رواية وجه اخر الفصل الثالث3بقلم سما
- طلعنا وانا وهو من تحت واول ما دخلنا الشقه..دخلت اوضتي وقفلت الباب ورايا..
- نديم بصلها بعدم فهم وقال: مالها دي؟
- بعد شويه لقيته جاي وبيخبط علي الباب..قلتله : نعم؟
- طب ما تفتحي الباب..
- لا
- لا ليه؟
- كده هنام..
- بس لسه بدري..
- انا حره..
- طب افتحي بس هقولك حاجه..
- عايز ايه يعني..
- يستي افتحي بس..
- رحت وفتحت الباب: خير؟
- مالك كده؟ انا عملت حاجه ضايقتك؟
- لا..لا سمح الله هو انت بتعمل حاجه..
- بقولك ايه يا هيام قولي فيه ايه بلاش لف ودوران...
- بلاش انت تكلم عن اللف والدوران بس...
- طب تصدقي ان انا غلطان جاي اعرف مالك..
- لا كتر خيرك والله كنت هموت من غير سؤالك..
- لا دانتي صعبه بجد..
- كويس انك عارف..
- اقفلي اقفلي مش عايز اعرف..
- وانا كنت هقولك يعني..
- خلاص يا هيام براحتك..
- طب يلا بقي عشان هنام..
- نامي..احسن برضو..
- بصتله بنرفزه وقلت: بقولك ايه يا نديم..
- قوليلي بس فيه ايه؟
- يوووه بقي مفيش حاجه..
- متأكدة اصلك دخلتي علي الاوضه جري...
- لا مليش حق المفروض ادخل اوضب العشا واعمل حاجه نشربها وفشاار ونقعد نتفرج علي فيلم..
- وماله؟ما نعمل كده..
- كان علي عيني بس فيه مشكله قد كده..
- ايه هي؟
- انت..
- انا؟
- اه شفت بقي..
- طب ما كنا تحت زي الفل..
- تمثيل وحياتك... تعليمك بقي..
- مكنتش حاسس كده خالص..علي فكره..
- اتوترت وقلتله: هتمشي ولا اقفل الباب في وشك..
- خلاص خلاص روحي..
- مشي وانا قفلت الباب بزهق وفضلت راحه جايه في الاوضه مش عارفه اعمل ايه؟وميعاد ايه ده؟ منك لله جننتني..
>>>>>>>>>>>>>>>>>>>>>>>>>>>>>
تاني يوم صحيت وسمعته بيتكلم في الموبايل بره..
قمت بسرعه ووقفت ورا الباب بتاع اوضتي عشان اسمع..بس لقيته قفل..وفجأه لقيته فتح الباب..
- بسم الله انتي بتمشي وانتي نايمه ولا ايه..
- لا انا صاحيه يا خفيف..
- صاحيه بدري كده ليه؟هتعمليلي الفطار...
- اه واظبطلك هدومك بالمره..
- نديم راح وقف قدامها وقال: طب يلا..
- زقيته وقلتله: اوعي كده انت ما بتصدق..
- نديم قرب تاني وقال: وفيها ايه؟
- بعدت ورفعت صابعي وقلتله: نديم..وحياه ربنا لو قربت مني كده تاني مش هعديها..
- لا يستي وعلي ايه ده كله..
- بصتله وضيق وقلت: حاجه تزهق..
-نديم بص لها باستغراب وقال: هو أنا بقيت بخوفك للدرجة دي؟
هيام: لا بس وجودك لوحده كفاية يخليني متعصبة..
نديم: طب ماشي... بس انتي من امبارح مش طبيعية.
- مالي انا طبيعية جدًا..اهوه..
- لأ انتي من ساعة ما رجعنا وانتي بتدوري على أي سبب تتخانقي معايا..
- عشان أنت مستفز.
-هيام انت بتقولي اي حاجه وخلاص..
- بقولك ايه متعملش حوار من الصبح كده..
- انا اللي بعمل برضو؟
- اه امال انا كل شويه تقول مضايقه ليه ومعرفش ايه..شايفني بشد في شعري..
- يعني انا غلطان مش عايز ازعلك..
- ناقص سنه واصدقك والله ..وبعدين انت شايف عملت حاجه غلط؟
- انا؟لا..
- يبقي خلاص..
- نديم:ماشي..
- ماشي..وسيبته ومشيت..وقلت: لا اه امي اللي عملت..
>>>>>>>>>>>>>>>>>>>>>>>>>>>>>
كان في الشغل وانا طول عماله افكر ياتري زمانه قابلها واتكلموا في ايه..طب اقوله واخرب الدنيا واسيب البيت...لأ يا هيام افرضي مطلعش عمل حاجه..بس ليه يرد عليها...
- بعد شويه ببص لقيت البيت فتح وجه..
- نديم: ازيك يا هيام..
- اهلا..
- عملتي أكل؟
- انت كل حاجه عندك اكل؟
- ايوا يا هيام واحد جاي من الشغل اكيد عايز ياكل يعني..
- ايوا طبخت..
- نديم: احلفي..
- غصب عني والله صافيه كانت قاعده معايا وكان لازم اطبخ قدامها..
- يااه تعرفي اني نفسي أكل من ايدك اوي..
- يخساره يريتني مبعرفش اطبخ..
- هو في زي اكلك يا جميل..
- بصيتله بضيق وقلت: هنخيب اهوه بقي..
- نديم ضحك وقال: لا خلاص..هيام بقولك..
- نعم..
- عايزك في موضوع..
- موضوع ايه؟
- حاجه كده يعني..
- قول..
- بصي انا امبارح فيه رقم غريب رن عليا..ولما رديت طلعت ساره..
- امم وبعدين..
- بس انا صديتها وعرفتها اني خلاص اتجوزت وكده وانها متتصلش عليا تاني..
- بس؟
- اه بس..
- سكتت ثواني وقلتله: مفيش اي حاجه حصلت تاني؟
- لا بس كده..
- ضحكت بسخريه وقلتله: طب يعني لما تيجي تضحك عليا بكلمتين قولي القصه كلها عشان شكلك ميبقاش وحش..
- مش فاهم قصدك..
- طب والرساله والميعاد ايه النظام مش تبع القصه ولا ايه؟
- ثانيه انتي شفتي الرساله؟
- اه شفتها حظك وحش المرادي..
- ليه؟طب منا قلتلك اهوه...
- قلتلي ايه انت جبت سيره الرساله؟
- ايوا منا مجبتش سيرتها عشان نفس اللي قالته في الرساله اتقال في المكالمه واني لما شفت الرساله عملت بلوك ومردتش عليها حتي خدي شوفي..
- يعني عايز تفهمني انك مقابلتهاش..
- لا
- بجد والله؟
- وربي ما حصل..
- تمام اعمل ايه يعني؟
- ايوا عشان بس تعرفي اني معتش بكدب عليكي..
- ماشي..
- يعني ايه ماشي؟
- ايوا يا نديم عايزني اقولك ايه برضو؟
- مفيش..بس انتي مصدقاني؟
- سكتت شويه وقلتله: معنديش حل تاني..
- هيام متبقيش كده وتمسكي علي الغلطه انسي بقي وانا والله اتغريت..
- حتي لو نسيت هعيش ازاي مع واحد مبيحبنيش؟
- لا بس انا هحبك يا هيام..
- يا عالم بقي..علي ما يحصل هكون انا شيلتك من قلبي اصلا ولفي بينا يا دنيا..
- نديم بصلها وسكت ثواني وقال: هيام حاولي تسامحيني..
- مش قادره احاول تاني..فقدت الشغف بعيد عنك..
- انتي ليه بقيتي كده انتي... مش هيام اللي انا عارفها..
- البركه فيك..
- نديم: ماشي يا هيام..مش هتكلم تاني عشان عارف اني مهما اقول كلامي مش بيدخل دماغك..
- شطور والله وفر كلامك بقي..
- نديم : ماشي..وقام دخل جوه..
- انا بقي من جوايا فرحت الصراحه وحسيت اني ارتحت ولاحظت انه فعلا اتغير بس مش عارفه اطمنله قلبي مش عارف يأمنله تاني...
>>>>>>>>>>>>>>>>>>>>>>>>>>>>>
- طلعت الصاله لقيته قاعد يشتغل علي الاب توب..رحت قعدت قدام الشاشه وجبت فيلم..
- ممكن توطي الصوت مش عارف اشتغل..
- خش اشتغل جوه..
- مانتي عارفه اني بحب اقعد هنا عشان اسند علي السفره..
- خد السفره وخش جوه..
- بجد والله؟
- اسكت بقي خليني اسمع..
- انتي متفرجه علي الفيلم ده ٥٠٠ الف مره..
- اصله حلو اوي..
- دانتي حفظتيه..
- قلت اتفرج تاني يمكن تكون حته فاتتني..
- يا حول الله يارب..
- عارف احلي حته لما جوزها قعد يزهقها وهي عملت غلبانه وسمعت كلامه ولما لما لف جابت السكينه وغزته احييها والله..
- يا ساتر يارب...
- متخفش ده تمثيل..
- ده اللي مطمني..
- كمل شغل بقي واسكت..
- بعد شويه لقيته بيقولي : طب وهيلاقوها..بصتله وضحكت: ايه ده انت بتتفرج..
- اه تصدقي ده حلو..هيلاقوها؟
- لا عارف الظابط اللي ماسك القضيه ده؟
- ماله؟
- هتقتله..
- اقفلي البتاع ده..
- الله مش بتقول ده حلو
- لا دي مفتريه..
- ليه دي بتاخد حقها..
- دي سفاحه..
- امال جوزها يخونها ويحرق دمها وتقعد تعيط..
- لا تصفيه..
- ايوا..
>>>>>>>>>>>>>>>>>>>>>>>>>>>>>
- كنت قاعده في الاوضه لقيته داخل وقف قدام المرايه وبيجهز..قلتله: ممكن تاخد حاجتك دي من اوضتي..تحطها في الاوضه التانيه..
- لا مش ممكن..
- وانا مش عايزاك تدخل عليا الاوضه كده..
- معلش..
- اصرفها منين دي؟
- خليها معاكي..المهم انا نازل اقابل صحابي...
- وبتقولي ليه؟
- مراتي بقي وكده..
- متقولش الكلمه دي تاني..
- ماشي يا مراتي..
- اه انت رايق بقي وجاي تتسلي عليا...
- عقبالك كده..
- وهتقعد قد ايه بره؟
- ليه هوحشك؟
- استظراف مش عايزه..
- امال بتسألي ليه؟
- عادي يعني مش كل حاجه تدقق عليها..
- مش هغيب ساعتين وجاي..
- لا خليك براحتك متخفش مش هعملك حاجه..
- متعرفيش ريحتيني ازاي بعد ما اخدت الاذن..
- اي خدمه..
- يلا انا ماشي..
- اوكيه..
- مش هتقوليلي خلي بالك من نفسك..
- لو عايزه اقول كنت قلت مش بالعافيه هو..
- يمكن مكسوفه او كده..
- يلا يا بابا من هنا..
- حاضر يا ماما..
- خليته طلع وقلت: اما ادخل البس بقي..
>>>>>>>>>>>>>>>>>>>>>>>>>>>>>
صافيه كانت واقفه علي السلم...مع حازم( خطيبها وكمان يبقوا جيران)
-حازم: عامله ايه يا صفصف..
- الحمد لله..
- لسه زعلانه؟
- لا وهزعل ليه؟
- خلاص حقك عليا والله كنت مضغوط اوي في الشغل..
- حتي لو كده متزعقليش..
- انا زعقت؟!
- ايوا قلتلي طب اقفلي دلوقتى يا صافيه بشخطه كده..
- ينهار ابيض عليا..لا مينفعش..حقك عليا..
- انت بتاخدني علي قد عقلي..
- يستي والله ابدا..
- كنت نازله علي السلم وشفتهم واقفين..:ازيكوا..
- اهلا هيومه..
- عامله ايه يا هيام؟
- الحمد لله يا حازم بخير..
- صافيه: راحه فين كده يا مزه؟
- راحه اقابل صحبتي..
- طيب يا هيومه..
- همشي انا بقي سلام..
- مع السلامه..
-بعد حوالي تلت ساعات نديم كان رجع البيت وهيام مكنتش موجوده..
-نديم: راحت فين دي؟ وفضل مستنيها كتير..ومجتش...: اما انزل اسأل صافيه..ولسه بيفتح الباب لقاها في وشه..
- هيام: يحزني خضتني..
- ادخليلي..
- دخلت وقعدت علي الكنبه واتعاملت كأنه عادي وانا من جوايا خايفه من بصته دي..
- نديم: ممكن اعرف اني كنتي فين يا هانم..
- كنت في مشوار..
- ومقلتيش ليه ان شاء الله؟
- هو لازم؟
- نديم بعصبيه: بقولك ايه يا هيام انا لحد دلوقتي بتكلم بهدوء...بتتنيلي تخرجي من غير ما اعرف ليه؟
- عادي
- لا مش عادي..يعني دلوقتي انا كنت هنزل اسأل صافيه تخيلي كنت هقولها مراتي فين اصلها خرجت من غير ما تقولي..
- انت مكنتش هنا..
- لا والله مفيش اختراع اسمه زفت موبايل..
- بقولك ايه متزعقليش..
- ردي عليا..يا هيام..
- فيه بس انا مكنتش عايزه اقولك..
- لا ما هو مش بمزاجك..
- لا بمزاجي..
- امم طب وكنتي فين؟
- كنت بتفق علي شغل..
- نعم؟!
- إيه هشتغل..
- وده ليه بقي؟
- عشان يبقي معايا فلوس وانجح في حياتي..
- وفين كلامك انا مش هشتغل بعد الجواز وهقعد وكل الكلام ده راح فين..
- ليه هي دي الحياه اللي انا كنت عايزه اعيشها...؟!
- اه يا هيام مش هي..بس دي الحياه اللي اتفرضت عليكي واللي هتعيشيها..
- ومين بقي اللي فرضها عليا؟
- انا..
- امم طب انا مش هعيشها وهعيش زي منا عايزه وهشتغل وهطلق منك يا نديم..
- سيبك من كل ده وهتشتغلي فين بقي؟
- في شركه..
- ايوا فين دي يعني؟
- سكتت ثواني وقلتله: هشتغل مع سامح..
- نعم ياختي؟!