أحمد بصدمة: انتِ عاوزاني أصالحها ولا أطلقها؟!
أمل بضحك: الله يصلح حالك ، اسمع بس مني دي بنتي وأنا عرفاها
أحمد في سره: ربنا يستر
خلاص يا طنط هعمل زي ما قولتِ وربنا يهدي بنتك
أمل: بعد كدا لو قولت ليها حاجة زعلتها تاني أنا اللي هزعل
أحمد: زعلكم غالي عندي مقدرش
أمل: حبيبي ربنا يباركلي فيكم ، يلا في أمان الله
أحمد قفل معاها واستأذن من الشغل وخرج من الشركة
--------------------------
عند ياقوت وتقى في الكلية
تقى بزهق: دا ايه الميد اللي عاوز دكتور يحله مش طالب دا..
ياقوت مكشرة: أنا نفسي أمسك الدكتور دي أعجنها ، هو شغل لما أوصل هصعبها عليكم ولا ايه
تقى بضحك: احنا الستات ليه والله؟!
ياقوت: ما تتصل على البت ملك كدا وقوليلها إننا هنستناها في الكافتيريا
تقى: صحيح فكرتيني أصلا أ.أحمد أخويا جاي؟
ياقوت بإستغراب: ليه فيه حاجة ولا ايه؟
تقى : شكله عك الدنيا مع ملك..بس ليه لا أدري
تقى طلعت الفون من الشنطة وجابت رقم ملك واتصلت فضل يرن شوية لحد ما ملك ردت
تقى: انتِ فين يست انتِ
ملك بتعب: معلش كنت في المحاضرة لسه خارجه حالاً
تقى بصت لياقوت وياقوت بصت ليها بمعنى فيه ايه
تقى: صوتك ماله؟
ملك: انتم فين دلوقت؟
تقى: هنروح الكافتيريا شوية ، تعالي على هناك
ملك: تمام خمس دقايق وأكون عندكم ، سلام
تقى: سلام
ياقوت: هو أخوكِ عكها جامد المرة دي ولا ايه؟
تقى بزهق: شكله كدا ، هو عموماً الحب متعب
ياقوت: طب يلا يختي يلا
اتمشوا لحد ما وصلوا الكافتيريا ولقوا ملك قاعدة وحاطه دماغها بين ايديها
تقى طبطبت عليها: ملك
ملك رفعت عيونها ليهم كانت عيونها حمرا وباين على وشها الأرق
ملك قامت وبإبتسامة بسيطة: وحشتوني عاملين ايه
الإتنين سلموا عليها وقعدوا
ياقوت بصت لـ تقى بمعنى شوفيها
تقى: ملك..مالك يحبيبتي، انتِ تعبانه؟
ملك أول ما سمعت مالك وكإنها كانت منتظرة الكلمة دي انفجرت في العياط ودخلت في حضن تقى
ياقوت بقلق: استهدي بالله بس ايه اللي حصل لكل دا
ملك ولسه بتعيط: أنا مش عاوزة أكمل
تقى بصدمة: للدرجادي الواد أخويا مزعلك؟!
ياقوت: والله يا ملك أحمد غلبان هو بس عصبي شوية
ملك: غلبان والله ما فيه راجل غلبان
تقى في سرها: ولا ست بعيد عنك
ياقوت: طب اهدي وكل حاجة هتتحل..الأمور م بتتاخد كدا مهما حصل بينكم
تقى: خلاص اهدي ولا انتِ استحليتِ حضني ولا ايه
ملك ضحكت وياقوت ابتسمت على طريقة تقى
في نفس الوقت وصل ماسدچ على فون تقى كانت من أحمد
= هي فين دلوقت؟
تقى بعتت ليه: مزعل البت ليه دا أنا هعجنك..احنا في الكافتيريا
=خلاص جاي بس م تقولي ليها
تقى رمت الفون على الترابيزة اللي قدامها وملك طلعت من حضنها
تقى بخبث: قوليلي أخويا الغلبان عمل فيكِ ايه؟
ملك بعصبية مفرطة: دا غلبان دا..دا أنا لو شوفته قدامي مش هسيب فيه حته سليمة.
ورجعت دمعت: تخيل سابني ليلة كاملة زعلانة يا تقى
تقى بصدمة: انتِ عامله في نفسك كدا علشان خناقة وسابك يوم!!
ياقوت بضحك: دراما كوين أقسم بالله
ملك بغضب: انتم أصحابه ولا أصحابي بقولكم زعلني هو ايه دا ، آه لو شوفته قدامي بجد هعجنه
ملك كانت ضهرها للباب
تقى وياقوت بصوا وراها بصدمة..
ملك بصت ليهم: انتم بتبصوا كدا ليه،فاكرين إني هخاف وكدا
تقى شاورت وراها
ملك بصت لقيت أحمد واقف بـ الورد ورافع حاجبه
ملك ببلاهه: ابن حلال كنت لسه بقول عنك كل خير
-------------------------
في بيت عز
عز لسه صاحي من النوم لقى يدوبك اتوضى وصلى لقى الباب بيخبط
عز: اتفضل
أمل: ايه يحبيبي النوم دا كله؟
عز بإبتسامة:معرفش أنا نفسي استغربت بس كنت نايم مرتاح
أمل: ربنا يريح بالك وقلبك يبني ويرزقك باللي تتمناه ياربّ
عز بإبتسامة: هي أمنية واحدة يماما..أمنية واحدة ونفسي ترضى عني
أمل : طب اتلحلح بقى ألا فيروز بتقولي امبارح إنه متقدم ليها عريس
عز بهدوء مخيف: هي مين دي؟
أمل: بقولك فيروز بتقولي يبقى هيكون مين..أحمد جوز أختك يعني؟
عز بإنفعال: ما هو أكيد مش المحروسه بتاعتي
أمل: هي يخويا هي..
عز بثقة: متقلقيش جدو جاي والخير كله هيجي معاه بإذن الله
وكمل أنا عاوز رقم حماتي
أمل: أحبك وانتَ واثق إنها حماتك أوي
عز كان بيلبس
رد بخبث : ما هي لو مش هتبقى حماتي مش هتبقى حماة حد غيري
قال كدا وكان خلص لبس وأخد مفاتيح عربيته وباس دماغها ومشي علطول
أمل بصدمة: الواد دا ناوي يقتل البت ولا ايه؟!!
دخلت البلكونه وبصت عليه بإبتسامة من البلكونه ربنا يهديك يبني ويصلح حالكم ويجمعكم على خير ياربّ
----------------------
نرجع للثنائي العاشق
ملك ببلاهه: ايه مش كنت بقول كل خير ولا ايه
تقى بصت ليها: هتتباس يعني هتتباس
وضحكت هي وياقوت
ملك ضربتها على ايديها: اتلمي أخوكِ واقف
بتبص على أحمد لقيته رافع حاجبه
ياقوت: كانت طيبه ربنا يرحمها
أحمد قرب عليهم ووقف سند على الكرسي بتاعها وبص ليهم
ازيكم يبنات
ياقوت وتقى: بخير الحمد لله
ملك كانت بتدعي ربنا يفضلوا معاها
أحمد غمز ليهم وبص ليها: ازيك يا أستاذة ملك
ملك ببرود: الحمد لله
أحمد بص ليهم: عن إذنكم يا بنات هخطف ملك منكم شوية
ياقوت وتقى ابتسموا وهزوا دماغهم
ملك: يا أندال
وببرود آسفة أنا ورايا محاضرة ومش فاضيه بعد إذنكم وقامت
أحمد قام وراها
كانت ماشيه أحمد مسك ايديها وملك بصت ليه هو أنا مش بنادي عليكِ
ملك: وأنا مش عاوزة أتكلم
أحمد بإنفعال: مش بمزاجك يا ملك ، هنتكلم يعني هنتكلم
ملك بصت ليه بعتاب: ما انت كل حاجة بمزاجك يا أحمد لحد دلوقت ونزلت دمعه منها ولا لا دا أنا نسيت إنك اتسرعت في جوازنا
أحمد قرب عليها: يا ملك انتِ ليه رابطه كل حاجة بجوازنا ، فيه مليون سيناريو ممكن يجي في بالك لكن ليه دايماً رابطه كل كلامي بجوازنا
ملك بعياط: علشان..علشان انت قولت كدا
أحمد قرب يمسح دموعها: حقك على قلبي،والله أنا عمري ما حبيت حد قدك يا ملك
ملك بصت ليه بعيون القطط بتاعتنا دي: أحمد أنا عارفة إنه عز غلطان وغلط كبير بس أنا مش هستحمل اللي حصل في تقى
أحمد بصدمة: هو انتِ كمان فاكرة إني متجوزك علشان كدا؟!
ملك كملت: أنا مقولتش كدا
أحمد بزعل: كلامك بيقول كدا يا ملك
ملك: أنا مش خايفه منك يا أحمد أنا خايفه من الظروف نفسها وأخدت نفس أنا امبارح كلمتك علشان تطمني بس انت ضغطت عليا أكتر
أحمد بحنية: آسف
ملك: وسبتني زعلانة طول الليل
أحمد قرب مسك ايديها: ياااه دا أنا وحش أوي بجد..حقك عليا يا ست البنات
ملك: أنا عيطت طول الليل شايف..شايف عيوني
أحمد بص لعيونها بحب: وأنا معنديش أغلى منهم ونظراتك دي عندي بالدنيا
ورفع ايديه وحاوط دماغها وباس عيونها الإتنين
ملك غمضت عيونها وحسيت بشعور حلو بس افتكرت إنهم في الكلية
ملك بعدت بسرعة وبخجل: أحمد عيب ايه اللي انت عملته دا
أحمد بضحك: كان فيه بوسه قصدي زتونه هموووت عليها
ملك: بطل عييييب
أحمد بص ليها بإبتسامة ومد ليها بوكيه الورد
ملك فرحت لإنه جايب ليها نوعها المفضل من الورد : الله شكله تحفه..ميرسي أوي يا أحمد
أحمد بصدمة: ميرسي يا أحمد!! ، وبسخرية هي حبيبي خارج نطاق التغطية عندك ولا ايه؟
ملك ابتسمت: حبيبي وكل حبايبي كمان
أحمد بحب: يجدع لقد هرمنا والله ، ورجع مسك ايديها خلاص صاف يا لبن
ملك : آخر مرة؟
أحمد قرب باس دماغها: آخر مرة يا ست البنات
ملك بعدت: انت استحليتها ولا ايه..والله عز ينفخك
أحمد : دا انتِ فصيلة..
ملك ضحكت : طب يلا علشان عندي محاضرة واتأخرت عشر دقايق بحالهم
أحمد: نحنا ما عنّا بنات تشتغل بشهادتها..عنّا البنت بتدلّل
ملك بضحك هستيري على صوته: امشي يا أحمد من هنا
أحمد بتنهيدة كلها حب: طيب يستي همشي عاوزة حاجة؟
ملك: عاوزة سلامتك
أحمد بإبتسامة: كدا يبقى تمت المهمة بنجاح الحمد لله ابقي سلميلي عليهم بقى علشان يدوبك أرجع أشوف اللي ورايا وباسها بسرعة من خدها سلام يقلبي
ملك بصدمة: يا قليل الأدب وضحكت على الموقف ومشيت علطول علشان المحاضرة
ياقوت وتقى كانوا دخلوا محاضرتهم وخلصوا ومشيوا
أما ملك دخلت محاضرتها وخلصت على الساعة 5 ومشيت علطول
--------------------------
بالليل في منزل ياقوت
جرس البيت رن
والد ياقوت: اتفضلوا اتفضلوا ،نورتونا
فيروز : البيت منور بيكم يحاج رأفت
فريدة من ورا : أهلا أهلا نورتونا والله
فريدة سلمت على فيروز وحمزة سلم على رأفت ودخلوا
وحمزة واقف كانت عيونه بتدور على ياقوته
رأفت: ياااه لو تركز معانا شوية يا حمزة..حالك هيتحسن صدقني
حمزة ضحك: ازيك يا عمي واحشني والله
فريدة: صدقتني لما قولتلك هياخد غرضه من البيت دا ويخلع..
فيروز: هو كلكم على ابني ولا ايه
كله ضحك ودخلوا الصالون
ياقوت جات: السلام عليكم وسلمت على فيروز بالحضن وجات عند حمزة ابتسمت ليه وهو ابتسم ليها بحب وقعدت بعيد عنه شوية
حمزة فتح فونه ودخل الشات بتاعهم: ايه الحلويات دي
ياقوت فتحت الفون لما شافت إنها منه
ابتسمت وردت: عيونك
ياقوت كانت لابسه دريس بيچ فيه نقشة ورد بسيطة وعليه طرحه بني وهيلز بني
أما حمزة كان لابس قميص بني وبنطلون أسود
فجأة وحمزة بيكلم ياقوت
والد ياقوت: أنا سمعت إنك..
حمزة بص بإستغراب لمامته: أيوة يا عمي والصراحة أنا جاي مخصوص النهاردة علشان الموضوع دا وكمل بهدوء عمي أنا...
ياقوت بذهول: بس دا مكنش اتفاقنا