رواية عاصفة النسور(فريق النسور)
الفصل الحادي عشر11
بقلم جمال المصري
نجلاء .. مش مطلوب منك يا دكتور محمود غير انك تقعد عشر دقايق والاكل هيكون جاهز
محمود .. ابتسم دكتور حلوه دكتور دي
نجلاء .. معلش بقا انا متعوده اغلب شغلي مع الدكاتره وبعدين انا لحد دلوقت معرفش انت بتشتغل ايه
ليلي .. نوجا يلا تعالي حمري اللحمه
نجلاء .. ماشي انا جايه ارتاحوا عشر دقايق بالظبط وكل حاجه تكون جاهزه
محمود .. يا دكتوره نجلاء استني
مصطفي .. اقعد يا فندم ريحة الاكل دخلت جوه نغاشيشى
عبد الرحمن .. اقعد يا فندم عشان لو مشينا مصطفي ممكن ياكولنا احنا
مصطفي .. ينظر إلي عبد الرحمن وهو بيزوم فعلآ لو مسكتش هاكلك
محمود .. بيضحك بس خلاص هنقعد بس عايز شوية هدوء
الكل .. تمام يا فندم
مصطفي .. بيقوم بالراحه وبيتحرك ناحيت المطبخ
عبد الرحمن .. بيقرب منه وبيمسكه من قفاه بتتسحب ورايح فين
مصطفي .. ينظر إليه وهو بياخد نفس جامد ابوس ايدك سيبني الريحه هتجنني يا عبود
عبد الرحمن .. انت همك علي بطنك علي طول يا درش ارجع بدل ما اخدك وننزل
مصطفي .. لا خلاص هقعد اهو وبيقعد وهو بيمشي لسانه علي شفايفه وهو بيفكر في الاكل
نجلاء .. وهي بتحمر اللحمه وتنظر إلي ليلي ما قولتليش يا لولو انتي بتشتغلي مع محمود
ليلي .. بتعبي اطباق الرز اه
نجلاء .. علي حسب ما انا فاكره انتي دخلتي طب بس هو مش دكتور
ليلي .. كلامك صحيح النقيب محمود زميلي في الكتيبه
نجلاء .. بدهشه نقيب وكتيبه انتي بتقولي ايه
ليلي .. ابتسمت انا الملازم اول طبيب ليلي وباخدم في سلاح حرس الحدود
نجلاء .. مش معقول انتي ازاي عملتي كده وزي عمو وطنط وافقوا علي كده
ليلي .. انا حلمي كان اني اخدم بلدي وبعد تفكير طويل اخدت قراري وبابا وماما دعموني في قراري والحمد لله انا سعيده وبحب شغلي اووي وزي ما انتي عارفه انا ما ليش اخوات وزمايلي كلهم قمه في الادب والاحترام والقائد بتاعنا النقيب محمود
نجلاء .. بصراحه ربنا يكون في عونكم ده رخم اووي مش عارفه مراته مستحمله ازاي
ليلي .. ليه بتقولي كده يا نوجا
نجلاء .. من خلال تعاملي معاه تحسي انه شايف نفسه مش فاهمه علي ايه
ليلي .. بتضحك لا انتي بس لسا ما تعرفهوش ويمكن الحادثه لسا ماثره عليه
نجلاء .. تنظر لي ليلي باهتمام حادثة ايه
ليلي .. بتشيل الاطباق يلا دلوقت و هنقعد مع بعض و حكيلك كل حاجه
نجلاء .. يبقا الليله هتباتي معايا فاهمه ومش عايزه اعذار
ليلي .. هكلم ماما واستاذنها
نجلاء .. شطوره وطنط نبيله وحشاني وعايزه اسلم عليها وبطلع اللحمه من الطاسه وبتحطها في طبق
.. الكل يتجمع و بياكله ونجلاء عنيها علي محمود اللي كان بيبصلها من وقت للتاني والشباب نزله علي الاكل وكأنهم ليهم شهر ما اكلوش ..
خالد .. عبد الرحمن ابعد عن مصطفي وانت كمان يا سامح لحسن ياكل ايد حد منكم
سامح .. درش كلم الرقيب خالد بيكلمك
مصطفي .. وهو بياكل لا كلام علي طعام ومش مركز غير في الاكل
نجلاء .. تبتسم فيه ايه يا جماعه سبوه ياكل براحته وبتغرف رز وبتحط قدامه
محمود .. بيبتسم خالي بالك ايدك صغيره لا يفتكرها حتة لحمه
... الكل ضحك اما مصطفي ولا كأنه سامع حاجه ...
عايده .. تسلم ايدك يا بنتي
نجلاء .. انتي ما اكلتيش حاجه يا طنط
عايده .. اكلت علي قد نفسي وبصراحه تسلم ايديكم يا بنات الاكل يجنن
.. وبعد ما اكله وشربه الشاي استاذنه ومحمود قام هو وعايده عشان يمشوا ..
نجلاء .. استني يا طنط كان في كيس معاكي فيه اكل انا حطيته في التلاجه لحظه هجيبه
عايده .. لا يا حبيبتي انا كنت عامله الاكل ده لمحمود والحمد لله اكلنا احلا اكل من ايدك ومش هينفع ارجع بيه تاني
نجلاء .. خلاص هستناكي بكره نتعشا سوا يا طنط اتفقنا
عايده .. ان شاء الله يا بنتي و بتحط ايدها علي كتف نجلاء وبطبطب عليه يلا السلام عليكم
الكل .. وعليكم السلام ورحمة الله وبركاته
ضياء .. واحنا كمان هنستاذن
.. والكل بيمشو وبتفضل نجلاء وليلي بس في الشقه وبيلمه الاكل وبينظفه السفره وبيدخله المطبخ عشان يغسله الموعين ..
نجلاء .. تنظر إلي ليلي قوليلي بقا يا لولو حادثة ايه اللي قولتي عليها
ليلي .. الحادثه دي قبل ما اخدم مع سيادة النقيب الارهابين فجره الشقه بتاعته وكان فيها مراته وبنته
نجلاء .. اتجمدت مكانها انتي بتقولي ايه
ليلي .. ده اللي حصل رحمه مراته وبنته في يوم واحد ده لو جبل ما كنش اتحمل اللي حصل
نجلاء .. لا حول ولا قوه إلا بالله معقول في حد يعمل كده دول مش بني ادمين ده الحيوانات ما تعملش كده
ليلي .. ده اللي حصل
نجلاء .. وعلامة الدهشه علي وشها طاب وطنط عايده سيباه ليه عايش لوحده
ليلي .. عندها شقتها واللي اعرفه هو بيسال عليها وهي كمان من وقت ما رحمه بنتها ماتت وهي بتعامله زي ابنها
نجلاء .. انا كنت فاكرها مامته هو كان بينديها يا ماما
ليلي .. اه من بعد الحادثه وهو معتبرها امه
نجلاء .. بتاخد نفس وبطلعه فعلآ كتر خيره الحادثه فظيعه ربنا ينتقم منهم
ليلي .. يارب با حبيبتي انا هرن علي ماما
نبيله .. قاعده مع نادر جوزها وبيشربه القهوه في البلكونه والتليفون بيرن بتمسك التليفون دي لولو الو
ليلي .. وحشاني يا ست الكل
نبيله .. اضحكي عليا بكلمتين يا بت اتاخرتي ليه
ليلي .. لما تعرفي هتعزوريني خدي في حد عايز يكلمك
نجلاء .. مزتي الاموره عامله ايه
نبيله .. بتسكت شويه وتقوم توقف نوجا انتي فين يا بت والله وحشاني اووي ومامتك وباباكي عاملين ايه
نجلاء .. بابا الله يرحمه يا بلبله وماما الحمد لله بخير وان شاء الله هظبط الامور هنا و هجيبها
نبيله .. الله يرحمه يا بنتي والله وحشاني اووي انتي جيتي القاهره من امتي
نجلاء .. لسا من كام يوم بعد ما مات بابا ما بقلناش حاجه في بني سويف وقرارت اعيش هنا وقدمت طلب واتنقلت وبشتغل في مستشفي هنا
نبيله .. بسم الله ما شاء الله يعني انتي كمان دكتوره زي لولو
نجلاء .. ايوه يا طنط
نبيله .. وزي تقعدي لوحدك وبيتنا موجود يلا هاتي شنطتك وتعالي مع لولو
نجلاء ..بتتمشي في الشقه وهي بتتكلم شكرآ يا طنط انا مرتاحه هنا وكلها شهر بالكتير وهنزل بني سويف اجيب ماما واجي
نبيله .. انتي وحشاني اوي يا نوجا تعالي علي الاقل اقعدي لحد سعاد ما تيجي
نجلاء .. انا هظبط وهاجي اقضي يوم معاكم بس ليا طلب يا بلبله
نبيله .. انتي تومري يا قلب بلبله
نجلاء .. لولو وحشاني خليها تبات معايا النهارده
نبيله .. ما عنديش مانع بس انتي عارفه الكلمه الاولي والاخيره لعمك نادر
نجلاء .. هو جنبك يا طنط
نبيله .. اه يا نوجا خدي اهو معاكي
نادر .. نوجا عامله ايه يا بنتي
نجلاء .. الحمد لله يا عمو انت عمل ايه طمني عنك
نادر .. الحمد لله انا بخير يا بنتي
نجلاء .. بعد اذنك يا عمو ممكن لولو تبات معايا النهارده
نادر .. هو انا عمري ما سمحت ان لولو تبات بره البيت غير في شغلها بس ما قدرش اقولك لا وهستناكي تيجي معاها اتفقنا
نجلاء .. اكيد يا عمي والف شكر لحضرتك مع السلامه
نادر .. سلام وبيقفل السكه يا يا نبيله مش مصدق بعد السنين دي كلها هنشوف نوجا
نبيله .. فعلآ يا نادر دي هي وليلي كانوا اكتر من الاخوات ربنا يسعدهم يارب بس واضح انها لسا متجوزتش ربنا يكرمهم هما الاتنين بي باولاد الحلال
نادر .. يارب يا نبيله عايز افرح بليلي قبل ما اموت
نبيله .. بتحط ايدها علي رجله ربنا يديك الصحه وطول العمر يا ابو ليلي وتفرح بيها وبعيالها كمان
نادر .. بيحط ايده علي ايدها ربنا ما يحرمني منك يا حبيبتي
نجلاء .. بتفتح الدولاب اتفضلي اللبس اي بجامه تعجبك وتعالي ده انتي وحشاني اوي وهنفضل نتكلم للصبح
ليلي .. بس كده وانا معاكي لحد ما تقولي عايزه انام
.. وبيفضله يتكلم لحد الصبح وبعد كده بيناموا وبعد كام يوم العقيد اسامه بيرن علي محمود وبيقوله يجمع الفريق فورآ ويرجع علي الكتيبه عشان فيه مهمه وفعلآ محمود بيجمع الفريق وبيتحركه علي الكتيبه واول ما بيوصله محمود بيدخل للعقيد اسامه و بيديله التحيه
اسامه .. جيت في وقتك يا محمود عشان ساعه بالظبط ولازم تتحرك علي ....