رواية امانة الغائب الفصل الحادي عشر11بقلم جمانه السعيد
امل.....رجع الوسيط الي جاب خبر حمل هبه علينا
وجايب تنازل جديد من اهلها يكولون ميخالف ترجع تكعد بيت اهله بس بشرط واحد
يسويلها درج خارجي
شكد متندمه هبه لان خربت علاقتها بفيصل بسرعه
ااكيد لمن اشتكت على فيصل وعمي هذا كان اقتراح من امها الذكيه
كاللتلها تعاي نشتكي عليهم ونجرجرهم بلمركز
حتى يحرم يمد ايده عليج بعد
ماتعرف هيه بهذا التصرف هدت المعبد على رأس بتها
كانت متوقعه اذا اشتكت عليهم راح يرحون يتوسلون
بيها تتنازل وتكعد تتشرط عليهم
تريد بيت وحدها وتريده بعيد عن أهله وتريده يجي يعتذر
بس رد فيصل عليهم فاجئهم
لمن كال الاخوها اني بعد مااريدها
واريد اطلكها هبه توقعت فيصل هلكد ما يحبها راح ينفذ
كل طلباتها مثل اول مره من خطبها وكعدت تتشرط
وجبر اهله ينفذون طلباتها
لمن دزو على فيصل ااكثر من مره وهو ماقبل يرجعها
بدو يتنازلون عن هاي الطلبات
بعد ماكانت مصممه تطلع بيت وحدها قبلت ترجع ويانا بنفس البيت
بدت تتصل علي ودزله رسائل بلكت كلبه يحن عليها وترجع
لان هيه متاكده لو تفتر العالم كله ما تلكه مثل فيصل
اما قصة حملها راح نكتشف حقيقتها
عمي...روح البيتهم واكعد كبالهم واشرط عليهم
ترجع بس مايدخلون بحياتكم
وكلهم هذا اخر انذار الها
فعلا راح عليهم فيصل وكللهم اني جاي احجي بموضوع رجعت هبه وعندي شروط حتى ترجع
طبعا ابوها لا يحل ولايربط الحجي كله الامها
حتى اخوانها مابيهم خير ولا عدهم كلمه
طلعت علي هبه كاشخه على اخر حبايه بلكت يشوفها
ويرجعها للبيت
محد طلع علي غير هبه
فيصل...اريد احجي ويا ابوج
هبه ...ابوي طالع
فيصل....واحد من اخوانج
هبه...معزومين
فيصل...امج
هبه.....امي مريضه
فيصل....بس اني اريد احجي ويا واحد منهم
اني عندي شروط حتى ترجعين للبيت
( طبعا كلهم موجودين بس مايريدون فيصل يكعد يتشرط عليهم لان ما ناوين يعوفوها بحالها لازم يدخلون بحياتها
ماطلعو علي حتى لا ياخذ عليهم كلام )
هبه...واني قابله بكل شروطك بس اريد درج خارجي
حتى بيتنا ينفصل عن بيت عمي
فيصل.....اسمعي شروطي قبل لا تكولين حاضر
هبه...اعرفهن وقابله بيهن
فيصل...ماكو نوم للضهر تكعدين الصبح حتى تحضرين الريوك وتنظيف البيت وتغسلين ملابسي وتحضرؤن الغده
انتي مو تردين بيت وحدج
الي تريد تعيش بيت وحدها تتحمل المسؤليه
هبه...حاضر يله خل نرجع البيتنا انت ماشتاقيتلي
اني اشتاقيتلك
فيصل....واهلج مااريد اشوف واحد بيهم يوصل البيتي
اني كل فتره اجيبج تشوفينهم وتبقين يمهم ليله ويوم كامل
وترجعين
هبه....موافقه
فيصل.... ماكو تليفونات ليل نهار وتقرير عن الحاله
كل شويه
هبه.... حاضر يله خل نرجع البيتنا
فيصل....هيج ترجعين وياي بدون علم اهلج
هبه...لا شلون بدون علمهم يعرفون هما كالو اذا اجا فيصل ارجعي وياا
فيصل....راح اتصل على ابوج
هبه...ماكو داعي بس اجيب جنطة ملابسي واجي
جمانه السعيدي
امل....رجع فيصل هو وهبه كبل صعدت فوك لا سلمت علينا ولا اعتذرت من عمي لان اتهمته تهمه باطله
فيصل بقى جوه وحجا العمي كلشي صار ويااا
عمي....لازم تحجي ويا ابوها
فيصل...اني شكيت ابوها واخوانها موجودين
بس مايريدون يواجهوني
عمي...شويه صير شديد وياها لا تخليها تلعب بكيفها
اسبوع كامل احنا ماشايفين وجها
ابد ماتنزل جوه تطبخ وتنظف حتى ما تقبل فيصل ينزل يمنا بس ينزل توكف على الدرج وتصيح علي
بعدها فيصل خلا درج خارجي وقفل باب البيتونه
وصار يجينا من الباب الخارجي
امل...اني من انظف البيت امسح الدرج وياي كل يوم
لان هبه مالها شغل بي ابد بعد الباب الي تنزل منه انقفل
الساعه عشره طفت الكهرباء عمتي اخذت الجهال تشتريلهم وجيب معجون للجدر واني صعدت امسح الدرج وبعدين امسح الهول
تعرفون اذا طفت الكهرباء يصير البيت هدوء
جان اسمع هبه تحجي ويا امها
الكلمه الي اجت بااذاني كبل
هبه.....شلون ويا سالفة الحمل خاف مااحبل هذا الشهر
وفيصل يعرف الحقيقه
اعتقد امها كاللتلها تستمر بالعلاقه ويا فيصل كل يوم حتى تحبل وما تطلع جذابه
لان سمعت هبه تكول واذا ماحبلت شلون
اذا يعرف اني جذبت علي يتخبل اصلا هو متغير مو مثل قبل ويحاسبني على الزغيره والجبيره
مطلع عيني من رجعت لليوم
معاملته وياي متغيره حيل
بعدين سمعت هبه تكول
...اي شنو الخطه البديله الضاهر امها جاي تحضرلها خطه بديله تخلص بيها من سالفة الحمل
امل...نزلت على كيف مااريدها تعرف اني سمعت كلامها
بس خطيه فيصل ذني عصابه
يخططن ويسون كوارث
قررت اسكت مالي شغل اني ماريد مشاكل
ولو فيصل خطيه بس مالي شغل مادام كامت اجر عدل
بلكت صدك تحبل
اذا صار عدها طفل اكيد تتغير وصير مسؤله
بس امها شلون حياله وما تقبل تعوفها
يلعبن على فيصل ثنيينهن
المهم بعدها بيوم واحد
كاعدين نتغدا وجان يرن تليفون عمي
رقم غريب
عمي...اللو ..
....ابو يحيى
عمي...اي تفضل اني ابو يحيى انت منو
...اني ضابط ويا يحيى بنفس الوحده العسكريه
عمي.....وين يحيى ليش انت تحجي وياي
....عمي اريد ابلغك خبر واتمنى منك تشد حيلك
عمي...هااا بحيى تصوب احجي
امل...من سمعت يحيى تصوب وكعت الخاشوكه من ايدي
عمي....لا
نزل عمي التليفون ونزلن ويا دموعه
امل...عمي يحيى تصوب احجي
رفع ايده ومسح دموعه
قريت الحزن بعيونه اول مره اشوف عمي يبجي
خالتي...يمه وليدي خاف مات
هز راسه عمي بحزن ودموعه تجري
امل...عطت بصوت عالي مات يحيى مات
كول غيرها
خالتي...يمه يحيى ولك يحيى يمه هديت حيلي
امل..كمت اوكف وارجع اكعد مااعرف اتصرف ولا اتمالك نفسي احساسي اتخربط
جهالي ثنيبنهم خافو
جمانه السعيدي
خالتي كامت تعيط بصوت عالي
عمي نزع الجفيه وخلاها على عيونه
على صوت عياط خالتي اجا فيصل يركض من الباب
لان سمع صوت خالتي تعيط
امل..بدون وعي لاكيته
. فيصل عمي يكول يحيى مات
فيصل...شنو مات يحيى مايموت
عمي يبجي وخالتي ملخت نفسها واني ارجف من راسي الرجليه
مااعرف شلون اتصرف ساعه اشيل جهالي ساعه انزلهم
دموعي تجري صرت مثل المخبله
اروح ارجع اريد اشرد من فكرة موت يحيى
بس صوت عياط خالتي يااكدلي يحيى مات
كعدت بلركن وخليت جهالي بحضني وكمت ابجي
امل.. كمت اصيح بصوت عالي وابجي .يحيى يحيى جهالك المن عفتهم
اني كلشي مااعرف غير انت ابوهم شلون تعوفهم
جهالي بحضني ويبجون ثنيبنهم
خايفين مايعرفون شصار
امل...يحيى تدري بروحك تموت ليش رحت
انت كلت اني يمكن مارجع ليش رحت هيج الموت
ياخذك من جهالك
المن عفتنا يحيى ليش يتمت علاوي وزهراء
بعدهم زغار ماشبعو منك
ليش رحت وانت تدري الموت منتظرك
ضليت تكول امل سباعيه وتكدر تشيل المسؤليه
ارجع ماكدر اشيل هاي المسؤليه
ارجع الخاطر عمي وخالتي اذا جهالك مو عزيزين عليك
امل....ليش عفتنا ارجع الخاطر الله ارجع
فيصل اخذ تليفون عمي ورجع اتصل على صاحب الرقم
يسئل على يحيى ما مصدك اخو مات
خالتي ملخت وجها وشكت ثوبها
عمي مغطي وجها ويبجي
فيصل ...يحجي ويا الولد ودموعه تجري
معقوله بعد مراح نشوف يحيى كلشي خلص الحد هنا
عائله كلها ادمرت لان يحيى مات
مات الولد مات السند مات العزيز الهيبه
جمانه السعيدي
بقيت كاعده بمكاني حاضنه جهالي وابجي
الجيران كلهم اجو بيتنا النسوان والزلم تبجي على حالنا
البيت صار هوسه
طلعوعمي وفيصل وكم واحد من الجيران راحو يستلمون الجثه من المستشفى
واحنا بقينا بلبيت حالنا يبجي الكافر
فاتحه ٣ ايام واني انام واكعد احجي بس بي
مامصدكه بعد مايرجع
ولا يدخل للبيت ولا يحضن جهاله ولا يتعارك وياي
اني قابله بكلشي كلشي بس يرجع علينا
خل يرجع واني بعد مااحجي ولا اتعارك ويااا
اذا رجع هلمره مااخلي يروح
لان اني وجهاله نضيع بدونه
جمانه السعيدي
خلصت الفاتحه والبيت خالي عكب عينه
جنا نحسب يمتى ينزل اجازه ونحضرله ااكل
ونظم السوالف لمن يجي حتى نحجيهن اله
واذا عدنا شغله مهمه ننتظره وناخذ رائيه يله نسويها
بعد ننتظر منو ومنو الي راح يخابر يسئل على علاوي وزهراء
عمي حالته الصحيه تعبانه حيل الضغط مايقبل ينزل
وخالتي ماتكدر تكوم من الفراش
مريضه وكل وكتها تبجي
واني يتيمه ابو والنوب يحيى عافني
يصير البنيه تتيتم مرتين
اني اليوم اتيتمت مرتين طول عمري ماعندي حظ
الي ماعدها حظ كوه تصير حالها حال الناس
شلون بيه وجهالي شلون بيهم
قبل جنت واكفه بسد يحيى
مثل وحده واكفه بسد جبل ماتهتم الاي شي
هسه صرت خايفه وضايعه
مااعرف شنو مصيري ومصير جهالي
بيتنا صار موحش وكئيب محد يقبل ياكل
ولا واحد اله خلك الاي شي
اسوي اكل بس الجهال ياكلون
عمي وخالتي مايقبلون ياكلون
خالتي عايشه على المهدئات تكعد تبجي وبعدين تبلع حبايه وتنام
وعمي مخلي الجهال بحضنه ويبجي
فيصل النهار كله كاعد يمنا يخاف على عمي وخالتي
يحيى يعرف اشصار بينا بعد عينه
معقوله مايحبنا وضحى بنفسه هيج وعافنا
الايام صعبه وطويله ومالها اي طعم
اما هبه مالها شغل بينا ابد وماتنزل تسئل عنا
حتى بلفاتحه نزلت اول يوم وبعد ماشفنا ها ابد
نسوان الجوارين كاعدات عدنا كعده وكل شويه يجن يسئلن عن خالتي لان يشوفنها مريضه
وهيه مالها شغل بينا ولا تدخل بيتنا
صدك اذا ازوجت دور بت الأصل
وهبه ماتعرف ريحة الأصل
بس يجي فيصل يمنا
تليفونه مايسكت تبقى ترن يباوع ومايرد
تبقى تتصل علي ماتريده ينزل يمنا
حتى واحنا بهاي المصيبه لا تنزل يمنا ولا تقبل فيصل ينزل يمنا
خطيه فيصل عبالك كبر الف سنه
شعره صار ابيض من كد القهر على يحيى
فات شهر كامل على استشهاد يحيى
انشغال فيصل الصبح بلشغل وباقي النهار يمنا
وتاكدها ماكو اي حمل لان لازم هيه هسه بلشهر الثالث
مخلصه الشهر الثالث وراح تدخل بلرابع اذا حامل صدك
خافت تنكشف جذبتها
بدت تنفذ الخطه البديله
راحت بيت اهلها
واتصلت علي تبجي
فيصل....شكو ليش تبجين
هبه...اني عندي وجع من البارحه بس ماحبيت اشغل بالك
هسه من وصلت بيت اهلي
صار عندي اسقاط
فيصل.....لا تحجين صدك
هبه...طبعا احجي صدك امي اخذتني للمستشفى
نظفوني وهسه رجعت
فيصل...ليش ما اتصلتي عليه اروح وياج
هبه....اهلي ما قصرو بعدين انت بيا حال
اني مااريد اتعبك وياي
راح ابقى بيت اهلي يومين لمن اصير زينه وارجع
فيصل...تردين اجيج هسه اخذج دكتوره اختصاص
هبه...ماكو داعي صرت زينه
سد التليفون عمي سئله
عمي...شكووو
فيصل...هبه سقطت الطفل
عمي...لا ياربي دخيلك المصايب من تجي كلها سوه
بويه فيصل روح المرتك خاف تأخذها للدكتوره
واخذلها وياك فواكه
فيصل...اي خل اصعد ابدل واروح الها
امل...كلت بكلبي ولله نصابات يلعبن على الحبلين
راحت بيت اهلها وكالت صار عندي اسقاط
الله يعينك يافيصل على هاي البلوه