رواية معشوقتي العنيدة الفصل الاول1بقلم صباح عبد الله فتحي
/في حوش العمدة بعد نص الليل كان رائفت واقف شاب وسيم جداً بس واضح عليه الشقى والفقر وقف قدامه علي صاحبه ماسك تليفون وبيوري رائفت تسجيل ورائفت عيونه احمرت من شدة الغضب
علي
شوف شوف بعينيك اللي حبيبة القلب بتعمله في ضهرك يا صاحبي ياما حذرتك منها وقلتلك البت دي شمال بس ما سمعتش مني قالك كلام دلوقتي
رائفت بغضب
الفاجرة وعز جلالة الله لأقتلها وأغسل عارها بدمها
اتفاجئ بعلي مطلع مسدس من جيب جلبابه وهو بيقول بشر
علي
امسك يا رائفت خلص عليها واغسل عارها قبل ما الشمس تطلع عليها
رائفت اتوتر وبص له بقلق
رائفت
إنت جايب الطبنجة دي منين ولا معاك من إمتى
علي سحب إيده وحط المسدس على كف رائفت وهو بيقول بحدة
علي
مش مهم جايبها منين المهم دلوقتي هتعمل بيها إيه يا رائفت ولا إنت عاوز بت عمك اللي خلاص بقت اسمها مراتك حتى لو لسه ما اتجوزتهاش تفضحك في البلد وسيرتها تبقى على كل لسان بسبب وساختها دي
ملامح رائفت اتحولت لغضب وشر وهو بيتفرج على التسجيل اللي في إيده وكور إيده على السلاح بغضب
ــــــــــــــــــــــــــــــــــــــــــــــــــــ
في بيت قديم دخل رائفت وهو شايل السلاح علشان يقتل بنت عمه وخطيبته اللي خانت ثقته لكنه وقف مصدوم والمسدس سقط من إيده لما شافها نايمة على الأرض وغرقانة في دمها وواضح إنها مقتولة فعلاً رائفت جري عليها بصدمة
رائفت
رغدة رغدة
قعد جنبها وشال رأسها من على الأرض وحاول يفوقها بس ما فاقتش
رائفت بدموع
رغدة حبيبتي افتحي عيونك يا قلبي والله خلاص مسامحك حقك عليا بس افتحي عيونك والله ما كنت هأذيكي ولا ناوي أقتلك غصب عني والله الشيطان غلبني وجيت بس أقسم بالله ما كنت ناوي أذيكي
وفجأة دخلت وسام بنت جميلة جداً لابسة فستان فلاحي بينك على طرحة سمر وكانت راجعة من الشغل واتأخرت في الطريق بسبب المواصلات وقفت مصدومة لما سمعت اللي رائفت قاله وشافت أختها غرقانة في دمها
وسام بصدمة
رغدة رغدة إنت إنت قتلت رغدة يا رائفت
رائفت التفت لها بصدمة وخوف وهي جريت على أختها وهي مصدومة ومنهارة في العياط
وسام
رغدة رغدة عملت في أختي إيه يا مجرم
قعدت على الأرض وخدتها من على دراع رائفت اللي كان مصدوم
وسام بصويت
يالهوي أختي لا يا رغدة أبوس إيدك افتحي عيونك يا حبيبتي لا يا رغدة ده ماليش في الدنيا غيرك هتروحي إنتي كمان وتسبيني لمين قومي يا رغدة أبوس إيدك افتحي عيونك
بصت لرائفت بغضب وهي بتلطم وتصرخ
وسام
قتلت رغدة يا رائفت ليه حرام عليك عملتلك إيه والله دي غلبانة وبتحبك وصبرت على المرار معاك دي جزاء حبها ليك ليه يا رائفت ده إحنا مالناش غيرك ليه يا ولد عمي ليه
رائفت بصدمة
إنتي بتخرفي وتقولي إيه أنا ما قتلتهاش أنا ما قتلتش رغدة صدقيني يا وسام أقسم بالله ما قتلتها ولا لمستها حتى أنا دخلت لاقيتها مقتولة وعز جلالة الله يا وسام ما لمستها ولا جيت ناحيتها حتى
وسام
كذاب ومهما تقول مش هصدقك وحق أختي هاخده مش هسيبه ولو القانون سامحك أنا مش هسامحك و و
وما قدرتش تكمل كلامها وأغمي عليها بسبب تأثير الصدمة اتخض رائفت عليها وقرب منها بسرعة
رائفت
وسام وسام ردي عليا وسام لو سامعاني افتحي عيونك
وقف مصدوم وبيشد في شعره وهو بيبص لبنات عمه الاتنين واحدة مقتولة والتانية أغمي عليها وهي مفكرة إنه قاتل أختها وتمتم برعب
رائفت
ياربي أعمل إيه في المصيبة دي دلوقتي وسام أكيد مش هتسكت والكل هيصدق إني اللي قتلت رغدة وحتى لو هربت هفضل طول عمري هربان من حاجة ما عملتهاش يارب ساعدني أعمل إيه دلوقتي ولا أروح فين
سكت للحظة وبص لرغدة باستغراب وبعدين قال
رائفت
بس مين اللي قتل رغدة واللي قتلها قتلها ليه أكيد حد قاصد يدبسني في المصيبة دي
سكت وهو بيفكر في اللي حصل بينه وبين صاحبه علي قبل ما ييجي لرغدة علشان يقتلها
رائفت
معقولة يكون علي طب ليه
ـــــــــــــــــــــــــــــــــــــــــــــــــــــــــ
في حوش العمدة اللي شغال فيه علي ورائفت وبيراعوا مواشي العمدة كان علي نايم على مسطبة صغيرة على جنب السور دخل رائفت وهو متعصب جري عليه وضربه بالقلم فجأة قام علي وهو مخضوض مسكه رائفت بغضب من هدومه وهو بيقول بغضب بس صوته كان واطي
رائفت
بقى إنت إنت يا علي يطلع منك كل ده ده أنا لحد آخر دقيقة كانت ثقتي فيك عمياء ليه ليه يا علي عملت كل ده
علي كان مخضوض ومستغرب ومش فاهم حاجة
علي
أنا عملت إيه مش فاهم وإنت مالك جاي حامي عليا ليه كده مش فاهم حصل إيه
رائفت اتغاظ منه جداً وراح ضربه قلم كمان وهو بيقول بغضب
رائفت
مش فاهم برضه بقى إنت تعمل العملة وتدبسني أنا يا علي طيب ليه عملتلك إيه علشان تقتلها ليه يا علي قتلت رغدة عاوز أفهم
علي قام من مكانه بصدمة وهو بيقول بغضب
علي
إنت اتجننت ولا حصل لعقلك حاجة وأنا هقتل بنت عمك ليه
رائفت
مش عارف بس أنا متأكد إنك اللي قتلتها وجيت تحرضني عليها علشان أروح لها وتدبسني أنا مش كده
علي بحنق
إنت حمار ولا إيه وأنا هقتلها ليه أنا ماليش لا كلام ولا سلام معاها وحد الله كان بيني وبين واحدة زيها أنا ياما حذرتك منها ولما شوفتها مع الجدع الغريب ده صورتها علشان تصدق كلامي بس مش أكتر ولا أقل
رائفت بص له بحيرة واستغراب
رائفت
يعني إيه مش إنت اللي قتلت رغدة
علي بحيرة
طب وأنا هقتل رغدة وأوقع نفسي في مصيبة زي دي ليه بس هو إيه اللي حصل مش كنت رايح لها ومش ناوي لها على خير
رائفت قعد على المسطبة وحط إيديه الاتنين على دماغه ووطى راسه وهو بيقول بحزن وقلق
رائفت
كنت رايح بس ما كنتش ناوي أعمل اللي قولت عليه ولما وصلتلها لاقيتها مقتولة والمصيبة وسام دخلت وأنا قاعد معاها ومفكرة إني اللي قتلتها وفكرتك إنت اللي قتلتها وعايز تدبسني فيها
علي قعد جنبه وهو بيقول بحيرة
علي
وانا هقتلها ليه هو القتل بالساهل.. بس أمال مين اللي قتلها واللي قتلها كان عايز منها إيه.
رائفت
ما عرفش أنا دماغي هتطير مني وهتعدم في حاجة أنا ما عملتهاش ودماغي واقفة مش عارف أعمل إيه في المصيبة دي
علي
مافيش غير حل واحد يا رائفت إنك تهرب تهرب وتاخد وسام معاك لحد ما نعرف مين السبب في البلوة السودة دي
رائفت فكر شوية وبعدين قال
رائفت
ما هو أنا لو هربت التهمة هتثبت عليا والكل هيصدق إني اللي قتلتها
علي بتفكير
يبقى مش لازم حد يعرف إنها ماتت من الأصل
بص الاتنين لبعض بشرود وفضلوا ساكتين
ــــــــــــــــــــــــــــــــــــــــ
ومع طلوع الفجر في منطقة جبلية كان علي ورائفت بيحفروا قبر رغدة اللي كانت نايمة على الأرض ملفوفة في الكفن وكانت وسام نايمة على الأرض جنبها ولسه مغمى عليها. علي ورائفت حفروا القبر وبعدين رائفت شال جثمان رغدة وهو بيبكي
رائفت
بوعدك يا بنت عمي لأعرف مين اللي أذاكي وهجيبلك حقك منه وسامحيني ما كنتش قد المسؤولية وما قدرتش أحميكي بس بوعدك ووعد تاني الغلط مش هيتكرر مرتين واللي ما قدرتش أعمله معاكي هعمله مع أختك ومش هسمح لمخلوق يلمس منها شعرة حتى لو كرهتني وفضل في بالها إني اللي أذيتك
قرب بيها من القبر وساعده علي وبعدين دفنوها ووقفوا يصلوا عليها صلاة الجنازة وبعد ما خلصوا بص علي ناحية وسام وهو بيقول باستغراب
علي
هتعمل فيها إيه دي يا رائفت ولا هتقعد بيها فين دلوقتي
رائفت بص هو كمان ناحيتها وقال بحيرة
رائفت
مش عارف يا علي بس أهم حاجة دلوقتي تفهم إني مش اللي قتلت أختها
علي سكت شوية وهو بيفكر بحيرة وشك
علي
طب تفتكر مين اللي ممكن يكون السبب في موتها يا رائفت
بص له رائفت بحيرة وهو نفسه مش فاهم حاجة ولا قادر يتوقع مين ممكن يكون السبب في موتها.. ولا أي اللي حصل وبينه وبين رغدة إيه علشان يقتلها وليه يدبسه هو بالذات.