رواية اسيرة عشقه القاسي الفصل الخامس عشر15بقلم جنات واسراء ابراهيم

سيف بصدمة :

انتي تعرفي مراد الحديدي ؟ انتي رايحة دلوقتي فرحه ؟ 

زينب باستغراب :

ايوة ....هو انت تعرفه ولا ايه ؟ ولا يكون هو ده صاحبك الانتيم ؟

سييف بصدمة وهو بيبتسم :

ايوة ده صاحبي من ايام الجامعة .....انتي بقي تعرفيه منين 

زينب بضحك وهي كمان مش متخيلة:

يابني منا لسة حاكيالك من دقيقتين بس انت كنت مصدوم باين فمخدتش بالك .....بقولك بنت عمه تبقي صاحبتي في الجامعة برضه وانتيمتي يعني مش اي حد وبصراحة بقي صاحبك ده شكله ذئب بشري وانا مش مرتحاله 

سيف برفعة حاجب وهو بيضحك:

نعم .....ذئب بشري وهيتجوز صاحبتك قدام الدنيا كلها .....اومال اللي مقضيها وبيلعب بالبنات ويعشمهم ويخلع بتسموه ايه عندكم ؟

زينب وهي بتكتم ضكتها :

 لاااااا  ده انت شكلك واخد مقلب في صاحبك اوي ومتعرفش عنه اي حاجة ....اومال انتيمه ازاي مش فاهمة انا ؟

سيف باحراج وهو بيحط ايديه علي شعره:

لا ماهو احنا كان بقالنا فترة كبيرة مش بنتكلم .....بس عادي يعني اهو الطريق طويل وتحكيلي انتي اللي معرفهوش 

زينب بحماس وهي بتسقف :

  إذا كان كدة اشطا بس تجيبلي شيبسي وبيبسي بقي لزوم الحكاية تحلو واعرف احكيلك بنفس 

سيف بابتسامة علي براءة زينب :

والله انتتي فعلا طفلة ......حاضر يا ستي وكمان شيكولاتة مني هدية بس تحكي بضمير عشان انا بحب اسمعك اوي 

أبتسمت زينب اوي وبصت بعيد بخجل وتوتر وهي مش عارفة ليه اقل كلام من سيف بيعمل فيها كدة 

.....................................

كانت قاعدة رفيف في الاوضة اللي طلب منها مراد انها تستني فيها الكوافيرة ومتخصصة الشعر فكانت رفيف خايفة اوي ومتوترة لانها في الفيلا اللي المفروض انها هتتجوز فيها وكمان بيت هند عمتها ومراد يعني كلهم عيلتها  بس كانت خايفة لانها متعرفهمش اوي ومش فاكراهم اوي لانها كانت صغيرة اما سابتهم وحتي  مفكرتش تتعرف عليهم من وقت اللي ابوها عمله زمان فكانت متوترة اوي وخايفة وكل شوية تبص في ساعتها بقلق 

رفيف بصوت مسموع وكلها توتر وقلق :

فينك يا زينب انتي وندي بس.....كل ده تأخير ...يعني هو ده اللي هنبقي جمبك من بدري انا بقالي هنا ساعتين وانتو معبرتونيش 

اتنفضت لماا سمعت صوت شريفة الهادي من وراها  :

ساعتين بس وبتقولي اتأخرو ....ده انتي مكملتيش حتي الساعتين يا رفيف ولا تكوني خايفة مننا 

رفيف بابتسامة متوترة:

انتي طنط شريفة صح ؟

شريفة بابتسامة وسعادة :

ايوة يا روحي ....الحمد لله افتكرتيني اهو ....انا قولت انتي نسيتيني لانك كنتي صغيرة اما مشيتي 

جريت رفيف علي شريفة وحضنتها وهي مبتسمة ومطمنة بوجودها :

انا فاكراكي اوي يا طنط لانك كنتي حنينة عليا اوي وفعلا الحنية مش   بتتنسي ولا القسوة وانا كنت بخاف بصراحة اجي هنا تاني عشان يعني انتي فاهمة  

قالت كدة رفيف وكشرت بحزن اما افتكرت ابوها واللي حصل 

شريفة بابتسامة حنينة :

حبيبتي اللي حصل انتي ملكيش دعوة بيه وانتي هنا وسط اهلك وناسك اوعي ابدا تنسي ده وبعدين اضحكي وافرحي انهاردة يومك وفرحك علي مراد 

رفيف بابتسامة وسعادة :

اانا لما شوفتك يا طنط اطمنت اوي والله ......انا كنتت خايفة يعني من مقابلتكم ليا و

مكمملتش رفيف كلامها لما سمعت صوت فريدة اللي دخلت من باب الأوضة 

فريدة بسخرية:

اهلا اهلا ببنتت الراجل اللي سرقنا ونهب فلوسنا .....صحيح يعيش البجح علي قفا المكسوف 

رفيف بصت لشريفة بحزن فاتكلمت شريفة بحدة :

فريدة .....ياريت توفري كلامك لنفسك وملكيش دعوة برفيف لانها مالهاش ذنب في اي حاجة انتي فاهمة ؟

فريدة بسخرية وهي بتبتسم :

هي لحقت ضحكت عليكي وخليتك في صفها يا شريفة ...طول عمرك غلبانة وبيضحك عليكي بكلمتين بس انا بقي شغل التماحيك دي متخيلش عليا لاني عارفة الاشكال دي كويس اوي 

رفيف بهدوء وتردد:

يا طنط فريدة انا معملتش حاجة عشان تحاسبيني ....انا هنا عشان بحب مراد وهو بيحبني فياريت متخليش كرهي لبابا يخليكي تاخديني بذنبه 

وعد بغضب وحقد من وراهم:

ومين قالك ان مراد بقي بيحبك ؟ اسمها انتي ضحكتي عليه ولفيتي عليه عشان يتجوزك وتاخدي باقي اللي ابوكي مسرقهوش 

رفي عنيها دمعت وكانت هتتكلم بس شريفة زعقت في وعد وقالتلها بحدة :

انتي اصلا ايه اللي جابك هنا ؟ وبعدين مراد بيحبها عشان كدة اتجوزها واوعي تفتكري عشان انتي بنتي فانا هسمحلك تهيني رفيف وهي معملتلكيش حاجة انتي سامعة ...يلا اتفضلي علي اوضتك 

وعد بصت لرفيف بكره ومشيت ووراها فريدة اللي بصتلها برضه بس بتوعد 

شريفة باحراج وزعل:

حقك عليا يا بنتي ....انا للاسف معرفتش اربيها ...معرفش هي طالعة كدة لمين والله مش عارفة ....

رفيف وهي بتمسح دموعها وبطبطب علي ايد شريفة:

لا يا طنط متقوليش كدة ...هما حقهم ياخدو عني الفكرة دي بس ان شاء الله لما يعرفوني كويس هيفهمو اني مليش ذنب واني مش وحشة والله 

شريفة بحب وهي بتبتسم:

انتي طيبة يا بنتي وانا فرحانة انك من نصيب مراد ...ربنا يسعدكم ...

خبطت في نفس الوقت زينب اللي كانت محرجة اوي من رفيف 

زينب بلهفة واستعجال :

قبل ما تشتميني والله مليش ذنب بس عربية سيف ابن عمي عملتها معانا وعطلت في الطريق 

رفيف بابتسامة وفرحة وهي بتحضن زينب:

ماشي سماح المرادي بس عشان فرحي .....دي زينب صاحبتي يا طنط شريفة ..... ويعتبر اختي مش صاحبتي وطنط تبقي عمة مراد يا زينب واطيب قلب في الدنيا 

زينب وهي بتسلم علي شريفة :

طب والله باين عليها انها طيبة وقمر .....الف مبروك يا طنط 

شريفة بحب وحنية:

وانتي طيبة يا حبيبتي عقبالك ....يلا هسيبكم بقي تجهزو وانا اشوف عملو ايه تحت 

خرجت شريفة وزينب ورفيف صرخو وحضنو بعض بفرحة 

رفيف بسرعة:

صح يا زينب رنيلي عالكلبة ندي دي لما تجيلي 

زينب بضحك :

اسكتي اخوكي عامل عليها حجر ومصمم يجيبها وهي بتعند معاه وقالتله طب مش رايحة وهو بقي مصمم لحد ما وافقت اخيرا وجاين  في الطريق .....

رفيف بابتسامة :

والله البت دي هبلة وبتحبه واخويا انا مش عارفة ايه اللي في راسه بس هقول ايه ربنا يهديه 

.....................................

كانت نازلة همس عالسلم بعد ما رن عليها مازن قالها انه مستنيها تحت فكانت نازلة وهي فرحانة اوي عالاقل عشان هتقضي وقت معاه حتي لو هي عارفة انه مش بيحبها بس فجأة وقفها وليد بصوته فوقفت مكانها بصدمة وقلبها اتقبض

وليد باعجاب وهو بيبصلها من فوق لتحت :

علي فين يا بنت عمي وانتي زي القمر كدة ؟

همس بضيق وهي بتحاول تبقي قوية:

وانت مالك يا وليد ؟ تكونش ولي امري وانا معرفش ؟

وليد برفعة حاجب :

لاا بس انا ابن عمك ومن حقي اعرف انتي رايحة فين وجاية منين ولاا هي سايبة 

همس بغضب وحدة :

ابكلاام ده لما ابقي اخصك ولا تبقي خطيبي ولا جوزي لكن انا جدو هو اللي انا مسئولة منه وهو الوحيد اللي يقولي رايحة فين وجاية منين وطالما عارف انا مكاني يبقي خلاص انت ملكش دعوة واقولك انا هريحك ....انا خارجة مع خطيبي ووسع بقي كدة عشان اتأخرت عليه وممكن يقلق عليا 

وليد بغضب وانفعال وهو بيبص لهمس بتملك:

ماشي يا همس ....بس احب اعرفك ان ده مش هيطول كتير .....اصل انا مش هسيبه ياخدك مني فمش عاووك تفرحي اوي كدة عشان قريب اوي هتزعلي عليه وهترجعيلي يا ...يا بنت عمي 

همس قلبها اتقبض وعنيها دمعت لما فهمت قصد وليد وبصتله بغضب وسابته ونزلت وهي كدة فقابلها مازن اللي انبهر بشكلها اول ما شافها وكأنه بيشوفها لاول مرة  بس اتخض لما شاف دموع في عنيها فقرب منها بلهفة 

مازن بلهفة وقلق :

همس انتي كويسة ؟ كنتي بتعيطي ليه ايه اللي حصل ؟ جدو كويس 

همس بحزن وهي بتننشف دموعها :

جدو كويس .....يلا بينا نمشي 

مازن وهو بيوقفها بصوته :

استني هنا ...احنا مش هنتحرك الا اما اعرف كان فيكي ايه ومعيطة من مين ؟ ....اوعي يكون الحيوان ده ضايقك ؟

همس بصتله ودموعها نزلت فاتاكد مازن ان هو وليد فقبض علي ايديه بغضب 

 مازن بعصبية مكتومة :

يبقي هو الحيوان ده ...انا هوريه 

قال كدة وكان هيدخل البيت بس وقفته همس بسرعة وخوف وهي بتمسك ايديه وبتترجاه 

همس بخوف :

لا يا مازن لو سمحت .....خلينا نمشي ارجوك وانا صدقني هحكيلك بس خلينا نمشي من هنا عشان خاطري 

اضايق اوي مازن لما شاف دموعها وقالها بلهفة:

خلاص كب متعيطيش واركبي يلااا بس هتحكيلي اللي حصل كله يا همس انتي فاهمة ؟

همس بحزن وهي بتمسح دموعها:

حاضر والله هحكيلك بس نمشي 

..................................

كانتت قاعدة رفيف وزينبب مع بعض لحد ما خبط ودخل مراد اللي اتحرج لما شاف زينب 

مراد باحراج :

انا اسف مكنتش اعرف ان معاكي صاحبتك يا رفيف 

زينب بابتسامة :

لا عادي انا كنت خارجة اصلا اجيبب ماية من تحت اتفضل يا مراد ومبروك 

مراد بابتسامة :

الله يبارك فيكي يا زينب عقبالك 

زينب ابتسمت وخرجت وهي بتغمز لرفيف اللي ابتسمت بخجل لانها مع مراد لوحدها 

مراد بابتسامة :

انا جيت اطمن عليكي ....حقيقي اسف اني سبتك الوقت ده بس انتي عارفة الدنيا كلها فوق راسي 

رفيف بابتسامة خطفت بيها قلبه:

ولا يهمك انا عارفة كويس اوي اللي وراك وعذراك ...متشلش همي انا معايا زينب وندي جاية كمان شوية 

مراد توتر وهو بيهرب من عنيها :

طيب محتاجة اي حاجة اخليهم يجيبوهالك ؟ ... انا طلبتلك اكل عشان يومنا طويل اوي وعاوزك متتعبيش 

رفيف بابتسامة متوترة:

شكرا انك بتفكر فيا يا مراد ...حقيقي انا فرحانة اوي اني هبقي مراتك.... ربنا يخليك ليا 

مراد قلبه دق وبلع ريقه بتوتر وهو بيهرب من احساسه بالذنب وقالها بابتسامة :

طيب هروح انا بقي اشوف باقي المسئوليات 

رفيف بتردد وهي مش عارفة تجيبها ازاي :

مراد كنت عاوزة اطلب منك طلب يعني واتمني انك مترفضش 

مراد بابتسامة وثقة:

وهرفض ليه ...انتي تؤمري يا رفيف ...قولي عاوزة ايه علطول من غير تردد

رفيف بحزن وهي مترددة:

ينفع نعيش في مكان تااني غير هنا ؟ في اي مكان حتي لو شقة صغيرة بس نبقي اانا وانت بس 

مراد باستغراب وتكشيرة :

مش فاهم ليه بتقولي كدة يا رفيف؟  اكيد حد هنا زعلك مش كدة ؟

رفيف بسرعة :

لالا محدش زعلني خالص بالعكس .....انا بس اللي حابة يكون لينا بيتنا لوحدينا 

مراد بشك :

ولو اني مش مصدق بس هرد عليكي يا رفيف ....انتي عارفة ان ده بيتي وانا كبير العيلة دي واكيد مينفعش اسيبهم واسكن في مكان تاني ولازم برضه تفهمي انك هتكوني ست البيت ده والهانم الصغيرة هنا بعد امي انتي فاهمة ؟

رفيف بحزن وتنهيدة :

فاهمة يا مراد

مراد وهو بيرفع وشها بايديه عشان تبصله :

مش عاوزك تزعلي من اي حد هنا واكيد لما يعرفوكي هيحبوكي اوي انا متأكد ولو اي حد ضايقك تقوليلي فورا وانا هتصرف ....تمام 

رفيف بابتسامة رقيقة:

تمام 

خبطت لورين ودخلت وهي مبتسمة :

مش اعتقد كفايا كدة يا عريس ولا ايه ....ممكن بقي تسيبنا نتعرف علي مراتك الحلوة دي 

مراد بابتسامة واسعة :

تعالي يا بكاشة انتي  ..... دي يا رفيف تبقي لورين بنت عمي ومامتها تبقي فريدة هتشوفيها بليل 

بلعت رفيف ريقها بتوتر وخوف اما سمعت اسم فريدة وعرفت ان لورين بنتها 

رفيف بابتسامة متوترة :

اهلا يا لورين 

لورين بحماس وهي بتسلم عليها :

لا اهلا ايه احنا هنبقي صحاب اصلا ....ده عمتو شريفة قالتلي فيكي البدع وخلتني متحمسة اوي اني اشوفك عشان كدة جيت جري 

ابتسمت رفيف بحب وسلمت علي لورين بحرارة واكتشفت انها  غير امها خالص وكأنها بنت شريفة بسبب طيبتها 

رفيف بحب :

احنا خلاص اصلا بقينا صحاب ....فاضل بس اعرفك علي زينب وندي ونبقي كلنا شلة رسمي 

لورين بحماس وفرحة طفولية:

وانا موافقة جدا ....انتي متعرفيش انا فرحانة ازاي انا اصلا معنديش صحاب خالص 

رفيف ابتسمت بحب وسابهم مراد وخرج بعد ما بص لرفيف وطمننها بعنيه وهي اتنهدت براحة عالاقل لان في هنا ناس طيبين مش كلهم نوعية فريدة ووعد 

.......................................

كانت قاعدة ندي في العربية وهي مكشرة وباصة من الشباك 

ادهم بتردد :

احم هتفضلي مكشرة كدة وشك هيشقق علي فكرة وهيبقي شكلك وحش؟ 

ندي بغضب وهي بتلفله:

انت اصلا ملكش دعوة بيا عشان بسببك اتأخرت علي صاحبة عمري في اهم يوم في حياتها 

ادهم برود وبرفعة حاجب :

علي فكرة بقي انتي السبب مش انا ...عشان لو كنتي من الاول لما قولتلك يلا هنروح سوا ومشيتي معايا كان زمانا هناك من بدري بس انتي بقي لازم تنشفي راسك وتعملي المفتش كرومبو ....وبعدين استني هنا ...اصلا صاحبتك دي اختي يعني عادي ايه يعني نتأخر عليها اصلا لسة بدري عالفرح 

ندي بغيظ وانفعال:

اوووف ...انت انسان بارد صحيح...يا سيدي واحدة ومش طايقاك ومش عاوزة تركب معاك هي عافية ؟ يا عم وفر توصيلتك دي لحد تاني مش ليا 

ادهم فهم قصدها واتنهد ورد بهدوء:

ندي انا مفيش حد في حياتي واللي سمعتيه فهمتيه غلط 

ندي بغضب واندفاع :

اصلا انا مش فارق معايا تعرف حد ولا لا... بس انا مبسمعش غلط وعارفة كويس اوي انا سمعت ايه 

ادهم بجدية وثقة:

انتي عارفة كويس ان انا لو اعرف حد مش هنكر وهقول عادي بس فعلا انا معرفش حد واللي سمعتيني بكلمها تبقي اخت  صاحبي الصغيرة وهي متعلقة بيا اوي وعشان كدة بكلمها دايما

ندي بتوتر وهي بتحاول تتهرب :

انا ميشغلنيش اصلا .....انت حر تعمل اللي تعمله ....المهم انك تبعد عني بقي وكفايا لحد كدة اظن الشاب ده خلاص تعب وزهق ومبقاش يتعرضلي يبقي خلاص 

ادهم بهدوء وقصد :

وحاجة كمان يا ندي ....انا عمري ما شوفتك بنت مش كويسة .....انتي اللي اخدتي الفكرة دي معرفش ليه ..

ندي لحد هنا ومقدرتش تستحمل وانفجرت فيه بغضب :

ده علي اساس اني هتبلي عليك مثلا ؟ انا قولت كدة بناء علي تصرفك معايا اول مرة شوفتني فيها ولا تكون ناسي لما قولت عليا اني بتلزق فيك وجيتلك شقتك وانا عارفة ان صاحبتي مش هنا ....اوعي تفتكر اني هغير نظرتي فيك لاني فعلا من وقتها وانا محتقراك بس انا عذراك لانك مش بتشوف بنات محترمة كتير ...كلهم من النوعية اللي انت افتكرتني منهم 

ادهم بندم حقيقي :

ولو قولتلك اني ندمت اني قولتلك كدة وعاوز نفتح صفحة جديدة سوا ايه رأيك ؟

ندي بكبرياء وهي بتبص بعيد:

وانا اسفة يا ادهم لاني عمري ما هنسيي الكلام اللي قولتهولي وجرحتني بيه .....خلينا كدة احسن وياريت تفاتح بابا في موضوع فسخ الخطوبة دي عشان بوخت اوي 

ادهم اتنهد بضيق ووقف بالعربية قدام فيلا مراد فنزلت ندي بسرعة ودخلت وهي من جواها مضايقة اوي انها قالت كدة بس كان لازم تنتقم لكرامتها 

......................................

وقف مازن بالعربية قدام فيلته وكان باين عليه الغضب والضيق وكانت شايفاه همس ومضايقة اوي من نفسها انها حكتله 

همس بندم:

دكتور مازن انا اسفة بجد اوي 

مازن بصلها باستغراب :

علي ايه يا همس ؟انتي اللي بتعتذري علي ايه ؟

همس باندفاع وتلقائية وهي بتبصله:

عشان حكلتلك ...المفروض مكنتش حكتلك بس انا خوفت عليك اوي احسن يأذيك عشان كدة قولتلك عشان تاخد بالك من نفسك 

مازن بابتسامة ومن جواه فرحان بخوفها عليه  :

متخافيش عليا يا همس ....ومتقلقيش انا هعرف اتصرف معاه كويس اوي واخليه يبعد عنك 

همس بخوف ولهفة:

بالله عليك اوعي تقرب منه ....وليد ده شخصية عندية وهيعند زيادة ومش هيسكت انا عارفة ...عشان كدة عاوزاك تبعد عنه وانا هتصرف  

مازن بضيق وانفعال :

يعني ايه تتصرفي ؟ انتي مش معاكي راجل يعني ولا ايه ؟ انا قولتلك ملكيش دعوة بيه نهائي وانا هتصرف يبقي تسمعي الكلام 

همس بسرعة وهي بتدمع:

حاضر انا مقصدش اللي انت فهمته ...انا بس مش عاوزة انت تتعرض للاذي بسببي وخصوصا انه هددني بيك وانا عارفة انه مؤذي 

مازن بتنهيدة :

طب اهدي خلاص و قولتلك متخافيش ....انا هتصرف يا همس وبعدين انتي مش السبب في اي حاجة وانا لو رجع بيا الزمن هعمل كدة برضه تاني وهقف جمبك 

همس بابتسامة رقيقة :

شكرا يا دكتور .....احم ننزل بقي 

مازن بابتسامة :

يلا ننزل طبعا 

يدوب نزلو من العربية وكانت همس لقت وعد خارجة من باب الفيلا واتصدمت لما شافتهم سوا وهمس اتوترت وبصت لمازن بحزن وهو عنيه متعلقة بوعد فقلبها وجعها 

وعد باستغراب :

مازن انت اتاأخرت كدة ليه ؟ انا بدور عليك من بدري .....هو ايه اللي جاب الممرضة بتاعتك هنا ؟ 

مازن بهدوء وهو بيشاور علي همس :

انا اللي عزمتها علي فرح مراد يا وعد ....انتي كنتي عاوزاني في ايه صحيح ؟

وعد وهي باصة لهمس بتركيز:

اصلي الدريس بتااعي اتأخر اوي وتقريبا في مشكلة هناك فلازم اروح وكلمتك كتير عشان توديني لاني خايفة بس انت مردتش تقريبا كنت مشغول 

مازن بابتسامة :

فعلا كنت عامله سايلنت .... طب استني هبعت الشوفير معاكي ولو في اي حاجة كلميني 

وعد برقة متعمدة قدام همس وهي بتقرب من مازن :

يعني انت هتسيبني اروح لوحدي .....ده انا مكلمتش اي حد ومرضتش اقول لحازم ولا مراد وكلمتك انت .....انا زعلانة منك 

مازن اتوتر وبص لهمس اللي كانت واقفة متجمدة وبتحاول تداري وجعها وبعدين ردت هي وعافته من الاحراج 

همس بهدوء:

اتفضل انت يا دكتور مع الانسة وانا هدخل استناك جوة 

مازن بتردد وقلق:

يعني هتعرفي تقعدي لوحدك جوة وانتي متعرفيش حد يا همس؟  

ردت وعد بضيق وبرود:

وهي صغيرة ولا ايه يا مازن ...ما اكيد يعني هتعرف تتصرف ....يلا بينا بقي 

سابتهم همس ودخلت الفيلا وهي بتحاول تمسح دموعها ومازن متابعها بعنيه وهو مضايق من نفسه انه سايبها لوحدها بس مش عارف يعمل ايه 

.......................................

كانت واقفة همس وعنيها بتلمع بدموع وهي مش عارفة اي حد وشايفة ناس كتير رايحة جاية وهي بتفكرك في ايديها بتوتر وصعبان عليها نفسها ان مازن عارف انها متعرفش اي حد هنا وسابها تدخل لوحدها رغم انها هي اللي قالتله بس عشان حست بحيرته فكانت واقفة في جنب لوحدها لحد ما انتبهت لصوت لورين اللي بتقرب منها 

لورين بابتسامة :

انتي همس مش كدة ؟

همس بتردد واحراج :

ايوة انا همس 

لورين بابتسامة وهي بتسلم عليها :

اهلا ....انا لورين اخت مازن وهو كلمني عشان قلقان عليكي وطلب مني اطلعك فوق معانا انا والبنات يلا تعالي 

همس ابتسمت بتلقائية وفرحت اوي من جواها ان مازن رغم كل ده فكر فيها وبعتلها حد عشان متبقاش لوحدها 

همس بابتسامة :

بجد شكرا اوي ...انا فعلا معرفش اي حد هنا وكنت متوترة اوي 

لورين بابتسامة :

حاسة بيكي اوي لاني زيك كدة بالظبط ....يلا تعالي البنات فوق كلهم قمرات وطيبين زيك كدة 

ابتسمت همس بخجل وطلعت مع لورين اللي قابلت حازم وهو نازل عالسلم وعنيهم اتقابلت بس لورين حاولت متبيينش تأثرها وعدته هي وهمس وهو كان متابعها بعنيه بتأثر 

لورين بابتسامة وهي بتدخل من باب الاوضة:

جبتلكم بقي قمر زيادة وشكلها كدة هتبقي فرد جديد في الشلة 

همس باحراج وهي بتبتسم :

ازيكم ....اسفة لو هبقي معاكم هنا بس انا معرفش اي حد تحت 

ندي بابتسامة واسعة :

يا لهوي دي باين عليها طيبة اوي ....لاا يا روحي متقلقيش كلنا هنا منعرفش حد تحت حتي العروسة الهبلة اللي واقفة دي 

رفيف بصدمة وهي بتضحك:

هبلة ؟ بقي انا يتقالي يا هبلة يوم فرحي .....ماشي يا ندي وربنا لاوريكي بس افضالك .....المهم سيببك منها يا قمر نورتينا

همس وهي بتسلم علي رفيف :

 الف مبروك ...ما شاء الله انتي زي القمر 

رفيف بخجل وهي بتبتسم :

تسلميلي يارب .....انتي بقي تقربي لمراد ؟

همس بتوتر وهي بتبص للورين اللي انقذتها وردت هي :

لااا يا روفي ..دي تبع مازن اخويا ....همس تبقي الممرضة بتاعته في العيادة 

زينب بابتسامة :

اهلا وسهلا يعني بقينا اربع عاطلين وممرضة حلو ده 

ضحكو كلهم بصوت واحد وهمس كمان حبتهم اوي وحست انها تعرفهم من زمان 

زينب بابتسامة :

بصي بقي يا ستي العروية تبقي صاحبتنا الانتيم واسمها رفيف والبت الرغاية دي اصغر واحدة فينا  اسمها ندي والحلوة القمر الشقرا دي زيك كدة فرد جديد في الشلة واسمها لورين وانا بقي محسوبتك زينب رئيسة العصابة قصدي الشلة 

ضحكو كلهم بصوت واحد واتبادلو ارقام بعض وكانت لورين فرحانة اوي انها بقي ليها صحاب بعد ما كانت طول عمرها لوحدها وكمان همس نفس الكلام  

....................................

بليل كانت واقفة رفيف قدام مراد بعد ما صحابها خرجو ومراد اول ما شافها بفستاان الفرح انبهر وكانت ضربات قلبه اعلي من صوت الموسيقي العالية تحت وهي ابتسمت بخجل لما شافت نظراته 

رفيف بخجل :

مراد انت ساكت ليه ؟

مراد اتنحنح باحراج :

بصراحة مبهور ....انتي زي القمر 

رفيف بخجل :

احم شكرا علي فكرة وانت كمان شكلك حلو اوي 

ابتسم مراد بتلقائية وبعدين قرب من رفيف ولمس وشها بايديه وهو متردد يتكلم فاتوترت هي اوي وبعدت بخجل بس كانت فرحانة اوي اوي وكانت لسة هتتكلم بس فجأة ملامحها اتبدلت للصدمة لما سمعت مراد بيقولها .......

                الفصل السادس عشر من هنا