رواية ماوراء النصيب الفصل الاول1بقلم دانيا
وانا ماري بجنب مكتب الباصات لمحت بت قاعده في مسطبة احد الدكاكين المغلقة وهي بتبكي قلت للزول البتكلم معاهو في التلفون كدي برجع ليك بعد شويه وقفلت الخط وقفت بعاين ليها بي حيره.
مشيت وقفت قدامها قلت ليها السلام عليكم ، من سمعت صوتي اتخلعت مسحت دموعها سريع سريع بطرحتها وقامت ماشه بدون ما ترد لي او ترفع راسها تعاين لي زاتو ... قلت ليها ياالأخت خير مالك دايرة مساعده ولكدا ؟ ماردت لي بس اكتفت بإنها نمشي من قدامي مشت على إتجاه واحد من دكاكين السفريات ديل ،، انتابني الشعور إني اعرف الحاصل عليها يمكن اقدر اساعدها طوالي مشيت وراها.
دخلت لقيتها قاعده جنب حاجه كبيره في العمر يعني بتكون في سن الخمسه وخمسين كانت بتقول ليها مالك اتأخرتي؟ ردت عليها وقالت ليها محل الدهب لقيتو مقفل لأنو الدنيا جمعه وديل زاتهم ممكن يقفلوا في أي لحظه تعالي نقعد برا لمن الناس يصلوا ويرجعوا الدكاكين بتفتح قالت ليها سمح البت قامت لملمت الشنط والأكياس حقتها دايرة تطلع شافني واقف قدام الباب مااشتغلت بي رجعت عاينت لأمها وقالت ليها تعالي ورح ح اطلع ديل وارجع للباقي.
خشيت وراها بعد طلعت شلت الشنطه طلعتها ليها برا وقفت بقت تعاين لي امها قالت لي يكتر خيرك ياولدي ما قصرت... ختيت الشنطه جنبها وهي قاعدة في المسطبه سلمت عليها وعاينت لبتها قلت ليها انتوا مسافرين الليله ولشنو؟ الأم قالت لي ااي والله يا ولدي جينا نحجز تزاكر لكن ما اتوفقنا إلا بكره.
قلت ليها لخير إن شاء الله خلاص لو راجعين البيت ممكن اوصلكم بدال تقعدو في الجو السموم دا وزاتو الدنيا جمعه ما ح تلقوا مواصلات بالهين ،، سكتت مسافه وبعدين قالت لي لالا ما راجعين هسي منتظرين السوق يفتح قلت ليها تمام لو ناقصه ليكم حاجه او كدا وروني اعتبريني ولد ياامي قالت لي يزيد فضلك يا ولدي.
مشيت منهم وانا مستغرب ليه البت كانت بتبكي وليه باين عليهم متضايقين من حاجه؟!! شفت في بقاله فاتحه قلت امشي اشتري منها مويه قبل تقفل.
اشتريت مويه وكيك وبسكويت ومازا ورجعت ليهن تاني اول ما جيت قريب منهم شايف البت قاعدة تبكي وبتتكلم مع امها.... وقفت بقيت بعاين ليهم قلت شكي في محلو الحريم ديل حاصله ليهن مشكله طوالي اتحركت عليهن الأم رفعت راسها شافتني اتوترت قالت لي ياولدي تاني جيت ؟ طوالي البت قبلت قادي ومسحت دموعها.
مديت لأمها الكيس وقلت ليها جيت ياامي جبت ليكم مويه وحاجات بسيطه قالت لي ليه مكلف نفسك ياولدي قاطعت كلامها وقلت ليها تكلفة شنو ياخ معقوله وقعدت جنبها وشلت لي قارورة مويه فتحتها وشربت منها وهي بتعاين فيني عيونها دمعت قالت سبحان الله القريب يجرح والغريب يداوي.
عاينت ليها بإستغراب وقلت ليها امي الحاصل شنو شايفكم مهمومين احكوا لي يمكن اقدر اساعدكم ،، البت قالت لي مافي حاجه حاصله الأم قالت لي ياولدي ما نقش عليك دي بتي جيت معاها من البلد للخرطوم عشان اسفرها لود عمها في السعودية عاقد عليها لينا قريب شهر هنا فضل ليها اسبوع على السفر لكن ما عارفه الود مالو حصل ليهو شنو طلقها ياولدي وانهارت بالبكاء