رواية ماوراء النصيب الفصل الثاني عشر12بقلم دانيا
صلوا على النبي.....وقت اشرت ليه على القطيه انا عرفت إني في خطر ومامعروف البحصل لي شنو لو دخلوني جوا عاينت للود الماسكني من يدي دا ريحة العرقي فايحه منو تقرف هنا جاتني فكره "السكران نص حيلو بكون ميت يعني انا لو شديت حيلي بقدر اسبقهم في الجري'" عضيتو في يدو ودفرتو لمن وقع وهربت منهم والنسوان يكوركن ويأشرن للشباب علي نظام اجرو امسكوها ،، اتلفت عليهم لقيتهم جارين وراي زدت في السرعه وبقيت اصرخ ياناس ساعدوني ياناس فجأة اشوف حريم ورجال طالعين من بيوتهم بعاينو فيني وقفوني مرا وراجل طلعو من البيت القدامي قالوا لي مالك مالك يا بت في شنو؟.
وقفت وانا نفس ما قادره اتنفس اتلفت وراء واشرت ليهم على الأولاد والمرا الجارين وراي ،، الراجل طوالي جاء وقف قدامي وقت قربو لينا مشى عليهم قال ليهم خير دايرين منها شنو؟ المرأ قالت ليهو انت مالك ؟ قال ليها هوي يا اكور خلي امورك البتسوي فيها دي انتي وجماعتك مشاكلكم كترت في الحي دا الزمن كله سكر ومشاكل والله إلا نطلعوكم من الحي دا امشو من هنا يلا.
عاين لي وانا واقفه وراهو ارجف قال لي ما تخافي ديل سكارى ساي انتي بت منو وديل مالهم معاكي؟قبل ارد ليهو الجنوبه رطنت مع ناساها وبقت تجوط مع الراجل شويه وناس الحله اتلمو عليهم وقامت مشكله كبيره بينهم بقوا يتضاربو ،، وانا واقفه في النص راسي جايط قلت دي شنو المصايب دي انا ما جيت للمشاكل ياخ.
فجأة من بين الناس سمعت صوت زول قال مريم بصوت عالي لمن اتخلعت اتلفت على مصدر الصوت إذا به "يوسف" حيلي كلو مات من الخلعه بقيت اشوفو طشاش وهو بعاين لي بنظرات كلها غضب.
الناس الكانو بتشاكلو وقفوا بقوا يعاينو ليهو الزول القبيل داك جاء وقف جنبو وسألو بإستغراب "بتعرفها؟" يوسف عاين ليهو بغضب وقال ليهو دي مرتي... مسكني من يدي وقال لي ورح حسابك بعدين، ،بقيت احاول اتفك منو واصرخ للناس الساعدوني قلت ليهم الزول دا انا ما بعرفو مابعرفو انقذوني منو في واحد منهم قال دي مجنونه ولشنو سيبونا منها ياخ شفو شغلكم وطوالي اتفرقوا .
ساقني من يدي ماشي بي ووشو ما بتفسر من الغضب قال لي انتي يا بت ما بتتوبي؟ لكن انتي ما غلطانه غلطان البخلي ليكي رجلين تقدري تجري بيهن، ، انا حسيت الدم جمد في عروقي في اللحظه دي لأني عارفاهو يوسف يمكن يعمل اي حاجه ماعندو تعطيل يكسر لي رجليني ... الزول الجاء معاهو قال ليهو اهدأ يايوسف ماجابت ليها كسير رجلين انت بس شدد عليها المراغبه وماتخليها تقرب من الباب زاتو ،، رد عليهو لا يا خضر دي تستاهل الضبح من قال كدا اتخيلت السكين في رقبتي بقيت ابكي واصرخ خليني امشي لأهلي يازول انت داير مني شنو؟ بتستفيد شنو لو قتلتني؟ طاااخ ضربني كف بقفى يدو وقال لي بنبرة غضب صوتك دا ماداير اسمعو فاهمه.
عند تقى:
وصلنا بيت ناس نوادر استقبلونا وقعدنا مع امها واختها وشويه جات هي طالعه من غرفتها سلمت علينا وقعدت ماشاء الله تبارك الله البت جميله عسل عديل كدا قعدت تتونس معانا واختها مشت جابت المويه والعصير هن بتين وامهن وابوهن نوادر الكبيرة ونسيم الصغيرة عائلة ما شاء الله ظريفين ووشوشهم بشوشه، ، الأم بقت تحكي لأمي وعمتي عن حالهم وإنو بعد عرسها طوالي سافرو السعودية وبناتها ولدتهم هناك وحياتهم كلها هناك بس جو لعرس نوادر وراجعين طوالي .
ونوادر قعدت معانا انا وتمني واختها قلت ليها اها احكي لينا اتعرفتي على معتز وين ؟ ابتسمت وقالت لي هو شغال مع ابوي يعني اتعرفت عليهو في مكان شغل بابا .
عند مريم:
اول ما وصلنا بيت ناس يوسف قلبي كان بدق بسرعه لأني متوقعه ح القى كل انواع السوء بعد رجعتي للسجن دا ... يوسف نزل من الكارو وعاين لي جراني من يدي جيت واقعه على وشي قال ما تنزلي راجيه شنو ؟ اكفيت على وشي لمن خشمي نزف دنقر رفعني وقال لي تعالي انتي شفتي حاجه؟ الراجيك لسه كتير .
دخلني الحوش اتفاجأ بمجموعه من الناس "حريم ورجال " واقفين منتظرين جيتي اول ما شافوني كل زول بشتم براهو وانا بعاين ليهم بخوف شلت الشهاده كم مره ،، يوسف دخلني الغرفه رب رزعني في السرير وكان شايل الصوت حق الحصان في يدو ويهرج بكل انواع الشتائم ماخلى شيء ،، قمت من السرير وانا بزحف زحف حركة وراء وقفت في الركن جنب الحيطه ودموعي نازلة رفعت يدي على وشي وشغاله ليهو لا يوسف لا عليك الله ماتدقني وهو بكل حقد الدنيا رفع الصوت فوق ونزلو فيني الضربه حسيت بيها في قلبي جوا وانا بصرخ وكل ما ليهو بزيد في الضرب لمن وقعت مغمى علي.
عند معتز:
وصلتي الوصلت العشاء اذن وقفت العربيه جنب احد الجوامع خشيت صليت وطلعت السوق كان عامر بالناس وقفت محتار لوهله اسأل منو؟ مشيت على دكان كدا اشتريت منو مويه وسألت سيدو لو سمحت بتعرف يوسف جمعه حماد ؟قال لي بالحيل بعرفو انت ضيف في البلد دي؟ قلت ليهو ااي ضيف ياداب وصلت انا صاحبو من الخرطوم جايهو زيارة وضربت ليهو هسي عشان يلاقيني رقمو قافل.. قال لي محلوله اقيف هنا طلع برا نادى ياود ياعزو رد عليهو نعم ياابوي تعال وصل الضيف دا بيت عمك جمعه.
شكرت الزول وسقت الولد ومشيت ركبنا العربيه وبقى يوصف لي في الطريق كم دقيقه كدا وصلنا..