كنت فاكره اني هعرف أهرب منها المره دي بس معرفتش ، قامت وهى بتقول بسخريه من الي قولته
-يعني انا مش عارفه مثلا صاحبتي بتحب مين
: قالتها صاحبتي حبيبه بعد ما قولت لها اني مبحبش حد او دي كدبه بحاول اقنع بيها نفسي
-يا بنتي روحتي فين
: ولا حاجه يا حبيبه انا هروح عشان اتأخرت
اتأخرتي ايه الساعة لسه ٣
: معلش بس عندي مشوار وكمان عشان الحق اصلي العصر في البيت
-ماشي تمام سلميلي على طنط
: حاضر ،يلا سلام
-سلام
........
وانا في طريقي للبيت عديت على البحر ، بحب ريحته اوي وانا بتمشى افتكرت اول مره شوفت فيها يوسف ..... هو يبقى جاري في البيت الي قصدنا كان نفسي اقولكم انه في البلكونه الي جنبي او الي قدامي بس لاء اصل شقته بلكونتها من الناحيه التانيه المهم هو أكبر مني بعشر سنين عارفه انه فرق كبير بس حبيته كنت لسه صغيره بس هو عمره ما كلمني ولا حتى بصلي بحس اني هوا قدامه ... عقبال ما وصلت البيت كان العصر بيأذن،صليته ودعيت نفس الدعوه الي بدعيها كل مره وهي يوسف ،خلصت صلاتي ولبست ونزلت مع ماما نشتري لبس
.........
-حلو ده يا ليل
: اه يا ماما حلو
-مالك يا ليل ملكيش مزاج النهارده ليه
: لا مفيش بس مش رايقه النهارده شويه
-طب يلا هعزمك على حاجه بما إن للأسف مليش بنت غيرك
: كده يا ماما طب والله هتعزميني على حاجتين
قالت بضحك
-اهو كده اطمن
بصتلها وانا ببتسم ، بحبها اوي عمري ما تخيلت حياتي من غيرها
روحنا وصليت وعملت قيام ليل بحاول انتظم عليه ،سمعت انه بيحقق الي نفسك فيه ... طلعت نمت وانا مستنيه اليوم الي بعده
|| اليوم التاني ||
صحيت اتصلت بحبيبه نتمشى زي ما بنعمل كل مره وبالمره ادور على شغل
الوووووو
: صوتك في ايه
-بكلمك من امبارح مش بتردي
: كنت مع ماما
-اه وبعدين
: بعدين ايه ؟
-عايزه اكل مش هتعزميني
: يخربيتك لسه صاحيه
-اه ماشي صباح النور عايزه اكل
: طب بصي عشان متعصبش اصلي والبس ونشوف ناكل ايه
-ماشي يا بنت طنط مُنى
: يلا سلام احنا ناقصين
......
قومت صليت ولبست جيبه سودا وشميز ابيض وطرحه اوف وايت ولفتها لفة خِمار عشان الخِمار مش هيليق على اللبس الفورمال ده
..........
-يابنتي بقولك جعانه عايزه اكل
: في ايه يا حبيبه بلاعه واتفتحت
-طب انا جعانه ما تيجي ناكل وبعدين نروح الانترفيو بتاعك
: لولا إن قلبي طيب مكنتش خليتك تشوفي سندوتش بطاطس واحد
-حبيبتي يا ليلو
.....
-مش هي دي الشركه
: ايوه بصي انتي هتستني هنا وانا هروح الانترفيو واجيلك على طول
-ماشي متتوتريش وحاولي تهدي شويه ده انتي مهندسه ديكور شاطره وقد الدنيا
بصتلها وانا بحاول اهدي نفسي شويه وطلعت ... دخلت الشركه وانا لسه متوتره واخيرا لقيت نفسي قدام مكتب المدير مش عارفه ازاي بعد ماتوهت كذا مره
| بعد الانترفيو |
-ها عملتي ايه
اتكلمت بفرحه
: شكله كان مبهور بالسي في بتاعي وقالي هنكلمك
-طيب كويس إن شاءالله تتقبلي
......
روحت البيت واتغديت مع ماما وبابا وقولتلهم هنزل اشتري حاجه من المكتبه الي جنب البيت ...وفعلا لبست الإسدال بتاعي وانا بفتح باب الشقه لقيت يوسف بيفتح الباب شقته، حاولت اني اغض بصري عنه وهو كمان ولا كأنه شايفني كنا هنركب الاسانسير بس وقفت وهو فهم اني مش بركب مع شباب فهز راسه اني اركب ونزل ورايا .....
ويشاء القدر انه يكون رايح لنفس المكتبه الي هروحها لاحظت وانا بشتري الكتب بتاعتي انه بيشتري حاجات لأخوه الصغير كريم أصله عايش مع كريم اخوه الي في تانيه اعدادي وأمه وابوه متوفي المهم كنت خلاص شريت حاجتي ومروحه وكان فيه شارعين واحد الي بروح منه كل مره بس طويل والتاني كانت الشمس بتغرب وابتدى يضلم وبابا كان محذرني اني ما اعديش منه حتى لو مختصر بس مشيت وأمري لله .....
لقيت وحد شكله غريب ونظراته مش مريحاني وفجأه لقيته بيقرب عليا وشكله شارب حاجه وابتدى بيقول كلام مش مفهوم
-أأننتي راييحه فين
كنت مرعوبه شكله مش في وعيه وشويه وهعيط
-متقووليي راييححه فينن ياحل..
وقبل مايكمل لقيت يوسف ظهر فجأه .....