رواية ضره من عالم اخر الفصل السادس عشر16بقلم نوسه حمد
سمعت صوت سند اتكلم افتكرتو بتكلم بالتلفون مع متاب لانها هددتني انها تخرب حياتي من غير م اعمل صوت دخلت براحه وفتحت النور لقيت سند التلفون م جنبو بس سرحان كالعاده والمره دي بتكلم براهو اتزكرت الجنيه وبقيت خايفه عليهو قلت ليهو سند قول بسم الله ما ركز معاي ولسه بالو بعيد نفس الحاله الكانت بتجيهو زمان بس الفرق المره دي ما لابساهو بتحاول انها تاني تلبسو وتدخلو في عالم الجن الما ليهو اول ولا اخر بقيت اضرب فيهو واقول ليهو سند ما تستلم. سند اقرا وهو لسانو تقيل جريت اتوضيت والالم بقطع فيني قطيع وحياتي وحياه الاجنه الفي بطني في خطر بس مافي فايده لو سند رجع لعالم الجن جيت جاريه ومسكت المصحف بقيت اقرا واقرا وسند لمن عرق وحالتو كانت صعبه شديد وجاتني وجعه حاره م قدرت استحمل ولسه سند ما واعي بي شكلها متمكنه فيهو شديد شيلت التلفون اتصلت علي محمد قلت ليهو محمد الحقني انا دايره الد وسند تعبان جيب معاك امك وابتهال قال لي تمام دقيقه واكون معاك قفلت الخط وبقيت اقرا ليهو وارقي ليهو وهو لمن بقول في كلام ما مفهوم وبحاول ابعد مني وانا ماسكاهو بكل قوتي والالم بقطع فيني ولمن بصرخ منو بس سند كانت عندي اهم لحظات اشبه بالموت والبمر بيهو سند اصعب من وجع الولاده منظرو ماقادر يفارقني محمد جا وامو وابتهال مخلوعين قلت ليهو محمد اطلب لينا عربيه وانت اقعد مع سند سند حالتو اصعب مني وبقيت احكي ليهم محمد طلب لينا العربيه وشيلنا شنطتي وما وصلنا سمح انا ولدت الطفل الاول في العربيه واسعفوني ولدت التاني حالتي كانت خطره لاني استحملت الالم ونزفت كتير لمن ادوني دم الدكتوره جات فرحتنا قالت لي جبتي بت وولد وكنت خجلانه ماعندي حتي احاسب المستشفى بس ابتهال ربنا اديها العافيه حاسبت وقبل اكتبو لي الخروج قلت لازم ارجع البيت قالو لي لا انتي تمشي معانا كيف يعني تلدي براك قلت ليهم لا سند محتاجني قالو لي نحنا مابنقدر نقعد معاهو وانتي في الايام الاولي محتاجه زول اقيف جنبك لانو جرحك جديد زايد دمك بسيط الدكتور ما خرجك انتي طلعتي بنفسك قلت ليهم ربنا كريم علي سند محتاج لي شديد قالو لي تمام وصلوني البيت ولقيت سند ما بين عاوز يستجيب ليها وبين رافض اولادي ما وعيت ليهم بقيت فيهو هو وكنت حافظه الرقيه وبقيت قاعده قصادو واقرا وهو يقاوم فيها مرات بحسو عاوز يقرا معاي بس صوتو بتقل الشي المطمني انها لسه ما لبستو انو م ظهرت لي محمد قال لي نوسه انتي والده جديد اولادك محتاجين ليك اكتر من سند وسند ربنا كريم عليهو قلت ليهو اولادي بعيشو يا محمد بس لو فقدو ابوهم بلقو ابو وين حسيتو انحرج شديد وانا م قصدي بس انا وضعي غير وضعو افوت بيهم وين وانا م صدقت انو رجع طبيعي محمد شال بتو وطلع قال لي اوعا تنسي ربنا كريم قلت ليهو ونعم بالله ابتهال قالت لي نوسه م ح تقدري ع الوضع دا براك قلت ليها ح احاول اعمل شنو م بي يدي شي وكنت برجف من الجوعه ما اكلت حاجه من يوم امس قالو لي طيب تمام نحنا يوميا ح نجهز اكل ونجيبو ليك عشان انتي مره مرضع الدمعه نزلت من عيني علي اولادي الماقدرت اعاين ليهم ولا أشوف شكلهم
بقيت اقرا ليهو لمن حسيت جسمي هبط من الجوع شغلت ليهو الرقيه وختيتا جنبو وهو بردد كلمه نوسه ما تخليني براي انا محتاج ليك وانا اللحظه ديك واقفه جنب التلاجه داير اكل لي لقمه غلبتني ابلعها جيت قعدت جنبو قلت ليهو سند والله م ح اخليك انا جنبك وكان ماسك يدي شديد لحظات وفتح عيونو قال لي نوسه انا وين نوسه انا كويس الحمد لله انا ماقدرت اتكلم دموعي عشره عشره قال لي اسنديني عاوز اصلي وكانت حالتو صعبه كانو كان جاري وجسمو كلو صابي مويه مسكتو من يدو وكان ضاغط علي يدي شديد حسيتو فقد الاحساس ولسه مصر يضغط علي يدي قلت ليهو سند انت ماسكني وانا جنبك م تخاف قبل علي وقال لي ربنا م يحرمني منك وبقا يعاين لي قال لي مالك تعبانه كده وعاين لي بطني قال لي نوسه بطنك مالا بقت صغيره اشرت ليهو علي اولادي لمن انخلع ومشا عليهم وحضنهم وبقا يبكي شديد وانا دموعي جاريه وبقا يقول يارب ماتحرمني من الحياه الطبيعيه وكان بدعي والح في الدعوات قال لي نوسه عايني البت تشبهني والولد اشبهك قعدت اضحك قلت ليهو عارف انا فرحه المولود واني اشوفو ما عيشتها همي كلو انت لانو خليتك في حاله صعبه وماعايزه احكي ليك بس بتمني انو الحاله دي تاني م تجيك قال لي نوسه اوعديني ما تخليني قلت ليهو سند وعد ما اخليك وربنا احفظك لي اولادك وتربيهم معاي قال لي باذن الله وحسيتو رجع طبيعي ومشا اتوضا وصلي ودموعو نهاي م وقفت انا كنت تعبانه نومتا من غير م اشعر ولا حسيت بي اولادي ابكو ولا ساكتين ما وعيت الا نص الليل بصوت بكاهم وسند شايلهم الاتنين قومتا مخلوعه قلت ليهو ماصحيتني ليه قال لي كنتي تعبانه وانا م عايز اتعبك زياده بس شكلهم جيعانين رضعيهم قلت ليهو سند انا جيعانه قال لي طيب انا بنزل اجيب ليك اكل كنت خايفه عليهو شديد قلت ليهو مستحيل اخليك براك قال لي نوسه م تخافي انا باذن الله كويس اتوضيت واتحصنتا قلت ليهو تمام ودعتك الله قال لي ساعه وبجيب الاكل واجي محتاجه حاجه قلت ليهو الادويه الكتبهم لي الدكتور قال لي تمام شال الاورشته وطلع بعد ساعه جاب لي الاكل وانا كنت جيعانه شديد اكلت بلهفه وهو بعاين لي قال لي نوسه اعفي لي عذبتك معاي قلت ليهو سند عافيه ليك والله العندك دا ابتلاء وانا لازم اصبر عليهو وان شاءالله يا سند ح تبقا كويس انا متاكده ربنا كريم وانا م ح ابعد منك قال لي الله مايحرمني منك
مرت الايام وسند عمل لي سمايه وعزم اصحابو والاهل وكان فرحان بي اولادو شديد
الحاله بقت تجيهو كتير وانا تعبت وحيلي اتهدا اصارع في الحياه من ناحيه ومن اطفالي من ناحيه ومع سند لوني قلب اسود وبقيت شينه شنه ما طبيعيه وضعفت زي السوط بقيت البشوفني بقول مجنونه ابتهال كم مره اتكلمت معاي قالت لي ح اجيك اكتئاب عايني لي نفسك مافي راجل مضمون قلت ليها اعمل شنو دي قسمتي قالت لي لخير بس م تكوني مخلصه للدرجه دي قلت ليها ابتهال انا فاقده السند اهلي خلاص قنعو مني انا متاكده هسي مافي بالهم ومافي في طريقي غير سند وربنا عالم بي م اخترت الوضع دا وقعت فيهو غصبا عني قالت لي والله مرات بتقطعي قلبي بالذات لمن اعاين ليك لانو روحك بقت طالعه قلت ليها ان شاء الله برجع قالت لي ان شاء الله بس بحزرك للمره الالف قلت ليها خير ان شاءالله انتو ادعو لي قالت لي ليل نهار في سيرتك لو بي يدنا ما يصيبك مكروه
مرت الايام وانا وسند بقينا نقرأ قران ليل نهار لغايه م حسيت وضعو استقرا ونزل شغلو لمن عاينت لي روحي في المرايه قلت سند دا اكيد بجامل فيني الله اعلم اكون متقبل شكلي بس اعمل شنو كنت مضغوطه زايد الحمل والولاده ولازم اهتم بنفسي بس اولادي كانو صعبين شديد الاكل مرات م بقدر اعملو كل يوم حوجتي لي لي امي بتزيد بس اعمل شنو اتصلت علي علا وحكيت ليها الحاصل كلو قالت لي نوسه ياخ كفايه انا ح امشي اكلم امك وابوك واحكي ليهم وح اجيبهم ليك قلت ليها انتي مفتكراني مانفسي الاقيهم بس اعمل شنو ياعلا سند محتاج لي مانفسي ابعد منو وبقو في يدي في اطفال قالت لي نوسه انا فاهمه وضعك بس م عاجبني خصام اهلك ليك قلت ليها علا انا م اتصلت عشان اعاتبهم انا عاوزه اعرف اخبارهم ان شاءالله اكونو كويسين قالت لي ح احاول امشي ليهم وبديك خبر
مرت الايام وقلت لي سند اعفي لي انا م قادره اهتم بنفسي وحاسه نفسي مقصره في حقك قال لي نوسه بس انتي حاولي اظبطي زمنك حسيت انو عاوزني اهتم لانو ماقال لي انا عازرك قلت مدام هو عاوزني اهتم ح احاول جاهده اني اظبط يومي واهتم بنفسي
وبعد قلت خلاص سند بقا كويس بس كل مره بحس الجنيه عاوزه تسيطر عليهو بكميه الغضب الجواي لو كانت انسانه كان قتلتها والشي الخوفني بقيت اسمع أصوات واولادي كل ما الصوت دا يظهر بحسهم ببكو شديد لدرجه اني مابقدر اقرا واتعوذ وبحس انو تفكيري أتشتت ولحظات بتمر علي بنسا القران وبقيت انا زاتي اصارع معاهو والشاشه اليوم كلو مشغلاها قران الوضع دا اتكرر كم مره وبقيت اخاف اخلي اولادي مع سند واليوم كلهم شايلاهم ما بنزلهم بخاف انها تضرهم لي عشت اسوا ايام حياتي وعقلي بقا مشتت بين انسان حبيتو ونفسي اساعدو وبين خوفي علي اولادي ونفسي والزاد الطين بله علا اتصلت علي وقالت لي نوسه ع فكره امك بقت طريحه الفراش وابوك حالتو تحنن جاتو رجفه ومافي زول معاهم واخوانك مافيهم واحد كلف نفسو ينزل عشان يراعيهم وهم في عز حوجتهم ليك انسي الحصل منهم وتعالي راجعه مارديت عليها بي حرف قفلت التلفون وبكيت باعلي صوت عندي حسيت انو ابتلاءات الدنيا كلها جات علي وحسيت نفسي ضعيفه وهزيله والله عالم بي لا قدره لا حيل وبقيت بين امرين امي ولا راجلي …