رواية ماوراء النصيب الفصل الثالث3بقلم دانيا
شهر على الحال دا الصباح قلت لأمي خليني امر عليهم اتفقدهم قبل امشي الصيدليه قالت لي لا اوعك تعتبي بابهم حاولت اشرح ليها إنو ديل صلة رحم قالت لي هم بعرفو يعني شنو صلة؟ فاطمه يابتي فاطمه الإعتبرتها اختي وبتها بتي تسمعني كلام شين زي دا؟ بقت تقلب في كفيها وقالت لا حول ولا قوه إلا بالله.
قلت ليها امي ارتاحي وماتشلي على كلامها الحصل دا ماهين خاصة إنو هي ام البت صراحه انا شايفه معتز غلطان شديد والله مهما حصل مريم في النهايه بت عمو وعرضو ليه يعمل فيها كدا؟ قاطع حديثنا صوت التلفون رديت عليهو لقيتها دي ياسمين قالت لي سيد البقاله وصاني اقول ليكم القروش المحولها معتز بإسم مريم رفضت تشيلهم كلمو يعمل شنو قلت ليها كويس انا بمر عليهو.
امي قالت لي دا منو؟ قلت ليها دي ياسمين قالت علي سيد الدكان قال مريم رفضت تشيل المصاريف حقت الشهر الرسلها معتز ... امي بقت تستغفر قلت ليها شفتي ياامي قلت ليكي بكون الغلط من ولدك زاتو كدي انا المساء بضرب ليك ليهو تحاولي تفهمي منو.
مشيت الشغل وانا راسي مشطوب من مواضيع معتز وبيت عمي دي قعدت شويه قلت اقوم اقول لست الشاي البرا دي تجيب لي قهوه اول ما قمت جاء زول خاشي قال سلام عليكم... قلت ليهو وعليكم السلام اتفضل اعاين في وشو القاهو نفس الشاب وقف بقى يعاين فيني نزلت عيني منو وعدت ليهو الكلام اتفضل.
قال داير بندول شلتو اديتو ليهو واداني القروش وقام طالع وقف جنب الباب واتلفت عاين لي وابتسم وفتح الباب ومشى.
العصر طلعت مشيت البقاله قبل ارجع البيت سيد الدكان قال لي والله القروش دي ليها شهر جات على اربعه حويلات ولحد الآن مريم ما جات شالتهم وصيت ليها الولد مشى ليها قالت ليهو قول ليهو ما دايراهم رجعهم لمعتز ... قلت ليهو تمام خليهم معاك وانا بتشوفها والصباح بجيك.
رجعت البيت شفت عربيه واقفه قدام بيت ناس مريم وقفت عاينت ليها بإستغراب وبعدين دخلت سألت امي الجاء بيت عمي منو؟ قالت لي ماسمعتي قالوا بت عمك جو يخطبوها.