحيم جني شنو ارتجيت بيدي على كتفه
ـ شبيهم شكو شصاير جوا؟
ـ ما ادري
ـ دفتح الباب وادخل خلي نشوف شبيهم يصيحون
ما قبل يخاف من بابا، تقدمت على الباب حطيت اذاني وهو هم اجى وجهه كبالي حط اذانه نسمع كلام عمـة اثيلة تحجي بعصبية وصوتها بيه رجفـة خفت لا ترجع توڪع
ـ محد شايف شنو دا يصير ببنتي
ـ واني اكول رجـعه لآصف ماڪو الا على موتي ذاك الوقت ارجعي لـه
ـ واني ما اريد ارجعله حباً بيه حسوا بيه بنتي جاي تضيع مني، صار اشكد من رجعت لي عجزت واني احاول احتويها واطلعها من حزنها
عجززت حتى افهم شبيها شهرين ونص وهي يوم بعد يـوم تذبل اڪثر من القبـله، الضحكة نستها وبموقف بسيط من ابوها رجعت على وجهها وهم لليل ورجعت لوضعها انتڪست
احس بنتي راح تضيع مني اني وحدي ماڪدر رجعت ابوها ويانا ضرورية ليش مدتفهمني
عمـة اثيله تحاول تقنعه هي وبابا بڪل الطرق وهو لسـه رافض
صاحت اي ليش شنووو عذرك؟
من كالها السبب نجنت عليهم تصيح اني افكر ببنتي ووضعها النفسي وانت تفكر بكرامة جدي المكبور من الله يجعل قبره حفره من حفر جهنم
فتحنا الباب جدي واكف يريد يضربها وبابا صاير بينهم وماما وجدتي يحاولن يهدنها
اباوع عليها تشنجت وكوة تجر النفس جدي كعد وهو يستغفر وعينه عليها يباوعلها بقلق
بابا كدر يهديها من هدأت اخذ راسها لحضنه تبجي وهي تشرحلهم حال زمزم وخوفها عليها
حطت ايدها على صدر بابا رفعت وجهها تحجي وياه
ـ اني السبب بوضعها اني ضيعتها من ايدي بيوم حرمتهم من أبوهم بنتي راح تضيع مني مرة ثانية، الكل كادر يحتويها الا اني ماريد اخسرها مرة ثانيـة ليش ما تفهموني باسل احجيلك ڪلمة وياه
أيام وبابا وعمو والكل تدخل يقنع جدو برجعتها لعمي آصف وبعده رافض ومعارض بشدة وبيوم اخذته عمه اثيلة من ايده حتى يشوف حال زمزم
رجع مقهور عليها ولخاطرها قبل ترجع عمتي لآصف وڪاله رجعت بنتي الك لخاطر ام لسان مايهون عليَّ شوفتها بهذا الحال كسرتني
الشيخ عقدلهم ببيتنا وهاي المناسبة مستحيل تفوت عمتي سمر اللي ماتصدك يصير شي حتى تجيب جڪليت
اباوع على عمي اصف حيل متغيـر ومبين عليه هالات الحزن على عمتـه
••------------- ♡♡♡ ---------------••
نفـــــــــــــــس
طـفح الڪيل وياهم احساسهم بالذنب اللي مامسؤولين عنه ديأذيني
كم مرة واجهت أرغد حاولت احجي وياه يجاوبني بكلمة ماعندي عين اصد بيها عليج عكب اللي سوا ناسي وياج
ڪل هذا الشعور بالذنب والمسؤولية وهما لسه مايعرفون شفته بـ المستشفى وتخربطت، عبالهم بس اعرف بيه طلع وبمساعدة آصف وآدم كم مرة يحاول يطلع لحديثة ويرجعونه لؤي وسراج، جرب كل الطرق وماڪدر يغلبهم
وجـودي بينهم مثل السراب وطاقتي بالتحمل والصبر استنزفتها أرغد رجع لدوامه وادم بعد ما آصف باع حصته على أبو مهند يلا رجع للمجمع كالهم اذا يبقى اعذروني ايدي ما احطها بيده وهو من واصله حجي آدم راح باع حصته
كملت الريوك رتبته الهم على الميز رحت على آدم لغرفته ديجهز نفسه يريد يطلع اليوم يستلمون قسم من الاجهزة ويجهزون المجمع بباقي الاحتياجات صار كم يوم من خلص البناء
ـ تعال تريك
هز راسه بـ اي
رحت على أرغد بالغرفة يجهز بنفسه للدوام وهاي الغرفة مايدخلها بس وقت تغير الملابس وهماتين من اني طالعة منها
ـ الريوك ڪامل يلا تعال
ـ ها آغاتي
دقائق واجي اتريكوا لا تنتظروني
ڪعدت انتظرهم اجى ادم دنك باس راسي وكعد وبعده أرغد هماتين دنك باس راسي وكعد بمكانه ديتريكون بهدوء بدون ڪلام
آدم:- يوم اريد الفلوس الضامها عندج
ظليت ساڪتة اشرب جاي من الاستكان وعيوني عليه
سألني ها يوم؟
بقيت على السڪوت رفع راسه باوع عليَّ وارغد هم وياه خزرتهم واني اجاوبه
ـ صار امي هسه اجيبهن الك
طلعت من المطبخ بعدني قريبة واسمع ادم يكول لابوه
ـ ليش هيج تخزر والله خوفتني
وابوه يجاوبه
ـ خفت من خزرة وحدة عجل اني من امس شابع خزرات المفروض هسه ميت
هزيت راسي ودخلت للغرفة طلعت الجنطة اللي أمنها عندي اخذتها اله باس جف ايدي وهو ياخذها
ـ يلا اني طالع اريد دعواتج يالغالية
كالها وهو يتقرب على أبوه باس راسه وطلع
استندت بيدي على الكرسي اباوع على أرغد بعده يشرب جاي
نفس:- وانت يمتى تطلع
رفع حواجبه ابتسم عاف الاستكان ونهض كال الحمد لله
رجع الكرسي ويحجي وياي
ـ آغانتي انتي هالطالع
تقرب حضن جانب وجهي بجفه باسني بخدي قبل لا يبتعد لزمته من ايده موقفته باوع بعيوني وبسرعه بعد عينه
رفعت ايدي لحيته حركت ابهامي عليها بلطف كتله
نفس:- ذيبي مثل ما تعودت تبعد عيونك عني اتعود على غيابي
عقد حواجبه كال شنوو قصدج!
ـ من تـرجع من الدوام احجيلك قصدي
حاوطني بين اديه حاضني بقوة باسني براسي
ـ الا غيابج مستحيل اتحمله
ڪافي عليَّ احس بوجودج قريبه وعطرج اتنفسه ويا الهوا
نفس:- وهذا كافي بالنسبة الك مو الي
المهم هسه انت تأخرت من ترجع نحجي
ـ تمام نحجي ليش مانحجي
ديطلع واني ورا كتله عادي اطلع اني وقمر
ـ وين!
ـ للسوك
أبتسم كال عادي مرخوصة لاي مكان
سديت الباب وراء ورجعت على الغرفة طلعت جنطة ملابس قمر من الڪنتور من البارحة جهزتها كم قطعة
كعدتها تتريك بين ما شطبت البيت والمطبخ على السريع
كتبت على Sticky Notes لا ينشغل بالكم عليَّ اني بمكان يقدر وجودي وقيمتي
لصقتها على باب الثلاجة طلبت تكسي على التلفون جهزت قمر على السريع من وصل التكسي قفلت البيت وطلعت …
••------------- ♡♡♡ ---------------••
آدم
كملنا ترتيب الاجهزة كضبت كتفي واني اطكه صديت على عمي سراج واكف يدخن ويسولف ويا لؤي على يوم الافتتاح تقدمت عليهم
آدم:- يمتى ترفعون اسمي من السيطرات
سراج:- من يرجع عقلك لرأسك
هزيت راسي نشوف اني لو انتم منو صاحب الصبر الطويل، كتله
ـ لاتنسى معزوم على العشاء باجر
لان بيوم العزيمة من عزمته تعذر كال الحجية تعبانة ما أكدر اعوفها وغير مرة اجيكم والحمد الله على سلامة الوالد مرة ثانيـه
كال:- باجر عندي شغل ضروري خليها غير يوم
صديت على لؤي مبتسم يدحك علينا
آدم:- براحتك نخليها عڪبة مو مشكلة
أبتسم وهو يحرك راسه بـ اي مشيت من يمهم واسمع لؤي يڪله جهزلك عذر
من صديت عليهم وشافوني كمل
ـ للحجية لان ماخذتها للزيارة
ـ تعبانة ماتتحمل الطريق بهذا الحر وهي الله يهديها تاخذلها نص يوم بالمقبرة
عفتهم ورجعت على الولد اساعدهم من كملت رجعت للبيت تلاكيت ويا ابوي بالباب، دخلنا جوة البيت مقفول والڪهرباء مفصولة
ـ عجل امي وين!
ـ كالت تطلع للسوك بس كل هذا الوقت!
حجى وهو يتصل عليها صد عليَّ
ـ تلفونها مغلق
اجى يوكع بسرعة سندته كعدته على القنفة يهمس ويا نفسه خطفها هاشم
غمضت عيوني بعصبية
ـ اذڪر الله بويه
رحت اجيب له مي والبراد لان طافي حار رحت اطلع ثلج من الفريز وقريت الملاحظه العايفتها
ـ الله يسامحج يمه على هاي الهبطة
رجعت عليه انطيته الملاحظة غمض عيونه يجر بالنفس، اخذ المي من ايدي شربه مره وحده
ـ وين راحت؟
كتله وين تروح اكيد يم عمتي سمر منو الها هينا غيرنا
نزل راسه بين اديه دنكت عليه
ـ بوية بيك شي
اخذك للمستشفى
ـ لا يابة خلي نروح نجيبها
رفعت جسمي كعدت على السرير المقابيله
آدم:- بس ارتاح شوية ونروح عليها
هز راسـه اي وهو يرجع ظهره على القنفة مغمض عيونه بتعب واني گلبي ينبض بقوة على اثر الهبطة
أرغد:- تعبتها وياي
والله خجلان منها ومالي عين اصد عليها ماڪدرت احميها قبل ولا كدرت احفظ حقها هسـه
آدم:- مو بس انت حتى اني تعبتها
واللي صار قبل وهسـه مو ذنبك
ظلينا اني وابوي وحدنا كاعدين كل واحد بينا يلوم نفسه بداخله
باوعت بعيوني على كل مكان بالبيت وحش بدونها مثل القبر
••------------ ♡♡♡ --------------••
نفـــــــــــــس
راح حمادة يفتح الباب دخلوا وياه ارغد وآدم ابداً ما باوعت عليهم بس رديت السلام عيوني على الڪل الا هما
يحجون وياي ارد عليهم طبيعي تغدينا ڪلنا سوة سمورة طايرة بينا وتجيب وتحط كبال آدم
بعد الغدا كعدوا سوالف وضحك عندي عادي مشاركتهم بس بعدني ما اباوع عليهم بعد ماطلعوا الولد للاسواق، كال ارغد
أرغد:- يلا أم آدم خلي نروح بعد
حجيت وياه واني اباوع على عسل وقمر
نفس:- روحوا الله وياڪم
آدم:- شنو روحوا الله وياكم! عجل وانت يمه
جاوبته ونفس الشي عيوني ماصارت عليه
نفس:- اني باقيـة هنا
أرغد:- تمام بالليل يجي آدم ياخذج
نفس:- لا يتعب نفسه مكاني هنا بغرفة عسل رجعة بينكم بعد ما الي
آدم:- شنو هالحجي يمه
اجى كعد على يساري وابوه على يميني ولسه عيوني ما اجت عليهم اباوع على سمر تضحك عليهم ضامه شفايفها
باسوا راسي اثنينهم ويتعذرون هزيت راسي لا
نفس:- كلمتي نهائية رجعه وياكم ما ارجع
أرغد:- حقج علينا نعترف غلطانين وياج بس مو القصد عليج لا القصد علينا احنا والله خجلان منج وعيني تستحي تصد عليج
نفس:- اي تمام
آدم:- واني هم اعتذر وعذري نفس عذر ابوي
نفس:- هم اي تمام
كالوا يعني ترجعين ويانا هزيت راسي لا
أرغد:- نفس ام آدم
ماباوعت عليه كتله ها ابو آدم
أرغد:- ما تعلمت عليج هيج عنودية
نفس:- هذا مو عناد هذا تعب منك ومن أبنك
كالوا حقج علينا والي تردينه يصير بس ارجعي ويانا
نفس:- اريد ارتاح بعيدة عنكم وهذا حقي ما طالبه اكثر منه
كمش ايدي ارغد كال تعالي نحجي وحدنا
سمر:- اخذها خوية لغرفة عسل واذا تريد نفرغلكم البيت ونصعد احنا لبيت ڪرم وعيشوا بيه شهر عسل تامر وتدلل كم أبو آدم عندنا بس ڪول
ول حمادة روح جيبلي جكليت
تحجي بشقى ضحكت واني اخزر بيها حتى تسكت آدم نهزم من لسانها وحمادة وراء
دخلني لغرفة عسل سد الباب واجى عليَّ عيوني على كل شيء إلا هو
أرغد:- دحكِ بعيني
نفس:- صار ايام ما تباوع بعيوني واني بس هالكم ساعة شنو حسيت؟
حضن وجهي بين اديه جبينه على جبيني باوعت بعيونه
أرغد:- حسيت بالموت بدونهن
نفس:- لعد لا تلومني من اعوفكم واخذ موقف ايام واني اتمنى النظرة من عيونكم عشت مثل السراب بينكم حزت نفسي عليَّ
أرغد:- حقج علينا شنو احجي واڪول ما يبررلج اعرف بس والرب المعبود خجلان منج نفس احس نفسي ما استاهلج
نفس:-: اني ما الومك على طلعة هاشـ …
بسرعة سد حلكي بجف ايده قبل لا اڪمل الاسم
نزلت جف ايده قربت راسي ضغطت جبيني على فڪة واني احجي وياه
ـ لا تحرمني من عيونك ولا تصـد عني ما اتحمل منك هيج جفاء انت قوتي وسندي
حركت اصابعي على لحيـته رفعت نفسي بسته برقبته
نفس:- بـعدك ضعت انت الامان لاتحرمني منـك ولا تلوم نفسك على شي مالك سبب بيه
نزل راسه على ڪتفي بتعب حسيت بثقله، حضني بقوة
أرغـد:- انتي عوض الله الجبير لاتحرميني من وجودج ما اتحمل مكان بدونج
رفع راسه يباوع على وجهي وعيوني بلهفة واشتياق
ـ عادي نجرب ساعة عسل قابل مو الا شهر
أبتسمت كتله بس ابقى هيج مثل ما انت ولا تلوم نفسك على شي صار مو بيدك راح نعيش العمر كله بعسل مو بس ساعة وشهر
طلعنا حتى نروح سمر شايلة جنطتي وتحجي ويا آدم
ـ سودة عليَّ عمه صار ساعة تتوسل وما فعلت ترد وياك وتصد بوجهك الحلو وابوك بالغرفة بدقيقتين قنعها
••------------- ♡♡♡ ---------------••
اثيــــــــــــلة
جنت واثقة من خطوة رجعتي لاصف راح تغير حال زمزم للافضل هيج مفڪرة ومتيقنة
لسه هي ماتعرف مسويتها الهم مفاجئة كال العصر أجي عندي شغل اكمله بالبداية، وهذا الشغل عرفته بعدين جلسات تخصه عند أبو مهند
العصر منتظرته يجي وعيني على زمزم ڪاعدة مقابيل الصندق مخيم عليها جوء من الكآبة والحزن دحك على السلاحف بدون اهتمام مو مثل أول يوم طارت بيهن
بس ماعافتهن تخلص اليوم يمهن وعنايتها الهن ما قلت بالعكس حيل مهتمه بيهن
مصطفى ديلعب حط جوا رجله قبق مال معطر ويجرخ بيه بالكاع غمضت عيني وصكيت اسناني من الصوت جلدي كله كزبر
زمزم:- مصطفى ڪافي ومررررض
فتحت عيني دفعته وهي تاخذ القبق اجت تضربه ونهزم منها للطرمه
دحكت عليَّ بخوف ورجعت كعدت بمكانها، ما اخذت على هذا الموقف شي عبالي نفسي تكره هذا الصوت طبيعي، بقت عيونها عليَّ ابتسمت بوجهها وهي لسه عيونها عليَّ محاوطتني
دخلت عسل بيدها قمـر وصحن بيه صاج بوستني وهي دحك على زمزم
ـ هذا صاج لڪوڪه من امس وصتني عليه
وينها؟
ـ بالحمام دتسبح انتظريها تطلع
ـ خاف تتأخر اريد اروح آدم عازمنا على العشا برة
رفعت عينها زمزم ادحـك على عسل
سألتها
زمزم:- آدم عندكم؟
ـ اي عندنا وراح يطلعنا للمنتزهة
تجين ويانا؟
هزت راسها لا وعيونها لسه على عسل ڪاضبة گلبي بين اديه هاي كل مرة تجينا عسل اخاف زمزم تنتڪس بس هادئة ما مهتمه وهاي اول مرة تصد عليها وتحجي وياها
زمزم:- منو غيرج انتي وقمر؟
عيوني على عسل ضحكت بشيطنة تريد ترجعلها كلامها ذيج النوبة من تكولها يطلعني اني وقمر وانتي لا
عسل:- بس اني وقمرررر
حطت جف ايدها جوا حنكها وهي تسند عكسها بحافة الصندوق ماردت بس ادحك عليها
ابتسمت عسل وكالتلها لا جذب ڪلنا راح نروح حتى بيت عمو ڪرم ودرة هم ويانا
زمزم:- هاي طيارة يلا تشيلكم مو سيارة
عسل:- نطلع بسيارتين
فتحت اديها لقمر اللي راحتلها تركض حضنتها بقوة
باستها وهي تحجي وياها
زمزم:- اووف قمقمي مشتاقتلج
تنامين الليلة هنا يمي
كالتلها اي وهي تبوس خد زمزم
طلعت كوثر نطتها الصحن وهن يتهامسن بيناتهن ويضحكن اشوف كوثر حطت شي بيد عسل بالبوڪة اخذت قمر وراحت تركض
شوية وكبت العيطة بين زمزم وكوثر اللي طلعت ماخذه وحدة من السلاحف اسمها نمنم وهاديتها لعسل
ڪوثر:- ما انطيتها من سلاحفج انطيتها سلحفاتي
زمزم:- يمتى صارت سلحفاتج اني اللي معتنيا بيها
اثيلة:- ڪافي اني اجيبلج باجر اثنين بمكانها
زمزم:- لا اريد نمنم هسه تروح وترجعها الي
ڪوثر:- والله ما ارجعها هدية الها
ظلت ترجد بروحها وتصيح نمنم مريضة بس اني اعرفلها
اجت على ڪوثر تريد تاكلها باسنانها حميتها منها
ـ روحي جيبيها
ـ ما اروح مالتي ونطيتها الها
ـ يا الله بعدهي تكول مالتي
دخلت للغرفة لبست حجابها ورجعت على الصندوق حسبتهن تأكدت ماكو نقص بس وحدة وراحت
كفخت كوثر على راسها لبست صاية وحجاب وطلعت وراها صار بوجهي ادم طالع من بيت درة شايل جهال لؤي
سلم عليَّ وطلب مني نروح وياهم كتلها غير مرة اليوم مانلحك
مشيت لبيت يونس وهو وراي من دخلنا نسمعها تصيح وين نمنم
آدم:- هاي زمزم!
جاوبته واني امشي لباب الصالة اي هي
آدم:- شبيها ومنو نمنم؟
اثيلة:- سلحفاة ڪوثر انطتها لعسل بدون علمها
آدم:- سلحفاة!!
دخلت للصالة زمزم ترجد بروحها جهال ڪرم ماخذينها ومهزومين وعسل ادور عليهم
نفس تهجد بيها تكولها هسه نلكاهم وترجعلج
زمزم:- راح يموتونها وهي مريضة
صارلها يومين
وصدك طلعوها شياطين ڪرم ميته نجنت اني بجهه ونفس بجهه نهجد بيها وعسل واڪفة بصفحة تبجي وتبرر اخذوها مني بالبوكة
زمزم:- خبيث والله متعمدات انتي وذيج كووثر
آدم:- اڪيد ما متقصدات
ومريضة بسبب هذا الطبع على ظهرها مايخليها تتعرض للتشميس
مسحت دموعها تتنفس بقوة ما صدت عليه ولا جاوبته اخذتها وطلعت آدم يدحك وراها تعذرت من نفس وطلعت عفت سمر تكفخ بعسل
دخلت للبيت لكيتها تدفن بيها بالحديقة وهي تبجي ومصطفى يبوس بخدها
زمزم::- ماتت مثل بيبي
حضنتها من ظهرها واني احلفلها باجر اجيبلها اثنين
دخلتها للصالة لكيت آصف موجود من شافته مسحت عيونها بأثنين اديها
زمزم:- شسووي هنا اطلع من بيتنا
بعد ايده عن اكتوف كوثر نهض وهو يدحك عليها
آصف:- ليش؟ جمارتي شنو اللي غيرج عليَّ
زمزم:- اطلع برة
ماما طلعي بسرعة
اجى حاوط كتفي كالها ما اطلع بعد رجعتلكم انتم وامڪم
ظلت صافنه علينا بصدمة ابتسمت كُلت راح اطير من الفرحة صدمتني من اجت علينا بقوة دفعته وهي تخليني ورا ظهرها
وتصيح جذاب مايحبج يريد يعذبج لخاطر ترضى سمر
نصكينا اني وابوها من ڪلامها تأشر عليه وتحجيلي عنه وعن سمر
ادحك عليها شفايفها ترجف ونگلب لونهم ازرق رفعت راسي اله خازرني عباله اني مسولفتلها
آصف:- شنوووو حاجيتلها بعد
زمزم:- موووو هي
اطلع منا ما نريدك
صدت عليَّ وتحلفلي متفق ويا سمر ويردون يأذوني وتحلف بعده يحبها ويغار عليها من يونس حتى موقف قديم الهم بالمطبخ بايام خطوبتي بطلعة محمد من السجن هم سولفته الي وتحلفلي راح ياذيني تهسترت اريد اكمشها وهي ترجد بروحها وتحلفلي تا اصدك
صارت عيوني على ڪوثر تتلفت بنظراتها بيني وبين ابوها بصدمة
ومصطفى مافاهم شي بس يدحك علينا
اني انڪر وهو اللي هـامه يريد يعرف منو سولفلها ويسأل بيها منين جبتي هالحجي
كمشها من اكتافها نجنت وهي ادفعه وتصيح اطلع منا مانريدك اطلع
كمشت ايدي تسبح بيه تريد اطلعني
زمزم:- ما يحبج والله سمر دزته ينتقم منج
آصف:- ڪاااااافي شنو هالحجي منو سمم راسج بيه
زمزم:- هذا الصدددك انت ماتحبها
وحتى ماما نفس
تريد تحجي وكعت بالكاع كاعدة كعدة وهي تلهث بالنفس فتحت الحجاب عنها واني اكُلها
ـ جذب ماما ماكو هيج حجي
تجاوبني بتعب راح يمرضج مثل بيلسان يكرهج يحب بس سمر
••------------- ♡♡♡ --------------••
آدم
نصـدمت شصاير بيها هاي زمزم لو شبح زمزم!
مرت كبالي اخذت النبض من گلبي وراحت بدون ما تصد عليَّ
مسحت صدري بجف ايدي ليش اختنكت وتضايقت مو خلص ڪلت بعد انسى مشاعري الها ولا راح يجي يوم ويجمعني بيها
ڪاعد بالمنتزة بين اهلنا واذا افتهمت شي من الڪعدة شنو اڪلت وشنو الطعم ماحسيت ولا انتبهت
نفس:- شبيك يوم؟
صديت على امي كتلها
ـ شصاير بيها ليش هيج متغيرة؟
هم حجيتي وياها؟
نفس:- منو
آدم:- زمزم
ـ ما اعرف حبيبي من رجعتها من حديثة وزمزم مو زمزم وحجيت وياها مرتين ماڪدرت اعرف شبيها رافضة تحجي
مسحت على رگبة رجلي وهي تربت عليها
نفس:- اشوف امها اذا قبلت اخليها ادزها يمي يومين
هزيت راسي أي
صديت على عسل بعدهي زعلانه من امها كتلها
ـ فستقة اللي صار بينج وبين زمزم جنتي متقصدته؟
ردت وهي تبجي لا والله
أبتسمتلها كتلها لا تبجين واذا بنفسج اني اشتريلج منهن
هزت راسها لا كالت ماريد بعد اخاف صرت منهن
بالليل طلبت سلحفاة نادرة لونها اصفر ماليزيا برمائية طلبتها الها هي وحوضها والتوصيل بـ 110 ثبتت الحجز واني صافن على نفسي شجـاي اسوي
عكست اديه على الميز ونزلت راسي بين جفوفي صوتها المبحوح وهي تبجي ما يطلع من رأسي اريد اطلعها من تفڪيري عجزت اتصلت على مهند وطلعت وياهم مهزوم من التفڪير بيها
ثاني يوم واكف كبال المجمع اني وعمي لؤي منتظرين وصول باقي الاجهزة الخاصة بقسم الاسنان
دك التلفون بجيبي ابو التوصيل كتله انتظر بالباب هسه يطلعولك اتصلت على امي بلغتها نزلت التلفون قبل لا التفت نحطت ايدي على كتفي عبالي عمي لؤي التفتت عليه مبتسم
ضاعت ابتسامتي والغضب والحقد ترسوا روحي وفاضوا
هاشـم:- آدم