رواية مقهي منتصف الليل الفصل الخامس5بقلم حميده عبد الحميد
عاينت ليو ب استغراب وقلت ليو كيف بس؟
يعني كيف اعتبر دا كلو حلم وا احاول اصحى منو.!
معليش بس كلامك دا م بيدخل الراس عديل. نحنا في مقهى. كلو شواطين على هيئة اموات. يعني قصدك انوم ولا كيف لو قصدك انو صراحه انا م بقدر انوم في مكان زي دا.
شال نفس عميق وقال لي انتي اسمك منو؟ قلت ليو سُنن
قال لي بجد م لاقاتني بت غبية زيك ونضامة كدا.
قلت ليو شنو.؟
قال لي سنن لا إله إلا الله محمد رسول الله ي بت الناس افهمي. نحنا. في مكان اشبهه بالحلم. الحاجات القعد تحصل لينا حاليا دي م عندها فرق مع الكوابيس البنشوفها في منامنا ولازم ب اي طريقه تحاولي تنومي وتعتبري دا كلو حلم.
قلت ليو م بقدر
. انا بقول ليك عيوني. ديل مكانهم وين زاتو م عارفه من شدة الخوف. تجي تقول لي انوم
قال لي عنك انا ح ارقد في الأرض دي وانوم. وح اصحى والقى نفسي في بيتنا وفي سريري وانتي اقعدي هنا لمن تنعسي براك وبعدين نومي ظابط
طوالي دموعي جو نازلين وقلت ليو عليك الله م تخليني هنا براي
عاين لي بعدم لا مبالاة وقال. غايتو الله يعينك ي سعد علي الشي المعاك دي
قلت ليو اول شي انا م شي انا اسمي. سُنن قلت ليك. عاين لي بطرف عينو ومشي لي جوا المقهى طوالي لحقتوا
مشينا لبتاع المقهى وكان مشغول مع سوات الحاجات سعد وقف وقال ليو انا عارف اي شي وعارف انو انت جن متحول
طوالي رفع راسو ونظراتو بقت حادة شديد. ٠٠ سعد قال ليو م تخاف انا ما ح اعمل ليك شي ولا انت ح تأذيني وانا متأكد دا شغلك وانت بتبيع هنا ساي. نظراتو طوالي بقت عاديه. همست لي سعد براحه وقلت ليو مجنون انت بتتكلم معاهو لي شنو
سعد واصل كلامو وقال ليو لو دخلت جو المحل حقك دا ح يحصل شنو ٠٠؟
ضحك ضحكة كشفت عن انيابوا وكان منظرهم مقرف ويطمم البطن. وبعدها قال بصوت ضخم. ومصدي
لو دخلتوا هنا. ح تختفوا وح تبقو زيكم وزي الجثث القاعدة هنا دي. طوالي اتلفتنا عليهم. سعد قال ليو موش ديل شواطين متحولين قال ليو اي لكن منهم في بشر وبقو كدا بعد م تم استدراجههم هنا وبعدها عاين لي قوي وقال.
انتي سنن الح يتزوجها صحبي بعد شويه وهو ح يظهر بعد تلاته يوم.
سعد قال ليو شنو؟
بتقصد صحبتها الكانت قاعدة معاها قبل شويه هنا صح؟ وياها زاتها صحبك
ضحك وهو بيكب قهوة في الكبابي وقال اي ٠٠
المقهى ح يختفي بعد تلاته يوم وللابد.وانتو خلاص اتقفلتوا هنا وما عندكم طلعه تاني وبعدها قال بصوت هادئ
تشربو قهوة؟
انا من الزعل والغضب. الكانو مسيطرين على شلت القهوة وكشحتها ليو في وشو ٠٠
سعد قال لي بصوت عالي دا شنو ي هبلة.
قلت لبتاع المقهى وانا غضبانه لسه. تمشي تقول لي صحبك الحيوان داك يختاني والا ٠٠
هنا بتاع المقهى كشف عن شخصيه قبيحه لي نفسو. وفي ثانيه وشو بقى مع وشي وقال لي بصوت متحشرج وقوي والا شنو؟؟؟؟؟
خفت خوف وكنت ح اسيح عديل من الخوف. وقفت ورا سعد وقلت ليو اتصرف. انا ح اموت من الخوف
رفع حاجبوا وقال سبحان الله موش قبل شويه كنتي بتتفاصحي!
وبعدها وجه كلامو لبتاع المقهى وقال ليو معليش انا بعتذر ليك بنيابه عنها هي غبيه شويه وعندها خلل في عقلها وبعدين دا توتر ما قبل العرس هي ح تتزوج صحبك وكدا يعني فطبيعي تكون متوترة
طوالي انفعلت فيهو وقلت ليو سعد احسنليك تحترم نفسك والا ح اقتلكم كلكم هنا
قال لي نملة م بتقدري تقتليها
وبعدها قال لبتاع المقهى ب استهتار م تشتغل بيها ويلا. ح نمشي ونقعد هناك وياريت تجيب لينا قهوة
طوالي رجع لي شخصيتوا الأولى وقال بكل هدوء حاضر
سعد حمر لي وقال ارح
قلت ليو بعناد م ماشه قال لي تمام اقعدي هنا
و طوالي فات
طبعا انا جبانه وخوافه شديد. لحقتوا ع طول
قعدنا في الطاولة وقلت ليو يعني ح نقعد هنا تلاته يوم ضحك وقال تلاته يوم عندهم تلاته ساعة وحاليا مرت ساعة وفضل ساعتين ي عروس
كل لوحات الغضب اترسمت في وشي قلت ليو سعد عليك الله انا م ناقصاك بجد. اموت ولا اعرس شي زي دا
قال لي م هو انا قلت ليك اعتبري دا كلو حلم بس انتي عنيدة ونهاية عنادك ح تتزوجي بعد ساعتين وبقي يضحك
طبعا انا انسانة حساسه شديد وم بستحمل كلام زي دا
ومن دون م أشعر لقيت نفسي ببكي اصلا موت عسجد لسه م طلع مني. فلميتهم كلهم مع بعض.
هنا شخصية سعد اتحولت ٣٦٠ درجة من كان انسان هزلي وم جادي بقي انسان تاني وكلو مشاعر
قال لي بصوت هادئ جدا
سُنن انا اسف وم قصدي ازعلك أو اخليك تبكي. وصح يمكن شايفاني عادي جدا. بس انا برضو من جوا قلبي خايف شويه وخايف عليك اكتر. وانا قعد بعمل كدا عشان م احسسهم بي شي. وبتاع المقهى الكنا بنتكلم معاهو حاليا هو مرتبط بيهم هناك وقعد ينقل ليهم كل حركة نحنا بنتحركها
وانا في كل ثانيه بتمر بفكر في حل يطلعك من هنا قبل م اطلع انا.
قلت ليو بس كدا
عاين لي ب استغراب وقال سبحان الله
انا في شنو وانتي ف شنو
طوالي سكته وقشيت دموعي وقلت ليو طيب خلاص
وصادف داك جا وهو شايل كوبين قهوة ختاهم قدامنا وجرا فيني نور قوي وفات
المكان كان هادئ شديد. وليلى . وفيهو نسمة باردة
سعد قال لي ح نعتبر نفسنا قاعدين في مقهى عادي وجينا نغير جو ونشرب قهوة ونتونس و ح نكون هادئين وتشرب قهوتنا بكل هدوء
قلت ليو م بشرب قهوة عاملها جن
ضحك وقال علفكرة هم م بيقدرو يعملوا قهوة وغالبا سارقها من كافي تاني ودي كلها خِدع بصريه ساي
قلت ليو بجد قال لي اي اي
طوالي رفعت الكبايه وشربت منها شويه وهو برضو شال كبايتو وبدأ يشرب
حرفيا كانت ظابطه شديد
. سعد قال لي بتقري ياتو تخصص؟
قلت ليو لغات قال لي حلو
قلت ليو وانت بتقرا شنو
نزل الكباية في الطربيزة وسرح مسافه وقال
انا قريت لحدي تامن وبعدها خليت المدرسة. لانو كانت وراي التزامات كتيرة امي واخواني الصغار. والحمدلله قدرت. اعيشهم احسن عيشه. وم ندمان على اي شي
قلت ليو ماشاءالله جاهدته في سبيل أهلك ربنا يعينك قال لي امين بعدها واصل كلامو وقال لي
شخصيتك تتشاف شخصية انسانه قويه بس طلع العكس وأقل حاجه بتخليك تبكي.وبقى يضحك
حمرت ليو وقلت ليو اها بدينا
قال لي خلاص سكت سكت
عايزة ارد ليو. شفت حاجه غريبه بدت تحصل طوالي قمت على حيلي وقلبي بدا يضرب
سعد قال لي مالك
قلت ليو عاين وراك
طوالي اتلفت. وقال لي سُنن اوع تخافي انا معاك٠٠