رواية ماوراء النصيب الفصل الرابع4بقلم دانيا
صلوا على النبي......
خطوبة شنو يا امي هي متين طلقوها عشان تعرس تاني؟ امي ياابتي دا شيء بعرفنو عمتك وبتها نحن ما لنا وملهن ، لكن ياامي كدا ما صاح انا بعد كدا مابسكت والله ماشه اتكلم مع مريم.
امي تقى يابت خشي جوا ياامي خليهن عمتي وبتها اتزكري عمي فؤاد الله يرحمه كان طيب معانا قدر شنو المرحوم عمرو ما قصر معانا دائما معتبرنا اولادو وكمان هم مش عزمونا؟ قالت ايوه عزمونا رسلو لي بت محاسن لكن ابيت امش .. قلت ليها خلاص ياامي قبل مريم تعرس وتطلع من هنا انا حأفهم منها سبب الطلاق وبأي طريقه هسي بخش اغير وامش تمني قالت لي ماشه معاكي، ، امي قلبها الكلام سكتت.
خشيت استحميت ولبست لي لي فستان اسود من طرف الدولاب وطرحه عنابيه وطلعت لقيت امي جاهزة وقاعده منتظراني اطلع عاينت ليها من فوق لتحت اتلفت علي وقالت لي مالك في النهايه المرحوم كان زول طيب معانا ومن واجبنا نقيف مع بتو في اللحظات دي والحصل داك بينها وبين معتز نعتبر مافي نصيب ضحكت ومشيت حضنتها قلت ليها والله يا امي كنت عارفاكي قلبك طيب شديد.
طلعنا مشينا ليهم لقينا في جزء كبير من الجيران جوهم سلمنا عليهم وعلى العريس واهلو باين عليهو زول محترم ووسيم كمان لكن الحاجه المحيراني مريم عرفتو كيف ولقتو وين بالسرعه دي؟ موضوع مريم دا انا ما مريحني مشيت سلمت لعمتي وقلت ليها الف مبروك ربنا يتمم على خير... سلمت لي سلام مسيخ كأنها مافرحت بشوفتنا.
بعد التعارف والخطوبه وكدا قررو العقد والعرس بعد اسبوع، ، بقيت منططه عيوني في قلبي قلت مستعجلين كمان !! .
بعد طلعوا ناديت مريم قعدت معاها برانا في غرفتها سألتها يابت الحاصل شنو نحن ما صغار عشان تدسو مننا سبب مشكله كبيره زي دي، ، فكت خشمها قالت لي مافي نصيب ياتقى وانا شايفه الكلام في الموضوع دا مافي داعي ليهو خلاص الحصل حصل دايرين شنو انتوا بالأسباب؟.
قلت ليها يابت مسكت اعصابي بالعافيه قلت ليها انتي مالك بقيتي كدا؟ بقت تعاين لي وردت لي بكل برود مالي انا ؟ قلت ليها بقيتي مستفزة انتي ما كنتي كدا من سافرتي وجيتي متغيره مننا كلنا حتى امي اسمعيني انا فاهمه إنو مهما كان الحصل ماهين عليكي لكن نحن ذنبنا شنو معاكم؟ العلاقه بينا ما علاقة نسب نحن اخوان اولاد عمومه انتي فاهمه؟ وحتى لو ما بنبقى لبعض زاتو مامن حقك تعاملينا كدا لأنو مشكلتك مع معتز نحن مالينا علاقه فيها ،، قالت لي صاح كلامك وانا ما عندي مشكله مع زول فيكم شوفتو مني او سمعتوا كلام كعب؟ قلت ليها لا قالت طيب مالك يا تقى ؟ كان إلا لسبب الطلاق هو داك اخوكي يعني اقرب ليكي مني مالو ماكلمك؟ كلامها استفزاني قمت طلعت منها.
رجعنا البيت رسلت لمعتز كلمتو بكل الحصل ردو كان بارد " الف مبروك ليها ربنا يسعدها " حسيتهم برفعوا الضغط والله طوالي طلعت منو.
الصباح وانا طالعه ماشه الصيدليه وقفت جنب الظلط بأشر للركشات وقفت قدامي عربيه عاينت ليها كنت دايرة اقول دا مالو واقف قدامي مالقى مكان تاني... القاها دي عربيه ابو صاحبتي ياسمين .
القزاز نزل اتفاجأ بنفس الشاب داك قال لي السلام عليكم يادكتورة لو ممكن اوصلك معاي لأنو ماشي بنفس الطريق ،، مارديت ليهو اكتفيت بإني اكشر وشي وامشي من قدامو وقفت لي ركشه وصلتني.
يوم العرس بعد خلصنا جرتق العرسان في بيت عمي قلت لياسمين ورح معاي بيتنا سريع ونجي نسيت حاجه طلعنا كان في شباب كتار واقفين جنب الباب من ضمنهم الشاب داك عينو ما شالها مننا قلت ليتسمين دا منو انتي؟ انا قاعده اشوفو قدام بيتكم ومره كان شفتو سايق عربية ابوكي قالت لي دا اخوي الكبير يابت معقوله ما بتعرفيهو دا ياسين قلت ليها ايواه ح اعرفو من وين يعني.
مرت سنه على عرس مريم بعد سافرت مع راجلها تاني اخبارها انقطعت مننا حتى عمتي بقت ما بتجينا والمصاريف البرسلها معتز حالفه ما تشيلهم فتحت ليها شغل بقت تبيع كسرة مهما حاولنا نتكلم معاها ماتشتغل عبس ماراضيه تسمعنا ،، قروشها الرسلهم ليها معتز الجمعناهم عندنا براهن ممكن يشترن ليها عربيه بدال تقعد تبيع كسرة ماقدرنا نوري معتز لأنو امي قالت هو في غربه ومافي داعي نشغل بالو .
اخو ياسمين لحد يومنا دا بجي الصيدليه كل يوم يشتري بندول هسي لو داير يفتح بيهو صيدليه كان فتحها، ، وكل ما يجي بحاول يتكلم معاي ويعترف لي بمشاعرو وانا كل مره بصدو وبرفضو وهو حالف ما يستسلم لحد الليله الصباح قلت اريح راسي منو وحرام والله فتر سنه كامله جاري وراي وافقت عليهو لكن اشترطت عليهو إلا اخوي معتز يجي من السعودية ويشوفو ويدي رايو فيهو حتى ارضى بيهو ومن هنا للزمن داك تاني م يجيني ولا يحاول يتكلم معاي للحظه حسيتو طاير من الفرحه ضحك وقال لي موافق ياحضرة الدكتورة العنيده.
فتحت الموضوع مع معتز قال لي تمام انا اصلاً نازل السودان في الشهر دا ... خطبت لي بت واهلها وافقوا وهم هنا لكن اتفقنا ننزل السودان سوى ونجي نتم العرس معاكم قلت ليهو احلى خبر والله في قلبي قلت كدا ح نعرفو الحصل شنو بينك وبين مريم.