رواية مقهي منتصف الليل الفصل الثاني2بقلم حميده عبد الحميد
مشيت عليها بخطوات كلها خوف واسئلة
عسجد ماتت ليها شهر. طيب كيف ظهرت هسي؟
وخبر وفاتها مؤكد مية في المية. وأهلها اتعرفو عليها طيب القاعدة هنا دي منو؟
معقولة وحدة بتشبهاا؟
لكن شبه كبير زي دا؟
ولا دي عسجد زاتها
بلعت ريقي بتعب لحدي م. وقفت قدام الطاولة الكانت قاعدة فيها قلبي كان بيضرب بقوة
رفعت راسها وعاينت لي مسافة وبعدها بصوت ملان هدوء قالت لي٠٠
سُنن!
قلعت عيوني وقلت ليها عسجد
وقفت على حيلها وفتحت يدينها. ضميتها على وبكيت شديد. لدرجة حسيت بصوتي راح من البكا
اما هي فكانت هادئة. جدا
قلت ليها بصوت متقطع عسجد. سمعنا بخبر وفاتك يعني دا كلو إشاعة ساي ووين انتي الزمن دا كلو
قالت لي اقعدي
قعدت في الكرسي وبقينا قاصدين بعض وايادينا في ايادي بعض
ابتسمت وقالت لي كيف انتي
قلت ليها الحمدلله انتي كيف
قالت لي كويسه.
امي وابوي واخواني كلهم كيف
قلت ليها بخير
رجعت. وسالتها نفس السؤال وقلت ليها عسجد انتي زمنك دا كلو وين ولي م ظهرتي لي أهلك ٠٠
اتجاهلت سوالي تاني
واشرت لبتاع الكافيه بعد لحظات جانا وشايل معاهو كوب قهوة ساخنه
ختاهو قدامي وفات ٠٠
ابتسمت وقالت لي اشربي
رفعت الكوب وانا بعاين ليها جو عيونها وفي سري كنت بفكر لي عسجد قعد تتجاهل سؤالي.
شربت من القهوة شوية وهي كانت مركزة معاي شديد.
بعد َ م ختيت الكباية في الطاولة قالت لي القهوة حلوه هزيت راسي ب رضي
قالت لي كيف مع الجامعة وامتحنتي ولا لسه؟
قلت ليها اي امتحنا ونزلنا سمستر جديد ٠٠
بقيت اتلفت يمين وشمال واتفحصت المكان كلو بنظري وقلت ليها
عسجد المقهى دا اول مرة اشوفو هنا هو فتح جديد ولا شنو ٠٠؟
م ردت علي وكانت سارحه بعيد
شويه شويه الناس الفي المقهى بدو ينسحبوا واحد واحد لحدي َ م المقهى فضي كلو وبقينا انا وعسجد وبتاع المكان
عاينت للساعة لقيتها 2منتصف الليل استغربت شديد كيف الزمن راح كدا
لحظات بس وشفت عسجد وهي قايمه على حيلها. وادتني ضهرها. قلت ليها عسجد ماشه وين بس م اتكلمت معاي. ٠٠
لحدي م دخلت جو المقهى. اتنفست وقلت في سري اكيد ح تمشي وترجع
اتلفت عشان ارجع واقعد في الطاولة بس اتفاجات لمن لقيت المكان كلو. مختفي ورجع الشارع لي طبيعتوا الأولى
بلعت ريقي بتعب والحروف اتكسرت في حلقي
بسم الله دا شنو
وين المقهى؟؟
بديت ارجع لي ورا. من الخوف
وعسجد اختفت وين
قلبي كان بيضرب وللحظة حسيت نفسي ح اجن من الخوف
كنت تايهه وما فاهمه اي شي
بركت رجولي في الأرض. وكنت مصدومه شديد.
من حول الحدث الحصل قدامي قبل شويه. غمض عيوني وبقيت احرك في راسي وفي نفس اللحظة بقيت اصرخ ب أعلى صوت
لحدي م حسيت بشي واقف قدامي فتحت عيوني واذا به شاب. كان واقف وهو بيعاين لي بكل استغراب
اتنهد وقال
مالك ي بت الناس المات ليك منو؟
قلت ليو المات لي رجع وعاش تاني
ضحك وقال غايتو المجانين كترو. واظن البلد دي م فضل فيها زول نصيح غيري انا
شلت نفس عميق وقلت ليو امشي في طريقك بالله م ناقصاك انا
دخل يدو اليمين في جيب البنطلون وباليد التانيه مسح بيها شعرو وقال
جدا اصلا ماشي بس اعملي حسابك المكان القاعدة فيهو دا بتحصل فيهو حاجات غريبه
طوالي وقفت على حيلي وقلت ليو زي شنو.
قال لي يهمك؟
يلا سلام وفات قدامي
طوالي لحقتوا وقلت ليه لو سمحت. ممكن اعرف زي شنو وقف وقبل على وقال لي
ي بتنا انا كنت بهظر معاك ساي
وعموما قعادك في نص الشارع كدا م كويس وانتي بت. بيتكم وين وانا بقدمك اذا م عندك مشكلة طبعا؟
اترددت مسافه وقلت ليو تمام وصلني قال لي تمام
اتحركنا. وكل زول كان ساكت. وانا طول الوقت كنت بتذكر في الشي الحصل لي قبل شويه. يعني معقولة انا كنت بتخيل!! وهل اذا حكيت لي ناس بيتنا ح يصدقوني
طوالي وقفت من دون م أشعر وقلت بصوت عالي مقهى منتصف الليل!!
الشاب وقف طوالي وعاين لي وهو مخلوع وقال
عيدي الكلام القلتي قبل شويه
قلت ليه قلت شنو انا؟
قال ي الله هسي انتي اتكلمتي
هزيت راسي وقلت ليه لا أبدآ انا م اتكلمت
. قال لي قلتي مقهى منتصف الليل؟
قلت ليو انا قلت كدا
قال لي اي طيب ممكن اعرف جبتي الاسم دا من وين
اترددت مسافة وتاني قلت احسن احكي ليهو حتى لو م صدقني
وبديت اسرد ليهو في الشي الحصل لي كلو
ضحك ضحكة غريبه شديد وقال حتى انا حصل لي نفس الشي وقبل شهر صادفت ود خالتي المات ليهو ١٠ سنة
قلعت عيوني وقلت ليو شنو؟