رواية صوره عائلية الفصل الاول1بقلم حياة محمد الجداوي
البارت الاول ( طفوله)
صورتنا واحنا سوا& تشهد يا نور العين
على جمال الهوى & والود بين قلبين
فى حديقه دار الأمل للأيتام كان الأطفال بيلعبوا وبيضحكوا كان في الركن جنب الشجرة وقفت حبيبه وهى بنت صغيره عمرها حوالى سبع سنوات وهى بتبص عليهم وهى خايفه
شافها مجموعه من الأولاد فقربوا منها
واحد من الأولاد: إنتى بتعملى إيه عندك
حبيبه بخوف: مفيش
ولد تانى: إيه إللى فى إيدك ده
خبت حبيبه إيديها وراء ظهرها وقالت: مفيش حاجه أنا مش معايا حاجه
قربت منها بنت شدت إيدها ومسكت اللعبه إللى مخبياها وقالت
البنت: الله العروسه دى حلوه اوي هاخدها
حبيبه بحزن وخوف: دى عروستى هاتيها
البنت: إنتى اكيد سرقاها يا حراميه
حبيبه هى بتبكى : لا والله دى عروستى بتاعتى
أخدت البنت العروسه ومشيت وحبيبه بتعيط وراها وبتقول
حبيبه: والنبى هاتى العروسه دى بتاعتى
واحد من الأولاد: سيبك منها يا هدير شاطره إنك اخدتى العروسه
مشيت حبيبه وراهم وهى بتعيط وبتقول
حبيبه: هاتوا عروستى أنا عايزة عروستى
( إدوا البنت عروستها)
وقف الكل أول ما سمعوا الصوت القوى جاى من وراهم
((محمود شاب يتيم عنده حوالى ١٧ سنه ))
واحد من الأولاد بخوف: محمود إحنا ....كنا...كنا بس ...
سحب محمود العروسه منهم وقال: لو شفت أى حد منكم بيضايقها حسابه معايا هوريه شغلوا فاهمين
الكل بخوف: فاهمين
محمود: يالا روحوا العبوا
جرى الكل منه وراحوا يلعبوا
نده عليها محمود وقال: إنتى يا بت تعالى هنا
قربت منه حبيبه وهى خايفه
قدم لها محمود العروسه وقال: خدى لعبتك أهى إنتى مين أنا أول مره اشوفك هنا
حسن صاحب محمود: دى بنت جديده الدار إللى كانت عايشه فيها قفلت فجابوا كل الأطفال هنا أنا سمعت المشرفه صباح بتتكلم مع صاحبتها
محمود: اسمك إيه
حبيبه بخوف: أسمى حبيبه
محمود: خدى لعبتك وماتخافيش من حد
حسن صاحب محمود: وأى حد يضايقك إخبطى رأسه بالطوبه وإبطحيه
محمود: ماتسمعتيش كلامه يا حبيبه إنتى تروحي تشتكى للأبله وخليكى شاطره واسمعى الكلام ماشي
هزت حبيبه رأسها وهى بتشوف محمود بيمشى هو وصاحبه
$$$$$&&&&&&&&&&&&ـ&&&
بعد فتره كانت حبيبه بتلعب مع البنات وشافت محمود بيلعب كوره مع الأولاد فوقفت تتفرج عليه لحد ما وقفت المشرفه ونادت عليهم
المشرفه: كله يدخل عشان عايزاكم في حاجه مهمه
دخل كل الأطفال وقعدوا على الكراسي
المشرفه : بكره أن شاءالله هيجى الأستاذ مجدى ومراته مدام سحر عشان يختاروا طفل صغير يتبنوه عشان كده أنا عايزة الكل بكره يبقى لابس احسن لبس ويقعد مؤدب عشان يختاره الاستاذ مجدى ماشي
فرح كل الأطفال وقالوا فى صوت واحد: ماشي يا ابله
دخل كل واحد يشوف أجمل لبس واحلى فستان والكل بيحلم إن الأستاذ مجدى هيختاره
فتحت حبيبه شنطتها وطلعت فستانها الأحمر الجميل إللى لبسته في العيد وصندلها الأحمر وهى بتحلم إن الأستاذ مجدى هيختارها وتروح تعيش معاه وتقول لأول مرة كلمه بابا وماما
فى اليوم التالى كان الكل لابس وجاهز دخل الأستاذ مجدى ومراته
سحر: أنا فرحانه أوي اخيرا هيبقى عندنا طفل صغير يقول لى يا ماما ويقول لك يا بابا
مجدي: طيب اختارى وأنا معاكى
مشيت سحر مابين الأطفال والكل بيبص عليها وفى عيونهم رجاء إنها تختاره
سحر: الله البنوته دى قموره أوى
مجدي: فعلا بس بصى شوفى الولد ده شكله طعم ولذيذ خالص
سحر: فعلا الولد بيضحك لى ودمه زى السكر بس بص كده شايف ((وشاورت ناحية حبيبه))
سحر : البنوته دى تهبل دى خطفت قلبى من أول نظره وقربت وشالت البنت من جنب حبيبه وقالت: اسمك إيه يا حلوه
البنت : اسمى ميار
سحر: الله اسمك حلو أوى شايف يا مجدى
شال مجدى البنت منها وقال: عسوله خالص
سحر: أنا حبيت البنت دى خلاص هاخدها
مجدى : وأنا كمان خلاص على بركة الله هاخد ميار قولى يا حلوه فرحانه إنك هتيجى معانا البيت
ميار بفرحه: أوى أوى إنت هتبقى بابا وطنط دى هتبقى ماما وهعيش عندكوا
ضحك مجدى وقال: أيوه وأنا عملت لك أوضه حلوه اوي فيها سرير كبير وألعاب كتيره حلوه أوي
حضنته ميار وقالت بلهفه: يالا خدنى بسرعه
ضحك الاستاذ مجدى وقال: ماشي يا حلوه تعالى نروح عند مديرة الدار عشان نخلص بسرعه ونروح
واتجه عند مكتب المديره وهو شايلها وعيون كل الأطفال بتتابعهم البعض حزين والبعض موجوع والبعض دموعه بتنزل البعض ماستحملش فإنفجر في البكاء بصوت عالى
قامت كل المشرفات تهدى الأطفال وتسكتهم
جريت حبيبه لمكانها تحت الشجره في حديقه الدار وهى بتبكى بصوت عالى كان محمود بيلعب فشافها وراح عندها
محمود: بتعيطى ليه دلوقتي
حبيبه: كنت عايزه اروح معاهم . ليه مش اخدونى أنا مؤدبه وبسمع الكلام أنا فستانى حلو وشعرى حلو ليه مش اخدونى
قعد جنبها محمود وقال:ماتزعلش يا حبيبه وبطلى عياط
حبيبه: إنت مش زعلان إنه مش إختارك
ضحك محمود وقال: لا مش زعلان يختار مين بس يا حبيبه أنا عندى ١٧ سنه ونص
حبيبه: يعنى إيه مش فاهمه
محمود: اللى بيجى عايز طفل صغير او بنت صغيره يربوهم ويعلموهم مش هيبصوا لراجل
اطول منهم وبعدين خلاص كلها كام شهر وهخرج من الدار
حبيبه: ليه وهتروح فين
اتنهد محمود وقال: أول ما اكمل ١٨ سنه هخرج لأن كده ابقى وصلت السن القانونى وفيه غيرى اولى بمكانى وسريرى أنا هروح فين وهعمل إيه فمش عارف
حبيبه: طيب إنت خايف
محمود: أوى مش عارف هعمل ايه في بره الدار ولا عارف هعيش إزاى
&&&&&&&&&&&&&&&
وبعد كام شهر قعد محمود في مكتب مديرة الدار وقالت : محمود إنت دلوقتي بقيت راجل كبير وعارف إنك للأسف لازم تمشى من الدار
محمود: عارف
المديره : لو عليا كنت سبتك هنا بس غصب عني .المهم أنا وكل إللى بيشتغلوا معانا هنا جمعنا لك المبلغ ده ( وقدمت له مبلغ من المال)
هو مش كتير حوالى ألف جنيه بس أهو مبلغ ينفع برضو
محمود: شكرا
المديره : أول ما تخرج تروح العنوان ده عند المعلم فتوح في المغربلين ده عنده ورشة نجاره وهيشغلك عنده
محمود : أن شاءالله شكرا لك يا ابله
وقام محمود وشال شنطت هدومه على كتفه وخرج بره الدار لاول مره في حياته
راح محمود عند ورشه الأسطه فتوح في المغربلين فقابل هناك راجل
محمود: السلام عليكم كنت عايز المعلم فتوح
المعلم فتوح: أنا فتوح عايز إيه
محمود بإحراج: أنا جايلك من مؤسسة دار الأمل وكنت عايز اشتغل
المعلم فتوح بزهق: كانت شوره سوده لما قلت لهم عايز صنايعيه كل شويه يحدفوا لى عيل من عندهم
محمود بإحراج: أنا يا معلم
قاطعه فتوح وقال بصوت عالى: شايف الورشه مليانه عمال وصنيعيه والحال واقف زى ما إنت شايف يعنى أنا بدفع أجرتهم بالعافيه وأنا مش ناقص ادفع اجره حد تانى فإتكل على الله وأخرج بره الورشه
محمود بتوهه: أروح فين وأروح لمين
المعلم فتوح: مش مشكلتي روح مترح ماتروح يالا بره الورشه خلى الواحد يشوف شغله
اتحرك محمود وهو بيجر رجليه بتعب وقال : حاضر يا معلم
وقبل ما يخرج نده عليه المعلم وقال: إنت يا....تعال أما أقولك
رجع محمود وهو فرحان وقال: تحت أمرك يا معلم
فتح المعلم الدرج وطلع ٢٠٠ جنيه وقال له : خد دول لك فى إيدك يمكن ينفعوك
بص محمود للفلوس وقال: كتر خيرك يا معلم بس أنا مش شحات أنا عايز أكل بعرق جبينى مش أكل صدقه خلى الفلوس في جيبك
وسابه وخرج وهو تايه ومحتار ومش عارف هيروح فين ولا هيعيش إزاى
ــــــــــــــــــــــــــــــــــــــــــــــــــــــ
ده عهد بينك وبيني & لاحلى صوره في عينى
صورتنا واحنا واحنا سوا