رواية ماوراء النصيب الفصل التاسع9بقلم دانيا
صلوا على النبي.....
بقت بكره لبعد الظهر لمينا حاجاتنا وسقنا عمتي فاطمه معانا وطلعنا طوالي الخرطوم ،، وصلنا بالليل نزلنا في مطعم اتعشينا وجانا صاحبي مازن جاب لينا مفتاح البيت الوصيتو يأجرو لينا.
الصباح طلعت بدري مشيت لاقيت حاتم المباحث الوكلتو بموضوع مريم قعدت معاهو في إحدى القهاوي قلت ليهو اها عرفت خالتو ساكنه في ياتو حي؟ قال لي الأزهري خلفت رجلي وسندت ظهري على الكرسي وطلعت النظارة وعاينت ليهو وقلت ليهو طيب خالتو دي عندها اولاد؟ قال لي عندها بتين بس وراجلها متقاعد واظنو طريح فراش مابقدر يتحرك زاتو.. قلت ليهو طيب تمام نتحرك عليهم ول عندك شغله ؟قال لي لا ماعندي.
قمنا ركبنا في عربيتي ودورت طوالي من ام درمان الأزهري ،، وصلنا دقينا الباب ووقفنا مسافه حتى جات فتحت لينا بتها سلمنا عليها وسالتها امك موجودة؟ قبل تجاوب الأم جات طالعه قالت ليها يااسماء منو الجاء؟ردت ليها " زولين بسألو منك " جات سلمت علينا وبقت تعاين لينا بإستغراب لأنو اول مره تشوفنا، انا طوالي قلت ليها انا ود عم مريم.
هنا لون وشها انخطف حسيتها اتوترت ماقدرت تتصرف تدخلنا او لا؟ بعد مسافه حتى قالت لينا اتفضلوا ادخلو... بعد دخلتنا الصالون قعدت وهي ما على بعضها كأنها خايفه بتها جات جابت لينا مويه هي رفعت راسها عاينت ليها قالت ليها اعملي شاي ،، قلت ليها لالا مافي داعي جاهزين نحن ما تتعبي نفسك.
قلت ليها بس جينا نسألك من مريم وراجلها وين هم م ساكنين معاكم ولشنو؟ قالت لي لالا يوسف بعد تم العرس ساقها مشى بيها البلد والله...عاينت ليها بإستغراب وقلت ليها البلد؟ طيب مالها قاطعه تواصل، هسي هم قاعدين يتواصلوا معاكي؟قالت لي ااا بكون شبكه مافي البلد هناك شبكتها كعبه قلت ليها بلدكم وين انتوا؟ قالت لي كادوقلي قلت ليها تمام اديني رقم يوسف شلت منها الرقم وطلعنا.
المساء امي قالت لي ياولدي ضربنا لأهل خطيبتك نوادر وقلنا بكره نمشي ليهم حصة تعارف... قلت ليها خير يا امي مافي مشكله انا كان دايركم ترتاحو من تعب السفر كم يوم لكن ما مشكلة البتشوفو مناسب وعمتي ماشه معاكم ؟ قالت لي اجي ياولدي دي شنو معاكم دي انت ماك ماشي معانا ؟قلت لا والله انا عندي سفره مستعجلة بكره قالت لي بسم الله ياولدي سفر شنو متين جينا؟ تقعد تتم عرسك الفضل ليهو كم يوم دا ول بتسافر ؟قلت ليها ماتشيلي هم ياامي كلها يومين تلاته وبجي رتجع العرس قدامو عشرة أيام ،، لكن انتوا م تتقيدو بي اعملوا كل تجهيزاتكم وبكره عمتي لو ما مشت معاكم خلو تمني معاها هنا ماتخلوها براها.
عند مريم:
رفعت صونية الشاي وديتها لأم يوسف وعماتو وخالاتو ختيتها قدامهن وانا بعاين في وجوهن واحد واحد وفي قلبي قلت ليهن إن شاء الله دي آخر مره اشوفكن فيها يا جلادات امهات قلوب قاسيه، ،كبيت ليهن الشاي ومشيت خشيت غرفتي وقفلت الباب وراي ابتسمت إبتسامة عريضه قلت وآخيراً انا الليل دا كنت منتظراهو بفارق الصبر عشان اقدر اهرب من السجن دا والليله دي بالذات لو ما طلعت من هنا تاني الله اعلم اقدر اطلع لأنو الرجال كلهم عندهم مجلس في بيت العمدة ومابجو إلا في وقت متأخر دي فرصتي الوحيده.
طلعت التوب جدعتو في السرير ولبست لي عبايه سوداء وطرحه سوداء وشلت لي حقيبه صغيره فيها حبة قروش سرقتها من جيب يوسف الصباح قبل يطلع... استعديت بس منتظرة الحريم ديل يفرن ينومن ،، لحظات الإنتظار دي بقت لي صعبه خلاص قاعدة على اعصابي قريب نص ساعه سمعت صوت خبيط خفيف على شباك الغرفه للحظه قلبي خفق مشيت فتحتو براحه عاينت برا لقيتها دي نهله "بت عم يوسف أصغر مني بسنتين هي الزوله الوحيده الكانت بتشفق علي من بيناتهم " قالت لي بصوت منخفض ارح ارح اطلعي سريع انا اتفقدت ليكي الشارع برا مافي زول.
من حسن حظي الغرف عندهم منفصله مجدعات في حوشهم الكبير دا بعاد بعاد ،، وغرفتي انا تاني غرفه على الباب طلعت برا وانا بتلفت زي الحرامي وقلبي يضرب من الخوف هي طلعت معاي لحد الباب وقفت وبقيت اعاين ليها اتزكرت وكيف وقت كان يوسف يضربني هي بتجي تقول تحجزو مني لمن بتنضرب معاي وكم مره ساعدتني عشان اهرب لكن ما نجحت لكن الليله جات فرصه عظيمة عشان الرجال مشغولين في بيت العمدة بمشكلة واحد من شبابهم هرب مع بت الجيران.
في اللحظه دي اتمنيت لو اقدر اسوقها معاي حسيت بغصه في قلبي دموعي نزلت حضنتها وبقيت ابكي، ، قالت لي يلا امشي قبل يطلع زول ويشوفك قلت ليها يلا مع السلامه يا صديقتي وطوالي جريت جري من محلي داك ماسكه الشارع وجاريه وم عارفاهو بوصل وين .
لأنو الدنيا ليل مافي ناس في الشارع كتير وكل ما اجي جنب زول بغطي وشي بالطرحه، ، للحظه حسيت بالخوف شديد لكن قويت قلبي وكملت طريقي لأنو اتزكرت الحريه طعم الحريه ألطلعه من المكان دا تستاهل التضحيه والتغلب على الخوف واتزكرت وجه امي انا ضروري اطلع من هنا قطعت نص القريه وانا بين اجري وبين لمن احس بالتعب امشي مشي لمن فجأة سمعت صوت من وراي قال اقيفي هوي..