رواية ماوراء النصيب الفصل الحادي عشر11بقلم دانيا

صلوا على النبي.....

اول ما دخلت على القريه مشيت على اقرب بيت شايفه لي مرتين قاعدات قدام بيت قطيه وقدامها شجرة نيم ظليظله قاعدات تحتها وقدامهن في كانون فيهو كفتيرة شاي وجنبو كبايتين شاي .

قربت منهم قلت السلام عليكم عاينن لي بطريقه غريبه ورجعوا عاينو لبعض ورطنو بين بعضهم انا واقفه زي الطيرة ما فاهمه شيء للحظه خفت منهن ،، المرأ الثلاثينيه دي قالت لي واليكم سلام "عربيها مكسر كدا " وبعدها سكتت والإتنين بعاينن فيني بدون ما يتكلمن معاي .. في قلبي قلت قولن لي اتفضلي على الأقل. 

الردت لي قبيل ديك قالت لي داير شنو؟ من نبرة صوتها حسيتها ما حبت جيتي ليهم، ،استغربت قلت دي مالها بتتكلم معاي كدا ؟خفت بقيت ابلع في ريقي الكلام زاتو قلبني ... لمن ما رديت عليها رجعت رطنت مع العجوز وبعدين نادت بصوت عالي "كوال" سمعت صوت من جوا القطيه قال هااا اتلفت بقيت اعاين على مصدر الصوت شوية وطلع شاب من جوا طويل ونحيل وبشرتو سوداء وعيونو حمر زي الجمر لمن عاين لي جسمي كله رجف من الخوف. 

رطنت معاهو واشرت علي انا قلبي عمل شح عرفت إنو في ورطه في محلي داك دنقرت شلت نعلاتي في يدي وفكيت الجريه وقلبي شغال يضرب زي الدلوكه وانا بردد في نفسي "خلاص انتي انتهيتي يامريم".

عند معتز:

ماشي في الطريق من صلاة الصبح للساعه جات 8ص وانا عشان مسافر براي الطريق دا شايفو بقى لي طويل شديد، ، اتصلت لي امي رديت عليها قالت لي ياولدي صحي انت ماشي بلد راجل مريم ؟ قلت ليها ياامي الوراكي منو ؟قالت لي مافي زول وراني سمعت تقى بتتكلم مع ياسمين بالتلفون... قلت ليها ياالله وتقى دي ما بتعرف تقفل خشمها دا ؟ قالت لي تقى خليها انت جد ماشي هناك؟ قلت ليها ااي ياامي ماشي من قلت ليها كدا بقت تجوط تسافر كيف وعرسك فضل ليهو خمسة يوم وانت عارف البلد ديك بعيدة ، وكان تعرس بالأول وبعدين تسافر مريم ملحوقه،  وهسي اهل البت يقولو عليك شنو ،، ماادتني فرصه اتكلم قلت ليها امي انا بجي ماتيشلي هم شيء انا قلت ليكم اعملوا كل تجهيزاتكم وانا كلها يومين وبجي .

قالت لي والله ياولدي لو وريتني ما كان خليتك هاك دي عمتك فاطمه دايرة تتكلم معاك .. ادتني ليها قلت ليها عمتي فاطمه انا دايرك تروقي بس وما تفكري في اي شيء ولا تشيلي هم الليله المساء بإذن الله بوصل لمريم وبديكي ليها بالتلفون تسلمي عليها كويس !! بقت تبكي قالت لي يكتر خيرك ياولدي والله ما عارفه اكافيك كيف قلت ليها استغفر الله مكافأة شنو دا واجبي يلا انا ح اقفل لأنو سايق قالت لي ربنا يحفك ويستر عليك. 

مريم:

في جريتي ديك كل ما اتلفت بلقى الزول جاري وراي بعد شويه صفر بصوت عالي إلا اشوف اشباهو كتار طلعوا من وين ما عارفه جاريين محصلني، ، من شدة الخوف والجري وقعت في ارضي مالحقت اقوم لقيتهم حصلوني بقيت اصرخ من راسي وفوق. 

مسكوني رجعوني لنفس النسوان القبيل وانا اصرخ واقول ليهم فكوني فكوني ياحيوانات ماشين بي وين؟ ودموعي نازلة مطر واحد فيهم عاين لي بنظرات تخوف بعيونو الحمر ديل وقال لي "البجي قرية كالوقي مابطلع منها " قلبي وقع بقيت اعاين ليهو عرفت من ريحتهم إنهم سكرانين قلت ليهو قصدك شنو؟ فجأة كلهم بقوا يضحكوا ورطنو بين بعضهم ياداب خوفوني زيادة بقيت ابكي قلت ليهم عليك الله خلوني.

ودوني للحريم القبيل من شافني الصغيره فيهن كشرت وشها وقامت على حيلها وقالت لي للود الماسكني كلام بالرطانه مافهمتو شنو لكن اشرت ليهو على القطيه كأنها بتقول دخلوها ... بقيت افرفر زي الطير المزبوح بحاول اتفك منو عشان ما يدخلوني في قلبي قلت هربت من يوسف لكن لقيت الأسواء منو ريحة العرقي فايحه شديد في المكان وناس اشكالهم براها تخوف عرفت إني شكلي جيت بيت سكر او ناس سطاله. 

عند يوسف:

وقف كارو الحصان حقتو وطلع تلفونو من جيبو وفتح الخط قال الوو ااي ياابوي لسه والله ما لقيناها قال ليهو انتوا وين هسي؟ رد نحن في قرية كالوقي ياداب خاشنها كدي لو لقيناها برجع ليك تمام ،، قفل الخط وعاين للجماعه المعاهو وقال ليهم يلا اتفرقوا كل اتنين يمشوا سوى والبلقوها يضربو لي.