رواية ماوراء النصيب الفصل الثاني2بقلم دانيا
صلوا على النبي....
كلام امها خلاني احس بالقرف من بعض الرجال قلت ليها روقي يا امي علي القسم معدوم رجوله ياخ كيف قدر يعمل كدا في دمو وعرضو كمان ماغريبه.
قلت ليها ساكنين وين انتوا ياامي؟ قالت لي والله ياولدي جينا من ربك هسي درنا الرجعه لكن الأمور زاتها عاكستنا بس الحمد لله رديت عليها ما اظن في باص بطلع باقي الزمن دا عشان كدا خلوني اوصلكم البيت وتحجزو في باصات بكره .
قالت لي مابتقصر والله كتر خيرك لكن نحن ما راجعين البيت هسي عندنا نيه في السوق وبعدين بنرجع شكرا ليك ،، قلت ليها طيب ياامي ربنا ييسر طريقكم ويسهل عليكم.
المساء بعد المغرب خلصت شغلي في السوق وقمت راجع البيت طلعت برا السوق شويه إلا اشوف المرأ وبتها قاعدات في واحده من الإستراحات الجنب السوق نزلت من الظلط شويه ووقفت العربية ومشيت عليهن كانن قاعدات بتعشن من شافني ملامحهن اتغيرت الأم قالت لي اتفضل ياولدي عليك الله كان ما جيت العشاء قلت ليها بالهناء والعافية ياامي لكن انتوا ليه لسه في السوق؟ البت عاينت لي وكشرت وشها الأم ردت لي بإستحاء قالت لي ماعارفه اقول ليك شنو نحن فكينا إجار البيت الكنا قاعدين فيهو لأنو كنا قايلين ح نسافر الليله لكن وقت ما سافرنا قلنا ما مشكلة مدة اليوم الواحد دي نقضيها في الإستراحه هنا والصباح نسافر... قلت ليها لالا ياخ معقولة تقضوها في إستراحه حرم ما يحصل تقومو تجوا معاي البيت.
دايرة تعترض قلت ليها ياامي انا حلفت والموضوع منتهي ماتخافو انا ما عايش براي عايش مع ناس خالتي اسره كبيرة ماشاء الله، ،قالت لي لا ياولدي مافي داعي نزعج الناس بالليل دا وكلها كم ساعه قلت ليها برضيكي مرت ولدك تحرم؟ عاينت لي بيأس واستسلمت .
سقتهم معاي وضربت لخالتي قلت ليها انا جاي ومعاي ضيوف وصلنا لقينا خالتي منتظرانا في الحوش استقبلتهم دخلتهم جوا قلت ليها ياخالتي وين البنات؟ قالت لي استبرق نايمه واسماء بتخت في العشاء في المطبخ قلت ليها تمام.
رجعت عاينت للمرأ وقلت ليها بعرفكم دي خالتي سوسن وخالتي ديل ضيوفنا الأنا لسه ما عرفت اسمائهم الأم ضحكت وقالت ليها انا فاطمه ودي بتي مريم خالتي قالت ليها شرفتونا والله اهلا بيكم.... قلت ليهم وانا إسمي يوسف تشرفت بيكم والله اتفضلوا جوا ارتاحوا لمن ادخل العربية واجيب ليكم الشنط.
دخلت ليهم شنطهم لقيت خالتي ما قصرت ختت ليهم العشاء الام قالت ليها ليه متعبه نفسك نحن متعشيين والله انا جيت اتدخلت وقلت ليها تعب شنو ياخالتي فاطمه البيت بيتكم قالت لي تعال انت اتعشى معانا الليله عزبناك شديد والله قلت ليها اتعشوا انتوا انا خاشي اتدوش وبعدين بتعشى.
الصباح قمت بدري بعد الصلاة طوالي سقتهم وديتهم الموقف ودعتهم وشلت رقم الأم وقلت ليها اعتبريني ولدك والله وح نبقى على تواصل إن شاء الله.
عند تقى:
من جهه عمتي سافرت مع بتها عشان تسفرها لأخوي معتز ومن جهه تانيه خبر إنو معتز طلق مريم وجايات راجعات ومعتز ما راضي يورينا الحاصل شنو وليه عمل كدا انتي ما شايفه إنو الموضوع دا غريب ياامي؟ امي شالت نفس عميق بأسف وقالت لي والله يابتي موضوع عمتك وبتها دا ما بنقدر نفسرو إلا بعد يصلن هنا ومعتز ولدي انا ربيتو وعارفاهو ما بعمل كدا لو مافي سبب... قلت ليها خلاص ياامي انا قايمه ماشه افتح الصيدليه وربنا يصلح حالهم وحالنا قالت لي ربنا يحفك ويسهل عليك يابتي.
مرقت مشيت الصيدليه عاوزة افتح الباب لمحت واحد واقف جنب عمود الكهرباء وبعاين فيني بطريقه غريبه للحظه خفت قلت معقوله يكون حرامي؟ فتحت الباب سريع وخشيت.
المساء بعد العصر البت البتشتغل دوام الليل جاتني استلمت محلي وانا طلعت، ، اجرت ركشه ومشيت البيت نزلت من الركشه ماشه على الباب شفت نفس الشاب واقف قدام بيت ناس صحبتي ياسمين اول ما شافني عمل حركه كدا كأنو اتهجم في قلبي قلت دا مجنون ولشنو ودخلت البيت طوالي ما اشتغلت بيهو.
كوركت على امي لقيتها مافي جاتني اختي تمني قالت لي امي مشت بيت عمي ناس مريم جو .
دخلت ختيت شنطتي في السرير وطلعت مشيت ليهم لقيت البيت مليان ناس اياهم الجيران جو يسلمو.... دخلت سلمت عليهن وقعدت معاهن شويه والمغرب اذن والنسوان الكانن قاعدات مشن مريم حسيتها ما على بعضها كأنها واخدة موقف كنت عاوزة اسالها من الحصل لكن قلت لا خليهم يرتاحو برجع ليها بكره .
امي تقول قرت افكاري طوالي قالت لعمتي فاطمه فطومه يااختي الحصل شنو؟ معتز ومريم الشي شنو البخليهم يختلفو لدرجة معتز يطلقها ؟ عمتي هزت راسها وبنبرة حادة قالت لأمي سؤالك دا ياليلي اسألي لولدك وكان انتوا عملتو كدا عشان تعيبو بتي انا دايره اطمنكم إنو بتي والله بت اصول وكل الحي يشهد ليها ما تقولو عشان ابوها مات خلاص انتوا بتقدرو تزلوها بالزواج والله بكره تلقى احسن راجل يااختي هو ولدك دا زاتو ما يخجل نكر الجميل بالسهوله دي هو لو ما نحن كتر خيرنا بعنا ارض المرحوم واديناهو القروش كان بقدر يسافر.
كلام عمتي فاطمه صدمنا شديد والله ، امي ما سكتت ليها قالت ليها هوي يا فطومه صيني لسانك الجاب الكلام الشين شنو ؟ نحن عملنا ليكن شنو اصلا عشان تقولي كلامك دا انا الله بشهد إني ما فرزت بتك من اولادي ولا يوم عندي معتز ومريم واحد كلهم اولادي انا زاتي محتاره من سمعت بالطلاق دا يشهد الله النوم غلبني وقدر ما حاولت اعرف من معتز ما راضي يقول لي بس بقول لي اسألي عمتي وبتها.
عمتي فاطمه قالت لأمي هي ياليلى دا ولدك انتي ولدتيهو هو ما ولدك لو دورتي تعرفي منو بتعرفي لكن البيكم اتعرفت ونحن حسبنا الله ونعم الوكيل فيكم الله يشيل لينا حقنا منك ومن ولدك ،، قامت جوطه كبيرة عريضه بين امي وبين عمتي فاطمه ... ماعرفنا كيف نهديهن مريم مسكت امها قعدتها وانا سقت امي مشيت البيت.
الحصل بين معتز ومريم عمل خلاف كبير بين امي وعمتي حتى امي منعتنا نمشي ليهم.... بحاول اتكلم مع مريم بالتلفون عشان افهم منها الحصل رافضه توريني حتى إنها وصلت لدرجة تحظرني من كل المواقع.
شهر على الحال دا الصباح قلت لأمي خليني امر عليهم اتفقدهم قبل امشي الصيدليه.