رواية ماوراء النصيب الفصل الخامس5بقلم دانيا
صلوا على النبي......
الصباح قمت مبسوطه مشيت كلمت امي بإنو معتز جاي السودان مع اهل اخطيبتو وداير يتم عرسو هنا ،، امي فرحت شديد بس في نفس الوقت بدأت عليها ملامح التوتر قلت ليها امي مالك سرحتي؟ قالت لي بفكر في اخوكي يابتي كان عرف بت عمو من عرست ما اتواصلت لا معانا ولا مع امها ردة فعلو ح تكون شنو؟ هديت امي وقلت ليها مافي داعي تفكري وتشغلي بالك إن شاء الله مابتحصل عوجه.
في مكان تاني:
مريم كانت قاعدة وسرحانه بعيد بتفكر في امها وفي يوم عرسها وبعد ودعت امها وسافرت مع راجلها وناس خالتو مشو الخرطوم عدو فيهو اسبوع وكانت متواصله مع امها ولاقيه خبرها وكانت امورها ممتازة وراجلها طيب وحنون معاها وخالتو سوسن وبناتها ماقصرن عاملنها اطيب معامله لمن جاء اليوم الفيهو جاها راجلها يوسف من الشغل وقال ليها اجهزي بكره مسافرين.... قالت ليهو وين ؟ عاين ليها بنظره غامضه مامفهومه وقال ليها على البلد مش دايرة تتعرفي على اهلي؟ ضحكت وقالت ليهو كيف ما دايرة طوالي.
اصبحو الصباح ودعوا ناس خالتو وسافرو بالباص بلدهم من الخرطوم تلاته يوم حتى وصلو مريم كانت طايرة من الفرح ومستمتعه بالرحلة وم عارفه الراجيها شنو !!.
وصلت بيت اهل راجلها وهي مزهوله من وسع البيت وطريقة بناهم وعائلتهم الكبيرة ،، كانت مندهشه لأنها خشت في جوا غريب عن الكانت عايشه فيهو السلام براهو فترها شدة ما اهل يوسف راجلها كانو كتار دا غير الشفع البجوا بمسكوا في رجليها هي كانت مستمتعه.
قضت اليوم الأول كله تعارف وطالعه مع فلانه وداخله مع علانه يوسف دا ما بتشوفو إلا زمن النوم ،، ودا غير إنها المفروض تقوم من النوم بدري وطوالي تطلع على الحريم في المطبخ الكبير وديك يالشغله والنهار كله البيت مليان ضيوف دا داخل ودا مارق ... رغم إنها عروس هلكت من التعب وشغل البيت.
وفي يوم ياداب اتزكرت تلفونها واتزكرت إنو عندها ام المفروض تسأل وتطمئن عليها دخلت غرفتها مع المغرب بتفتش في التلفون عشان تضرب لأمها قلبت الغرفه غلب مالقتو يوسف جاء خاشي سألتو يوسف شفت تلفوني وين؟ رد ليها بكل برود دايرة بيهو شنو؟ قالت ليهو اجي يايوسف كيف دايرة بيهو شنو؟ عاين ليها بنظره حادة وقال ليها سألتك ردت ليهو دايرة اتصل لأمي.
فتح خشمو وقال ليها "مافي تلفون" عاينت ليهو بإستغراب شديد وقالت ليهو كيف يعني بتهظر معاي ؟ اداها عين حاره وقال ليها حصل هظرت معاكي ؟ انفعلت وقالت ليهو بنبرة حادة كيف يعني مافي تلفون اقول ليك دايرة اتصل لأمي اطمن على عافيتها تقول لي مافي تلفون وزاتو هو تلفوني انا انت تشيلو مالك ومالو .
الساعه القشطها كف لمن وقعت كورك فيها وقال ليها "ترفعي صوتك على منو انتي " في اللحظه دي بقت تشوف طشاش طشاش وماقادرة تستوعب الحاصل ومن هناك امو واخواتو جن جاريات مالكم مالكم مالك يا ولدي في شنو؟ طلع خلاها هي واقعه بتبكي وامو واخواتو فوق راسها.
ومن اليوم داك ماشافت تلفون بي عينها وبدأت المشاكل بينهم قال ليها عايني للحريم الهنا ديل كلهن فيهن واحدة شايله تلفون؟ شوفي هنا نحن ما عندنا مرا بتشيل تلفون وماعندنا مرا بترفع صوتها على راجل فاهمه!!.
اتزكرت الأحداث الحصلت معاها دي كلها وكيف مره حصلت بينهم مشكله بسبب شفع اختو ودقاها لمن حصل ليها إجهاض بقت تبكي من حرقتها .
معتز اتصل لينا وقال لينا انا حالياً وصلت الخرطوم وبكره بتحرك عليكم .... فرحنا شديد مع امي رتبنا لجية معتز وكأنو الدنيا عيد .
عند معتز:
وصلت ربك وانا ما مصدق دي ياها الحله الطلعت منها قبل سته سنين اشياء كثيره اتغيرت فيها ... فجأة وقفت العربية بسرعه وانا ما قادر اصدق مصدوم عديل نزلت منها وقفت مسافه بحاول استوعب دي بالجد عمتي فاطمه؟ ليه قاعدة كدا ؟ مشيت عليها لمن اتلفت شافتني هي زاتها اتصدمت بقت بس تعاين فيني سلمت عليها قامت سلمت علي بالأحضان ورجعت قعدت وهي بتنجنب إنها تعاين لي زاتو سألتها بدهشه عمتي فاطمه دا شنو انتي بتبيعي كسرة؟ ردت لي ببرود وقالت لي الشغل ما عيب.
قعدت جنبها في الأرض على ركبي ومسكت يدها وقلت ليها فعلا الشغل ماعيب ياامي لكن العيب لمن تشتغلي وولدك موجود... ابتسمت بحسره وقالت لي ولدي؟ورجعت سكتت قلت ليها ايوه ياامي ولدك وقروش المصاريف لو ما مكفيه كنتي تقولي اتواصلي معاي من تلفون تقى وطوالي ازيدهم ليكي لكن التعب مايسوى ليكي ياامي انا شغال عشان منو ما عشانكم انتوا .
حسيت بغصه في قلبي قلت في نفسي معقوله انا مقصر للدرجه دي؟ دموعي نزلت مسحتها وقلت ليها وكمان الف مبروك لمريم إن شاء الله بيت مال وعيال ،، قالت لي ااي الحمد لله ربنا سترها رغم نيتكم لكن بتي الله ما كريم ليها المسكينه ،، عاينت ليها بإستغراب شديد في نفسي قلت عمتي فاطمه مالها بتتكلم كدا رغم الحصل ؟.
مااهتميت قلت ليها كدي قومي ياامي نمشي البيت ارتاحي وبعدين نتفاهم في كل حاجه، جيت ارفع صونينها مسكتها قالت لي امشي ساي انا ما ماشه إلا شغلي دا يكمل... جاء واحد بعرفو من ناس الحي سلم علي ووقف معاي قريب خمسة دقائق بسأل عن احوالي بعد فات مني قلت الإحسن اتكلم معاها وقت ترجع .
قلت ليها تمام ياامي لبعدين بجيك في البيت اقعد معاكي برواق نتفاهم ... وصلت البيت سلمت على ناس امي وكانوا مبسوطين شديد خاصة امي مسكتني وبقت تبكي لمن بكتني معاها .
قعدت اتونست معاهم شويه وسألت امي من عمتي فاطمه ليه شغاله بتبيع كسرة في الشارع الحاصل شنو؟ فجأة حسيتهم كلهم ملامحهم اتغيرت.